ឥណ្ឌា - La Reine Media

រកស៊ីក្នុងវិស័យណាខ្លះដែលងាយក្លាយជាមហាសេដ្ឋីបំផុត?

ហិរញ្ញវត្ថុ – វិនិយោគ បង្កើតមហាសេដ្ឋីជាង 420 នាក់នៅលើពិភពលោក ក្នុងនោះ Warren Buffett ដែលជាអគ្គនាយកប្រតិបត្តិរបស់ក្រុមហ៊ុន Berkshire Hathaway គឺជាអ្នកមានជាងគេបង្អស់។

ដើមខែនេះ ទស្សនាវដ្ដី Forbes បានប្រកាសបញ្ជីឈ្មោះមហាសេដ្ឋីពិភពលោកសម្រាប់ឆ្នាំ2024។ ឆ្នាំនេះ ពិភពលោកមានមហាសេដ្ឋីសរុបចំនួន 2,781នាក់ ច្រើនជាង 141នាក់បើធៀបនឹងឆ្នាំកន្លង។ ក្នុងនោះ ទ្រព្យរបស់មហាសេដ្ឋីទាំងនេះក៏មានច្រើនជាងមុន ដោយមានរហូតដល់ 14,200 ពាន់លានដុល្លារអាម៉េរិក។ យោងតាមស្ថិតិរបស់ Forbes មហាសេដ្ឋីភាគច្រើនរកស៊ីក្នុងវិស័យចំនួន10 ដែលមានដូចខាងក្រោម៖

1/ ហិរញ្ញវត្ថុ-វិនិយោគ

-ចំនួនមហាសេដ្ឋី៖ 427នាក់
-អត្រានៅក្នុងបញ្ជី៖ 15%
-អ្នកមានជាងគេ៖ Warren Buffett (អាម៉េរិក) (133ពាន់លានដុល្លារអាម៉េរិក)

2/ បច្ចេកវិទ្យា

-ចំនួនមហាសេដ្ឋី៖ 342នាក់
-អត្រានៅក្នុងបញ្ជី៖ 12%
-អ្នកមានជាងគេ៖ Jeff Bezos (អាម៉េរិក) ( 194ពាន់លានដុល្លារអាម៉េរិក)

3/ ផលិត

-ចំនួនមហាសេដ្ឋី៖ 328នាក់
-អត្រានៅក្នុងបញ្ជី៖ 12%
-អ្នកមានជាងគេ៖ Reinhold Wuerth (អាល្លឺម៉ង់) (33.6ពាន់លានដុល្លារអាម៉េរិក)

4/ សម្លៀកបំពាក់-លក់រាយ

-ចំនួនមហាសេដ្ឋី៖ 285នាក់
-អត្រានៅក្នុងបញ្ជី៖ 10%
-អ្នកមានជាងគេ៖ Bernard Arnault (បារាំង) (233ពាន់លានដុល្លារអាម៉េរិក)

5/ អាហារ – ភេសជ្ជៈ

-ចំនួនមហាសេដ្ឋី៖ 210នាក់
-អត្រានៅក្នុងបញ្ជី៖ 8%
-អ្នកមានជាងគេ៖ Zhong Shanshan (ចិនដីគោក) (62.3ពាន់លានដុល្លារអាម៉េរិក)

6/ ពហុវិស័យ

-ចំនួនមហាសេដ្ឋី៖ 201នាក់
-អត្រានៅក្នុងបញ្ជី៖ 7%
-អ្នកមានជាងគេ៖ Mukesh Ambani (ឥណ្ឌា) (116ពាន់លានដុល្លារអាម៉េរិក)

7/ សុខាភិបាល

-ចំនួនមហាសេដ្ឋី៖ 197នាក់
-អត្រានៅក្នុងបញ្ជី៖ 7%
-អ្នកមានជាងគេ៖ Dilip Shanghvi (ឥណ្ឌា) (22.6ពាន់លានដុល្លារអាម៉េរិក)

8/ អចលនាទ្រព្យ

-ចំនួនមហាសេដ្ឋី៖ 190នាក់
-អត្រានៅក្នុងបញ្ជី៖ 7%
-អ្នកមានជាងគេ៖ Lee Shau Kee (ចិនហុងកុង) (27.7ពាន់លានដុល្លារអាម៉េរិក)

9/ ប្រព័ន្ធផ្សព្វផ្សាយ – កម្សាន្ត

-ចំនួនមហាសេដ្ឋី៖ 104នាក់
-អត្រានៅក្នុងបញ្ជី៖ 4%
-អ្នកមានជាងគេ៖ Rupert Murdoch (អាម៉េរិកដើមកំណើតអូស្ត្រាលី) (19.5 ពាន់លានដុល្លារអាម៉េរិក)។

10/ ថាមពល

-ចំនួនមហាសេដ្ឋី៖ 98នាក់
-អត្រានៅក្នុងបញ្ជី៖ 4%
-អ្នកមានជាងគេ៖ Harold Hamm (អាម៉េរិក) (18.5ពាន់លានដុល្លារអាម៉េរិក)។

April 25, 2024

យានលើឋានព្រះចន្ទរបស់ជប៉ុន «នៅមានជីវិត» ក្រោយដេកកករយៈពេលបីយប់

យានស្រាវជ្រាវ SLIM របស់ប្រទេសជប៉ុន បង្កើតបានកំណត់ត្រាដ៏អស្ចារ្យ នៅពេលរស់ឡើងវិញបីដង ក្រោយពីបានឆ្លងកាត់រាត្រីដ៏សែនត្រជាក់នៅលើឋានព្រះចន្ទដែលមានសីតុណ្ហភាព -183 អង្សាសេ, -130 អង្សាសេ និង -170 អង្សាសេ។

អង្គការស្រាវជ្រាវអភិវឌ្ឍវិស័យអវកាសចរណ៍ជប៉ុន (JAXA) នាថ្ងៃទី 24 មេសានេះ បានឱ្យដឹងថា យានចុះចតឆ្លាតវៃលើឋានព្រះចន្ទ (SLIM) របស់ប្រទេសនេះ បន្តបង្កើតបានកំណត់ត្រាថ្មី នោះគឺ «នៅមានជីវិតក្រោយរាត្រីព្រះចន្ទទីបីដែលមានបរិស្ថានមហាសែនត្រជាក់។

យាន SLIM បានចុះចតលើផ្ទៃព្រះចន្ទកាលពីខែមករាកន្លងទៅ ដែលនេះបានជួយឱ្យជប៉ុនមានឈ្មោះជាប្រទេសទី 5 លើពិភពលោក ដែលមានយានចុះចតដោយជោគជ័យលើឋានព្រះចន្ទ បន្ទាប់ពីអតីតសូវៀត សហរដ្ឋអាម៉េរិក ចិន និងឥណ្ឌា។

April 24, 2024

Top 10 អ្នកមានជាងគេលើពិភពលោកក្នុងឆ្នាំ 2024

Mark Zuckerberg ដែលជាម្ចាស់ Meta Platforms បានវិលមកកាន់ top 10 នៃក្រុមមនុស្សដែលមានទ្រព្យច្រើនជាងគេលើពិភពលោក ទន្ទឹមនឹងបណ្ដាឈ្មោះដែលគេស្គាល់ច្រើន មានដូចជា Bernard Arnault និង Elon Musk ជាដើម បន្ទាប់ពីបាត់មុខអស់ 3 ឆ្នាំ។

ទីមួយ៖ Barnard Arnault

ទ្រព្យ៖ 233 ពាន់លានដុល្លារអាម៉េរិក
ប្រភពទ្រព្យ៖ LVMH
សញ្ជាតិ៖ បារាំង

ទីពីរ៖ Elon Musk

ទ្រព្យ៖ 195 ពាន់លានដុល្លារអាម៉េរិក
ប្រភពទ្រព្យ៖ Tesla, SpaceX
សញ្ជាតិ៖ អាម៉េរិក

ទីបី៖ Jeff Bezos

ទ្រព្យ៖ 194 ពាន់លានដុល្លារអាម៉េរិក
ប្រភពទ្រព្យ៖ Amazon
សញ្ជាតិ៖ អាម៉េរិក

ទីបួន៖ Mark Zuckerberg

ទ្រព្យ៖ 177 ពាន់លានដុល្លារអាម៉េរិក
ប្រភពទ្រព្យ៖ Facebook
សញ្ជាតិ៖ អាម៉េរិក

ទីប្រាំ៖ Larry Ellison

ទ្រព្យ៖ 141 ពាន់លានដុល្លារអាម៉េរិក
ប្រភពទ្រព្យ៖ Oracle
សញ្ជាតិ៖ អាម៉េរិក

ទីប្រាំមួយ៖ Warren Buffett

ទ្រព្យ៖ 133 ពាន់លានដុល្លារអាម៉េរិក
ប្រភពទ្រព្យ៖ Berkshire Hathaway
សញ្ជាតិ៖ អាម៉េរិក

ទីប្រាំពីរ៖ Bill Gates

ទ្រព្យ៖ 128 ពាន់លានដុល្លារអាម៉េរិក
ប្រភពទ្រព្យ៖ Microsoft
សញ្ជាតិ៖ អាម៉េរិក

ទីប្រាំបី៖ Steve Ballmer

ទ្រព្យ៖ 121 ពាន់លានដុល្លារអាម៉េរិក
ប្រភពទ្រព្យ៖ Microsoft
សញ្ជាតិ៖ អាម៉េរិក

ទីប្រាំបួន៖ Mukesh Ambani

ទ្រព្យ៖ 116 ពាន់លានដុល្លារអាម៉េរិក
ប្រភពទ្រព្យ៖ ពហុជំនួញ
សញ្ជាតិ៖ ឥណ្ឌា

ទីដប់៖ Larry Page

ទ្រព្យ៖ 114 ពាន់លានដុល្លារអាម៉េរិក
ប្រភពទ្រព្យ៖ Google
សញ្ជាតិ៖ អាម៉េរិក

April 4, 2024

ការប្រើប្រាស់ប្រាក់រៀលតាមប្រព័ន្ធអេឡិចត្រូនិកក្នុងឆ្នាំ 2023 កើនឡើងខ្ពស់

ក្នុងឆ្នាំ 2023 ប្រតិបត្តិការទូទាត់ដោយប្រើប្រាស់ប្រាក់រៀលតាមប្រព័ន្ធឌីជីថល់ បានកើនឡើង 44% ធៀបនឹងឆ្នាំ 2022 និងខ្ពស់ជាងកំណើននៃប្រតិបត្តិការទូទាត់អេឡិចត្រូនិកជាប្រាក់ដុល្លារអាមេរិក ដែលកើនក្នុងអត្រា 3.1%។

តួលេខខាងលើនេះ ត្រូវបានលើកឡើងដោយលោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា នៅក្នុងសិក្ខាសាលាស្តីពី «ខួបលើកទី 44 នៃការដាក់ឱ្យចរាចរប្រាក់រៀលឡើងវិញ ក្រោមប្រធានបទ៖ ដំណើរឆ្ពោះទៅមុខនៃប្រាក់រៀល និងប្រព័ន្ធបាគង» ដែលបានធ្វើឡើងនៅថ្ងៃទី 20 ខែមីនា ឆ្នាំ 2024។

ក្នុងចំណោមវិធានការនានាដែលធ្វើឡើងដើម្បីលើកកម្ពស់ប្រាក់រៀល ប្រព័ន្ធទូទាត់អេឡិចត្រូនិក ជាពិសេសប្រព័ន្ធបាគង បានរួមចំណែកយ៉ាងសំខាន់ក្នុងការសម្រួលដល់ការទូទាត់ប្រាក់រៀលឱ្យកាន់តែមានភាពទាន់សម័យ ឆាប់រហ័ស និងចំណាយតិច។ លើសពីនេះ ក៏បានជំរុញការតភ្ជាប់ប្រព័ន្ធទូទាត់ជាមួយប្រទេសជិតខាង និងក្នុងតំបន់ ដើម្បីឱ្យប្រជាពលរដ្ឋកម្ពុជា ដែលមានគណនីជាប្រាក់រៀល អាចទូទាត់តាមប្រព័ន្ធយ្យូអរកូដ (QR code) បានងាយស្រួលនៅក្នុងប្រទេសទាំងនោះ។

លោកជំទាវ ជា សិរី បានឱ្យដឹងថា បច្ចុប្បន្ន កម្ពុជាបានតភ្ជាប់ប្រព័ន្ធទូទាត់ជាមួយប្រទេសថៃ វៀតណាម និងឡាវ ព្រមទាំងក្រុមហ៊ុនផ្តល់សេវាទូទាត់អន្តរជាតិមួយចំនួន ជាមួយនឹងផែនការតភ្ជាប់ជាមួយប្រទេសផ្សេងទៀតក្នុងតំបន់ដូចជា ចិន និងឥណ្ឌា ជាដើម។

ទេសាភិបាលធនាគារជាតិនៃកម្ពុជា ក៏បានអំពាវនាវ ដល់គ្រប់ភាគីពាក់ព័ន្ធទាំងអស់ បន្តរួមចំណែកប្រើប្រាស់ប្រាក់រៀល នៅក្នុងប្រតិបត្តិការរបស់ខ្លួនឱ្យកាន់តែច្រើនឡើង។ លោកជំទាវថ្លែងថា ការប្រើប្រាស់ប្រាក់រៀលកាន់តែច្រើន នឹងជួយពង្រឹងអធិបតេយ្យជាតិ និងការកសាងសង្គមជាតិឱ្យកាន់តែរីកចម្រើន និងប្រកបដោយនិរន្តរភាព។

March 20, 2024

រកឃើញ «សមុទ្រអវកាស» មានទឹកច្រើនជាងបីដង ធៀបនឹងផែនដី

នៅទីឋានដែលភពមួយ ឬច្រើនជិតកកើតឡើង ក្រុមអ្នកតារាសាស្ត្របានរកឃើញទឹកក្នុងបរិមាណច្រើនជាងបីដង បើធៀបនឹងទឹកទាំងអស់នៅក្នុងមហាសមុទ្រលើភពផែនដី។

ដោយការប្រើប្រាស់ស្ថានីយតារាសាស្ត្រ ALMA ដែលជាឧបករណ៍សង្កេតរលកវិទ្យុអានុភាពខ្លាំងបំផុតលើពិភពលោក និងមានទីតាំងនៅលើសមុទ្រខ្សាច់ Atacama របស់ប្រទេសស៊ីលី (Chile) ក្រុមអ្នកវិទ្យាសាស្ត្របានរកឃើញ «សមុទ្រអវកាស» ដ៏មហិមា ស្ថិតនៅតំបន់មួយដែលមានចម្ងាយពីផែនដី 450 ឆ្នាំពន្លឺ នៅក្នុងបណ្ដុំផ្កាយ Taurus។

នោះគឺជាកូនផ្កាយវ័យក្មេងមួយដួង ត្រូវបានព័ទ្ធជុំវិញដោយថាសធូលីដែលបង្ហាញថា ភពថ្មីដំបូងជិតកកើតឡើង និងត្រូវបានហៅថា HL Tauri ហើយនៅទីនោះមានផ្ទុកទឹកក្នុងបរិមាណដ៏ច្រើន នឹកស្មានមិនដល់។

តាមការគណនារបស់ក្រុមអ្នកវិទ្យាសាស្ត្រ បរិមាណទឹកនៅទីនោះអាចស្មើនឹងទឹកទាំងអស់នៅក្នុងមហាសមុទ្រប៉ាស៊ីហ្វិក អាត្លង់ទិក មហាសមុទ្រឥណ្ឌា អង់តាកទិក និងមហាសមុទ្រខាងត្បូង (Southern Ocean) បូកចូលគ្នា រួចគុណនឹងបី។

យោងតាមអ្នកវិទ្យាសាស្ត្រមកពីសាកលវិទ្យាល័យ Milan ប្រទេសអ៊ីតាលី ការរកឃើញនេះបង្ហាញថា វត្តមានរបស់ទឹកអាចជះឥទ្ធិពលយ៉ាងដូចម្ដ៉េច ដល់ការរីកចម្រើនរបស់ប្រព័ន្ធផ្កាយ។

អ្វីដែលយើងកំពុងមើលឃើញនៅក្នុងបណ្ដុំផ្កាយ Taurus អាចជារូបភាពដូចប្រព័ន្ធព្រះអាទិត្យកាលពី 4.5 ពាន់លានឆ្នាំមុន គ្រាដែល «ពន្លក» របស់ភពផែនដី ក៏ដូចជាបណ្ដាភពជាបងប្អូន កំពុងកកើតពីថាសធូលីដ៏សែនក្រាស់។

ពិសេសជាងនេះ យើងក៏ទំនងជាកំពុងសម្លឹងមើលទៅលើរូបភាពកាលពីវ័យក្មេងជាង 4.5 ពាន់លានឆ្នាំរបស់ភពផែនដី។

បរិមាណទឹកក្នុង HL Tauri មិនបានបែងចែកស្មើគ្នា ដោយទឹកប្រមូលផ្ដុំច្រើនជាងគេនៅត្រង់ចង្អូរមួយក្នុងថាសធូលីដែលជាដើមកំណើតរបស់ភព (protoplanetary disk)។ នេះបើតាមទំព័រ Space.com ។

បណ្ដាចង្អូរក្នុងថាសដើមកំណើតភពនេះ បានកកើតឡើងគ្រាដែលទីឋានណាមួយនោះ ឧស្ម័ន ធូលីប្រមូលផ្ដុំគ្នាក្លាយជាពន្លកភព។ ដូច្នេះ នៅក្នុងតំបន់ដែលមានទឹកច្រើននោះ ភពមួយទំនងជាកំពុងចាប់កំណើត។

យើងពិតជាកំពុងសម្លឹងមើលចំភពមួយដែលរាប់ពាន់លានឆ្នាំក្រោយ នឹងមានអរិយធម៌មួយដែលដូចទៅនឹងមនុស្សជាតិបច្ចុប្បន្ន ជាទីដែលមានភ្នំ បឹង ទន្លេនៅលើទ្វីប និងមហាសមុទ្រធំធេង។

ការរកឃើញនេះមិនត្រឹមតែជាជំហានដ៏សំខាន់ក្នុងការយល់ដឹងរបស់មនុស្សជាតិអំពីការកកើតរបស់ភព ប៉ុន្តែក៏ជាសមិទ្ធផលធំរបស់ ALMA។

March 12, 2024

ប្រទេសពីរក្នុងចំណោមមហាអំណាចសេដ្ឋកិច្ចធំៗទាំងដប់របស់ពិភពលោក កំពុងជួបវិបត្តិសេដ្ឋកិច្ច

ចក្រភពអង់គ្លេស និងជប៉ុន បាន និងកំពុងធ្លាក់ចូលក្នុងវិបត្តិសេដ្ឋកិច្ចចាប់ពីដំណាក់កាលចុងឆ្នាំ 2023 ខណៈដែលសហរដ្ឋអាម៉េរិក បន្តទទួលបានសញ្ញាណវិជ្ជមានគួរឱ្យមានសុទិដ្ឋិនិយមជាងមុន។

មហាអំណាចសេដ្ឋកិច្ចទាំងដប់របស់ពិភពលោក រួមចំណែកយ៉ាងធំធេងទៅក្នុងផលិតផលក្នុងស្រុកសរុប (GDP) ទូទាំងសកលលោក និងមានឥទ្ធិពលយ៉ាងខ្លាំងក្លាដល់គោលនយោបាយសេដ្ឋកិច្ច និងពាណិជ្ជកម្មអន្តរជាតិ។ ក៏ប៉ុន្តែ ពីរប្រទេសក្នុងចំណោមនោះ ពោលគឺ ជប៉ុន និងអង់គ្លេស ថ្មីៗនេះបានប្រកាសអំពីស្ថានភាពសេដ្ឋកិច្ច ដែលធ្លាក់ចូលក្នុងវិបត្តិ ក្នុងរយៈពេលពីរត្រីមាសជាបន្តបន្ទាប់។ ចំណែកមហាអំណាចសេដ្ឋកិច្ចទាំង 8 ផ្សេងទៀត បានឃើញកំណើនសេដ្ឋកិច្ចងើបឡើងវិញប្រកបដោយទំនុកចិត្ត។

ខាងក្រោមនេះគឺជាស្ថានភាពសេដ្ឋកិច្ចរបស់ Top 10 នៃប្រទេសមហាអំណាចសេដ្ឋកិច្ចទាំងដប់ លើពិភពលោក នៅក្នុងឆ្នាំ 2024 ដោយយោងទៅលើការវិភាគទិន្នន័យរបស់មូលនិធិរូបិយវត្ថុអន្តរជាតិ (IMF) ដែលគិតត្រឹមថ្ងៃទី 07 ខែកុម្ភៈ ឆ្នាំ 2024៖

សហរដ្ឋអាម៉េរិក

GDP៖ 27,974 ពាន់លានដុល្លារ
GDP ជាមធ្យមសម្រាប់មនុស្សម្នាក់៖ 83 ពាន់ដុល្លារ
កំណើន GDP ប្រចាំឆ្នាំ៖ 1.5%

ចាប់ពីឆ្នាំ 1960 ដល់បច្ចុប្បន្ន សហរដ្ឋអាម៉េរិក នៅតែរក្សាបានតំណែងជាមហាអំណាចសេដ្ឋកិច្ចទីមួយលើពិភពលោក។

ប្រទេសចិន

GDP៖ 18,566 ពាន់លានដុល្លារអាម៉េរិក
GDP ជាមធ្យមសម្រាប់មនុស្សម្នាក់៖ 13 ពាន់ដុល្លារ
កំណើន GDP ប្រចាំឆ្នាំ៖ 4.2%

ប្រទេសនេះបានហក់ពីចំណាត់ថ្នាក់មហាអំណាចសេដ្ឋកិច្ចទីបួនកាលពីឆ្នាំ 1960 ឡើងមកចំណាត់ថ្នាក់ទីពីរនៅក្នុងប៉ុន្មានឆ្នាំចុងក្រោយនេះ។

ប្រទេសអាល្លឺម៉ង់

GDP៖ 4,730 ពាន់លានដុល្លារ
GDP ជាមធ្យមសម្រាប់មនុស្សម្នាក់៖ 56 ពាន់ដុល្លារ
កំណើន GDP ប្រចាំឆ្នាំ៖ 0.9%

ប្រទេសជប៉ុន

GDP៖ 4,291 ពាន់លានដុល្លារ
GDP ជាមធ្យមសម្រាប់មនុស្សម្នាក់៖ 34 ពាន់ដុល្លារ
កំណើន GDP ប្រចាំឆ្នាំ៖ 1.0%

ប្រទេសឥណ្ឌា

GDP៖ 4,112 ពាន់លានដុល្លារ
GDP ជាមធ្យមសម្រាប់មនុស្សម្នាក់៖ 2.8 ពាន់ដុល្លារ
កំណើន GDP ប្រចាំឆ្នាំ៖ 6.3%

ចក្រភពអង់គ្លេស

GDP៖ 3,592 ពាន់លានដុល្លារ
GDP ជាមធ្យមសម្រាប់មនុស្សម្នាក់៖ 52 ពាន់ដុល្លារ
កំណើន GDP ប្រចាំឆ្នាំ៖ 0.6%

ប្រទេសបារាំង

GDP៖ 3,182 ពាន់លានដុល្លារ
GDP ជាមធ្យមសម្រាប់មនុស្សម្នាក់៖ 48 ពាន់ដុល្លារ
កំណើន GDP ប្រចាំឆ្នាំ៖ 1.3%

ប្រទេសអ៊ីតាលី

GDP៖ 2,280 ពាន់លានដុល្លារ
GDP ជាមធ្យមសម្រាប់មនុស្សម្នាក់៖ 38 ពាន់ដុល្លារ
កំណើន GDP ប្រចាំឆ្នាំ៖ 0.7%

ប្រទេសប្រេស៊ីល

GDP៖ 2,272 ពាន់លានដុល្លារ
GDP ជាមធ្យមសម្រាប់មនុស្សម្នាក់៖ 11 ពាន់ដុល្លារ
កំណើន GDP ប្រចាំឆ្នាំ៖ 1.5%

ប្រទេសកាណាដា

GDP៖ 2,242 ពាន់លានដុល្លារ
GDP ជាមធ្យមសម្រាប់មនុស្សម្នាក់៖ 55 ពាន់ដុល្លារ
កំណើន GDP ប្រចាំឆ្នាំ៖ 1.6%

February 26, 2024

សេណារីយ៉ូណាដែលធ្វើឱ្យតម្លៃមាសពិភពលោកឡើងដល់ 361 ដុល្លារ/ជី

តម្លៃមាសអាចកើន 50% ឡើងដល់ 3,000 ដុល្លារអាម៉េរិកក្នុងមួយអោន (1 អោន (ounce) = 8.29426 ជី) នៅក្នុងរង្វង់ពី 12 ទៅ 18 ខែទៀត បើសិនសេដ្ឋកិច្ចពិភពលោកធ្លាក់ចូលក្នុងឱនភាពជ្រៅជាងបច្ចុប្បន្ន និងបណ្ដាធនាគារកណ្ដាលបង្កើនការទិញ។ នេះបើតាមធនាគារ Citi។

តម្លៃមាសប្រគល់ភ្លាមពិភពលោក បច្ចុប្បន្នត្រូវបានជួញដូរក្នុងតម្លៃ 2,016 ដុល្លារក្នុងមួយអោន ទាបជាងឆ្ងាយបើធៀបនឹង 2,135 ដុល្លារកាលពីខែធ្នូ 2023។ ក៏ប៉ុន្តែ ក្រុមអ្នកវិភាគនៅធនាគារ Citi យល់ថា តម្លៃមាសនេះអាចឡើងដល់ 3,000 ដុល្លារ/អោន នៅក្នុងរង្វង់ពី 12 ទៅ 18 ខែខាងមុខ។

យោងតាម Aakash Doshi ប្រធានក្រុមអ្នកវិភាគទំនិញតំបន់អាម៉េរិកខាងជើង ប្រចាំធនាគារ Citi សេណារីយ៉ូដែលមានភាគរយកើតឡើងខ្ពស់ជាងគេ ដែលនាំឱ្យមាសឡើងថ្លៃដល់ 3,000 ដុល្លារ/អោន គឺនិន្នាការ «មិនប្រើប្រាស់ប្រាក់ដុល្លារអាម៉េរិក» នៅតាមធនាគារជាតិនៃបណ្ដាប្រទេសទើបលេចធ្លោ។ ប្រការនេះអាចនាំឱ្យកម្លាំងទិញមាសរបស់ធនាគារទាំងនេះកើនឡើងទ្វេដង។ បច្ចុប្បន្ន គ្រឿងអលង្ការគឺជាកម្លាំងរុញច្រានចម្បងគេសម្រាប់តម្រូវការមាសលើពិភពលោក។

«និន្នាការនេះកំពុងកើតឡើង ប៉ុន្តែមានសភាពយឺតយ៉ាវខ្លាំង។ បើសិនត្រូវបានជំរុញល្បឿន វិបត្តិទំនុកចិត្តលើប្រាក់ដុល្លារអាម៉េរិក នឹងកើតឡើង» Aakash Doshi ឱ្យដឹងដូច្នេះ។

Citi ឱ្យដឹងថា ប៉ុន្មានឆ្នាំចុងក្រោយនេះ កម្លាំងទិញមាសរបស់បណ្ដាធនាគារកណ្ដាល បានកើនឡើងដល់កម្រិតខ្ពស់បំផុត នៅពេលពួកគេស្វែងរកវិធីធ្វើពិពិធកម្មទុនបម្រុង និងកាត់បន្ថយហានិភ័យឥណទាន។ ធនាគារជាតិចិន និងរុស្ស៊ី ទិញមាសច្រើនជាងគេបំផុត និងតាមពីក្រោយដោយប្រទេសឥណ្ឌា តួកគី និងប្រេស៊ីល។

របាយការណ៍របស់ក្រុមប្រឹក្សាមាសពិភពលោក (WGC) កាលពីខែមករា បង្ហាញថា បណ្ដាធនាគារកណ្ដាលបានទិញមាសជាង 1,000 តោន ក្នុងរយៈពេលពីរឆ្នាំជាប់ៗគ្នា។ «បើសិនតួលេខនេះច្រើនជាងទ្វេដង ពោលគឺឡើងដល់ 2,000 តោន យើងយល់ថា នេះនឹងជាកម្លាំងទាញដ៏ធំសម្រាប់តម្លៃមាស» Doshi បញ្ជាក់ដូច្នេះ។

ទន្ទឹមនឹងនេះ ការដែលសេដ្ឋកិច្ចពិភពលោកធ្លាក់ចូលក្នុងឱនភាពជ្រៅ ក៏អាចទាញតម្លៃមាសឱ្យឡើងដល់ 3,000 ដុល្លារក្នុងមួយអោន ព្រោះថា សេណារីយ៉ូនេះធ្វើឱ្យធនាគារកណ្ដាលអាម៉េរិក (Fed) បញ្ចុះអត្រាការប្រាក់កម្រិតខ្ពស់បំផុត។ ប៉ុន្តែ Citi ឱ្យដឹងថា សេណារីយ៉ូនេះមានលទ្ធភាពកើតឡើងមិនខ្ពស់។

ក្រៅពីនេះ Stagflation (កំណើនសេដ្ឋកិច្ចទាប អមនឹងអតិផរណា) ក៏អាចជាកត្តារុញតម្លៃមាសឱ្យឡើងខ្ពស់ ដោយសារមាសគឺជាទ្រព្យសុវត្ថិភាពក្នុងពេលមានអស្ថិរភាពសេដ្ឋកិច្ច – នយោបាយ។ ក៏ប៉ុន្តែ សេណារីយ៉ូនេះក៏មានលទ្ធភាពកើតឡើងក្នុងកម្រិតទាប។

ក្នុងស្ថានភាពធម្មតា Citi ព្យាករថា តម្លៃមាសជាមធ្យមនឹងត្រូវបានជួញដូរក្នុងរង្វង់ 2,000 ដុល្លារ/អោន នៅពាក់កណ្ដាលដើមឆ្នាំ និងឡើងដល់ 2,150 ដុល្លារ នៅពាក់កណ្ដាលចុងឆ្នាំ 2024។ ធនាគារនេះរំពឹងថា នៅចុងឆ្នាំនេះ តម្លៃមាសអាចមានលទ្ធភាពហក់ឡើងដល់កម្រិតថ្មីមួយទៀត៕

February 22, 2024

ជប៉ុនប្រកាសថា យាន SLIM នៅលើឋានព្រះចន្ទបានដំណើរការឡើងវិញ

យានចុះចតលើឋានព្រះចន្ទ SLIM របស់ប្រទេសជប៉ុន ដំណើរការឡើងវិញ និងបានថតរូបភាពថ្មមួយផ្ទាំងដែលស្ថិតនៅក្បែរនោះ កាលពីថ្ងៃទី 28 មករា 2024។

ក្រោយពីបានចុះចតលើឋានព្រះចន្ទកាលពីថ្ងៃទី 20 មករា 2024 អង្គការស្រាវជ្រាវអវកាសជប៉ុន (JAXA) ប្រកាសថា SLIM មានបញ្ហាប្រព័ន្ធសូឡា នាំឱ្យយានចុះចតរបស់ពួកគេមិនអាចផលិតអគ្គិសនី។ ក៏ប៉ុន្តែ JAXA បានភ្ជាប់ទំនាក់ទំនងជាមួយ SLIM ដោយជោគជ័យ និងបើកដំណើរការយាននេះឡើងវិញ។ នេះបើតាមប្រកាសរបស់ JAXA នាថ្ងៃនេះ។ JAXA ក៏បានចែករំលែករូបថតមួយសន្លឹកដែលបង្ហាញពីថ្មមួយផ្ទាំងនៅក្បែរយាន SLIM ផងដែរ។

យានអវកាស SLIM ឬហៅថា Moon Sniper បានចុះចតលើឋានព្រះចន្ទដោយជោគជ័យកាលពីវេលាម៉ោង 22 និង 20 នាទី ថ្ងៃទី 19 មករា 2024 ជួយឱ្យជប៉ុនក្លាយជាប្រទេសទីប្រាំដែលមានយានធ្វើសកម្មភាពនៅលើទីឋានរណបធម្មជាតិរបស់ផែនដី បន្ទាប់ពី សហរដ្ឋអាម៉េរិក សូវៀត ចិន និងឥណ្ឌា។

បច្ចុប្បន្ន ការបញ្ជូនយានទៅចុះចតលើឋានព្រះចន្ទ កំពុងក្លាយជារឿងប្រកួតប្រជែងមួយលើពិភពលោក។ ប្រទេសរុស្ស៊ី កូរ៉េខាងត្បូង និងអេមីរ៉ាតអារ៉ាប់រួម ក៏កំពុងរកវិធីបញ្ជូនយានទៅចុះចតលើឋានព្រះចន្ទ។ ក្នុងខែមករានេះ យានចុះចតលើឋានព្រះចន្ទ Peregrine របស់ក្រុមហ៊ុនអាម៉េរិក Astrobotic ជួបបញ្ហាលេចធ្លាយឥន្ធនៈ បន្ទាប់ពីបានហោះឡើង នាំឱ្យបេសកកម្មរបស់វាត្រូវបរាជ័យ។ ចំណែក NASA វិញក៏បានពន្យារពេលចំពោះគម្រោងនាំមនុស្សឡើងទៅជាន់ដីព្រះចន្ទនៅក្នុងកម្មវិធី Artemis ផងដែរ៕

January 29, 2024

យានអវកាសជប៉ុន អាចនឹងឈប់ដំណើរការ ក្រោយពីបានចុះចតលើផ្ទៃព្រះចន្ទ

យានស្រាវជ្រាវ SLIM របស់ប្រទេសជប៉ុន បានចុះចតលើឋានព្រះចន្ទដោយជោគជ័យនៅវេលាម៉ោង 21 និង 20 នាទី ថ្ងៃទី 19 មករា 2024 ប៉ុន្តែបញ្ហាផ្ទាំងសូឡាមិនផលិតអគ្គិសនីដូចការគ្រោងទុក អាចនាំឱ្យយាននេះឈប់ដំណើរការឆាប់ៗខាងមុខ។

យានអវកាសស្វ័យប្រវត្ត SLIM របស់អង្គការស្រាវជ្រាវអវកាសជប៉ុន (ចាសា – JAXA) បានចុះចតលើផ្ទៃព្រះចន្ទកាលពីថ្ងៃទី 19 មករា ជួយឱ្យជប៉ុនក្លាយជាប្រទេសទីប្រាំដែលបានបញ្ជូនយានទៅចុះចតដោយជោគជ័យលើឋានរណបធម្មជាតិរបស់ផែនដី។ យោងតាមទំព័រ Space បណ្ដាប្រទេសដែលធ្លាប់មានយានស្រាវជ្រាវនៅលើឋានព្រះចន្ទមុនជប៉ុន រួមមាន អតីតសូវៀត (រុស្ស៊ី) សហរដ្ឋអាម៉េរិក ប្រទេសចិន និងឥណ្ឌា។

ផ្ទាំងសូឡាលើយាន SLIM របស់ប្រទេសជប៉ុន ដែលកំពុងស្ថិតនៅលើផ្ទៃព្រះចន្ទ មិនអាចផលិតអគ្គិសនីដូចការគ្រោងទុក បន្ទាប់ពីបានចុះចត។ បើសិនបញ្ហានេះមិនត្រូវបានដោះស្រាយទាន់ពេល SLIM អាចនឹងត្រូវអស់ថាមពល និងឈប់ដំណើរការជារៀងរហូត ដោយសារតែប្រព័ន្ធថ្មផ្ទុកថាមពលអាចជួយឱ្យវាដំណើរការបានតែប៉ុន្មានម៉ោងប៉ុណ្ណោះ។

SLIM (Smart Lander for Investigating Moon) ត្រូវបានបាញ់បង្ហោះជាមួយនឹងកែវយឹតអវកាស XRISM។ XRISM ត្រូវបានដាក់ឱ្យដំណើរការនៅលើគន្លងគោចរកម្រិតទាបរបស់ផែនដី បន្ទាប់ពីត្រូវបានបាញ់បង្ហោះ ខណៈដែល SLIM បន្តហោះទៅកាន់ឋានព្រះចន្ទ។ SLIM បានហោះទៅដល់គន្លងតារាវិថីព្រះចន្ទកាលពីថ្ងៃទី 25 ធ្នូ 2023។

យានអវកាសនេះបានចាប់ផ្ដើមដំណើរការចុះចតនៅវេលាម៉ោង 21 នៃថ្ងៃទី 19 មករា 2024 ម៉ោងនៅកម្ពុជា ហើយ 20 នាទីក្រោយមក វាក៏បានចុះចតលើផ្ទៃព្រះចន្ទដោយជោគជ័យ៕

January 20, 2024

យានអវកាសសង្កេតមើលព្រះអាទិត្យដំបូងរបស់ឥណ្ឌា ហោះដល់គោលដៅដោយជោគជ័យ

ស្ថានីយសង្កេតព្រះអាទិត្យដំបូងរបស់ប្រទេសឥណ្ឌា បានហោះដល់គន្លងជុំវិញព្រះអាទិត្យដូចបានគ្រោងទុក។ នេះបើតាមអង្គការស្រាវជ្រាវអវកាសឥណ្ឌា (ISRO) ដែលបានប្រកាសកាលពីចុងសប្ដាហ៍កន្លង។

យានអវកាស Aditya-L1 បានហោះដល់ចំណុច Lagrange Point L1 ជាទីតាំងក្នុងអវកាសដែលមានចម្ងាយពីផែនដីប្រហែល 1.5 លានគីឡូម៉ែត្រ និងមើលឃើញព្រះអាទិត្យដោយពុំមានអ្វីមករារាំង។ នេះគឺជាការបើកផ្លូវឱ្យអ្នកវិទ្យាសាស្ត្របង្កើនការស្រាវជ្រាវអំពីព្រះអាទិត្យ-ផែនដី ពិសេសគឺអ្វីៗដែលកើតឡើងដោយសារព្រះអាទិត្យ។

Aditya-L1 ត្រូវបានបាញ់បង្ហោះកាលពីថ្ងៃទី 02 កញ្ញា 2023 បន្ទាប់ពី ISRO បានបញ្ជាឱ្យយានChandrayaan-3 ចុះចតនៅប៉ូលខាងត្បូងរបស់ព្រះចន្ទ កាលពីជិតពីរសប្ដាហ៍មុននោះ។

January 10, 2024

ស្ត្រីដំបូងគេលើពិភពលោកដែលមានទ្រព្យ 100 ពាន់លានដុល្លារអាម៉េរិក

Francoise Bettencourt Meyers ដែលជាស្ត្រីមានទ្រព្យសម្បត្តិច្រើនជាងគេលើពិភពលោក ទើបតែបានក្លាយជាស្ត្រីដំបូងគេបង្អស់ដែលមានទ្រព្យ 100 ពាន់លានដុល្លារអាម៉េរិក។

យោងតាមបញ្ជីចំណាត់ថ្នាក់មហាសេដ្ឋី Bloomberg Billionaire’s Index គិតត្រឹមថ្ងៃទី 28 ធ្នូ 2023 អ្នកស្រី Francoise Bettencourt Meyers ដែលជាអ្នកស្នងមរតកក្រុមហ៊ុន L’Oreal បានក្លាយជាមហាសេដ្ឋិនីដំបូងគេលើពិភពលោក ដែលមានទ្រព្យ 100 ពាន់លានដុល្លារអាម៉េរិក។

បច្ចុប្បន្ន អ្នកស្រីគឺជាអ្នកមានជាងគេលំដាប់ទី 12 លើពិភពលោក និងនៅពីលើមហាសេដ្ឋីឥណ្ឌា លោក Mukesh Ambani ទៀតផង។ ចាប់ពីដើមឆ្នាំ ទ្រព្យសម្បត្តិរបស់អ្នកស្រីបានកើនបន្ថែម 28.6 ពាន់លានដុល្លារ ដោយសារតែភាគហ៊ុន L’Oreal កើនឡើង 35%។

ចំណែកបញ្ជីចំណាត់ថ្នាក់មហាសេដ្ឋីរបស់ Forbes ក៏បានឱ្យដឹងថា ទ្រព្យសម្បត្តិរបស់អ្នកស្រី Bettencourt Meyers កើនជិតដល់ 100 ពាន់លានដុល្លារ ពោលគឺ 99.6 ពាន់លានដុល្លារអាម៉េរិក។

L’Oreal Group គឺជាក្រុមហ៊ុនផលិតគ្រឿងសម្អាងធំបំផុតលើពិភពលោក ដោយមានយីហោជាច្រើន មានដូចជា Lancome និង Maybelline ជាដើម។ កាលពីឆ្នាំ 2022 ក្រុមហ៊ុននេះរកបានប្រាក់ចំណូលជាង 38 ពាន់លានអឺរ៉ូ ដែលស្មើនឹង 42 ពាន់លានដុល្លារអាម៉េរិក៕

December 29, 2023

យានអវកាសជប៉ុន ហោះចូលដល់គន្លងតារាវិថីព្រះចន្ទ

យានអវកាស SLIM នឹងត្រៀមខ្លួនចុះចតលើផ្ទៃរបស់ព្រះចន្ទនៅក្នុងខែមករា ឆ្នាំ 2024 ដែលអាចនាំឱ្យជប៉ុនក្លាយជាប្រទេសទីប្រាំធ្វើបានដូច្នេះ បន្ទាប់ពី សូវៀត សហរដ្ឋអាម៉េរិក ចិន និងឥណ្ឌា។

យានចុះចតលើឋានព្រះចន្ទដោយស្វ័យប្រវត្ត SLIM របស់ជប៉ុន បានហោះដល់គន្លងតារាវិថីព្រះចន្ទកាលពីថ្ងៃទី 25 ធ្នូ 2023 ដូចការគ្រោងទុក។ នេះបើតាមទីភ្នាក់ងារស្រាវជ្រាវអវកាសជប៉ុន (ចាសា – JAXA)។ SLIM ឆ្ពោះចូលដល់គន្លងតារាវិថីព្រះចន្ទ នៅវេលាម៉ោង 13 និង 51 នាទី ថ្ងៃទី 25 ធ្នូ ម៉ោងនៅកម្ពុជា។

យោងតាមចាសា យាន SLIM កំពុងហោះហើរទៅតាមគន្លងគោចររាងពងក្រពើ និងចំណាយពេល 6.4 ម៉ោង ដើម្បីហោះបានមួយជុំព្រះចន្ទ ពីកម្ពស់ 600 គីឡូម៉ែត្រនៅតំបន់ដែលជិតបំផុត និង 4,000 គីឡូម៉ែត្រ នៅតំបន់ដែលឆ្ងាយបំផុត។ នេះគឺជាជំហានថ្មីដែលបញ្ជាក់ថា SLIM កំពុងឆ្ពោះជិតដល់គោលដៅចុះចតលើឋានព្រះចន្ទនៅថ្ងៃទី 19 មករា ឆ្នាំ 2024។

នេះនឹងជាជោគជ័យក្នុងប្រវត្តិសាស្ត្រ ព្រោះថា មកដល់បច្ចុប្បន្ន មានតែប្រទេសចំនួនបួនប៉ុណ្ណោះ រួមមាន សូវៀត សហរដ្ឋអាម៉េរិក ចិន និងឥណ្ឌា ដែលបានបញ្ជូនយានអវកាសទៅចុះចតលើផ្ទៃព្រះចន្ទដោយជោគជ័យ។

យាន SLIM ដែលមានប្រវែង 2.7 ម៉ែត្រ ត្រូវបានបាញ់បង្ហោះកាលពីថ្ងៃទី 06 កញ្ញា 2023 រួមជាមួយនឹង XRISM ជាតេឡេស្កុបអវកាសប្រើកាំរស្មី X កម្លាំងខ្លាំង។

ចាសាឱ្យដឹងថា SLIM មានបេសកកម្មស្វែងរកវិធីចុះចតប្រកបដោយសុវត្ថិភាព ដែលជារឿងចាំបាច់សម្រាប់យានចុះចតនាពេលអនាគត៕

December 26, 2023

Tag: ឥណ្ឌា