សន្សំ - La Reine Media

ហេតុអ្វីអាកាសធាតុកាន់តែក្ដៅឡើងៗ?

ក្នុងរង្វង់ 100ឆ្នាំកន្លងទៅនេះ ការកើនឡើងកម្ដៅរបស់ផែនដីកាន់តែបង្ហាញច្បាស់ឡើងៗ ធ្វើឱ្យអ្នកវិទ្យាសាស្ត្រមានការព្រួយបារម្ភ។ ក្នុងអនាគត កម្ដៅផែនដីក៏នឹងកើនឡើងបន្តទៀត ហើយបន្សល់ទុកនូវផលវិបាកយ៉ាងធ្ងន់ធ្ងរ។ ដូច្នេះតើបាតុភូតផែនដីឡើងកម្ដៅកើតឡើងដោយសារកត្តាអ្វីខ្លះ? ការឡើងកម្ដៅផែនដីបង្កផលវិបាកអ្វីខ្លះ? តើមនុស្សត្រូវដោះស្រាយបញ្ហានេះដោយរបៀបណា?

ផែនដីឡើងកម្ដៅបណ្ដាលមកពីកត្តាពីរសំខាន់ រួមមាន កត្តាធម្មជាតិ និងកត្តាមនុស្ស

កត្តាធម្មជាតិ

ការបញ្ចេញឧស្ម័នមេតានច្រើនហួសពីប៉ូលខាងជើង និងបណ្ដាតំបន់ដែលមានសំណើមកម្រិតខ្ពស់ កំពុងរួមចំណែកធ្វើឱ្យកម្ដៅផែនដីកើនឡើង។ ឧស្ម័នមេតានគឺជាឧស្ម័នផ្ទះកញ្ចក់មួយប្រភេទដែលអាចរក្សាកម្ដៅក្នុងបរិយាកាស។
បាតុភូតភ្នំភ្លើងផ្ទុះ បង្កើតបានជាធូលីយ៉ាងច្រើនក៏ជាមួយក្នុងចំណោមមូលហេតុដែលនាំឱ្យអាកាសធាតុក្ដៅ។
នៅពេលសីតុណ្ហភាពមធ្យមរបស់ផែនដីកើនឡើង ផ្ទាំងទឹកកកនៅឯប៉ូលទាំងពីររបស់ផែនដីក៏ត្រូវរលាយ និងធ្វើឱ្យស្រទាប់ទឹកកកកាបូនឌីអុកស៊ីត (CO2) ដែលនៅជ្រៅក្រោមទឹកកកត្រូវលេចឡើង ហើយក៏សាយភាយទៅក្នុងបរិយាកាសផែនដី គ្រាដែលព្រៃឈើលើផែនដីដែលមានតួនាទីស្រូបយកឧស្ម័ននេះក៏ចេះតែហិនហោចទៅៗ។ ពេលនេះ បរិមាណកាបូនឌីអុកស៊ីតបានកើនឡើងដល់កម្រិតខ្ពស់ខ្លាំង លើសពីសមត្ថភាពគ្រប់គ្រងរបស់ធម្មជាតិ ទើបផែនដីត្រូវឡើងកម្ដៅជាបន្តបន្ទាប់។

កត្តាមនុស្ស

មនុស្សបានធ្វើឱ្យផែនដីឡើងកម្ដៅបន្តិចម្ដងៗរហូតដល់បច្ចុប្បន្ន តាមរយៈការបំភាយឧស្ម័នពីសកម្មភាពផលិត ជីវភាពប្រចាំថ្ងៃ ទៅក្នុងបរិស្ថានធម្មជាតិ។
បច្ចុប្បន្ន បាតុភូតផែនដីឡើងកម្ដៅ ភាគច្រើនគឺដោយសារមនុស្ស។ សកម្មភាពដុតឥន្ធនៈហ្វូស៊ីល ដែលរួមមាន ប្រេងសាំង ឬធ្យូងថ្មជាដើម ដែលបង្កើតឱ្យមានឧស្ម័នផ្ទះកញ្ចក់ បាន និងកំពុងរក្សាកម្ដៅនៅក្នុងបរិយាកាស។

ផលវិបាកដែលកើតឡើងពីបាតុភូតផែនដីឡើងកម្ដៅ

បាតុភូតកម្ដៅផែនដីកើនឡើង នឹងនាំឱ្យកើតមានផលវិបាកជាច្រើនរៀបមិនអស់ ក្នុងនោះមានជាអាទិ៍ អាកាសធាតុក្ដៅអូសបន្លាយពេលយូរជាងមុន នាំឱ្យមានគ្រោះរាំងស្ងួត ឆេះព្រៃ ព្យុះធូលី និងគ្រោះទឹកជំនន់ជាដើម។

បញ្ហាឡើងកម្ដៅផែនដីក៏នឹងធ្វើឱ្យខ្យល់អាកាសប្រែជាអាក្រក់ជាងមុន ដោយសារតែស្រទាប់អូហ្សូនលើដីក្រាស់ជាងមុន ព្រោះតែផ្សែងពុលកើនឡើង។ ប្រការនេះនឹងបណ្ដាលឱ្យមនុស្សត្រូវឈឺច្រើនជាងធម្មតា។

អត្រាផុតពូជនៃសត្វ និងរុក្ខជាតិក៏នឹងកើនឡើង ព្រោះតែសម្របខ្លួនមិនទាន់ពេល នៅពេលដី និងសមុទ្រត្រូវឆ្លងកាត់ការប្រែប្រួលឆាប់រហ័ស។

កម្ដៅផែនដីកើនឡើងក៏នឹងធ្វើឱ្យផ្ទាំងទឹកកកនៅតំបន់ប៉ូលត្រូវរលាយលឿនជាងធម្មតា បណ្ដាលឱ្យទឹកសមុទ្រកើនឡើងខ្ពស់ គំរាមកំហែងដល់បណ្ដាតំបន់ទំនាបនៅលើផែនដី។

ដំណោះស្រាយសម្រាប់បាតុភូតផែនដីឡើងកម្ដៅ រួមមាន

ការស្ដារ និងលើកកម្ពស់គុណភាពហេដ្ឋារចនាសម្ព័ន្ធ
ការកាត់បន្ថយការប្រើប្រាស់ឥន្ធនៈហ្វូស៊ីល
ការពារព្រៃឈើ
កាត់បន្ថយការប្រើប្រាស់ថង់ប្លាស្ទិច
ការសន្សំសំចៃអគ្គិសនី និងទឹក
ការបរិភោគបន្លែ ផ្លែឈើឱ្យបានច្រើនជាងមុន
ការប្រើប្រាស់ប្រភពថាមបលបៃតង ថាមពលកកើតឡើងវិញ
ការប្រើប្រាស់បច្ចេកវិទ្យាថ្មីនៅក្នុងការការពារផែនដី។

May 2, 2024

ឡានហោះដំបូងលើពិភពលោក ដឹកភ្ញៀវដោយជោគជ័យ

ក្រុមហ៊ុន Klein Vision នៅប្រទេសស្លូវ៉ាគី បានបញ្ចប់ជើងហោះហើរដំបូងលើពិភពលោកដោយឡានដែលអាចផ្លាស់ទីទាំងនៅលើដី និងនៅលើអាកាស។

Klein Vision សម្រេចបានជំហានសំខាន់នេះជាមួយនឹងឡានហោះគំរូ AirCar។ ឡានហោះនេះដឹកភ្ញៀវម្នាក់ដែលជាតន្ត្រីករជនជាតិបារាំង Jean-Michel Jarre។ ការធ្វើតេស្តសាកល្បងត្រូវបានធ្វើឡើងនៅក្នុងព្រលានយន្តហោះនៅស្លូវ៉ាគី។ នៅក្នុងវីដេអូដែលបានចែករំលែកដោយក្រុមហ៊ុន ឡានកីឡាដែលមានស្លាបនេះបានបរដោយកង់បួន ហើយហោះឡើងបន្តិចម្ដងៗ។ តែប៉ុន្មាននាទីប៉ុណ្ណោះ AirCar ក៏បានហោះឡើងដោយសុវត្ថិភាព។

ឆ្នាំ 2021 AirCar បានបញ្ចប់ជើងហោះហើរពីទីក្រុងមួយទៅទីក្រុងមួយជាលើកដំបូង ក្នុងនោះវាបានហោះហើររយៈពេល 15នាទីរវាងព្រលានយន្តហោះអន្តរជាតិ Nitra និង Bratislava នៅប្រទេស្លូវ៉ាគី។ ឡានហោះនេះត្រូវបានរចនាឡើងដើម្បីអាចបរនៅលើដងផ្លូវ និងហោះនៅលើអាកាស។

AirCar ត្រូវបានធានាសុវត្ថិភាពដោយឆត្រយោង ហើយក្នុងអនាគត ក្រុមហ៊ុននឹងអភិវឌ្ឍកាប៊ីន ដែលមានកៅអីបី និងបួន។

ក្នុងដំណាក់កាលដំបូង AirCar ប្រើប្រាស់ម៉ាស៊ីន BMW 160 កម្លាំងសេះ។ កំណែពីរកៅអីមានទម្ងន់ប្រហែល 1,100 គីឡូក្រាម អាចដឹកទម្ងន់បាន 200 គីឡូក្រាម។ ក្នុងការហោះហើរសាកល្បង AirCar បានហោះដល់កម្ពស់ 2,500 ម៉ែត្រ និងល្បឿន 190 គីឡូម៉ែត្រ/ម៉ោង។

ក្នុងអនាគត Klein Vision នឹងសាកល្បងម៉ាស៊ីនសម្រាប់អាកាសចរណ៍ ADEPT ទំនើប ដែលមាំ ស្រាល និងសន្សំសំចៃថាមពល។ ទន្ទឹមនឹងនេះ ក្រុមហ៊ុន Klein Vision ក៏បានបញ្ចប់ការរចនាជាមូលដ្ឋាន និងការវាយតម្លៃ ចំពោះកំណែមួយកៅអីដែលអាចហោះបានជាង 300 គីឡូម៉ែត្រក្នុងមួយម៉ោង និងអាចហោះបាន 1,000 គីឡូម៉ែត្រ។

April 28, 2024

ទីក្រុងឆ្លាតវៃតម្លៃដប់ពាន់លានដុល្លាររបស់ក្រុមហ៊ុនតូយ៉ូតា

(ជប៉ុន) – ទីក្រុង Woven City នៅជើងភ្នំហ្វ៊ូជី (Fuji) នឹងប្រើប្រាស់អគ្គិសនីព្រះអាទិត្យ ថ្មឥន្ធនៈឆ្លាតវៃ និងរថយន្តមិនបំភាយឧស្ម័នពុល។

ត្រូវបានរចនាឡើងដោយក្រុមហ៊ុនតូយ៉ូតា (Toyota) ទីក្រុង Women City មានចម្ងាយតែប៉ុន្មានគីឡូម៉ែត្រប៉ុណ្ណោះ ពីភ្នំហ្វ៊ូជី នៃប្រទេសជប៉ុន និងត្រូវបានកសាងតាំងពីឆ្នាំ 2021។ យោងតាមទំព័រ Sun ទីក្រុងអនាគតនេះ ដើរតួនាទីដូចទៅនឹង «បន្ទប់ពិសោធន៍» របស់ក្រុមហ៊ុន ដើម្បីធ្វើតេស្តបណ្ដារថយន្តបើកបរស្វ័យប្រវត្តសន្សំសំចៃថាមពល ដែលមានរហ័សនាមថា «E-palettes»។

មនុស្ស 2ពាន់នាក់ដំបូងនឹងរើមករស់នៅក្នុងទីក្រុងឆ្លាតវៃនេះនៅចុងឆ្នាំ 2024 តាមរយៈគម្រោងសិក្សាស្រាវជ្រាវមួយដែលមានតម្លៃជិត 10ពាន់លានដុល្លារអាម៉េរិក ដើម្បីស្វែងយល់អំពីរូបមន្តក្នុងឥរិយាបថនៃការបើកបររថយន្ត និងអ្នកថ្មើរជើង។

នៅក្នុងទីក្រុងឆ្លាតវៃ ពលរដ្ឋទាំងឡាយនឹងរស់នៅក្នុងផ្ទះដែលដំណើរការដោយអ៊ីដ្រូសែនស្ទើរតែទាំងស្រុង ធ្វើឱ្យទីក្រុងនេះមានភាពស្រស់ស្រាយខ្លាំង។ គ្រប់ផ្ទះសុទ្ធតែមានផ្ទាំងសូឡានៅលើដំបូល រួមនឹងបច្ចេកវិទ្យាបញ្ញាសិប្បនិម្មិតតាមដានសុខភាពអ្នកនៅខាងក្នុង។

យោងតាមប្រធានក្រុមហ៊ុនតូយ៉ូតា Akio Toyoda រាល់មធ្យោបាយធ្វើដំណើរ និងផ្ទះ សុទ្ធតែត្រូវបានតភ្ជាប់តាមរយៈប្រព័ន្ធទិន្នន័យ និងសេនស៊ើរ។ នៅតាមផ្ទះដែលត្រូវបានសង់ពីឈើ នឹងមានរ៉ូបូតជួយធ្វើកិច្ចការប្រចាំថ្ងៃ ជួយឱ្យម្ចាស់ផ្ទះមានភាពឯករាជ្យជាងមុន។

ក្រុមហ៊ុនតូយ៉ូតាឱ្យដឹងថា ការកសាងទីក្រុងពេញលេញមួយ បើទោះទោះក្នុងទ្រង់ទ្រាយតូចក៏ពិតមែន ប៉ុន្តែវាគឺជាឱកាសពិសេសដើម្បីអភិវឌ្ឍបច្ចេកវិទ្យាថ្មី។

ក្រុមមនុស្សដែលនឹងមករស់នៅក្នុងទីក្រុង Woven City រួមមាន ចាប់ពីក្រុមគ្រួសារ គូស្វាមីភរិយាចូលនិវត្សរ៍ អ្នកលក់រាយ រហូតដល់អ្នកវិទ្យាសាស្ត្រ។

April 24, 2024

Ford Ranger ជាប់ជាជម្រើសរថយន្ត Pick-Up ដែលទទួលបានចំណាត់ថ្នាក់លេខ១ ប្រចាំឆ្នាំ២០២៣!

រថយន្ត Next-Generation Ford Ranger បានទទួលការផ្លាស់ប្តូររូបរាងថ្មីទាំងស្រុង និងរួមបញ្ចូលនូវបច្ចេកវិទ្យាចុងក្រោយដ៏ទំនើប និងឈានមុខគេរបស់ Ford ។មិនតែប៉ុណ្ណោះ រថយន្ត Next-Generation Ford Ranger ក៏មានជម្រើសជាច្រើនដូចជា Ford Ranger XL, Ford Ranger XLT, Ford Ranger Wildtrak, និងកំពូលរថយន្តFord Ranger Raptor សម្រាប់អតិថិជនជ្រើសរើស ដែលសមស្របទៅនឹងតម្រូវការរបស់អតិថិជនទាំងអស់ ដែលមានគោលបំណងចង់បានរថយន្ត Pick-UP ដែលរឹងមាំ មានផាសុកភាព និងសន្សំសំចៃខ្ពស់។ ដោយសារតែកត្តាទាំងនេះ ទើបនាំអោយរថយន្ត Next-Generation Ford Ranger ក្លាយជារថយន្ត Pick-Up លក់ដាច់បំផុត ប្រចាំឆ្នាំ២០២៣ នៅក្នុងទីផ្សារប្រទេសអូស្រ្តាលី ដោយយោងទៅតាមអត្រាការលក់ប្រចាំឆ្នាំរបស់ទីផ្សាររថយន្ត Pick-Up ទាំងមូល កាលពីថ្ងៃទី០៤ ខែមករា ឆ្នាំ២០២៤។

ចំណែកឯនៅប្រទេសកម្ពុជាវិញ រថយន្ត Next Generation Ford Ranger គឺជារថយន្តដែលជាប់ចំណាត់ថ្នាក់លេខ១ រយៈពេល ៥ ឆ្នាំជាប់គ្នាចាប់តាំងពីឆ្នាំ ២០១៩ មក រហូតមកដល់បច្ចុប្បន្ន គឺនៅតែជារថយន្តដែលកំពុងពេញនិយមបំផុត ដោយសារមានការផ្តល់នូវទំនុកចិត្តដល់អតិថិជន និងបច្ចេកវិទ្យាទំនើបលើសគេនៅក្នុងទីផ្សារព្រះរាជាណាចក្រកម្ពុជា។ លើសពីនេះទៅទៀត រថយន្ត Next Generation Ford Ranger ក៏បានគ្របដណ្តប់ទីផ្សាររថយន្ត Pick-Up ជាច្រើនប្រទេសនៅជុំវិញពិភពលោក ជាពិសេសទីផ្សារព្រះរាជាណាចក្រកម្ពុជា។ នេះក៏ដោយសារតែការគាំទ្រពីអតិថិជន និងទំនុកចិត្តទៅលើសមត្ថភាព និងប្រព័ន្ធសុវត្ថិភាពដ៏ទំនើបរបស់រថយន្ត ដោយហេតុនេះហើយទើបធ្វើអោយរថយន្ត Next Generation Ford Ranger ទទួលបាននូវការផ្តល់ចំណាត់ថ្នាក់ផ្កាយ៥ ពីកម្មវិធីវាយតំលៃរថយន្តថ្មីរបស់អូស្រ្តាលី និងនូវែលសេឡង់ (Australasian New Car Assessment Programme) ដែលក្រោមការរចនានៃគំនិតឆ្នៃប្រឌិត «Built Ford Tough» របស់សហរដ្ឋអាមេរិច ដើម្បីផ្តល់នូវទំនុកចិត្តដល់អតិថិជនប្រទេសអូស្រ្តាលី ក៏ដូចជាអតិថិជនជុំវិញពិភពលោកផងដែរ។

សម្រាប់ការទំនាក់ទំនងផ្នែកលក់ និង បើកបរសាកល្បងរថយន្ត Next Generation Ford Ranger សូមទំនាក់ទំនងទៅកាន់លេខទូរស័ព្ទ 078 333 748 និង 016 333 785។

ចង់ជ្រាបច្បាស់ ពីមូលហេតុដែលធ្វើអោយរថយន្ត Ford Ranger ទទួលបានការគាំទ្រ និងពេញនិយមនៅទីផ្សារប្រទេសកម្ពុជា សូមទស្សនាវីឌីអូនេះទាំងអស់គ្នា៖

April 2, 2024

ក្រុមហ៊ុនបច្ចេកវិទ្យាថាមពលមួយរបស់អូស្ត្រាលី កំពុងស្វែងរកឱកាសវិនិយោគនៅកម្ពុជា

(អូស្ត្រាលី) – នាថ្ងៃទី 2 ខែមីនានេះ ប្រមុខរាជរដ្ឋាភិបាលកម្ពុជា បានអនុញ្ញាតឱ្យ លោក Mario Vecchio នាយកប្រតិបត្តិ និងជាប្រធានក្រុមហ៊ុន FreshStart Energy ចូលជួបសម្តែងការគួរសម និងពិភាក្សាការងារ ក្នុងឱកាសចូលរួមកិច្ចប្រជុំកំពូលពិសេស អាស៊ាន-អូស្រ្តាលី នៅទីក្រុងម៉ែលប៊ន ប្រទេសអូស្ត្រាលី។

យោងតាមក្រសួងព័ត៌មាន ក្នុងជំនួបនេះ លោក Mario Vecchio បានជម្រាបជូន សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា អំពីវឌ្ឍនភាពនៃអាជីវកមុ្មរបស់ក្រុមហ៊ុន FreshStart Energy ដែលជាបុត្រសម្ព័ន្ធរបស់ក្រុមហ៊ុន FreshStart កំពុងមានប្រតិបត្តិការនៅប្រទេសអូស្រ្តាលី និងប្រទេសមួយលើពិភពលោក។ ក្នុងប្រទេស អូស្ត្រាលី ក្រុមហ៊ុនរបស់លោក បានប្រើប្រាស់បច្ចេកវិទ្យាទំនើបក្នុងការគ្រប់គ្រងការប្រើប្រាស់ថាមពលអគ្គិសនីនៅតាមសាលារៀន មន្ទីរពេទ្យ និង ស្ថានីយប្រេងឥន្ធនៈជាដើម។

នាយកប្រតិបត្តិរបស់ FreshStart Energy បានបន្ថែមទៀតថា ក្រុមហ៊ុនអភិវឌ្ឍបច្ចេកវិទ្យាទំនើបៗ សម្រាប់ការប្រើប្រាស់ថាមពលអគ្គីសនី ប្រកបដោយប្រសិទ្ធភាព គុណភាព និងសន្សំសំចៃខ្ពស់។

លោកនាយកប្រតិបត្តិ បានបង្ហាញបំណងវិនិយោគនៅកម្ពុជាដោយការនាំយកបច្ចេកវិទ្យាទំនើបនៃការគ្រប់គ្រងការប្រើប្រាស់ថាមពលអគ្គិសនី។

ជាការឆ្លើយតប ប្រមុខរាជរដ្ឋាភិបាលកម្ពុជា បានសម្តែងនូវការស្វាគមន៍ និងរីករាយដែលបានជួបពិភាក្សាការងារជាមួយលោកនាយកប្រតិបត្តិ និងអរគុណចំពោះក្រុមហ៊ុន FreshStart Energy ដែលបានបង្ហាញពីបំណងក្នុងការបណ្តាក់ទុនវិនិយោគនៅកម្ពុជា និងលើកទឹកចិត្តដល់ក្រុមហ៊ុននេះ នៅក្នុងការបណ្ដាក់ទុននៅកម្ពុជា៕

March 2, 2024

ក្រុមហ៊ុន Kawasaki បង្ហាញម៉ូតូអគ្គិសនីទំនើបមួយគូ

Kawasaki Ninja E-1 និង Z E-1 2024 សុទ្ធតែត្រូវបានបំពាក់ម៉ូទ័រអគ្គិសនីប្រភេទសន្សំសំចៃថាមពល និងមានអានុភាពខ្លាំងក្លា ជួយឱ្យយានជំនិះឆ្លើយតបបានលឿន ក៏ដូចជាមានភាពបត់បែបខ្ពស់នៅក្នុងការធ្វើដំណើរក្នុងទីក្រុង។

ការបញ្ចូលថាមពលថ្មក៏មានភាពងាយស្រួលជាងពេលណាទាំងអស់ ក្នុងនោះការសាកថ្ម និងការដោះថ្មពីម៉ូតូ ក៏ស៊ីពេលតិច។ ដោយមានមុខងារហ្វ្រាំងបង្កើតថាមពលឆ្លាតវៃ នៅពេលបន្ថយល្បឿនម្ដងៗគឺសុទ្ធតែជាឱកាសសម្រាប់ការបង្កើតថាមពលសម្រាប់ថ្ម ជួយបង្កើនរយៈចម្ងាយនៃការធ្វើដំណើរ និងសន្សំសំចៃថាមពល។

ម៉ូតូអគ្គិសនី Kawasaki Ninja E-1 និង Z E-1 2024 ក៏សុទ្ធតែបំពាក់អេក្រង់ TFT 4.3 អ៊ិញ និងមាន Bluetooth ជួយឱ្យម្ចាស់ និងម៉ូតូភ្ជាប់ទំនាក់ទំនងនឹងគ្នា ដើម្បីប្រើប្រាស់បណ្ដាមុខងារទំនើបនៅលើយានជំនិះនេះ។

Kawasaki Ninja E-1 និង Z E-1 2024 ត្រូវបានបង្ហើបឱ្យដឹងថា មានតម្លៃប្រកបដោយភាពប្រកួតប្រជែងខ្ពស់ បើទោះមិនទាន់ឱ្យដឹងតួលេខច្បាស់លាស់៕

March 2, 2024

ក្រុមហ៊ុនអាកាសចរណ៍ថៃ ទិញយន្តហោះ 45 គ្រឿងពី Boeing

អគ្គនាយកប្រតិបត្តិរបស់ក្រុមហ៊ុន Thai Airways ឱ្យដឹងថា បណ្ដាយន្តហោះ Dreamliner ដែលបានបញ្ជាទិញពី Boeing នឹងត្រូវបានបំពាក់ម៉ាស៊ីនសន្សំសំច័យឥន្ធនៈ ដើម្បីជួយកាត់បន្ថយការបំភាយឧស្ម័នកាបូន។

ក្រុមហ៊ុនផលិតយន្តហោះ Boeing នាថ្ងៃទី 20 កុម្ភៈនេះ បានប្រកាសថា ក្រុមហ៊ុនអាកាសចរណ៍ថៃ Thai Airways បានបញ្ជាទិញយន្តហោះ Dreamliner ចំនួន 45 គ្រឿង ដែលនេះគឺជាការលក់ដ៏ធំលើកទីមួយរបស់ក្រុមហ៊ុនអាម៉េរិកនៅក្នុងពិព័រណ៍អាកាសចរណ៍សិង្ហបុរី។

ប្រកាសរបស់ Boeing ឱ្យដឹងថា Thai Airways បានជ្រើសយកយន្តហោះ 787-9 ដើម្បីគាំទ្រដល់យុទ្ធសាស្ត្រយូរអង្វែងរបស់ក្រុមហ៊ុននេះ នៅក្នុងការប្ដូរផ្លាស់ថ្មី និងបង្កើនក្រុមហោះហើរសម្រាប់ប្រភេទយន្តហោះសន្សំសំច័យឥន្ធនៈ ក៏ដូចជាការពង្រីកជើងហោះហើរថ្មីរបស់ខ្លួន។

អគ្គនាយកប្រតិបត្តិរបស់ក្រុមហ៊ុន Thai Airways ឱ្យដឹងថា បណ្ដាយន្តហោះ Dreamliner ដែលបានបញ្ជាទិញពី Boeing នឹងត្រូវបានបំពាក់ម៉ាស៊ីនសន្សំសំច័យឥន្ធនៈ ដើម្បីជួយកាត់បន្ថយការបំភាយឧស្ម័នកាបូន។ យោងតាម Boeing យន្តហោះ Dreamliner ជួយកាត់បន្ថយការប្រើប្រាស់ឥន្ធនៈ និងការបំភាយឧស្ម័នពុលបានរហូតដល់ 25% បើធៀបនឹងបណ្ដាយន្តហោះដែលជំនួសដោយ Dreamliner។

តម្លៃនៃការជួញដូរនេះមិនទាន់ត្រូវបានបង្ហើបឱ្យដឹងនៅឡើយ ប៉ុន្តែបើយោងតាមតម្លៃយន្តហោះខាងលើដែលត្រូវបានប្រកាស ការទិញដូរនេះអាចមានតម្លៃសរុបឡើងដល់ 13.16 ពាន់លានដុល្លារអាម៉េរិក៕

February 21, 2024

បច្ចេកវិទ្យាថ្មីមួយនេះត្រូវបានរំពឹងថា នឹងរួមចំណែកកាត់បន្ថយការឡើងកម្ដៅផែនដី

អ្នកវិទ្យាសាស្ត្រចិន បានអភិវឌ្ឍបច្ចេកវិទ្យាថ្មីមួយដែលជួយផលិតជីវឥន្ធនៈដែលមានបរិមាណជីវម៉ាស (បាយអូម៉ាស – Biomass) ក្នុងកម្រិតខ្ពស់ជាងមុន អាចលើសពី 40% ដែលខ្ពស់ជាងឆ្ងាយបើធៀបនឹងបរិមាណមធ្យមនៅទូទាំងសកលលោកនាបច្ចុប្បន្ន ដែលមានមិនដល់ 10%។

សាស្ត្រាចារ្យ Shen Jian មកពីមហាវិទ្យាល័យគីមីវិទ្យា និងវិទ្យាសាស្ត្រវត្ថុធាតុ នៃសាកលវិទ្យាល័យគរុកោសល្យណានជីង រួមនឹងសហការី បានអភិវឌ្ឍវិធីសាស្ត្រផលិត ដោយប្រើប្រាស់ជាតិខ្លាញ់ជីវសាស្ត្រ (triglycerides) និងសមាសធាតុនានារបស់ប្រេងឆៅដែលបានចម្រាញ់ ដើម្បីផលិតជីវឥន្ធនៈសម្រាប់រថយន្ត ដោយមិនត្រូវការដំណើរការបំប្លែង Este។

យោងតាមក្រុមអ្នកស្រាវជ្រាវខាងលើ ប្រេងម៉ាស៊ូតជីវសាស្ត្រដែលមានបរិមាណជីវម៉ាសកាន់តែខ្ពស់ គឺកាន់តែមានប្រសិទ្ធភាពនៅក្នុងការសន្សំសំច័យថាមពល និងកាត់បន្ថយការបំភាយឧស្ម័នកាបូន។

សាស្ត្រាចារ្យ Shen ឱ្យដឹងថា តាមរយៈការប្រើប្រាស់ខ្លាញ់ជីវសាស្ត្រជំនួសប្រេងមួយផ្នែក បច្ចេកវិទ្យានេះជួយបង្កើតឥន្ធនៈជាប្រេងម៉ាស៊ូតជីវសាស្ត្រដែលល្អជាងមុនសម្រាប់បរិស្ថាន និងបន្ទាន់សម័យបណ្ដាស្ដង់ដាស្ដីពីការបំភាយឧស្ម័ន ឆ្ពោះទៅជិតគោលដៅបង្កើតតុល្យភាពកាបូនទូទាំងសកលលោក។

លទ្ធផលស្រាវជ្រាវនៃក្រុមរបស់សាស្ត្រាចារ្យ Shen ដែលត្រូវបានត្រួតពិនិត្យដោយអាជ្ញាធរចិន បានបង្ហាញថា ឥន្ធនៈនេះឆ្លើយតបនឹងបទដ្ឋានជាតិស្ដីពីប្រេងម៉ាស៊ូតជីវសាស្ត្រសម្រាប់រថយន្ត និងលំនឹងផ្នែកអុកស៊ីសែន ទប់ទល់នឹងការសឹករេចរឹល និងការពារបរិស្ថានបានយ៉ាងប្រសើរ៕

January 4, 2024

រថភ្លើងដឹកជញ្ជូន Hyperloop ល្បឿនជាង 1,200 គីឡូម៉ែត្រ/ម៉ោង

(សហរដ្ឋអាម៉េរិក) – ប្រព័ន្ធ Hyperloop Express Freight អាចដឹកទំនិញដោយស្វ័យប្រវត្តក្នុងល្បឿន 1,223 គីឡូម៉ែត្រក្នុងមួយម៉ោង និងលើកដាក់ទំនិញក្នុងពេលតែមួយ។

ក្រុមហ៊ុន Hyperloop Transportation Technologies (HyperloopTT) កំពុងឆ្ពោះទៅរកការអភិវឌ្ឍប្រព័ន្ធទូរថភ្លើងល្បឿនលឿនដែលស្ទើរតែមិនមានកម្លាំងកកិត អាចជាបដិវត្តន៍ក្នុងវិស័យដឹកជញ្ជូន។ ប្រព័ន្ធថ្មីបំផុតដែលមានឈ្មោះថា Express Freight ប្រើប្រាស់បំពង់ផ្លូវទទេ ទូរថភ្លើងអណ្ដែត និងទ្វារអគ្គិសនីជាដើមដោយស្វ័យប្រវត្តទាំងស្រុង ដើម្បីលើកដាក់ទំនិញដំណាលគ្នានៅពេលចេញដំណើរ។ HyperloopTT ឱ្យដឹងថា ប្រព័ន្ធនេះនឹងអាចដឹកជញ្ជូនបានលឿន សន្សំសំចៃប្រាក់ និងមានស្ថិរភាពជាងបើធៀបនឹងការដឹកទំនិញតាមយន្តហោះ ឬរថយន្តដឹកទំនិញ។

ប្រព័ន្ធនេះត្រូវបាន HyperloopTT សហការអភិវឌ្ឍជាមួយនឹងក្រុមហ៊ុន Tangerine របស់ប្រទេសអង់គ្លេស។

ផែនការរបស់ HyperloopTT គឺការបំពាក់ប្រព័ន្ធ Express Freight ខាងក្នុងហេដ្ឋារចនាសម្ព័ន្ធដឹកអ្នកដំណើរ។ ប្រព័ន្ធដឹកអ្នកដំណើរគឺជាទូដែលមានរូបរាងដូចដងខ្លួនយន្តហោះ ធ្វើដំណើរក្នុងល្បឿន 1,223 គីឡូម៉ែត្រ/ម៉ោង តាមរយៈប្រព័ន្ធម៉ាញេទិចដំណើរការនៅក្នុងប្រព័ន្ធបំពង់សម្ពាធទាប។

October 25, 2023

យានស្រាវជ្រាវរបស់ឥណ្ឌាទើបតែរកឃើញធនធានដ៏មានតម្លៃលើឋានព្រះចន្ទ

យានអវកាសឥណ្ឌា ដែលទើបតែបានចុះចតលើឋានព្រះចន្ទកាលពីមួយខែមុន ប៉ុន្តែបានរួមចំណែកធំធេងនៅក្នុងវិស័យវិទ្យាសាស្ត្រ។

ក្រោយពីបេសកកម្ម Chadrayaan-3 របស់ប្រទេសឥណ្ឌា ទទួលបានជោគជ័យក្នុងការចុះចត ក្រុមអ្នកវិទ្យាសាស្ត្រប្រទេសនេះកំពុងតែមមាញឹកក្នុងការវិភាគទិន្នន័យដែលយានចុះចត Vikram និងយានស្រាវជ្រាវ Pragyan បានបញ្ជូនមកកាន់ផែនដីបន្ទាប់ពីធ្វើការលើឋានព្រះចន្ទបានមួយថ្ងៃ (មួយថ្ងៃព្រះចន្ទស្មើនឹង 14 ថ្ងៃលើផែនដី)។

មកដល់ពេលនេះ Pragyan បានរកឃើញអ្វីៗជាច្រើនដែលមានតម្លៃ ក្នុងនោះក៏មានដែក ទីតានីញ៉ូម អាលុយមីញ៉ូម និងពិសេសគឺ ស្ពាន់ធ័រ រួមនឹងកំហាប់របស់វា នៅក្នុងដីរបស់ព្រះចន្ទ។

មុននោះ អ្នកវិទ្យាសាស្ត្របានដឹងថា ស្ពាន់ព័រមាននៅក្នុងដី និងថ្មរបស់ព្រះចន្ទ ប៉ុន្តែមានកំហាប់ទាប។ យានរបស់ឥណ្ឌារកឃើញថា ស្ពាន់ធ័រមាននៅក្នុងដីព្រះចន្ទច្រើនជាងការរំពឹងទៅទៀត។

ស្ពាន់ធ័រលើឋានព្រះចន្ទគឺជាប្រភពធនធានដ៏មានតម្លៃចំពោះបេសកកម្មអវកាសរយៈពេលយូរ។ ស្ថាប័នអវកាសជាច្រើនកំពុងគិតដល់ការសាងសង់មូលដ្ឋានរបស់មនុស្សនៅលើឋានព្រះចន្ទ ក្នុងនោះក៏ត្រូវការស្ពាន់ធ័រជាចាំបាច់ផងដែរ។ ដោយសារមានស្ពាន់ធ័រលើឋានព្រះចន្ទស្រាប់ អ្នកអវកាសមិនបាច់វិលមកកាន់ផែនដីដើម្បីដឹកជញ្ជូនវត្ថុធាតុឡើងទៅកាន់ឋានព្រះចន្ទ។

អ្នកអវកាសអាចប្រើប្រាស់ស្ពាន់ធ័រដើម្បីផលិតផ្ទាំងសូឡា និងថ្មផ្ទុកថាមពលអគ្គិសនីដែលប្រើប្រាស់ស្ពាន់ធ័រ និងផលិតជាបេតុងសម្រាប់ការសាងសង់ជាដើម។

បេតុងស្ពាន់ធ័រល្អជាងបេតុងធម្មតាដែលពេញនិយមលើផែនដី។ អ្នកវិទ្យាសាស្ត្របកស្រាយថា បេតុងស្ពាន់ធ័រនឹងរឹងមកវិញ ហើយមាំខ្លាំង ដោយចំណាយពេលតែប៉ុន្មានម៉ោងប៉ុណ្ណោះក្រោយការប្រើប្រាស់ មិនមែនច្រើនសប្ដាហ៍ និងមានសមត្ថភាពទប់ទល់នឹងការសឹករេចរិលខ្ពស់ខ្លាំងជាងឆ្ងាយបើធៀបនឹងបេតុងធម្មតា។

ជាងនេះ ស្ពាន់ធ័រក៏មិនត្រូវការទឹកដូចបេតុងធម្មតា ដូច្នេះអ្នកអវកាសអាចសន្សំសំចៃទឹកដ៏មានតម្លៃទុកសម្រាប់បរិភោគ បង្កើតអុកស៊ីសែន និងផលិតជាឥន្ធនៈសម្រាប់រ៉ុក្កែតជាដើម៕

យានចុះចត Vikram និងយានស្រាវជ្រាវ Pragyan

September 27, 2023

Tag: សន្សំ