ភព - La Reine Media

កម្ពុជាលើកលែងការបង់កម្រៃគយចំពោះទំនិញមានតម្លៃក្រោមមួយពាន់ដុល្លារ

ប្រមុខរាជរដ្ឋាភិបាលកម្ពុជា បានប្រកាសលើកលែងការបង់ប្រាក់សម្រាប់ការបំពេញបែបបទគយ ចំពោះទំនិញនាំចេញ-នាំចូល ដែលមានតម្លៃក្រោម 1,000 ដុល្លារអាម៉េរិក រួមនឹងការកាត់បន្ថយកម្រៃប្រតិវេទន៍គយផងដែរ។

ការប្រកាសដូចខាងលើដែលត្រូវបានធ្វើឡើងកាលពីថ្ងៃទី 13 ខែវិច្ឆិកា ឆ្នាំ 2023 នៅក្នុងវេទិកា «រាជរដ្ឋាភិបាល-ផ្នែកឯកជន» លើកទី 19 គឺក្នុងបំណងសម្រួលដល់ការធ្វើពាណិជ្ជកម្ម ដើម្បីលើកកម្ពស់សមត្ថភាពប្រកួតប្រជែងរបស់កម្ពុជា នៅក្នុងទីផ្សារពិភពលោក។

សម្តេចបវរធិបតី ហ៊ុន ម៉ាណែត ក៏បានប្រកាសកាត់បន្ថយកម្រៃប្រតិវេទន៍គយពី 15,000 រៀល មកនៅត្រឹម 8,000 រៀល ក្នុងមួយប្រតិវេទន៍ ចំពោះទំនិញនាំចេញ-នាំចូល ដែលមានតម្លៃក្រោម 1,000 ដុល្លារអាម៉េរិក រួមនឹងការលើកលែងការបង់កម្រៃស្គែន ចំពោះកុងតឺន័រ ដែលមិនបានឆ្លងកាត់ម៉ាស៊ីនស្គែនផងដែរ។

ទន្ទឹមនឹងនេះ ចាប់ពីថ្ងៃទី 01 ខែមករា ឆ្នាំ 2024 កម្ពុជា ក៏នឹងដាក់ឱ្យអនុវត្តនូវការងារមួយចំនួនដូចខាងក្រោម៖

វិធាន និងនីតិវិធីសម្រាប់ការរាយការណ៍អំពីទំនិញ និងការបំពេញបែបបទគយមុនពេលទំនិញមកដល់ តាមប្រព័ន្ធអេឡិចត្រូនិច
វិធាន និងនីតិវិធីសម្រាប់ការរាយការណ៍អំពីទំនិញ និងការបំពេញបែបបទគយ ចំពោះបញ្ញើប្រៃសណីយ៍ បញ្ញើរហ័ស និងទំនិញពាណិជ្ជកម្ម តាមប្រព័ន្ធអេឡិចត្រូនិចឆ្លងកាត់ព្រំដែន
ការធ្វើស្វ័យប្រវត្តិកម្មពេញលេញលើនីតិវិធីផ្ទៀងផ្ទាត់តម្លៃគិតពន្ធគយ និងសំអាងដើមកំណើតទំនិញក្នុងប្រព័ន្ធប្រតិវេទន៍តម្លៃគិតពន្ធគយ (CVDS)
ការតភ្ជាប់ប្រព័ន្ធ ដើម្បីបញ្ជូនដោយស្វ័យប្រវត្តិនូវទិន្នន័យប្រតិវេទន៍តម្លៃគិតពន្ធគយ ការបញ្ជាក់តម្លៃគិតពន្ធគយ និង ការផ្ដល់អត្រាពន្ធអនុគ្រោះ ពីប្រព័ន្ធ CVDS ទៅប្រព័ន្ធ ASYCUDA, និង
ការបោះពុម្ពលិខិតបញ្ជាក់ការផ្ទៀងផ្ទាត់តម្លៃគិតពន្ធគយ និងលិខិតបញ្ជាក់ការផ្ទៀងផ្ទាត់សំអាងដើមកំណើតទំនិញទម្រង់ក្រដាស អាចធ្វើឡើងក្នុងករណីមានការស្នើសុំរបស់ម្ចាស់ទំនិញ ឬ តំណាង។

យោងតាមរបាយការណ៍អគ្គនាយកដ្ឋានគយ និងរដ្ឋាករកម្ពុជា ការនាំចេញទំនិញរបស់កម្ពុជា ទៅកាន់ប្រទេសសំខាន់ៗចំនួន 20 ក្នុងរយៈពេល 10 ខែដំបូងនៃឆ្នាំ 2023 សម្រេចបានប្រមាណជាង 18.5 ពាន់លានដុល្លារអាម៉េរិក។

November 17, 2023

Goldman Sachs ថា «សេដ្ឋកិច្ចពិភពលោកនៅឆ្នាំ 2024 នឹងប្រសើរជាងការរំពឹងទុក

ក្រុមហ៊ុនវិនិយោគផ្នែកធនាគារនៅសហរដ្ឋអាម៉េរិក Goldman Sachs អះអាងថា សេដ្ឋកិច្ចពិភពលោកក្នុងឆ្នាំក្រោយនឹងប្រសើរជាងការរំពឹងទុករបស់មនុស្សជាច្រើន ខណៈដែលការផលិតនឹងងើបឡើងវិញ ហើយផលប៉ះពាល់ពីការដំឡើងការប្រាក់ក៏ថយចុះ។

នៅក្នុងរបាយការណ៍ដែលបានប្រកាសកាលពីចុងសប្ដាហ៍កន្លង ធនាគារ Goldman Sachs (សហរដ្ឋអាម៉េរិក) ព្យាករថា សេដ្ឋកិច្ចពិភពលោកនឹងមានកំណើន 2.6% នៅឆ្នាំក្រោយ ខ្ពស់ជាងការប៉ាន់ស្មាន 2.1% របស់ក្រុមសេដ្ឋវិទូដែលត្រូវបានស្រង់មតិ និងចុះផ្សាយដោយ Bloomberg។ សហរដ្ឋអាម៉េរិក ក៏ត្រូវបានរំពឹងថា មានកំណើនសេដ្ឋកិច្ច 2.1% ដែលខ្ពស់ជាងបណ្ដាប្រទេសអភិវឌ្ឍដទៃ។

ធនាគារ Goldman Sachs ក៏យល់ថា ភាគច្រើន ផលប៉ះពាល់ពីដំណើរការរឹតបន្តឹងសារពើពន្ធ និងរូបិយវត្ថុ នឹងលែងមានទៀតហើយ។ ដើម្បីគ្រប់គ្រងអតិផរណា ធនាគារកណ្ដាលរបស់សហរដ្ឋអាម៉េរិក (Fed) បានដំឡើងការប្រាក់ 11 លើករាប់ចាប់ពីខែមីនា 2022។ កាលពីសប្ដាហ៍កន្លង ប្រធាន Fed លោក Jerome Powell បានបង្ហាញសញ្ញាថា នឹងដំឡើងការប្រាក់ទៀត បើសិនជាចាំបាច់។

Goldman Sachs យល់ថា អតិផរណានឹងបន្តថយចុះនៅក្នុងបណ្ដាប្រទេសដែលមានសេដ្ឋកិច្ចជឿនលឿន និងទើបលេចធ្លោ ដោយចុះមកនៅត្រឹមពី 2 ទៅ 2.5%។ ធនាគារនេះក៏សង្ឃឹមថា សកម្មភាពផលិតរបស់រោងចក្រនានានៅទូទាំងពិភពលោកនឹងត្រូវបានស្ដារឡើងវិញ បន្ទាប់ពីរងសម្ពាធធ្ងន់ធ្ងរនៅក្នុងឆ្នាំនេះ៕

November 16, 2023

ក្រុមហ៊ុនហូឡង់រកវិធីបង្កកំណើតទារកដំបូងគេក្នុងទីអវកាស

ក្រុមហ៊ុន Spaceborn United របស់អ្នកជំនួញជនជាតិហូឡង់ Egbert Edelbroek កំពុងសិក្សាស្រាវជ្រាវដើម្បីបង្កកំណើត និងបង្កើតទារកតាមធម្មជាតិ នៅក្នុងបរិស្ថានដែលមានកម្លាំងទំនាញខ្សោយដូចនៅលើភពអង្គារ។

បើទោះជាមានឧបសគ្គច្រើនក្នុងដំណើរឆ្ពោះទៅការសម្រេចគោលដៅខាងលើ ប៉ុន្តែ លោក Edelbroek ជឿថា លោកអាចមើលឃើញទារកដំបូងដែលបង្កកំណើតក្នុងទីអវកាស។ នេះបើតាម AFP ចុះផ្សាយកាលពីថ្ងៃទី 14 វិច្ឆិកា 2023។

«មនុស្សជាតិត្រូវតែជាសត្វលោកដែលរស់នៅក្នុងអន្តរភព។ បើសិនជាចង់រស់នៅដោយឯករាជ្យនៅខាងក្រៅផែនដី យើងត្រូវការដោះស្រាយបញ្ហានៃការបន្តពូជ» លោក Edelbroek សង្កត់ធ្ងន់ដូច្នេះ។

ការបង្កកំណើតក្នុងទីអវកាស មានឧបសគ្គច្រើន។ ឧបសគ្គចម្បងគេគឺកង្វះកម្លាំងទំនាញ ធ្វើឱ្យគូស្នេហ៍ងាយនឹងអណ្តែតឆ្ងាយពីគ្នា ដូច្នេះ Spaceborn United គឺជាក្រុមហ៊ុនដំបូងគេដែលស្វែងរកវិធីបង្កកំណើតនៅទីអវកាស។

យោងតាមលោក Edelbroek ឧបសគ្គមួយទៀត នោះគឺធាតុរាវរបស់រាងកាយនឹងត្រូវបានរុញច្រានឡើងទៅលើ នៅក្នុងបរិស្ថានកម្លាំងទំនាញទាប ដែលផ្ទុយពីនៅលើផែនដី។ ដូច្នេះ ជាដំបូង មនុស្សត្រូវការបង្កើតបរិស្ថានមួយដែលល្អឥតខ្ចោះ។

ក្រុមអ្នកវិទ្យាសាស្ត្រកំពុងស្វែងយល់អំពីវិធីបង្កកំណើតក្នុងបន្ទប់ពិសោធន៍ដែលមានកម្លាំងទំនាញផែនដីទាប ប៉ុន្តែ លោក Edelbroek និយាយថា គម្រោងបាញ់បង្ហោះកោសិកាកណ្ដុរទៅពិសោធក្នុងទីអវកាសនឹងធ្វើឡើងនៅចុងឆ្នាំនេះ។ បន្ទាប់មក ក្នុងរយៈពេលពី 5 ដល់ 6 ឆ្នាំទៀត ក្រុមហ៊ុននេះនឹងពិសោធលើកោសិកាមនុស្ស។

បញ្ហាសីលធម៌គឺជាមូលហេតុដែលធ្វើឱ្យការបង្កកំណើតក្នុងទីអវកាស ទាក់ទាញចំណាប់អារម្មណ៍របស់បណ្ដាក្រុមហ៊ុនឯកជនដូច Spaceborn ជំនួសឱ្យណាសា ដែលរារែកក្នុងការផ្ដល់ថវិកាសម្រាប់ប្រធានបទ «រសើប»។ ក៏ប៉ុន្តែ លោក Edelbroek ជឿថា នឹងមានពេលវេលាគ្រប់គ្រាន់ដើម្បីបង្កើតទារកដំបូងដែលបង្កកំណើតក្នុងអវកាស មុនពេលលោកទទួលមរណភាព៕

November 16, 2023

ក្រុមហ៊ុនកៅស៊ូវៀតណាមនៅកម្ពុជា ស្ថិតក្នុងដំណាក់កាលចំណេញពីកៅស៊ូជិត 90,000 ហិកតា

ក្រុមហ៊ុនឧស្សាហកម្មកៅស៊ូវៀតណាម VRG បច្ចុប្បន្នមានក្រុមហ៊ុនបុត្រសម្ព័ន្ធចំនួន 16 ដែលអនុវត្តគម្រោងកៅស៊ូលើផ្ទៃដីជិត 90,000 ហិកតានៅកម្ពុជា កំពុងស្ថិតក្នុងដំណាក់កាលប្រមូលផល និងមានប្រាក់ចំណេញប្រចាំឆ្នាំ។

ក្រុមហ៊ុនឧស្សាហកម្មកៅស៊ូវៀតណាម VRG (Vietnam Rubber Group) បាន និងកំពុងវិនិយោគលើគម្រោងដាំដើមកៅស៊ូក្នុងខេត្តចំនួន 7 នៅកម្ពុជា ដែលភាគច្រើនស្ថិតក្នុងតំបន់ដាច់ស្រយាល តំបន់ព្រំដែនជាប់នឹងប្រទេសវៀតណាម។ នេះបើតាមសារព័ត៌មានវៀតណាម NLD ចុះផ្សាយនាថ្ងៃទី 15 វិច្ឆិកា 2023។

លោក ឡេ វ៉ាន់ឡាំ អគ្គនាយកក្រុមហ៊ុនកៅស៊ូដុងណៃ – ក្រចេះ ដែលជាកម្មសិទ្ធិរបស់ក្រុមហ៊ុនឧស្សាហកម្មកៅស៊ូវៀតណាម VRG ឱ្យដឹងថា ក្នុងឆ្នាំ 2021 ក្រុមហ៊ុននេះរកបានប្រាក់ចំណេញប្រចាំឆ្នាំ 8.18 ពាន់លានដុង (336,000 ដុល្លារអាម៉េរិក) ខណៈដែលគម្រោងនេះនៅខាត 25.8 ពាន់លានដុង ព្រោះនេះជាគម្រោងយូរអង្វែង។ លោក វ៉ាន់ឡាំ បន្តថា ក្នុងឆ្នាំ 2022 ក្រុមហ៊ុនដែលលោកគ្រប់គ្រង រកបានប្រាក់ចំណេញ 18.9 ពាន់លានដុង (778,000 ដុល្លារអាម៉េរិក)។

បើសិនជាការរីកចម្រើនបន្តរលូនដូចឆ្នាំ 2022 គម្រោងវិនិយោគនេះនឹងអាចស្រង់ដើមទុនគ្រប់ចំនួននៅក្នុងឆ្នាំ 2026 និងចាប់ផ្ដើមការវិនិយោគសម្រាប់វដ្តថ្មីចាប់ពីឆ្នាំ 2028។ យោងតាមលោក វ៉ាន់ឡាំ ពេលនោះ ក្រុមហ៊ុននឹងមានប្រភពចំណូលបន្ថែមពីឈើកៅស៊ូ ដែលតម្លៃទីផ្សារបច្ចុប្បន្នប្រហែល 250 លានដុង/ហិកតា គ្រាដែលការដាំឡើងវិញគឺចំណាយប្រហែលតែ 65 លានដុង/ហិកតា»។

ចំណែកក្រុមហ៊ុនកៅស៊ូដុងហ្វូ – ក្រចេះ វិញ មានរោងចក្រកែច្នៃដ៏ធំ ដែលអាចកែច្នៃជ័រកៅស៊ូបានពី12,000 ដល់ 13,000 តោន/ឆ្នាំ។ ឆ្នាំ 2021 ក្រុមហ៊ុននេះរកប្រាក់ចំណេញបាន 69.3 ពាន់លានដុង ខណៈឆ្នាំ 2022 ចំណេញ 53.26 ពាន់លានដុង។

ទន្ទឹមនឹងនេះ Vketi ដែលជាក្រុមហ៊ុនបុត្រសម្ព័ន្ធរបស់ Locninh Rubber ដែលជាសមាជិកមួយរបស់ VRG ក៏មានប្រាក់ចំណេញប្រចាំឆ្នាំ ចាប់ពីឆ្នាំ 2021 ក្នុងនោះ ឆ្នាំ 2022 ចំណេញជាង 5 ពាន់លានដុង។

ចំណែកសមាជិកមួយទៀតរបស់ Vietnam Rubber Group គឺក្រុមហ៊ុនកៅស៊ូ Dau Tieng ក្រចេះ និង Dau Tieng កម្ពុជា (នៅក្រចេះ) ក៏សុទ្ធតែមានប្រាក់ចំណេញក្នុងឆ្នាំ 2022។ ក្នុងនោះ ក្រុមហ៊ុនកៅស៊ូ Dau Tieng ក្រចេះ ចំណេញ 12 ពាន់លានដុង និង Dau Tieng កម្ពុជា ចំណេញ 6.7 ពាន់លានដុង។ នេះបើតាមលោក ទ្រិញ វ៉ាន់ហ្វាង អគ្គនាយករបស់ក្រុមហ៊ុនទាំងពីរនេះ៕

November 16, 2023

ថៃអញ្ជើញអាម៉េរិកមកវិនិយោគលើ «មហាស្ពានគោក» តម្លៃជិត 30 ពាន់លានដុល្លារ

គម្រោងស្ពានគោក Landbridge របស់ប្រទេសថៃ នឹងរួមមានកំពង់ផែទឹកជ្រៅចំនួនពីរ និងបណ្ដាញផ្លូវល្បឿនលឿន ក៏ដូចជាផ្លូវដែកដែលមានប្រវែងសរុប 100 គីឡូម៉ែត្រ តភ្ជាប់កំពង់ផែទាំងពីរនេះ។

ទំព័រ Bloomberg បានផ្សាយថា ប្រទេសថៃកំពុងហៅរកទុនវិនិយោគដែលមានតម្លៃច្រើនពាន់លានដុល្លារអាម៉េរិក ដោយគ្រោងនឹងផ្ដល់ជម្រើសមួយដែលជំនួសឈូងសមុទ្រ Malacca ដែលជាមួយក្នុងចំណោមផ្លូវដឹកជញ្ជូនតាមសមុទ្រដែលមមាញឹកបំផុតលើពិភពលោក។

កាលពីម្សិលមិញ នាយករដ្ឋមន្ត្រីថៃ Srettha Thavisin បានប្រាប់ក្រុមអ្នកវិនិយោគអាម៉េរិកនៅ San Francisco អំពីព័ត៌មានជាច្រើនដែលទាក់ទងនឹងគម្រោងដែលមានឈ្មោះថា Landbridge។ គម្រោងនេះនឹងជួយកាត់បន្ថយពេលវេលានៃការធ្វើដំណើររវាងមហាសមុទ្រឥណ្ឌា និងមហាសមុទ្រប៉ាស៊ីហ្វិក បានជាមធ្យមបួនថ្ងៃ និងកាត់បន្ថយការចំណាយលើការដឹកជញ្ជូន 15%។

គម្រោង Landbridge គ្រោងនឹងត្រូវចំណាយទុនវិនិយោគប្រហែលមួយទ្រីលានបាត (ប្រហែលនឹង 28 ពាន់លានដុល្លារអាម៉េរិក) ដែលរួមមានទាំងកំពង់ផែសមុទ្រដែលនឹងត្រូវបានសាងសង់នៅលើឧបទ្វីបភាគខាងត្បូងប្រទេសថៃ។ កំពង់ផែទឹកជ្រៅទាំងពីរនេះនឹងត្រូវបានតភ្ជាប់ជាមួយគ្នាដោយបណ្ដាញផ្លូវល្បឿនលឿន និងផ្លូវដែកប្រវែង 100 គីឡូម៉ែត្រ។

ស្ថិតនៅចន្លោះប្រទេសម៉ាឡេស៊ី និងសិង្ហបុរី ច្រកសមុទ្រម៉ាឡាកា បច្ចុប្បន្នគឺជាផ្លូវសមុទ្ររយៈចម្ងាយខ្លីបំផុតដែលតភ្ជាប់តំបន់អាស៊ីប៉ាស៊ីហ្វិក ជាមួយនឹងប្រទេសឥណ្ឌា និងមជ្ឈឹមបូព៌ា។ ទំនិញប្រហែលជា ¼ របស់ពិភពលោក ត្រូវបានដឹកជញ្ជូនតាមផ្លូវនេះ។

នាយករដ្ឋមន្ត្រីថៃនិយាយថា «មហាគម្រោង Landbridge នេះ ប្រាកដជានឹងក្លាយជាផ្លូវដឹកជញ្ជូនដែលចំណាយទាបជាង លឿនជាង និងសុវត្ថិភាពជាង»។

ប្រទេសថៃបានកំណត់គោលដៅថា ដល់ឆ្នាំ 2030 មហាគម្រោងនេះនឹងសម្រេចបានជាស្ថាពរ។ អ្នកវិនិយោគបរទេសត្រូវបានអនុញ្ញាតឱ្យកាន់កាប់ភាគហ៊ុនជាង 50% នៅក្នុងបណ្ដាក្រុមហ៊ុនបណ្ដាក់ទុនរួមគ្នារបស់ក្រុមហ៊ុនបរទេស និងក្រុមហ៊ុនក្នុងស្រុក ដើម្បីស្ថាបនាកំពង់ផែ និងហេដ្ឋារចនាសម្ព័ន្ធដែលទាក់ទង។ កំពង់ផែទឹកជ្រៅនៅ Ranong (ទល់មុខនឹងសមុទ្រ Andaman) និងនៅ Chumphon (ទល់មុខនឹងឈូងសមុទ្រថៃ) អាចត្រូវចំណាយទុន 630 ពាន់លានបាត៕

November 15, 2023

ការដាច់ទំនាក់ទំនងនឹងផែនដី ធ្វើឱ្យយានស្រាវជ្រាវភពអង្គារត្រូវធ្វើសកម្មភាពតែឯង

ទីភ្នាក់ងារអវកាសអាម៉េរិក (ណាសា) បានផ្អាកការបញ្ជូនបញ្ជាទៅកាន់រ៉ូបូតនានារបស់ខ្លួន ដែលកំពុងស្រាវជ្រាវលើភពព្រះអង្គារ ធ្វើឱ្យពួកវាត្រូវធ្វើសកម្មភាពដោយស្វ័យប្រវត្ត។

បច្ចុប្បន្ន យើងកំពុងឆ្លងកាត់ព្រឹត្តិការណ៍មួយដែលអូសបន្លាយពេលពីរសប្ដាហ៍ នៅពេលផែនដី និងភពអង្គារស្ថិតនៅត្រង់ចំហៀងផ្ទុយគ្នារបស់ព្រះអាទិត្យ។ ដូច្នេះ បណ្ដាបេសកម្មនៅលើភពអង្គារក៏ត្រូវផ្អាកការទទួលបញ្ជាពីផែនដី ដើម្បីសុវត្ថិភាព។ នេះបើតាមទំព័រ Space.com។

«បេសកកម្មបច្ចុប្បន្នត្រូវផ្អាកបណ្ដោះអាសន្ន ព្រោះតែឧស្ម័នអ៊ីយ៉ូដក្ដៅដែលបំភាយចេញពីបរិយាកាសខាងក្រៅរបស់ព្រះអាទិត្យ (កូរ៉ូណា) អាចបង្ខូចរលកសញ្ញាវិទ្យុដែលត្រូវបានបញ្ជូនពីផែនដីទៅកាន់យានអវកាសលើភពអង្គារ នាំឱ្យមានសកម្មភាពមិនចង់បានកើតឡើង» ណាសាបានឱ្យដឹងកាលពីថ្ងៃទី 10 វិច្ឆិកាដូច្នេះ។

ក៏ប៉ុន្តែ បណ្ដាក្រុមបំពេញបេសកកម្មនៅភពអង្ការរបស់ណាសា នៅតែដំណើរការក្នុងអំឡុងពេលខាងលើ។ ក្នុងព្រឹត្តិការណ៍ដែលអូសបន្លាយពីថ្ងៃទី 10 វិច្ឆិកាដល់ 25 វិច្ឆិកា រ៉ូបូតទាំងអស់នឹងបន្តធ្វើសកម្មភាពទាំងឡាយដែលមិនចាំបាច់ទទួលបញ្ជាពីផែនដី។

ទន្ទឹមនឹងនេះ យានអវកាសបីគ្រឿងរបស់ណាសាដែលកំពុងគោចរជុំវិញភពអង្គារ ដែលរួមមាន Odyssey, MRO និង MAVEN ក៏នៅតែសង្កេតមើលភពនេះពីទីអវកាស។

November 15, 2023

អាម៉េរិកអនុម័តឱ្យប្រើប្រាស់វ៉ាក់សាំងដំបូងគេលើពិភពលោកដែលទប់ស្កាត់ជំងឺគ្រុនឈីក

រដ្ឋបាលចំណីអាហារ និងឪសថអាម៉េរិក (FDA) កាលពីថ្ងៃទី 09 វិច្ឆិកា ឆ្នាំ 2023 បានអនុម័តឱ្យប្រើប្រាស់វ៉ាក់សាំងដំបូងគេលើពិភពលោកដែលទប់ស្កាត់ការឆ្លងជំងឺគ្រុនឈីកពីមូសដែលមានផ្ទុកវីរុស Chikungunya។

សារព័ត៌មាន AFP ផ្សាយថា នៅក្នុងរបាយការណ៍មួយ FDA ឱ្យដឹងថា វ៉ាក់សាំងទប់ស្កាត់ជំងឺដែលកើតឡើងដោយសារវីរុស Chikungunya ត្រូវបានអនុម័តឱ្យប្រើប្រាស់សម្រាប់មនុស្សដែលមានអាយុចាប់ពី 18 ឆ្នាំឡើងទៅ ដែលប្រឈមនឹងហានិភ័យឆ្លងខ្ពស់ជាងគេ។ វ៉ាក់សាំងនេះត្រូវបានអភិវឌ្ឍដោយក្រុមហ៊ុន Valneva របស់អឺរ៉ុប ហើយថា នឹងត្រូវបានដាក់លក់ក្នុងទីផ្សារក្រោមឈ្មោះថា Ixchiq។

ការអនុម័តរបស់ FDA នេះ ត្រូវបានរំពឹងថា នឹងបង្កើនល្បឿននៃការដាក់ពង្រាយវ៉ាក់សាំង Ixchiq នៅតាមបណ្ដាប្រទេសដែលសម្បូរវីរុស Chikungunya ជាងគេ មានជាអាទិ៍ ទ្វីបអាហ្វ្រិក តំបន់អាស៊ីអាគ្នេយ៍ និងតំបន់មួយចំនួននៅទ្វីបអាម៉េរិកជាដើម។

ជំងឺគ្រុនឈីកបង្កឡើងដោយវីរុស Chikungunya ឬហៅថា វីរុសឈីក និងបណ្ដាលមកពីមូសខ្លាញី Aedes aegypti (the yellow fever mosquito) ខាំ ជាពិសេសនៅពេលថ្ងៃ ហើយអាចកើតមានចំពោះមនុស្សគ្រប់វ័យ និងឆ្លងពីមនុស្សម្នាក់ទៅមនុស្សម្នាក់ផ្សេងទៀត។

មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្រ្ត និងបាណកសាស្រ្ត នៃក្រសួងសុខាភិបាលកម្ពុជា បានឱ្យដឹងថា ជំងឺគ្រុនឈីកមានរោគសញ្ញាសំខាន់ៗចំនួនបី រួមមាន គ្រុនក្តៅពី 3 ទៅ 4 ថ្ងៃ, ឈឺសន្លាក់ឆ្អឹង និងមានស្នាមកន្ទួល ឬក្រហមលើស្បែកដូចកើតស្អូច ឬកញ្ជ្រឹល។ ជំងឺគ្រុនឈីកមិនបណ្តាលឱ្យអ្នកជំងឺស្លាប់ លើកលែងតែវាកើតរួមគ្នាជាមួយជំងឺផ្សេងៗ ដូចជាជំងឺគ្រុនឈាម គ្រុនចាញ់ ឬជំងឺរលាកស្រោមខួរជាដើម។

យោងតាមអង្គការសុខភាពពិភពលោក (WHO) រាប់ចាប់តាំងពីត្រូវបានរកឃើញលើកដំបូងនៅប្រទេសតង់ហ្សានីកាលពីឆ្នាំ 1952 វីរុសឈីកនេះបានឆ្លងរាលដាលដល់ប្រទេស និងដែនដីជាង 110 រួចហើយ។

AFP ឱ្យដឹងថា អ្នកជំនាញផ្នែកសុខាភិបាលសាធារណៈបានសម្ដែងការព្រួយបារម្ភថា វីរុស Chikungunya អាចបង្កឱ្យមានវិបត្តិសុខភាពសកលនៅក្នុងពេលអនាគត នៅពេលការប្រែប្រួលអាកាសធាតុជំរុញឱ្យមូសចម្លងវីរុសនេះទៅកាន់តំបន់ថ្មីៗនៅទូទាំងពិភពលោក៕

November 14, 2023

ភពចំនួនពីរដែលអាចមានអរិយធម៌ជឿនលឿនជាងផែនដីប្រាំពាន់លានឆ្នាំ

ការសិក្សាស្រាវជ្រាវមួយរបស់អង់គ្លេសបានបង្ហាញទីតាំងដែលកំពុងលាក់បាំងភពក្រៅប្រព័ន្ធព្រះអាទិត្យយ៉ាងតិចពីរ ដែលមានទ្វីប «ចាស់» ជាងផែនដីរហូតដល់ប្រាំពាន់លានឆ្នាំ និងអាចមានជីវិតដែលជឿនលឿនជាងមនុស្ស។

ក្រុមអ្នកវិទ្យាសាស្ត្រមកពីសាកលវិទ្យាល័យ Cardiff (អង់គ្លេស) បានឱ្យដឹងថា នៅជុំវិញផ្កាយពីរដួងដែលមានឈ្មោះថា HD 76932 និង HD 201991 អាចមានលាក់បាំងភពយ៉ាងតិចពីរដែលកកើតទ្វីបមុនផែនដីរហូតដល់ចាប់ពី 4 ទៅ 5 ពាន់លានឆ្នាំ។

យោងតាម Live Science ខាងលើនេះគឺជាលទ្ធផលនៃការចម្រាញ់ពីផ្កាយ 29 ដួងដែលត្រូវបានចាត់ទុកថា មានសក្ដានុពលក្នុងការគាំទ្រឱ្យមានការកកើតភពទាំងឡាយដែលអាចទ្រទ្រង់ជីវិត។

ជាងនេះទៀត ក្រុមអ្នកស្រាវជ្រាវនេះក៏ជឿថា ភពដែលវិលជុំវិញផ្កាយ HD 76932 និង HD 201991 ទំនងជាមានជីវមណ្ឌល (Biosphere) ជឿនលឿនជាងផែនដីទៅទៀត។ ប្រការនេះនាំឱ្យមានការរំពឹងថា រយៈពេលពីបួនដល់ប្រាំពាន់លានឆ្នាំ បានអនុញ្ញាតឱ្យភពទាំងនេះមានភាវៈរស់ ឬមានអរិយធម៌ជឿនលឿនជាងអ្វីដែលកំពុងកើតមាននៅលើផែនដី។

ក្រុមស្រាវជ្រាវកំណត់បាន «ដែនដីដែលមានសក្ដានុពល» សម្រាប់ភាវៈរស់នេះ តាមរយៈការរកឃើញអ៊ុយរ៉ាញ៉ូម-239 និងប៉ូតាស្យូមក្នុងបរិមាណច្រើន ដែលមាននៅក្នុងផ្កាយទាំងពីរដួងខាងលើ ក៏ដូចជាអាយុរបស់ផ្កាយដែលត្រូវបានវាស់ស្ទង់ដោយផ្កាយរណប Gaia របស់ទីភ្នាក់ងារអវកាសអឺរ៉ុប (ESA)។

យោងតាមរបាយការណ៍នៅលើ Research Notes of the American Astronomical Society ផ្កាយ HD 76932 និងផ្កាយ HD 201991 មានចម្ងាយពីផែនដីប្រហែល 70 និង 110 ឆ្នាំពន្លឺ (មួយឆ្នាំពន្លឺមានចម្ងាយប្រហែល 9.46 (9,460,000,000,000) ទ្រីលានគីឡូម៉ែត្រ) និងស្ថិតតំបន់ជាយរបស់កាឡាក់ស៊ីមីលគីវ៉េ។ ផែនដីរបស់មនុស្សក៏ស្ថិតនៅក្នុងតំបន់ក្បែរជាយកាឡាក់ស៊ីនេះផងដែរ៕

November 10, 2023

ប្រទេសថៃ ត្រៀមកម្លាំងម្ភៃលាននាក់ដើម្បីបង្កើតចំណូលបួនទ្រីលានបាត/ឆ្នាំ

រាជរដ្ឋាភិបាលថៃទើបតែបានប្រកាសផែនការប្រើប្រាស់កម្លាំងទន់ដើម្បីជួយបង្កើតប្រាក់ចំណូលប្រចាំឆ្នាំប្រហែល 4 ទ្រីលាន (4,000,000,000,000.00) បាត នៅក្នុងរង្វង់បួនឆ្នាំខាងមុខ ដោយការចាប់ផ្ដើមអនុវត្តគម្រោងបណ្ដុះបណ្ដាលកម្លាំងពលកម្ម 20 លាននាក់ សម្រាប់ការអភិវឌ្ឍឧស្សាហកម្មច្នៃប្រណិតចំនួន 11 វិស័យ និងជំរុញកម្លាំងទន់របស់ប្រទេសនេះនៅទូទាំងពិភពលោក។

គំនិតថ្មីរបស់រាជរដ្ឋាភិបាលថៃនេះ នឹងត្រូវបានចែកជាបីដំណាក់កាល ក្នុងនោះដំណាក់កាលដំបូងនឹងត្រូវបានអនុវត្តក្នុងរយៈពេល 100 ថ្ងៃ និងផ្ដោតទៅលើការបង្កើតបណ្ដាទីតាំងព្រឹត្តិការណ៍ កែសម្រួលបទបញ្ជានានាដែលទាក់ទងនឹងក្រសួងវប្បធម៌ និងការប្រារព្ធពិធីបុណ្យទាំងឡាយនៅក្នុងរដូវរងា។

ដំណាក់កាលទីពីរដែលអូសបន្លាយដល់ខែមេសាឆ្នាំ 2024 នឹងផ្ដោតលើគំនិតផ្ដួចផ្ដើម «គ្រួសារមួយ – អំណាចទន់មួយ» ដែលនឹងត្រូវអនុវត្តជាមួយនឹងសំណើបង្កើតអាជ្ញាធរគ្រប់គ្រងមាតិកម្មច្នៃប្រឌិតថៃ (THACCA)។

ដំណាក់កាលនេះ មនុស្ស 20 លាននាក់ មកពី 20 លានគ្រួសារ នឹងត្រូវបានបណ្ដុះបណ្ដាល ដើម្បីអភិវឌ្ឍអំណាចទន់របស់ប្រទេសជាតិ ដែលបង្កបង្កើតឡើងពីវិស័យឧស្សាហកម្មច្នៃប្រឌិតចំនួន 11 រួមមាន ម្ហូបអាហារ កីឡា ពិធីបុណ្យ ទេសចរណ៍ តន្ត្រី សៀវភៅ ភាពយន្ត ល្បែងកម្សាន្ត សិល្បៈ ការរចនា និងការច្នៃម៉ូដែលសម្លៀកបំពាក់។ ក្នុងដំណាក់កាលនេះ ពិធីបុណ្យជះទឹក (ចូលឆ្នាំថ្មី) និងវេទិកាអំណាចទន់ នឹងត្រូវបានប្រារព្ធឡើងនៅប្រទេសថៃ។

ដំណាក់កាលចុងក្រោយនៃគំនិតផ្ដួចផ្ដើមនេះគ្រោងនឹងអូសបន្លាយដល់ខែតុលា 2024។ បណ្ដាព្រឹត្តិការណ៍មហោស្រពភាពយន្ត និងតន្ត្រី នឹងត្រូវបានជំរុញបន្ថែមដើម្បីគាំទ្រដល់អំណាចទន់របស់ប្រទេសថៃ ក្នុងការចូលរួមក្នុងព្រឹត្តិការណ៍សកលនានា។ ក្រសួងការបរទេសនឹងទទួលខុសត្រូវទាំងស្រុងតាមរយៈការប្រឹងប្រែងរបស់អ្នកការទូត និងទីប្រឹក្សាពាណិជ្ជកម្មថៃនៅតាមបណ្ដាប្រទេសលើពិភពលោក។

ក្រសួងវប្បធម៌ថៃកំណត់គោលដៅបង្កើតតម្លៃសេដ្ឋកិច្ចនៅក្នុងបណ្ដាវិស័យជាក់លាក់ មានជាអាទិ៍ ភាពយន្ត ការរចនាសម្លៀកបំពាក់ ម្ហូបអាហារ-ភេសជ្ជៈ កីឡា តន្ត្រី ទេសចរណ៍-វប្បធម៌ អក្សរសិល្ប៍ សិល្បៈសហសម័យ សុខាភិបាល-សុខភាព សុសវែរ-ល្បែងកម្សាន្ត ក្នុងបំណងរកប្រាក់ចំណូលឱ្យបាន 300 ដល់ 400 លានបាតពីព្រឹត្តិការណ៍នីមួយៗ។

ក្រសួងវប្បធម៌ថៃក៏សហការជាមួយវិទ្យាស្ថានគ្រប់គ្រងពាណិជ្ជកម្ម Sasin របស់សាកលវិទ្យាល័យ Chulalongkorn ដើម្បីបង្កើតសន្ទស្សន៍ស្ថិតិវប្បធម៌ វាស់ស្ទង់ផលប៉ះពាល់របស់បណ្ដាសកម្មភាពវប្បធម៌ចំពោះសេដ្ឋកិច្ចប្រទេសនេះផងដែរ។ វិធីសាស្ត្រគ្រប់ជ្រុងជ្រោយនេះគឺធ្វើឡើងក្នុងគោលដៅលើកកម្ពស់អំណាចទន់របស់ប្រទេសថៃ ក៏ដូចជាតម្លៃសេដ្ឋកិច្ច និងវប្បធម៌របស់ប្រទេសនេះ នៅលើឆាកអន្តរជាតិ៕

November 8, 2023

ណាសាធ្វើតេស្តក្បាលបាញ់កម្លាំងរុញច្រានរបស់ម៉ាស៊ីនរ៉ុក្កែតដែលបោះពុម្ព 3D

ទីភ្នាក់ងារអវកាសអាម៉េរិក (ណាសា) ទើបតែបានធ្វើការសាកល្បងក្បាលបាញ់កម្លាំងរុញច្រានរបស់ម៉ាស៊ីនរ៉ុក្កែតអវកាស ដែលផលិតដោយបច្ចេកវិទ្យាបោះពុម្ព 3D នៅឯមជ្ឈមណ្ឌលអវកាស Marshall ក្នុងរដ្ឋ Alabama សហរដ្ឋអាម៉េរិក។

គម្រោងនេះត្រូវបានអនុវត្តដោយណាសា សហការជាមួយនឹងដៃគូចំនួនពីរគឺ Elementum 3D និង RPM Innovations។ នេះគឺជាផ្នែកមួយនៃគម្រោងផលិតសារធាតុបន្ថែមដែលមានប្រតិកម្ម សម្រាប់បដិវត្តន៍ឧស្សាហកម្មលើកទីបួន (RAMFIRE) របស់ណាសា។ RAMFIRE ប្រើប្រាស់ការរួមផ្សំជាមួយនឹងបច្ចេកវិទ្យាបោះពុម្ព 3D និងអាលុយមីញូម ដើម្បីកាត់បន្ថយពេលវេលា និងទម្ងន់ផលិតកម្ម ទន្ទឹមនឹងការកាត់បន្ថយចំណាយ និងអាចត្រូវបានផលិតនៅក្នុងទីអវកាស។

កន្លងមក អាលុយមីញូមមិនត្រូវបានប្រើប្រាស់ក្នុងការផលិតយានអវកាស ដោយសារតែវាងាយនឹងក្ដៅ និងប្រេះក្នុងពេលផ្សារភ្ជិត។ ក៏ប៉ុន្តែ បច្ចេកទេសបោះពុម្ព 3D ដែលណាសាប្រើប្រាស់ខាងលើ បានជួយដោះស្រាយបញ្ហាទាំងនេះ ដោយការលុបបំបាត់តម្រូវការផ្សារភ្ជាប់ និងបង្កើតបានចង្អូរតូចៗនៅខាងក្នុងលោហធាតុ អនុញ្ញាតឱ្យវាចុះត្រជាក់ ដែលជួយទប់ស្កាត់បញ្ហាក្ដៅរហូតដល់រលាយ។

John Vickers ប្រធានក្រុមស្រាវជ្រាវរបស់គម្រោង RAMFIRE បានឱ្យដឹងថា គម្រោងនានាដូច RAMFIRE នឹងជួយអភិវឌ្ឍបណ្ដាប្រព័ន្ធរុញច្រានថ្មីដែលគាំទ្រដល់បេសកកម្មប្រកបដោយមហិច្ឆតារបស់ណាសា ក្នុងការឆ្ពោះទៅកាន់ឋានព្រះចន្ទ ភពអង្គារ និងឆ្ងាយជាងនេះ៕

November 8, 2023

Tag: ភព