វ៉ាក់សាំង

អាម៉េរិកអនុម័តឱ្យប្រើប្រាស់វ៉ាក់សាំងដំបូងគេលើពិភពលោកដែលទប់ស្កាត់ជំងឺគ្រុនឈីក

រដ្ឋបាលចំណីអាហារ និងឪសថអាម៉េរិក (FDA) កាលពីថ្ងៃទី 09 វិច្ឆិកា ឆ្នាំ 2023 បានអនុម័តឱ្យប្រើប្រាស់វ៉ាក់សាំងដំបូងគេលើពិភពលោកដែលទប់ស្កាត់ការឆ្លងជំងឺគ្រុនឈីកពីមូសដែលមានផ្ទុកវីរុស Chikungunya។

សារព័ត៌មាន AFP ផ្សាយថា នៅក្នុងរបាយការណ៍មួយ FDA ឱ្យដឹងថា វ៉ាក់សាំងទប់ស្កាត់ជំងឺដែលកើតឡើងដោយសារវីរុស Chikungunya ត្រូវបានអនុម័តឱ្យប្រើប្រាស់សម្រាប់មនុស្សដែលមានអាយុចាប់ពី 18 ឆ្នាំឡើងទៅ ដែលប្រឈមនឹងហានិភ័យឆ្លងខ្ពស់ជាងគេ។ វ៉ាក់សាំងនេះត្រូវបានអភិវឌ្ឍដោយក្រុមហ៊ុន Valneva របស់អឺរ៉ុប ហើយថា នឹងត្រូវបានដាក់លក់ក្នុងទីផ្សារក្រោមឈ្មោះថា Ixchiq។

ការអនុម័តរបស់ FDA នេះ ត្រូវបានរំពឹងថា នឹងបង្កើនល្បឿននៃការដាក់ពង្រាយវ៉ាក់សាំង Ixchiq នៅតាមបណ្ដាប្រទេសដែលសម្បូរវីរុស Chikungunya ជាងគេ មានជាអាទិ៍ ទ្វីបអាហ្វ្រិក តំបន់អាស៊ីអាគ្នេយ៍ និងតំបន់មួយចំនួននៅទ្វីបអាម៉េរិកជាដើម។

ជំងឺគ្រុនឈីកបង្កឡើងដោយវីរុស Chikungunya ឬហៅថា វីរុសឈីក និងបណ្ដាលមកពីមូសខ្លាញី Aedes aegypti (the yellow fever mosquito) ខាំ ជាពិសេសនៅពេលថ្ងៃ ហើយអាចកើតមានចំពោះមនុស្សគ្រប់វ័យ និងឆ្លងពីមនុស្សម្នាក់ទៅមនុស្សម្នាក់ផ្សេងទៀត។

មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្រ្ត និងបាណកសាស្រ្ត នៃក្រសួងសុខាភិបាលកម្ពុជា បានឱ្យដឹងថា ជំងឺគ្រុនឈីកមានរោគសញ្ញាសំខាន់ៗចំនួនបី រួមមាន គ្រុនក្តៅពី 3 ទៅ 4 ថ្ងៃ, ឈឺសន្លាក់ឆ្អឹង និងមានស្នាមកន្ទួល ឬក្រហមលើស្បែកដូចកើតស្អូច ឬកញ្ជ្រឹល។ ជំងឺគ្រុនឈីកមិនបណ្តាលឱ្យអ្នកជំងឺស្លាប់ លើកលែងតែវាកើតរួមគ្នាជាមួយជំងឺផ្សេងៗ ដូចជាជំងឺគ្រុនឈាម គ្រុនចាញ់ ឬជំងឺរលាកស្រោមខួរជាដើម។

យោងតាមអង្គការសុខភាពពិភពលោក (WHO) រាប់ចាប់តាំងពីត្រូវបានរកឃើញលើកដំបូងនៅប្រទេសតង់ហ្សានីកាលពីឆ្នាំ 1952 វីរុសឈីកនេះបានឆ្លងរាលដាលដល់ប្រទេស និងដែនដីជាង 110 រួចហើយ។

AFP ឱ្យដឹងថា អ្នកជំនាញផ្នែកសុខាភិបាលសាធារណៈបានសម្ដែងការព្រួយបារម្ភថា វីរុស Chikungunya អាចបង្កឱ្យមានវិបត្តិសុខភាពសកលនៅក្នុងពេលអនាគត នៅពេលការប្រែប្រួលអាកាសធាតុជំរុញឱ្យមូសចម្លងវីរុសនេះទៅកាន់តំបន់ថ្មីៗនៅទូទាំងពិភពលោក៕

November 14, 2023

ប្រេស៊ីលអភិវឌ្ឍ «វ៉ាក់សាំងព្យាបាលជំងឺញៀនកូកាអ៊ីន»

ក្រុមអ្នកវិទ្យាសាស្ត្រនៅប្រទេសប្រេស៊ីលប្រកាសថា កំពុងអភិវឌ្ឍវិធីសាស្ត្រថ្មីដែលទំនើប ដើម្បីព្យាបាលអាការញៀនកូកាអ៊ីន និងម៉ាទឹកកក ដោយយោងទៅតាមបច្ចេកវិទ្យាវ៉ាក់សាំង។

យោងតាម AFP ចុះផ្សាយកាលពីថ្ងៃទី 26 តុលា 2023 វ៉ាក់សាំងឈ្មោះ Calixcoca ដែលកំពុងត្រូវបានពិសោធនេះ អាចដាស់ប្រព័ន្ធការពាររាងកាយឱ្យទប់ស្កាត់សារធាតុកូកាអ៊ីន និងម៉ាទឹកកកដែលនឹងចូលទៅកាន់ខួរក្បាល ជួយឱ្យអ្នកប្រើប្រាស់បំផ្លាញវដ្ដនៃអាការញៀន។ នេះមានន័យថា ពួកគេនឹងលែងមានអារម្មណ៍ត្រេកត្រអាលនៅពេលប្រើប្រាស់គ្រឿងញៀន។

អ្នកជំនាញនៅសាកលវិទ្យាល័យរដ្ឋ Minas Gerais បានឱ្យដឹងថា បើសិនវិធីសាស្ត្រព្យាបាលនេះទទួលបានការអនុញ្ញាត នោះវានឹងក្លាយជាវ៉ាក់សាំងដំបូងគេដែលព្យាបាលអាការញៀនកូកាអ៊ីន។

បច្ចុប្បន្ន វ៉ាក់សាំងនេះជិតចូលដល់ដំណាក់កាលពិសោធចុងក្រោយនៅលើមនុស្ស។ អ្នកជំនាញឱ្យដឹងថា វ៉ាក់សាំង Calixcoca អាចកំណត់ឡើងវិញនូវការព្យាបាលអាការញៀននឹងគ្រឿងញៀន។

គម្រោងអភិវឌ្ឍវ៉ាក់សាំងនេះទទួលបានពានរង្វាន់តម្លៃជាងកន្លះលានដុល្លារអាម៉េរិកពី Euro Health Innovation ដែលឧបត្ថម្ភដោយក្រុមហ៊ុនផលិតឱសថ Eurofarma៕

October 27, 2023

អាយុរបស់មនុស្សនឹងកើនឡើងដល់ 120 ដោយសារតែបច្ចេកវិទ្យា និងការយល់ដឹង

(ស៊ុយអែត) – អាយុរបស់មនុស្សគ្រោងនឹងកើនឡើងដល់ 120 ក្នុងរយៈពេលប៉ុន្មានទសវត្សរ៍ខាងមុខ ដោយសារតែបច្ចេកវិទ្យា និងចំណេះដឹងដែលបានពីវិបត្តិសុខភាពកូវីដ-19។ល។

បណ្ឌិត Ignat Kulkov នៅសាកលវិទ្យាល័យ Malardalen (MDU) ឱ្យដឹងថា អាយុរបស់មនុស្សអាចឡើងដល់ពី 100 ទៅ 120 នៅក្នុងអំឡុងឆ្នាំ 2070 យ៉ាងហោចណាស់នៅក្នុងបណ្ដាប្រទេសអភិវឌ្ឍ។ នេះគឺជាលទ្ធផលនៃការសិក្សាស្រាវជ្រាវរបស់លោក Kulkov និងសហការីនៅប្រទេសហ្វាំងឡង់ បារាំង និងអង់គ្លេស ហើយត្រូវបានប្រកាសលើទស្សនាវដ្ដីវិទ្យាសាស្ត្រ Futures កាលពីថ្ងៃទី 30 កក្កដា 2023។

យោងតាមបណ្ឌិត Kulkov ពីមួយថ្ងៃទៅមួយថ្ងៃ មានមនុស្សកាន់តែច្រើនដែលពាក់ឧបករណ៍តាមដានសុខភាព។ ឧបករណ៍ទាំងនេះតែងត្រូវបានភ្ជាប់ជាមួយនឹងមន្ទីរពេទ្យ ជួយឱ្យវេជ្ជបណ្ឌិតអាចធ្វើរោគវិនិច្ឆ័យ និងណែនាំប្រកបដោយភាពសុក្រឹតសម្រាប់អ្នកប្រើប្រាស់ និងអ្នកជំងឺ ដែលនាំឱ្យពួកគេកែលំអការរស់នៅ ប្ដូរទម្លាប់មិនល្អសម្រាប់សុខភាពតាំងពីក្មេង ដូច្នេះពួកគេនឹងមានអាយុវែងជាងធម្មតា។

ក្រៅពីនេះ ការរីកចម្រើនរបស់វិស័យដទៃក៏អាចជួយឱ្យមនុស្សរស់បានយូរជាងមុន។ ឧទាហរណ៍ដូចជា វិបត្តិសុខភាពសកលកូវីដ-19 បានជួយឱ្យមនុស្សជាតិយល់ដឹងបន្ថែមអំពីការតាមដានវីរុសប្រកបដោយប្រសិទ្ធភាព។ បច្ចេកវិទ្យា រួមនឹងវិធីសាស្ត្រព្យាបាលបែបទំនើបនានាក៏ត្រូវបានបង្កើតឡើងក្នុងសម័យកូវីដផងដែរ។

តាមជាក់ស្ដែង អាយុរបស់មនុស្សបាន និងកំពុងកើនឡើងនៅក្នុងរយៈពេល 200 ឆ្នាំកន្លង។ កាលពីខែវិច្ឆិកា 2022 មូលនិធិប្រជាជននៃអង្គការសហប្រជាជាតិ បានព្យាករថា អាយុជាមធ្យមរបស់មនុស្សនៅទូទាំងសកលលោកកើតដល់ 77.2 ឆ្នាំនៅឆ្នាំ 2050 ដោយសារតែការរីកចម្រើននៃវិស័យវេជ្ជសាស្ត្រ ដែលក្នុងនោះមានទាំងវ៉ាក់សាំង និងថ្នាំរម្ងាប់មេរោគ ខណៈដែលអនាម័យ ការរស់នៅ ក៏ដូចជាអាហារ និងជីវជាតិក៏ត្រូវបានកែលំអ៕

August 1, 2023

វ៉ាក់សាំង Pfizer 3 ដូស គ្រប់គ្រាន់សម្រាប់ការទប់ទល់នឹង វ៉ារ្យ៉ង់ Delta របស់ COVID-19

ទិន្នន័យថ្មីបានបង្ហាញថា ដូស (ម្ជុល) ទីបី នៃ វ៉ាក់សាំង Pfizer អាចបង្កើនបរិមាណនៃអង្គបដិប្រាណប្រឆាំងវីរុស COVID-19 ប្រភេទ Delta ចាប់ពី 5-11 ដង បើធៀបនឹងការចាក់ម្ជុលទីពីរ។

ទិន្នន័យដែលត្រូវក្រុមហ៊ុន Pfizer បង្ហោះនៅលើអ៊ីនធើណិត កាលពីថ្ងៃទី 28 កក្កដា បង្ហាញថា បរិមាណនៃអង្គបដិប្រាណប្រឆាំងនឹង វីរុស COVID-19 ប្រភេទ Delta នៅលើមនុស្សដែលមានវ័យចាប់ពី 18-55 ឆ្នាំ កើនឡើង 5 ដង ក្រោយពីបានចាក់ដូសទីបី។ ចំណែកនៅលើអ្នកដែលមានវ័យចាប់ពី 65-85 ឆ្នាំ កំណើននៃអង្គបដិប្រាណនេះ ស្មើនឹង 11 ដង។

ក្រុមអ្នកស្រាវជ្រាវរបស់ Pfizer/BioNTech អះអាងថា ការចាក់វ៉ាក់សាំង Pfizer ដូសទីបី ជួយបង្កើនភាពរឹងមាំនៃរបងការពារមនុស្សពី Delta ដែលជាវ៉ារ្យ៉ង់ (វីរូសបំប្លែងខ្លួនថ្មី) របស់ COVID-19 ដែលកំពុងរាតត្បាតតំបន់ជាច្រើនក្នុងពិភពលោក។ ក្រុមស្រាវជ្រាវបន្ថែមថា វ៉ាក់សាំង Pfizer ចំនួន 3 ដូស អាចជួយ «បង្កើនលទ្ធភាពនៃការបង្ក្រាបលើ វ៉ារ្យ៉ង់ Delta បានរហូតដល់ 100 ដង» ធៀបនឹងកាលមិនទាន់បានចាក់វ៉ាក់សាំង។

ក្រៅពីនេះ ទិន្នន័យនៃការពិសោធស្រាវជ្រាវខាងលើ ក៏បានបញ្ជាក់ថា អ្នកដែលបានចាក់វ៉ាក់សាំង Pfizer ចំនួន 3 ដូស មានប្រសិទ្ធភាពក្នុងការទប់ស្កាត់វីរុសប្រភេទដំបូងរបស់ COVID-19 និង វ៉ារ្យ៉ង់ Beta ដែលបង្ហាញខ្លួនដំបូងនៅប្រទេស អាហ្វ្រិកខាងត្បូង ខ្ពស់ជាងច្រើន បើធៀបនឹងអ្នកដែលបានចាក់ពីរដូស។ បច្ចុប្បន្ន ទិន្នន័យនៃការពិសោធនេះ មិនទាន់ត្រូវបានផ្ទៀងផ្ទាត់ជាផ្លូវការនៅឡើយ។

នៅក្នុងបញ្ជីស្ដីពីវ៉ាក់សាំងប្រឆាំង COVID-19 ដែលត្រូវបាន WHO អនុម័ត គេឃើញថា វ៉ាក់សាំងដែលប្រើប្រាស់បច្ចេកវិទ្យា mRNA មានប្រសិទ្ធភាពខ្ពស់ជាងគេ នៅក្នុងការពិសោធលើមនុស្ស ក្នុងនោះ វ៉ាក់សាំង Moderna មានប្រសិទ្ធភាព 94% និង Pfizer 95%។ បើទោះជាមានការលំបាកក្នុងការរក្សាទុក និងការដឹកជញ្ជូន ប៉ុន្តែ វ៉ាក់សាំងទាំង 2 ប្រភេទនេះ ហាក់មានប្រសិទ្ធភាពក្នុងការប្រើប្រាស់ជាក់ស្ដែង ប្រហាក់ប្រហែលនឹងលទ្ធផលនៃការពិសោធ។ ការស្រាវជ្រាវមួយរបស់រដ្ឋាភិបាលអង់គ្លេស កាលពីខែមុន បានបង្ហាញដែរថា វ៉ាក់សាំង Pfizer ចំនួន 2 ដូស អាចកាត់បន្ថយហានិភ័យនៃការចូលពេទ្យរបស់អ្នកវិជ្ជមាននឹង វ៉ារ្យ៉ង់ Delta បានរហូតដល់ 96% ឯណោះ៕

ប្រភព៖ CNN
ប្រែសម្រួល៖ បុត្រា

July 29, 2021

វ៉ាក់សាំង Sinovac របស់ ចិន មានប្រសិទ្ធភាពពិត ដល់កម្រិតណា?

វ៉ាក់សាំងរបស់ក្រុមហ៊ុន ចិន ស៊ីណូវ៉ាក់ (Sinovac) ជួយទប់ស្កាត់ការឆ្លង Covid-19 ការត្រូវចូលពន្យាបាលនៅមន្ទីរពេទ្យ និងអត្រានៃការស្លាប់ ប៉ុន្តែ កម្រិតនៃប្រសិទ្ធភាពរបស់វា ថយចុះទៅតាមពេលវេលា និងខ្សោយ នៅចំពោះមុខ វ៉ារ្យ៉ង់ (វីរុសបំប្លែងខ្លួន) ឈ្មោះ Delta។

វ៉ាក់សាំងរបស់ក្រុមហ៊ុន ចិន Sinovac Biotech គឺជាវ៉ាក់សាំងប្រឆាំង Covid-19 ដែលត្រូវបានប្រើប្រាស់ច្រើនបំផុតក្នុងពិភពលោក ដោយមានជាង 943 លានដូស ត្រូវបានផ្គត់ផ្គង់។ នេះបើតាមសារព័ត៌មាន South China Morning Post។

ទិន្នន័យនៃការចាក់វ៉ាក់សាំងខាងលើ នៅប្រទេស ឈីលី ដែលត្រូវបានចុះផ្សាយលើគេហទំព័រវេជ្ជសាស្ត្រ New England Journal of Medicine កាលពីសប្ដាហ៍មុន បានបង្ហាញថា វ៉ាក់សាំង Sinovac មានប្រសិទ្ធភាព 65.9% ក្នុងការទប់ស្កាត់ការឆ្លងនៃវីរុស Covid-19, 87.5% ក្នុងការទប់ស្កាត់ការចូលពេទ្យ និង 86.3% ក្នុងការទប់ស្កាត់មិនឱ្យអ្នកជំងឺបាត់បង់ជីវិត។

បច្ចុប្បន្ន នៅមានកង្វះខាតច្រើន ទាក់ទិននឹងការសិក្សាស្រាវជ្រាវអំពីប្រសិទ្ធភាពរបស់វ៉ាក់សាំង នៅចំពោះមុខឥទ្ធិពលរបស់ វ៉ារ្យ៉ង់ Delta នៃវីរុស Covid-19។ Feng Zijian អនុប្រធាននៃមជ្ឈមណ្ឌលគ្រប់គ្រង និងបង្ការជំងឺឆ្លងរបស់ ចិន កាលពីខែមិថុនា បានននិយាយថា អង្គបដិប្រាណដែលបង្កើតឡើងដោយសារវ៉ាក់សាំង Covid-19 ចំនួន 2 ប្រភេទរបស់ ចិន មានប្រសិទ្ធភាពតិច នៅចំពោះមុខ វ៉ារ្យ៉ង់ Delta បើធៀបនឹង វ៉ារ្យ៉ង់ ដទៃ ប៉ុន្តែ វ៉ាក់សាំងនេះនៅតែជួយការពារបាន។ លោក Feng Zijian មិនបានបង្ហើបឱ្យដឹងអំពីឈ្មោះរបស់វ៉ាក់សាំងទាំង 2 ខាងលើនេះទេ។

ក្រុមមន្ត្រីសុខាភិបាល កំពុងស្នើឱ្យមានការសិក្សាបន្ថែមអំពីប្រសិទ្ធភាពរបស់វ៉ាក់សាំងខាងលើ នៅចំពោះមុខវីរុសបំប្លែងខ្លួន Delta និងថា តើចាំបាច់ត្រូវចាក់ម្ជុលទីបីដែរ ឬទេ ដើម្បីបង្កើនកម្លាំងការពាររាងកាយ។

ឥណ្ឌូនេស៊ី គឺជាប្រទេសមួយ ក្នុងចំណោមប្រទេសដែលប្រើប្រាស់វ៉ាក់សាំង Sinovac ច្រើនជាងគេ។ ទិន្នន័យរបស់ក្រុមស្រាវជ្រាវឯករាជ្យ LaporCovid-19 បង្ហាញថា បុគ្គលិកសុខាភិបាលរបស់ ឥណ្ឌូនេស៊ី ជាង 130 នាក់ បានស្លាប់ដោយសារ Covid-19 រាប់ចាប់ពីខែមិថុនា ក្នុងនោះមាន 58 នាក់ បានស្លាប់ក្នុងខែកក្កដា។ ក្រុមស្រាវជ្រាវ មិនបានឱ្យដឹងថា មានជនរងគ្រោះប៉ុន្មាននាក់បានទទួលការចាក់វ៉ាក់សាំងរួចរាល់នោះទេ ប៉ុន្តែ មានបុគ្គលិកសុខាភិបាល ឥណ្ឌូនេស៊ី ចំនួនប្រហែល 95% បានទទួលការចាក់វ៉ាក់សាំង។

អ្នកជំនាញផ្នែករោគឆ្លង ជនជាតិ ឥណ្ឌូនេស៊ី Dicky Budiman មកពីសាកលវិទ្យាល័យអូស្ត្រាលី Griffith និយាយថា បុគ្គលិកសុខាភិបាលជាច្រើននាក់ បើទោះបានឆ្លងវីរូស ប៉ុន្តែ នៅតែគេចផុតពីការស្លាប់ និងមានរោគសញ្ញាស្រាល។ «ប្រការនេះនាំឱ្យយើងជឿថា វ៉ាក់សាំង Sinovac មានប្រសិទ្ធភាពក្នុងកម្រិតណាមួយ ក្នុងការប្រឆាំងនឹងវ៉ារ្យ៉ង់ថ្មី។ នេះជាមូលហេតុដែលយើងលើកទឹកចិត្តឱ្យពលរដ្ឋ ទទួលយកការចាក់វ៉ាក់សាំងនេះ» លោក Budiman បញ្ជាក់បន្ថែម។

ករណីដែលបុគ្គលិកសុខាភិបាលបាត់បង់ជីវិតដោយសារ Covid-19 ត្រូវបានលោក Budiman អះអាងថា អាចបណ្ដាលមកពីការចុះថយនៃប្រសិទ្ធភាពរបស់វ៉ាក់សាំង ទៅតាមពេលវេលា និងថមថយឥទ្ធិពល នៅចំពោះមុខវ៉ារ្យ៉ង់ Delta។

នៅឯប្រទេស ទួរគី វិញ ការស្រាវជ្រាវលើបុគ្គលិកសុខាភិបាលចំនួន 1,053 នាក់ បានបង្ហាញថា ក្រោយការចាក់វ៉ាក់សាំង Sinovac រួចរាល់បាន 3 ខែ 23% ក្នុងចំណោមនេះ មានអង្គបដិប្រាណតិចជាងមុន និងក្រោមកម្រិតនៃប្រសិទ្ធភាព។ ក៏ប៉ុន្តែ ក្នុងចំណោមបុគ្គលិកសុខាភិបាលដែលបានចាក់វ៉ាក់សាំង គឺមាន ត្រឹមតែ 2.8% ប៉ុណ្ណោះ ដែលបានឆ្លងវីរុស និងពុំមានអ្នកណាម្នាក់ត្រូវចូលពេទ្យនោះឡើយ ក្រោយការចាក់វ៉ាក់សាំង ចន្លោះពី 1 ដល់ 3 ខែ។

សាស្ត្រាចារ្យមួយរូប មកពីមហាវិទ្យាល័យជីវវេជ្ជសាស្ត្រ នៃសាកលវិទ្យាល័យហុងកុង យល់ថា ប្រសិទ្ធភាពរបស់ Sinovac ប្រាកដជានឹងថយចុះនៅចំពោះមុខវីរុសបំប្លែងខ្លួន Delta ប៉ុន្តែ ថយចុះប៉ុន្មានភាគរយ គេមិនទាន់ដឹងច្បាស់នៅឡើយ។ លោកយល់ថា ត្រូវការកែសម្អប្រសិទ្ធភាព និងសាកល្បងចាក់ម្ជុលទីបី សម្រាប់ក្រុមមនុស្សដែលមានហានិភ័យខ្ពស់ ឬចាក់លាយជាមួយវ៉ាក់សាំងដទៃ។

ចំណែក Yin Weidong ដែលជាប្រធានប្រតិបត្តិរបស់ក្រុមហ៊ុន Sinovac បាននិយាយថា លទ្ធផលនៃការពិសោធលើមនុស្ស បង្ហាញថា អ្នកដែលបានចាក់វ៉ាក់សាំងដូសទីបី បន្ទាប់ពីបានចាក់ដូសទីពីរបានពី 3 ដល់ 6 ខែ មានអង្គបដិប្រាណកើនឡើងច្រើនជាងមុន 10 ដង ដោយប្រើពេលត្រឹមតែ 10 ថ្ងៃ ក្រោយពីបានចាក់៕

ប្រភព៖ SCMP
ប្រែសម្រួល៖ បុត្រា

July 12, 2021

យុទ្ធនាការចាក់វ៉ាក់សាំង Covid-19! កម្ពុជា ចាក់វ៉ាក់សាំងជូនពលរដ្ឋ បានជាង 2.6លាននាក់

គណៈកម្មការចំពោះកិច្ចចាក់វ៉ាក់សាំងទូទាំងប្រទេស បានឱ្យដឹងនាព្រឹកថ្ងៃទី3 ខែមិថុនានេះថា ក្រសួងសុខាភិបាល និងក្រសួងការពារជាតិ បានចាក់វ៉ាក់សាំងបង្ការវីរុសCovid-19 ជូនមន្ត្រីរាជការ ប្រជាពលរដ្ឋ និងកងកម្លាំងប្រដាប់អាវុធ នៅទូទាំងប្រទេស សរុបចំនួន 2,665,822នាក់។

ខាងលើនេះគឺជាតួលេខនៃអ្នកបានទទួលការចាក់វ៉ាក់សាំង ម្ជុល (ដូស) ទីមួយ គិតត្រឹមថ្ងៃទី2 ខែមិថុនា ឆ្នាំ2021។ ចំណែកអ្នកដែលបានទទួលការចាក់វ៉ាក់សាំងម្ជុលទីពីរ មានចំនួន 2,058,122នាក់។

សូមបញ្ជាក់ថា យុទ្ធនាការចាក់វ៉ាក់សាំងបង្ការ Covid-19 នៅ កម្ពុជា ត្រូវបានធ្វើឡើងចាប់ពីថ្ងៃទី10 ខែកុម្ភៈ ឆ្នាំ2021។ ព័ត៌មានបន្ថែម សូមអានតារាងបញ្ជីបូកសរុបការចាក់វ៉ាក់សាំងបង្ការជំងឺCovid-19 ដែលមានដូចខាងក្រោម៖

ប្រភព៖ Pres OCM
ដកស្រង់៖ បុត្រា

June 3, 2021

ថ្មី! វ៉ាក់សាំងCovid-19 ប្រភេទគ្រាប់សម្រាប់លេប ត្រៀមធ្វើការពិសោធលើមនុស្សហើយ!

វ៉ាក់សាំងបង្ការ Covid-19 ដែលត្រូវបានផ្សំឡើងជាប្រភេទគ្រាប់សម្រាប់លេបដែលអាចប្រើប្រាស់នៅតាមផ្ទះ នឹងអាចត្រូវបានធ្វើការពិសោធលើមនុស្សនាពេលដ៏ខ្លីខាងមុខ។

យោងតាមសារព័ត៌មាន RT វ៉ាក់សាំងប្រភេទថ្មីដំបូងគេដែលមានឈ្មោះថា Oravax នេះ ត្រូវបានសហការអភិវឌ្ឍដោយក្រុមហ៊ុន Oramed របស់អាមេរិក-អ៊ីស្រាអែល និងក្រុមហ៊ុនជីវសាស្ត្រ Premas របស់ឥណ្ឌា។ ក្រុមហ៊ុនទាំងពីរនេះបានចាប់ដៃគ្នាបង្កើតក្រុមហ៊ុន Oravax Medical ដើម្បីអភិវឌ្ឍ និងផលិតវ៉ាក់សាំងបង្ការវីរុស Covid-19 ប្រភេទគ្រាប់សម្រាប់លេប ដែលផ្ដល់ភាពងាយស្រួលដល់អ្នកប្រើប្រាស់។

ក្រោយពីបានធ្វើការពិសោធនៅលើសត្វ ក្រុមអ្នកវិទ្យាសាស្ត្ររកឃើញថា វ៉ាក់សាំងប្រភេទគ្រាប់នេះអាចជួយបង្កើតអង្គបដិប្រាណដែលមានប្រសិទ្ធភាពទប់ស្កាត់វីរុស Covid-19។ ចំណុចពិសេស នោះគឺវ៉ាក់សាំង Oravax តែមួយគ្រាប់គត់ សត្វដែលត្រូវធ្វើការពិសោធអាចការពារខ្លួនពីការឆ្លងវីរុស Covid-19។ នេះគឺជាចំណុចខុសប្លែក និងត្រូវបានគេចាត់ទុកថាលេចធ្លោជាងបើធៀបជាមួយនឹងវ៉ាក់សាំងបច្ចុប្បន្នដែលត្រូវការចាក់រហូតដល់ពីរម្ជុល។

លោក Prabuddha Kundu ដែលជាសហស្ថាបនិករបស់ Premas បានថ្លែងនៅចំពោះមុខអ្នកសារព័ត៌មានឥណ្ឌាថា ការលេបវ៉ាក់សាំងនេះនឹង «ដូចទៅនឹងការលេបថ្នាំវីតាមីន» ហើយ «យើងជឿជាក់100% ថា បច្ចេកវិទ្យានេះមានប្រសិទ្ធភាព និងប្រកបដោយក្ដីសង្ឃឹម»។ លោកបន្ថែមថា លទ្ធផលដែលបានមកពីការពិសោធបឋមលើសត្វនឹងត្រូវបានប្រកាសឱ្យដឹងនៅលើទស្សនាវដ្ដីវិទ្យាសាស្ត្រមួយនាពេលឆាប់ៗនេះ។

Oravax ត្រូវបានសហការអភិវឌ្ឍដោយក្រុមហ៊ុន Oramed របស់អាមេរិក-អ៊ីស្រាអែល និងក្រុមហ៊ុនជីវសាស្ត្រ Premas របស់ឥណ្ឌា

ចំណែក Nadav Kidron នាយកប្រតិបត្តិរបស់ Oramed និយាយថា វ៉ាក់សាំងប្រភេទគ្រាប់នេះនឹងបំបាត់បញ្ហានានាដែលកើតឡើងពីរដូវចាក់វ៉ាក់សាំងនៅទូទាំងពិភពលោក។ ជាងនេះ វាក៏នឹងអាចត្រូវបានប្រើប្រាស់នៅតាមផ្ទះយ៉ាងងាយស្រួលផងដែរ។

គេអាចរក្សាទុកវ៉ាក់សាំង Oravax នេះនៅក្នុងសីតុណ្ហភាពរបស់បន្ទប់ក្នុងផ្ទះ និងជួយកាត់បន្ថយបញ្ហារក្សាទុកក្នុងស្ថានភាពត្រជាក់ដែលវ៉ាក់សាំង «បុរាណ» នានាកំពុងជួបប្រទះ។ នាយក Kedron ប្រកាសថា ការប្រើប្រាស់វ៉ាក់សាំងប្រភេទគ្រាប់នេះអាចជួយកាត់បន្ថយផលប៉ះពាល់ក្រោយពីបានលេប ហើយវាក៏នឹងមានប្រយោជន៍ច្រើន បើសិនក្លាយជាវ៉ាក់សាំងដែលត្រូវលេបប្រចាំឆ្នាំដូចទៅនឹងវ៉ាក់សាំងបង្ការវីរុសផ្ដាសាយ។

Oravax Medical នឹងធ្វើការពិសោធលើមនុស្សក្នុងដំណាក់កាលដំបូងនៅក្នុងប្រទេសមួយចំនួន ក្នុងនោះមាន សហរដ្ឋអាមេរិក, អ៊ីស្រាអែល, ម៉ិកស៊ិក និងនៅបណ្ដាប្រទេសក្នុងតំបន់អឺរ៉ុបផងដែរ។ ការពិសោធដំបូងអាចត្រូវបានធ្វើឡើងនៅក្នុងខែកក្កដាឆ្នាំ2021៕

ប្រភព៖ BI
ប្រែសម្រួល៖ បុត្រា

March 23, 2021

វៀតណាមអះអាងថា «វ៉ាក់សាំង Covid-19 របស់ខ្លួន បង្កើតអង់ទីក័រច្រើនជាង 20ដង ធៀបនឹងអ្នកមិនបានចាក់»

ក្រោយការចាក់វ៉ាក់សាំង Covid-19 កម្រិតនៃការទប់ទល់នឹងការឆ្លងវីរុសរបស់ក្រុមអ្នកស្ម័គ្រចិត្ត ត្រូវបានវាយតម្លៃថាល្អ នៅពេលវាបង្កើតអង្គបដិប្រាណច្រើនជាង 4 ដង ទៅ 20 ដង បើធៀបនឹងអ្នកមិនបានចាក់វ៉ាក់សាំងនេះ។

អនុប្រធាននៃវិទ្យាស្ថានស្រាវជ្រាវវេជ្ជសាស្ត្រយោធាវៀតណាម លោក Ho Anh Son កាលពីថ្ងៃទី 14 មករា ឱ្យដឹងថា យោងតាមការស្រាវជ្រាវថ្មីៗនេះ កម្រិតនៃការឆ្លើយតបរបស់អង្គបដិប្រាណនៃក្រុមអ្នកស្ម័គ្រចិត្តដែលបានចាក់វ៉ាក់សាំង Covid-19 ត្រូវបានវាយតម្លៃថាល្អ នៅពេលបង្កើតបានអង្គបដិប្រាណច្រើនជាង 4 ដង បើធៀបនឹងមនុស្សធម្មតា។ ជាងនេះ ក៏មានអ្នកស្ម័គ្រចិត្តខ្លះកកើតអង់ទីក័រច្រើនជាង 20 ដងក៏មាន។

លោក Son បញ្ជាក់ថា ក្រោយការចាក់វ៉ាក់សាំង Covid-19 លើកទីពីរ បរិមាណនៃអង្គបដិប្រាណរបស់អ្នកស្ម័គ្រចិត្តនឹងកើនឡើងខ្ពស់ និងរក្សាកម្រិតនេះបានយូរអង្វែង។ ដូច្នេះ ក្រុមអ្នកស្ម័គ្រចិត្តដែលបានចាក់លើកទីពីរក្នុងថ្ងៃទី 14 មករា នឹងត្រូវបានតាមដានក្នុងរយៈពេល 6 ខែ ដើម្បីឱ្យដឹងថា សមត្ថភាពនៃការការពាររបស់វ៉ាក់សាំងនេះអាចបន្លាយពេលយូរប៉ុនណា។ ក្រោយរយៈពេលមួយឆ្នាំ ក្រុមអ្នកស្ម័គ្រចិត្តនឹងត្រូវបានវាយតម្លៃលើបរិមាណនៃអង្គបដិប្រាណក្នុងរាងកាយ ដើម្បីឱ្យអ្នកស្រាវជ្រាវកំណត់បរិមាណវ៉ាក់សាំង និងផែនការចម្រាញ់ជ្រើសរើស។

ប៉ុន្តែ មកដល់បច្ចុប្បន្ន មិនទាន់មានទិន្នន័យគ្រប់គ្រាន់ដើម្បីអាចកំណត់បរិមាណវ៉ាក់សាំងដែលត្រូវចាក់នៅឡើយ។ ក្រោយចូលឆ្នាំចិន ក្រុមអ្នកវិទ្យាសាស្ត្រនៃប្រទេសវៀតណាមនឹងមានគម្រោងពិសោធវ៉ាក់សាំង Covid-19 ឈ្មោះ Nanocovax នេះសម្រាប់ដំណាក់កាលទីពីរ ដែលគ្រោងនឹងចាក់ពីរម្ជុលក្នុងមួយដូស។

Nanocovax គឺជាវ៉ាក់សាំងទប់ស្កាត់ Covid-19 ដំបូងរបស់វៀតណាម ដែលត្រូវបានផលិតឡើងដោយក្រុមហ៊ុនឱសថជីវបច្ចេកវិទ្យា Nanogen។ វ៉ាក់សាំងនេះត្រូវការសីតុណ្ហភាពចាប់ពី 2 អង្សាសេ ដល់ -8 អង្សាសេ ដើម្បីរក្សាគុណភាពបានល្អ។

កាលពីព្រឹកថ្ងៃទី 17 ខែធ្នូ ឆ្នាំ 2020 វ៉ាក់សាំង Covid-19 មួយម្ជុលដំបូងរបស់វៀតណាម ត្រូវបានចាក់ឱ្យអ្នកស្ម័គ្រចិត្តចំនួន 3 នាក់ ក្នុងចំណោមជាង 200 នាក់ដែលបានចុះឈ្មោះ។ គិតមកដល់បច្ចុប្បន្ន ការពិសោធវ៉ាក់សាំង Nanocovax លើមនុស្សដំណាក់កាលដំបូងនេះ សម្រេចបាន 50% ហើយតាមផែនការ គម្រោងនេះនឹងត្រូវបញ្ចប់នៅក្នុងខែកុម្ភៈ ឆ្នាំ 2021។ ក្រសួងសុខាភិបាលនឹងធ្វើការវាយតម្លៃ នៅមុនពេលអនុញ្ញាតឱ្យពិសោធលើមនុស្សដំណាក់កាលទីពីរ ដោយមានអ្នកស្ម័គ្រចិត្តចំនួន 560 នាក់៕

ប្រភព៖ CB

January 15, 2021

អ៊ីស្រាអែលគ្រោងនឹងចាក់វ៉ាក់សាំង Covid-19 ដល់ពលរដ្ឋទាំងថ្ងៃទាំងយប់

ប្រភពព័ត៌មានពីប្រទេសអ៊ីស្រាអែល បានឱ្យដឹងថា កាលពីថ្ងៃទី 10 ខែមករា ទំនិញជាវ៉ាក់សាំង Covid-19 ចំនួន 700,000 ដូសរបស់ក្រុមហ៊ុន Pfizer ត្រូវបានបញ្ជូនដល់អ៊ីស្រាអែលតាមជើងយន្តហោះ។

នាយករដ្ឋមន្ត្រីអ៊ីស្រាអែល Benjamin Netanyahu និងរដ្ឋមន្ត្រីក្រសួងសុខាភិបាល Yuli Edelstein ជាអ្នកទៅទទួលយកវ៉ាក់សាំងនេះដោយផ្ទាល់។

ក្នុងថ្ងៃដដែល ក្រសួងសុខាភិបាលប្រទេសនេះបានប្រកាសថា រហូតមកដល់បច្ចុប្បន្ន ពលរដ្ឋដែលមានអាយុលើសពី 60 ឆ្នាំ ចំនួន 70% បានចាក់វ៉ាក់សាំង Covid-19 រួចហើយ។ នៅក្នុងកិច្ចប្រជុំមួយជាមួយនឹងបុគ្គលិកក្នុងវិស័យនេះ រដ្ឋមន្ត្រីសុខាភិបាល Edelstein បានស្នើឱ្យរៀបចំផែនការចាក់វ៉ាក់សាំងជូនពលរដ្ឋទាំងថ្ងៃ ទាំងយប់ ដើម្បីទប់ស្កាត់ការឆ្លងវីរុសឱ្យបានជាអតិបរមា។

នាយករដ្ឋមន្ត្រី Netanyahu ឱ្យដឹងថា នឹងបង្កើនចំនួនអ្នកដែលត្រូវបានចាក់វ៉ាក់សាំងឱ្យបាន 170,000 នាក់ក្នុងមួយថ្ងៃ។ ប្រធានអង្គភាពប្រឆាំង Covid-19 លោក Nachman Ash ថ្លែងថា អ៊ីស្រាអែលមានលទ្ធភាពអាចចាក់វ៉ាក់សាំងជូនពលរដ្ឋបាន 200,000 នាក់ក្នុងមួយថ្ងៃ ដែលរួមមានទាំងការចាក់លើកទីមួយ និងលើកទីពីរ។

ក្រសួងសុខាភិបាលអ៊ីស្រាអែលបានចាប់ផ្ដើមរៀបចំគម្រោងសម្រាប់ការចាក់វ៉ាក់សាំងជូនបុគ្គលិកក្នុងវិស័យអប់រំ ក្នុងនោះ គ្រួបង្រៀនដែលត្រូវធ្វើការនៅក្នុងអំឡុងពេលមានបម្រាមគោចរទូទាំងប្រទេស នឹងមានអាទិភាពមុនគេ។ ក្រុមអាទិភាពបន្ទាប់គឺជាក្រុមមនុស្សដែលមានវ័យចាប់ពី 55 ដល់ 60 ឆ្នាំ ហើយបន្ទាប់មកទៀតគឺពលរដ្ឋដែលមានវ័យច្រើនជាង 50 ឆ្នាំ។

យោងតាមកិច្ចព្រមព្រៀងរវាងអ៊ីស្រាអែល និងក្រុមហ៊ុន Pfizer ជារៀងរាល់សប្ដាហ៍ Pfizer នឹងប្រគល់ទំនិញជាវ៉ាក់សាំងចំនួនរាប់ម៉ឺនដូសដល់អ៊ីស្រាអែល រហូតដល់ពលរដ្ឋទាំងអស់នៃប្រទេសនេះបានចាក់វ៉ាក់សាំងរួចរាល់។

គិតមកដល់បច្ចុប្បន្ន នៅអ៊ីស្រាអែល ពលរដ្ឋជាង 1.8 លាននាក់បានចាក់វ៉ាក់សាំង Covid-19 លើកទីមួយរួចហើយ ដែលតួលេខនេះគឺប្រហាក់ប្រហែលនឹង 20% នៃចំនួនប្រជាជនសរុបរបស់ប្រទេសនេះ។

រហូតមកដល់ថ្ងៃទី 11 មករានេះ ប្រទេសអ៊ីស្រាអែលបានរកឃើញអ្នកឆ្លងវីរុស Covid-19 សរុបចំនួន 491,319 នាក់ ក្នុងនោះមាន 3,671 នាក់បានស្លាប់ និង 419,907 នាក់បានជាសះស្បើយ៕

ប្រភព៖ Times of Israel

January 11, 2021

ចម្លើយលើចំណុចសង្ស័យ 7រឿងដែលស្ត្រីមានគភ៌ចង់ដឹងបំផុត

ស្ត្រីដែលទើបតែមានគភ៌ជាលើកដំបូងដែលកើតមានក្តីសង្ស័យ និងមិនប្រាកដក្នុងចិត្តថា តើក្នុងអំឡុងពេលមានគភ៌នោះ ត្រូវមើលថែទាំអ្វីខ្លះទៀត ក្រៅពីការជ្រើសរើសចំណីអាហារត្រូវតាមភោជនាការរបស់ស្ត្រីមានគភ៌ហើយ ហាត់ប្រាណយ៉ាងត្រឹមត្រូវ និងសម្រាកយ៉ាងគ្រប់គ្រាន់ហើយ តើនៅមានរឿងអ្វីដែលគួរធ្វើបន្ថែមទៀតឬទេ? និងតើមានរឿងអ្វីខ្លះដែលគួរចៀសវាង? និងកិច្ចការងារពីមុនដែលធ្លាប់ធ្វើ តើអាចធ្វើបានទៀតឬទេ? ឬហុចផលអាក្រក់ប៉ុនណា?។ ចំណុចសង្ស័យទាំងនេះ សុទ្ធតែជារឿងដែលអ្នកមានផ្ទៃពោះនៅសង្ស័យច្រើនគ្នាណាស់ ដូច្នេះយើងនាំគ្នាមកបកស្រាយចំណុចសង្ស័យទាំងនេះទាំងអស់គ្នា។

1-ទម្ងន់ខ្លួនដែលស័ក្តិសមសម្រាប់អ្នកមានគភ៌

បើអ្នកមានគភ៌ទទួលទានអាហារតាមការណែនាំហើយ (ប្រូតេអុីន វិតាមីន សារធាតុរ៉ែ អុីយ៉ូដ កាល់ស្យូម ហ្វូលេត សារធាតុដែក)នោះ ទម្ងន់ខ្លួននឹងកើនឡើងប្រមាណជា 12 -15គីឡូក្រាម ជាមធ្យមកើន 1ខែ 2គីឡូក្រាម តែក្នុងត្រីមាសដំបូងទម្ងន់ខ្លួនអាចថយចុះ ដោយសារតែអាការចាញ់កូនដែលធ្វើឱ្យក្អួតចង្អោរញឹកញាប់ ឬមិនអាចញ៉ាំអាហារបានច្រើន។ ក្នុងត្រីមាសទី2 ជាអំឡុងពេលអស់អាការចាញ់កូនហើយ ស្ត្រីមានគភ៌អាចហាត់ប្រាណបានយ៉ាងត្រឹមត្រូវ ដើម្បីគ្រប់គ្រងកុំឱ្យទម្ងន់ខ្លួនកើនឡើងលឿនជ្រុលពេក។ ចំណែកត្រីមាសចុងក្រោយ ត្រូវប្រយ័ត្នប្រយែងបន្តិច ព្រោះឱកាសប្រសូតមុនកំណត់មានខ្ពស់ណាស់ បើសិនបញ្ចេញកម្លាំងធ្វើអ្វីមួយខ្លាំងជ្រុលពេក។ ក្នុងត្រីមាសនេះ ទម្ងន់ខ្លួនអ្នកម្តាយនឹងកើនឡើងខ្ពស់បំផុត។

2-បើចាក់វ៉ាក់សាំងការពារជំងឺផ្សេងៗ ក្នុងអំឡុងពេលមានគភ៌ត្រីមាសដំបូងដោយសារតែមិនដឹង តើនឹងមានគ្រោះថ្នាក់អ្វីដែរទេ?

បើវ៉ាក់សាំងដែលចាក់នោះជាវ៉ាក់សាំងការពារតេតាណូស គ្រុនផ្តាសាយធំ ឬកញ្រ្ជឹល មិនជាគ្រោះថ្នាក់ដល់ទារកក្នុងផ្ទៃទេ និងជាការសាងប្រព័ន្ធការពារជំងឺឱ្យខ្លួនទារកទៀតផង។ ពេញមួយរយៈពេល 9ខែ ស្ត្រីមានគភ៌អាចត្រូវចូលទៅទទួលយកការចាក់វ៉ាក់សាំងការពារជំងឺយ៉ាងត្រឹមត្រូវ ដើម្បីទារកចម្រើនធំធាត់ រឹងប៉ឹង និងពេញលេញ ប្រាសចាកជំងឺតម្កាត់។

3-តើវីតាមីនបន្ថែម ចាំបាច់ដែរឬទេ?

សារធាតុអាហារដែលអ្នកមានគភ៌គួរទទួលទានបន្ថែមនោះគឺ សារធាតុដែកដែលជួយគាំទ្រការធ្វើការងាររបស់ហ៊ីម៉ូគ្លោប៊ីនក្នុងគ្រាប់ឈាមក្រហម ដែលជាអ្នកនាំអុកស៊ីហ្ស៊ែនឆ្ពោះទៅទារកដែលនៅក្នុងផ្ទៃ បើអ្នកមានគភ៌បានទទួលសារធាតុដែកមិនគ្រប់គ្រាន់ នឹងធ្វើឱ្យកើតសភាវលោហិតស្លេកស្លាំង ហុចផលឱ្យកើតអាការនឿយល្វើយ ហត់ និងដកដង្ហើមមិនស្រួល។ ទាំងអស់នេះ ការទទួលទានសារធាតុដែកគួរស្ថិតក្នុងបរិមាណដែលសមល្មមតាមដែលរាងកាយត្រូវការ ចំណែកវិតាមីន និងសារធាតុអាហារផ្សេងទៀត បើទទួលទានអាហារគ្រប់ 5ប្រភេទក្រុមតាមពាក្យណែនាំរបស់គ្រូពេទ្យហើយនោះ មិនចាំបាច់ទទួលទានវីតាមីនបន្ថែមក៏បានដែរ តែគួរញ៉ាំទឹកដោះគោជាប្រចាំ ដើម្បីបង្កើនភាពរឹងមាំដល់ឆ្អឹងរបស់ទារកនៅក្នុងផ្ទៃ មិនគួរទទួលទានថ្នាំសារធាតុដែកលាយគ្នាជាមួយទឹកដោះគោឡើយ ព្រោះវាធ្វើឱ្យមានគុណវិបត្តិច្រើនជាងគុណសម្បត្តិ។

4-ស្វាមីទ្រាំមិនបាន សុំមានភេទសម្ព័ន្ធក្នុងអំឡុងពេលមានគភ៌

ការមានភេទសម្ព័ន្ធ មិនមែនជារឿងគ្រោះថ្នាក់ដល់ទារកក្នុងផ្ទៃទេ លើកលែងតែខាងប្រុសមានជំងឺកាមរោគ។ ក្នុងអំឡុងត្រីមាសទី3 សូមឱ្យលោកប្ដីអត់ទ្រាំបន្តិច ព្រោះជាដំណាក់កាលសំខាន់ណាស់ គភ៌របស់ភរិយាមិនគួរទទួលរងកម្លាំងញ័ររញ្ជួយអ្វីទាំងអស់ ដើម្បីការពារការប្រសូតមុនកំណត់ និងអាចធ្វើឱ្យទារកមិនរឹងប៉ឹងបាន។ បើត្រីមាសទី1 និង 2 ស្ត្រីមានគភ៌គួរសង្កេតមើលផងថា តើមានអាការខុសប្រក្រតីអ្វីឬទេ? ដូចជា ឈឺពោះមុនពេលកំណត់ និងមានឈាមធ្លាក់ចេញពីមាត់ស្បូន ជាដើម។ បើមានអាការទាំងនេះ គួរបញ្ឈប់ការមានភេទសម្ព័ន្ធ និងប្រញាប់ទៅជួបគ្រូពេទ្យភ្លាម។

5-ទឹកដោះដែលគួរញ៉ាំ

ក្នុងអំឡុងពេលមានគភ៌ ស្ត្រីអាចញ៉ាំទឹកដោះបានគ្រប់ប្រភេទ ទាំងទឹកដោះគោ ទឹកដោះពពែ ឬទឹកសណ្តែកលឿង (មិនចាំបាច់តែទឹកដោះសម្រាប់ស្រ្តីមានគភ៌ក៏បានដែរ) និងគួរញ៉ាំឱ្យបានទ្វេដង ព្រោះរាងកាយរបស់អ្នកមានគភ៌ត្រូវការកាល់ស្យូម និងកូនតូចក៏ត្រូវការកាល់ស្យូមដែរ ព្រោះកាល់ស្យូមនេះជួយការពារសភាវលើសឈាមបាន។

6-មុនប្រើថ្នាំក្នុងអំឡុងពេលមានគភ៌…

…គួរប្រឹក្សាជាមួយគ្រូពេទ្យសម្ភព គឺជាវិធីដែលល្អបំផុត ព្រោះថ្នាំប្រភេទខ្លះមានគ្រោះថ្នាក់ដល់ទារក ដូចជាស្ត្រីមានគភ៌ដែលរក្សាសម្ផស្ស ត្រូវការញ៉ាំថ្នាំព្យាបាលមុន និងថ្នាំព្យាបាលមុនខ្លះជាប្រភេទលាប និងខ្លះទៀតជាប្រភេទលេប ដែលអាចចាត់ទុកថាជាប្រភេទថ្នាំគ្រោះថ្នាក់ ដែលមានផលប៉ះពាល់ទៅដល់ទារកនៅក្នុងគភ៌ អាចធ្វើឱ្យកើតពិការភាពបាន ដូច្នេះមុននឹងប្រើថ្នាំគួរប្រឹក្សាជាមួយគ្រូពេទ្យ និងត្រូវប្រាប់គ្រូពេទ្យគ្រប់ពេលថា ខ្លួនឯងមានគភ៌ ដើម្បីបានទទួលការផ្តល់ថ្នាំដែលត្រឹមត្រូវ។

7-មានដុំសាច់ដុះលើរាងកាយក្នុងអំឡុងពេលមានគភ៌

ភាពគ្រោះថ្នាក់ អាស្រ័យលើទីតាំង និងលក្ខណៈរបស់សាច់ដុះនោះ។ នៅពេលស្ទាបប៉ះ ស្ត្រីមានគភ៌គួរទៅប្រឹក្សាជាមួយគ្រូពេទ្យជំនាញ ដើម្បីវាយតម្លៃពីដុំសាច់ដុះនោះ និងធ្វើការព្យាបាលជាបន្ត។ យ៉ាងណាក៏ដោយ ការត្រៀមខ្លួនជាស្រេចមុនពេលមានគភ៌ គឺជារឿងចាំបាច់ ដូចជា ពិនិត្យរកមើលសាច់ដុះ និងធ្វើការព្យាបាលឱ្យជាសះស្បើយមុនពេលសម្រេចចិត្តមានគភ៌ វានឹងជួយកាត់បន្ថយសភាវគភ៌ប្រថុយប្រថានបាន។

ការមើលថែទាំគភ៌យ៉ាងត្រឹមត្រូវតាមគោលភោជនាហារ និងពាក្យណែនាំរបស់ពេទ្យ ទារកនឹងធំធាត់ឡើងយ៉ាងល្អឥតខ្ចោះ និងរឹងប៉ឹង។ នៅពេលគេធំឡើង ឪពុក-ម្តាយនឹងមានមោទនភាពដែលបានមើលថែទាំគភ៌យ៉ាងល្អ។ បើមានចំណុចសង្ស័យអ្វីផ្សេងក្រៅពីនេះ ការប្រឹក្សាជាមួយពេទ្យសម្ភព នឹងទទួលបានការណែនាំយ៉ាងត្រឹមត្រូវ ព្រោះរាងកាយស្ត្រីម្នាក់ៗ មិនដូចគ្នាទេ ដូច្នេះហើយការទៅប្រឹក្សាជាមួយគ្រូពេទ្យជំនាញពេញមួយរយៈពេល 9ខែនោះ នឹងយល់បានច្បាស់ល្អជាង៕

December 9, 2020

Tag: វ៉ាក់សាំង