មនុស្ស - La Reine Media

រកឃើញភពមួយស្រដៀងនឹងផែនដី ប៉ុន្តែមួយឆ្នាំមានតែជាងបីថ្ងៃ

ណាសាបានរកឃើញភពថ្មមួយដែលមានឈ្មោះថា LTT 1445 Ac កំពុងគោចរជុំវិញកូនផ្កាយក្រហមមួយដួង។

ភព LTT 1445 Ac ដែលត្រូវបានរកឃើញដំបូងដោយតេឡេស្កុប TESS របស់ណាសា ស្ថិតនៅក្នុងប្រព័ន្ធផ្កាយបីដ៏ចម្លែកមួយ និងមានចម្ងាយពីផែនដីប្រហែល 22 ឆ្នាំពន្លឺ ដែលមួយឆ្នាំពន្លឺមានចម្ងាយ 9.46 លានលាន/ទ្រីលាន (9,460,000,000,000) គីឡូម៉ែត្រ។

LTT 1445 Ac គោចរជុំវិញកូនផ្កាយក្រហមមួយដួងដែលមានឈ្មោះថា LTT 1445 A តែប៉ុណ្ណោះ ប៉ុន្តែ បើសិនអ្នកស្ថិតនៅលើភពនេះ អ្នកអាចមើលឃើញទាំងផ្កាយ LTT 1445 B និង LTT 1445 C ធ្វើឱ្យទិដ្ឋភាពលើភពនេះ ស្រដៀងទៅនឹងភពប្រឌិតមួយនៅក្នុងខ្សែភាពយន្ត Star Wars។

ក្នុងរបាយការណ៍ស្រាវជ្រាវមួយដែលទើបត្រូវបានប្រកាសលើទស្សនាវដ្ដី Astronomical Journal ក្រុមអ្នកស្រាវជ្រាវដែលដឹកនាំដោយបណ្ឌិត Emili Pass មកពីមជ្ឈមណ្ឌលរូបវិទ្យាតារាសាស្ត្រ Harvard & Smithsonian (សហរដ្ឋអាម៉េរិក) បានរកឃើញប្រការពិសេសមួយ នោះគឺថា LTT 1445 Ac ស្ថិតក្នុងប្រភេទភពដែលមានទំហំប៉ុនផែនដី។

យោងតាមការសង្កេតបន្ថែមដោយតេឡេស្កុប Hubble ក្រុមអ្នកវិទ្យាសាស្ត្រអាម៉េរិកបានគណនាឃើញថា ភពនេះមានម៉ាសធ្ងន់ជាង 1.37 ដង និងកាំធំជាង 1.07 ដង ធៀបនឹងផែនដី។ ដូច្នេះ ភពថ្ម LTT 1445 Ac មានម៉ាស និងទំហំប្រហាក់ប្រហែលនឹងផែនដី។

ប្រការដែលគួរឱ្យស្ដាយគឺថា LTT 1445 Ac ស្ថិតនៅក្បែរផ្កាយមេរបស់វាពេក ធៀបនឹងការចង់បានរបស់មនុស្ស។ បើទោះកូនផ្កាយនេះមានពន្លឺតិច និងត្រជាក់ជាងព្រះអាទិត្យរបស់មនុស្ស ប៉ុន្តែដោយសារវដ្ដនៃគន្លងគោចរត្រឹមតែ 3.12 ថ្ងៃ ផ្ទៃរបស់ភព LTT 1445 Ac មានសីតុណ្ហភាពរហូតដល់ 260 អង្សាសេ ដែលមិនងាយនឹងឱ្យជីវិតដូចលើផែនដី អាចកកើតបាន។

ស្ថានភាពរបស់ភព LTT 1445 Ac អាចជួយឱ្យអ្នកវិទ្យាសាស្ត្រយល់ច្បាស់ជាងមុនអំពីរបៀបដែលភពស្រដៀងនឹងផែនដី អាចកកើត និងរីកចម្រើននៅក្នុងប្រព័ន្ធផ្កាយផ្សេងៗ ដែលនេះក៏នឹងជួយកាត់បន្ថយទំហំនៃ ការស្វែងរកជីវិតនៅក្នុងចក្រវាល៕

November 22, 2023

ស្រឡាងហោះអគ្គិសនី រត់លើផ្ទៃទឹកជាលើកដំបូងដោយជោគជ័យ

(ស៊ុយអែត) – ស្រឡាងស្លាបក្រោមទឹកអគ្គិសនី P-12 របស់ Candela ធ្វើដំណើរលើផ្ទៃទឹកជាលើកដំបូងដោយជោគជ័យ នៅទីក្រុងស្តុកខុល។

ក្រុមហ៊ុនផលិតកប៉ាល់ស្លាបក្រោមទឹក Candela របស់ប្រទេសស៊ុយអែត បានប្រកាសថា ស្រឡាងដឹកអ្នកដំណើរ P-12 បំពាក់ម៉ូទ័រអគ្គិសនី និងមានស្លាបចំនួនបីដែលជួយលើកដងខ្លួនរបស់ស្រឡាងឡើងផុតពីផ្ទៃទឹក បានទទួលជោគជ័យក្នុងការរត់ជាលើកដំបូង ក្នុងល្បឿន 55 គីឡូម៉ែត្រក្នុងមួយម៉ោង។ ក្រុមហ៊ុន Candela បានចាប់ផ្ដើមផលិត P-12 ក្នុងចំនួនច្រើន ដើម្បីរួមចំណែកបើកទំព័រថ្មីសម្រាប់គមនាគមន៍បៃតងលើផ្ទៃទឹក។ នេះបើតាម New Atlas ចុះផ្សាយកាលពីថ្ងៃទី 16 វិច្ឆិកា 2023។

ស្រឡាងដឹកអ្នកដំណើរស្លាបក្រោមទឹកនេះត្រូវបានអភិវឌ្ឍឡើងដើម្បីអាចបញ្ជាដោយមនុស្សម្នាក់ និងដំណើរការដោយកម្លាំងពីម៉ូទ័រអគ្គិសនី C-Pod ចំនួនពីរគ្រឿង។ ស្រឡាងគំរូសម្រាប់ការផលិតដែលមានឈ្មោះថា Zero របស់ P-12 អាចធ្វើដំណើរដល់ល្បឿន 55 គីឡូម៉ែត្រ/ម៉ោង ក្នុងរង្វង់ 16 វិនាទីដំបូង បន្ទាប់ពីបញ្ឆេះម៉ូទ័ររត់ក្នុងល្បឿន 30 គីឡូម៉ែត្រក្នុងមួយម៉ោង។

ស្រឡាងមានដងខ្លួនពីរនេះ ងើបផុតពីផ្ទៃទឹកដោយសារស្លាបដែលនៅក្រោមផ្ទៃទឹក ធ្វើពីសរសៃកាបូន ជាមួយនឹងប្រព័ន្ធបញ្ជាអេឡិចត្រូនិចដែលប្រើប្រាស់ទិន្នន័យពីអង្គញាណ ឬហៅថាសេនសឺរ។

P-12 មានប្រវែង 11.99 ម៉ែត្រ និងទទឹង 4.5 ម៉ែត្រ។ យានជំនិះនេះអាចដឹកអ្នកដំណើរបាន 30 នាក់។ ក្នុងស្រឡាងនេះក៏មានកន្លែងសម្រាប់ចតកង់ រទេះរុញ រទេះជនពិការ។ល។

យោងតាម Candela ស្រឡាងទីពីរនឹងដំណើរការនៅក្នុងទីក្រុងស្តុកខុល ចាប់ពីឆ្នាំ 2024។ កំណែ Shuttle របស់ស្រឡាងនេះមានតម្លៃប្រហែល 1.85 លានដុល្លារអាម៉េរិក ដែលប្រហាក់ប្រហែលនឹងស្រឡាងប្រើម៉ាស៊ីនម៉ាស៊ូតដែលមានទំហំដូចគ្នា។ កំណែពាណិជ្ជកម្មដែលមានគ្រឿងសង្ហារិមប្រណិត នឹងអាចដឹកអ្នកដំណើរបានពី 12 ដល់ 20 នាក់។ ចំណែកកំណែ Voyager វិញ អាចកែប្រែទៅតាមហោប៉ៅ ឬសកម្មភាពពាណិជ្ជកម្ម៕

November 17, 2023

Goldman Sachs ថា «សេដ្ឋកិច្ចពិភពលោកនៅឆ្នាំ 2024 នឹងប្រសើរជាងការរំពឹងទុក

ក្រុមហ៊ុនវិនិយោគផ្នែកធនាគារនៅសហរដ្ឋអាម៉េរិក Goldman Sachs អះអាងថា សេដ្ឋកិច្ចពិភពលោកក្នុងឆ្នាំក្រោយនឹងប្រសើរជាងការរំពឹងទុករបស់មនុស្សជាច្រើន ខណៈដែលការផលិតនឹងងើបឡើងវិញ ហើយផលប៉ះពាល់ពីការដំឡើងការប្រាក់ក៏ថយចុះ។

នៅក្នុងរបាយការណ៍ដែលបានប្រកាសកាលពីចុងសប្ដាហ៍កន្លង ធនាគារ Goldman Sachs (សហរដ្ឋអាម៉េរិក) ព្យាករថា សេដ្ឋកិច្ចពិភពលោកនឹងមានកំណើន 2.6% នៅឆ្នាំក្រោយ ខ្ពស់ជាងការប៉ាន់ស្មាន 2.1% របស់ក្រុមសេដ្ឋវិទូដែលត្រូវបានស្រង់មតិ និងចុះផ្សាយដោយ Bloomberg។ សហរដ្ឋអាម៉េរិក ក៏ត្រូវបានរំពឹងថា មានកំណើនសេដ្ឋកិច្ច 2.1% ដែលខ្ពស់ជាងបណ្ដាប្រទេសអភិវឌ្ឍដទៃ។

ធនាគារ Goldman Sachs ក៏យល់ថា ភាគច្រើន ផលប៉ះពាល់ពីដំណើរការរឹតបន្តឹងសារពើពន្ធ និងរូបិយវត្ថុ នឹងលែងមានទៀតហើយ។ ដើម្បីគ្រប់គ្រងអតិផរណា ធនាគារកណ្ដាលរបស់សហរដ្ឋអាម៉េរិក (Fed) បានដំឡើងការប្រាក់ 11 លើករាប់ចាប់ពីខែមីនា 2022។ កាលពីសប្ដាហ៍កន្លង ប្រធាន Fed លោក Jerome Powell បានបង្ហាញសញ្ញាថា នឹងដំឡើងការប្រាក់ទៀត បើសិនជាចាំបាច់។

Goldman Sachs យល់ថា អតិផរណានឹងបន្តថយចុះនៅក្នុងបណ្ដាប្រទេសដែលមានសេដ្ឋកិច្ចជឿនលឿន និងទើបលេចធ្លោ ដោយចុះមកនៅត្រឹមពី 2 ទៅ 2.5%។ ធនាគារនេះក៏សង្ឃឹមថា សកម្មភាពផលិតរបស់រោងចក្រនានានៅទូទាំងពិភពលោកនឹងត្រូវបានស្ដារឡើងវិញ បន្ទាប់ពីរងសម្ពាធធ្ងន់ធ្ងរនៅក្នុងឆ្នាំនេះ៕

November 16, 2023

ក្រុមហ៊ុនហូឡង់រកវិធីបង្កកំណើតទារកដំបូងគេក្នុងទីអវកាស

ក្រុមហ៊ុន Spaceborn United របស់អ្នកជំនួញជនជាតិហូឡង់ Egbert Edelbroek កំពុងសិក្សាស្រាវជ្រាវដើម្បីបង្កកំណើត និងបង្កើតទារកតាមធម្មជាតិ នៅក្នុងបរិស្ថានដែលមានកម្លាំងទំនាញខ្សោយដូចនៅលើភពអង្គារ។

បើទោះជាមានឧបសគ្គច្រើនក្នុងដំណើរឆ្ពោះទៅការសម្រេចគោលដៅខាងលើ ប៉ុន្តែ លោក Edelbroek ជឿថា លោកអាចមើលឃើញទារកដំបូងដែលបង្កកំណើតក្នុងទីអវកាស។ នេះបើតាម AFP ចុះផ្សាយកាលពីថ្ងៃទី 14 វិច្ឆិកា 2023។

«មនុស្សជាតិត្រូវតែជាសត្វលោកដែលរស់នៅក្នុងអន្តរភព។ បើសិនជាចង់រស់នៅដោយឯករាជ្យនៅខាងក្រៅផែនដី យើងត្រូវការដោះស្រាយបញ្ហានៃការបន្តពូជ» លោក Edelbroek សង្កត់ធ្ងន់ដូច្នេះ។

ការបង្កកំណើតក្នុងទីអវកាស មានឧបសគ្គច្រើន។ ឧបសគ្គចម្បងគេគឺកង្វះកម្លាំងទំនាញ ធ្វើឱ្យគូស្នេហ៍ងាយនឹងអណ្តែតឆ្ងាយពីគ្នា ដូច្នេះ Spaceborn United គឺជាក្រុមហ៊ុនដំបូងគេដែលស្វែងរកវិធីបង្កកំណើតនៅទីអវកាស។

យោងតាមលោក Edelbroek ឧបសគ្គមួយទៀត នោះគឺធាតុរាវរបស់រាងកាយនឹងត្រូវបានរុញច្រានឡើងទៅលើ នៅក្នុងបរិស្ថានកម្លាំងទំនាញទាប ដែលផ្ទុយពីនៅលើផែនដី។ ដូច្នេះ ជាដំបូង មនុស្សត្រូវការបង្កើតបរិស្ថានមួយដែលល្អឥតខ្ចោះ។

ក្រុមអ្នកវិទ្យាសាស្ត្រកំពុងស្វែងយល់អំពីវិធីបង្កកំណើតក្នុងបន្ទប់ពិសោធន៍ដែលមានកម្លាំងទំនាញផែនដីទាប ប៉ុន្តែ លោក Edelbroek និយាយថា គម្រោងបាញ់បង្ហោះកោសិកាកណ្ដុរទៅពិសោធក្នុងទីអវកាសនឹងធ្វើឡើងនៅចុងឆ្នាំនេះ។ បន្ទាប់មក ក្នុងរយៈពេលពី 5 ដល់ 6 ឆ្នាំទៀត ក្រុមហ៊ុននេះនឹងពិសោធលើកោសិកាមនុស្ស។

បញ្ហាសីលធម៌គឺជាមូលហេតុដែលធ្វើឱ្យការបង្កកំណើតក្នុងទីអវកាស ទាក់ទាញចំណាប់អារម្មណ៍របស់បណ្ដាក្រុមហ៊ុនឯកជនដូច Spaceborn ជំនួសឱ្យណាសា ដែលរារែកក្នុងការផ្ដល់ថវិកាសម្រាប់ប្រធានបទ «រសើប»។ ក៏ប៉ុន្តែ លោក Edelbroek ជឿថា នឹងមានពេលវេលាគ្រប់គ្រាន់ដើម្បីបង្កើតទារកដំបូងដែលបង្កកំណើតក្នុងអវកាស មុនពេលលោកទទួលមរណភាព៕

November 16, 2023

អាម៉េរិកអនុម័តឱ្យប្រើប្រាស់វ៉ាក់សាំងដំបូងគេលើពិភពលោកដែលទប់ស្កាត់ជំងឺគ្រុនឈីក

រដ្ឋបាលចំណីអាហារ និងឪសថអាម៉េរិក (FDA) កាលពីថ្ងៃទី 09 វិច្ឆិកា ឆ្នាំ 2023 បានអនុម័តឱ្យប្រើប្រាស់វ៉ាក់សាំងដំបូងគេលើពិភពលោកដែលទប់ស្កាត់ការឆ្លងជំងឺគ្រុនឈីកពីមូសដែលមានផ្ទុកវីរុស Chikungunya។

សារព័ត៌មាន AFP ផ្សាយថា នៅក្នុងរបាយការណ៍មួយ FDA ឱ្យដឹងថា វ៉ាក់សាំងទប់ស្កាត់ជំងឺដែលកើតឡើងដោយសារវីរុស Chikungunya ត្រូវបានអនុម័តឱ្យប្រើប្រាស់សម្រាប់មនុស្សដែលមានអាយុចាប់ពី 18 ឆ្នាំឡើងទៅ ដែលប្រឈមនឹងហានិភ័យឆ្លងខ្ពស់ជាងគេ។ វ៉ាក់សាំងនេះត្រូវបានអភិវឌ្ឍដោយក្រុមហ៊ុន Valneva របស់អឺរ៉ុប ហើយថា នឹងត្រូវបានដាក់លក់ក្នុងទីផ្សារក្រោមឈ្មោះថា Ixchiq។

ការអនុម័តរបស់ FDA នេះ ត្រូវបានរំពឹងថា នឹងបង្កើនល្បឿននៃការដាក់ពង្រាយវ៉ាក់សាំង Ixchiq នៅតាមបណ្ដាប្រទេសដែលសម្បូរវីរុស Chikungunya ជាងគេ មានជាអាទិ៍ ទ្វីបអាហ្វ្រិក តំបន់អាស៊ីអាគ្នេយ៍ និងតំបន់មួយចំនួននៅទ្វីបអាម៉េរិកជាដើម។

ជំងឺគ្រុនឈីកបង្កឡើងដោយវីរុស Chikungunya ឬហៅថា វីរុសឈីក និងបណ្ដាលមកពីមូសខ្លាញី Aedes aegypti (the yellow fever mosquito) ខាំ ជាពិសេសនៅពេលថ្ងៃ ហើយអាចកើតមានចំពោះមនុស្សគ្រប់វ័យ និងឆ្លងពីមនុស្សម្នាក់ទៅមនុស្សម្នាក់ផ្សេងទៀត។

មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្រ្ត និងបាណកសាស្រ្ត នៃក្រសួងសុខាភិបាលកម្ពុជា បានឱ្យដឹងថា ជំងឺគ្រុនឈីកមានរោគសញ្ញាសំខាន់ៗចំនួនបី រួមមាន គ្រុនក្តៅពី 3 ទៅ 4 ថ្ងៃ, ឈឺសន្លាក់ឆ្អឹង និងមានស្នាមកន្ទួល ឬក្រហមលើស្បែកដូចកើតស្អូច ឬកញ្ជ្រឹល។ ជំងឺគ្រុនឈីកមិនបណ្តាលឱ្យអ្នកជំងឺស្លាប់ លើកលែងតែវាកើតរួមគ្នាជាមួយជំងឺផ្សេងៗ ដូចជាជំងឺគ្រុនឈាម គ្រុនចាញ់ ឬជំងឺរលាកស្រោមខួរជាដើម។

យោងតាមអង្គការសុខភាពពិភពលោក (WHO) រាប់ចាប់តាំងពីត្រូវបានរកឃើញលើកដំបូងនៅប្រទេសតង់ហ្សានីកាលពីឆ្នាំ 1952 វីរុសឈីកនេះបានឆ្លងរាលដាលដល់ប្រទេស និងដែនដីជាង 110 រួចហើយ។

AFP ឱ្យដឹងថា អ្នកជំនាញផ្នែកសុខាភិបាលសាធារណៈបានសម្ដែងការព្រួយបារម្ភថា វីរុស Chikungunya អាចបង្កឱ្យមានវិបត្តិសុខភាពសកលនៅក្នុងពេលអនាគត នៅពេលការប្រែប្រួលអាកាសធាតុជំរុញឱ្យមូសចម្លងវីរុសនេះទៅកាន់តំបន់ថ្មីៗនៅទូទាំងពិភពលោក៕

November 14, 2023

ស្ថានីយផលិតអគ្គិសនីពីព្រះអាទិត្យអណ្ដែតធំបំផុតនៅអាស៊ីអាគ្នេយ៍ត្រូវបានសម្ពោធ

កាលពីថ្ងៃទី 09 វិច្ឆិកា 2023 ឥណ្ឌូណេស៊ីបានសម្ពោធបើកដំណើរការស្ថានីយផលិតអគ្គិសនីពីថាមពលព្រះអាទិត្យអណ្ដែត តម្លៃ 100 លានដុល្លារអាម៉េរិក ដែលនេះគឺជាការបោះជំហានធំមួយក្នុងដំណើរងាកទៅរកថាមពលបៃតង ថាមពលកកើតឡើងវិញ។

ស្ថានីយផលិតអគ្គិសនីដែលទើបត្រូវបានសម្ពោធ និងមានឈ្មោះថា Cirata នេះ គ្រោងនឹងផលិតអគ្គិសនីគ្រប់គ្រាន់សម្រាប់ផ្គត់ផ្គង់ដល់មនុស្ស 50,000 គ្រួសារ។ ស្ថានីយនេះត្រូវបានសាងសង់លើបឹងមួយដែលមានទំហំ 200 ហិកតា នៅ Java ខាងលិច ដែលមានចម្ងាយពីរដ្ឋធានីហ្សាការតាប្រហែល 130 គីឡូម៉ែត្រ។

គម្រោងនេះគឺជាកិច្ចសហការរវាងក្រុមហ៊ុនអគ្គិសនីជាតិឥណ្ឌូណេស៊ី Perusahaan Listrik Negara (PLN) និងក្រុមហ៊ុន Abu Dhabi Masdar ដោយចំណាយថវិកាប្រហែល 100 លានដុល្លារអាម៉េរិក និងចំណាយពេលសាងសង់ 3 ឆ្នាំ។ ស្ថានីយនេះមានផ្ទាំងសូឡាប្រហែល 340,000 ផ្ទាំង។

បច្ចុប្បន្ន Cirata អាចផលិតអគ្គិសនីបាន 192 មេហ្គាវ៉ាត់ (MW) ហើយគ្រោងនឹងពង្រីកឱ្យបាន 500 MW នាពេលខាងមុខ និង 1,000 MW នៅទីបញ្ចប់។ គម្រោងនេះរួមចំណែកក្នុងការខិតខំប្រឹងប្រែងរបស់រដ្ឋាភិបាលឥណ្ឌូណេស៊ី ដែលបានកំណត់គោលដៅកាត់បន្ថយការបំភាយឧស្ម័នផ្ទះកញ្ចក់មកនៅស្មើសូន្យចាប់ពីឆ្នាំ 2060៕

November 10, 2023

ភពចំនួនពីរដែលអាចមានអរិយធម៌ជឿនលឿនជាងផែនដីប្រាំពាន់លានឆ្នាំ

ការសិក្សាស្រាវជ្រាវមួយរបស់អង់គ្លេសបានបង្ហាញទីតាំងដែលកំពុងលាក់បាំងភពក្រៅប្រព័ន្ធព្រះអាទិត្យយ៉ាងតិចពីរ ដែលមានទ្វីប «ចាស់» ជាងផែនដីរហូតដល់ប្រាំពាន់លានឆ្នាំ និងអាចមានជីវិតដែលជឿនលឿនជាងមនុស្ស។

ក្រុមអ្នកវិទ្យាសាស្ត្រមកពីសាកលវិទ្យាល័យ Cardiff (អង់គ្លេស) បានឱ្យដឹងថា នៅជុំវិញផ្កាយពីរដួងដែលមានឈ្មោះថា HD 76932 និង HD 201991 អាចមានលាក់បាំងភពយ៉ាងតិចពីរដែលកកើតទ្វីបមុនផែនដីរហូតដល់ចាប់ពី 4 ទៅ 5 ពាន់លានឆ្នាំ។

យោងតាម Live Science ខាងលើនេះគឺជាលទ្ធផលនៃការចម្រាញ់ពីផ្កាយ 29 ដួងដែលត្រូវបានចាត់ទុកថា មានសក្ដានុពលក្នុងការគាំទ្រឱ្យមានការកកើតភពទាំងឡាយដែលអាចទ្រទ្រង់ជីវិត។

ជាងនេះទៀត ក្រុមអ្នកស្រាវជ្រាវនេះក៏ជឿថា ភពដែលវិលជុំវិញផ្កាយ HD 76932 និង HD 201991 ទំនងជាមានជីវមណ្ឌល (Biosphere) ជឿនលឿនជាងផែនដីទៅទៀត។ ប្រការនេះនាំឱ្យមានការរំពឹងថា រយៈពេលពីបួនដល់ប្រាំពាន់លានឆ្នាំ បានអនុញ្ញាតឱ្យភពទាំងនេះមានភាវៈរស់ ឬមានអរិយធម៌ជឿនលឿនជាងអ្វីដែលកំពុងកើតមាននៅលើផែនដី។

ក្រុមស្រាវជ្រាវកំណត់បាន «ដែនដីដែលមានសក្ដានុពល» សម្រាប់ភាវៈរស់នេះ តាមរយៈការរកឃើញអ៊ុយរ៉ាញ៉ូម-239 និងប៉ូតាស្យូមក្នុងបរិមាណច្រើន ដែលមាននៅក្នុងផ្កាយទាំងពីរដួងខាងលើ ក៏ដូចជាអាយុរបស់ផ្កាយដែលត្រូវបានវាស់ស្ទង់ដោយផ្កាយរណប Gaia របស់ទីភ្នាក់ងារអវកាសអឺរ៉ុប (ESA)។

យោងតាមរបាយការណ៍នៅលើ Research Notes of the American Astronomical Society ផ្កាយ HD 76932 និងផ្កាយ HD 201991 មានចម្ងាយពីផែនដីប្រហែល 70 និង 110 ឆ្នាំពន្លឺ (មួយឆ្នាំពន្លឺមានចម្ងាយប្រហែល 9.46 (9,460,000,000,000) ទ្រីលានគីឡូម៉ែត្រ) និងស្ថិតតំបន់ជាយរបស់កាឡាក់ស៊ីមីលគីវ៉េ។ ផែនដីរបស់មនុស្សក៏ស្ថិតនៅក្នុងតំបន់ក្បែរជាយកាឡាក់ស៊ីនេះផងដែរ៕

November 10, 2023

ប្រទេសថៃ ត្រៀមកម្លាំងម្ភៃលាននាក់ដើម្បីបង្កើតចំណូលបួនទ្រីលានបាត/ឆ្នាំ

រាជរដ្ឋាភិបាលថៃទើបតែបានប្រកាសផែនការប្រើប្រាស់កម្លាំងទន់ដើម្បីជួយបង្កើតប្រាក់ចំណូលប្រចាំឆ្នាំប្រហែល 4 ទ្រីលាន (4,000,000,000,000.00) បាត នៅក្នុងរង្វង់បួនឆ្នាំខាងមុខ ដោយការចាប់ផ្ដើមអនុវត្តគម្រោងបណ្ដុះបណ្ដាលកម្លាំងពលកម្ម 20 លាននាក់ សម្រាប់ការអភិវឌ្ឍឧស្សាហកម្មច្នៃប្រណិតចំនួន 11 វិស័យ និងជំរុញកម្លាំងទន់របស់ប្រទេសនេះនៅទូទាំងពិភពលោក។

គំនិតថ្មីរបស់រាជរដ្ឋាភិបាលថៃនេះ នឹងត្រូវបានចែកជាបីដំណាក់កាល ក្នុងនោះដំណាក់កាលដំបូងនឹងត្រូវបានអនុវត្តក្នុងរយៈពេល 100 ថ្ងៃ និងផ្ដោតទៅលើការបង្កើតបណ្ដាទីតាំងព្រឹត្តិការណ៍ កែសម្រួលបទបញ្ជានានាដែលទាក់ទងនឹងក្រសួងវប្បធម៌ និងការប្រារព្ធពិធីបុណ្យទាំងឡាយនៅក្នុងរដូវរងា។

ដំណាក់កាលទីពីរដែលអូសបន្លាយដល់ខែមេសាឆ្នាំ 2024 នឹងផ្ដោតលើគំនិតផ្ដួចផ្ដើម «គ្រួសារមួយ – អំណាចទន់មួយ» ដែលនឹងត្រូវអនុវត្តជាមួយនឹងសំណើបង្កើតអាជ្ញាធរគ្រប់គ្រងមាតិកម្មច្នៃប្រឌិតថៃ (THACCA)។

ដំណាក់កាលនេះ មនុស្ស 20 លាននាក់ មកពី 20 លានគ្រួសារ នឹងត្រូវបានបណ្ដុះបណ្ដាល ដើម្បីអភិវឌ្ឍអំណាចទន់របស់ប្រទេសជាតិ ដែលបង្កបង្កើតឡើងពីវិស័យឧស្សាហកម្មច្នៃប្រឌិតចំនួន 11 រួមមាន ម្ហូបអាហារ កីឡា ពិធីបុណ្យ ទេសចរណ៍ តន្ត្រី សៀវភៅ ភាពយន្ត ល្បែងកម្សាន្ត សិល្បៈ ការរចនា និងការច្នៃម៉ូដែលសម្លៀកបំពាក់។ ក្នុងដំណាក់កាលនេះ ពិធីបុណ្យជះទឹក (ចូលឆ្នាំថ្មី) និងវេទិកាអំណាចទន់ នឹងត្រូវបានប្រារព្ធឡើងនៅប្រទេសថៃ។

ដំណាក់កាលចុងក្រោយនៃគំនិតផ្ដួចផ្ដើមនេះគ្រោងនឹងអូសបន្លាយដល់ខែតុលា 2024។ បណ្ដាព្រឹត្តិការណ៍មហោស្រពភាពយន្ត និងតន្ត្រី នឹងត្រូវបានជំរុញបន្ថែមដើម្បីគាំទ្រដល់អំណាចទន់របស់ប្រទេសថៃ ក្នុងការចូលរួមក្នុងព្រឹត្តិការណ៍សកលនានា។ ក្រសួងការបរទេសនឹងទទួលខុសត្រូវទាំងស្រុងតាមរយៈការប្រឹងប្រែងរបស់អ្នកការទូត និងទីប្រឹក្សាពាណិជ្ជកម្មថៃនៅតាមបណ្ដាប្រទេសលើពិភពលោក។

ក្រសួងវប្បធម៌ថៃកំណត់គោលដៅបង្កើតតម្លៃសេដ្ឋកិច្ចនៅក្នុងបណ្ដាវិស័យជាក់លាក់ មានជាអាទិ៍ ភាពយន្ត ការរចនាសម្លៀកបំពាក់ ម្ហូបអាហារ-ភេសជ្ជៈ កីឡា តន្ត្រី ទេសចរណ៍-វប្បធម៌ អក្សរសិល្ប៍ សិល្បៈសហសម័យ សុខាភិបាល-សុខភាព សុសវែរ-ល្បែងកម្សាន្ត ក្នុងបំណងរកប្រាក់ចំណូលឱ្យបាន 300 ដល់ 400 លានបាតពីព្រឹត្តិការណ៍នីមួយៗ។

ក្រសួងវប្បធម៌ថៃក៏សហការជាមួយវិទ្យាស្ថានគ្រប់គ្រងពាណិជ្ជកម្ម Sasin របស់សាកលវិទ្យាល័យ Chulalongkorn ដើម្បីបង្កើតសន្ទស្សន៍ស្ថិតិវប្បធម៌ វាស់ស្ទង់ផលប៉ះពាល់របស់បណ្ដាសកម្មភាពវប្បធម៌ចំពោះសេដ្ឋកិច្ចប្រទេសនេះផងដែរ។ វិធីសាស្ត្រគ្រប់ជ្រុងជ្រោយនេះគឺធ្វើឡើងក្នុងគោលដៅលើកកម្ពស់អំណាចទន់របស់ប្រទេសថៃ ក៏ដូចជាតម្លៃសេដ្ឋកិច្ច និងវប្បធម៌របស់ប្រទេសនេះ នៅលើឆាកអន្តរជាតិ៕

November 8, 2023

វិស័យទេសចរណ៍កម្ពុជាងើបឡើងវិញ គ្រាដែលភ្ញៀវបរទេសវិលមកជាបណ្ដើរៗ

កម្ពុជារំពឹងខ្ពស់ទៅលើកំណើនទេសចរអន្តរជាតិនៅក្នុងរដូវបុណ្យនាចុងឆ្នាំនេះ និងបានត្រៀមខ្លួនរួចរាល់សម្រាប់ការធ្វើបដិសណ្ឋារកិច្ចចំពោះភ្ញៀវដែលមកទស្សនាតំបន់ទេសចរណ៍ល្បីៗ ពិសេសគឺអង្គរវត្ត។

លោក ហុង ប៉ូលីន ដែលមានបទពិសោធន៍ជាមគ្គុទេសក៍ទេសចរណ៍ជាងមួយទសវត្សរ៍ ហើយបច្ចុប្បន្នជាមគ្គុទេសក៍ទេសចរណ៍នៅតំបន់អង្គរ បានសម្ដែងការសប្បាយរីករាយនៅពេលឃើញទេសចរបរទេសជាច្រើនវិលត្រលប់មកវិញ។ យោងតាមមគ្គុទេសក៍ទេសចរណ៍រូបនេះ វិស័យទេសចរណ៍កម្ពុជាកំពុងតែបង្ហាញសញ្ញាវិជ្ជមានច្រើន បន្ទាប់ពីរងផលប៉ះពាល់ដោយសារកូវីដ-19។

លោក ប៉ូលីន និយាយថា «ក្រោយពីកូវីដ-19 ត្រូវបានគ្រប់គ្រង ទេសចរក៏ចាប់ផ្ដើមវិលត្រលប់មកកាន់អង្គរវត្តក្នុងចំនួនកើនឡើងពីមួយថ្ងៃទៅមួយថ្ងៃ។ ពិសេសគឺនៅខែតុលា និងខែវិច្ឆិកា ខ្ញុំឃើញថា ចំនួនភ្ញៀវបរទេសដែលវិលត្រលប់មកកម្ពុជា ពិតជាច្រើន»។

លោក ហុង ប៉ូលីន បច្ចុប្បន្នជាមគ្គុទេសក៍ទេសចរណ៍នៅតំបន់អង្គរ

លោក ស៊ិន ច័ន្ទសិរីវុត្ថា អនុរដ្ឋលេខាធិការ និងជាអ្នកនាំពាក្យអាកាសចរណ៍ស៊ីវិលកម្ពុជា បានឱ្យដឹងថា ក្នុងសប្ដាហ៍កន្លង ចំនួនភ្ញៀវទេសចរណ៍អន្តរជាតិមកដល់ព្រលានយន្តហោះសៀមរាប បានកើនជាមធ្យមប្រហែល 2,700 នាក់/ថ្ងៃ។ ភាគច្រើនពួកគេមកពីបណ្ដាប្រទេសក្នុងតំបន់អាស៊ីអាគ្នេយ៍ (75%) និងអឺរ៉ុប (25%)។ តួលេខនេះបានបង្ហាញអំពីការងើបឡើងវិញយ៉ាងខ្លាំងក្លារបស់វិស័យទេសចរណ៍របស់កម្ពុជា។

ក្នុង 9 ខែដំបូងនៃឆ្នាំ 2023 កម្ពុជាទាក់ទាញទេសចរបរទេសបាន 3.92 លាននាក់ កើន 211% បើធៀបនឹងដំណាក់កាលដូចគ្នាក្នុងឆ្នាំ 2022។ ភ្ញៀវថៃឈរលំដាប់លេខមួយក្នុងចំណោមភ្ញៀវបរទេសដែលបានមកទស្សនាកម្ពុជា ខណៈដែលវៀតណាម និងចិនឈរលំដាប់លេខពីរ និងលេខបី។

អ្នកនាំពាក្យអាកាសចរណ៍ស៊ីវិលកម្ពុជា អះអាងថា ចាប់ពីចុងខែតុលាឆ្នាំ 2023 ដល់ខែមីនាឆ្នាំ 2024 ចំនួនជើងហោះហើរមកកាន់ព្រលានយន្តហោះសៀមរាបនឹងកើនឡើងដល់ 40 ជើងជារៀងរាល់សប្ដាហ៍ ខណៈចំនួនក្រុមហ៊ុនអាកាសចរណ៍នឹងកើនពី 9 ឡើងដល់ 10 ក្រុមហ៊ុន។ យោងតាមលោក ស៊ិន ច័ន្ទសិរីវុត្ថា វិស័យទេសចរណ៍កម្ពុជាបានត្រៀមខ្លួនរួចរាល់ និងបានធ្វើគ្រប់យ៉ាងដើម្បីត្រៀមសម្រាប់ការវិលត្រលប់របស់ភ្ញៀវអន្តរជាតិ។

កាលពីថ្ងៃទី 02 វិច្ឆិកា 2023 ក្រសួងទេសចរណ៍កម្ពុជា ក៏បានចេញសេចក្តីជូនដំណឹងស្តីពី «កម្ពុជាជាគោលដៅទេសចរណ៍ឈានមុខគេលើពិភពលោក ផ្នែកទេសចរណ៍វប្បធម៌ និងដំណើរកម្សាន្តរបស់យុវជន ឆ្នាំ 2023» បន្ទាប់ពីមានកម្មវិធីបោះឆ្នោតជ្រើសរើសតាមអ៊ីនធើរណិត ដោយក្រុមអ្នកជំនាញ និងសាធារណជនពីជុំវិញពិភពលោក ដែលរៀបចំដោយក្រុមហ៊ុន World Travel Awards នៅចក្រភពអង់គ្លេស។

នៅព្រឹកថ្ងៃទី 04 ខែវិច្ឆិកា ឆ្នាំ 2023 កម្ពុជាក៏បានទទួលភ្ញៀវបរទេសចូលមកកម្សាន្តនៅខេត្តព្រះសីហនុ តាមនាវាទេសចរណ៍មួយគ្រឿង ឈ្មោះ VIKING ORION របស់ប្រទេសន័រវែស ដែលដឹកមនុស្សសរុប 1,337 នាក់ ផងដែរ៕

November 7, 2023

ម៉ាឡេស៊ី និងសិង្ហបុរី បង្កើតតំបន់សេដ្ឋកិច្ចពិសេសរួមនៅជាប់ព្រំដែន

ថ្នាក់ដឹកនាំនៃប្រទេសម៉ាឡេស៊ី និងសិង្ហបុរី បានព្រមព្រៀងបង្កើតតំបន់សេដ្ឋកិច្ចពិសេសរួមដែលមានឈ្មោះថា តំបន់សេដ្ឋកិច្ចពិសេស Johor – Singapore (SEZ)។

ក្រោយជំនួបពិភាក្សាកាលពីថ្ងៃទី 30 តុលា នាយករដ្ឋមន្ត្រីសិង្ហបុរី លី សៀនឡុង និងសមភាគីម៉ាឡេស៊ី អាន់វ៉ា អ៊ីប្រាហ៊ីម បានចេញសេចក្ដីថ្លែងការណ៍រួមស្ដីពីការព្រមព្រៀងឆ្ពោះទៅរកការបង្កើតតំបន់សេដ្ឋកិច្ចពិសេស SEZ ។ តំបន់សេដ្ឋកិច្ចពិសេសនេះនឹងត្រូវបានបង្កើតឡើងនៅក្នុងតំបន់ Iskandar រដ្ឋ Johor របស់ប្រទេសម៉ាឡេស៊ី ក្បែរព្រំដែនជាមួយនឹងសិង្ហបុរី។

«SEZ នឹងប្រើប្រាស់កម្លាំងបន្ថែមរបស់ប្រទេសទាំងពីរ ដើម្បីជំរុញការតភ្ជាប់សេដ្ឋកិច្ច តាមរយៈការកែលម្អលំហូរទំនិញ វិនិយោគ និងមនុស្សឆ្លងព្រំដែន» សេចក្ដីប្រកាសរួមលើកឡើងដូច្នេះ។

លោក លី សៀនឡុង អះអាងថា «ប្រការនេះនឹងធ្វើឱ្យប្រសើរឡើងនូវកម្លាំងទាក់ទាញផ្នែកសេដ្ឋកិច្ចសម្រាប់សិង្ហបុរី និងរដ្ឋ Johor របស់ម៉ាឡេស៊ី»។ លោកបន្ថែមថា ភាគីទាំងពីរកំពុងសហការគ្នាសិក្សាអំពីលទ្ធភាពនៃគម្រោង ដើម្បីកំណត់ចំណុចស្នូលរបស់តំបន់ពិសេស ជាពិសេសគឺផលប្រយោជន៍របស់អ្នកវិនិយោគ និងតម្រូវការទីផ្សារ។

នាយករដ្ឋមន្ត្រីសិង្ហបុរី លី សៀនឡុង (ស្ដាំ) និងសមភាគីម៉ាឡេស៊ី អាន់វ៉ា អ៊ីប្រាហ៊ីម

នាយករដ្ឋមន្ត្រីម៉ាឡេស៊ី លោក អានវ៉ា អ៊ីប្រាហ៊ីម ឱ្យដឹងថា ភាគីទាំងពីរគ្រោងនឹងចុះហត្ថលេខាលើអនុស្សរណៈនៃការយោគយល់គ្នានៅក្នុងខែមករាឆ្នាំក្រោយ។

សិង្ហបុរី និងម៉ាឡេស៊ី គឺជាដៃគូសហការផ្នែកពាណិជ្ជកម្មធំជាងគេលំដាប់ទីពីររបស់គ្នាកាលពីឆ្នាំ 2022 ដោយចំណូយបានពីពាណិជ្ជកម្មសម្រេចបានជាង 83.5 ពាន់លានដុល្លារអាម៉េរិក។ សិង្ហបុរីក៏ជាមួយក្នុងចំណោមប្រភពវិនិយោគផ្ទាល់ពីបរទេសលំដាប់កំពូលរបស់ម៉ាឡេស៊ីផងដែរ ដោយរួមចំណែកប្រមាណ 8.3% នៃទុនវិនិយោគបរទេសសរុបកាលពីឆ្នាំកន្លង៕

November 1, 2023

Tag: មនុស្ស