អវកាស - La Reine Media

ចិនសាងសង់អគារគ្មានទំនាញផែនដីកម្ពស់រាប់សិបម៉ែត្រ

ក្រុមអ្នកជំនាញរបស់ប្រទេសចិន កំពុងតែសាងសង់មូលដ្ឋានថ្មីដើម្បីបម្រើដល់ការពិសោធដែលទាក់ទងនឹងដែនទំនាញផែនដី រួមចំណែកក្នុងការសិក្សាស្រាវជ្រាវទីអវកាស។

មូលដ្ឋានពិសោធន៍មីក្រូទំនាញជាមួយនឹងអេឡិចត្រូម៉ាញ៉េទិច (Microgravity Experiment Facility with Electromagnetic Launch – MEFEL) នៅទីក្រុងប៉េកាំង មានកម្ពស់ 40 ម៉ែត្រ ប្រើប្រាស់ម៉ាស៊ីនពិសេសដែលនាំវត្ថុឡើង-ចុះ និងទទួលបទពិសោធន៍នៃស្ថានភាពដែលស្ទើរតែមិនមានទំនាញផែនដីក្នុងរយៈពេល 4 វិនាទី។ នេះបើតាមការចុះផ្សាយរបស់ SCMP កាលពីថ្ងៃទី 20 កក្កដា 2023។

MEFEL អាចឱ្យធ្វើការពិសោធ 100 ដង/ថ្ងៃ និងចំណាយអគ្គិសនីប្រហែលតែ 1 គីឡូវ៉ាត់ម៉ោងប៉ុណ្ណោះសម្រាប់ការពិសោធមួយ។ វាក៏អាចបង្កើតកម្លាំងទំនាញស្រាលដើម្បីធ្វើត្រាប់តាមលក្ខខណ្ឌធម្មជាតិនៅលើព្រះចន្ទ និងភពអង្គារ។

កាលពីឆ្នាំ 2019 មូលដ្ឋានដំបូងដែលស្ថិតក្នុងប្រភេទ MEFEL ចាប់ផ្ដើមដំណើរការនៅប្រទេសអាល្លឺម៉ង់ និងមានឈ្មោះថា Einstein – Elevator។ អគារនេះមានកម្ពស់ 40 ម៉ែត្រ អាចឱ្យទទួលបទពិសោធន៍ស្ថានភាពគ្មានទំនាញប្រហែល 4 វិនាទី ហើយអាចធ្វើការពិសោធបាន 300 ដង/ថ្ងៃ។

ក្រុមអ្នកវិទ្យាសាស្ត្រចិន បានចាប់ផ្ដើមអភិវឌ្ឍ MEFEL តាំងពីឆ្នាំ 2017។ ពួកគេប្រើប្រាស់ម៉ាស៊ីនប្រវែង 3 ម៉ែត្រ ដើម្បីបង្កើតបរិស្ថានគ្មានទំនាញក្នុងរយៈពេលខ្លី។ នៅខាងក្នុង MEFEL ឈុតសម្រាប់ពិសោធន៍នឹងផ្ដល់បរិស្ថានមានទំនាញផែនដីស្មើនឹង 1/100,000 នៃកម្រិតទំនាញធម្មតានៅលើផែនដី ក្នុងរយៈពេល 4 វិនាទី។

ក្រុមវិស្វករចិន ក៏ពុងតែអភិវឌ្ឍ MEFEL ជំនាន់ថ្មី ដែលគ្រោងនឹងអាចបង្កើតស្ថានភាពគ្មានទំនាញឱ្យបានដល់ 20 វិនាទី និងទម្ងន់អតិបរមាសម្រាប់ការពិសោធ នឹងឡើងដល់ 500 គីឡូក្រាម៕

July 21, 2023

SpaceX បាញ់បង្ហោះផ្កាយរណប Starlink នៅពេលយប់ បង្កើតឱ្យមានទិដ្ឋភាពដ៏ស្រស់ស្អាត

សន្សើមធ្លាក់ និងផ្ទៃមេឃស្រឡះល្អរបស់ California បានជួយបង្កើតទិដ្ឋភាពដ៏ទាក់ទាញនៅពេល SpaceX បាញ់បង្ហោះផ្កាយរណបនៅពេលយប់។

ក្រុមហ៊ុនអាម៉េរិក SpaceX បានបាញ់បង្ហោះផ្កាយរណប Starlink ចំនួន 15 គ្រឿងរបស់ខ្លួន ឡើងទៅកាន់គន្លងគោចរ នៅក្នុងមួយយប់ ដើម្បីបង្កើនវិសាលភាពអ៊ីនធើណិត។ ការបាញ់បង្ហោះដែលប្រើប្រាស់រ៉ុក្កែត Falcon 9 ត្រូវបានធ្វើឡើងនៅវេលាម៉ោង 9:09 យប់ ថ្ងៃទី 19 កក្កដា ម៉ោងនៅ California (ថ្ងៃទី 20 នៅកម្ពុជា) ពីមូលដ្ឋានរបស់ SpaceX ក្នុងបន្ទាយទ័ពអវកាស Vandenberg។

នេះគឺជាការបាញ់បង្ហោះលើកទី 10 របស់រ៉ុក្កែត Falcon 9 និងជាលើកទី 48 ក្នុងឆ្នាំនេះរបស់ SpaceX។ ប្រហែល 9.5 នាទីបន្ទាប់ពីបានបាញ់បង្ហោះ កំណាត់ដំបូងរបស់រ៉ុក្កែត បានចុះចតលើស្រឡាងស្វ័យប្រវត្តគ្មានមនុស្សបើកបររបស់ SpaceX មានឈ្មោះថា Of Course I Still Love You ដែលរង់ចាំនៅលើមហាសមុទ្រប៉ាស៊ីហ្វិក។

ខាងក្រោមនេះគឺជាបណ្ដារូបថតដែលត្រូវបានក្រុមហ៊ុន SpaceX ចែករំលែកលើបណ្ដាញសង្គម បន្ទាប់ពីបានទទួលជោគជ័យក្នុងការបាញ់បង្ហោះខាងលើ៖

July 21, 2023

អាចម៍ផ្កាយធំប៉ុនអគារ 20 ជាន់ ហោះកាត់មុខផែនដី «រំលងភ្នែក» អ្នកវិទ្យាសាស្ត្រ

ក្រុមអ្នកវិទ្យាសាស្ត្របានរកឃើញ 2023 NT1 ដែលជាអាចម៍ផ្កាយមានបណ្ដោយប្រហែល 60 ម៉ែត្រ កាលពីថ្ងៃទី 15 កក្កដា 2023 ពីរថ្ងៃបន្ទាប់ពីវាបានហោះកាត់ពីមុខផែនដី ដែលនេះត្រូវបានចាត់ទុកថា បាន «រំលងភ្នែក» របស់អ្នកវិទ្យាសាស្ត្រ។

យោងតាមណាសា អាចម៍ផ្កាយ 2023 NT1 កាលពីថ្ងៃទី 13 កក្កដា ស្ថិតក្នុងចម្ងាយពីផែនដីប្រហែល ¼ នៃចម្ងាយពីព្រះចន្ទមកកាន់ផែនដី។ នេះមានន័យថា វាស្ថិតនៅយ៉ាងជិត នៅពេលគេនិយាយដល់ទីអវកាសដ៏ធំធេង។ 2023 NT1 ធ្វើដំណើរក្នុងល្បឿន 86,000 គីឡូម៉ែត្រ/ម៉ោង។

ក៏ប៉ុន្តែ ដោយសារតែ 2023 NT1 ហោះសំដៅមកពីទិសរបស់ព្រះអាទិត្យ ដូច្នេះពន្លឺរបស់ផ្កាយនេះក៏ធ្វើឱ្យកែវយឺតអវកាសមិនអាចមើលឃើញបានឆាប់រហ័សដូចធម្មតា។

មកដល់ថ្ងៃទី 15 កក្កដា តេឡេស្កុបនៅអាហ្វ្រិកខាងត្បូងរបស់ប្រព័ន្ធតេឡេស្កុប ATLAS ដែលមានតួនាទីស្វែងរកអាចម៍ផ្កាយដែលអាចបង្កគ្រោះថ្នាក់ដល់ផែនដីមុនពេលកើតហេតុការណ៍ច្រើនថ្ងៃ ក៏បានរកឃើញថា 2023 NT1 កំពុងគោចរចាកចេញទៅឆ្ងាយពីផែនដី។ តេឡេស្កុបជាង 10 ផ្សេងទៀត ក្រោយមកក៏បានមើលឃើញអាចម៍ផ្កាយនេះ។

បើទោះជាបង្កការភ្ញាក់ផ្អើល ប៉ុន្តែ 2023 NT1 មានទំហំមិនគ្រប់គ្រាន់ដើម្បីត្រូវបានចាត់ទុកជាវត្ថុអវកាសដែលអាចបង្កគ្រោះថ្នាក់ដល់ផែនដី។ យោងតាមការសិក្សាស្រាវជ្រាវនាពេលថ្មីៗនេះ ផែនដីរបស់មនុស្សនៅតែមានសុវត្ថិភាពក្នុងរង្វង់ 1,000 ឆ្នាំទៀត នៅចំពោះមុខបណ្ដាអាចម៍ផ្កាយធំៗ។ ក៏ប៉ុន្តែ ក្រុមតារាវិទូនៅតែតាមដានវត្ថុអវកាសជាង 31,000 ដុំ ដែលកំពុងហោះហើរក្បែរផែនដី៕

July 20, 2023

ចិននឹងបាញ់បង្ហោះយានដឹកមនុស្សអាចប្រើឡើងវិញបាននៅឆ្នាំ 2027

យានអវកាសដឹកមនុស្សថ្មីរបស់ប្រទេសចិន អាចដាក់មនុស្សបាន 7 នាក់ ហើយគ្រឿងសំខាន់ៗរបស់យាននេះ អាចត្រូវបានប្រើប្រាស់ឡើងវិញបានរហូតដល់ 10 ដង។

Yang Liwei ដែលជាអនុប្រធានកម្មវិធីអវកាសមានមនុស្សបើកបរ របស់ទីភ្នាក់ងារអវកាសចិន បានឱ្យដឹងថា យានអវកាសដែលអាចប្រើប្រាស់ឡើងវិញដំបូងគេរបស់ប្រទេសចិន នឹងត្រូវបានបាញ់បង្ហោះយ៉ាងឆាប់ត្រឹមឆ្នាំ 2027។ កាលពីថ្ងៃទី 17 កក្កដា 2023 លោក Yang បានឱ្យដឹងថា យានថ្មីនេះអាចដឹកមនុស្សបាន 7 នាក់។ ប្រការនោះនឹងដើរតួនាទីសំខាន់ក្នុងការសាងសង់ស្ថានីយអវកាសចិន និងបេសកកម្មចុះចតលើឋានព្រះចន្ទ។

យានគំរូដែលមានទំហំតាមខ្នាតផ្លូវការមួយគ្រឿងរបស់ស្ថាប័នខាងលើ បានបញ្ចប់ដោយជោគជ័យនូវជើងហោះហើរសាកល្បងរយៈពេល 67 ម៉ោង និងប្រើប្រាស់រ៉ុក្កែត Long March 5 កាលពីឆ្នាំ 2020។

តាមទ្រឹស្ដី យ៉ាងហោចណាស់ បណ្ដាគ្រឿងសំខាន់ៗរបស់យានអវកាសនេះ អាចប្រើប្រាស់ឡើងវិញបាន 10 ដង ដែលនេះនឹងជួយកាត់បន្ថយការចំណាយបានច្រើន។

យានអវកាសថ្មីខាងលើរបស់ប្រទេសចិន អាចបៀបស្មើទៅនឹងបណ្ដាយានអវកាសជំនាន់ថ្មីរបស់សហរដ្ឋអាម៉េរិក ដែលមានដូចជា យាន Dragon V2 របស់ SpaceX និង CST-100 Starliner របស់ Boeing ជាដើម៕

July 19, 2023

ស្ថានីយថាមពលព្រះអាទិត្យអាចបាញ់បញ្ជូនអគ្គិសនីទៅឱ្យឋានព្រះចន្ទ

ក្រុមវិស្វកររបស់ប្រទេសស្វ៊ីស កំពុងរៀបគម្រោងសាងសង់ស្ថានីយផលិតអគ្គិសនីពីកម្ដៅព្រះអាទិត្យដែលអាចផ្គត់ផ្គង់អគ្គិសនីជាបន្តបន្ទាប់ទៅឱ្យមូលដ្ឋាននៅលើឋានព្រះចន្ទ ក្នុងទម្រង់រលកមីក្រូវ៉េវ។

ក្រុមវិស្វករនៅក្នុងក្រុមហ៊ុនហ៊ុនស្វ៊ីស Astrostrom បានបង្ហាញសេចក្ដីលំអិតអំពីស្ថានីយអគ្គិសនីព្រះចន្ទ – ផែនដីខ្នាតធំ (GE⊕-LPS)។ ស្ថានីយនេះរួមមានផ្ទាំងសូឡារាងអក្សរ V ជាច្រើនផ្ទាំង ត្រូវបានរៀបជារាងគូទខ្យងនៅក្នុងផ្ទៃក្រឡាមួយគីឡូម៉ែត្រការ៉េ ដែលអាចបាញ់បញ្ជូនថាមពលឡើងដល់ 23 ម៉េហ្គាវ៉ាត់ (MW) ទៅកាន់មូលដ្ឋានរបស់មនុស្សនៅលើផ្ទៃរបស់ឋានព្រះចន្ទ។

យោងតាមការស្រាវជ្រាវរបស់ក្រុមវិស្វករខាងលើ ទាំងស្ថានីយ GE⊕-LPS ទាំងផ្ទាំងសូឡា អាចត្រូវបានផលិតឡើងដោយប្រើប្រាស់វត្ថុធាតុដែលមាននៅលើឋានព្រះចន្ទ។

ស្ថានីយផលិតអគ្គិសនីនឹងត្រូវបានបង្កើតឡើងសម្រាប់អ្នកស្នាក់នៅយូរអង្វែង ហើយស្ថិតនៅក្នុងតំបន់ Lagrange ត្រង់ចន្លោះផែនដី និងព្រះចន្ទ ក្នុងរយៈកម្ពស់ 61,350 គីឡូម៉ែត្រពីផ្ទៃព្រះចន្ទ។

«នៅពេលគម្រោងដូច GE⊕-LPS បានបញ្ជាក់អំពីប្រសិទ្ធភាពនៃដំណើរការផលិត និងដំឡើងផ្កាយរណបថាមពលព្រះអាទិត្យ យើងនឹងអាចបង្កើនវិសាលភាពក្នុងការផលិតផ្កាយរណបថាមពលព្រះអាទិត្យពីវត្ថុធាតុដែលមាននៅលើឋានព្រះចន្ទ ដើម្បីផ្គត់ផ្គង់ដល់ភពផែនដី» Sanjay Vijendran ប្រធានគម្រោងស្រាវជ្រាវថាមពលព្រះអាទិត្យក្នុងទីអវកាស SOLARIS របស់អង្គការ ESA ឱ្យដឹងដូច្នេះ៕

July 19, 2023

យានអវកាសចុះចតលើឋានព្រះចន្ទរបស់ប្រទេសចិន មានទម្ងន់ជាង 20 តោន

ស្ថានីយចុះចត ឬយានអវកាសចុះចតលើឋានព្រះចន្ទរបស់ប្រទេសចិន នឹងមានទម្ងន់ប្រហែល 26 តោន ដោយរួមមាន ម៉ូឌុលព្រះចន្ទចំនួនមួយគ្រឿង និងម៉ូឌុលរុញច្រានមួយគ្រឿង។

យោងតាមមន្ត្រីនៅទីភ្នាក់ងារអវកាសចិន យានចុះចតនេះអាចនាំអ្នកអវកាសពីររូប ចុះចតលើផ្ទៃព្រះចន្ទដោយសុវត្ថិភាព។ ម៉ូឌុលព្រះចន្ទគឺជាបន្ទប់ដឹកមនុស្ស ខណៈដែលម៉ូឌុលរុញច្រានគឺជាកំណាត់ដែលជួយទប់មិនឱ្យយានធ្លាក់ចុះលឿនពេក ក្នុងពេលចុះចតលើឋានព្រះចន្ទ។

ស្ថានីយចុះចតរបស់ចិន ប្រើប្រាស់រចនារូបរាងដែលមានលក្ខណៈស្រាល និងមានបំពាក់មុខងាររក្សាថាមពលបម្រុងផងដែរ ហើយក៏មានលទ្ធភាពហោះហើរដោយស្វ័យប្រវត្ត។ ស្ថានីយនេះមានតួនាទីនាំអ្នកអវកាសពីគន្លងតារាវិថីព្រះចន្ទ ចុះចតលើផ្ទៃរបស់វា ហើយក្រោយមក ហោះឡើងមកកាន់គន្លងតារាវិថីព្រះចន្ទវិញ មុននឹងក្រុមអវកាសចរ ជិះយានអវកាសហោះត្រឡប់មកកាន់ផែនដី។

July 18, 2023

យានអវកាសបីគ្រឿងរបស់អាម៉េរិកដែលនឹងត្រូវដឹកមនុស្សឡើងទៅកាន់ឋានព្រះចន្ទ

ក្រុមហ៊ុនការពារជាតិសហរដ្ឋអាម៉េរិក Lockheed Martin កាលពីថ្ងៃទី 14 កក្កដា បានបង្ហាញរូបថតយានអវកាស Orion 3 គ្រឿងដែលនឹងត្រូវប្រើប្រាស់ក្នុងបេសកកម្មឋានព្រះចន្ទ Artemis II, III និង IV។

«អនាគតរបស់យាន Orion ទំនងជាល្អខ្លាំងណាស់។ ម៉ូឌុលទាំងឡាយដែលនឹងដឹកមនុស្សក្នុងបេសកកម្ម Artemis II, Artemis III និង Artemis IV កំពុងឆ្លងកាត់ដំណាក់កាលផលិតខុសៗគ្នានៅក្នុងមជ្ឈមណ្ឌលអវកាស Kennedy របស់អង្គការណាសា ដើម្បីត្រៀមសម្រាប់ការនាំអវកាសចរត្រលប់ទៅកាន់ឋានព្រះចន្ទ» Lockheed Martin សរសេរនៅលើ Twitter កាលពីថ្ងៃទី 14 កក្កដាដូច្នេះ អមនឹងរូបថតរបស់យានអវកាស Orion។ យានទាំងនេះកំពុងត្រូវបានអភិវឌ្ឍក្រោមការគ្រប់គ្រងរបស់ Lockheed Martin។

ក្នុងបេសកកម្ម Artemis II យានអវកាស Orion គ្រោងនឹងត្រូវបានបាញ់បង្ហោះនៅថ្ងៃទី 11 កុម្ភៈ ឆ្នាំ 2024 នាំយកអ្នកអវកាស 4 នាក់ទៅជាមួយ រួមមាន 3 នាក់មកពីណាសារបស់សហរដ្ឋអាម៉េរិក និងម្នាក់មកពីអង្គការអវកាសកាណាដា។ ចំណែកក្រុមអវកាសចរដែលនឹងចូលរួមក្នុងបេសកកម្ម Artemis III និង Artemis IV មិនទាន់ត្រូវបានបង្ហើបឱ្យដឹងនៅឡើយ។ តាមផែនការ Artemis II នឹងត្រូវបានបាញ់បង្ហោះក្នុងឆ្នាំ 2025 ឬ 2026 អាស្រ័យទៅលើយាន Starship របស់ SpaceX។ Artemis IV គ្រោងនឹងបាញ់បង្ហោះនៅចុងទសវត្សរ៍នេះ។

នៅក្នុងរូបថតខាងលើ ពុំមានយានអវកាស Orion របស់ Artemis I ជាយានដែលបានបំពេញបេសកកម្មឡើងទៅកាន់គន្លងតារាវិថីព្រះចន្ទកាលពីចុងឆ្នាំមុន។ ក្នុងរូបថតនេះក៏មិនមានយាន Orion ដែលត្រូវបានផលិតដំបូង និងជាយានដែលបានហោះជុំវិញផែនដីកាលពីឆ្នាំ 2014 នៅក្នុងជើងហោះហើរសាកល្បង។

ណាសាបានចុះកិច្ចព្រមព្រៀងជាមួយនឹងប្រទេសចំនួន 26 ដើម្បីបង្កើតគោលការណ៍សម្រាប់ការធ្វើដំណើរទៅកាន់ឋានព្រះចន្ទប្រកបដោយសន្តិភាព។ អង្គការអវកាសអឺរ៉ុប និងកាណាដាសុទ្ធតែបានសន្យាផ្គត់ផ្គង់ផ្នែករឹងសម្រាប់ Artemis និង Gateway ជាស្ថានីយអវកាសហោះជុំវិញឋានព្រះចន្ទដែលគ្រោងនឹងត្រូវបាញ់បង្ហោះក្នុងទសវត្សរ៍នេះ៕

July 17, 2023

យានចុះចត Chandrayaan-3 របស់ឥណ្ឌា ឡើងដល់គន្លងតារាវិថិផែនដីដោយជោគជ័យ

អង្គការអវកាសរបស់ប្រទេសឥណ្ឌា បានបាញ់បង្ហោះរ៉ុក្កែតមួយគ្រឿងកាលពីថ្ងៃទី 14 កក្កដា ដើម្បីនាំយានអវកាសឡើងទៅកាន់គន្លងគោចរផែនដី និងនាំយានចុះចតឡើងទៅកាន់ឋានព្រះចន្ទ។

រ៉ុក្កែត LVM3 របស់អង្គការអវកាសឥណ្ឌា (ISRO) ត្រូវបានបាញ់បង្ហោះពីព្រលានអវកាសក្នុងរដ្ឋ Andhra Pradesh នៅភាគខាងត្បូងប្រទេសនេះ កាលពីល្ងាចថ្ងៃទី 14 កក្កដា ឆ្នាំ 2023។

ប្រហែល 16 នាទីបន្ទាប់ពីបានបាញ់បង្ហោះ ISRO ក៏ប្រកាសថា រ៉ុក្កែតបាននាំយានចុះចត Chandrayaan-3 ឡើងដល់គន្លងតារាវិថីផែនដីដោយជោគជ័យ។ យានចុះចតនេះនឹងហោះទៅដល់ឋានព្រះចន្ទនៅខែក្រោយ។

បើសិនជាបេសកកម្មខាងលើប្រព្រឹត្តិទៅដោយរលូន នោះឥណ្ឌានឹងក្លាយជាប្រទេសមួយក្នុងចំណោមប្រទេសដែលបាននាំយានទៅចុះចតលើឋានព្រះចន្ទដោយជោគជ័យ។ បច្ចុប្បន្ន មានប្រទេសចំនួនបីដែលបានទទួលជោគជ័យក្នុងបេសកកម្មដូចគ្នានេះ រួមមាន អាម៉េរិក អតីតសូវៀត និងចិន។

Chandrayaan (ចន្ទ្រយាន) នៅក្នុងភាសាសំស្ក្រឹតមានន័យថា «យានព្រះចន្ទ»។ ចន្ទ្រយានរួមមានយានចុះចតមួយគ្រឿងដែលមានកម្ពស់ពីរម៉ែត្រ ត្រូវបានផលិតឡើងដើម្បីដាក់ពង្រាយយានបើកបរស្វ័យប្រវត្តិមួយគ្រឿងនៅក្បែរប៉ូលខាងត្បូងរបស់ព្រះចន្ទ។

អង្គការអវកាសឥណ្ឌាឱ្យដឹងថា ការចុះចតលើដីនៅឋានព្រះចន្ទ គ្រោងនឹងធ្វើឡើងនៅថ្ងៃទី 23 ខែសីហា ឆ្នាំ 2023៕

July 15, 2023

Tom Cruise មិនប្រើប្រាស់កម្មវិធីធ្វើរូបភាពឱ្យក្មេងជាងវ័យក្នុងរឿង «Mission: Impossible 7»

អ្នកដឹកនាំរឿង «Mission: Impossible 7» និយាយថា មិនប្រើប្រាស់កម្មវិធីបំប្លែងរូបភាព Tom Cruise ឱ្យក្មេងជាងវ័យ ដោយយល់ថា បច្ចេកវិទ្យាមិនអាចជួយដល់ភាពយន្តនៅក្នុងបញ្ហានេះ។

នៅលើទំព័រ GamesRadar+ និង Total Film កាលពីថ្ងៃទី 12 កក្កដា Christopher McQuarrie ដែលជាអ្នកដឹករឿង Mission: Impossible – Dead Reckoning Part One («Mission: Impossible 7») បានឱ្យដឹងថា ដំបូងឡើយ ក្រុមការងារប្រុងប្រើប្រាស់កម្មវិធីកុំព្យូទ័រសម្រាប់ទិដ្ឋភាពបើកឆាក ដែលជាឈុតឆាករម្លឹកអំពីតួអង្គសំខាន់ Ethan Hunt (សម្ដែងដោយ Tom Cruise) កាលពីឆ្នាំ 1989។

ក្រោយពីបានពិចារណា McQuarrie យល់ថា លោកមិនចូលចិត្តការប្រើប្រាស់បច្ចេកវិទ្យាកុំព្យូទ័រដើម្បីធ្វើឱ្យ Tom Cruise ដែលមានវ័យ 61 ឆ្នាំ ប្រែជាកំលោះភ្លាមៗនៅលើអេក្រង់។ អ្នកដឹកនាំរឿងរូបនេះនិយាយថា ប្រការនេះធ្វើឱ្យលោកបាត់បង់ការផ្ដោតអារម្មណ៍សម្រាប់ខ្លឹមសារសំខាន់របស់ភាពយន្ត និងយល់ថា មិនទាន់ចាំបាច់។

បច្ចុប្បន្ន វគ្គ 7 របស់យីហោ «Mission: Impossible» កំពុងតែមានស្ថានភាពល្អនៅឯបញ្ជរលក់សំបុត្រនៅរោងកុន។ Variety អះអាងថា ភាពយន្តរបស់ Tom Cruise អាចរកចំណូលបានយ៉ាងតិច 60 ដុល្លារអាម៉េរិកនៅក្នុង 5 ថ្ងៃដំបូងនៃការចាប់បញ្ចាំង ហើយអាចក្លាយជាវគ្គដែលរកចំណូលបានច្រើនជាងគេរបស់ «Mission: Impossible»។

បច្ចុប្បន្ន ក្រុមការងារកំពុងតែផលិតវគ្គ 8 ដែលមានឈ្មោះថា «Dead Reckoning Part Two» ដែលត្រៀមនឹងចាក់បញ្ចាំងក្នុងរោងកុននៅឆ្នាំក្រោយ។ ចំណែក Tom Cruise វិញ ក៏កំពុងត្រៀមខ្លួនសម្រាប់គម្រោងភាពយន្តដែលត្រូវថតនៅទីអវកាស របស់អ្នកដឹកនាំរឿង Doug Liman៕

July 14, 2023

ចិនបង្ហើបពីផែនការនាំមនុស្សឡើងទៅជាន់ដីព្រះចន្ទនៅឆ្នាំ 2030

នៅក្នុងបេសកកម្មថ្មី យានអវកាសហោះជុំវិញគន្លងតារាវិថី និងយានចុះចត នឹងត្រូវបានបាញ់បង្ហោះឡើងទៅកាន់ទីអវកាស ហើយសហការគ្នាដើម្បីនាំមនុស្សទៅចុះចតលើឋានព្រះចន្ទ។

លោក Zhang Hailian អនុប្រធានក្រុមវិស្វកររបស់ទីភ្នាក់ងារអវកាសមានក្រុមហោះហើរចិន (CMSA) បានបង្ហើបឱ្យដឹងអំពីព័ត៌មានថ្មីស្ដីពីផែនការនាំមនុស្សឡើងទៅកាន់ឋានព្រះចន្ទ ក្នុងកិច្ចប្រជុំកំពូលនៃវិស័យអាកាសចរណ៍អវកាសនៅប្រទេសចិនកាលពីថ្ងៃទី 12 កក្កដា 2023។

បេសកកម្មនេះ គ្រោងនឹងធ្វើឡើងឱ្យបានមុនដំណាច់ឆ្នាំ 2030។ វាគឺជាផ្នែកមួយនៃមហាគម្រោងដែលឆ្ពោះទៅរកការស្ថាបនាស្ថានីយស្រាវជ្រាវលើដីនៅឋានព្រះចន្ទ។ លោក Zhang ឱ្យដឹងថា បេសកកម្មនេះនឹងស្វែងរកវិធីល្អបំផុតដើម្បីសាងសង់មជ្ឈមណ្ឌលអវកាស ក៏ដូចជាធ្វើការស្រាវជ្រាវ ការពិសោធន៍ផ្នែកវិទ្យាសាស្ត្រជាច្រើនផ្សេងទៀត នៅលើឋានព្រះចន្ទ។

នៅក្នុងបេសកកម្មខាងលើ ការបាញ់បង្ហោះរ៉ុក្កែតចំនួនពីរលើកនឹងនាំយានចុះចត និងយានអវកាសដឹកមនុស្សឡើងទៅកាន់គន្លងតារាវិថីជុំវិញព្រះចន្ទ។ យានទាំងពីរនេះនឹងតភ្ជាប់គ្នាដើម្បីឱ្យអ្នកអវកាសចិនឆ្លងពីយានអវកាស ចូលទៅក្នុងយានចុះចត មុននឹងទម្លាក់ខ្លួនសន្សឹមៗចុះទៅកាន់ឋានព្រះចន្ទ។ នៅទីនេះ ពួកគេនឹងរើសយកដីលើឋានព្រះចន្ទ និងធ្វើដំណើរសិក្សាស្រាវជ្រាវ។ បន្ទាប់មក ពួកគេនឹងជិះយានចុះចតនេះ ហោះឡើងទៅកាន់យានអវកាសដែលកំពុងស្ថិតនៅលើគន្លងតារាវិថី រួចក៏វិលត្រលប់មកកាន់ផែនដី។

ដើម្បីត្រៀមសម្រាប់ការអនុវត្តផែនការខាងលើ ក្រុមអ្នកស្រាវជ្រាវចិន កំពុងតែប្រឹងប្រែងអភិវឌ្ឍរាល់ឧបករណ៍ដែលចាំបាច់ ក្នុងនោះមានជាអាទិ៍ ឈុតសម្លៀកបំពាក់អវកាស រថយន្តសម្រាប់បើកបរលើឋានព្រះចន្ទ យានអវកាសដឹកមនុស្ស និងយានចុះចត។

បេសកកម្មនាំមនុស្សឡើងទៅឋានព្រះចន្ទគឺជាជំហានថ្មីបំផុតនៅក្នុងមហិច្ឆតាអភិវឌ្ឍកម្មវិធីអវកាសរបស់ប្រទេសចិន។ បច្ចុប្បន្ន វិស័យអវកាសរបស់ប្រទេសនេះ កំពុងតែមានការរីកចម្រើនយ៉ាងឆាប់រហ័ស។ ចិនមានស្ថានីយអវកាសផ្ទាល់ខ្លួន មានរ៉ូបូតនៅលើឋានព្រះចន្ទ និងភពអង្គារផងដែរ៕

July 14, 2023

Tag: អវកាស