បើសិនជាម៉ាស៊ីនត្រជាក់នៅតែប្រើប្រាស់បច្ចេកវិទ្យាបញ្ចុះកម្ដៅដូចបច្ចុប្បន្ន ពេលដែលតម្រូវការប្រើប្រាស់កាន់តែកើនឡើង គ្រានោះផែនដីអាចនឹងត្រូវឆ្អិនដូចបាយមិនខាន។
ទីភ្នាក់ងារថាមពលអន្តរជាតិ (IEA) បានព្យាករថា ពិភពលោកឆ្នាំ 2023 មានម៉ាស៊ីនត្រជាក់ជាងពីរពាន់លានគ្រឿង, ឆ្នាំ 2030 នឹងមានបីពាន់លានគ្រឿង និងឆ្នាំ 2040 នឹងមានជាងបួនពាន់លានគ្រឿង។ ការប្រើប្រាស់ម៉ាស៊ីនត្រជាក់ត្រូវបានវាយតម្លៃថា ជួយលើកកម្ពស់សុខភាព និងបង្កើនសមត្ថភាព និងប្រសិទ្ធភាពការងារ។ ក៏ប៉ុន្តែ តម្រូវការប្រើប្រាស់ថាមពលដើម្បីដំណើរការម៉ាស៊ីនត្រជាក់ រួមនឹងវត្ថុធាតុធ្វើឱ្យត្រជាក់នៅក្នុងបច្ចេកវិទ្យារបស់ម៉ាស៊ីនត្រជាក់បច្ចុប្បន្ន ក៏បង្កផលវិបាកច្រើនដល់អាកាសធាតុ។
Abhas Jha អ្នកជំនាញរបស់ធនាគារពិភពលោកផ្នែកបម្រែបម្រួលអាកាសធាតុនៅសិង្ហបុរី បានអះអាងថា «បើសិនជាស្ដង់ដាស្ដីពីប្រសិទ្ធភាពមិនត្រូវបានកែលំអ ផែនដីនឹងត្រូវក្ដៅដល់ឆ្អិន ទៅតាមន័យធៀប»។
យោងតាម Bloomberg តំបន់ក្រីក្រធំៗមួយចំនួនលើពិភពលោកក៏ជាកន្លែងដែលមានអាកាសធាតុក្ដៅបំផុត។ ប៉ុន្តែ នៅក្នុងតំបន់ទាំងនេះ ប្រាក់ចំណូលរបស់ប្រជាជនកំពុងតែមានការកើនឡើង ហើយម៉ាស៊ីនត្រជាក់ក៏ក្លាយជាទំនិញដែលមនុស្សរាប់សិបលាននាក់អាចទិញបាន។
នេះក៏ជាមូលហេតុនៅពីក្រោយការលក់ដាច់ខ្លាំងរបស់ម៉ាស៊ីនត្រជាក់នាពេលកន្លង និងអនាគត។ បណ្ដាប្រទេសមានដូចជា ចិន និងឥណ្ឌាជាដើម ត្រូវបានព្យាករថា គឺជាទីផ្សារធំបំផុតរបស់ឧបករណ៍អេឡិចត្រូនិចមួយនេះនៅក្នុងអំឡុងច្រើនឆ្នាំខាងមុខ។
នៅក្នុងម៉ាស៊ីនត្រជាក់បច្ចុប្បន្ន hydrofluorocarbons (HFC) គឺមួយក្នុងចំណោមវត្ថុធាតុធ្វើឱ្យត្រជាក់ដែលកំពុងពេញនិយម ប៉ុន្តែធាតុដែលអាចធ្វើឱ្យផែនដីឡើងកម្ដៅខ្ពស់ជាង 1,000 ដង បើធៀបនឹង carbon dioxide។ អ្នកស្រាវជ្រាវបានគណនាឃើញថា បើសិនមិនកាត់បន្ថយការពឹងផ្អែកលើ HFC នោះនឹងនាំទៅរកការឡើងកម្ដៅបន្ថែមកន្លះអង្សាសេនៅចុងសតវត្សរ៍នេះ ហើយប្រការនេះនឹងធ្វើឱ្យបញ្ហាអាកាសធាតុអាក្រក់ៗកើតឡើងញឹកញាប់ជាងបច្ចុប្បន្ន ក្នុងនោះមានដូចជា ខ្យល់ព្យុះ គ្រោះរាំងស្ងួត និងរលកកម្ដៅជាដើម។
ដើម្បីជំនួស HFC វិស័យឧស្សាហកម្មម៉ាស៊ីនត្រជាក់ត្រូវការវត្ថុធាតុបញ្ចុះកម្ដៅមួយផ្សេងទៀតដែលមិនសូវបង្កផលវិបាកដល់បរិស្ថាន។ បច្ចុប្បន្ន ក្រុមហ៊ុន Chemours និង Honeywell កំពុងផលិតវត្ថុធាតុបញ្ចុះកម្ដៅបៃតងនេះ។ ក្រៅពីបណ្ដាក្រុមហ៊ុនខាងលើ ក្រុមហ៊ុន Daikin និង Mitsubishi ក៏កំពុងអភិវឌ្ឍផលិតផលបែបនេះ។ សង្ឃឹមថា អនាគត ផែនដីនឹងមិនឡើងកម្ដៅខ្លាំងដោយសារតែសារធាតុ HFC៕
