Tag: ឧស្សាហកម្ម

វៀតណាម មិនព្រមបន្ថយអត្រាពន្ធនាំចូលរថយន្តអគ្គិសនី ខណៈកម្ពុជាបញ្ចុះ 50%
ថ្មីៗនេះ សំណើសុំបញ្ចុះអត្រាពន្ធនាំចូលរថយន្តអគ្គិសនីរបស់បណ្ដាក្រុមហ៊ុន និងស្ថាប័នមួយចំនួននៅប្រទេសវៀតណាម បានទទួលចម្លើយជាផ្លូវការពីក្រសួងហិរញ្ញវត្ថុប្រទេសនេះ។
ក្រសួងហិរញ្ញវត្ថុវៀតណាម កាលពីចុងឆ្នាំកន្លង បានស្នើឱ្យរដ្ឋាភិបាល កុំអនុម័តគោលនយោបាយកាត់បន្ថយអត្រាពន្ធពិសេសចំពោះការនាំចូលរថយន្តអគ្គិសនី ដោយលើកហេតុផលថា វៀតណាមមានគោលនយោបាយបញ្ចុះអត្រាពន្ធជាច្រើនរួចហើយ ក្នុងនោះក៏អត្រាពន្ធនាំចូលគ្រឿងបន្លាស់សម្រាប់ការផលិត និងដំឡើងរថយន្តអគ្គិសនី ដែលបញ្ចុះមកនៅ 0% ជាដើម ដើម្បីជំរុញវិស័យឧស្សាហកម្មបៃតងនៅប្រទេសនេះ។
ចំពោះអ្នកប្រើប្រាស់វិញ រដ្ឋាភិបាលវៀតណាមអនុវត្តគោលនយោបាយអនុគ្រោះពន្ធប្រថាប់ត្រា 0 ដុង ក្នុងរង្វង់បីឆ្នាំ ចាប់ពីខែមីនា 2022 និងបញ្ចុះពន្ធនេះ 50% នៅពីរឆ្នាំបន្ទាប់។ នេះបើតាមការអះអាងរបស់ក្រសួងហិរញ្ញវត្ថុវៀតណាម។
ជាងនេះ ក្រសួងខាងលើបានបញ្ជាក់ថា ការបញ្ចុះអត្រាពន្ធនាំចូលចំពោះរថយន្តអគ្គិសនី ក៏នឹងធ្វើឱ្យសមត្ថភាពប្រកួតប្រជែងរបស់រថយន្តផលិតក្នុងស្រុកត្រូវថយចុះ ប៉ះពាល់ដល់ប្រភពចំណូលរបស់រដ្ឋ និងបន្ថែមសម្ពាធទៅលើហេដ្ឋារចនាសម្ព័ន្ធគមនាគមក្នុងប្រទេសនេះផងដែរ។
សំណើសុំមិនបញ្ចុះអត្រាពន្ធសម្រាប់ការនាំចូលរថយន្តអគ្គិសនីរបស់ក្រសួងហិរញ្ញវត្ថុវៀតណាម ក៏ត្រូវបានឧបនាយករដ្ឋមន្ត្រីវៀតណាម Le Minh Khai អនុម័តរួចហើយកាលពីចុងឆ្នាំ 2022។
នេះគឺជាការបដិសេធជាផ្លូវការទៅនឹងសំណើសុំបញ្ចុះអត្រាពន្ធដែលក្រុមហ៊ុន TMT ដៃគូសហការរបស់សម្ព័ន្ធក្រុមហ៊ុនចិន-អាម៉េរិក SGMW (SAIC-GM-Wuling) នៅវៀតណាម និងសមាគមអាជីវកម្មមេកានិចវៀតណាម (VAMI) ដែលបានស្នើមុននោះ។
នៅកម្ពុជា ដើម្បីលើកទឹកចិត្តឱ្យមានការប្រើប្រាស់រថយន្តអគ្គិសនីកាន់តែច្រើនថែមទៀត រាជរដ្ឋាភិបាលបានទម្លាក់ពន្ធនាំចូលរថយន្តអគ្គិសនីចំនួន 50% ខណៈដែលការនាំចូលយានយន្តដែលដើរដោយប្រេងឥន្ធនៈ តម្រូវឱ្យបង់ពន្ធនាំចូលរហូតដល់ 120%។ នេះបើតាម ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន ថ្លែងនៅក្នុងពិធី «អបអរសាទរខួបបីឆ្នាំ និងការដាក់តាំងពិព័រណ៍លក់លេខពិសេសផ្ទាល់ខ្លួន» នៅសួនច្បារវត្តបទុមវតី កាលពីព្រឹកថ្ងៃទី 07 មីនា 2023៕
May 11, 2023
ស្ពានសម្រាប់ផ្លូវរថភ្លើងខ្ពស់ជាងគេបង្អស់លើពិភពលោក
(ឥណ្ឌា) – ស្ពាន Chenab ដែលមានកម្ពស់ 359 ម៉ែត្រធៀបនឹងផ្ទៃទឹកទន្លេ Chenab ក្នុងតំបន់ Jammu និង Kashmir គ្រោងនឹងត្រូវបានដាក់ឱ្យប្រើប្រាស់ចាប់ពីចុងខែធ្នូ 2023 ឬដើមខែមករា 2024។
ស្ពានដែលមានប្រវែង 1,315 ម៉ែត្រនេះ ស្ថិតក្នុងគម្រោងនាំយកបណ្ដាញផ្លូវដែកទៅកាន់តំបន់ជ្រលងភ្នំ Kashmir។ ក្រៅពីស្ពាន Chenab គម្រោងផ្លូវដែក Udhampur-Srinagar-Baramulla (USBRL) ក៏មានទាំងផ្លូវរូងក្រោមដីវែងជាងគេប្រចាំប្រទេស និងស្ពានខ្សែកាបដំបូងសម្រាប់ផ្លូវដែកឥណ្ឌាផងដែរ។ នេះបើតាមទីភ្នាក់ងារសារព័ត៌មាន CNN។
សម្រាប់នាយករដ្ឋមន្ត្រីឥណ្ឌា Narendra Modi ការវិនិយោគទៅលើហេដ្ឋារចនាសម្ព័ន្ធដូចស្ពាន Chenab និងគម្រោង USBRL ជាដើម គឺជាវិធីដែលមានប្រសិទ្ធភាពដើម្បីបង្កើនការតភ្ជាប់ក្នុងសង្គម ភ្ជាប់តំបន់ដាច់ស្រយាលជាមួយនឹងទីក្រុងធំៗ។ ការតភ្ជាប់ Kashmir និងតំបន់ដទៃទៀតនេះ នឹងពង្រឹងការអភិវឌ្ឍឧស្សាហកម្ម និងកសិកម្មក្នុងតំបន់។
មុននោះ ផ្លូវតែមួយខ្សែគត់ដែលតភ្ជាប់តំបន់ Kashmir ជាមួយនឹងតំបន់នានានៅឥណ្ឌា គឺផ្លូវជាតិ Sringar-Jammu ប្រវែង 300 គីឡូម៉ែត្រដែលបត់បែនខ្លាំង។ ផ្លូវនេះត្រូវបិទនៅរដូវរងា ហើយតែងតែកើតមានគ្រោះថ្នាក់ចរាចរណ៍។
ឥណ្ឌាបាន និងកំពុងតែវិនិយោគជាច្រើនទៅលើការស្ដារ និងធ្វើឱ្យប្រសើរឡើងហេដ្ឋារចនាសម្ព័ន្ធរបស់ខ្លួន។ កាលពីខែកុម្ភៈ 2023 លោក Modi បានសម្ពោធដាក់ឱ្យប្រើប្រាស់កំណាត់ផ្លូវដំបូងរបស់ផ្លូវល្បឿនលឿនប្រវែង 1,386 គីឡូម៉ែត្រ តភ្ជាប់រដ្ឋធានីញូវដែលី ជាមួយនឹងមជ្ឈមណ្ឌលហិរញ្ញវត្ថុមុមបៃ។ ដំណើរការសាងសង់ផ្លូវរបៀងដឹកជញ្ជូននៅភាគខាងលិចប្រទេសក៏កំពុងត្រូវបានធ្វើឡើង ដែលនេះនឹងជួយកាត់បន្ថយសម្ពាធនៃបណ្ដាញផ្លូវដែកនៅឥណ្ឌា៕

May 3, 2023
ក្រសួង៖ ទិន្នន័យគំនូរឧស្សាហកម្ម និងកម្មសិទ្ធិបញ្ញាកម្ពុជា ភ្ជាប់ទៅនឹងប្រព័ន្ធទិន្នន័យអាស៊ាន-សហភាពអឺរ៉ុប ជាផែនការអភិវឌ្ឍន៍ឧស្សាហកម្ម ប្រកបដោយចីរភាព
គំនូរឧស្សាហកម្មត្រូវបានយកចិត្តទុកដាក់ និងប្រើប្រាស់យ៉ាងសកម្មនៅក្នុងទីផ្សារសម្រាប់ការលក់ផលិតផល ការផ្សព្វផ្សាយពាណិជ្ជកម្មទាក់ទាញអតិថិជនឱ្យចាប់អារម្មណ៍លើផលិតផលរបស់ខ្លួនដែលជាកត្តាសំខាន់សម្រាប់ការប្រកួតប្រជែងទីផ្សារនាពេលបច្ចុប្បន្ន។ នេះបើតាមការអះ អាងរបស់មន្ត្រីជាន់ខ្ពស់នៃក្រសួងឧស្សាហកម្ម និងសិប្បកម្ម។
ឯកឧត្តម ភោគ សុវណ្ណរិទ្ធ រដ្ឋលេខាធិការក្រសួងឧស្សាហកម្ម និងសិប្បកម្មបានមានប្រសាសន៍ថា ក្រសួងបាននិងកំពុងអនុវត្តយ៉ាងសកម្មនូវផែនការអភិវឌ្ឍន៍ឧស្សាហកម្មប្រកបដោយចីរភាពក្នុងការរួមចំណែកអភិវឌ្ឍសេដ្ឋកិច្ចជាតិឱ្យរីកចម្រើនប្រកបដោយបរិយាប័ន្ន។
ឯកឧត្តមបានបញ្ជាក់ថា៖“ជាក់ស្តែងផ្នែកកម្មសិទ្ធិឧស្សាហកម្ម ក្រសួងបានបន្តខិតខំពង្រីកកិច្ចការពារកម្មសិទ្ធិបញ្ញា ពង្រីកកិច្ចសហប្រតិបត្តិការជាមួយអង្គការអន្តរជាតិ និងបណ្តាអង្គភាពកម្មសិទ្ធិបញ្ញាលើពិភពលោកសំដៅធ្វើយ៉ាងណាឱ្យការងារប្រកាសនីយបត្រ តក្កកម្ម គំនូរឧស្សាហកម្មដំណើរការស៊ីសង្វាក់គ្នាជាមួយអន្តរជាតិ និងទទួលបានការទាក់ទាញការចុះបញ្ជីការពារកម្មសិទ្ធិបញ្ញានៅកម្ពុជាកាន់តែច្រើនឡើង”។
ឯកឧត្តមបានបន្តថា៖“នៅក្នុងក្របខ័ណ្ឌអាស៊ានយើងមានការសហការជាមួយបណ្តាអង្គភាពកម្មសិទ្ធិបញ្ញានៅក្នុងតំបន់អាស៊ាន យើងមានគម្រោងរបស់សហគមន៍អឺរ៉ុបជួយគាំពារខាងផ្នែកកម្មសិទ្ធិបញ្ញាតំបន់អាស៊ាន”។
ថ្ងៃនេះគម្រោងជួយគាំទ្រការធ្វើសមាហរណកម្មអាស៊ានលើផ្នែកកម្មសិទ្ធិបញ្ញារបស់សហ ភាពអឺរ៉ុប ARISE+IPR (The Enhanced ASEAN Regional Intergration Suuport from TheEuropean Unionfor Intellectual Property) បានសហការជាមួយក្រសួងឧស្សាហកម្ម និង សិប្បកម្ម រៀបចំសិក្ខាសាលាគំនូរឧស្សាហកម្ម និងដាក់ឱ្យដំណើការទិន្នន័យគំនូរឧស្សាហកម្មកម្ពុជា ភ្ជាប់ទៅនឹងប្រព័ន្ធទិន្នន័យអាស៊ាន និងកម្មសិទ្ធិបញ្ញាសហភាពអឺរ៉ុបដើម្បីជាប្រយោជន៍ដល់កិច្ចការពារកម្មសិទ្ធិបញ្ញា”។
លោក ង៉ែត វិបុល អគ្គនាយករងនៃអគ្គនាយកដ្ឋានកម្មសិទ្ធិបញ្ញាក្រសួងឧស្សាហកម្ម និងសិប្បកម្មបានថ្លែងឱ្យដឹងថា៖“គោលបំណងសិក្ខាសាលានាថ្ងៃនេះ គឺដើម្បីបំប៉នចំណេះដឹង និងស្វែងយល់បន្ថែមទៀតអំពីគំនូរឧស្សាហកម្ម ដែលជាផ្នែកមួយដ៏សំខាន់នៃកម្មសិទ្ធិបញ្ញា និងជាមួយគ្នានេះដែរ ជាការដាក់ឱ្យដំណើរការទិន្នន័យគំនូរឧស្សាហកម្មកម្ពុជា តភ្ជាប់ជាមួយទិន្នន័យគំនូរឧស្សាហកម្មក្នុងតំបន់អាស៊ានទៅសហភាពអឺរ៉ុបដែលជាប្រយោជន៍សម្រាប់ការប្រើប្រាស់ក្នុងកិច្ចការពារកម្មសិទ្ធិបញ្ញា”។
ការសុំការពារគំនូរឧស្សាហកម្ម គឺមានសារៈសំខាន់ និងផ្តល់ផលប្រយោជន៍ជាច្រើនដល់ អ្នក គូរ តក្កករ រោងចក្រ សហគ្រាសធុនតូច និងមធ្យម(SMEs)សិប្បករ ធុរជនពីការលួចចម្លងគំនូរឧស្សាហកម្ម ការរចនាម៉ូដរបស់ផលិតផលដោយគ្មានការអនុញ្ញាត។ នៅប្រទេសកម្ពុជាយើងបច្ចុប្បន្ន មានច្បាប់ប្រកាសនីយបត្រតក្កកម្ម វិញ្ញាបនបត្រម៉ូដែលដែលមានប្រ-យោជន៍ និងប្រកាសអំពីការចុះបញ្ជីប្រើប្រាស់គំនូរឧស្សាហកម្មនេះ។
គំនូរឧស្សាហកម្មមួយដែលបានទទួលកិច្ចការពារ យើងឱ្យមានសិទ្ធិពេញលេញក្នុងការប្រើប្រាស់ធ្វើអាជីវកម្ម និងមានសិទ្ធិហាមឃាត់អ្នកធ្វើតាម អ្នកលួចចម្លងគំនូរឧស្សាហកម្មដែលដាក់លក់លើទីផ្សារដោយគ្មានការអនុញ្ញាតពីម្ចាស់ដើមស្របច្បាប់។ នេះបើតាមលោកវិបុលបានបញ្ជាក់។
លោកអគ្គនាយករងរូបនេះបានបញ្ជាក់ថា៖“នាយកដ្ឋានកម្មសិទ្ធិឧស្សាហកម្មបានដំណើរការ ទទួលពាក្យសុំការពារ និងផ្តល់កិច្ចការពារជូនអ្នកដាក់ពាក្យស្នើសុំចាប់ពីឆ្នាំ2008 ដល់ឆ្នាំ2018 យើងទទួលបានចំនួន 243ពាក្យសុំ និងបានចុះបញ្ជីចំនួន 672គំនូរឧស្សាហកម្ម”។
លោកបានឱ្យដឹងទៀតថា៖“ការចុះបញ្ជីគំនូរឧស្សាហកម្ម គឺឈរលើមូលដ្ឋានលក្ខខណ្ឌថ្មី ដែលផ្តល់កិច្ចការពារសរុបចំនួន15ឆ្នាំ (ដោយម្តងអាចធ្វើអាជីវកម្មរយៈពេល 5ឆ្នាំ) និងបន្តបាន 3ដង”។
លោក វិបុល បានបន្តថា៖“យើងទទួលបានការសុំចុះបញ្ជីភាគច្រើនមកពីបរទេសប្រមាណ80% រីឯតក្កករ អ្នកឌីហ្សាញ សហគ្រាសធុនតូច និងមធ្យមក្នុងស្រុកមានតែ 20%ទេ។ ដូច្នេះយើងចង់ឱ្យមានការចាប់អារម្មណ៍ពី SMEs ក្នុងស្រុកដើម្បីដាក់ពាក្យសុំការពារគំនូរឧស្សាហកម្ម ហេតុនេះហើយទើបក្រសួងឧស្សាហកម្ម និងសិប្បកម្ម បន្តការបណ្តុះបណ្តាល ផ្សព្វផ្សាយ អំពីសារប្រយោជន៍នៃកម្មសិទ្ធិបញ្ញា និងអ្នកពាក់ព័ន្ធឱ្យបានដឹង និងចូលរួមការពារកម្មសិទ្ធិបញ្ញារបស់ខ្លួនជាបន្តបន្ទាប់”។
លោក ង៉ែត វិបុល បានបញ្ជាក់ឱ្យដឹងទៀតថា៖“រាជរដ្ឋាភិបាលកម្ពុជាបានចូលជាសមាជិករបស់កិច្ចព្រមព្រៀងទីក្រុងឡាអេផងដែរអំពីការចុះបញ្ជីគំនូរឧស្សាហកម្មអន្តរជាតិតាំងពីឆ្នាំ2017 មក ហើយឆ្នាំ2018 យើងបានទទួលការសុំការពារចំនួន 250គំនូរឧស្សាហកម្មពីប្រព័ន្ធអន្តរជាតិនេះហើយចំនួននៃការសុំចុះបញ្ជីនេះ អាចមានការកើនឡើងបន្តទៀតនៅឆ្នាំ2019 នេះ”។
លោក Tiago Guerreiro ជាប្រធានគម្រោង ARISE+IPR បានថ្លែងថា៖“ការសុំចុះបញ្ជីការពារគំនូរឧស្សាហកម្មនៅក្នុងទីក្រុងឡាអេ គឺជាការផ្តល់តម្លៃការងាររបស់ SMEs ផ្ទាល់ ដោយបានប្រើជាប្រចាំឱ្យក្រុមហ៊ុនរបស់ខ្លួន ហើយឆ្លើយតបទៅនឹងផលិតផលក្នុងស្រុកសរុប(ផ.ស.ស) GDP របស់ប្រទេសផ្ទាល់ខ្លួនផងដែរ”។
លោក Tiago Guerreiro បានបញ្ជាក់ថា៖ “នៅបណ្តាប្រទេសអឺរ៉ុបចាប់ពីឆ្នាំ2003 មក ការទទួលខុសត្រូវលើកម្មសិទ្ធិបញ្ញាត្រូវបានត្រួតពិនិត្យមើលថា តើសហគ្រាស SMEs 1 មានភាពត្រឹមត្រូវដែរឬទេ? ប្រសិនបើ SMEsនោះមានភាពត្រឹមត្រូវហើយ យើងត្រូវតែចុះបញ្ជីការពារសិទ្ធិឱ្យគេ ដែលបច្ចុប្បន្នមានចំនួន 2.5លានដែលបានចុះបញ្ជីហើយ ហើយយើងបានការពារកម្មសិទ្ធិបញ្ញារបស់គេ។ ក្នុងការការពារគំនូរឧស្សាហកម្មនេះ យើងក៏មានការការពារចំនួនរាប់លាននៅសហគមន៍អឺរ៉ុប ព្រោះថាការការពារគំនូរឧស្សាហកម្ម និងកម្មសិទ្ធបញ្ញានាំឱ្យមានការរីកចម្រើនខាងសេដ្ឋកិច្ច និងឱកាសការងារ ដែលនាំឱ្យមាន12% នៃឱកាសការងារនៅអឺរ៉ុប និងការប្រកួតប្រជែងនាពេលបច្ចុប្បន្ន រួមជាមួយនឹងការងារការពារកម្មសិទ្ធិបញ្ញានេះ SMEs តូចៗក៏អាចធានាបាននូវប្រាក់ចំណូលរបស់ខ្លួនឱ្យមានស្ថិរភាពបានដែរ”។
សូមបញ្ជាក់ថា នៅតំបន់អាស៊ានមានប្រទេសចំនួន3 រួមមានកម្ពុជា ប្រ៊ុយណេ និងប្រទេសសិង្ហបុរីដែលបានចុះកិច្ចព្រមព្រៀងលើការចុះបញ្ជីជាខ្នាតអន្តរជាតិនូវគំនូឧស្សាហកម្មកម្មសិទ្ធិបញ្ញាក្រុងឡាអេ៕
June 13, 2019
ទីតាំងភាគខាងលិចរាជធានីភ្នំពេញកំពុងក្លាយជាតំបន់ឧស្សាហកម្មធំជាងគេនៅពេលបច្ចុប្បន្ន
ស្របពេលដែលរដ្ឋាភិបាលបាន និងកំពុងរៀបចំផែនការរំកិលរោងចក្រ ចេញពីទីប្រជុំជននានាក្នុងភូមិសាស្ត្ររាជធានីភ្នំពេញ ដែលជាគោលនយោបាយកាត់បន្ថយការកកស្ទះចរាចរណ៍ បានធ្វើឱ្យតំបន់ជាយក្រុងមួយចំនួន ពិសេសតំបន់ភាគខាងលិចឆៀងខាងត្បូងរាជធានីភ្នំពេញ កំពុងក្លាយជាតំបន់ឧស្សាហកម្មធំជាងគេក្នុងប្រទេសកម្ពុជា។
គេសង្កេតឃើញថា ចាប់ពីរង្វង់មូលចោមចៅរហូតដល់តំបន់សេដ្ឋកិច្ចពិសេសភ្នំពេញ (PPSEZ) បន្តទៅដល់ផ្សារបែកចានដែលជាព្រំប្រទល់រវាងរាជធានីភ្នំពេញ និងភូមិសាស្ត្រស្រុកអង្គស្នួល ខេត្តកណ្តាលកំពុងមានការរីកចម្រើនយ៉ាងខ្លាំងចំពោះវិស័យឧស្សាហកម្មនេះ ដែលជាចំណែកដ៏សំខាន់ធ្វើឱ្យជីវភាពប្រជាជពលរដ្ឋនៅតំបន់នោះមានជីវភាពកាន់តែល្អប្រសើរឡើង គួរឱ្យកត់សម្គាល់ជាលំដាប់។
លោក នឹម នីរ៉ាដេត អភិបាលស្រុកអង្គស្នួល ខេត្តកណ្តាលមានប្រសាសន៍យល់ស្រប និងទទួលស្គាល់ថា បន្ទាប់ពីរដ្ឋាភិបាលរៀបចំផែនការរំកិលរោងចក្រចេញពីទីប្រជុំជនក្រុងភ្នំពេញ បានធ្វើឱ្យរោងចក្រឧស្សាហកម្មនានាមានការរីកដុះដាលច្រើននៅតំបន់ជាយក្រុងភាគខាងលិចឆៀងខាងត្បូង ចាប់ពីរង្វង់មូលចោមចៅរហូតដល់ស្រុកអង្គស្នួល ខេត្តកណ្តាល ហើយបន្តតាមបណ្ដោយផ្លូវជាតិលេខ4 ឆ្ពោះទៅទីរួមខេត្តកំពង់ស្ពឺទៀតផង។
លោកបញ្ជាក់ថា នៅក្នុងឆ្នាំ2018នេះ រោងចក្រឧស្សាហកម្មស្រុកអង្គស្នួលបានកើនឡើងដល់ចំនួន 68រោងចក្រ និងផ្តល់ការងារដល់ប្រជាពលរដ្ឋបានប្រមាណជា 60,000នាក់ ដែលក្នុងនោះទទួលបានប្រាក់ខែអប្បបរមាចំនួន 175ដុល្លារ បូករួមនឹងប្រាក់បន្ថែមម៉ោង ប្រាក់ឧបត្ថម្ភលើកទឹកចិត្តផ្សេងៗទៀត ម្នាក់ៗនឹងទទួលបានចំណូលលើសពី 200ដុល្លារទៅដល់ជាង 300ដុល្លារក្នុងមួយខែៗ ដែលអាចធ្វើឱ្យជីវភាពពួកគាត់រឹតតែល្អប្រសើរឡើង អាចផ្គត់ផ្គង់ជីវភាពផ្ទាល់ខ្លួនផង និងសល់មួយចំណែកផ្ញើជូនគ្រួសារនៅឯស្រុកទៀតផង។
សម្រាប់គ្រួសារកម្មករ-កម្មការិនីដែលធ្វើការយូរឆ្នាំ ពួកគាត់ថែមទាំងសន្សំប្រាក់បានមួយចំនួនសម្រាប់ទិញដីសង់ផ្ទះរស់នៅដោយមិនចាំបាច់ជូលគេ ឯកម្មករខ្លះទៀតកំពុងសន្សំលុយទិញដីបង់រំលស់ខ្លះ ទុកចំណាយប្រចាំថ្ងៃខ្លះ ដោយពួកគេគិតថា បង់រំលស់យូរទៅ ដីនឹងឡើងថ្លៃដូច្នេះបើសិនជាចាំសន្សំលុយគ្រប់ សឹមទិញដីនោះ ពួកគាត់មិនអាចមានលទ្ធភាពទិញដីសង់ផ្ទះបាននៅនោះឡើយដូច្នេះមានតែការចាយវាយរិះថាំ ហើយយកប្រាក់ទៅបង់រំលស់ខ្លះ ទើបអាចទិញដីសង់ផ្ទះបានរស់នៅសមរម្យនឹងគេ។
លោកបន្តថា រោងចក្រឧស្សហកម្មមិនត្រឹមតែរីករាលដុះដាលច្រើននៅក្នុងស្រុកអង្គស្នួលប៉ុណ្ណោះទេ ប៉ុន្តែវាបានបន្តរីករាលដាលតាមផ្លូវជាតិលេខ4 រហូតដល់ទីរួមខេត្ត កំពង់ស្ពឺទៀតផង ដោយក្រុមហ៊ុនបរទេសបានបោះទុនជាច្រើនសាងសង់បង្កើតរោងចក្រជាបន្តបន្ទាប់នៅឆ្នាំនេះ ក៏ដូចជាឆ្នាំខាងមុខទៀតដែរ។
កត្តាដែលធ្វើឱ្យរោងចក្រឧស្សាហកម្មរីកចម្រើនខ្លាំងនៅតាមបណ្តោយផ្លូវជាតិលេខ4នេះ គឺដោយសារតែរដ្ឋាភិបាលបានទទួលកម្ចីចំនួន 110លានដុល្លារអាមេរិកពីធនាគារអភិវឌ្ឍន៍អាស៊ីមកស្ថាបនាផ្លូវជាតិលេខ4 និងពង្រីកឱ្យកាន់តែធំទូលាយឡើង ផ្តល់ភាពងាយស្រួលដល់ប្រជាពលរដ្ឋក្នុងការធ្វើដំណើរ បើកបរយានជំនិះផ្សេងៗ ពិសេសផ្តល់ភាពងាយស្រួលក្នុងការដឹកជញ្ជូនទំនិញពីរោងចក្រទៅកាន់កំពង់ផែទឹកជ្រៅ មាត់សមុទ្រខេត្តព្រះសីហនុ និងដឹកទំនិញពីកំពង់ផែក្រុងព្រះសីហនុមកកាន់ទីក្រុងភ្នំពេញវិញផងដែរ។
ក្រុមអ្នករកស៊ីអចលនទ្រព្យនៅតាមបណ្តោយផ្លូវជាតិលេខ4 ចាប់ពីរង្វង់មូលចោមចៅរហូតដល់ស្រុកអង្គស្នួល បន្តទៅដល់ទីរួមខេត្តកំពង់ស្ពឺបានលើកឡើងថា ដោយសារតែរោងចក្រកំពុងពង្រីកខ្លួននៅជាយក្រុងបានធ្វើឱ្យតម្លៃដីកើនឡើងទ្វេដង រហូតស្ទើរមិនគួរឱ្យជឿទៀតផង។
លោក សឹង ប៊ុនសុង អ្នកពុះដីឡូត៍លក់នៅក្រោយផ្សារអង្គស្នួលបានឱ្យដឹងថា តម្លៃដីនៅស្រុកអង្គស្នួលពិតជាឡើងថ្លៃគួរឱ្យកត់សម្គាល់មែនដោយសារតម្លៃដីពុះឡូត៍កាលពីអំឡុង 2ឆ្នាំមុនក្នុងមួយឡូត៍តម្លៃត្រឹមតែ 2,000ដុល្លារ ទៅ3,000ដុល្លារប៉ុណ្ណោះ ប៉ុន្តែមកទល់ឆ្នាំ2018នេះ តម្លៃដីបានស្ទុះឡើងខ្លាំងរហូតដល់ 8,000ដុល្លារ ទៅដល់ជាង10,000ដុល្លារឯណោះក្នុងមួយឡូត៍។ ហើយសម្រាប់ដីស្រែប្រាំងរបស់ប្រជាពលរដ្ឋវិញ កាលពីឆ្នាំមុន1ម៉ែត្រការ៉េតម្លៃ10 ទៅ20ដុល្លារនោះ បច្ចុប្បន្នឡើងថ្លៃដល់ទៅ 50 ឬ100ដុល្លារឯណោះក្នុងមួយម៉ែត្រការ៉េ ខណៈដែលរដ្ឋាភិបាលគ្រោងស្ថាបនាផ្លូវចាក់កៅស៊ូទទឹង 30ម៉ែត្រ ចាប់ពីផ្សារអង្គស្នួលទៅកាន់តំបន់ភ្នំប្រសិទ្ធិ៍។
អ្នកជំនាញវិស័យអចលនទ្រព្យបានលើកឡើងថា ឱ្យតែរោងចក្រឧស្សាហកម្មទៅដល់កន្លែងណាតម្លៃដីនឹងឡើងថ្លៃនៅកន្លែងនោះ ដោយសារតែសម្បូរមនុស្សទៅរស់នៅ មានកម្មករធ្វើការច្រើន អ្នករស់នៅក្បែរនោះអាចប្រកបរបរកស៊ីកាន់តែកាក់កបឡើងៗហ្នឹងឯង៕
December 7, 2018
ឧស្សាហកម្ម 4.0 ជំរុញមនុស្សឱ្យបង្កើន សមត្ថភាពកាន់តែខ្លាំងលើផ្នែកបច្ចេកវិទ្យា
ឧស្សាហកម្ម 4.0 ជាដំណើរនៃការធ្វើអាជីវកម្មបែបថ្មីដែលប្រើប្រាស់គ្រឿងម៉ាស៊ីនស្វ័យប្រវត្តិ និងការប្រើប្រាស់បច្ចេកវិទ្យាជំនួសកម្លាំងមនុស្សដើម្បីកាត់បន្ថយចំណាយ ហើយបង្កើនប្រសិទ្ធភាពការផលិតឱ្យកាន់តែមានសក្តានុពល។
ផ្តើមចេញពីការធ្វើបដិវត្តន៍ឧស្សាហកម្ម 4.0 ស្ថានភាពវិជ្ជមានជាច្រើនត្រូវបានគេរំពឹងទុកថាអាចនឹងកើតមានឡើងនៅក្នុងចង្វាក់ផលិតកម្មនានាលើពិភពលោក ដែលធ្វើឱ្យមានការផ្លាស់ប្តូររបៀបនៃការធ្វើអាជីវកម្មទាំងផ្នែកផលិតកម្ម និងសេវាកម្ម។ ម៉ាស៊ីនស្វ័យប្រវត្តិនឹងត្រូវចូលមកជំនួសកន្លែងមនុស្សក្នុងរោងចក្រសហគ្រាស និងឧស្សាហកម្មដែលទាមទារឱ្យប្រើកម្លាំងច្រើន ព្រោះម៉ាស៊ីនអាចធ្វើការពេញ 24ម៉ោងក្នុងមួយថ្ងៃដោយគ្មានការសម្រាក និងមានថាមពលខ្លាំងជាងកម្លាំងមនុស្ស។ ប្រព័ន្ធផ្ទុកទិន្នន័យទាំងអស់នឹងត្រូវផ្លាស់ប្តូរពីការប្រើប្រាស់ឃ្លាំង ដាក់ឯកសារ ហើយមានមនុស្សធ្វើការច្រើន មកប្រើប្រាស់បច្ចេកវិទ្យា និងប្រើមនុស្សតិចបំផុតវិញម្តង។ ម្យ៉ាងវិញទៀតវាមានភាពងាយស្រួលខ្លាំងក្នុងការស្វែងរកទិន្នន័យរាប់ពាន់លានទំព័រក្នុងរយៈពេលខ្លីបំផុត ដែលអាចធ្វើឱ្យការធ្វើអាជីវកម្មកាន់តែមានលក្ខណៈងាយស្រួល និងប្រកួតប្រជែង។ ចំពោះការទិញលក់របស់មនុស្សវិញក៏ដូចគ្នាដែរ វត្តមាននៃបច្ចេកវិទ្យាក្នុងវិស័យហិរញ្ញវត្ថុ (Fintech) នឹងធ្វើឱ្យមនុស្សជួបគ្នាកាន់តែតិច ហើយការចរាចរទំនិញនឹងកាន់តែមានលក្ខណៈងាយស្រួល ព្រោះការដឹកជញ្ជូនក៏មានការឆាប់រហ័ស ហើយការទូទាត់ប្រាក់ក៏ចំណាយពេលវេលាតិចបំផុតដែរ។
ស្របជាមួយនឹងគុណសម្បត្តិយ៉ាងច្រើនលើសលប់នៃបដិវត្តន៍ឧស្សាហកម្ម 4.0 វាក៏ត្រូវបានគេមើលឃើញថា អាចនឹងជះផលប៉ះពាល់ច្រើនលើវិស័យធនធានមនុស្ស និងអាជីវកម្មដែលមានលក្ខណៈជាប្រពៃណី។ អ្នកជំនាញដែលមិនសូវចេះបច្ចេកវិទ្យាចាំបាច់ត្រូវតែរត់ទៅសិក្សាបន្ថែមពីបច្ចេកវិទ្យាបើមិនធ្វើបែបនេះទេ គាត់នឹងប្រឈមជាមួយនឹងការបាត់បង់ការងារក្នុងឧស្សាហកម្មដែលមានការប្រែប្រួលយ៉ាងឆាប់រហ័សនេះ។ អាជីពជាច្រើននឹងត្រូវជំនួសដោយបច្ចេកវិទ្យា AI (artificial intelligence) ព្រោះការងារទាំងអស់ដែលធ្វើដដែលៗ ម៉ាស៊ីនសុទ្ធតែអាចធ្វើបានទាំងអស់ ហើយលើសពីនេះទៅទៀតក្រុមហ៊ុនទាំងអស់ត្រូវតែចំណាយលុយដើម្បីធ្វើបច្ចុប្បន្នភាពឱ្យទាន់សម័យកាល ស្របពេលដែលអ្នកគ្មានអាជីពអាចនឹងក្លាយជាបន្ទុកសម្រាប់សង្គម។
លោក ឌៀប សីហា សាកលវិទ្យាធិការនៃសាកលវិទ្យាល័យបៀលប្រាយ បានលើកឡើងថា បច្ចុប្បន្ននេះមនុស្សជាច្រើនបានប្រើប្រាស់បច្ចេកវិទ្យា ហើយសកម្មភាពឧស្សាហកម្មមួយចំនួនក៏ចាប់ផ្តើមប្រើប្រាស់បច្ចេកវិទ្យាទំនើប ជាមួយនឹងគ្រឿងម៉ាស៊ីន (robot) ដើម្បីធ្វើការដែរ។ ចំពោះមនុស្សវិញ ការទូទាត់សាច់ប្រាក់ក៏លែងសូវប្រើប្រាស់ជាសាច់លុយសុទ្ធទៀតហើយ ភាគច្រើនគឺប្រើប្រាស់ការទូទាត់តាមបច្ចេកវិទ្យាដើម្បីទិញទំនិញ និងចំណាយផ្សេងៗ។ មនុស្សចាប់ផ្តើមបញ្ចូលបច្ចេកវិទ្យានៅក្នុងការរស់នៅ ព្រោះសូម្បីតែកាហ្វេនាសម័យ Cyber world នេះក៏ទាល់តែ Cyber Café ទើបមានអតិថិជន មានន័យថា ទាល់តែមាន Wifi និងបច្ចេកវិទ្យាទំនើបនានាទើបមានមនុស្សគាំទ្រ។ ហេតុនេះវត្តមាននៃបច្ចេកវិទ្យានៅលើពិភពលោក នឹងធ្វើឱ្យមានការផ្លាស់ប្តូររបៀបនៃការរស់នៅ។
លោក ឌៀប សីហា បានមានប្រសាសន៍ថា៖ “តាមរបាយការណ៍របស់វេទិកាសេដ្ឋកិច្ចពិភពលោកបានបញ្ជាក់ថា ឆ្នាំ2022 មនុស្សប្រើប្រាស់ម៉ាស៊ីនអាចកើនឡើងដល់ 48% បើធៀបនឹងកម្លាំងមនុស្សតែដល់ឆ្នាំ2025 មនុស្សអាចប្រើគ្រឿងយន្តដល់ទៅជាង 50% ហេតុនេះវាអាចធ្វើឱ្យប៉ះពាល់ដល់វិស័យការងារ”។
អ្នកជំនាញអប់រំខាងលើបានលើកឡើងផងដែរថា ទោះជាឧស្សាហកម្ម 4.0 ត្រូវបានគេសង្កេតឃើញថាមានផលប៉ះពាល់ខ្លះយ៉ាងណាក៏ដោយ តែយុវជនជំនាន់ថ្មីនេះនៅមានពេលសម្រាប់ត្រៀមមុនមិនដូចជំនាន់មុនដែលនៅឆ្ងាយខ្លាំងពីបច្ចេកវិទ្យានោះទេ។ ក្នុងនាមជាស្ថាប័នអប់រំ លោក រួមទាំងថ្នាក់ដឹកនាំសាកលវិទ្យាល័យបៀលប្រាយ ក៏បានធ្វើការជជែកពិភាក្សានៅបរទេសជាមួយដៃគូជាច្រើន រួមទាំងអ្នកជំនាញពីភាពជាប្រជាជនសកល (global citizen) និងការប្រើប្រាស់បច្ចេកវិទ្យាក្នុងពិភពលោក ដើម្បីត្រៀមខ្លួនឱ្យបានល្អក្នុងការឆ្លើយតបជាមួយនឹងទីផ្សារការងារជំនាន់ថ្មីនេះ។
លោក ឌៀប សីហា បានលើកឡើងផងដែរថា ដើម្បីដោះស្រាយបញ្ហានេះសាកលវិទ្យាល័យរបស់លោកបានបញ្ចូលនូវបច្ចេកវិទ្យាទៅកាន់និស្សិតនៅគ្រប់ផ្នែកទាំងអស់ ដើម្បីពង្រឹងសមត្ថភាពឱ្យបានទាន់ពេលវេលា និងធានាថា ពួកគាត់អាចមានសមត្ថភាពគ្រប់គ្រាន់ក្នុងការប្រកួតប្រជែងក្នុងទីផ្សារការងារទាំងពេលបច្ចុប្បន្ន និងអនាគត។ ម្យ៉ាងវិញទៀត សាកលវិទ្យាល័យក៏បានជំរុញឱ្យមានកិច្ចសហប្រតិបត្តិការល្អជាមួយនឹងក្រុមហ៊ុនបច្ចេកវិទ្យាធំៗជាច្រើនដើម្បីធ្វើការផ្លាស់ប្តូរចំណេះដឹង និងផ្តល់ឱកាសការងារទៅកាន់និស្សិត ដោយធ្វើយ៉ាងណាលើកទឹកចិត្តឱ្យពួកគេខិតខំប្រឹងប្រែងឱ្យកាន់តែខ្លាំងពីបច្ចេកវិទ្យា៕
October 4, 2018
BIC ជាអ្នកភ្ញាស់បណ្តុំសហគ្រាសធុនតូច និងមធ្យមនៅកម្ពុជាឱ្យមានភាពរឹងមាំ
ភ្នំពេញ៖ ក្រសួងឧស្សាហកម្ម និងសិប្បកម្មបានសហការជាមួយសមាគមសហគ្រិនវ័យក្មេងកម្ពុជា សមាគមសហគ្រិនស្ត្រីកម្ពុជា សភាពាណិជ្ជកម្មកម្ពុជា និងអង្គការគំនិតផ្តួចផ្តើមអាជីវកម្មមេគង្គ(MBI)បង្កើតមជ្ឈមណ្ឌលព័ត៌មានអាជីវកម្ម(BIC) ពង្រឹងដល់ឧស្សាហកម្មខ្នាតតូច និងមធ្យមនៅកម្ពុជាឱ្យកាន់តែរឹងមាំ។
កម្មវិធីនេះទទួលបានការឧបត្ថម្ភពីធនាគារអភិវឌ្ឍន៍អាស៊ី(ADB), ជំនួយអូស្ត្រាលី WEG ,GMT , CAM-ASEAN ,LG,Manulife និងAdvanced Glory Logistic ដែលជួយជំរុញឱ្យមជ្ឈមណ្ឌលព័ត៌មានអាជីវកម្ម(BIC)ដំណើរការទៅប្រកបដោយជោគជ័យ។
ឯកឧត្តមទេសរដ្ឋមន្ត្រី ចម ប្រសិទ្ធ រដ្ឋមន្រ្តីក្រសួងឧស្សាហកម្ម និងសិប្បកម្ម បានលើកឡើងពីអត្ថប្រយោជន៍នៃការបង្កើត BIC ដោយបានសង្កត់ធ្ងន់ថា៖ BIC យើងអាចចាត់ទុកថាជាអ្នក ភ្ញាស់បណ្តុំសហគ្រាសធុនតូច និងមធ្យមឱ្យមានភាពរឹងមាំ និងមានលក្ខណៈប្រកួតប្រជែង ហើយក៏បានរួមចំណែកក្នុងការអនុវត្តគោលនយោបាយអភិវឌ្ឍន៍វិស័យឧស្សាហកម្មកម្ពុជា 2015-2025ផងដែរ។
BIC ក៍បានចូលរួមលើកកម្ពស់ប្រសិទ្ធភាព និងតម្លាភាពនៃការអនុវត្តច្បាប់ និងលិខិតបទដ្ឋានគតិយុត្តនានាពាក់ព័ន្ធ និងសហគ្រាសឯកជន។ ម៉្យាង BIC មិនមែនគ្រាន់ជាបណ្តុំព័ត៌មានអាជីវកម្មទេតែបានផ្តល់ជូននូវសេវាកម្មដូចជា៖ ការផ្តល់នូវការប្រឹក្សាផ្នែកហិរញវត្ថុ និងប្រព័ន្ធទិន្នន័យផ្តល់ការប្រឹក្សាលើដំណើរការអាជីវកម្ម និងភាពអនុលោមសម្រាប់ SMEs ដោយផ្តល់នូវសេវាផ្នែកពាណិជ្ជកម្ម និងជំនាញការសម្រាប់ពិភាក្សាការងារពាក់ព័ន្ធ និងSMEs។
ក្រៅពីនោះឯកឧត្តមទេសរដ្ឋមន្ត្រីបានបន្ថែមចំណុចជាគន្លឹះមួយចំនួនទៀត ធ្វើយ៉ាងណាជួយជ្រោមជ្រែងឱ្យ SMEs អាចរស់ដោយខ្លួនឯងបាន ហើយគួរដាក់បញ្ចូលចំណេះដឹងផ្សេងៗ ទាក់ទងនឹងផែនការអាជីវកម្ម ជំនាញទីផ្សារ ព័ត៌មានទីផ្សារ និងបញ្ជីប្រព័ន្ធគណនេយ្យជាដើម៕
August 9, 2017