អារម្មណ៍ - La Reine Media

ការវិលត្រលប់របស់ Messi ទៅកាន់ក្លឹប Barcelona មានភាគរយកាន់តែច្រើន

លោក Jorge ដែលជាឪទុករបស់ Lionel Messi បានឱ្យដឹងថា ដំណើរការចរចាជាមួយក្លឹបនៅអេស្ប៉ាញ ដើម្បីនាំកូនប្រុសវិលត្រលប់ទៅកាន់កីឡដ្ឋាន Nou Camp វិញ មានភាពរលូន។

នៅយប់ថ្ងៃទី 05 មិថុនា (ម៉ោងនៅកម្ពុជា) លោក Jorge បានជួបពិភាក្សាជាមួយប្រតិភូរបស់ក្លឹប Barca ដែលដឹកនាំដោយប្រធាន Joan Laporta។ យោងតាមអ្នកជំនាញខាងព័ត៌មានទិញដូរកីឡាករ លោក Fabrizio Romano ដំណើរការចរចាប្រព្រឹត្តទៅដោយរលូន ដែលនេះបង្ហាញថា លទ្ធភាពវិលទៅកាន់អេស្ប៉ាញរបស់កំពូលកីឡាករវ័យ 35 ឆ្នាំ M10 កាន់តែច្បាស់ថែមមួយកម្រិតទៀត។

«Leo ចង់ត្រលប់ទៅកាន់ Barca ហើយខ្ញុំក៏ចង់បានដូច្នេះ។ ខ្ញុំអាចនិយាយបានថា យើងជឿជាក់ថា ស្ថានភាពនោះនឹងក្លាយជាការពិត។ អ្នកទាំងឡាយនឹងបានដឹងអំពីអនាគតឆាប់ៗនេះ» លោក Romano ដកស្រង់សម្ដីរបស់លោក Jorge ឱ្យដឹងដូច្នេះ។

កាលពីឆ្នាំ 2021 Messi ត្រូវចាកចេញពី Barca ក្រោយរួមសុខទុក្ខនឹងគ្នាអស់ 21 ឆ្នាំ ព្រោះតែក្លឹបនេះមិនអាចធ្វើតាមការកំណត់ផ្នែកហិរញ្ញវត្ថុរបស់ La Liga។

Messi នឹងក្លាយជាកីឡាករសេរី បន្ទាប់ពីកិច្ចព្រមព្រៀងពីរឆ្នាំជាមួយក្លឹបបារាំង PSG អស់សុពលភាពឆាប់ៗនេះ។ Messi កំពុងត្រូវបានក្លឹបធំៗជាច្រើនចាប់អារម្មណ៍ ក្នុងនោះក៏មាន Barca, Inter Miami (អាម៉េរិក) និងក្លឹបមួយនៅអារ៉ាប៊ីសាអូឌីត។ ក្នុងនោះដែរ មានតែភាគីនៅអារ៉ាប៊ីសាអូឌីមួយគត់ដែលស្នើជាផ្លូវការសម្រាប់ Messi ក្នុងតម្លៃ 400 លានដុល្លារអាម៉េរិក/ឆ្នាំ។

Lionel Messi បានឆ្លងកាត់ពីររដូវកាលជាមួយនឹង PSG ក្នុងនោះ ពួកគេដណ្ដើមបានពានរង្វាន់ជើងឯក Ligue 1 ទាំងពីររដូវកាល ក៏ដូចជាដណ្ដើមបានតំណែងជើងឯក Champions Trophy របស់បារាំងឆ្នាំ 2022។ Messi ចូលរួមទាត់ឱ្យ PSG បាន 74 ប្រកួត រកបាន 32 គ្រាប់ និងបង្កឱកាសបាន 35 គ្រាប់។ ក៏ប៉ុន្តែមួយរយៈពេលចុងក្រោយនេះ អ្នកគាំទ្ររបស់ PSG តែងតែសម្ដែងការមិនពេញចិត្តចំពោះកីឡាករអាហ្សង់ទីនរូបនេះ៕

June 6, 2023

Ronaldo បង្កការភ្ញាក់ផ្អើលនៅអាស៊ីអាគ្នេយ៍ ក្រោយចាកចេញពីក្លឹប Al Nassr

បន្ទាប់ពីទទួលបានការអនុញ្ញាតឱ្យចាកចេញពី Al Nassr នៅមុនអស់រដូវកាល Cristiano Ronaldo បានធ្វើដំណើរមកកាន់ប្រទេសមួយនៅអាស៊ីអាគ្នេយ៍ ហើយក៏បានបង្កការភ្ញាក់ផ្អើលខ្លាំងនៅទីនេះ។

ថ្មីៗនេះ Ronaldo ត្រូវបានគ្រូបង្វឹកអនុញ្ញាតឱ្យចាកចេញពីក្លឹប Al Nassr ប៉ុន្តែមិនមែនដើម្បីទាត់ជុំចុងក្រោយនៅ Saudi Pro League (SPL) ឡើយ ព្រោះថា នេះគ្រាន់តែជាការប្រកួត «បំពេញបែបបទ» ប៉ុណ្ណោះ ដោយសារតែក្លឹបនេះបានអស់ឱកាសប្រកួតប្រជែង ហើយត្រូវឈរមើល Al Ittihad លើកពាន។

បើទោះជាសូមឈប់ និងចាកចេញពី Al Nassr មុនការបញ្ចប់រដូវកាល ប៉ុន្តែ Ronaldo មិនបានត្រលប់ទៅព័រទុយហ្កាល់ដើម្បីសម្រាកនោះទេ។ ជំនួសមកវិញ កំពូលតារាបាល់ទាត់វ័យ 38 ឆ្នាំរូបនេះបែរជាធ្វើដំណើរមកសិង្ហបុរីទៅវិញ កាលពីថ្ងៃទី 02 មិថុនា 2023។

តបតាមការអញ្ជើញរបស់ Peter Lim ដែលជាអ្នកជំនួញជនជាតិសិង្ហបុរី Ronaldo ក៏ចូលរួមព្រឹត្តិការណ៍ចែកអាហារូបករណ៍ដល់កុមារនៅប្រទេសនេះ និងធ្វើជាវាគ្មិន ចែករំលែកបទពិសោធន៍ និងផ្ដល់កម្លាំងចិត្តដល់យុវជន យុវនារីដែលស្ថិតក្នុងស្ថានភាពលំបាក។

វត្តមានរបស់ Ronaldo នៅសិង្ហបុរី ទទួលបានចំណាប់អារម្មណ៍យ៉ាងខ្លាំង។ ទោះជាបង្ហាញខ្លួនប្រហែល 15 នាទីនៅឧទ្យាន Singapore Botanic Gardens ប៉ុន្តែមានមនុស្សជាច្រើនបានស្គាល់ និងដេញតាមពីក្រោយរថយន្តរបស់ CR7 ដើម្បីរកឱកាសបានថតរូបជាមួយ ឬចង់ឃើញផ្ទាល់នឹងភ្នែក។

ក្រោយពីបញ្ចប់សកម្មភាពនៅសិង្ហបុរី ទើប Ronaldo ត្រលប់ទៅស្រុកកំណើតដើម្បីសម្រាក និងត្រៀមខ្លួនសម្រាប់ការប្រកួតរបស់ក្រុមជម្រើសជាតិព័រទុយហ្កាល់នៅ វគ្គជម្រុះ Euro 2024 នាពេលខាងមុខ។ តាមកាលវិភាគ នៅថ្ងៃទី 18 និង 21 ខែនេះ ព័រទុយហ្កាល់នឹងប្រកួតបន្តបន្ទាប់ជាមួយបូស្នី និងអ៊ីស្លង់៕

June 5, 2023

ក្រុមហ៊ុនរបស់ Elon Musk ទទួលបានសិទ្ធិ «បំពាក់ឈីបបញ្ជារាងកាយក្នុងខួរក្បាលមនុស្ស»

(សហរដ្ឋអាម៉េរិក) – ឈីបខួរក្បាលដែលអភិវឌ្ឍដោយក្រុមហ៊ុន Neuralink របស់មហាសេដ្ឋីអាម៉េរិក Elon Musk ទទួលបានការអនុញ្ញាតឱ្យធ្វើការពិសោធលើមនុស្ស ក្រោយការធ្វើតេស្តជាច្រើនលើកនៅលើសត្វ។

ស្ថាប័នគ្រប់គ្រងអាហារ និងឱសថអាម៉េរិក (FDA) បានផ្ដល់វិញ្ញាបនបត្រឱ្យក្រុមហ៊ុន Neuralink ដើម្បីធ្វើការពិសោធដំបូងនៅលើមនុស្ស នេះបើតាមការចុះផ្សាយកាលពីថ្ងៃទី 02 មិថុនា របស់ Live Science។ Neuralink កំពុងឆ្ពោះទៅរកការប្រើប្រាស់បច្ចេកវិទ្យាអន្តរកម្មខួរក្បាល-កុំព្យូទ័រ ដែលហៅថា BCI (brain-computer interface) ដើម្បីស្ដារពិការភាពរបស់មនុស្ស។ លោក Musk អះអាងថា ឧបករណ៍ដែលបំពាក់ក្នុងខួរក្បាលនេះក៏អាចជួយស្ដារបញ្ហាចក្ខុវិញ្ញាណផងដែរ។

Neuron ឬកោសិកាសរសៃវិញ្ញាណ ទាក់ទងគ្នាតាមរយៈរលកសញ្ញាអគ្គិសនីដើម្បីចាត់ចែងគំនិត អារម្មណ៍ និងឥរិយាបថរបស់មនុស្ស។ ឈិបខួរក្បាលរបស់ Neuralink ដំណើរការតាមរយៈការបកស្រាយរលកសញ្ញាអគ្គិសនី និងបញ្ជូនព័ត៌មានដែលបាន «បិទសោ» ទៅកាន់កុំព្យូទ័រដោយប្រើ Bluetooth។ កុំព្យូទ័រនឹងវិភាគព័ត៌មានដែលទទួលបាន ហើយឆ្លើយតបដោយការផ្ញើរលកសញ្ញាឱ្យរាងកាយ ដាស់សរសៃវិញ្ញាណ និងសាច់ដុំ ដើម្បីបញ្ជាសកម្មភាព។

ដំណើរការនៃបច្ចេកវិទ្យាអន្តរកម្មខួរក្បាល-កុំព្យូទ័រ ដែលហៅថា BCI (brain-computer interface)

ឈីបខួរក្បាលរបស់ Neuralink ត្រូវបានបំពាក់ក្នុងក្បាលមនុស្សតាមរយៈរន្ធតូចមួយនៅលើលលាដ៍ក្បាលដែលបានចោះដោយរ៉ូបូតវះកាត់ស្វ័យប្រវត្ត ហើយបន្ទាប់មក អេឡិចត្រូតរបស់ឈីបនេះនឹងត្រូវបានបំពាក់ក្នុងជម្រៅតែប៉ុន្មានមិល្លីម៉ែត្រប៉ុណ្ណោះនៅលើស្រទាប់ក្រៅបង្អស់របស់ខួរក្បាល។ ដំណើរការវះកាត់បំពាក់ឈីបខួរក្បាលនេះ ចំណាយពេល 30 នាទី ដោយមិនបាច់ចាក់ថ្នាំសន្លប់៕

June 3, 2023

ត្បូងពេជ្រមិនទាន់ច្នៃដែលធំជាងគេបង្អស់លើពិភពលោក

ពេជ្រមិនទាន់ច្នៃមានទំហំធំជាងគេបង្អស់លើពិភពលោក ដែលមានឈ្មោះថា Cullinan ត្រូវបានរកឃើញនៅប្រទេសអាហ្វ្រិកខាងត្បូង ក្នុងឆ្នាំ 1905។

យោងតាមទំពី IFL Science ត្បូង Cullinan គឺជាពេជ្រមិនទាន់ច្នៃមួយដុំដែលមានទម្ងន់ 3,106 ការ៉ាត និងមានទំហំ 10.1 x 6.35 x 5.9 សង់ទីម៉ែត្រ។ ទម្ងន់នេះស្មើនឹង 621 ក្រាម និងធំប៉ុនបាល់បោះមួយគ្រាប់ ឬសត្វឃ្មុំ 7,692 ក្បាល។

កាលពីឆ្នាំ 1905 Frederick Wells អ្នកគ្រប់គ្រងអណ្ដូងរ៉ែ Premier នៅ Pretoria ប្រទេសអាហ្វ្រិកខាងត្បូង បានឃើញពន្លឺចាំងចេញពីវត្ថុអ្វីមួយនៅជាប់នឹងជញ្ជាំងផ្នែកខាងលើ នៅពេលស្ថិតក្នុងដីជម្រៅ 5.5 ម៉ែត្រ។ Wells យកបានត្បូងពេជ្រនេះ ហើយប្រគល់ជូនលោក Thomas Cullinan ដែលជាម្ចាស់អណ្ដូងរ៉ែ នៅក្នុងថ្ងៃដដែល។ ប៉ុន្តែ រហូតដល់ឆ្នាំ 1907 ទើបត្បូងនេះមានអ្នកទិញ។ អាជ្ញាធរខេត្ត Transvaal បានទិញត្បូងពេជ្រនេះដើម្បីធ្វើជាតង្វាយសម្រាប់ថ្វាយស្ដេច Edward ទី 7 របស់ចក្រភពអង់គ្លេស។ ដោយសារតែបារម្ភអំពីសុវត្ថិភាពតាមផ្លូវដឹកជញ្ជូនពីទ្វីបអាហ្វ្រិកទៅកាន់ទីក្រុងឡុងដ៍របស់អង់គ្លេស ស្ដេច Edward បានដាក់ត្បូងពេជ្រក្លែងក្លាយនៅលើកប៉ាល់ ដោយមានអ្នកយាមការពារច្រើននាក់ ក្នុងបំណងបង្វែរចំណាប់អារម្មណ៍ ខណៈដែលពេជ្រ Cullinan ពិតប្រាកដត្រូវបានផ្ញើទៅកាន់អង់គ្លេសដោយដាក់ក្នុងប្រអប់សាមញ្ញ។

ដោយសារតែ Cullinan មានទំហំធំពេក ស្ដេច Edward ក៏ប្រគល់ការងារកែច្នៃទៅឱ្យ Joseph Asscher ដែលជាប្រធានក្រុមហ៊ុន Asscher Diamond នៅ Amsterdam ។ Asscher និងក្រុមការងារបានចំណាយពេលពិនិត្យ និងកាត់ជាដុំអស់រយៈពេល 14 ខែ ក្នុងនោះពួកគេត្រូវធ្វើការជាងដប់ម៉ោង/ថ្ងៃ ហើយពេលខ្លះ Asscher ក៏ត្រូវដួលសន្លប់ព្រោះតែអស់កម្លាំង និងព្រួយបារម្ភ។ ចុងក្រោយ ពេជ្រ Cullinan ក៏ត្រូវបានកាត់ជា 9 ដុំធំៗ និងត្រូវបានដាក់ឈ្មោះពី Cullinan I ដល់ Cullinan IX និងដុំតូចៗជិត 100 ដែលមានតម្លៃរាប់លានដុល្លារអាម៉េរិក។

Cullinan គឺជាត្បូងពេជ្រធំជាងគេបង្អស់លើពិភពលោក

ត្បូងពេជ្រមួយគ្រាប់ធំជាងគេក្នុងចំណោមនោះ ដែលត្រូវបានដាក់ឈ្មោះឱ្យថា Cullinan I ឬហៅថា តារាទ្វីបអាហ្វ្រិក មានទម្ងន់ 530.2 ការ៉ាត។ ពេជ្រធំៗទាំង 9 គ្រាប់នេះសុទ្ធតែជាកម្មសិទ្ធិរបស់រាជវង្សអង់គ្លេស ហើយភាគច្រើនត្រូវបានប្រើប្រាស់ដើម្បីតុបតែងមកុដ និងគ្រឿងអលង្ការនានា។

គ្រាប់ពេជ្រដែលធំជាងគេលំដាប់ទីពីរលើពិភពលោកបន្ទាប់ពី Cullinan គឺ Excelsior។ Excelsior ត្រូវបានរកឃើញដោយកម្មករនៅអណ្ដូងរ៉ែ Jagersfontein ក្នុងប្រទេសអាហ្វ្រិកខាងត្បូង កាលពីឆ្នាំ 1893។ អណ្ដូងរ៉ែ Jagersfontein ជាកន្លែងដែលបានរកឃើញដុំពេជ្រចំនួនពីរក្នុងចំណោយដុំពេជ្រទាំងដប់ដែលមានទំហំធំជាងគេលើពិភពលោក៕

May 31, 2023

ទិដ្ឋភាពខាងក្នុងយន្តហោះដឹកអ្នកដំណើរដំបូងដែលផលិតដោយប្រទេសចិន

យន្តហោះដឹកអ្នកដំណើរដំបូងដែលផលិតដោយប្រទេសចិន និងមានឈ្មោះថា C919 ត្រូវបានអ្នកដំណើរវាយតម្លៃថា «ធំទូលាយល្មម» ខណៈដែលពីឡុតវាយតម្លៃថាជាយន្តហោះ «ល្អបំផុត»។

នៅឯព្រលានយន្តហោះអន្តរជាតិ Hongqiao កាលពីថ្ងៃទី 28 ឧសភា 2023 ជើងហោះហើរលេខ MU9191 របស់ China Eastern Airlines បានដឹកអ្នកដំណើរ 130 នាក់ ហោះឆ្ពោះទៅកាន់រដ្ឋធានីប៉េកាំង។

«ខ្ញុំធ្វើដំណើរតាមយន្តហោះជាញឹកញាប់។ ខ្ញុំយល់ថា កៅអីធំទូលាយល្មម ធ្វើឱ្យមានអារម្មណ៍ស្រួលខ្លួន» អ្នកស្រី Yu ដែលជាអ្នកដំណើរមួយរូប យល់ឃើញដូច្នេះ។

យន្តហោះ C919 ក៏បានចុះចតលើព្រលានយន្តហោះប៉េកាំង និងត្រូវបានទទួលស្វាគមន៍ដោយការបាញ់ទឹក ក្រោយពីធ្វើដំណើររយៈពេលពីរម៉ោងពីព្រលានយន្តហោះ Hongqiao នៅសៀងហៃ។

Zhao Hongbing ដែលជាប្រធានក្រុមហោះហើរ និយាយថា «យើងបានធ្វើការហោះហើរសាកល្បងជាង 100 ជើង ដោយហោះឡើង និងចុះចតរាប់សិបលើក។ និយាយរួម ខ្ញុំគិតថា យន្តហោះនេះល្អណាស់»។

C919 ត្រូវបានអ្នកដំណើរវាយតម្លៃថា «ធំទូលាយល្មម» ខណៈដែលពីឡុតវាយតម្លៃថាជាយន្តហោះ «ល្អបំផុត»

ពិធីប្រគល់វិញ្ញាបនបត្រទទួលស្គាល់ថា យន្តហោះ C919 សម្រេចបានស្ដង់ដានៅទីក្រុងប៉េកាំង ត្រូវបានធ្វើឡើងកាលពីថ្ងៃទី 29 កញ្ញា ឆ្នាំ 2019។ វិញ្ញាបនបត្រនេះត្រូវបានប្រគល់ដោយអាជ្ញាធរគ្រប់គ្រងអាកាសចរណ៍ស៊ីវិលចិន។

យន្តហោះដឹកអ្នកដំណើរដំបូងដែលផលិតដោយប្រទេសចិន មានឈ្មោះថា C919

«យើងមានម្ចាស់ការទាំងស្រុងលើដំណើរការនៃការរចនា ផលិត ធ្វើតេស្ត ត្រួតពិនិត្យ និងទទួលស្គាល់ ដែលនេះគឺជាសញ្ញាមួយបង្ហាញថា ប្រទេសចិនឈានចូលក្នុងក្រុមប្រទេសផលិតលំដាប់ខ្ពស់» លោក Zhang Yanzhong ទីប្រឹក្សាកម្មវិធី C919 នៃបណ្ឌិត្យសភាវិទ្យាសាស្ត្រ និងបច្ចេកវិទ្យាចិន អះអាងដូច្នេះ៕

May 29, 2023

អនាគតបេក្ខភាពប្រធាន FAT របស់ថៃ៖ «បើថៃមិនបានចូលរួម World Cup ខ្ញុំនឹងលាលែងពីតំណែង»

អតីតកីឡាករឆ្នើម Piyapong Pew On ធ្វើឱ្យមានការចាប់អារម្មណ៍បន្ទាប់ពីបានប្រកាសឈរឈ្មោះជាបេក្ខភាពសម្រាប់តំណែងប្រធានសហព័ន្ធកីឡាបាល់ទាត់របស់ប្រទេសថៃ។

យោងតាមប្រព័ន្ធផ្សព្វផ្សាយថៃ បើទោះជាការបោះឆ្នោតជ្រើសរើសប្រធានសហព័ន្ធបាល់ទាត់ថៃ (FAT) ត្រូវធ្វើឡើងនៅខែមេសា ឆ្នាំ 2024 ប៉ុន្តែស្ថានការណ៍ប្រែប្រួលនៅមុនការបោះឆ្នោតនេះ កំពុងតែឡើង «កម្ដៅ»។ Piyapong Pew On ដែលជាអតីតកីឡាករឆ្នើមរបស់បាល់ទាត់ថៃ នឹងក្លាយជាបេក្ខភាពសម្រាប់តំណែងនេះ។

ចែករំលែកអំពីការសម្រេចចិត្តខាងលើ លោក Piyapong Pew On បានបង្កការចាប់អារម្មណ៍ខ្លាំងនៅពេលប្រកាសថា នឹងលាលែងពីតំណែង បើសិនមិនអាចជួយឱ្យបាល់ទាត់ថៃបានចូលរួមប្រកួតនៅ World Cup។

«… ខ្ញុំបានត្រៀមខ្លួនរួចហើយសម្រាប់ការកាន់តំណែងប្រធាន FAT។ បើសិនសមាជិក សមាជិកាគាំទ្រ ខ្ញុំសន្យាចំពោះគ្រប់គ្នាថា នឹងបំពេញកាតព្វកិច្ចក្នុងរង្វង់បួនឆ្នាំ។ បើសិនក្រុមជម្រើសជាតិថៃមិនបានចូលរួម World Cup ខ្ញុំនឹងលាលែងពីតំណែង ហើយធ្វើកិច្ចការក្នុងវិស័យបាល់ទាត់ជាមួយនឹងតួនាទីផ្សេង» អតីតកីឡាករឆ្នើមរបស់ប្រទេសថៃ លោក Piyapong Pew On អះអាងដូច្នេះ។

លោក Piyapong Pew On បញ្ជាក់ថា លោកមិនប្រជែងដើម្បីមុខតំណែង ប៉ុន្តែលោកមានភាពម៉ឺងម៉ាត់ដោយរំពឹងថានឹងអភិវឌ្ឍ និងបង្កើតវប្បធម៌បាល់ទាត់ថៃទៅតាមស្មារតី «ភាពត្រឹមត្រូវ ភាពស្មោះត្រង់ តម្លាភាព និងមានការផ្ទៀងផ្ទាត់»។

លោក Piyapong Pew On ក៏ជាអ្នកដែលបានរិះគន់ទៅលើក្រុមគ្រូបង្វឹករបស់ក្រុមបាល់ទាត់ U22 ថៃ នៅក្នុងករណីវាយតប់គ្នាក្នុងការប្រកួតវគ្គផ្ដាច់ព្រ័ត្រនៅស៊ីហ្គេមលើកទី 32 រវាង U22 ថៃ និង U22 ឥណ្ឌូណេស៊ី កាលពីថ្ងៃ 16 ខែឧសភា 2023។

«ករណីហិង្សាកើតឡើងក្នុងវគ្គផ្ដាច់ព្រ័ត្ររវាង U22 ថៃ និង U22 ឥណ្ឌូណេស៊ី។ នោះគឺជារឿងដែលកីឡាករថៃត្រូវរៀនសូត្រ ពិសេសគឺការគ្រប់គ្រងកំហឹង។ ប៉ុន្តែ នោះគឺជាបញ្ហាដែលមិនគួរកើតឡើង និងមិនអាចលើកលែងទោស នៅពេលក្រុមគ្រូបង្វឹកទាំងមូលសម្រុកចូលបង្កហេតុជាមួយឥណ្ឌូណេស៊ី។ ពួកគេគួរណាស់តែរារាំងកីឡាករក្មេងៗ តែបែរជាធ្វើឱ្យមានកំហុសដោយខ្លួនឯងទៅវិញ» លោក Piyapong Pew On ថ្លែងដូច្នេះ។

លោក Piyapong Pew On បន្ថែមថា «ទោះជាយ៉ាងណាក៏ដោយ គេត្រូវតែផ្លាស់ប្ដូរគ្រូបង្វឹក ថៃត្រូវការមនុស្សហ្មត់ចត់ជាងដើម្បីដឹកនាំក្រុមកីឡាករក្មេង មិនដូច្នេះទេ យើងនឹងត្រូវបានបំផ្លាញដូចនៅក្នុងការប្រកួតផ្ដាច់ព្រ័ត្រនៅស៊ីហ្គេមលើកនេះ»។

លោក Piyapong Pew On អាចនឹងត្រូវប្រកួតប្រជែងដណ្ដើមតំណែងប្រធានសហព័ន្ធបាល់ទាត់ថៃ ជាមួយនឹងអតីតប្រធាន FAT លោក Worawee Makudi អាយុ 72 ឆ្នាំ។ កន្លងមក លោក Worawee Makudi ក៏បានបញ្ជាក់ថា នឹងឈរឈ្មោះជាបេក្ខភាពសម្រាប់តំណែងនេះជាថ្មី បើទោះផ្ទុយពីការកំណត់ដែលហាមបេក្ខភាពដែលមានអាយុលើសពី 70 ឆ្នាំ។ ប្រធាន FAT បច្ចុប្បន្នដែលត្រូវចប់អាណត្តិនៅខែកុម្ភៈ ឆ្នាំ 2024 គឺលោក Somyot Poompanmoung៕

May 23, 2023

ចម្លែកណាស់! បុរសនេះពិសាតែភេសជ្ជៈកំប៉ុងជំនួសអាហារ អស់រយៈពេល 17 ឆ្នាំមកហើយ

(ប្រទេសអ៊ីរ៉ង់) – Gholamreza Ardeshiri អាយុ 58 ឆ្នាំ គឺជាបុរសម្នាក់ដែលរស់ដោយសារ Pepsi និង Coca-Cola ក្នុងរយៈពេល 17 ឆ្នាំកន្លងមកហើយ ព្រោះ ឱ្យតែឃើញអាហារគឺគាត់រកកលក្អួត។

រឿងរ៉ាវបានចាប់ផ្ដើមកាលពីយប់មួយក្នុងឆ្នាំ 2006 នៅពេល Ardeshiri ក្រោកពីសម្រាន្តស្រាប់តែមានអ្វីចម្លែកនៅក្នុងមាត់ដែលមិនអាចបំបាត់ចោលបាន។

«ខ្ញុំមានអារម្មណ៍ដូចជាមានសក់នៅក្នុងអណ្ដាត។ ខ្ញុំបានធ្វើគ្រប់យ៉ាង ប៉ុន្តែមិនអាចបំបាត់វាចោល។ ខ្ញុំពិបាកដកដង្ហើម មិនអាចធ្វើអ្វីបាន។ អារម្មណ៍នេះពិតជាផ្ដេសផ្ដាស និងពិបាកពន្យល់» លោក Ardeshiri រម្លឹកអំពីដើមហេតុដែលនាំឱ្យគាត់ឈប់ទទួលទានអាហារ។

គាត់បានទៅពេទ្យស្ទើរគ្រប់ជំនាញ ប៉ុន្តែ បញ្ហានៅតែមិនអាចដោះស្រាយបាន។ ចុងក្រោយ គាត់បានសម្រេចចិត្តបោះបង់ការទទួលទានអាហារ ហើយរស់នៅដោយសារភេសជ្ជៈកំប៉ុង។ លោក Ardeshiri ឱ្យដឹងថា លើកដំបូងដែលគាត់ពិសាភេសជ្ជៈកំប៉ុន គាត់មានអារម្មណ៍ថា មានកម្លាំងភ្លាមៗ ហើយក៏សម្រេចចិត្តពិសាវាជំនួសអាហារ។

គ្រួសាររបស់លោក Ardeshiri បានប្រាប់ថា ពួកគេមិនបរិភោគអាហារនៅចំពោះលោក Ardeshiri ឡើយ ព្រោះថា រាល់ពេលដែលគាត់បានឃើញអាហារ គាត់តែងតែរកកលក្អួត។ ជារៀងរាល់ថ្ងៃ លោក Ardeshiri ពិសាភេសជ្ជៈនេះបីដបធំៗ និងបានអះអាងថា មិនដែលមានអារម្មណ៍ថាឃ្លាននោះទេ។ ចាប់តាំងពីមានទម្លាប់នេះមក គាត់ស្រកទម្ងន់ 32 គីឡូក្រាម ហើយក៏មិនដែលមានបញ្ហាសុខភាពធ្ងន់ធ្ងរអ្វីឡើយ ក្នុងរយៈពេល 17 ឆ្នាំកន្លងទៅ៕

May 19, 2023

FIFA ជិតចាប់ផ្ដើមចូលស៊ើបអង្កេត ខណៈ U22 ឥណ្ឌូណេស៊ីប្ដេជ្ញាប្ដឹងប្រឆាំង U22 ថៃ ក្នុងករណីនៅស៊ីហ្គេម 2023

ភាគីខាង U22 ឥណ្ឌូណេស៊ី កំពុងតែមានបំណងពឹង FIFA កាត់ក្ដីករណីអំពើហិង្សារវាងក្រុមបាល់ទាត់បុរសជម្រើសជាតិប្រទេសនេះ និងក្រុមបាល់ទាត់ថៃ នៅក្នុងការប្រកួតវគ្គផ្ដាច់ព្រ័ត្រនៅស៊ីហ្គេមលើកទី 32។

ហេតុការណ៍វាយតប់គ្នារវាង U22 ថៃ និង U22 ឥណ្ឌូណេស៊ី មិនទាន់ត្រូវបានដោះស្រាយរួចរាល់នៅឡើយ បើទោះវគ្គផ្ដាច់ព្រ័ត្រនៅស៊ីហ្គេមឆ្នាំ 2023 បានចប់សព្វគ្រប់។ បន្ទាប់ពីសហព័ន្ធកីឡាបាល់ទាត់អាស៊ី (AFC) ចាប់ផ្ដើមស៊ើបអង្កេត ហើយក្រុមទាំងពីរអាចត្រូវទទួលការពិន័យ ភាគីឥណ្ឌូណេស៊ីក៏បែរជាចង់អញ្ជើញទាំង FIFA មកចូលរួមដោះស្រាយ។

ភាគីឥណ្ឌូណេស៊ីចង់ឱ្យថៃទទួលខុសត្រូវនៅក្នុងករណីនេះ។ ប្រធានគណៈកម្មាធិការអូឡាំពិកឥណ្ឌូណេស៊ី (NOC) Raja Sapta Oktohari បានបើកកិច្ចប្រជុំមួយជាមួយសមាជិករបស់សហព័ន្ធបាល់ទាត់ឥណ្ឌូណេស៊ី (PSSI) ដើម្បីធ្វើការសម្រេចលើការស្នើសុំអន្តរាគមន៍របស់ FIFA ក្នុងករណីហិង្សានៅវគ្គផ្ដាច់ព្រ័ត្រផ្នែកបាល់ទាត់បុរសនៅស៊ីហ្គមលើកទី 32 និងកាត់ក្ដីចុងក្រោយ។

ប្រធាន NOC ឱ្យដឹងថា «ពេលនេះ យើងមិនទាន់បញ្ជូនរបាយការណ៍ឡើងទៅកាន់ FIFA ប៉ុន្តែរឿងនេះនឹងកើតឡើងឆាប់ៗខាងមុខ។ កិច្ចប្រជុំផ្ទៃក្នុងបានបញ្ចប់ ខ្ញុំ និងប្រធាន PSSI – Erick Thohir សុទ្ធតែមិនចង់នៅស្ងៀមក្នុងករណីនេះ។ បើសិនខាងឥណ្ឌូណេស៊ីខុស យើងនឹងទទួលខុសត្រូវ ប៉ុន្តែបើថៃខុស ពួកគេក៏នឹងត្រូវធ្វើដូច្នេះ»។

ភាគីឥណ្ឌូណេស៊ីទំនងជាកំពុងជឿជាក់ថា ខ្លួនមិនមានកំហុសនៅក្នុងការវាយតប់គ្នាជាមួយក្រុមថៃនៅវគ្គផ្ដាច់ព្រ័ត្រនៅស៊ីហ្គេមឆ្នាំ 2023។ ចំណែកថៃវិញ បច្ចុប្បន្នក៏កំពុងមានភាពតានតឹងខ្លាំង ទាក់ទងនឹងបញ្ហានេះ។ អនុប្រធានសហព័ន្ធកីឡាបាល់ទាត់ថៃ Yuttana Yimkarun ថ្មីៗនេះបានសរសេរលិខិតសុំលាលែងពីតំណែង។ ប្រធានសមាគមបាល់ទាត់ថៃ (FAT) យល់ថា ពួកគេត្រូវទទួលខុសត្រូវ បន្ទាប់ពីបានបណ្ដោយឱ្យកីឡាករ U22 ថៃ បាត់បង់ការគ្រប់គ្រងអារម្មណ៍ក្នុងវគ្គផ្ដាច់ព្រ័ត្រ ហើយបង្កើតឱ្យមានរូបភាពអាក្រក់នៅកម្ពុជា។

ការប្រកួតវគ្គផ្ដាច់ព្រ័ត្ររវាង U22 ឥណ្ឌូណេស៊ី និងថៃ ត្រូវបានគេចាត់ទុកថាមានភាពទាក់ទាញបំផុតក្នុងប្រវត្តិសាស្ត្រស៊ីហ្គេម។ ក្នុងការប្រកួតនេះ ឥណ្ឌូណេស៊ីបានឈ្នះថៃ 5-2 ខណៈអាជ្ញាកណ្ដាលបានពិន័យកាតលឿងជាង 10 និងកាតក្រហមចំនួន 7 ដោយសារតែមានការប៉ះទង្គិចគ្នាច្រើន និងការប្រើអំពើហិង្សា៕

May 19, 2023

U22 ឥណ្ឌូណេស៊ីត្រូវអ្នកគាំទ្រកម្ពុជា «ស្ទាក់រថយន្ត» ព្រោះតែមូលហេតុដ៏គួរឱ្យភ្ញាក់ផ្អើល

ការស្ទាក់ផ្លូវរបស់ក្រុមអ្នកគាំទ្រកម្ពុជានេះ គឺជាទិដ្ឋភាពដែលពិបាកបំភ្លេចសម្រាប់ក្រុមកីឡាករបាល់ទាត់បុរសអាយុក្រោម 22 ឆ្នាំ (U22) របស់ប្រទេសឥណ្ឌូណេស៊ី ក្រោយពីបានប៉ះ U22 វៀតណាម នៅវគ្គពាក់កណ្ដាលផ្ដាច់ព្រ័ត្រនៃវិញ្ញាសាបាល់ទាត់បុរសនៅស៊ីហ្គេមលើកនេះ។

ទំព័រ Okezone ថ្មីៗនេះ ទើបតែបានចុះផ្សាយអត្ថបទមួយនិយាយអំពីប្រតិកម្មពិសេសរបស់ក្រុមអ្នកគាំទ្រកម្ពុជា ចំពោះក្រុមកីឡាករបាល់ទាត់ U22 ឥណ្ឌូណេស៊ី ដែលដណ្ដើមបានជ័យជម្នះលើ U22 វៀតណាម ក្នុងវគ្គពាក់កណ្ដាលផ្ដាច់ព្រ័ត្រនៅស៊ីហ្គេមលើកទី 32 កាលពីថ្ងៃទី 13 ឧសភា ក្នុងលទ្ធផល 3-2។

ទំព័រ Okezone ឱ្យដឹងថា មិនយូរប៉ុន្មានបន្ទាប់ពីយកឈ្នះលើវៀតណាម រថយន្តក្រុងក៏បានត្រៀមដឹកក្រុម U22 ឥណ្ឌូណេស៊ី ត្រលប់ទៅសណ្ឋាគារ ប៉ុន្តែ ស្រាប់តែត្រូវក្រុមអ្នកគាំទ្ររបស់កម្ពុជា ស្ទាក់ផ្លូវ «ឡោមព័ទ្ធ» ធ្វើឱ្យរថយន្តមិនអាចបរទៅមុខ។ ក្រោយពីរូបថតស្ដីពីករណីនេះត្រូវបានចែករំលែកលើបណ្ដាញសង្គម អ្នកគាំទ្រនៅឥណ្ឌូណេស៊ី ក៏មានការងឿងឆ្ងល់ខ្លាំង និងចង់ដឹងថា មានអ្វីកើតឡើងចំពោះក្រុមឥណ្ឌូណេស៊ី។

U22 ឥណ្ឌូណេស៊ី ឈ្នះ U22 វៀតណាម ក្នុងវគ្គពាក់កណ្ដាលផ្ដាច់ព្រ័ត្រ កាលពីថ្ងៃទី 13 ឧសភា ក្នុងលទ្ធផល 3-2

តាមការពិត មូលហេតុដែលនាំឱ្យអ្នកគាំទ្ររបស់កម្ពុជា ស្ទាក់ឡានដឹកក្រុមឥណ្ឌូណេស៊ី គឺជារឿងសាមញ្ញសោះ។ យោងតាមទំព័រ Okezone អ្នកគាំទ្ររបស់កម្ពុជាធ្វើដូច្នេះគឺគ្រាន់តែដើម្បីសុំថតរូបជាមួយ Marselino Ferdinan និងមិត្តរួមក្រុមរបស់គាត់។

ក្រុមអ្នកគាំទ្ររបស់កម្ពុជាទាំងនេះ គឺមានទាំងបុរស ទាំងនារី។ តប់នឹងសំណើរបស់អ្នកគាំទ្រក្រុមម្ចាស់ផ្ទះ កីឡាករជាច្រើនរូបរបស់ឥណ្ឌូណេស៊ី ក៏យល់ព្រមថតរូបប្រកបដោយភាពស្និទ្ធស្នាល។ បន្ទាប់មក ពួកគេក៏ឡើងឡាន និងចេញដំណើរដោយមានការរាដៃលាពីអ្នកគាំទ្រ ហើយទៅដល់សណ្ឋាគារដោយសុវត្ថិភាព។

ទំព័រ Okezone បានឱ្យដឹងថា ប្រតិកម្មដ៏ពិសេសនេះ បានក្លាយជាទីចាប់អារម្មណ៍លើបណ្ដាញសង្គមនៅឥណ្ឌូណេស៊ី។ សារព័ត៌មានឥណ្ឌូណេស៊ី យល់ថា នេះគឺជាទិដ្ឋភាពដ៏គួរឱ្យចងចាំសម្រាប់ Ferdinan និងមិត្តរួមក្រុមនៅស៊ីហ្គេមលើកទី 32។ ក្រៅពីនេះ ការគាំទ្ររបស់ទស្សនិកជនកម្ពុជា ក៏នឹងជួយឱ្យ U22 ឥណ្ឌូណេស៊ី មានកម្លាំងចិត្តកាន់តែខ្ពស់ នៅក្នុងការប្រកួតជាមួយ U22 ថៃ នៅវគ្គផ្ដាច់ព្រ័ត្រ ឆ្ពោះទៅដណ្ដើមមេដាយមាសក្រោយការរង់ចាំអស់ 32 ឆ្នាំ៕

May 16, 2023

ហាងសម្លៀកបំពាក់អេស្ប៉ាញលំដាប់ពិភពលោកដំបូងគេបង្អស់នៅកម្ពុជា «ZARA» សម្ពោធបើកដំណើរការនៅភ្នំពេញ

(ភ្នំពេញ) – តើនាងកញ្ញា លោក លោកស្រី គឺជាមនុស្សស៊ីវិល័យដែលចូលចិត្ត និងមានបំណងស្វែងរកម៉ូដសម្លៀកបំពាក់ទាន់សម័យ និងថ្លៃថ្នូរលំដាប់ពិភពលោកមែនទេ? ZARA បានមកដល់កម្ពុជាយើងហើយ!

ក្រុមហ៊ុនគ្រប់គ្រង ម៉ាក ZARA បានសម្ពោធបើកដំណើរការហាងសម្លៀកបំពាក់លំដាប់ពិភពលោកដំបូងរបស់ខ្លួននៅកម្ពុជា ស្ថិតនៅផ្សារទំនើប ជីប ម៉ុង 271 មេហ្កាម៉ល ជាកន្លែងប្រមូលផ្ដុំនូវម៉ូដសម្លៀកបំពាក់ទាន់សម័យ និងសម្បូបែបសម្រាប់មនុស្សគ្រប់វ័យ។

នាងកញ្ញា លោក លោកស្រី អាចរកទិញសម្លៀកបំពាក់ថ្មីៗ ទាន់សម័យ សម្បូរបែប សម្រាប់គ្រប់វ័យ នៅឯហាង ZARA ក្នុងផ្សារទំនើប ជីប ម៉ុង 271 មេហ្កាម៉ល នៅរាជធានីភ្នំពេញ ដែលបើកដំណើរការលក់ចាប់ពីថ្ងៃទី13 ខែឧសភា ឆ្នាំ 2023 និងរកទិញបានតាមអនឡាញ តាមរយៈគេហទំព័រ Zara.com/kh។

ហាងសម្លៀកបំពាក់អន្តរជាតិដំបូងគេក្នុងប្រទេសកម្ពុជា របស់យីហោ ZARA ស្ថិតនៅក្នុងបរិវេណទំហំសរុប 3,300 ម៉ែត្រការ៉េ ដែលលាតសន្ធឹងពេញមួយជាន់នៃផ្សារទំនើប ជីប ម៉ុង 271 មេហ្កាម៉ល។ ផ្នែកខាងក្នុងរបស់ហាងនេះ ត្រូវបានរចនាដោយស្ទូឌីយោ ស្ថាបត្យកម្ម ZARA (Zara Architectural Studio) ដែលភាគច្រើនមានពណ៌ស្រស់ស្អាត ស៊ីគ្នានឹងពណ៌នានារបស់សម្លៀកបំពាក់ រួមគ្រឿងសង្ហារឹមធ្វើពីឈើ និងផ្ទៃពណ៌ធម្មជាតិដ៏ទាក់ទាញ។

ហាង ZARA មានទំហំធំទូលាយ ប្រមូលផ្ដុំសម្លៀកបំពាក់កីឡា ស្បែកជើង និងប្រដាប់ប្រដារផ្សេងៗដ៏ទាន់សម័យ។ ក្នុងហាង មានការតុបតែង និងរចនាគ្រឿងសង្ហារឹមប្លែកៗ និងរៀបចំទីតាំងស្តុកទំនិញថ្មីនៅជាប់ៗ គ្នា ផ្ដល់ភាពងាយស្រួលដល់អតិថិជន។

ហាង ZARA ត្រូវបានបំពាក់ឧបករណ៍បច្ចេកវិទ្យាដ៏មានប្រសិទ្ធភាព ដើម្បីផ្តល់ជូនអតិថិជននូវបទពិសោធន៍ម៉ូដែលសម្លៀកបំពាក់មួយគ្មានពីរ ដែលរួមបញ្ចូលជាមួយវេទិកាអនឡាញថ្មីបំផុតនៅកម្ពុជា ក្នុងនោះមានដូចជា Zara.com/kh តាមរយៈកម្មវិធី Zara និងមុខងារ Store Mode ជាដើម។ ZARA ផ្ដល់ភាពងាយស្រួលដល់អតិថិជន ដោយសារមានកម្មវិធីស្វែងរកទំនិញនៅក្នុងហាង តាមរយៈអ៊ីនធើណិត។ ទំនិញដែលលក់តាមអនឡាញមានតម្លៃដូចគ្នាទៅនឹងទំនិញលក់នៅក្នុងហាង ZARA ហើយអតិថិជនអាចសម្រេចចិត្តទិញមុខទំនិញដោយការដឹកជញ្ជូនដល់ផ្ទះ ឬទៅទិញផ្ទាល់នៅហាងក៏បាន។

មុខងារ «Store Mode» តាមរយៈកម្មវិធី ZARA ភ្ជាប់ប្រព័ន្ធអនឡាញជាមួយហាងនៅរាជធានីភ្នំពេញ។ មុខងារនេះអនុញ្ញាតឱ្យអតិថិជនរកមើលមុខទំនិញនៅក្នុងហាង និងបញ្ជាទិញទំនិញក្នុងរយៈពេលដ៏ខ្លី។ អតិថិជនក៏អាចប្រើបាស់កម្មវិធីនេះ ដើម្បីរកទីតាំងមុខទំនិញ នៅក្នុងហាងផងដែរ។

សម្រាប់ការដឹកជញ្ជូន គឺត្រូវបានរៀបចំឡើងដើម្បីផ្តល់ជូននូវផលិតផល ដែលបានបញ្ជាទិញតាមអនឡាញ ដោយការវេចខ្ចប់យ៉ាងប្រុងប្រយ័ត្ន មិនធ្វើឱ្យប៉ះពាល់ដល់បរិស្ថាន និងការពារមុខទំនិញក្នុងអំឡុងពេលដឹកជញ្ជូន។

មុខទំនិញត្រូវបានដឹកជញ្ជូនដោយឥតគិតថ្លៃ ដោយមិនគិតពីចំនួនមុខទំនិញ នៅពេលអតិថិជនសម្រេចចិត្តទិញមុខទំនិញនៅក្នុងហាង តាមរយៈសេវាដឹកជញ្ជូនស្តង់ដារពី 7 ទៅ 8 ថ្ងៃនៃថ្ងៃធ្វើការ។

អតិថិជនដែលជ្រើសរើសការដឹកជញ្ជូនដល់ផ្ទះ សម្រាប់ការដឹកជញ្ជូនតាមស្ទង់ដារ 7-8 ថ្ងៃនៃថ្ងៃធ្វើការ លើការបញ្ជាទិញដែលមានតម្លៃលើសពី 320,000 រៀល នឹងមិនគិតថ្លៃដឹកជញ្ជូន។ ចំពោះការដឹកជញ្ជូនតាមស្តង់ដារ 7-8 ថ្ងៃនៃថ្ងៃធ្វើការ លើការបញ្ជាទិញដែលមានតម្លៃក្រោម 320,000 រៀល នឹងមានការគិតថ្លៃដឹកជញ្ជូន 20,000 រៀល។

ចំពោះអតិថិជនដែលចង់ផ្លាស់ប្តូរទំនិញ តាមគោលការណ៍ផ្លាស់ប្តូរ និងប្រគល់ទំនិញត្រលប់ គឺដូចគ្នាសម្រាប់ទាំងការទិញនៅហាង និងតាមអនឡាញ ក្នុងនោះ អតិថិជនអាចប្រគល់ទំនិញដែលមិនទាន់បានប្រើប្រាស់ត្រលប់មកវិញដើម្បីប្តូររយកប្រាក់ ក្នុងរង្វង់ 30 ថ្ងៃ បន្ទាប់ពីបានទិញ។ ការប្រគល់ទំនិញគឺឥតគិតថ្លៃ សម្រាប់ការប្រគល់ទំនិញផ្ទាល់នៅហាង និងគិតថ្លៃ 20,000 រៀល សម្រាប់ការប្រគល់ទំនិញពីអាសយដ្ឋានរបស់អតិថិជន។

យីហោ Zara គឺជាផ្នែកមួយនៃក្រុមហ៊ុន Inditex ដែលជាក្រុមហ៊ុនលក់រាយសម្លៀកបំពាក់ទូទាំងពិភពលោក។ Inditex ក៏ជាម្ចាស់កម្មសិទ្ធិលើក្រុមហ៊ុនជាច្រើនទៀត រួមមាន ក្រុមហ៊ុន Pull&Bear, Massimo Dutti, Bershka, Stradivarius, Oysho, Zara Home និង Uterque ផងដែរ។ រឿងរ៉ាវស្ដីពី ZARA បានចាប់ផ្តើមជាមួយនឹងការបើកហាងដំបូង របស់ខ្លួននៅប្រទេសអេស្ប៉ាញ ក្នុងឆ្នាំ 1975 ហើយ បច្ចុប្បន្ននេះ ZARA មានវត្តមានទាំងនៅហាងផ្ទាល់ និងនៅលើហាងអនឡាញ នៅក្នុងទីផ្សារជាង 200 កន្លែង នៅទូទាំងពិភពលោក។ ដោយផ្តោតលើការច្នៃប្រឌិតឥតឈប់ឈរ ZARA ផ្តល់ជូននូវផលិតផលឈានមុខគេសម្រាប់ស្រ្តី បុរស និងកុមារ តាមរយៈគំរូអាជីវកម្មដែលធ្វើឱ្យអតិថិជនមានចំណាប់អារម្មណ៍លើអ្វីគ្រប់យ៉ាងដែលយើងមាន។

លើសពីនេះទៅទៀត ថ្នាក់ដឹកនាំរបស់យីហោ ZARA ក៏ដូចជា Inditex ក៏បានសន្យាថា នឹងសម្រេចឱ្យបានគោលដៅស្ដីពីការបន្សាបកាបូនដែលនឹងជួយទប់ស្កាត់ការឡើងកម្ដៅផែនដីនៅត្រឹមឆ្នាំ 2040 ផងដែរ៕

ហាងសម្លៀកបំពាក់ ZARA ស្ថិតក្នុង ផ្សារទំនើប ជីប ម៉ុង 271 មេហ្កាម៉ល

May 13, 2023

Tag: អារម្មណ៍