អាស៊ីអាគ្នេយ៍ - La Reine Media

ក្រុមហ៊ុនផលិតរថយន្តអគ្គិសនីវៀតណាម ចំណាយជាងមួយពាន់លានដុល្លារ សាងសង់រោងចក្រនៅឥណ្ឌូណេស៊ី

កាលពីថ្ងៃទី 6 វិច្ឆិកា ប្រធានការិយាល័យប្រធានាធិបតីឥណ្ឌូណេស៊ី Moeldoko បានឱ្យដឹងថា VinFast ដែលជាក្រុមហ៊ុនផលិតរថយន្តអគ្គិសនីវៀតណាម នឹងដាក់ទុនវិនិយោគ 1.2 ពាន់លានដុល្លារអាម៉េរិក នៅប្រទេសឥណ្ឌូណេស៊ី។

លោក Moeldoko បានប្រាប់ក្រុមអ្នកសារព័ត៌មានថា «ក្រុមហ៊ុនរថយន្តវៀតណាមនឹងវិនិយោគ 1.2 ពាន់លានដុល្លារអាម៉េរិក ហើយនឹងសាងសង់រោងចក្រផលិតរថយន្តអគ្គិសនីនៅប្រទេសឥណ្ឌូណេស៊ី ក្នុងពេលឆាប់ៗខាងមុខ»។

យោងតាមលោក Moeldoko ក្រុមហ៊ុន VinFast គឺជាមួយក្នុងចំណោមអ្នកផលិតរថយន្តអគ្គិសនីធំៗនៅក្នុងតំបន់អាស៊ីអាគ្នេយ៍។ ការវិនិយោគរបស់ VinFast នៅឥណ្ឌូណេស៊ី នឹងរួចចំណែកជួយបង្កបង្កើតបណ្ដាញ EV នៅប្រទេសនេះ។

កាលពីថ្ងៃទី 31 តុលា អគ្គលេខាធិការនៃសមាគមអ្នកផលិតរថយន្តឥណ្ឌូណេស៊ី (Gaikindo) លោក Kukuh Kumara បានឱ្យដឹងថា បច្ចុប្បន្ន VinFast កំពុងស្ថិតក្នុងដំណាក់កាលបង្ហើយការងារនានាជាមួយនឹងភាគីរដ្ឋាភិបាលឥណ្ឌូណេស៊ី មុនពេលឈានជើងចូលប្រឡូកក្នុងទីផ្សាររថយន្តនៅប្រទេសនេះជាផ្លូវការ៕

November 7, 2023

វិស័យទេសចរណ៍កម្ពុជាងើបឡើងវិញ គ្រាដែលភ្ញៀវបរទេសវិលមកជាបណ្ដើរៗ

កម្ពុជារំពឹងខ្ពស់ទៅលើកំណើនទេសចរអន្តរជាតិនៅក្នុងរដូវបុណ្យនាចុងឆ្នាំនេះ និងបានត្រៀមខ្លួនរួចរាល់សម្រាប់ការធ្វើបដិសណ្ឋារកិច្ចចំពោះភ្ញៀវដែលមកទស្សនាតំបន់ទេសចរណ៍ល្បីៗ ពិសេសគឺអង្គរវត្ត។

លោក ហុង ប៉ូលីន ដែលមានបទពិសោធន៍ជាមគ្គុទេសក៍ទេសចរណ៍ជាងមួយទសវត្សរ៍ ហើយបច្ចុប្បន្នជាមគ្គុទេសក៍ទេសចរណ៍នៅតំបន់អង្គរ បានសម្ដែងការសប្បាយរីករាយនៅពេលឃើញទេសចរបរទេសជាច្រើនវិលត្រលប់មកវិញ។ យោងតាមមគ្គុទេសក៍ទេសចរណ៍រូបនេះ វិស័យទេសចរណ៍កម្ពុជាកំពុងតែបង្ហាញសញ្ញាវិជ្ជមានច្រើន បន្ទាប់ពីរងផលប៉ះពាល់ដោយសារកូវីដ-19។

លោក ប៉ូលីន និយាយថា «ក្រោយពីកូវីដ-19 ត្រូវបានគ្រប់គ្រង ទេសចរក៏ចាប់ផ្ដើមវិលត្រលប់មកកាន់អង្គរវត្តក្នុងចំនួនកើនឡើងពីមួយថ្ងៃទៅមួយថ្ងៃ។ ពិសេសគឺនៅខែតុលា និងខែវិច្ឆិកា ខ្ញុំឃើញថា ចំនួនភ្ញៀវបរទេសដែលវិលត្រលប់មកកម្ពុជា ពិតជាច្រើន»។

លោក ហុង ប៉ូលីន បច្ចុប្បន្នជាមគ្គុទេសក៍ទេសចរណ៍នៅតំបន់អង្គរ

លោក ស៊ិន ច័ន្ទសិរីវុត្ថា អនុរដ្ឋលេខាធិការ និងជាអ្នកនាំពាក្យអាកាសចរណ៍ស៊ីវិលកម្ពុជា បានឱ្យដឹងថា ក្នុងសប្ដាហ៍កន្លង ចំនួនភ្ញៀវទេសចរណ៍អន្តរជាតិមកដល់ព្រលានយន្តហោះសៀមរាប បានកើនជាមធ្យមប្រហែល 2,700 នាក់/ថ្ងៃ។ ភាគច្រើនពួកគេមកពីបណ្ដាប្រទេសក្នុងតំបន់អាស៊ីអាគ្នេយ៍ (75%) និងអឺរ៉ុប (25%)។ តួលេខនេះបានបង្ហាញអំពីការងើបឡើងវិញយ៉ាងខ្លាំងក្លារបស់វិស័យទេសចរណ៍របស់កម្ពុជា។

ក្នុង 9 ខែដំបូងនៃឆ្នាំ 2023 កម្ពុជាទាក់ទាញទេសចរបរទេសបាន 3.92 លាននាក់ កើន 211% បើធៀបនឹងដំណាក់កាលដូចគ្នាក្នុងឆ្នាំ 2022។ ភ្ញៀវថៃឈរលំដាប់លេខមួយក្នុងចំណោមភ្ញៀវបរទេសដែលបានមកទស្សនាកម្ពុជា ខណៈដែលវៀតណាម និងចិនឈរលំដាប់លេខពីរ និងលេខបី។

អ្នកនាំពាក្យអាកាសចរណ៍ស៊ីវិលកម្ពុជា អះអាងថា ចាប់ពីចុងខែតុលាឆ្នាំ 2023 ដល់ខែមីនាឆ្នាំ 2024 ចំនួនជើងហោះហើរមកកាន់ព្រលានយន្តហោះសៀមរាបនឹងកើនឡើងដល់ 40 ជើងជារៀងរាល់សប្ដាហ៍ ខណៈចំនួនក្រុមហ៊ុនអាកាសចរណ៍នឹងកើនពី 9 ឡើងដល់ 10 ក្រុមហ៊ុន។ យោងតាមលោក ស៊ិន ច័ន្ទសិរីវុត្ថា វិស័យទេសចរណ៍កម្ពុជាបានត្រៀមខ្លួនរួចរាល់ និងបានធ្វើគ្រប់យ៉ាងដើម្បីត្រៀមសម្រាប់ការវិលត្រលប់របស់ភ្ញៀវអន្តរជាតិ។

កាលពីថ្ងៃទី 02 វិច្ឆិកា 2023 ក្រសួងទេសចរណ៍កម្ពុជា ក៏បានចេញសេចក្តីជូនដំណឹងស្តីពី «កម្ពុជាជាគោលដៅទេសចរណ៍ឈានមុខគេលើពិភពលោក ផ្នែកទេសចរណ៍វប្បធម៌ និងដំណើរកម្សាន្តរបស់យុវជន ឆ្នាំ 2023» បន្ទាប់ពីមានកម្មវិធីបោះឆ្នោតជ្រើសរើសតាមអ៊ីនធើរណិត ដោយក្រុមអ្នកជំនាញ និងសាធារណជនពីជុំវិញពិភពលោក ដែលរៀបចំដោយក្រុមហ៊ុន World Travel Awards នៅចក្រភពអង់គ្លេស។

នៅព្រឹកថ្ងៃទី 04 ខែវិច្ឆិកា ឆ្នាំ 2023 កម្ពុជាក៏បានទទួលភ្ញៀវបរទេសចូលមកកម្សាន្តនៅខេត្តព្រះសីហនុ តាមនាវាទេសចរណ៍មួយគ្រឿង ឈ្មោះ VIKING ORION របស់ប្រទេសន័រវែស ដែលដឹកមនុស្សសរុប 1,337 នាក់ ផងដែរ៕

November 7, 2023

វៀតណាមចង់ទិញម៉ាស៊ីនព្យាបាលជំងឺមហារីកទំនើបចុងក្រោយបង្អស់ តម្លៃជាងមួយរយលានដុល្លារអាម៉េរិក/គ្រឿង

ប្រធានមន្ទីរពេទ្យជោរៃរបស់វៀតណាម បានដាក់សំណើទិញម៉ាស៊ីនវិទ្យុសកម្មប្រូតុងដើម្បីព្យាបាលជំងឺមហារីក ចំនួនពីរគ្រឿង សម្រាប់រដ្ឋធានីហាណូយ និងទីក្រុងហូជីមិញ ក្នុងនោះ ម៉ាស៊ីននេះមានតម្លៃយ៉ាងតិចប្រហែលពី 101,719,000.00 ដុល្លារអាម៉េរិក។

នេះគឺជាម៉ាស៊ីនបាញ់កាំរស្មីពីក្រៅទំនើបបំផុតនាបច្ចុប្បន្ន ដែលអនុញ្ញាតឱ្យបាញ់វិទ្យុសកម្មសមស្រប និងសុក្រឹតទៅកាន់ដុំគីស សូម្បីតែពួកវាមានរូបរាងស្មុគស្មាញ និងស្ថិតនៅក្បែរអវយវៈមិនមានជំងឺ និងងាយប្រតិកម្ម។ វិធីសាស្ត្រនេះនឹងដោះស្រាយបាននូវចំណុចអវិជ្ជមាននៃការព្យាបាលដោយម៉ាស៊ីនបង្កើនល្បឿនលីនេអ៊ែរ LINAC (Linear Accelerator) ដែលអាចបង្កផលប៉ះពាល់ច្រើន។

ការព្យាបាលដោយម៉ាស៊ីនបង្កើនល្បឿនលីនេអ៊ែរ Linear Accelerator (ឆ្វេង) អាចបង្កផលប៉ះពាល់ច្រើន បើធៀបនឹងម៉ាស៊ីនវិទ្យុសកម្មប្រូតុង (ស្ដាំ)

ការស្រាវជ្រាវមួយបង្ហាញថា វៀតណាមមានអ្នកជំងឺមហារីកប្រមាណ 9,000 នាក់ ដែលត្រូវការការព្យាបាលដោយម៉ាស៊ីនបច្ចេកវិទ្យាថ្មីបំផុតនេះ។ បន្ទប់វិទ្យុសកម្មប្រូតុងមួយអាចព្យាបាលអ្នកជំងឺប្រហែល 300 នាក់ ក្នុងមួយឆ្នាំ ដូច្នេះ វៀតណាម ត្រូវការម៉ាស៊ីនទំនើបចុងក្រោយនេះប្រហែល 30 គ្រឿង។ ក៏ប៉ុន្តែ បច្ចុប្បន្ន ប្រទេសនេះមិនទាន់មានមួយគ្រឿងណានៅឡើយ។

មូលហេតុនេះហើយ ក្នុងកិច្ចប្រជុំមួយនៅសភាជាតិវៀតណាម កាលពីថ្ងៃទី 01 វិច្ឆិកា ប្រធានមន្ទីរពេទ្យជោរៃ លោក ង្វៀន ទ្រីធឹក យល់ថា ការបំពាក់ម៉ាស៊ីនវិទ្យុសកម្មប្រូតុងគឺជារឿងចាំបាច់ និងបន្ទាន់។ លោកបានដាក់សំណើទិញម៉ាស៊ីនវិទ្យុសកម្មប្រូតុងដើម្បីព្យាបាលជំងឺមហារីក ចំនួនពីរគ្រឿង សម្រាប់រដ្ឋធានីហាណូយ និងទីក្រុងហូជីមិញ ក្នុងនោះ ម៉ាស៊ីនមួយគ្រឿងៗមានតម្លៃប្រហែលពី 101,719,000.00 ទៅ 122,062,800.00 ដុល្លារអាម៉េរិក។

ម៉ាស៊ីនវិទ្យុសកម្មប្រូតុងមួយគ្រឿងមានតម្លៃប្រហែលពី 101,719,000.00 ទៅ 122,062,800.00 ដុល្លារអាម៉េរិក

បច្ចុប្បន្ន នៅលើពិភពលោកមានមជ្ឈមណ្ឌលព្យាបាលជំងឺមហារីកជាង 120 កន្លែង កំពុងប្រើប្រាស់ម៉ាស៊ីនវិទ្យុសកម្មប្រូតុង។ បណ្ដាប្រទេសអភិវឌ្ឍលើពិភពលោក មានជាអាទិ៍ សហរដ្ឋអាម៉េរិក ជប៉ុន អាល្លឺម៉ង់ បារាំង អង់គ្លេស រុស្ស៊ី ចិន និងប្រទេសមួយចំនួននៅអាស៊ីអាគ្នេយ៍ (សិង្ហបុរី និងថៃ) សុទ្ធតែមានម៉ាស៊ីនទំនើបនេះ៕

November 2, 2023

ថៃបញ្ចុះថ្លៃទិដ្ឋាការ និងការស្នាក់នៅសម្រាប់ពលករកម្ពុជា

ក្រសួងការងារថៃ បានចេញអនុក្រឹត្យថ្មីមួយដែលកំណត់តម្លៃថ្មីទៅលើការត្រួតពិនិត្យ និងផ្ដល់លិខិតពលកម្ម ចំពោះពលករបរទេសដែលមកពី កម្ពុជា និងប្រទេសមួយចំនួនទៀតដែលស្ថិតក្នុងតំបន់អាស៊ីអាគ្នេយ៍។

យោងតាមសារព័ត៌មានក្នុងស្រុក អនុក្រឹត្យខាងលើមានសុពលភាពរយៈពេល 4 ឆ្នាំ ដោយចាប់ផ្ដើមអនុវត្តពីថ្ងៃទី 10 វិច្ឆិកា 2023 និងអនុវត្តសម្រាប់ពលករដែលធ្វើការក្នុងក្របខណ្ឌកិច្ចសន្យា ឬអនុស្សរណៈនៃការយោគយល់ (MoU) ដែលទាក់ទងនឹងការជ្រើសរើសពលករ។

សេចក្ដីសម្រេចថ្មីនេះកំណត់ថា ថ្លៃទិដ្ឋាការសម្រាប់ពលករមកពីប្រទេសកម្ពុជា ឡាវ មីយ៉ាន់ម៉ា និងវៀតណាម ត្រូវបានកាត់បន្ថយពី 2,000 បាតនាបច្ចុប្បន្ន មកនៅត្រឹម 500 បាត ស្របពេលដែលថ្លៃស្នាក់នៅបណ្ដោះអាសន្ន (ថ្លៃពន្យារពេលទិដ្ឋាការរៀងរាល់ឆ្នាំ) ក៏ត្រូវបានបន្ថយពី 1,900 បាតនាបច្ចុប្បន្ន មកនៅត្រឹម 500 បាតផងដែរ។

ក្រសួងការងារថៃសង្កត់ធ្ងន់ថា អនុក្រឹត្យខាងលើគឺស្របនឹងវិធីសាស្ត្ររបស់រដ្ឋាភិបាលក្នុងការគ្រប់គ្រងការជ្រើសរើសពលករបរទេស ដើម្បីពង្រឹងសមត្ថភាពប្រកួតប្រជែងរបស់ប្រទេសនេះ ក៏ដូចជាការរួមចំណែកស្ដារសេដ្ឋកិច្ចក្រោយសម័យកូវីដ-19។

យោងតាមព័ត៌មានរបស់នាយកដ្ឋានរដ្ឋបាលការងារបរទេសនៃប្រទេសថៃ ក្នុងខែកញ្ញា ប្រទេសនេះមានពលករបរទេសចំនួន 2,593,439 នាក់ និងប្រហែលមួយលាននាក់ទៀតកំពុងស្ថិតក្នុងដំណាក់កាលដាក់ពាក្យស្នើសុំលិខិតអនុញ្ញាតការងារ ទៅតាមអនុក្រឹត្យចុះថ្ងៃទី 03 តុលា ឆ្នាំ 2023 របស់រដ្ឋាភិបាលថៃ៕

November 1, 2023

ថៃ និងវៀតណាមជំរុញឱ្យឆាប់សម្រេចបានគោលដៅពាណិជ្ជកម្ម 25 ពាន់លានដុល្លារ

ថៃ និងវៀតណាម បានយល់ព្រមប្រឹងប្រែងជំរុញការនាំចេញ-នាំចូលទ្វេភាគី ឱ្យឆាប់បានសម្រេចគោលដៅពាណិជ្ជកម្ម 25 ពាន់លានដុល្លារអាម៉េរិក តាមរយៈការកាត់បន្ថយរនាំងពាណិជ្ជកម្ម។

ក្នុងឱកាសជួបពិភាក្សាជាមួយនឹងរដ្ឋមន្ត្រីការបរទេសវៀតណាមនៅទីក្រុងហាណូយ កាលពីម្សិលមិញ រដ្ឋមន្ត្រីការបរទេសថៃ លោក Parnpree Bahiddha-Nukara ឱ្យដឹងថា វៀតណាមគឺជាដៃគូសំខាន់ជួរមុខរបស់ប្រទេសថៃនៅក្នុងតំបន់។

អំពីសេដ្ឋកិច្ច ពាណិជ្ជកម្ម និងវិនិយោគ ភាគីទាំងពីរបានយល់ព្រមប្រឹងប្រែងជំរុញការនាំចេញ-នាំចូលទ្វេភាគី ឱ្យឆាប់សម្រេចបានគោលដៅពាណិជ្ជកម្ម 25 ពាន់លានដុល្លារអាម៉េរិក តាមរយៈការកាត់បន្ថយឧបសគ្គនានា ដែលជារារាំងរារាំងពាណិជ្ជកម្ម និងបើកទូលាយបន្ថែមទៀតសម្រាប់ទំនិញរបស់ប្រទេសទាំងពីរ។

ការលើកឡើងខាងលើត្រូវបានធ្វើឡើងក្នុងដំណើរទស្សនកិច្ចពីថ្ងៃទី 25 ដល់ 26 តុលា របស់លោក Parnpree នៅប្រទេសវៀតណាម។

ក្នុងឆ្នាំ 2022 តម្លៃនៃការនាំចេញ-នាំចូលរវាងប្រទេសថៃ និងវៀតណាម សម្រេចបាន 21.6 ពាន់លានដុល្លារអាម៉េរិក។ វៀតណាមគឺជាដៃគូពាណិជ្ជកម្មធំជាងគេលំដាប់ទីពីររបស់ប្រទេសថៃ នៅក្នុងសមាគមប្រជាជាតិអាស៊ីអាគ្នេយ៍ និងលំដាប់ទីប្រាំនៅលើពិភពលោក៕

October 27, 2023

ក្រុមហ៊ុន Changan សាងសង់រោងចក្រផលិតរថយន្តអគ្គិសនីនៅប្រទេសថៃ

ក្រុមហ៊ុនផលិតរថយន្តចិន Changan Automobile បានចុះកិច្ចព្រមព្រៀងជាមួយអាជ្ញាធរថៃ ដើម្បីជំរុញផែនការសាងសង់រោងចក្រមួយនៅក្នុងប្រទេសអាស៊ីអាគ្នេយ៍មួយនេះ។

Changan សម្រេចបានកិច្ចព្រមព្រៀងជាមួយគណៈកម្មការវិនិយោគថៃ (BOI) នៅក្នុងវេទិកាសហប្រតិបត្តិការអន្តរជាតិខ្សែក្រវាត់ និងផ្លូវលើកទីបី នៅទីក្រុងប៉េកាំង កាលពីថ្ងៃទី 17 តុលា 2023។ នេះបើតាមប្រកាសមួយកាលពីថ្ងៃទី 19 តុលា របស់ Changan។

ក្រុមហ៊ុនចិនខាងលើមានផែនការវិនិយោគ 240 លានដុល្លារអាម៉េរិកនៅប្រទេសថៃ ដើម្បីសាងសង់រោងចក្រផលិតរថយន្តអគ្គិសនីមួយដែលអាចផលិតបាន 100,000 គ្រឿងក្នុងដំណាក់កាលដំបូង។

អគ្គលេខាធិការរបស់ BOI ថៃ Narit Therdsteerasukdi ក៏បានប្រគល់វិញ្ញាបនបត្រចុះបញ្ជីវិនិយោគសម្រាប់គម្រោងទីតាំងផលិតរថយន្តនៅប្រទេសថៃ ជូនដល់ប្រធានក្រុមហ៊ុន Changan លោក Zhu Huarong។

Changan បានបង្កើតក្រុមហ៊ុនតំណាងរបស់ខ្លួននៅប្រទេសថៃកាលពីថ្ងៃទី 23 សីហា 2023។ ថ្ងៃទី 24 សីហា ក្រុមហ៊ុននេះក៏បានប្រកាសគម្រោងវិនិយោគ 8.8 ពាន់លានបាត ដើម្បីសាងសង់រោងចក្រផលិតរថយន្តអគ្គិសនីនៅប្រទេសនេះ។

កាលពីខែសីហា Changan ឱ្យដឹងថា ដំណាក់កាលដំបូងរបស់រោងចក្រនេះនឹងអាចផលិតរថយន្តបាន 100,000 គ្រឿងជារៀងរាល់ឆ្នាំ ចំណែកដំណាក់កាលទីពីរនឹងអាចផលិតបាន 200,000 គ្រឿង/ឆ្នាំ។

រថយន្តអគ្គិសនីរបស់ Changan នៅប្រទេសថៃ នឹងត្រូវបានលក់ក្នុងស្រុក និងនាំចេញទៅកាន់ទីផ្សារអូស្ត្រាលី នូវែលសេឡង់ អង់គ្លេស និងអាហ្វ្រិកខាងត្បូង។

ថៃគឺជាប្រទេសផលិត និងនាំចេញរថយន្តធំជាងគេបង្អស់នៅអាស៊ីអាគ្នេយ៍ និងជាទីផ្សាររថយន្តអគ្គិសនីលំដាប់កំពូលមួយផងដែរ។ អាជ្ញាធរថៃកំពុងតែប្រឹងប្រែងដើម្បីជំរុញឱ្យប្រទេសនេះក្លាយជាមជ្ឈមណ្ឌលផលិតរថយន្តអគ្គិសនីរបស់តំបន់អាស៊ាន ដោយបានដាក់ចេញនូវគោលនយោបាយទាក់ទាញជាច្រើន មានជាអាទិ៍ ការបន្ថយអត្រាពន្ធ ការផ្ដល់ជំនួយដល់អ្នកប្រើប្រាស់ និងជំនួយគាំទ្រដល់ការវិនិយោគជាដើម៕

October 23, 2023

TikTok ឈប់លក់ទំនិញអនឡាញនៅឥណ្ឌូណេស៊ី បន្ទាប់ពីរដ្ឋបានហាមឃាត់

TikTok សម្រេចចិត្តឈប់លក់ទំនិញតាមអនឡាញនៅប្រទេសឥណ្ឌូណេស៊ី ក្រោយពីរដ្ឋាភិបាលប្រទេសនេះបានប្រកាសហាមឃាត់ ដើម្បីការពារអាជីវកម្មខ្នាតតូច។

កាលពីថ្ងៃទី 03 តុលា 2023 TikTok ដែលជាបណ្ដាញសង្គមរបស់ក្រុមហ៊ុនចិន ByteDance បានប្រកាសថា នឹងបញ្ឈប់សកម្មភាពពាណិជ្ជកម្មនៅលើឧបករណ៍ទិញដូរទំនិញរបស់ខ្លួននៅប្រទេសឥណ្ឌូណេស៊ី ចាប់ពីថ្ងៃទី 04 តុលា 2023 នេះ។

ការសម្រេចចិត្តខាងលើរបស់បណ្ដាញសង្គមចិន TikTok ត្រូវបានធ្វើឡើងក្រោយពីរដ្ឋាភិបាលឥណ្ឌូណេស៊ីបានប្រកាសហាមឃាត់សកម្មភាពលក់ទំនិញផ្ទាល់នៅលើទំព័របណ្ដាញសង្គមនានា ដើម្បីការពារអាជីវកម្មខ្នាតតូចរបស់ខ្លួន។

ក្នុងប្រកាសថ្មីបំផុតរបស់ខ្លួន TikTok Indonesia សង្កត់ធ្ងន់ថា អាទិភាពដំបូងគេគឺការគោរពច្បាប់ និងការសម្រេចរបស់ប្រទេសដែល TikTok កំពុងធ្វើសកម្មភាព។ ក្នុងនោះ ពួកគេនឹងឈប់ធ្វើពាណិជ្ជកម្មអនឡាញនៅលើឧបករណ៍លក់ដូរទំនិញ TikTok Shop Inodnesia។

ក៏ប៉ុន្តែ TikTok ក៏យល់ថា បទបញ្ជាខាងលើរបស់រដ្ឋាភិបាលឥណ្ឌូណេស៊ី នឹងប៉ះពាល់ដល់អាជីវកររាប់លាននាក់ដែលប្រើប្រាស់ TikTok Shop ក្នុងប្រទេសដែលមានប្រជាជនច្រើនជាងគេនៅអាស៊ីអាគ្នេយ៍នេះផងដែរ។

រដ្ឋមន្ត្រីក្រសួងពាណិជ្ជកម្មឥណ្ឌូណេស៊ី Zulkifli Hasan ឱ្យដឹងថា បណ្ដាក្រុមហ៊ុនដែលមិនគោរពតាមបទបញ្ជាហាមលក់ទំនិញលើបណ្ដាញសង្គម នឹងត្រូវបានព្រមាន។ បើសិននៅតែរំលោភបំពានជាថ្មី ពួកគេនឹងត្រូវបានដកហូតអាជ្ញាប័ណ្ណអាជីវកម្មនៅឥណ្ឌូណេស៊ី។

មុននោះ រដ្ឋមន្ត្រីខាងលើយល់ថា ពាណិជ្ជកម្មអនឡាញត្រូវការបែងចែកឱ្យដាច់ពីបណ្ដាញសង្គម។ បណ្ដាញសង្គមអាចផ្សព្វផ្សាយផលិតផល ប៉ុន្តែមិនត្រូវបង្កលក្ខណៈងាយស្រួលក្នុងការលក់ដូរផលិតផលនៅលើថ្នាលបច្ចេកវិទ្យារបស់ពួកគេ។ លោក Hasan សង្កត់ធ្ងន់ថា បទបញ្ជាថ្មីនេះត្រូវបានធ្វើឡើងក្នុងបំណងការពារសហគ្រាស អាជីវកម្មខ្នាតមធ្យម និងតូច។

យោងតាមទិន្នន័យរបស់ TikTok ប្រទេសឥណ្ឌូណេស៊ីដែលមានអ្នកប្រើប្រាស់ 125 លាននាក់ គឺជាទីផ្សារធំជាងគេលំដាប់ទីពីរក្នុងពិភពលោករបស់ TikTok បន្ទាប់ពីសហរដ្ឋអាម៉េរិក។ ប៉ុន្តែ ប៉ុន្មានខែចុងក្រោយនេះ មានមតិកាន់តែច្រើនដែលអំពាវនាវឱ្យរដ្ឋគ្រប់គ្រងបណ្ដាញសង្គម និងពាណិជ្ជកម្មអនឡាញ ពេលដែលអ្នកលក់តាមបែបបុរាណយល់ឃើញថា ការលក់ទំនិញក្នុងតម្លៃទាបខ្លាំងនៅលើ TikTok Shop និងបណ្ដាញសង្គមនានា កំពុងគំរាមកំហែងដល់ «ឆ្នាំងបាយ» របស់ពួកគេ៕

October 4, 2023

ឥណ្ឌូណេស៊ីសម្ពោធដាក់ឱ្យប្រើប្រាស់ផ្លូវដែកល្បឿនលឿនដំបូងអាស៊ីអាគ្នេយ៍

ផ្លូវដែកល្បឿនលឿនដំបូងរបស់ប្រទេសឥណ្ឌូណេស៊ី ជិតបើកទ្វារទទួលអ្នកដំណើរ ដែលនេះនឹងជួយកាត់បន្ថយពេលវេលានៃការធ្វើដំណើររវាងទីក្រុងពីរធំជាងគេបង្អស់របស់ប្រទេសនេះ។

គម្រោងផ្លូវដែកដែលមានតម្លៃ 7.3 ពាន់លានដុល្លារអាម៉េរិកនេះនឹងត្រូវបានសម្ពោធដាក់ឱ្យដំណើរការក្នុងថ្ងៃទី 02 តុលា 2023 ក្រោយពីបានពន្យារពេលច្រើនលើក។ នេះគឺជាមួយផ្នែកនៃគំនិតផ្ដួចផ្ដើមហេដ្ឋារចនាសម្ព័ន្ធខ្សែក្រវាត់ និងផ្លូវ ដែលទទួលបានជំនួយភាគច្រើនពីបណ្ដាក្រុមហ៊ុនរដ្ឋចិន។

«យើងនឹងសម្ពោធនៅថ្ងៃទី 02 តុលា ដោយសារប្រធានាធិបតីជាប់រវល់នៅក្នុងថ្ងៃទី 01 តុលា» រដ្ឋមន្ត្រីក្រសួងគមនាគមន៍ឥណ្ឌូណេស៊ី Budi Karya Sumadi កាលពីថ្ងៃទី 29 កញ្ញា ថ្លែងដូច្នេះ។

ផ្លូវដែកសម្រាប់រថភ្លើងល្បឿនលឿនប្រវែង 138 គីឡូម៉ែត្រ និងមានឈ្មោះថា WHOOSH នេះ តភ្ជាប់រវាងរដ្ឋធានីហ្សាការតា និង Bandung នៅខេត្តជ្វាខាងលិច ដែលជាទីក្រុងធំជាងគេលំដាប់ទីពីររបស់ឥណ្ឌូណេស៊ី និងជាមជ្ឈមណ្ឌលសិល្បៈ វប្បធម៌ដ៏ធំរបស់ឥណ្ឌូណេស៊ី។

រថភ្លើងដែលរត់លើផ្លូវដែក WHOOSH ដំណើរការដោយអគ្គិសនី និងមានល្បឿនប្រហែល 350 គីឡូម៉ែត្រ/ម៉ោង នឹងជួយកាត់បន្ថយពេលវេលាក្នុងការធ្វើដំណើររវាង ហ្សាការតា និង Bandung ពីបីម៉ោងមកនៅក្រោមមួយម៉ោង។ WHOOSH ក៏ជាផ្លូវដែកល្បឿនលឿនដំបូងនៅតំបន់អាស៊ីអាគ្នេយ៍ផងដែរ។

គម្រោងខាងលើនេះត្រូវបានគ្រប់គ្រងដោយក្រុមហ៊ុនបណ្ដាក់ទុនរួម PT Kereta Cepat ឥណ្ឌូណេស៊ី – ចិន (PT KCIC)។ តំណាងក្រុមហ៊ុននេះក៏បានឱ្យដឹងថា ស្ថាប័នពាក់ព័ន្ធកំពុងចរចាអំពីការពង្រីកផ្លូវដែកល្បឿនលឿនទៅកាន់ Surabaya ដែលជាទីក្រុងកំពង់ផែធំរបស់ខេត្តជ្វាខាងកើត។

កិច្ចព្រមព្រៀងអភិវឌ្ឍផ្លូវរថភ្លើងល្បឿនលឿននៅឥណ្ឌូណេស៊ី ត្រូវបានចុះហត្ថលេខាកាលពីឆ្នាំ 2015 និងចាប់ផ្ដើមស្ថាបនាតាំងពីចុងឆ្នាំនោះ។ តាមផែនការដំបូង គម្រោងនេះគ្រោងនឹងត្រូវបានដាក់ឱ្យដំណើរការក្នុងឆ្នាំ 2019 ប៉ុន្តែត្រូវបានពន្យារពេលច្រើនលើកដោយសារតែបញ្ហាកូវីដ-19៕

October 2, 2023

យប់ថ្ងៃ15 កើតនេះ មានព្រឹត្តិការណ៍ពិសេសបីកើតឡើងដំណាលគ្នា

យប់ថ្ងៃសីលពេញបូណ៌មីនេះ កើតឡើងចំព្រឹត្តិការណ៍តារាសាស្ត្រពិសេសមួយដែលត្រូវបានហៅថា មហាចន្ទពេញវង់។

យប់ថ្ងៃសុក្រ 15 កើត ខែភទ្របទ ឆ្នាំថោះ បញ្ចស័ក ពុទ្ធសករាជ 2567 ត្រូវនឹងថ្ងៃទី 29 កញ្ញា គ្រីស្តសករាជឆ្នាំ 2023 នេះ គឺជាថ្ងៃពិសេស ព្រោះថាមិនត្រឹមតែជាថ្ងៃសីលពេញបូណ៌មី និងជាថ្ងៃបុណ្យសែនព្រះខែរបស់ជនជាតិមួយចំនួននៅអាស៊ីខាងកើត និងអាស៊ីអាគ្នេយ៍ មានដូចជា ចិន ជប៉ុន កូរ៉េ និងវៀតណាមជាដើមនោះទេ ប៉ុន្តែក៏ជាឱកាសដែលមានព្រឹត្តិការណ៍មហាចន្ទពេញវង់ផងដែរ។

នៅយប់នេះ ព្រះចន្ទនឹងស្ថិតនៅពីមុខផែនដី និងព្រះអាទិត្យ ហើយផ្ទៃរបស់វានឹងទទួលបានពន្លឺពេញលេញពីព្រះអាទិត្យ។ ព្រឹត្តិការណ៍នេះនឹងកើតឡើងនៅវេលាម៉ោង 16:59 ម៉ោងអន្តរជាតិ ត្រូវនឹងម៉ោង 23:59 ថ្ងៃទី 29 កញ្ញានៅកម្ពុជា។ ព្រះចន្ទពេញវង់លើកនេះគឺជាមហាចន្ទពេញវង់ចុងក្រោយក្នុងចំណោមមហាចន្ទទាំងបីរបស់ឆ្នាំ 2023។ យប់នេះ ព្រះចន្ទនឹងស្ថិតនៅក្បែរផែនដីបំផុត ហើយនឹងធំជាង ភ្លឺជាងចន្ទពេញវង់ធម្មតា។

អ្នកតារាសាស្ត្រឱ្យដឹងថា ចម្ងាយមធ្យមពីព្រះចន្ទទៅផែនដីគឺ 384,000 គីឡូម៉ែត្រ។ ប៉ុន្តែដោយសារគន្លងគោចររបស់ព្រះចន្ទមានរាងដូចពងក្រពើ ដូចនេះវាតែងតែមានពេលខ្លះនៅជិតខ្លាំង និងឆ្ងាយខ្លាំងធៀបនឹងចម្ងាយមធ្យម។ ជាធម្មតា រៀងរាល់ឆ្នាំតែងមានចន្ទពេញវង់មួយលើក ពីរលើក ឬអាចបីលើកដែលកើតឡើងចំពេលព្រះចន្ទកំពុងស្ថិតនៅចំណុចជិតផែនដីបំផុតនៅលើគន្លងតារាវិថីរបស់វា។ ពេលនោះ មនុស្សនៅលើផែនដីនឹងមើលឃើញព្រះចន្ទធំជាង និងភ្លឺជាងធម្មតា។ នេះគឺជាឱកាសដ៏ពិសេសសម្រាប់អ្នកចូលចិត្តវិស័យតារាសាស្ត្រ និងអ្នកចូលចិត្តគយគន់ផ្ទៃមេឃពេលរាត្រី៕

September 29, 2023

ឥណ្ឌូណេស៊ីហាមលក់ទំនិញតាមបណ្ដាញសង្គមដើម្បីការពារពាណិជ្ជកម្មបែបបុរាណ

វាសនារបស់ TikTok Shop នៅប្រទេសឥណ្ឌូណេស៊ីអាចនឹងត្រូវបានសម្រេចនៅក្នុងសប្ដាហ៍នេះ ពេលដែលរដ្ឋាភិបាលរបស់ប្រទេសដែលមានប្រជាជនច្រើនជាងគេនៅអាស៊ីអាគ្នេយ៍ បានកំណត់គោលការណ៍ស្ដីពីការលក់ទំនិញតាមអនឡាញ។

លោក Oktavianus មានមុខរបរលក់សម្លៀកបំពាក់កូនក្មេងរយៈពេល 10 ឆ្នាំ នៅឯផ្សារ Tanah Abang (ហ្សាការតា) ប៉ុន្តែ ទើបតែបានងាកទៅលក់តាមអនឡាញកាលពីឆ្នាំ 2017។ អាជីវករវ័យ 37 ឆ្នាំរូបនេះ ឱ្យដឹងថា តាំងពីពេលនោះមក គាត់លក់ដាច់ជាងមុនឆ្ងាយ។ «TikTok Shop បានជួយខ្ញុំ។ ខ្ញុំបានឃើញល្បឿនរង្វិលជុំនៃទំនិញកើនពី 30% ទៅ 40%» លោក Oktavianus បានប្រាប់សារព័ត៌មាន Strait Times ដូច្នេះ។

ក៏ប៉ុន្តែ អាជីវករដូចលោក Oktavianus ទំនងជានឹងលែងបានសប្បាយចិត្តបែបនេះទៀតហើយ នៅពេលរដ្ឋាភិបាលឥណ្ឌូណេស៊ីអំពាវនាវ និងចាត់វិធានការ បង្ខំឱ្យថ្នាលបច្ចេកវិទ្យាទាំងអស់ត្រូវបែងចែកឱ្យបានច្បាស់រវាងបណ្ដាញសង្គម និងពាណិជ្ជកម្មអេឡិចត្រូនិច (ecommerce)។

ឥរិយាបថនេះធ្វើឡើងសំដៅលើបណ្ដាក្រុមហ៊ុនដូច TikTok ជាដើម ដោយក្រុមមន្ត្រីឥណ្ឌូណេស៊ីយល់ថា សកម្មភាពពាណិជ្ជកម្មនៅលើបណ្ដាញសង្គម (social commerce) គឺមិនយុត្តិធម៌ គំរាមកំហែងដល់បណ្ដាសហគ្រាសខ្នាតតូចក្នុងស្រុក។

ចំណែកភាគីតំណាង TikTok ប្រចាំប្រទេសឥណ្ឌូណេស៊ី ឱ្យដឹងថា ពាណិជ្ជកម្មសង្គម ត្រូវបានបង្កើតឡើងដើម្បីដោះស្រាយបញ្ហាជាក់ស្ដែងរបស់អាជីវករតូចតាចនៅក្នុងស្រុកដែលលក់ដូរបែបបុរាណ ដោយការតភ្ជាប់ពួកគេជាមួយនឹងក្រុមអ្នកច្នៃប្រឌិតក្នុងស្រុក ជាមនុស្សដែលអាចជួយបង្កើនការចូលមើលហាងអនឡាញរបស់អាជីវករ។

ទោះយ៉ាងណាក៏ដោយ ថ្មីៗនេះ រដ្ឋមន្ត្រីក្រសួងសហករណ៍សហគ្រាសធុនតូច និងមធ្យមឥណ្ឌូនេស៊ី Teten Masduki លើកឡើងថា សហគ្រាសលើបណ្ដាញសង្គមលក់ផលិតផលនាំចូលក្នុងតម្លៃទាបខុសធម្មតា ទាបជាងការចំណាយក្នុងការផលិតទំនិញក្នុងស្រុក និងប៉ះពាល់ដល់សហគ្រាសក្នុងស្រុក។

ក៏ប៉ុន្តែ លោកស្រី Weihan Chen ប្រធានក្រុម Insights របស់ Momentum Works ឱ្យដឹងថា ការហាមឃាត់លក់ដូរលើបណ្ដាញសង្គមអាចលុបបំបាត់រាល់ផលប្រយោជន៍ដែលបានពីបណ្ដាញសង្គម។ ប្រការនេះប្រាកដជាបង្កឱ្យមានឧបសគ្គដល់អាជីវករតូចតាច ជាក្រុមដែលមានបទពិសោធន៍តិចតួច និងមានធនធានតិចជាងគេ នាំឱ្យកំណើននៃការចាប់ផ្ដើមអាជីវកម្មយូរអង្វេងមានភាពយឺតយ៉ាវ៕

September 26, 2023

Tag: អាស៊ីអាគ្នេយ៍