ជំនាញ - La Reine Media

យន្តហោះអវកាសដ៏អាថ៌កំបាំងរបស់ចិន បង្ហោះវត្ថុ «សម្ងាត់» ទៅក្នុងគន្លងគោចរ

យោងតាមមជ្ឈមណ្ឌលស្រាវជ្រាវអន្តរជាតិ និងយុទ្ធសាស្ត្រនៅសហរដ្ឋអាម៉េរិក យន្តហោះអវកាសប្រើប្រាស់ឡើងវិញរបស់ប្រទេសចិន បានបង្ហោះវត្ថុមួយចូលទៅក្នុងគន្លងគោចរកាលពីខែតុលា ឆ្នាំ 2022។

ក្រោយរយៈពេល 9 ខែនៅលើគន្លងគោចរ យន្តហោះអវកាសដ៏អាថ៌កំបាំងរបស់ប្រទេសចិនក៏បានចុះចត ជួយឱ្យប្រទេសនេះក្លាយជាមួយក្នុងចំណោមប្រទេសដ៏តិចតួចដែលបានបាញ់បង្ហោះ និងបញ្ជាឱ្យចុះចតដោយជោគជ័យនូវយន្តហោះអវកាសដែលអាចប្រើប្រាស់ឡើងវិញ។ យន្តហោះអវកាសនេះបានត្រលប់មកកាន់ផែនដីវិញកាលពីព្រឹកថ្ងៃទី 08 ឧសភា 2023 បន្ទាប់ពីស្ថិតនៅលើគន្លងគោចរអស់រយៈពេល 276 ថ្ងៃ យូរជាង 100 ដង ធៀបនឹងជើងហោះហើរដំបូងកាលពីជិត 3 ឆ្នាំមុន។

ក៏ប៉ុន្តែ រដ្ឋាភិបាលចិនមិនបានប្រកាសព័ត៌មានច្រើនទាក់ទងនឹងយន្តហោះអវកាសនេះទេ។ នេះបើតាម Live Science ចុះផ្សាយកាលពីថ្ងៃទី 20 ឧសភា។

Kevin Pollpeter អ្នកវិទ្យាសាស្ត្រប្រចាំមជ្ឈមណ្ឌលវិភាគផ្នែកទ័ពជើងទឹករបស់សហរដ្ឋអាម៉េរិក ឱ្យដឹងថា យន្តហោះអវកាសរបស់អាម៉េរិក Boeing X-37B ដែលបានបង្ហាញខ្លួនកាលពីឆ្នាំ 2010 អាចជាកត្តាជំរុញឱ្យរដ្ឋាភិបាលចិនអភិវឌ្ឍយន្តហោះអវកាសផ្ទាល់ខ្លួន។

ដូចទៅនឹង Boeing X-37B យន្តហោះអវកាសរបស់ចិនទំនងជាមិនមានមនុស្សបើកបរ និងតូច។ វាប្រហែលជាបានហោះហើរលើកដំបូងកាលពីខែកញ្ញា 2020 និងចុះចតវិញក្រោយការហោះហើរបាន 2 ថ្ងៃ។ បេសកកម្មថ្មីបំផុតរបស់យន្តហោះអវកាសចិន ចាប់ផ្ដើមពីខែសីហា 2022 ដែលហោះឡើងដោយសាររ៉ុក្កែត Long March 2F។ នេះបើតាមរបាយការណ៍របស់មជ្ឈមណ្ឌលស្រាវជ្រាវអន្តរជាតិ និងយុទ្ធសាស្ត្រ (CSIS) នៅសហរដ្ឋអាម៉េរិក។ គោលដៅពិតប្រាកដរបស់បេសកកម្មនេះនៅតែជារឿងអាថ៌កំបាំង។

CSIS បានឱ្យដឹងថា យន្តហោះអវកាសចិន បានទម្លាក់វត្ថុមួយទៅក្នុងគន្លងគោចរកាលពីខែតុលា 2022។ វត្ថុនេះទំនងជាបានបាត់ខ្លួនកាលពីខែមករា 2023 ហើយក្រោយមកក៏បានបង្ហាញខ្លួនជាថ្មីនៅលើរ៉ាដាកាលពីខែមីនា 2023។ ក្រុមអ្នកជំនាញយល់ថា ប្រការនេះអាចបង្ហាញថា យន្តហោះអវកាសចិនមានសមត្ថភាពបំផ្លាស់ទីវត្ថុដោយដៃយន្តរបស់វា៕

May 22, 2023

ចម្លែកណាស់! បុរសនេះពិសាតែភេសជ្ជៈកំប៉ុងជំនួសអាហារ អស់រយៈពេល 17 ឆ្នាំមកហើយ

(ប្រទេសអ៊ីរ៉ង់) – Gholamreza Ardeshiri អាយុ 58 ឆ្នាំ គឺជាបុរសម្នាក់ដែលរស់ដោយសារ Pepsi និង Coca-Cola ក្នុងរយៈពេល 17 ឆ្នាំកន្លងមកហើយ ព្រោះ ឱ្យតែឃើញអាហារគឺគាត់រកកលក្អួត។

រឿងរ៉ាវបានចាប់ផ្ដើមកាលពីយប់មួយក្នុងឆ្នាំ 2006 នៅពេល Ardeshiri ក្រោកពីសម្រាន្តស្រាប់តែមានអ្វីចម្លែកនៅក្នុងមាត់ដែលមិនអាចបំបាត់ចោលបាន។

«ខ្ញុំមានអារម្មណ៍ដូចជាមានសក់នៅក្នុងអណ្ដាត។ ខ្ញុំបានធ្វើគ្រប់យ៉ាង ប៉ុន្តែមិនអាចបំបាត់វាចោល។ ខ្ញុំពិបាកដកដង្ហើម មិនអាចធ្វើអ្វីបាន។ អារម្មណ៍នេះពិតជាផ្ដេសផ្ដាស និងពិបាកពន្យល់» លោក Ardeshiri រម្លឹកអំពីដើមហេតុដែលនាំឱ្យគាត់ឈប់ទទួលទានអាហារ។

គាត់បានទៅពេទ្យស្ទើរគ្រប់ជំនាញ ប៉ុន្តែ បញ្ហានៅតែមិនអាចដោះស្រាយបាន។ ចុងក្រោយ គាត់បានសម្រេចចិត្តបោះបង់ការទទួលទានអាហារ ហើយរស់នៅដោយសារភេសជ្ជៈកំប៉ុង។ លោក Ardeshiri ឱ្យដឹងថា លើកដំបូងដែលគាត់ពិសាភេសជ្ជៈកំប៉ុន គាត់មានអារម្មណ៍ថា មានកម្លាំងភ្លាមៗ ហើយក៏សម្រេចចិត្តពិសាវាជំនួសអាហារ។

គ្រួសាររបស់លោក Ardeshiri បានប្រាប់ថា ពួកគេមិនបរិភោគអាហារនៅចំពោះលោក Ardeshiri ឡើយ ព្រោះថា រាល់ពេលដែលគាត់បានឃើញអាហារ គាត់តែងតែរកកលក្អួត។ ជារៀងរាល់ថ្ងៃ លោក Ardeshiri ពិសាភេសជ្ជៈនេះបីដបធំៗ និងបានអះអាងថា មិនដែលមានអារម្មណ៍ថាឃ្លាននោះទេ។ ចាប់តាំងពីមានទម្លាប់នេះមក គាត់ស្រកទម្ងន់ 32 គីឡូក្រាម ហើយក៏មិនដែលមានបញ្ហាសុខភាពធ្ងន់ធ្ងរអ្វីឡើយ ក្នុងរយៈពេល 17 ឆ្នាំកន្លងទៅ៕

May 19, 2023

រដ្ឋមួយនៅប្រទេសឥណ្ឌា គំរាមបញ្ឈប់ការងារនគរបាលដែលមិនសម្រកជម្ងន់

មេប៉ូលិសនៅរដ្ឋ Assam បានតម្រូវឱ្យមន្ត្រីនគរបាលដែលធាត់ជ្រុល សម្រកជម្ងន់ក្នុងរង្វង់បីខែ បើមិនដូច្នេះទេនឹងត្រូវបណ្ដេញចេញពីការងារ។

GP Singh ស្នងការនគរបាលរដ្ឋ Assam ភាគឦសានប្រទេសឥណ្ឌា កាលពីថ្ងៃទី 15 ឧសភា បានប្រាប់ដល់មន្ត្រីនគរបាលដែលលើសទម្ងន់ថា រង្វាស់សុខភាព BMI របស់ពួកគេនឹងត្រូវបានកត់ត្រាប្រកបដោយជំនាញចាប់ពីពាក់កណ្ដាលខែសីហា។ ក្រុម «លើសទម្ងន់» ត្រូវតែកាត់បន្ថយតួលេខ BMI ឱ្យបានមុនខែវិច្ឆិកា ឆ្នាំ 2023 បើមិនដូច្នេះទេ នឹងត្រូវបណ្ដេញចេញពីការងារ។

«យើងគ្រោងនឹងទុកពេលបីខែឱ្យប៉ូលិសនៅ Assam មុនពេលចាប់ផ្ដើមពិនិត្យ។ គ្រប់គ្នាដែលស្ថិតក្នុងក្រុមធាត់ជ្រុល ដែលមាន BMI 30+ នឹងមានពេលបីខែទៀតដើម្បីសម្រកទម្ងន់» លោក GP Singh ឱ្យដឹងដូច្នេះ។

BMI ត្រូវបានគណនាតាមរូបមន្ត៖ BMI = (ទម្ងន់រាងកាយ) / (កម្ពស់ x កម្ពស់) ក្នុងនោះ ទម្ងន់គិតជាគីឡូក្រាម និងកម្ពស់គិតជាម៉ែត្រ។ រង្វាស់សុខភាព BMI បញ្ជាក់ថា ទម្ងន់ និងកម្ពស់របស់មនុស្សម្នាក់ មានរាងកាយសមសួន និងសុខភាពល្អ ឬអត់។

May 19, 2023

កុមារបួននាក់វង្វេងក្នុងព្រៃអាម៉ាហ្សូនអស់ 17 ថ្ងៃ ប៉ុន្តែសំណាងល្អនៅមានជីវិត

កងកម្លាំងជួយសង្គ្រោះបានរកឃើញកុមារបួននាក់ដែលបានបាត់ខ្លួនអស់រយៈពេល 17 ថ្ងៃ ក្រោយពីជួបគ្រោះថ្នាក់ធ្លាក់យន្តហោះនៅក្នុងព្រៃអាម៉ាហ្សូន ដែលស្ថិតក្នុងប្រទេសកូឡុំប៊ី។

កាលពីថ្ងៃទី 01 ឧសភា យន្តហោះ Cessna 206 មួយគ្រឿង ដឹកមនុស្ស 7 នាក់ បានជួបគ្រោះថ្នាក់នៅពេលធ្វើដំណើរពី Araracuara ទៅកាន់ San Jose del Guaviare ជាទីក្រុងមួយស្ថិតក្នុងតំបន់ព្រៃអាម៉ាហ្សូននៅក្នុងប្រទេសកូឡុំប៊ី។ សាកសពមនុស្សបីនាក់ ក្នុងនោះក៏មានពីឡុត ត្រូវបានរកឃើញនៅកន្លែងកើតហេតុ។

ការស្រាវជ្រាវបានបង្ហាញថា កុមារបួននាក់ដែលមានអាយុ 4, 9, 13 ឆ្នាំ និងទារកអាយុ 11 ខែម្នាក់ ស្ថិតក្នុងសហគមន៍ជនជាតិដើម Huitolo នៅមានជីវិត នៅក្នុងហេតុការណ៍ធ្លាក់យន្តហោះខាងលើ និងបានចូលទៅក្នុងព្រៃដើម្បីស្វែងរកអាហារ និងជំនួយ។ អាជ្ញាធរក្នុងតំបន់ក៏បានបើក «យុទ្ធនាការនៃក្ដីសង្ឃឹម» ដោយបញ្ជូនកម្លាំងទាហានជាង 100 នាក់ និងឧទ្ធម្ភាគចក្របីគ្រឿង រួមនឹងសុនកពិសេស ចូលទៅព្រៃស្វែករកជនរងគ្រោះ។

«នៅក្នុងការប្រឹងប្រែងមិនឈប់ឈរ កងទ័ពបានរកឃើញក្មេងបួននាក់ដែលបានបាត់ខ្លួនក្រោយហេតុការណ៍ធ្លាក់យន្តហោះនៅ Guaviare» ប្រធានាធិបតីកូឡុំប៊ី Gustavo Petro ប្រកាសលើ Twitter កាលពីថ្ងៃទី17 ឧសភាដូច្នេះ ហើយថា ការរកឃើញនេះគឺជា «ភាពរីករាយសម្រាប់ប្រទេសជាតិ»។

តំបន់ដែលក្មេងទាំងបួននាក់បានវង្វេង មិនមានផ្លូវល្បឿនលឿន ហើយក៏ពិបាកទៅដល់តាមរយៈផ្លូវទឹក។ ដើមឈើធំៗ កម្ពស់រហូតដល់ 40 ម៉ែត្រ រួមនឹងសត្វព្រៃ និងភ្លៀងធំក៏ធ្វើឱ្យកម្លាំងសង្គ្រោះជួបការលំបាកខ្លាំង។

មួយក្នុងចំណោមឧទ្ធម្ភាគទាំងបីគ្រឿងបំពាក់ឧបករណ៍បំពងសំឡេង បានធ្វើការស្វែងរកក្នុងរង្វង់ 1,500 ម៉ែត្រ និងបានចាក់ផ្សាយសំឡេងជីដូនរបស់ក្មេងទាំងនោះ ដែលប្រាប់ថា «ឈប់ផ្លាស់ទីក្នុងព្រៃដើម្បីរង់ចាំការជួយសង្គ្រោះ»។

សកម្មភាពស្វែងរកត្រូវបានបន្ថែម បន្ទាប់ពីកម្លាំងសង្គ្រោះបានឃើញកូនខ្ទមមួយ ដែលគេជឿថា គឺជាខ្ទមរបស់ក្មេងទាំងនោះ។ មុននោះ កម្លាំងសង្គ្រោះបានរកឃើញដបទឹកដោះគោសម្រាប់ទារក និងផ្លែឈើសល់ពីការហូប។

ក្មេងរងគ្រោះទាំងបួននាក់នេះត្រូវបានរកឃើញក្នុង «ស្ថានភាពសុខភាពធម្មតា បើទោះមានរបួសស្នាមខ្លះ» ក្រោយពីរង្វេង 17 ថ្ងៃនៅក្នុងព្រៃ។

អាជ្ញាធរមិនទាន់ប្រកាសអំពីមូលហេតុនៃករណីធ្លាក់យន្តហោះនេះនៅឡើយ។ ប៉ុន្តែ ប៉ុន្មាននាទីមុនពេលជួបគ្រោះថ្នាក់ ពីឡុតបានបញ្ជូនសញ្ញាប្រាប់ថា ម៉ាស៊ីនយន្តហោះមានបញ្ហា។ ជនជាតិកូឡុំប៊ី នៅក្នុងតំបន់ខាងលើនេះ តែងតែធ្វើដំណើរតាមឧទ្ធម្ភាគចក្រ ដោយសារតែផ្លូវគោកមិនមានអំណោយផលល្អសម្រាប់ការធ្វើដំណើរ។

យោងតាមអង្គការជនជាតិដើមភាគតិចកូឡុំប៊ី (ONIC) ជីវភាពរបស់ជនជាតិ Huitoto បានសម្របខ្លួននឹងស្ថានភាពលំបាកនៅក្នុងព្រៃអាម៉ាហ្សូន និងថែរក្សាប្រពៃណីបរបាញ់សត្វ ក៏ដូចជាមានជំនាញក្នុងការបេះផ្លែឈើក្នុងព្រៃជាអាហារ៕

May 18, 2023

CAMSOC បង្ហាញទិដ្ឋភាពខ្លះៗនៅមុនពិធីបិទព្រឹត្តិការណ៍ស៊ីហ្គេមលើកទី 32

ដូចទៅនឹងពិធីសម្ពោធចាប់ផ្ដើមព្រឹត្តិការណ៍ប្រកួតកីឡាអាស៊ីអាគ្នេយ៍ (ស៊ីហ្គេម) លើកទី 32 ម្ចាស់ផ្ទះកម្ពុជាមិនបានប្រកាសព័ត៌មានលំអិតស្ដីពីកម្មវិធីដែលត្រូវប្រារព្ធឡើងនោះទេ ប៉ុន្តែ គេសង្ឃឹមថា ព្រឹត្តិការណ៍បិទក៏នឹងអស្ចារ្យមិនចាញ់ព្រឹត្តិការណ៍បើកប៉ុន្មានឡើយ។

នៅល្ងាចថ្ងៃទី 17 ឧសភា ទំព័រផ្លូវការរបស់ គណៈកម្មាធិការជាតិរៀបចំព្រឹត្តិការណ៍ស៊ីហ្គេម (CAMSOC) បានបញ្ចេញរូបភាពមួយចំនួនបង្ហាញអំពីការត្រៀមសម្រាប់ពិធីបិទស៊ីហ្គេមលើកនេះ។ «កាន់តែរួចរាល់ សម្រាប់ពិធីបិទផ្លូវការព្រឹត្តិការណ៍កីឡាអាស៊ីអាគ្នេយ៍ លើកទី 32 ឆ្នាំ 2023 នៅពហុកីឡដ្ឋានជាតិមរតកតេជោ» ទំព័របណ្ដាញសង្គមរបស់ CAMSOC សរសេរដូច្នេះ។

វិញ្ញាសាទាំងឡាយនៅស៊ីហ្គេមត្រូវបានបញ្ចប់កាលពីយប់ថ្ងៃទី 16 ឧសភា។ ថ្ងៃនេះពុំមានការប្រកួតទៀតនោះទេ គឺមានតែកម្មវិធីបិទជាផ្លូវការតែប៉ុណ្ណោះ។ ព្រះអគ្គិជ័យនៅទីលាននៃពហុកីឡដ្ឋានជាតិមរតកតេជោ ក៏នឹងត្រូវបានពន្លត់នៅចុងបញ្ចប់នៃពិធីបិទ បញ្ជាក់ថា រដូវស៊ីហ្គេមលើកទី 32 ត្រូវបានចប់ជាស្ថាពរ។

ពិធីសម្ពោធចាប់ផ្ដើមព្រឹត្តិការណ៍ប្រកួតកីឡាអាស៊ីអាគ្នេយ៍លើកទី 32 កាលពីយប់ថ្ងៃទី 05 ឧសភា ត្រូវបានវាយតម្លៃខ្ពស់ចំពោះភាពសម្បូរបែប និងអស្ចារ្យ ប្រហាក់ប្រហែលនឹង Asiad ដែលជាមហាព្រឹត្តិការណ៍ប្រកួតកីឡានៅទ្វីបអាស៊ី។ ចំណែកពិធីបិទព្រឹត្តិការណ៍ស៊ីហ្គេមលើកនេះក៏ត្រូវបានអ្នកជំនាញយល់ថា នឹងអស្ចារ្យផងដែរ៕

May 17, 2023

វគ្គផ្ដាច់ព្រ័ត្របាល់ទាត់បុរសនៅស៊ីហ្គេម៖ បើសិនឈ្នះ U22 ថៃ នឹងបំណែកកំណត់ត្រារបស់ខ្លួន

ក្រុមបាល់ទាត់បុរសថៃ នឹងបង្កើតបានកំណត់ត្រាថ្មីស្ដីពីការដណ្ដើមបានមេដាយមាសនៅព្រឹត្តិការណ៍ប្រកួតកីឡាអាស៊ីអាគ្នេយ៍ (ស៊ីហ្គេម) បើសិនបានឈ្នះក្នុងវគ្គផ្ដាច់ព្រ័ត្រ។

បើផ្ដួល U22 ឥណ្ឌូណេស៊ីនៅវគ្គផ្ដាច់ព្រ័ត្រនៃវិញ្ញាសាបាល់ទាត់បុរសនៅស៊ីហ្គេមលើកទី 32 នេះបានសម្រេច បាល់ទាត់ថៃនឹងបង្កើតបានកំណត់ត្រាដណ្ដើមបានមេដាយមាស 17 ជំនាន់នៅអាស៊ីអាគ្នេយ៍។ ចំណែក U22 ឥណ្ឌូណេស៊ីវិញ បើសិនជាឈ្នះថៃ ពួកគេក៏នឹងមានមេដាយមាសទីបីដូចទៅនឹងក្រុមបាល់ទាត់វៀតណាម។

បច្ចុប្បន្ន ក្រុមកីឡាករថៃ ត្រូវបានវាយតម្លៃខ្ពស់ជាងក្រុមឥណ្ឌូណេស៊ី សម្រាប់វគ្គចុងក្រោយបង្អស់នេះ។ ក្រៅពីកត្តាប្រវត្តិសាស្ត្រ គុណភាពនៃជំនាញរបស់ក្រុមថៃក៏កំពុងលេចធ្លោជាងឥណ្ឌូណេស៊ី។ ថៃក៏កំពុងសប្បាយចិត្តផងដែរ ព្រោះមិនត្រូវប្រឈមមុខនឹងគូប្រជែង (វៀតណាម) ដែលជាម្ចាស់ជើងឯកបីជំនាន់ជាប់ៗគ្នា។

ចំណែក U22 ឥណ្ឌូណេស៊ីមិនចាញ់ U22 ថៃប៉ុន្មានដែរ បើនិយាយអំពីបទពិសោធន៍។ ប៉ុន្តែឥណ្ឌូណេស៊ីធ្លាប់បានឈ្នះថៃនៅក្នុងវគ្គផ្ដាច់ព្រ័ត្រនៅស៊ីហ្គេមតែម្ដងគត់ នោះគឺនៅស៊ីហ្គេមឆ្នាំ 1991 (ពួកគេស្មើគ្នា 0-0 ប៉ុន្តែ ពេលទាត់ប៉េណាំងទីម្ដងម្នាក់ ឥណ្ឌូណេស៊ីក៏បានឈ្នះ 4-3)។ កន្លងមក ថៃមិនបានចាត់ទុកឥណ្ឌូណេស៊ីថា «ខ្លាំងជាង» ម៉ាឡេស៊ី និងវៀតណាមនោះឡើយ។

ការប្រកួតវគ្គផ្ដាច់ព្រ័ត្រនៃវិញ្ញាសាបាល់ទាត់បុរសរវាង ថៃ និងឥណ្ឌូណេស៊ី នៅស៊ីហ្គេមលើកនេះ នឹងត្រូវធ្វើឡើងនៅម៉ោង 19:30 ព្រលប់ថ្ងៃទី 16 ឧសភា 2023 លើទីលានពហុកីឡដ្ឋានជាតិអូឡាំពិក៕

May 16, 2023

ផលប្រយោជន៍ដែលកម្ពុជាអាចទទួលបានពីស៊ីហ្គេមលើកទី 32

យោងតាមអ្នកជំនាញ កម្ពុជាចំណាយប្រាក់ជាង 100 លានដុល្លារអាម៉េរិក ដើម្បីរៀបចំព្រឹត្តិការណ៍ប្រកួតកីឡាអាស៊ីអាគ្នេយ៍ (ស៊ីហ្គេម) ដោយ «មិនគិតថ្លៃ» ក្នុងបំណងលើកកម្ពស់កិត្តិនាមប្រទេសជាតិ ជំរុញសកម្មភាពវិនិយោគ និងទេសចរណ៍យូរអង្វេង។

កម្ពុជាចំណាយប្រាក់ប្រហែល 118 លានដុល្លារអាម៉េរិកសម្រាប់ស៊ីហ្គេមលើកទី 32 ក្នុងនោះមានប្រហែល 7 លានដុល្លារសម្រាប់ការស្នាក់នៅ ហូបចុករបស់ប្រតិភូកីឡានៃបណ្ដាប្រទេសដែលចូលរួមប្រកួត ព្រមទាំងមិនគិតថ្លៃសម្រាប់ការចូលទស្សនា និងការផ្សាយផ្ទាល់តាមទូរទស្សន៍។ នេះបើតាម សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី 32 (CAMSOC)។

ថ្លែងនៅក្នុងពិធីជួបជុំអ្នកសារព័ត៌មានអន្តរជាតិ នៅឯមជ្ឈមណ្ឌលព័ត៌មានកណ្ដាលនៃស៊ីហ្គេមលើកទី 32 កាលពីព្រលប់ថ្ងៃទី 14 ឧសភា ឯកឧត្តម ថោង ខុន រដ្ឋមន្ត្រីក្រសួងទេសចរណ៍កម្ពុជា និងជាអនុប្រធានអចិន្ត្រៃយ៍របស់ CAMSOC បានអះអាងថា ស៊ីហ្គេមលើកទី 32 គឺជាឱកាសល្អដើម្បីឱ្យកម្ពុជាផ្សព្វផ្សាយអំពីប្រទេសជាតិ ពិសេសគឺទេសចរណ៍ វប្បធម៌ និងទំនាក់ទំនងការបរទេស។

លោក អ៊ុច លាង អនុប្រធាននៃនាយកដ្ឋានសិក្សាអាស៊ី អាហ្វ្រិក និងមជ្ឈិមបូព៌ា នៃវិទ្យាស្ថានទំនាក់ទំនងអន្តរជាតិកម្ពុជា យល់ថា ការសម្រេចចិត្តទទួលរៀបចំព្រឹត្តិការណ៍ស៊ីហ្គេមលើកទី 32 និងគោលនយោបាយមិនគិតថ្លៃ បានរួមចំណែកបង្ហាញអំពីមុខមាត់ កេរ្តិ៍ឈ្មោះ និងការរីកចម្រើនថ្មីរបស់កម្ពុជា។ លោកបញ្ជាក់ថា ប្រការនេះបង្ហាញថា កម្ពុជាមានសមត្ថភាពគ្រប់គ្រាន់ក្នុងការរៀបចំព្រឹត្តិការណ៍ធំជាលក្ខណៈអន្តរជាតិ។

ប្រការនេះគឺផ្ទុយពីឆ្នាំ 2006 ដែលកាលណោះ រាជរដ្ឋាភិបាលកម្ពុជាបានប្រកាសថា កម្ពុជាមិនអាចទទួលធ្វើជាម្ចាស់ផ្ទះស៊ីហ្គេមលើកទី 26 ហើយបានបដិសេធការអញ្ជើញឱ្យធ្វើជាម្ចាស់ផ្ទះសម្រាប់ស៊ីហ្គេមឆ្នាំ 2015។

ឯកឧត្តម ថោង ខុន រដ្ឋមន្ត្រីក្រសួងទេសចរណ៍កម្ពុជា និងជាអនុប្រធានអចិន្ត្រៃយ៍របស់ CAMSOC

មកដល់ឆ្នាំ 2015 ទើប គណៈកម្មាធិការជាតិអូឡាំពិកកម្ពុជា ប្រកាសជាលើកដំបូងស្ដីពីបំណងទទួលរៀបចំព្រឹត្តិការណ៍ស៊ីហ្គេមលើកទី 32។ ចាប់តាំងពីពេលនោះមក កម្ពុជាក៏ចាប់ផ្ដើមត្រៀមខ្លួនសម្រាប់មហាព្រឹត្តិការណ៍នេះ។

ឆ្នាំ 2015 រាជរដ្ឋាភិបាលអនុម័តគម្រោងសាងសង់ពហុកីឡដ្ឋានជាតិមរតកតេជោដែលកាលណោះគ្រោងនឹងត្រូវចំណាយ 200 លានដុល្លារអាម៉េរិក។ គម្រោងនេះបានរួចរាល់ជាស្ថាពរកាលពីខែសីហា 2021 ដោយចំណាយប្រាក់អស់ប្រហែល 160 លានដុល្លារ។

ក្រៅពីការលើកកម្ពស់មុខមាត់ប្រទេសជាតិ ស៊ីហ្គេមលើកទី 32 ក៏នាំមកនូវផលប្រយោជន៍ចំពោះមុខ និងយូរអង្វែងសម្រាប់កម្ពុជាផងដែរ៕

May 15, 2023

ក្រុមហ៊ុននៅអឺរ៉ុប ប្រើ ChatGPT ជំនួសបុគ្គលិក 250 នាក់ នាំឱ្យមានការបារម្ភអំពីអាជីពផ្ទាល់ខ្លួន

ក្រុមហ៊ុនអង់គ្លេស Octopus Energy បានឱ្យដឹងថា កម្មវិធី ChatGPT កំពុងធ្វើការជំនួសបុគ្គលិក 205 នាក់ នៅក្នុងការឆ្លើយតបសារអេឡិចត្រូនិច និងត្រូវបានវាយតម្លៃថា ល្អជាងអ្នកជំនាញដែលទទួលបានការបណ្ដុះបណ្ដាលពេញលេញទៅទៀត។

លោក Greg Jackson ដែលជាអគ្គនាយកប្រតិបត្តិរបស់ក្រុមហ៊ុនថាមពល Octopus Energy នៅប្រទេសអង់គ្លេស បានឱ្យដឹងថា តាំងពីខែធ្នូឆ្នាំកន្លង លោកបានចាប់ផ្ដើមសាកល្បងប្រើប្រាស់កម្មវិធី ChatGPT នៅក្នុងប្រព័ន្ធរបស់ក្រុមហ៊ុន។

យោងតាមលោក Greg ក្រុមហ៊ុន Octopus Energy ទុកឱ្យ AI (បញ្ញាសិប្បនិម្មិត) ឆ្លើយតបអ៊ីមេលពីអតិថិជនក្រោមការតាមដានរបស់ក្រុមអ្នកជំនាញ។ អ៊ីមេលដែល chatbot នេះសរសេរ ទទួលបានការពេញចិត្តពីអតិថិជនរហូតដល់ 80% ខ្ពស់ជាងកម្រិត 65% នៃអ៊ីមេលដែលឆ្លើយតបដោយបុគ្គលិកមានឯកទេសទៅទៀត។

ក្រោយពីបានធ្វើតេស្តរួចរាល់ ចាប់ពីដើមខែនេះ ក្រុមហ៊ុន Octopus Energy សម្រេចចិត្តប្រើប្រាស់ AI នៅក្នុងការឆ្លើយតបសារអេឡិចត្រូនិចចំនួន 34% ក្នុងចំណោមអ៊ីមេលសរុបដែលក្រុមហ៊ុននេះបានទទួលពីអតិថិជន។

កាលពីមិនទាន់មាន ChatGPT ក្រុមហ៊ុនខាងលើត្រូវការបុគ្គលិក 250 នាក់ ដើម្បីបំពេញការងារឆ្លើយតបសាររបស់អតិថិជន។ «ដោយសារ AI សេវាបម្រើអតិថិជនត្រូវបានកែសម្រួល ការឆ្លើយតបតាមទូរស័ព្ទក៏ថយចុះ ខណៈភាពពេញចិត្តរបស់អតិថិជនក៏កើនឡើង» លោក Greg បញ្ជាក់ដូច្នេះ។

លោក Greg Jackson អគ្គនាយកប្រតិបត្តិរបស់ក្រុមហ៊ុនថាមពល Octopus Energy នៅប្រទេសអង់គ្លេស

ChatGPT (Chat Generative Pre-Training Transformer) គឺជាកម្មវិធី chatbot មួយដែលអភិវឌ្ឍឡើងដោយក្រុមហ៊ុន OpenAI។ កម្មវិធី AI នេះ ប្រើប្រាស់ «ឃ្លាំង» ចំណេះដឹងដែលវា «រៀនសូត្រ» បានពីគ្រប់ទិសទី។ វាអាចឆ្លើយនឹងសំណួរគ្រប់យ៉ាងដែលអ្នកប្រើប្រាស់ចង់ដឹង។ ChatGPT ថែមទាំងអាចនិពន្ធកំណាព្យ សរសេរបទចម្រៀង សរសេរសំបុត្រ ឬឌីហ្សាញជាដើម។ល។

ទោះជាយ៉ាងណាក៏ដោយ យោងតាមលោក Greg និងអ្នកជំនាញនានា ប្រការខាងលើនេះគឺស្មើនឹងការបញ្ឈប់ការងារបុគ្គលិកទ្រង់ទ្រាយធំ និងកើតឡើងឆាប់រហ័សជាងធម្មតា។ បញ្ហានេះកំពុងតែនាំឱ្យមានការព្រួយបារម្ភជាខ្លាំងពីក្រុមនិយោជិត ក៏ដូចជារដ្ឋាភិបាលនានានៅទូទាំងសកលលោក៕

May 11, 2023

ក្រុមបាល់ទាត់ U-22 ថៃ រកគ្រាប់បាល់បានលឿនបំផុតនៅស៊ីហ្គេម 2023 គិតត្រឹមបច្ចុប្បន្ន

ក្រុមបាល់ទាត់បុរសជម្រើសជាតិអាយុក្រោម 22 ឆ្នាំ (U-22) របស់ប្រទេសថៃ ចំណាយពេលតែបីនាទីប៉ុណ្ណោះក្នុងការស៊ុតពីរគ្រាប់ចូលទីរបស់ U-22 ឡាវ កាលពីល្ងាចថ្ងៃទី 08 ឧសភា។ នេះក៏ជាល្បឿននៃការស៊ុតបញ្ចូលទីពីរគ្រាប់ក្នុងរយៈពេលខ្លីបំផុតសម្រាប់វិញ្ញាសាកីឡាបាល់ទាត់បុរសនៅស៊ីហ្គេមលើកទី 32។

នៅក្នុងជ័យជម្នះលើកលើ U-22 ឡាវ ក្នុងលទ្ធផល 4-1 U-22 ថៃ បានបង្ហាញវិធីសាស្ត្រវាយសម្រុកដ៏លឿន ក្នុងនោះ U-22 ថៃ ចំណាយពេលតែប្រាំនាទីដំបូងនៃការប្រកួត ក៏រកបានពីរគ្រាប់។ អ្វីដែលអស្ចារ្យគឺថា ការស៊ុតបញ្ចូលទីបានពីរគ្រាប់នេះ កើតឡើងនៅក្នុងរយៈពេលតែបីនាទីប៉ុណ្ណោះ។

គិតមកដល់បច្ចុប្បន្ន U-22 ថៃ បានឈ្នះ 9 គ្រាប់ និងចាញ់ 2 គ្រាប់។ អ្នកជំនាញនិយាយថា U-22 ថៃ បច្ចុប្បន្នមានខ្សែប្រយុទ្ធខ្លាំងជាងគេនៅពូល B។ U-22 ថៃ នឹងក្លាយជាគូប្រជែងចុងក្រោយរបស់ U-22 វៀតណាម នៅពូល B ហើយអាចដណ្ដើមបានតំណែងជើងឯកពី U-22 វៀតណាម នៅស៊ីហ្គេមលើកនេះ។

ក្នុងការប៉ះគ្នានៅថ្ងៃទី 11 ឧសភាខាងមុខ ខ្សែប្រយុទ្ធ U-22 ថៃ នឹងត្រូវផ្ដាច់ខ្សែការពារដ៏រឹងមាំរបស់ U-22 វៀតណាមឱ្យបាន បើសិនចង់បានមេដាយមាសនៅស៊ីហ្គេមលើកទី 32។ U-22 វៀតណាម មកដល់ពេលនេះក៏ត្រូវប៉ើងសំណាញ់ទីពីរគ្រាប់ដូចទៅនឹង U-22 ថៃ។

May 9, 2023

U-22 បួនក្រុមនៅស៊ីហ្គេមកម្ពុជា «ទាត់បាល់ចូលទីខ្លួនឯងក្នុងថ្ងៃតែមួយ» តើជាកំហុសរបស់នរណា?

ក្នុងពីរប្រកួតនៅពូល B ដែលបានធ្វើឡើងកាលពីល្ងាចថ្ងៃទី 04 ឧសភា នៅឯទីលានបាល់ទាត់ព្រីនស៍ បានកើតមានហេតុការណ៍កីឡាករទាត់បាល់ចូលទីខ្លួនឯងដល់ទៅបួនលើក ដែលនេះគឺជាកំណត់ត្រាមួយមិនធ្លាប់កើតឡើងនៅស៊ីហ្គេម នាំឱ្យមានការសង្ស័យថា ផ្ទៃទីលានដែលទើបតែត្រូវបានធ្វើឱ្យប្រសើរឡើងនេះគឺជាដើមហេតុ?

គេហទំព័រព័ត៌មានកីឡាមួយរបស់វៀតណាម បានសរសេរថា «បើទោះទើបតែត្រូវបានកែលំអ លើកកម្ពស់គុណភាព ប៉ុន្តែផ្ទៃស្មៅលើទីលានបាល់ទាត់ព្រីនស៍លែងនៅល្អដូចការប្រកួតបើកឆាក។ នៅក្នុងការប្រកួតជើងទីពីរ ទស្សនិកជនបានទស្សនាទិដ្ឋភាពកីឡាករយកជើងលុបក្រហូងដីលើទីលានប្រកួត។

ពិសេសនៅត្រង់ចំណុចដែលត្រូវកីឡាករជាន់ច្រើនជាងគេ ក្នុងនោះមានចំណុចខាងមុខអ្នកចាំទីជាដើម គុណភាពផ្ទៃដី និងស្មៅត្រូវធ្លាក់ចុះយ៉ាងឆាប់រហ័ស។

Ilhan Noor ខ្សែការពាររបស់ U-22 សង្ហបុរី «ក្បត់ទីខ្លួនឯង»

សារព័ត៌មានវៀតណាមមួយនេះបានសរសេរការពារកីឡាកររបស់ខ្លួនដែលបានទាត់បាល់ចូលទីខ្លួនឯងថា «ពិតជាពិបាកជឿ កីឡាករដែលស្ទាត់ជំនាញ និងធ្លាប់ប្រកួតនៅស៊ីហ្គេមពីរលើកដូចខ្សែបម្រើ Vu Tien Long បែរជាទាត់បាល់អន់ដូច្នេះនៅខាងមុខតំបន់គ្រោះថ្នាក់ ក្នុងគ្រាដែលមិនមានសម្ពាធខ្លាំង»។

គេហទំព័រកីឡានេះបានសរសេរទៀតថា «គេអាចមើលឃើញច្បាស់បំផុតគឺការ «ក្បត់ទីខ្លួនឯង» របស់ Ilhan Noor។ ខ្សែការពាររបស់ U-22 សង្ហបុរីរូបនេះទំនងជាចំពប់ជើង ធ្វើឱ្យសកម្មភាពកាត់ចង្វាក់បាល់ត្រូវបាត់បង់ម្ចាស់ការ»។

23 ក្រុមម៉ាឡេស៊ី បែរជាត្រូវចាញ់មួយគ្រាប់វិញ បន្ទាប់ពីខ្សែការពារទាត់ចូលទីខ្លួនឯង

ប្រការដ៏ស្ទើរតែមិនគួរឱ្យជឿដូចខាងលើបន្តកើតឡើងនៅក្នុងការប្រកួតរវាង U-22 ឡាវ និង U-22 ម៉ាឡេស៊ី។ ថ្វីបើរកបានមួយគ្រាប់ដំបូងគេនៅនាទីទីបួន ប៉ុន្តែដល់នាទីទី 23 ក្រុមម៉ាឡេស៊ី បែរជាត្រូវចាញ់មួយគ្រាប់វិញ បន្ទាប់ពីខ្សែការពារទាត់ចូលទីខ្លួនឯង។ ប៉ុន្មាននាទីក្រោយមក ដល់វេន U-22 ឡាវ ទាត់បាល់ចូលទីខ្លួនឯងវិញម្ដង នៅពេលខ្សែបម្រើ Najmudin របស់ម៉ាឡេស៊ី ប្លោងបាល់ចូលក្បែរតំបន់គ្រោះថ្នាក់។

យោងតាមសារព័ត៌មានខាងលើ ផ្ទៃរបស់វាលស្មៅនៅទីលានបាល់ទាត់ព្រីនស៍ ត្រូវខូចខាតច្រើនក្រោយពីមានការប្រកួតជាបន្តបន្ទាប់ ហើយគេអាចមើលឃើញដោយផ្នែកទទេ។ នេះអាចជាដើមហេតុដែលធ្វើឱ្យកីឡាករទាត់បាល់មិនបានល្អ នាំឱ្យមានហេតុការណ៍ទាត់ចូលទីខ្លួនឯងច្រើនដងមិនធ្លាប់មានពីមុនមកដូច្នេះ៕

May 5, 2023

Tag: ជំនាញ