សំណង់ - La Reine Media

អគាររាងមូលធំជាងគេបង្អស់នៅលើពិភពលោក បើកទ្វារនៅខែកញ្ញា

(សហរដ្ឋអាម៉េរិក) – អគារ Sphere នៅ Las Vegas គឺជាសំណង់ដែលមានរាងមូលធំជាងគេលើពិភពលោក និងគ្របដណ្ដប់ដោយអំពូលភ្លើង LED នៅខាងក្រៅ ហើយគ្រោងនឹងបើកទ្វារចាប់ពីខែកញ្ញាខាងមុខ។

អគារ Sphere មានកម្ពស់ 111 ម៉ែត្រ និងទទឹង 157 ម៉ែត្រ។ ការចំណាយលើការសាងសង់អគារនេះគឺប្រមាណ 2.3 ពាន់លានដុល្លារ។ អំពូលភ្លើង LED នៅខាងក្រៅគ្របដណ្ដប់លើផ្ទៃក្រឡាប្រហែល 54,000 ម៉ែត្រការ៉េ។ អគារនេះប្រើប្រាស់អំពូលភ្លើង LED សរុប 1.2 លានឈុត ក្នុងមួយឈុតៗមាន 48 អំពូល។ ផ្នែកខាងក្រៅរបស់អគារ Sphere អាចរចនាឡើងវិញបានទាំងស្រុងតាមរយៈកម្មវិធីកុំព្យូទ័រ ដើម្បីបង្ហាញទិដ្ឋភាពដែលគេចង់បាន។ នេះបើតាម New Atlas ចុះផ្សាយកាលពីថ្ងៃទី 05 កក្កដា 2023។

Sphere អាចដាក់កៅអីបាន 17,000 ឬកន្លែងឈរបាន 20,000 នាក់ ដែលអាចប្រារព្ធកម្មវិធីធំៗដូចជា ពិធិប្រគំតន្ត្រី ឬប្រដាល់។ល។ ខណៈផ្នែកខាងក្នុងមិនទាន់ត្រូវបានបង្ហើបឱ្យដឹង លើកលែងតែអេក្រង់ទូរទស្សន៍ខ្នាតយក្ស។

កៅអីទាំងអស់នឹងត្រូវបានបំពាក់បច្ចេកវិទ្យា 4D រួមមាន ប្រព័ន្ធដែលអនុញ្ញាតឱ្យអ្នកអង្គុយទទួលអារម្មណ៍ដឹងពីជំនោរខ្យល់ ការប្ដូរផ្លាស់កម្ដៅ និងក្លិនក្រអូបជាដើម ក៏ដូចជាប្រព័ន្ធកាមេរ៉ាពិសេសអាចថតរូបក្នុងល្បឿន 120 រូប/វិនាទី។

«ដោយស្ថិតក្នុងកម្មវិធីសម្ដែងពិសេសដើម្បីអបអរថ្ងៃបុណ្យឯករាជ្យជាតិ គ្រឿងលំអខាងក្រៅដែលធ្វើពីអំពូលភ្លើង LED របស់ Sphere ដែលជាអេក្រង់ LED ធំជាងគេលើពិភពលោក នឹងត្រូវបានបើកទាំងស្រុងជាលើកដំបូង» នេះបើតាមក្រុមហ៊ុន Sphere។

Sphere ត្រូវបានរចនាឡើងដោយ Populous ដែលជាក្រុមហ៊ុនស្ថាបត្យកម្មអន្តរជាតិ នៅពីក្រោយសំណង់កីឡាលំដាប់កំពូលជាច្រើនរបស់ពិភពលោក។ បច្ចុប្បន្ន ការងារសាងសង់របស់អគារនេះសម្រេចបានទាំងស្រុង ហើយគ្រោងនឹងបើកទ្វារនៅខែកញ្ញាខាងមុខ ដែលចាប់ផ្ដើមដោយការប្រគំតន្ត្រីជាបន្តបន្ទាប់។ Populous ក៏មានគម្រោងសាងសង់អគារប្រហាក់ប្រហែលនឹង Sphere មួយផ្សេងទៀតនៅទីក្រុងឡុងដ៍ ចក្រភពអង់គ្លេស៕

July 7, 2023

គម្រោងសាងសង់ដងទង់ខ្ពស់ជាងគេលើពិភពលោក តម្លៃមួយពាន់លានដុល្លារ

ក្រុមហ៊ុនមួយនៅសហរដ្ឋអាម៉េរិក គ្រោងចំណាយប្រាក់មួយពាន់លានដុល្លារដើម្បីសាងសង់ដងទង់ដែលខ្ពស់ជាងអគារ Empire State ក្នុងបំណងលើកកម្ពស់ស្មារតីមោទកភាព និងសាមគ្គីភាពជាតិ។

Morrill Worcester ស្ថាបនិកក្រុមហ៊ុនលក់គ្រឿងអលង្ការ Worcester Wreath ដែលជាស្ថាប័នអភិវឌ្ឍគម្រោងដងទង់ខាងលើបានឱ្យដឹងថា សំណង់ដែលមានឈ្មោះថា ដងទង់ឧទ្យានសេរីភាព (Flagpole of Freedom Park) នេះ នឹងត្រូវសាងសង់នៅក្នុងរដ្ឋ Maine ក្នុងបំណង «ផ្សារភ្ជាប់ប្រជាជនអាម៉េរិក រម្លឹកពួកគេអំពីប្រវត្តិសាស្ត្រការពារសេរីភាព និងផ្សារភ្ជាប់ប្រទេសជាតិដែលត្រូវប្រេះឆា»។

Worcester គ្រោងនឹងសាងសង់ដងទង់ដែលកម្ពស់ 445 ម៉ែត្រនៅក្នុងរយៈពេលដប់ឆ្នាំ ហើយវានឹងក្លាយជាដងទង់ដែលខ្ពស់ជាងគេបង្អស់លើពិភពលោក។ ដងទង់នេះក៏នឹងត្រូវដំឡើងទង់ជាតិសហរដ្ឋអាម៉េរិកដែលមានទំហំធំជាងទីលានបេស្បល។ ភ្ញៀវនឹងត្រូវប្រើប្រាស់ជណ្ដើរយោងដើម្បីឡើងទៅដល់ស្ថានីយគយគន់ទេសភាពនៅកំពូលដងទង់ ដែលខ្ពស់ជាងអគារ State Empire ទៅទៀត។ នៅលើកម្ពស់នេះ ភ្ញៀវអាចមើលទៅឆ្ងាយរហូតដល់ទឹកដីកាណាដា។

លោក Morrill ក៏គ្រោងនឹងបង្កើតភូមិមួយដែលមាន «សារមន្ទីររស់» ជាទីដែលអតីតទាហានបរិយាយអំពីប្រវត្តិសាស្ត្រ រួមនឹងសំណង់ជាច្រើនផ្សេងទៀតដែលស្ថិតនៅក្នុងផ្ទៃដីជាង 4,000 ហិកតា។

July 6, 2023

បណ្ដុំអគារស្នាក់នៅកម្ពស់ជាង 100 ម៉ែត្រ ត្រូវបានដំឡើងពីម៉ូឌុលជាង 6,000 ដុំ

(ប្រទេសចិន) – បណ្ដុំអគារស្នាក់នៅកម្ពស់ជាង 100 ម៉ែត្រ នៅទីក្រុង Shenzhen ត្រូវបានសាងសង់រួចរាល់ក្នុងរយៈពេលមួយឆ្នាំ ដោយការដំឡើងជាម៉ូឌុល។

អគារម៉ូឌុលគឺជាស្ថាបត្យកម្មសំណង់ដំឡើងពីបណ្ដុំរចនាសម្ព័ន្ធដែលត្រូវបានគេចាក់ពុម្ពរួចរាល់នៅរោងចក្រ ហើយដឹកយកមកផ្គុំ ជំនួសឱ្យការសាងសង់នៅនឹងកន្លែងដូចសព្វថ្ងៃ។

អគារស្នាក់នៅចំនួនប្រាំនៅទីក្រុង Shenzhen ប្រទេសចិន ត្រូវបានដំឡើងជារូបរាងពីម៉ូឌុលស្ដង់ដាជាង 6,000 ដុំ។ បណ្ដាម៉ូឌុលត្រូវបានយកមកដំឡើងនៅពេលបណ្ដាញអគ្គិសនី និងផ្នែកនានានៅខាងក្នុងត្រូវបានធ្វើរួចរាល់។

វិធីសាស្ត្រសាងសង់ខាងលើត្រូវបានវាយតម្លៃថា សន្សំសំចៃពេល ប្រាក់កាស និងបំភាយឧស្ម័នពុលក្នុងកម្រិតទាប។

«តាមការគណនាជាបឋមរបស់យើង ការសាងសង់ដោយម៉ូឌុលអាចជួយកាត់បន្ថយសំណល់សំណង់បាន 75%» លោក Cen Yan មន្ត្រីនៅស្ថាប័នសំណង់ និងផ្ទះស្នាក់នៅរបស់ទីក្រុង Shenzhen ឱ្យដឹងដូច្នេះ៕

July 4, 2023

អគារសង់ដោយការបោះពុម្ព 3D ធំជាងគេបង្អស់នៅទ្វីបអឺរ៉ុប ប្រើពេលស្ថាបនាតែ 140 ម៉ោង

(អាល្លឺម៉ង់) – អគារដែលមានបណ្ដោយ 55 ម៉ែត្រ ទទឹង 11 ម៉ែត្រ និងកម្ពស់ 9 ម៉ែត្រ គ្រោងនឹងសាងសង់រួចរាល់ជាស្ថាពរដោយប្រើប្រាស់កម្មករពីរនាក់ និងប្រើពេលត្រឹមតែប៉ុន្មានថ្ងៃប៉ុណ្ណោះ។

គម្រោងនៅប្រទេសអាល្លឺម៉ង់នេះ ត្រូវបានបញ្ជាក់ថា ជាសំណង់បោះពុម្ព 3D ធំជាងគេបង្អស់នៅទ្វីបអឺរ៉ុប។ ជាធម្មតា ការសាងសង់អគារនីមួយៗគឺត្រូវប្រើប្រាស់កម្មករយ៉ាងហោចក៏ប្រាំ ឬដប់នាក់ ប៉ុន្តែ ការស្ថាបនាអគារបោះពុម្ព 3D នេះ មានបុគ្គលិកតែពីរនាក់ប៉ុណ្ណោះ។

កម្មករសំណង់នៅទីនេះគឺជារ៉ូបូតដែលធ្វើការទៅតាមគម្រោងដែលបានកំណត់នៅលើកុំព្យូទ័រ។ តាមផែនការ គម្រោងនេះនឹងត្រូវសាងសង់រួចរាល់ក្នុងរយៈពេល 140 ម៉ោង។ នៅពេលរួចរាល់ អគារនេះនឹងមានទំហំប្រហែល 55 ម៉ែត្រ x 11 ម៉ែត្រ x 9 ម៉ែត្រ។

លោក Hans-Joerg Kraus ដែលជានាយកប្រតិបត្តិរបស់ Kraus Gruppe ឱ្យដឹងថា «ខ្ញុំគិតថា បច្ចេកវិទ្យាបោះពុម្ព 3D មានអនាគតប្រកបដោយសក្ដានុពល។ …នៅទីនេះ យើងកំពុងប្រឹងប្រែងស្វែងយល់ឱ្យដឹងថា នេះជាផលិតផលដែលឆ្ពោះទៅកាន់អនាគត ឬអត់…។

ក្រៅពីអាល្លឺម៉ង់ ក៏មានប្រទេសជាច្រើនផ្សេងទៀតកំពុងបង្កើនការប្រើប្រាស់បច្ចេកទេសសាងសង់ដោយការបោះពុម្ព 3D។ កាលពីឆ្នាំ 2018 ក្រុមហ៊ុនមួយរបស់បារាំងបានបង្ហាញផ្ទះបោះពុម្ព 3D ជាលើកដំបូងមួយខ្នងដែលសាងសង់ក្នុងរយៈពេល 18 ថ្ងៃ។ ចំណែកប្រទេសចិនវិញ ក៏ប្រើប្រាស់បច្ចេកវិទ្យាបោះពុម្ព 3D ដើម្បីសាងសង់ទំនប់ទឹកមួយនៅតំបន់ខ្ពង់រាបទីបេ។

យោងតាម SCMP បច្ចេកវិទ្យាសាងសង់ដោយការបោះពុម្ព 3D ដំបូងឡើយត្រូវបានអភិវឌ្ឍឡើងក្នុងបំណងកាត់បន្ថយសំណល់នៅក្នុងការផលិត។ បច្ចេកវិទ្យានេះក៏មានសក្ដានុពលនៅក្នុងវិស័យជាច្រើនផ្សេងទៀត មានជាអាទិ៍ វិស័យវេជ្ជសាស្ត្រ ការពារជាតិ និងឧស្សាហកម្មផលិតអាហារ។ល។

May 10, 2023

សំណង់ស្ថាបត្យកម្មពិសេសៗនៅ ប្រទេសកូរ៉េខាងជើង

សំណង់ស្ថាបត្យជាច្រើនដែលមានរចនាបថប្លែកភ្នែក និងច្នៃប្រឌិត ត្រូវបានសាងសង់ដើម្បីបម្រើដល់គោលដៅខុសៗគ្នានៅ សាធារណរដ្ឋប្រជាមានិតប្រជាធិបតេយ្យកូរ៉េ (កូរ៉េខាងជើង)។ រូបភាពខាងលើនេះគឺជា ទិដ្ឋភាពជើងមេឃដែលមានអគារខ្ពស់ៗនៅ រដ្ឋធានីព្យុងយ៉ាង របស់ កូរ៉េខាងជើង។ ចំណុចសំខាន់របស់ទិដ្ឋភាពឯនាយជើងមេឃនេះគឺជាសណ្ឋាគារ Ryugyong កម្ពស់ ១០៥ ជាន់។

ខាងលើគឺជា សណ្ឋាគារ Ryugyong លេចធ្លោងនៅពេលរាត្រី។

ខាងលើជាអគារខ្ពស់នានាត្រូវបានសាងសង់តាមមាត់ទន្លេនៅ ព្យុងយ៉ាង ក្នុងនោះមានអគារ Mirae Unha ពណ៌ផ្ទៃមេឃ កម្ពស់ ៥៣ ជាន់ ដែលជាទីស្នាក់ការកណ្ដាលរបស់ វិទ្យាស្ថានស្រាវជ្រាវវិទ្យាសាស្ត្រ នៃ សាកលវិទ្យាល័យបច្ចេកវិទ្យា Kim Chaek។

បណ្ដាអគារស្នាក់នៅដែលមានពណ៌ចម្រុះក៏ត្រូវបានចាត់ទុកថាជាចំណុចលេចធ្លោនៅក្នុងស្ថាបត្យកម្មនៅ រដ្ឋធានីរបស់ កូរ៉េខាងជើង។

តំបន់ចម្រុះវិទ្យាសាស្ត្រ-បច្ចេកវិទ្យានៅ ព្យុងយ៉ាង ត្រូវបានស្ថាបនាទៅតាមរូបរាងរបស់អាតូម (រូបខាងលើ)។

ខាងលើជាទិដ្ឋភាពទាំងមូលរបស់តំបន់ចម្រុះវិទ្យាសាស្ត្រ-បច្ចេកវិទ្យានៅ ព្យុងយ៉ាង មើលពីទីខ្ពស់។

និមិត្តរូបនៃមីស៊ីលត្រូវបានដាក់នៅក្នុងចំណុចកណ្ដាលរបស់តំបន់ចម្រុះវិទ្យាសាស្ត្រ-បច្ចេកវិទ្យា នៅ ព្យុងយ៉ាង។

កសិដ្ឋាន Ryonpho គឺជាប្រព័ន្ធផ្ទះកញ្ចក់ទំហំ ២៨០ ហិកតា ត្រូវបានស្ថាបនានៅលើមូលដ្ឋានទ័ពអាកាសរបស់ កូរ៉េខាងជើង។ កសិដ្ឋាននេះត្រូវបានសម្ពោធកាលពីថ្ងៃទី ១០ តុលា (រូបខាងលើ)។

កសិដ្ឋានសត្វអូទ្រីសនៅ ព្យុងយ៉ាង។ សាច់អូទ្រីសដែលត្រូវបាននិយមចូលចិត្តនៅ កូរ៉េខាងជើង ក៏ព្រោះតែបញ្ហាកង្វះអាហារដែលប្រទេសនេះជួបប្រទះ។

ចំណតរថយន្តអគ្គិសនីក្រោមដីនៅ រដ្ឋធានីព្យុងយ៉ាង។ វាក៏ត្រូវបានចាត់ទុកថាជាជម្រកសុវត្ថិភាពសម្រាប់ប្រជាជន នៅពេលកើតមានសង្គ្រាម។

October 22, 2022

អាមេរិក ត្រូវការបុគ្គលិកផ្នែកសំណង់ 1 លាននាក់ ៖ ប្រាក់ខែខ្ពស់ តែពិបាករកកម្មករ

ការងាររាប់លានកន្លែងកំពុងរង់ចាំបុគ្គលិក ប៉ុន្តែ បែរជាខ្វះអ្នកមកដាក់ពាក្យធ្វើការ នោះគឺជាសេដ្ឋកិច្ចថ្មីនៅ សហរដ្ឋអាមេរិក នៅពេលដែលជីវភាពបានត្រលប់មករកសភាពដើមបន្តិចម្ដងៗ ក្រោយការវាយប្រហាររបស់វីរុស COVID-19។

Matthew Messer ជញ្ជូនផ្ទាំងសូឡានៅលើដំបូលផ្ទះមួយកន្លែងរបស់អតិថិជន នៅឯ Long Island នៃទីក្រុង New York ក្រោមកំដៅថ្ងៃ 38 អង្សា ក្នុងខែមិថុនា។ Messer គឺជាថៅកែនៃក្រុមហ៊ុន New York Solar Maintenance (ជំនាញជួសជុលផ្ទាំងសូឡា) ប៉ុន្តែ បច្ចុប្បន្ន គាត់ត្រូវចេញទៅធ្វើការជាមួយក្រុមបច្ចេកទេសរបស់ខ្លួនជារៀងរាល់ថ្ងៃ នៅពេលអាជីវកម្មចាប់ផ្ដើមកក្រើនជាថ្មី។

ក្រោយរលក COVID-19 តម្រូវការកម្លាំងពលកម្ម កើនឡើងឆាប់រហ័ស

«នេះមិនមែនជាវិធីល្អបំផុតក្នុងការប្រើប្រាស់ពេលវេលារបស់ខ្ញុំ។ ប៉ុន្តែ នោះគឺជាអ្វីដែលចាំបាច់ត្រូវធ្វើ» លោក Messer និយាយអំពីថ្ងៃដែលគាត់ត្រូវធ្វើការនៅលើដំបូលផ្ទះ។ នេះក៏ព្រោះតែម្ចាស់អាជីវកម្មរូបនេះ រកបុគ្គលិកមិនបាន។ ក្រុមហ៊ុនរបស់លោក ជួលបុគ្គលិកចំនួន 3 កម្រិត ក្នុងនោះក៏មានផ្នែកបច្ចេកទេសផងដែរ ប៉ុន្តែ ក្រុមហ៊ុនកំពុងប្រឈមនឹងបញ្ហារួមនៅក្នុងវិស័យសំណង់ នោះគឺបញ្ហាខ្វះបុគ្គលិក ដោយសារតែតម្រូវការរើសបុគ្គលិកក្នុងវិស័យនេះ កំពុងកក្រើកឡើងវិញ បន្ទាប់ពីការវាយប្រហាររបស់ COVID-19។

ការងាររាប់លានកន្លែងកំពុងរង់ចាំបុគ្គលិក ប៉ុន្តែ បែរជាខ្វះអ្នកមកដាក់ពាក្យធ្វើការទៅវិញ។ នោះគឺជាសេដ្ឋកិច្ចថ្មីនៅ សហរដ្ឋអាមេរិក នៅពេលដែលជីវភាពបានត្រលប់មករកសភាពដើមបន្តិចម្ដង។

តម្រូវការផ្នែកសាងសង់ និងជួសជុលផ្ទះ កំពុងកើនឡើង នៅពេលទីផ្សារលំនៅឋាន ងើបឡើងវិញ ចំណែកមនុស្សជាច្រើន ត្រូវធ្វើការនៅផ្ទះ។ យោងតាមសមាគមកម្មករនិងអ្នកម៉ៅការសំណង់ របស់ សហរដ្ឋអាមេរិក «ក្នុងវិស័យមួយដែលធ្លាប់តែខ្វះកម្លាំងពលកម្មតាំងពីមុន COVID-19 បណ្ដាក្រុមហ៊ុនសំណង់ នឹងត្រូវការបុគ្គលិកចំនួន 430,000 នាក់ ក្នុងឆ្នាំនេះ និង 1 លាននាក់ទៀតនៅក្នុងរយៈពេល 2 ឆ្នាំខាងមុខ ដើម្បីឆ្លើយតបនឹងតម្រូវការទីផ្សារការងារ»។

ដំណោះស្រាយ៖ ផ្ដល់ប្រាក់ខែច្រើនជាងមុន ដើម្បីទាក់ទាញបុគ្គលិក

នៅពេល Matthew Messer ចាប់ផ្ដើមដឹងថា មានបញ្ហាខ្វះបុគ្គលិក គាត់ក៏យល់ថា ខ្លួនត្រូវតែប្រញាប់ដំឡើងឈ្នួល ដើម្បីរក្សាកម្លាំងប្រកួតប្រជែង។ បុគ្គលិកដែលនៅសេះសល់របស់លោក កំពុងត្រូវក្រុមហ៊ុនផ្សេងៗ តាម «ចែចង់»។ ក្នុងអំឡុង 4 ខែកន្លង លោក Messer បានដំឡើងប្រាក់ឈ្នួលរហូតដល់ 40% ធៀបនឹងប្រាក់ឈ្នួលមុននេះ។

Messer និយាយថា៖ «ខ្ញុំឱ្យប្រាក់ឈ្នួលចាប់ពី 18 ដល់ 22 ដុល្លារ ក្នុង 1 ម៉ោង ប៉ុន្តែ ពុំមានអ្នកណាមកដាក់ពាក្យធ្វើការទាល់តែសោះ។ ខ្ញុំក៏ដំឡើងថ្លៃឈ្នួលដល់ 23 ដុល្លារ តែ នៅតែមិនអាចរកបានបុគ្គលិក។ ខ្ញុំបន្តដំឡើងរហូតដល់ 25 ដុល្លារ ទើបឃើញមានអ្នកមកដាក់ពាក្យខ្លះ។ នេះគឺជាការដំឡើងថ្លៃឈ្នួលខ្ពស់គួរសម ប៉ុន្តែ ដើម្បីអាជីវកម្មរីកចម្រើន ខ្ញុំចាំបាច់ត្រូវការជ្រើសរើសបុគ្គលិកឱ្យបាន»។

យោងតាមនាយកដ្ឋានស្ថិតិកម្លាំងពលកម្មរបស់ សហរដ្ឋអាមេរិក បុគ្គលិកនៅភោជនីយដ្ឋានម្នាក់ អាចរកប្រាក់បាន 18.23 ដុល្លារ/ម៉ោង ខណៈដែលបុគ្គលិកសំណង់ម្នាក់ អាចរកបាន 32.86 ដុល្លារ/ម៉ោង៕

ប្រភព៖ CNN
ប្រែសម្រួល៖ បុត្រា

July 13, 2021

រកឃើញវិធីផលិតដុំឥដ្ឋ “រស់” ដែលអាចបង្កើតកូនចៅ និងអាចបិទភ្ជិតកន្លែងប្រេះបែកដោយខ្លួនឯង

អ្នកវិទ្យាសាស្ដ្រ 1ក្រុមបានរកឃើញវិធីកែច្នៃ ឬអភិវឌ្ឍន៍ “បេតុងរស់” ដែលល្អសម្រាប់បរិស្ថាន ដោយការលាយបញ្ចូលគ្នារវាងខ្សាច់ ហាយដ្រូជែល (hydrogel) និងបាក់តេរី ដើម្បីបង្កើតបានជាវត្ថុធាតុរឹង និងអាចប្រើប្រាស់បានក្នុងការសាងសង់ដូចគ្នានឹងស៊ីម៉ងត៍ដែរ។

វត្ថុធាតុថ្មីនេះ មានផ្ទុកសារាយបុរាណមួយប្រភេទដែលវិវឌ្ឍជាលើកដំបូងនៅលើផែនដីកាលពី 3.5ពាន់លានឆ្នាំមុន ហើយសារាយនេះស្រូបយកថាមពលព្រះអាទិត្យធ្វើជាអាហារ។ ដោយសារសារាយនេះហើយ ទើបវត្ថុធាតុថ្មីនេះអាចប៉ះភ្ជិតកន្លែងប្រេះដាច់បានដោយស្វ័យប្រវត្តិ ហើយវាក៏បញ្ចេញឧស្ម័នកាបូនតិចជាងបេតុងបច្ចុប្បន្នទៀតផង។ នេះបើតាមការប្រកាសឱ្យដឹងរបស់ក្រុមអ្នកវិទ្យាសាស្ដ្រនៅសកលវិទ្យាល័យ Colorado Boulder កាលពីថ្ងៃទី15 មករាកន្លងទៅថ្មីៗនេះ។

ក្រុមអ្នកស្រាវជ្រាវដែលដឹកនាំដោយបណ្ឌិត Vil Sruber ដែលជាជនជាតិអាមេរិក បានឱ្យដឹងថា វត្ថុធាតុថ្មីនេះនឹងបើកផ្លូវឱ្យមានការសាងសង់ “អគាររស់” នាថ្ងៃអនាគតដ៏ខ្លីខាងមុខ ព្រោះវាមានសមត្ថភាពអាចបិទភ្ជិតកន្លែងប្រេះបែកដោយខ្លួនឯងដោយស្វ័យប្រវត្តិ និងជួយស្រូបយកជាតិពុលដែលនៅជុំវិញវាទៀតផង។ បដិវត្តន៍វិស័យសំណង់នឹងចាប់ផ្ដើមក្នុងពេលឆាប់ៗនេះឯង។ បណ្ឌិត Srubar បានបន្ថែមថា សម្ភារជីវសាស្ត្រ ដូចជាឈើ ដែលកំពុងត្រូវបានប្រើប្រាស់យ៉ាងទូលំទូលាយសព្វថ្ងៃនេះ វាជាវត្ថុធាតុ “ងាប់”។

បណ្ឌិត Srubar និងសហការី បានប្រើប្រាស់បាក់តេរី ; Cyanobacteria ជាបាក់តេរីរស់នៅក្នុងទឹកដែលមានសមត្ថភាពផលិតអាហារបានដោយខ្លួនឯង ដើម្បីបង្កើតបានជាវត្ថុធាតុរស់។

អនាគតអាចនឹងមិនពិបាកក្នុងការធ្វើឱ្យវាលខ្សាច់ធំមួយក្លាយជាដែលមានរូបរាងបែបនេះ

ក្រុមអ្នកស្រាវជ្រាវខាងលើ ចាប់ផ្ដើមដោយការប្រើដីខ្សាច់ និងហាយដ្រូជែល (hydrogel) ដើម្បីបង្កើតបានជាប្រព័ន្ធរន្ទាមួយសម្រាប់ឱ្យបាក់តេរីរីកចម្រើន។ ហាយដ្រូជែល មានផ្ទុកចំហាយសំណើម និងសារជាតិបំប៉នដែលអនុញ្ញាតឱ្យបាក់តេរីបង្កើតកូនចៅ និងរីកលូតលាស់ដូចគ្នានឹងដំណើរការនៃការរីកចម្រើនរបស់សម្បកខ្យងនៅក្នុងបាតសមុទ្រដែរ។ បាក់តេរីនៅក្នុងវត្ថុធាតុខាងលើ ស្រូបយកឧស្ម័នកាបូនឌីអុកស៊ីតក្នុងបរិយាកាស និងបង្កើតកាល់ស្យូមកាបូណាត ដែលជាសារធាតុចម្បងរបស់ស៊ីម៉ងត៍។

ស៊ីម៉ងត៍ គឺជាវត្ថុធាតុសម្រាប់សំណង់ដែលត្រូវបានគេប្រើច្រើនបំផុតលំដាប់ទី2 នៅលើផែនដីបន្ទាប់ពីទឹក។ បើគិតដោយឡែកតែលើវិស័យផលិតស៊ីម៉ងត៍ គេរកឃើញថា វាបានបញ្ចេញឧស្ម័ន CO2 ដល់ទៅ 6% ទៅក្នុងបរិយាកាស។ របកគំហើញថ្មីនេះគឹជាវិធីសាស្ដ្រដ៏អស្ចារ្យបំផុតដើម្បីដោះស្រាយបញ្ហានេះ។

ដុំឥដ្ឋហាយដ្រូជែល ក៏មានសមត្ថភាពបង្កើតកូនចៅរបស់វាបានដែរ។ នៅពេលគេកាត់ដុំឥដ្ឋជា 2កំណាត់ បាក់តេរីក្នុងឥដ្ឋនោះអាចរីកលូតលាស់ទៅជាឥដ្ឋចំនួន 2ដុំដែលមានរូបរាងដូចដើម ដោយគ្រាន់តែបន្ថែមខ្សាច់ ហាយដ្រូជែល និងជាតិបំប៉នបន្តិចប៉ុណ្ណោះ។ ជំនួសឱ្យការផលិតឥដ្ឋម្ដង 1ដុំៗ ក្រុមរបស់បណ្ឌិត Srubar បានបញ្ជាក់ថា ដុំឥដ្ឋមេ 1ដុំ អាចបង្កើតដុំឥដ្ឋកូនដល់ទៅ 8ដុំ បន្ទាប់ពីឆ្លងកាត់ 3ជំនាន់។

ក្រុមអ្នកវិទ្យាសាស្ដ្រខាងលើបានឱ្យដឹងថា ការសិក្សាស្រាវជ្រាវនេះកំពុងស្ថិតក្នុងដំណាក់កាលដំបូងនៅឡើយ និងនៅមានឧបសគ្គមួយចំនួនទៀតដែលត្រូវដោះស្រាយ។ បញ្ហាធំបំផុតនោះគឹ ដុំឥដ្ឋត្រូវតែស្ងួតទាំងស្រុង ដើម្បីបង្កើនគុណភាពដល់កម្រិតខ្ពស់បំផុត ប៉ុន្តែប្រការនេះបែរជាធ្វើឱ្យមានសម្ពាធទៅលើបាក់តេរី និងកាត់បន្ថយលទ្ធភាពនៃការរក្សាជីវិតរបស់ពួកវា។ ដើម្បីរក្សាជីវិតរបស់បាក់តេរីក្នុងដុំឥដ្ឋ គេត្រូវរក្សាសំណើម និងកម្ដៅឱ្យបានត្រឹមត្រូវ។ ក្រុមអ្នកវិទ្យាសាស្ដ្រនេះ ក៏អាចគ្រប់គ្រងដុំឥដ្ឋ ដោយអាចឱ្យវានៅស្ងៀម ឬរីកលូតលាស់ពេលណាក៏បាន ដើម្បីងាយស្រួលក្នុងការសាងសង់៕

ប្រភព៖ សារព័ត៌មានបរទេស

January 18, 2020

វិនិយោគិនបរទេសកំពុងចាប់យកឱកាសវិនិយោគលើវិស័យអចលនទ្រព្យ សំណង់ និងទីផ្សារស្ថាបត្យកម្ម

ស្របពេលប្រទេសកម្ពុជាកំពុងទទួលបានការអភិវឌ្ឍយ៉ាងលោតផ្លោះលើវិស័យសំណង់ និងអចលនទ្រព្យ វិនិយោគិនដែលកំពុងចាប់យកឱកាសវិនិយោគលើវិស័យនេះកំពុងទទួលបានប្រាក់ចំណេញខ្ពស់ រួមទាំងរួមចំណែកធ្វើឱ្យមានកំណើនសេដ្ឋកិច្ច និងការកើនឡើងនៃប្រាក់ចំណូលរបស់ប្រជាពលរដ្ឋ ដែលជាចលករជួយជំរុញការវិនិយោគលើគម្រោងនានាឱ្យនៅតែបន្តធ្វើឱ្យការពង្រីកមូលដ្ឋានអាជីវកម្មរបស់ពួកគេលើវិស័យនេះ (Investment Fund) កាន់តែមានភាពរឹងមាំខ្លាំងឡើង។

ជាមួយគ្នានេះដែរនៅត្រឹមពាក់កណ្តាលឆ្នាំ2019 នេះ វិស័យសំណង់ និងអចលនទ្រព្យនៅកម្ពុជាមានអ្នកវិនិយោគអន្តរជាតិចូលមកសិក្សា និងរកឱកាសវិនិយោគកាន់តែច្រើន ដែលក្នុងនោះមាន ដូចជាក្រុមហ៊ុនមកពីប្រទេសចិន ជប៉ុន និងកូរ៉េជាដើម ដែលគេរំពឹងថា នឹងមានវត្តមានក្រុមហ៊ុនបរទេសថ្មីៗចូលមកបន្ថែមទៀតនៅកម្ពុជា និងកាន់តែជួយជំរុញឱ្យវិស័យមួយនេះមានការអភិវឌ្ឍកាន់ខ្លាំងក្លា។

របាយការណ៍របស់ក្រសួងរៀបចំដែនដី នគរូបនីយកម្ម និងសំណង់បានបង្ហាញថា សំណង់លំនៅឋានសរុបក្នុងឆ្នាំ2018 មានចំនួន 2,420គម្រោង មានផ្ទៃក្រឡាសរុបចំនួន 4,682,565ម៉ែត្រការ៉េ មានទុនវិនិយោគ 1,835,416,912ដុល្លារ ស្មើនឹង18,471ខ្នងផ្ទះ ចំណែកគម្រោងអគារខ្ពស់ៗចាប់ពី5ជាន់ឡើងទៅនៅរាជធានីភ្នំពេញក្នុងឆ្នាំ2018 មានចំនួន 110អគារ និងបណ្ដុំលំនៅឋានមានលក្ខណៈជាបុរីនៅរាជធានីភ្នំពេញក្នុងឆ្នាំ2018 ចំនួន 28ទីតាំង។

ឯកឧត្តម ឡៅ ទិព្វសីហា រដ្ឋលេខាធិការក្រសួងរៀបចំដែនដីនគរូបនីយកម្ម និងសំណង់បាន ឱ្យដឹងថា ការផ្តល់ទស្សនទានថ្មីលើវិស័យស្ថាបត្យកម្មនិងសំណង់អគារបានដាក់ចេញនូវគោលនយោបាយលើកទឹកចិត្តឱ្យមានសំណង់អគារទំនើបខ្ពស់ៗនៅលើទីតាំងនានាដែលសមស្រប ដូចជានៅភ្នំពេញអគារខ្ពស់ៗដែលមានកម្ពស់ចាប់ពី 5ជាន់ឡើងទៅមានចំនួន 1,241អគារ ការបើកទូលាយនៃផ្ទៃដីរាជធានីភ្នំពេញជាង 678គីឡូម៉ែត្រការ៉េ និងការអភិវឌ្ឍទីក្រុងរណបថ្មី និងបុរីលំនៅឋាន ឬបណ្តុំលំនៅឋានមានលក្ខណៈបុរីចំនួន 257ទីតាំង ដើម្បីបន្ថែមកន្លែងរស់នៅ កន្លែងធ្វើការងារ និងការផ្លាស់ប្តូរមុខមាត់រាជធានីភ្នំពេញ ទីក្រុង និងជនបទឱ្យក្លាយជាទីក្រុងទំនើប។

ឯកឧត្តមលើកឡើងថា ការតាំងបង្ហាញផលិតផលសេវាកម្ម និងបច្ចេកវិទ្យាថ្មីៗពាក់ព័ន្ធវិស័យស្ថាបត្យកម្ម និងសំណង់ពិតជាបានរួមចំណែកយ៉ាងសំខាន់ក្នុងការបង្កើតទីផ្សារថ្មីនៃសំណង់ ហើយក៏ជួយទាក់ទាញវិនិយោគិនបរទេសមកវិនិយោគក្នុងវិស័យសំណង់ និងស្ថាបត្យកម្មនៅកម្ពុជាផងដែរ។

កត្តានេះបានផ្តល់កាលានុវត្តភាព និងជាកម្លាំងចលករថ្មីមួយថែមទៀតក្នុងការជំរុញការអភិវឌ្ឍវិស័យស្ថាបត្យកម្ម និងសំណង់នៅកម្ពុជាឱ្យកាន់តែល្អប្រសើរឡើង និងជាសញ្ញាមួយនៃការទាក់ទាញ កៀរគរអ្នកវិនិយោគទុនក្នុងស្រុក និងក្រៅស្រុកមកធ្វើការបណ្តាក់ទុនលើវិស័យស្ថាបត្យកម្ម និងសំណង់។

ឯកឧត្តមក៏ធ្លាប់បានលើកឡើងដែរថា នៅក្នុងឆ្នាំនេះ យើងសង្កេតឃើញមានគម្រោងវិនិយោគថ្មីៗពីអ្នកវិនិយោគក្នុងស្រុក និងលំហូរទុនវិនិយោគផ្ទាល់ពីបរទេសមានការកើនឡើង។ ឯកឧត្តមបានឱ្យដឹងថា នៅត្រឹមដំណាច់ឆ្នាំ2019នេះ អាចមានគម្រោងសំណង់អគារពាណិជ្ជកម្មមួយចំនួន ក៏ដូចជាគម្រោងអគារផ្សារទំនើបផងដែរនឹងបញ្ចប់គម្រោងរបស់ខ្លួន ដែលជាកត្តាមួយជំរុញឱ្យវិស័យនេះមានការកើនឡើងជាលំដាប់។

ជាមួយគ្នានេះដែរ ការរីកចម្រើននៃវិស័យសំណង់នៅកម្ពុជាបានទាក់ទាញឱ្យមានក្រុមហ៊ុនផ្នែកស្ថាបត្យកម្ម និងរចនាទាំងក្នុងស្រុក និងបរទេសលេចឡើងយ៉ាងច្រើននាពេលបច្ចុប្បន្ន។ នេះបើតាមការលើកឡើងរបស់អ្នកជំនាញ។

លោក ស៊ិន សុជាតិ ប្រធានសមាគមស្ថាបត្យករកម្ពុជាបានមានប្រសាសន៍ថា ចំនួនក្រុមហ៊ុន និងអ្នកជំនាញក្នុងវិស័យស្ថាបត្យកម្មនៅកម្ពុជាបានកើនឡើងយ៉ាងច្រើននាពេលបច្ចុប្បន្ន ដែលកំណើននេះមានទំនាក់ទំនងយ៉ាងជិតស្និទ្ធជាមួយនឹងការរីកចម្រើននៃបច្ចេកវិទ្យា។ លោកលើកឡើងថា គ្រប់ការងារទាំងអស់សូម្បីតែប្រព័ន្ធលូបង្ហូរទឹកកខ្វក់ក៏មានទំនាក់ទំនងជាមួយនឹងការងារស្ថាបត្យកម្មដែរ។ លោកថ្លែងថា៖“វិស័យស្ថាបត្យកម្មនៅកម្ពុជាកំពុងមានដំណើរការល្អជាលំដាប់ តែការរីកចម្រើននេះក៏ត្រូវការរួមចំណែកពីបច្ចេកវិទ្យាផងដែរ”។

លោក ថង លិនថោង ប្រធានក្រុមហ៊ុនសិក្សាប្លង់ស្ថាបត្យកម្ម និងសាងសង់ A-SmileArt Architecture & Construction បានលើកឡើងថា ទីផ្សារស្ថាបត្យកម្មបានរីកចម្រើនយ៉ាងឆាប់រហ័សក្នុងរយៈពេលប្រហែល 10ឆ្នាំចុងក្រោយនេះ។ ប្រជាជនកម្ពុជាយល់កាន់តែច្រើនពីសារៈប្រយោជន៍ប្លង់ដែលរចនាឡើងដោយអ្នកជំនាញ។

លោកបន្តថា ការងារស្ថាបត្យកម្មពិតជាមានសារៈសំខាន់ណាស់ក្នុងការជួយលើកកម្ពស់មុខមាត់សំណង់របស់ប្រទេស ហើយការរចនាដែលត្រឹមត្រូវល្អក៏នឹងជួយធ្វើឱ្យកាត់បន្ថយថវិកាសម្រាប់ចំណាយលើការសាងសង់ផងដែរ។

លោកថ្លែងថា៖ “ពីមុនមកការងារស្ថាបត្យកម្មមិនសូវមានគេឱ្យតម្លៃប៉ុន្មានទេ រហូតដល់មានអ្នកខ្លះគិតថា ជាការងាររបស់វិស្វករទៀតផង តែនៅពេលនេះមានម្ចាស់សំណង់ជាច្រើនបានមករកស្ថាបត្យករឱ្យជួយ ទោះជាត្រូវចំណាយលុយច្រើនក៏ដោយ។ ទីផ្សារការងារស្ថាបត្យកម្មកំពុងមានដំណើរការល្អ”។

ទោះយ៉ាងណា លោក លិនថោង ក៏បានលើកឡើងដែរថា ភាពរីកចម្រើននាពេលនេះ ក៏បានទាក់ទាញឱ្យក្រុមហ៊ុនបរទេសជាច្រើនចូលមករកស៊ីនៅកម្ពុជាផងដែរ ដែលការណ៍នេះទាមទារឱ្យស្ថាបត្យករក្នុងស្រុកត្រូវខិតខំពង្រឹងសមត្ថភាពរបស់ខ្លួនបន្ថែមទៀត៕

July 1, 2019

ដើមឆ្នាំ2019 ទុនវិនិយោគលើវិស័យសំណង់មានប្រមាណ 829លានដុល្លារ

នៅក្នុងខែមករា ឆ្នាំ2019 កន្លងទៅនេះ ការវិនិយោគលើវិស័យសំណង់កម្ពុជាមានទំហំទឹកប្រាក់ចំនួនប្រមាណ 829លានដុល្លារ មានការកើនឡើងរហូតដល់ 178% បើប្រៀបធៀបនឹងរយៈពេលដូចគ្នាកាលពីឆ្នាំ2018 កន្លងទៅនេះ។

ឯកឧត្តម ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ បានលើកឡើងថា ការអភិវឌ្ឍវិស័យអចលនទ្រព្យ និងសំណង់បានក្លាយជាសសរស្តម្ភស្នូលយ៉ាងសំខាន់ក្នុងការជំរុញកំណើនសេដ្ឋកិច្ចកម្ពុជា។ ចំពោះក្រុមហ៊ុនសាងសង់ និងក្រុមហ៊ុនសិក្សាគម្រោងប្លង់ដែលមានអាជ្ញាប័ណ្ណចំនួន 2,307 ក្រុមហ៊ុន រួមមានស្ថាបត្យករប្រមាណជាង 2,500នាក់ វិស្វករប្រមាណជាង 30,000 នាក់។ នេះ គឺជាសញ្ញាវិជ្ជមានដ៏ប្រសើរមួយចំពោះការអភិវឌ្ឍក្នុងវិស័យសំណង់ និងអចលនទ្រព្យនៅកម្ពុជានាពេលបច្ចុប្បន្ន និងបន្តទៅថ្ងៃអនាគត។

ឯកឧត្តមបានបន្តថា៖“ជាក់ស្ដែងនៅក្នុងរយៈពេល 10ឆ្នាំចុងក្រោយនេះដោយរាប់ចាប់ពីឆ្នាំ2010 រហូតដល់ឆ្នាំ2019 ទំហំវិនិយោគលើវិស័យសំណង់ និងអចលនទ្រព្យនៅកម្ពុជាមានទឹកប្រាក់សរុបចំនួនប្រមាណជា 43,896 លានដុល្លារសហរដ្ឋអាមេរិក ហើយនៅដើមឆ្នាំ2019នេះ ការវិនិយោគលើវិស័យមួយនេះមានទំហំទឹកប្រាក់ប្រមាណ 829លានដុល្លារអាមេរិក ធៀបនឹងរយៈពេលដូចគ្នាក្នុងឆ្នាំ2018 ឃើញថាមានការកើនឡើងប្រមាណ 178% ”។

ឯកឧត្តមបានបញ្ជាក់ទៀតថា ជាមួយនឹងការអភិវឌ្ឍនគរូបនីយកម្ម និងសំណង់ដែលកំពុងមានកំណើនក្នុងល្បឿនដ៏លឿននេះ យើងអាចមើលឃើញពីតម្រូវការវិនិយោគជាច្រើន មានជាអាទិ៍ដូចជា ការអភិវឌ្ឍសំណង់លំនៅឋាន សំណង់ពាណិជ្ជកម្ម សំណង់សេវាកម្ម សំណង់ឧស្សាហកម្ម សំណង់ហេដ្ឋារចនាសម្ព័ន្ធរូបវ័ន្ត និងបរិស្ថាន សេដ្ឋកិច្ចសង្គម។ ជាពិសេសការអភិវឌ្ឍលំនៅឋានតម្លៃសមរម្យ បណ្តាញផ្លូវ ការផ្គត់ផ្គង់ទឹកស្អាត អគ្គិសនី ប្រព័ន្ធលូ និងប្រពន្ធការពារទឹកជំនន់ ស្ថានីយប្រព្រឹត្តកម្មទឹកកខ្វក់ ការគ្រប់គ្រងសំណល់រឹង និងរាវ លម្ហសាធារណៈ និងផ្ទៃបៃតងបរិស្ថានទីក្រុង ដែលសុទ្ធសឹងជាដំណោះស្រាយដ៏មានប្រសិទ្ធភាពសម្រាប់គោលដៅនៃការអភិវឌ្ឍប្រកបដោយចីរភាព មានបរិយាប័ន្ន មានភាពធន់ និងមានភាពប្រកួតប្រជែងឆ្ពោះទៅសម្រេចចក្ខុវិស័យកម្ពុជាឆ្នាំ2030 ក្លាយជាប្រទេសមានចំណូលមធ្យមកម្រិតខ្ពស់ និងនៅឆ្នាំ2050 ក្លាយជាប្រទេសមានចំណូលខ្ពស់។

លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA)បានប្រាប់ឡារ៉ែនពាណិជ្ជឱ្យដឹងផងដែរថា៖ “ជារួម វិស័យអចលនទ្រព្យដែលយើងមើលឃើញនៅដើមឆ្នាំ2019 នេះ វាដំណើរការជាធម្មតានៅឡើយទេ វាអត់មានអ្វីជាឧបសគ្គធំទេ ព្រោះវាពុំមានអ្វីជាអវិជ្ជមាន ប៉ះពាល់ដល់វិស័យនេះទេ ហើយអ្វីដែលជាដំណើរការក្នុងវិស័យអចលនទ្រព្យនេះ គេអាចហៅបានថាមានសម្ទុះខ្លាំង តែក៏ពុំទាន់មានអ្វីលេចធ្លោនៅឡើយដែរ”។

លោកប្រធានសមាគមបានបញ្ជាក់ថា ពាក់ព័ន្ធនឹងទុនវិនិយោគនៃវិស័យអចលនទ្រព្យ ជារួម វាចាប់ផ្តើមគម្រោង និងបានដំណើរការទៅហើយ ដូចនេះដើម្បីឱ្យដឹងពីទំហំនៃគម្រោងនេះ គឺយើងត្រូវមើលលើការងាររបស់វា ឬចុងបញ្ចប់នៃគម្រោង និងការលក់របស់គម្រោងនោះ។

លោក សុខនីម បានបន្ថែមថា ប៉ុន្តែគម្រោងដែលមាន និងបានបង្ហាញពីទុនវិនិយោគរួចហើយនោះ គេអាចប៉ាន់ស្មានបាន ប្រសិនបើគម្រោងនោះបានធ្វើជាក់ស្តែង គឺយើងអាចដឹងពីទំហំកំណើនបានថា ស្ថិតក្នុងចន្លោះណា? បើទុននោះយកមកពីបរទេស គេអាចវាយតម្លៃនៃទុនវិនិយោគនោះដោយធៀបនឹងផលទុនសរុបរបស់ជាតិ(ផ.ស.ស)។ ពោលគឺ ប្រសិនបើកើនឡើងប្រមាណ 800លាន គឺថែមតម្លៃនោះចាក់បញ្ចូលទៅក្នុងផ.ស.ស នៃថវិកាជាតិរបស់យើង។

លោកប្រធានសមាគមបានបញ្ជាក់ទៀតថា ទោះបីជាមិនទាន់មានការបង្ហាញពិវិស័យនេះថាមានអ្វីឱ្យលេចធ្លោ និងគួរឱ្យកត់សម្គាល់ក៏ដោយ តែសម្រាប់លោកវិញ លោកមើលឃើញថា វិស័យនេះកំពុងតែចាប់ផ្តើមល្អ ដោយការលេចចេញនូវគម្រោងថ្មីៗជាបន្តបន្ទាប់ ឯគម្រោងចាស់ក៏បានបញ្ចប់ទៅដោយរលូន និងមានទីផ្សារល្អដែរ ហើយទំហំទុនវិនិយោគចាប់ផ្តើមក្នុងដើមឆ្នាំ2019នេះ ក៏បង្ហាញពីកំណើនច្រើនជាងកាលពីឆ្នាំកន្លងទៅដែរ៕

March 11, 2019

ADB បន្តជួយកម្ពុជាលើការអប់រំផ្នែក អគ្គិសនី អេឡិចត្រូនិក សំណង់ និងកម្មន្តសាល

ធនាគារអភិវឌ្ឍន៍អាស៊ី (ADB) គឺជាដៃគូដ៏សំខាន់មួយសម្រាប់កម្ពុជាដែលបានចូលរួមចំណែកក្នុងការផ្តល់កញ្ចប់ថវិកាអភិវឌ្ឍន៍លើសកម្មភាពសេដ្ឋកិច្ច និងការអប់រំរបស់កម្ពុជា។

គ្រឹះស្ថានហិរញ្ញវត្ថុអន្តរជាតិមួយនេះបានផ្តល់គម្រោងជាច្រើនសម្រាប់កម្ពុជា ដូចជាគម្រោងអភិវឌ្ឍន៍ហេដ្ឋារចនាសម្ព័ន្ធផ្លូវថ្នល់ ការតភ្ជាប់តំបន់សេដ្ឋកិច្ច និងការបណ្តុះបណ្តាលវិជ្ជាជីវៈដើម្បីលើកស្ទួយវិស័យធនធានមនុស្សសម្រាប់បំពេញតម្រូវការក្នុងតំបន់។ ធនាគារអភិវឌ្ឍន៍អាស៊ីក៏ធ្លាប់បានផ្តល់ជំនួយជាច្រើនសម្រាប់កម្ពុជាក្នុងការជំរុញការបណ្តុះបណ្តាលបច្ចេកទេស និងវិជ្ជាជីវៈ (TVET) តាមរយៈគ្រឹះស្ថានសិក្សាបច្ចេកទេសដែលស្ថិតក្រោមការគ្រប់គ្រងរបស់ក្រសួងការងារ និងបណ្តុះបណ្តាលវិជ្ជាជីវៈ។

ថ្មីៗនេះលោកស្រី Sunniya Durani -Jamal នាយិកាធនាគារអភិវឌ្ឍន៍អាស៊ីប្រចាំនៅកម្ពុជាបានលើកឡើងពីសុទិដ្ឋិនិយមចំពោះការអភិវឌ្ឍធនធានមនុស្សរបស់កម្ពុជា តាមរយះការពង្រឹងការអនុវត្តគោលនយោបាយបណ្តុះបណ្តាលបច្ចេកទេស និងវិជ្ជាជីវៈ និងការពង្រឹងយន្តការនានាដើម្បីបង្កើតប្រសិទ្ធភាពការងារបស់គណៈកម្មការជាតិបណ្តុះបណ្តាល (NTB) ដែលស្របនឹងចក្ខុវិស័យនៃផែនការយុទ្ធសាស្ត្រឆ្នាំ2030 របស់ធនាគារអភិវឌ្ឍន៍អាស៊ី (ADB) ដែលផ្តោតលើការអភិវឌ្ឍធនធានមនុស្សឱ្យស្របនឹងការរីកចម្រើននៃឧស្សាហកម្មសកល។

ស្របពេលជាមួយគ្នានេះ ធនាគារអភិវឌ្ឍន៍អាស៊ីបានសន្យាបន្តផ្តល់គម្រោងថ្មីមួយទៀតក្នុងរយៈពេល 5ឆ្នាំ ដោយចាប់ផ្តើមពីឆ្នាំក្រោយនេះ រហូតដល់ឆ្នាំ2024 ដើម្បីអភិវឌ្ឍលើធនធានមនុស្សនៅកម្ពុជា។បើយោងតាមការលើកឡើងរបស់ ADB គម្រោងនេះនឹងផ្តោតសំខាន់លើយុវជនដែលទើបនឹងបញ្ចប់ការ-សិក្សាថ្នាក់មធ្យមសិក្សាទុតិយភូមិ ដើម្បីអភិវឌ្ឍសមត្ថភាពរបស់ពួកគេឱ្យបានកាន់តែខ្លាំងលើជំនាញបច្ចេកទេស វិទ្យាសាស្ត្រពិត និងជំនាញវិជ្ជាជីវៈដើម្បីឱ្យពួកគេមានលទ្ធភាពគ្រប់គ្រាន់ក្នុងការចូលទៅកាន់បច្ចេកវិទ្យាឌីជីថលនៃបដិវត្តន៍ឧស្សាហកម្មនាពេលខាងមុខនេះ។

ឯកឧត្តម ឡៅ ហ៊ីម ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានអប់រំ បណ្តុះបណ្តាល បច្ចេកទេស និងវិជ្ជាជីវៈ បានលើកឡើងថាបន្ទាប់ពីសិក្សាលើតម្រូវការទីផ្សារការងារ ដែលមានជំនាញច្បាស់លាស់នៅកម្ពុជាសម្រាប់ពេលបច្ចុប្បន្ន និងអនាគតហើយនោះ ធនាគារអភិវឌ្ឍន៍អាស៊ី នឹងផ្តល់ជំនួយបន្ថែមមកកម្ពុជាលើការបណ្តុះបណ្តាលលើជំនាញសំខាន់ៗចំនួន4 គឺមុខវិជ្ជាអគ្គិសនី អេឡិចត្រូនិក សំណង់ និងកម្មន្តសាល ដែលជំនាញទាំងអស់នេះជាជំនាញដែលមានតម្រូវការខ្ពស់ក្នុងពិភពលោក ដែលកំពុងជំរុញឱ្យប្រទេសកំពុងអភិវឌ្ឍន៍ដូចជាប្រទេសកម្ពុជាត្រូវតែជំរុញឱ្យមានការខិតខំប្រឹងប្រែងបណ្តុះបណ្តាលឱ្យកាន់តែខ្លាំង និងច្រើនឡើង។

ឯកឧត្តម ឡៅ ហ៊ីម បានមានប្រសាសន៍ថា៖ “គ្រឹះស្ថានបណ្តុះបណ្តាលដែលនឹងត្រូវអនុវត្តសម្រាប់គម្រោងនេះ គឺសាលាអប់រំជាតិបណ្តុះបណ្តាលបច្ចេកទេស និងវិជ្ជាជីវៈ និងសាលាជាច្រើនផ្សេងទៀតដែលស្ថិតក្រោមការគ្រប់គ្រងរបស់ក្រសួងការងារ និងបណ្តុះបណ្តាលវិជ្ជាជីវៈ។ ការអនុវត្តគម្រោងនេះនឹងត្រូវត្រួតពិនិត្យដោយក្រសួងការងារ និង ADB ដោយផ្ទាល់”។

បើតាមឯកឧត្តម ឡៅ ហ៊ីម កម្ពុជាបច្ចុប្បន្ននៅមានឧបសគ្គប្រឈមមួយចំនួននៅឡើយក្នុងការបណ្តុះបណ្តាលបច្ចេកទេស និងវិជ្ជាជីវៈ ជាពិសេសលើបញ្ហាអគារ សម្ភារបរិក្ខារ គ្រឿងម៉ាស៊ីន និងសមត្ថភាពគ្រូបង្រៀនដែលទាមទារឱ្យមានការបណ្តុះបណ្តាលបន្ថែមទៀត។ ចំពោះសមត្ថភាពអ្នកបណ្តុះបណ្តាលចាំបាច់បំផុតត្រូវតែពង្រឹងសមត្ថភាពឱ្យបានខ្លាំង និងបន្តអភិវឌ្ឍរហូតជាប់ជានិច្ច ព្រោះបច្ចេកវិទ្យានាពេលបច្ចុប្បន្ននេះ មានការវិវឌ្ឍលឿន ហេតុនេះវាទាមទារឱ្យមានការបណ្តុះបណ្តាលឱ្យទាន់តម្រូវការជាក់ស្តែងចៀសសវាងបណ្តុះបណ្តាលដោយប្រើបច្ចេកវិទ្យាចាស់ៗហើយពេលនិស្សិតចេញមកមិនអាចប្រើប្រាស់បាន៕

December 26, 2018

Tag: សំណង់