ឥណទាន - La Reine Media

ឌូបៃជួយជួសជុលផ្ទះដោយមិនគិតថ្លៃ ក្រោយ «ភ្លៀងបាក់មេឃ» កាលពីសប្ដាហ៍កន្លង

បន្ទាប់ពីភ្លៀងធំបង្កទឹកជំនន់ ប្រជាពលរដ្ឋនៅទីក្រុងឌូបៃរបស់អេមីរ៉ាត់អារ៉ាប់រួម (UAE) ដែលត្រូវរងផលប៉ះពាល់ធ្ងន់ធ្ងរ នឹងទទួលបានការពន្យារពេលសងបំណងធនាគារ 6 ខែ និងជួសជុលផ្ទះដោយមិនគិតថ្លៃ។

ធនាគារជាតិ UAE (CBUAE) ទើបតែអនុម័ត និងប្រកាសស្នើឱ្យគ្រប់ធនាគារ និងក្រុមហ៊ុនធានារ៉ាប់រង អនុញ្ញាតឱ្យពន្យារពេលលើការបង់ប្រាក់សងត្រឡប់ចំពោះឥណទានផ្ទាល់ខ្លួន និងឥណទានទិញរថយន្ត ចំពោះអតិថិជនដែលរងផលប៉ះពាល់ពីជំនន់ទឹកភ្លៀង រយៈពេល 6ខែ។ ការពន្យារពេលបង់ប្រាក់សងធនាគារនេះនឹងមិនមានការប្រាក់ ឬការចំណាយបន្ថែម។

ទន្ទឹមនឹងនេះ CBUAE ក៏បានសម្រេចថា ការខូចខាតយានជំនិះ និងផ្ទះសំបែងដោយជំនន់ទឹកភ្លៀងកាលពីសប្ដាហ៍កន្លង នឹងត្រូវបានធានារ៉ាប់រង បើសិនមានកិច្ចសន្យាធានារ៉ាប់រងការបាត់បង់ និងការខូចខាត។ ដូច្នេះ បណ្ដាក្រុមហ៊ុនធានារ៉ាប់រងត្រូវតែមានកាតព្វកិច្ចអនុវត្តតាមការព្រមព្រៀង។

April 25, 2024

ក្រុមហ៊ុន VinFast មានកម្មវិធី «ទទួលយករថយន្តសាំង – ផ្ដល់ជូនរថយន្តអគ្គិសនី»

បន្ទាប់ពីបានទទួលជោគជ័យក្នុងកម្មវិធី «ទទួលយកម៉ូតូសាំង – ផ្ដល់ជូនម៉ូតូអគ្គិសនី» ដែលបានអនុវត្តតាំងពីចុងខែមីនា កម្មវិធីថ្មី «ទទួលយករថយន្តសាំង – ផ្ដល់ជូនរថយន្តអគ្គិសនី» របស់ក្រុមហ៊ុនផលិតរថយន្តអគ្គិសនីវៀតណាម VinFast នឹងនាំមកនូវឱកាសសម្រាប់អតិថិជនដែលចង់ប្ដូររថយន្តសាំង យករថយន្តអគ្គិសនី VinFast ។

យោងតាមកម្មវិធីខាងលើ ម្ចាស់រថយន្តអគ្គិសនី VinFast ទាំងឡាយដែលចង់ប្ដូរយករថយន្តអគ្គិសនីស៊េរីខ្ពស់ជាង ក៏អាចទទួលបានអត្ថប្រយោជន៍ពីកម្មវិធី «ទទួលយករថយន្តសាំង – ផ្ដល់ជូនរថយន្តអគ្គិសនី» នេះផងដែរ។

ជាក់ស្ដែង អតិថិជនដែលជាម្ចាស់រថយន្តសាំង និងរថយន្តអគ្គិសនី VinFast នឹងទទួលបានការធានាពីក្រុមហ៊ុន Cho Tot ដែលជាដៃគូសហការ ទាក់ទងនឹងតម្លៃ។ ចំណែកម្ចាស់រថយន្តសាំងយីហោផ្សេងពី VinFast ក៏កម្មវិធីខាងលើទទួលទិញក្នុងតម្លៃសមរម្យជាងទីផ្សារ។

ទន្ទឹមនឹងនេះ នៅពេលទិញរថយន្តអគ្គិសនី VinFast ថ្មី អតិថិជនដែលលក់រថយន្តចាស់ឱ្យកម្មវិធី «ទទួលយករថយន្តសាំង – ផ្ដល់ជូនរថយន្តអគ្គិសនី» នឹងទទួលបានឥណទានឡើងដល់ 8 ឆ្នាំ ក៏ដូចជាឥណទានស្មើនឹង 80% នៃតម្លៃរថយន្តថ្មី ព្រមទាំងការប្រាក់ទាបបំផុត នៅទូទាំងប្រទេសវៀតណាម។

កម្មវិធី «ទទួលយករថយន្តសាំង – ផ្ដល់ជូនរថយន្តអគ្គិសនី» របស់ VinFast និង Cho Tot នៅវៀតណាម បានផ្ដើមដំណើរការចាប់ពីថ្ងៃទី 22 ខែមេសា ឆ្នាំ 2024។

April 23, 2024

សេណារីយ៉ូណាដែលធ្វើឱ្យតម្លៃមាសពិភពលោកឡើងដល់ 361 ដុល្លារ/ជី

តម្លៃមាសអាចកើន 50% ឡើងដល់ 3,000 ដុល្លារអាម៉េរិកក្នុងមួយអោន (1 អោន (ounce) = 8.29426 ជី) នៅក្នុងរង្វង់ពី 12 ទៅ 18 ខែទៀត បើសិនសេដ្ឋកិច្ចពិភពលោកធ្លាក់ចូលក្នុងឱនភាពជ្រៅជាងបច្ចុប្បន្ន និងបណ្ដាធនាគារកណ្ដាលបង្កើនការទិញ។ នេះបើតាមធនាគារ Citi។

តម្លៃមាសប្រគល់ភ្លាមពិភពលោក បច្ចុប្បន្នត្រូវបានជួញដូរក្នុងតម្លៃ 2,016 ដុល្លារក្នុងមួយអោន ទាបជាងឆ្ងាយបើធៀបនឹង 2,135 ដុល្លារកាលពីខែធ្នូ 2023។ ក៏ប៉ុន្តែ ក្រុមអ្នកវិភាគនៅធនាគារ Citi យល់ថា តម្លៃមាសនេះអាចឡើងដល់ 3,000 ដុល្លារ/អោន នៅក្នុងរង្វង់ពី 12 ទៅ 18 ខែខាងមុខ។

យោងតាម Aakash Doshi ប្រធានក្រុមអ្នកវិភាគទំនិញតំបន់អាម៉េរិកខាងជើង ប្រចាំធនាគារ Citi សេណារីយ៉ូដែលមានភាគរយកើតឡើងខ្ពស់ជាងគេ ដែលនាំឱ្យមាសឡើងថ្លៃដល់ 3,000 ដុល្លារ/អោន គឺនិន្នាការ «មិនប្រើប្រាស់ប្រាក់ដុល្លារអាម៉េរិក» នៅតាមធនាគារជាតិនៃបណ្ដាប្រទេសទើបលេចធ្លោ។ ប្រការនេះអាចនាំឱ្យកម្លាំងទិញមាសរបស់ធនាគារទាំងនេះកើនឡើងទ្វេដង។ បច្ចុប្បន្ន គ្រឿងអលង្ការគឺជាកម្លាំងរុញច្រានចម្បងគេសម្រាប់តម្រូវការមាសលើពិភពលោក។

«និន្នាការនេះកំពុងកើតឡើង ប៉ុន្តែមានសភាពយឺតយ៉ាវខ្លាំង។ បើសិនត្រូវបានជំរុញល្បឿន វិបត្តិទំនុកចិត្តលើប្រាក់ដុល្លារអាម៉េរិក នឹងកើតឡើង» Aakash Doshi ឱ្យដឹងដូច្នេះ។

Citi ឱ្យដឹងថា ប៉ុន្មានឆ្នាំចុងក្រោយនេះ កម្លាំងទិញមាសរបស់បណ្ដាធនាគារកណ្ដាល បានកើនឡើងដល់កម្រិតខ្ពស់បំផុត នៅពេលពួកគេស្វែងរកវិធីធ្វើពិពិធកម្មទុនបម្រុង និងកាត់បន្ថយហានិភ័យឥណទាន។ ធនាគារជាតិចិន និងរុស្ស៊ី ទិញមាសច្រើនជាងគេបំផុត និងតាមពីក្រោយដោយប្រទេសឥណ្ឌា តួកគី និងប្រេស៊ីល។

របាយការណ៍របស់ក្រុមប្រឹក្សាមាសពិភពលោក (WGC) កាលពីខែមករា បង្ហាញថា បណ្ដាធនាគារកណ្ដាលបានទិញមាសជាង 1,000 តោន ក្នុងរយៈពេលពីរឆ្នាំជាប់ៗគ្នា។ «បើសិនតួលេខនេះច្រើនជាងទ្វេដង ពោលគឺឡើងដល់ 2,000 តោន យើងយល់ថា នេះនឹងជាកម្លាំងទាញដ៏ធំសម្រាប់តម្លៃមាស» Doshi បញ្ជាក់ដូច្នេះ។

ទន្ទឹមនឹងនេះ ការដែលសេដ្ឋកិច្ចពិភពលោកធ្លាក់ចូលក្នុងឱនភាពជ្រៅ ក៏អាចទាញតម្លៃមាសឱ្យឡើងដល់ 3,000 ដុល្លារក្នុងមួយអោន ព្រោះថា សេណារីយ៉ូនេះធ្វើឱ្យធនាគារកណ្ដាលអាម៉េរិក (Fed) បញ្ចុះអត្រាការប្រាក់កម្រិតខ្ពស់បំផុត។ ប៉ុន្តែ Citi ឱ្យដឹងថា សេណារីយ៉ូនេះមានលទ្ធភាពកើតឡើងមិនខ្ពស់។

ក្រៅពីនេះ Stagflation (កំណើនសេដ្ឋកិច្ចទាប អមនឹងអតិផរណា) ក៏អាចជាកត្តារុញតម្លៃមាសឱ្យឡើងខ្ពស់ ដោយសារមាសគឺជាទ្រព្យសុវត្ថិភាពក្នុងពេលមានអស្ថិរភាពសេដ្ឋកិច្ច – នយោបាយ។ ក៏ប៉ុន្តែ សេណារីយ៉ូនេះក៏មានលទ្ធភាពកើតឡើងក្នុងកម្រិតទាប។

ក្នុងស្ថានភាពធម្មតា Citi ព្យាករថា តម្លៃមាសជាមធ្យមនឹងត្រូវបានជួញដូរក្នុងរង្វង់ 2,000 ដុល្លារ/អោន នៅពាក់កណ្ដាលដើមឆ្នាំ និងឡើងដល់ 2,150 ដុល្លារ នៅពាក់កណ្ដាលចុងឆ្នាំ 2024។ ធនាគារនេះរំពឹងថា នៅចុងឆ្នាំនេះ តម្លៃមាសអាចមានលទ្ធភាពហក់ឡើងដល់កម្រិតថ្មីមួយទៀត៕

February 22, 2024

ការដ្ឋានសាងសង់ស្ពានឆ្លងកាត់ទន្លេបាសាក់ «ចាក់អង្រែក្រោម-ព្រែកប្រា» នឹងបើកជាផ្លូវការនៅខែកុម្ភៈខាងមុខ

ក្រសួងសាធារណការ និងដឹកជញ្ជូន កំពុងត្រៀមរៀបចំពិធីបើកការដ្ឋានសាងសង់ស្ពានឆ្លងកាត់ទន្លេបាសាក់ និងផ្លូវតភ្ជាប់ ដែលស្ថិតនៅរាជធានីភ្នំពេញ ត្រង់តំបន់ចាក់អង្រែក្រោម-ព្រែកប្រា នៅថ្ងៃទី 19 កុម្ភៈ 2024 ខាងមុខ។

ព័ត៌មាននេះត្រូវបានលើកឡើងដោយក្រសួងសាធារណការ និងដឹកជញ្ជូន នាថ្ងៃទី 31 មករា ក្រោយពីមានកិច្ចប្រជុំគណៈកម្មការសម្រាប់រៀបចំពិធីបើកការដ្ឋានសាងសង់ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) និងផ្លូវតភ្ជាប់ ដែលដឹកនាំដោយ ឯកឧត្តម សួង ហេង រដ្ឋលេខាធិការក្រសួងសាធារណការ និងដឹកជញ្ជូន។

ក្រសួងសាធារណការ និងដឹកជញ្ជូន បានឱ្យដឹងថា គម្រោងសាងសង់ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) និងផ្លូវតភ្ជាប់ ដែលទទួលបានឥណទានសម្បទានពីរដ្ឋាភិបាល នៃសាធារណរដ្ឋប្រជាមានិតចិន គ្រោងនឹងប្រារព្ធពិធីបើកការដ្ឋាន ក្រោមអធិបតីភាពដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា នៅថ្ងៃចន្ទ ទី 19 ខែកុម្ភៈ ឆ្នាំ 2024៕

January 31, 2024

ហេតុអ្វីសហរដ្ឋអាម៉េរិក គេចផុតពីវិបត្តិសេដ្ឋកិច្ច?

ការព្យាករជាច្រើនបានបង្ហាញថា សហរដ្ឋអាម៉េរិក អាចធ្លាក់ទៅក្នុងវិបត្តិសេដ្ឋកិច្ចនៅក្នុងឆ្នាំ 2023 ប៉ុន្តែពេលនេះ ស្ថានការណ៍បានផ្លាស់ប្ដូរទាំងស្រុង។

រយៈពេលប៉ុន្មានឆ្នាំមកនេះ Wall Street តែងតែយល់ថា សេដ្ឋកិច្ចអាម៉េរិកនឹងធ្លាក់ទៅក្នុងវិបត្តិ មុនពេលរដូវបោះឆ្នោតជ្រើសរើសប្រធានាធិបតីមកដល់នៅចុងឆ្នាំ 2024។ ក្នុងដំណាក់កាលនោះដែរ ក៏មានសេដ្ឋវិទូជាច្រើនបានព្យាករថា អាម៉េរិកជិតជួបវិបត្តិសេដ្ឋកិច្ច។

ក៏ប៉ុន្តែ មួយឆ្នាំក្រោយមក ពួកគេបានផ្លាស់ប្ដូរយោបល់។ ថ្វីបើពុំមានអ្វីជារឿងប្រាកដ ប៉ុន្តែលទ្ធភាពដែល សហរដ្ឋអាម៉េរិក ជួបវិបត្តិសេដ្ឋកិច្ចក្នុងឆ្នាំរយៈពេលខ្លី កំពុងតែថយចុះបន្តិចម្ដងៗ។

ដូច្នេះ តើហេតុអ្វីបានជា សហរដ្ឋអាម៉េរិក គេចផុតពីវិបត្តិសេដ្ឋកិច្ច?

ក្នុង 20 ខែកន្លង ធនាគារកណ្ដាលអាម៉េរិក (Fed) បានធ្វើគ្រប់យ៉ាងដើម្បីគ្រប់គ្រងសេដ្ឋកិច្ចអាម៉េរិក ក្នុងបំណងកាត់បន្ថយអតិផរណា។ ពួកគេយល់ច្បាស់ថា ប្រការនេះអាចធ្វើឱ្យមនុស្សរាប់លាននាក់បាត់បង់ការងារ។

ក្នុងអំឡុងពេលនោះ Fed បានដំឡើងការប្រាក់ 11 លើក។ ប៉ុន្តែ Fed មិនបានដំឡើងការប្រាក់លឿន និងខ្លាំងដូចកាលពី 40 ឆ្នាំមុន។ កាលពីទសវត្សរ៍ឆ្នាំ 1980 Fed បានដំឡើងការប្រាក់យ៉ាងខ្ពស់ ធ្វើឱ្យសេដ្ឋកិច្ចធ្លាក់ក្នុងវិបត្តិអាក្រក់បំផុតនៅក្នុងអំឡុង 50 ឆ្នាំ។

Fed ក៏បានលក់ចោលមូលបត្របំណុលរាប់ទ្រីលានដុល្លារអាម៉េរិក ដែលបានទិញក្នុងរយៈពេលច្រើនឆ្នាំមុននោះ។ ទង្វើនេះបានកាត់បន្ថយតម្រូវការមូលបត្របំណុលរបស់រដ្ឋាភិបាល នាំឱ្យអត្រាការប្រាក់កើនឡើងខ្ពស់។ អត្រាការប្រាក់នៃកម្ចីប្រើប្រាស់ កម្ចីទិញផ្ទះ បណ្ណឥណទានជាដើម ក៏ត្រូវបានអូសឡើងទៅតាម ធ្វើឱ្យទីផ្សារអចលនទ្រព្យអាម៉េរិកធ្លាក់ចុះ។

ទោះយ៉ាងនេះក៏ដោយ ក្រោយពីអនុវត្តគោលនយោបាយគ្រប់គ្រងសេដ្ឋកិច្ចបានពីរឆ្នាំ Fed ក៏ធ្វើបានសម្រេចនូវអ្វីដែលគ្រប់គ្នាគិតថាមិនអាចទៅរួច នោះគឺការគ្រប់គ្រងអតិផរណាបាន ដោយមិនរុញសេដ្ឋកិច្ចឱ្យធ្លាក់ក្នុងវិបត្តិ បើទោះមិនអាចបំពេញចិត្តមនុស្សគ្រប់រូបបានក៏ដោយ៕

December 22, 2023

សេដ្ឋកិច្ចកម្ពុជា នឹងមានកំណើន 5.8% ក្នុងឆ្នាំ 2024 ខណៈឆ្នាំ 2023 មានកំណើន 5.4%

ធនាគារពិភពលោក (WB) បានទម្លាក់កំណើនសេដ្ឋកិច្ចកម្ពុជា ពី 5.5% មកនៅត្រឹម 5.4% សម្រាប់ឆ្នាំនេះ នៅក្នុងរបាយការណ៍ចុងក្រោយស្តីពីបច្ចុប្បន្នភាពសេដ្ឋកិច្ចរបស់កម្ពុជា ចេញផ្សាយនៅថ្ងៃទី22 វិច្ឆិកា 2023។

ទោះបីជាវិស័យទេសចរណ៍ និងសេវាដទៃទៀតបានងើបឡើងវិញ ប៉ុន្តែ ធនាគារពិភពលោក បានលើកពីកត្តារួមផ្សំរវាងសម្ពាធពីខាងក្រៅ និងបញ្ហាប្រឈមផ្នែករចនាសម្ព័ន្ធ ដែលបានដាក់សម្ពាធលើកំណើនសេដ្ឋកិច្ចកម្ពុជា។

ប្រសិនបើការកែទម្រង់រចនាសម្ព័ន្ធដើរអមគ្នាជាមួយការវិនិយោគលើហេដ្ឋារចនាសម្ព័ន្ធ និងកាលានុវត្តភាពពាណិជ្ជកម្ម នោះវានឹងនាំឱ្យកំណើនសេដ្ឋកិច្ចបន្តបង្កើនល្បឿននៅក្នុងរយៈពេលមធ្យម និងវែង។ នេះបើតាមអនុសាសន៍របស់ WB។

«កម្ពុជាចាំបាច់ត្រូវជួយដល់វិស័យឯកជនឱ្យបំពេញមុខងារជាក្បាលម៉ាស៊ីនលើកកម្ពស់កំណើនសេដ្ឋកិច្ច» លោកស្រី ម៉ារីយ៉ាម សាលីម នាយកគ្រប់គ្រងនៃធនាគារពិភពលោកប្រចាំនៅកម្ពុជា លើកឡើងដូច្នេះ និងបន្តថា «កិច្ចការនេះអាចសម្រេចបាន ដោយការធ្វើសកម្មភាពភ្លាមៗនៅក្នុងការធ្វើឱ្យប្រសើរឡើងនូវការបំពេញការងាររបស់វិស័យសាធារណៈ» ខណៈការរក្សាស្ថិរភាពហិរញ្ញវត្ថុក៏ជាអាទិភាពមួយដែរ។

WB សង្កត់ធ្ងន់ថា កំណើនសេដ្ឋកិច្ចអាចនៅតែរងផលប៉ះពាល់បន្ថែមទៀតពីការចុះខ្សោយនៃតម្រូវការពិភពលោក ឬពីការឡើងថ្លៃប្រេងឥន្ធនៈ និងថ្លៃស្បៀងអាហារកើនឡើងវិញ។ ចំណែកនៅក្នុងស្រុក ការកើនឡើងនៃបំណុលគ្រួសារ និងឥណទានក្នុងស្រុកនៅក្នុងវិស័យអចលនទ្រព្យ នៅតែជាហានិភ័យដដែល។

WB ក៏បានផ្ដល់អនុសាសន៍អំពីកំណែទម្រង់រចនាសម្ព័ន្ធ ដែលអាចជួយកម្ពុជាជំរុញឱ្យមានកំណើនប្រកបដោយចីរភាព រួមមាន ការកែលម្អបរិយាកាសធុរកិច្ចដើម្បីបង្កើនផលិតភាព និងការប្រកួតប្រជែង, ការធ្វើឱ្យប្រសើរឡើងនូវហេដ្ឋារចនាសម្ព័ន្ធ និងបណ្តាញតភ្ជាប់ផ្លូវ និងការធ្វើឱ្យប្រសើរឡើងនូវជំនាញរបស់កម្លាំងពលកម្ម ។

កាលពីឆ្នាំ 2022 សេដ្ឋកិច្ចរបស់កម្ពុជាមានកំណើន 5.2% ខណៈឆ្នាំ 2023 នេះ ត្រូវបាន WB ព្យាករថា នឹងមានកំណើន 5.4% ថយចុះបន្តិចបើធៀបនឹង 5.5% ដែលត្រូវបានព្យាករកាលពីខែឧសភា។ WB ក៏បានព្យាករថា កំណើនសេដ្ឋកិច្ចកម្ពុជា នឹងឡើងដល់ 5.8% ក្នុងឆ្នាំ 2024 និង 6.1% ក្នុងឆ្នាំ 2025៕

November 23, 2023

កម្ពុជា លើកទឹកចិត្តឱ្យធនាគារ រៀបចំឥណទានឡើងវិញចំពោះអ្នកទិញអចលនទ្រព្យដែលរងផលប៉ះពាល់ពីវិបត្តិសេដ្ឋកិច្ច

(ភ្នំពេញ) – គ្រឹះស្ថានធនាគារ និងហិរញ្ញវត្ថុទទួលបានការលើកទឹកចិត្តពី ប្រមុខរាជរដ្ឋាភិបាលកម្ពុជា ទាក់ទងនឹងការរៀបចំឥណទានឡើងវិញ ជូនដល់អតិថិជនរបស់ខ្លួនដែលបានខ្ចីប្រាក់ដើម្បីទិញអចលនទ្រព្យ និងកំពុងរងផលប៉ះពាល់ដោយសារវិបត្តិសេដ្ឋកិច្ច។

«លើកទឹកចិត្តដល់គ្រឹះស្ថានធនាគារ និងហិរញ្ញវត្ថុ ធ្វើការរៀបចំឥណទានឡើងវិញ តាមលទ្ធភាពជាក់ស្តែងរបស់គ្រឹះស្ថាន ដោយផ្អែកលើគោលការណ៍ស្ម័គ្រចិត្ត និងការព្រមព្រៀងរវាងគ្រឹះស្ថាន និងក្រុមហ៊ុនអចលនទ្រព្យ និងអភិវឌ្ឍន៍លំនៅឋានជាបុរី ដែលអនុលោមតាមប្រកាសលេខធមស 017 3 44 ប្រក. ចុះថ្ងៃទី 01 ខែធ្នូ ឆ្នាំ 2017 ស្តីពីចំណាត់ថ្នាក់ហានិភ័យឥណទាន និងសមវិធានធន់» សម្តេច ហ៊ុន ម៉ាណែត បានថ្លែងដូច្នេះនៅឯវិមានសន្ដិភាព កាលពីព្រឹកថ្ងៃទី 13 វិច្ឆិកា 2023 ក្នុងឱកាសអញ្ជើញជាអធិបតីនៃវេទិកា «រាជរដ្ឋាភិបាល -ផ្នែកឯកជន» លើកទី 19 ដើម្បីបើកការជជែកលើបញ្ហាធុរកិច្ចនៅកម្ពុជា។

ដោយសារតែវិស័យអចលនទ្រព្យបាន និងកំពុងរងផលប៉ះពាល់ធ្ងន់ធ្ងរពីវិបត្តិសុខភាព និងវិបត្តិផ្សេងៗទៀត រាជរដ្ឋាភិបាលក៏ដាក់ចេញនូវវិធានការមួយចំនួនដើម្បីចូលរួមដោះស្រាយ។ វិធានការទាំងនេះ រួមមានដូចខាងក្រោម៖

បន្តពន្យារពេលការបង់ពន្ធជាកញ្ចប់តាមដំណាក់កាលរហូតដល់ដំណាច់ឆ្នាំ 2024 សម្រាប់ក្រុមហ៊ុនអភិវឌ្ឍន៍លំនៅឋានជាបុរី ដែលបាននឹងកំពុងប្រតិបត្តិការគម្រោងអភិវឌ្ឍន៍លំនៅឋាន ដែលមានអាជ្ញាបណ្ណអចលនវត្ថុផ្តល់ដល់និយ័តករអាជីវកម្មអចលនវត្ថុ និងបញ្ចាំ។ល។
បង្កើនរយៈពេលនៃការបង់ពន្ធជាកញ្ចប់តាមដំណាក់កាលពី 12 ខែ ដល់ 18 ខែ សម្រាប់ក្រុមហ៊ុនអភិវឌ្ឍន៍លំនៅឋានជាបុរី ដែលបង់ពន្ធតិចជាងមួយលានដុល្លារ និងពី 24 ខែ ដល់ 38 ខែ សម្រាប់ក្រុមហ៊ុនអភិវឌ្ឍន៍លំនៅឋានជាបុរី ដែលបង់ពន្ធលើសពីមួយលានដុល្លារ។
ក្រុមហ៊ុនអភិវឌ្ឍន៍លំនៅឋានជាបុរីថ្មី ឬក្រុមហ៊ុនមានគម្រោងអភិវឌ្ឍន៍លំនៅឋានជាបុរី ដែលមិនទាន់បានអភិវឌ្ឍន៍ត្រូវបង់ពន្ធស្របតាម និតិវិធីជាព័ត៌មានរបបពិត និងត្រូវកាន់បញ្ជីគណនីឱ្យបានត្រឹមត្រូវ។
បន្តពន្យារពេលការអនុវត្តលើពន្ធចំណេញមូលធន សម្រាប់តែវិស័យអចលនទ្រព្យរហូតដល់ដំណាច់ឆ្នាំ2024។
បន្តលើកលែងពន្ធប្រថាប់ត្រាលើការផ្ទេរសិទ្ធិ ឬសិទ្ធិកាន់កាប់លំនៅឋានគ្រប់ប្រភេទដែលមានលក្ខណៈជាបុរី និងដែលមានតម្លៃក្រោម ឬស្មើនឹង 7 ម៉ឺនដុល្លាររហូតដល់ដំណាច់ឆ្នាំ 2024។
លើកទឹកចិត្ត និងស្នើឱ្យគ្រឹះស្ថានធនាគារ និងហិរញ្ញវត្ថុ ធ្វើការរៀបចំឥណទានឡើងវិញ តាមលទ្ធភាពជាក់ស្តែងរបស់គ្រឹះស្ថាន ដោយផ្អែកលើគោលការណ៍ស្ម័គ្រចិត្ត និងការព្រមព្រៀងរវាងគ្រឹះស្ថាន និងក្រុមហ៊ុនអចលនទ្រព្យ និងអភិវឌ្ឍន៍លំនៅឋានជាបុរី ដែលអនុលោមតាមប្រកាសលេខ 017 3 44 ប្រក. ចុះថ្ងៃទី 01 ខែធ្នូ ឆ្នាំ 2017 ស្តីពីចំណាត់ថ្នាក់ហានិភ័យឥណទាន និងសមវិធានធន។
លើកលែងការផាកពិន័យផ្សេងៗចំពោះគម្រោងអភិវឌ្ឍន៍លំនៅឋានជាបុរី ប៉ុន្តែក្រុមហ៊ុនអភិវឌ្ឍចាំបាច់ត្រូវបំពេញកាតព្វកិច្ចសមស្របតាមប្រកាសស្តីពីការគ្រប់គ្រងអាជីវកម្មអភិវឌ្ឍអចលនវត្ថុ។
ពន្យារពេលអនុវត្តរហូតដល់ដំណាច់ឆ្នាំ 2023 លើសេចក្តីប្រកាសស្តីពីកាតព្វកិច្ចដាក់រាយការណ៍ហិរញ្ញវត្ថុឱ្យសវកម្មឯករាជ្យ ចេញដោយក្រសួងសេដ្ឋកិច្ច និងហិរញ្ញវត្ថុ។

រាជរដ្ឋាភិបាលក៏បានបង្កើតក្រុមការងារអន្តរក្រសួងចំនួនពីរ ដើម្បីតាមដាន ដោះស្រាយបញ្ហាប្រឈម នៅក្នុងវិស័យនេះអចលនទ្រព្យផងដែរ។

សម្តេចធិបតី ក៏បានដាក់ចេញនូវវិធានការមួយចំនួនទៀត ដើម្បីជួយដល់វិស័យអចលទ្រព្យ និងសំណង់ ក្នុងនោះសម្រាប់ផ្ទះមានតម្លៃលើស 7 ម៉ឺនដុល្លារអាមេរិក ត្រូវបានអនុញ្ញាតឱ្យដកតម្លៃ 7 ម៉ឺនដុល្លារអាមេរិកចេញពីមូលដ្ឋាន នៃការគិតពន្ធប្រថាប់ត្រា ក៏ដូចជាការលើកលែងពន្ធប្រថាប់ត្រាដល់អចលនទ្រព្យដែលត្រូវបានទិញ-លក់ក្នុងតម្លៃក្រោម 7 ម៉ឺនដុល្លារ រហូតដល់ឆ្នាំ 2024 ផងដែរ៕

November 14, 2023

IMF ព្យាករអំពីកំណើនសេដ្ឋកិច្ចក្នុងឆ្នាំ 2024 របស់ប្រទេសថៃ

មូលនិធិរូបិយវត្ថុអន្តរជាតិ (IMF) ទើបតែបានកែប្រែការព្យាករអំពីកំណើន GDP ក្នុងឆ្នាំ 2024 របស់ប្រទេសថៃ ដោយយោងទៅតាមកំណើននៃការប្រើប្រាស់ក្នុងវិស័យឯកជនដ៏ខ្លាំងក្លា និងការងើបឡើងវិញនៃតម្រូវការពីខាងក្រៅ។

IMF យល់ថា សេដ្ឋកិច្ចរបស់ប្រទេសថៃអាចនឹងមានកំណើន 2.7% ក្នុងឆ្នាំនេះ និងកើនឡើងដល់ 3.6% ក្នុងឆ្នាំ 2024 បើទោះស្ថានភាពសេដ្ឋកិច្ចសកលកំពុងស្ថិតក្នុងអស្ថិរភាព។

អតិផរណារួមត្រូវបានប៉ាន់ស្មានថា ស្ថិតនៅក្នុងកម្រិតមធ្យម 1.3% នៅឆ្នាំ 2023 ដោយសារប្រសិទ្ធភាពរបស់វិធានការនានាដែលបន្តរក្សាតម្លៃថាមពលនៅក្នុងកម្រិតទាប រួមនឹងការប្រសើរឡើងនៃបណ្ដាញផ្គត់ផ្គង់សកល។ ទន្ទឹមនឹងនេះ ព្រោះតែកំណើនសេដ្ឋកិច្ចក្នុងឆ្នាំក្រោយកើនឡើង អតិផរណាក៏ត្រូវបានព្យាករថា នឹងកើនឡើង 1.6% ផងដែរ។

យោងតាម IMF ការបន្តធ្វើប្រក្រតីភាពគោលនយោបាយម៉ាក្រូសេដ្ឋកិច្ចក្នុងពេលខាងមុខ នឹងជួយកសាងឡើងវិញនូវ «ទម្រ» ហិរញ្ញវត្ថុ និងធានាស្ថិរភាពហិរញ្ញវត្ថុសម្រាប់ប្រទេសថៃ។

ក្រៅពីនេះ ការបង្កើតរាជរដ្ឋាភិបាលថ្មីបានដោយជោគជ័យក៏ជួយឱ្យប្រទេសថៃមានឱកាសអនុវត្ត «កំណែទម្រង់ស៊ីជម្រៅ និងគ្រប់ជ្រុងជ្រោយ» ដើម្បីបង្កើនទិន្នផល គាំទ្រដល់កំណើនសេដ្ឋកិច្ចប្រកបដោយស្ថិរភាព និងគ្រប់ជ្រុងជ្រោយជាងមុន។

IMF ក៏សម្ដែងស្វាគមន៍ចំពោះគម្រោងរបស់ធនាគារជាតិថៃ នៅក្នុងការបញ្ចេញវិធានការថ្មីៗដើម្បីដោះស្រាយបញ្ហាបំណុលគ្រួសារដែលមានកម្រិតខ្ពស់ ទន្ទឹមនឹងការណែនាំការផ្ដល់ឥណទានប្រកបដោយការទទួលខុសត្រូវជាក់លាក់ ក៏ដូចជាជួយដល់ពលរដ្ឋដែលកំពុងជួបបញ្ហាបំណុលរ៉ាំរ៉ៃផងដែរ៕

November 11, 2023

លាក់បាំងរឿងម្ដាយស្លាប់ បន្លំខ្លួនជាង 30 ឆ្នាំ ស៊ីប្រាក់រដ្ឋជាង 8 សែនដុល្លារ

(សហរដ្ឋអាម៉េរិក) – បុរសម្នាក់នៅ California បានសារភាពថា បានលាក់បាំងរឿងម្ដាយស្លាប់ជាង 30 ឆ្នាំ ដើម្បីទទួលបានប្រាក់របបសន្តិសុខសង្គម និងប្រាក់ខែចូលនិវត្តន៍របស់ម្ដាយ។

Randy Grossman រដ្ឋអាជ្ញានៅ California ខាងត្បូង បានឱ្យដឹងថា Donald Felix Zampach អាយុ 65 ឆ្នាំ រស់នៅតំបន់ Poway បានបន្លំជាម្ដាយ ទទួលប្រាក់មូលនិធិសាធារណៈចំនួន 830,000 ដុល្លារ និងប្រាក់ជិត 30,000 ដុល្លារ ពីប័ណ្ណឥណទាន ក្នុងរយៈពេល 30 ឆ្នាំ។ នេះបើតាម Guardian ចុះផ្សាយកាលពីថ្ងៃទី 03 កក្កដា 2023។

ករណីនេះចាប់ផ្ដើមតាំងពីឆ្នាំ 1990 នៅពេលម្ដាយរបស់ Zampach បានទទួលមរណភាពនៅប្រទេសជប៉ុន។ មុនពេលម្ដាយស្លាប់ លោក Zampach បានប្ដូរឈ្មោះកម្មសិទ្ធិកាន់កាប់ផ្ទះរបស់ម្ដាយនៅ California ខាងត្បូង មកជាឈ្មោះខ្លួន។

ច្រើនឆ្នាំក្រោយមក បុរសនេះនៅតែរក្សាគណនីធនាគាររបស់ម្ដាយ និងបន្លំហត្ថលេខារបស់ម្ដាយ។ Zampach មិនបានរាយការណ៍ប្រាប់សមត្ថកិច្ចអំពីការស្លាប់របស់ម្ដាយដើម្បីឱ្យរដ្ឋឈប់ផ្ដល់ប្រាក់ខែ និងប្រាក់ឧបត្ថម្ភ។ ម្ដាយរបស់ Zampach ធ្លាប់បម្រើការក្នុងជួរកងទ័ព។

«នេះគឺជាសកម្មភាពបោកប្រាសដែលមានផែនការក្នុងរយៈពេល 30 ឆ្នាំ ហើយត្រូវតែចាត់ការឱ្យបានម៉ឺងម៉ាត់» Grossman ថ្លែងដូច្នេះ។

Zampach បានសារភាពកំហុស និងត្រូវបានការអនុញ្ញាតឱ្យនៅក្រៅឃុំ។ បុរសនេះនឹងត្រូវបានកាត់ទោសនៅថ្ងៃទី 20 កញ្ញាខាងមុខ ហើយអាចប្រឈមនឹងការជាប់ពន្ធនាគារ 25 ឆ្នាំ។ ជននេះក៏នឹងត្រូវរដ្ឋរឹបអូសយកផ្ទះនៅ Poway ដើម្បីជាសំណង 830,000 ដុល្លារដែលបានបន្លំយក។

ក្នុងឆ្នាំ 2020 ពលរដ្ឋជិត 70 លាននាក់បានទទួលប្រាក់ខែចូលនិវត្តន៍នៅសហរដ្ឋអាម៉េរិក ក្នុងនោះមានករណីបន្លំក្រោម 1%៕

July 4, 2023

ទិញរថយន្តក្នុងក្តីស្រមៃដោយមិនចាំបាច់មានប្រាក់កក់ និងបង់រំលស់គ្មានការប្រាក់ដល់ទៅមួយឆ្នាំ

[ភ្នំពេញ – ថ្ងៃទី ០១ ខែឧសភា ឆ្នាំ២០២៣] ផ្នែករថយន្ត Ford នៃ ក្រុមហ៊ុន អ អិម អេ (ខេមបូឌា) ម.ក បានរៀបចំកម្មវិធី ពិធីចុះអនុស្សរណៈយោគយល់គ្នារវាង ក្រុមហ៊ុន អ អិម អេ (ខេមបូឌា) ម.កដែលជាក្រុមហ៊ុននាំចូល និងចែកចាយផ្តាច់មុខរថយន្ត ហ្វដ ប្រចាំប្រទេសកម្ពុជា និងធនាគារ វីង (ខេមបូឌា) ម.ក ដែលជាធនាគារឈានមុខគេនៅកម្ពុជា។

លោក ហាន ប៉េង ក្វាង អគ្គនាយក ធនាគារ វីង បានមានប្រសាសន៍ថា៖ “យើងពិតជាមានសេចក្តីសោមន្សរីករាយ ដែលបានក្លាយជាដៃគូសហការជាមួយ ក្រុមហ៊ុន អ អិម អេ (ខេមបូឌា) ដើម្បីរួមគ្នាផ្តល់ដំណោះស្រាយដ៏មានសារៈសំខាន់មួយសម្រាប់អតិថិជន” ។

“យើងជឿជាក់ថាគ្រប់គ្នាស័ក្កិសមនឹងទទួលបានឱកាសក្លាយជាម្ចាស់រថយន្តក្នុងក្តីស្រមៃរបស់ពួកគេ។ ហើយយើងចង់ធ្វើឲ្យក្តីស្រមៃនោះក្លាយជាការពិត សម្រាប់អតិថិជនមិនថាជាប្រជាជនកម្ពុជា ឬជនជាតិបរទេសកំពុងរស់នៅប្រទេសកម្ពុជា នោះគឺអតិថិជនមិនបារម្មណ៍លើការចំណាយប្រាក់កក់ ហើយថែមទាំងមិនចំណាយបង់ការប្រាក់រហូតដល់ ១២ ខែ”។

លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) បានមានប្រសាសន៍ថា៖ “ សម្រាប់អតិថិជនដែលមានបំណងចង់ក្លាយជាម្ចាស់រថយន្ត ឥឡូវនេះយើងមានការផ្តល់ជូនពិសេសគឺ ការទិញរថយន្តដោយមិនតម្រូវមានប្រាក់កក់ និងការបង់រំលស់ដោយមិនចំណាយការប្រាក់ពេញមួយឆ្នាំពេញសម្រាប់រថយន្តម៉ូដែល Ford Ranger Wildtrak, Everest, EcoSport, Territory ស៊េរីឆ្នាំ ២០២២ ដែលនេះជាលើកទី១ ដែលមានការសហការបែបនេះកើតឡើងរវាង អ អិម អេ (ខេមបូឌា) ជាមួយធនាគារ វីង ហើយនេះគ្រាន់តែជាការចាប់ផ្តើមតែប៉ុណ្ណោះ ៕

ឆ្លៀតក្នុងឱកាសនេះដែរ លោក លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) ក៏បានបន្ថែមថា “ បច្ចុប្បន្នក្រុមហ៊ុន ហ្វដ បានពង្រីកនូវវិសាលភាពនៃគ្រឿងបន្លាស់ និងសេវាកម្មជួសជុលរថយន្តនៅតាមបណ្តាខេត្តផ្សេងៗដូចជា ខេត្តកំពង់ចាម និងខេត្តសៀមរាប ហើយយើងក៏មានយានដ្ឋានដៃគូសហការជាច្រើននៅទូទាំង២៥ខេត្តក្រុងក្នុងប្រទេសកម្ពុជាផងដែរ។ ជាពិសេស ថ្មីៗនេះយើងក៏បានបង្កើតនូវ ការិយាល័យផ្នែកទំនាក់ទំនងអតិថិជន (Call Center) ដើម្បីផ្តល់នូវសេវាកម្មឆាប់រហ័ស និងផ្តល់ភាពងាយស្រួលដល់អតិថិជនក្នុងការសាកសួរព័ត៌មាន ក៏ដូចជាធ្វើការទំនាក់ទំនងដោយផ្ទាល់ជាមួយអ្នកជំនាញរបស់យើង ។ ”

សម្រាប់អតិថិជនដែលចង់សាកសួរព័ត៌មាន ឬមានបំណងចង់ទិញរថយន្ត Ford អាចធ្វើការទំនាក់ទំនងតាមលេខទូរស័ព្ទ 012 333 975 ឬ 077 666 357 ឬ 078 999 883

សម្រាប់លោកអ្នកដែលមានតម្រូវការកម្ចីឥណទានតាមរយៈធនាគារ វីង សូមធ្វើការទំនាក់ទំនងតាមលេខទូរស័ព្ទ 078 989 767/078 989 511 ឬអញ្ជើញមកកាន់សាខាណាមួយដែលនៅជិតលោកអ្នកបំផុត៕

May 1, 2023

Tag: ឥណទាន