ពាណិជ្ជកម្ម

ក្រុមហ៊ុន Virtus Solis មានគម្រោងផលិតអគ្គិសនីព្រះអាទិត្យក្នុងទីអវកាស

ក្រុមហ៊ុន Virtus Solis គ្រោងនឹងប្រើប្រាស់រ៉ុក្កែត Starship ដើម្បីបាញ់បង្ហោះផ្ទាំងសូឡាទំហំមួយគីឡូម៉ែត្រ ឡើងទៅកាន់ទីអវកាស ដើម្បីផលិត និងបាញ់បញ្ជូនអគ្គិសនីពីលើមេឃមកកាន់ផែនដី។

Virtus Solis ដែលជាក្រុមហ៊ុនធុរកិច្ចថ្មីនៅរដ្ឋ Michigan សហរដ្ឋអាម៉េរិក ត្រូវបានបង្កើតឡើងដោយអតីតវិស្វកររ៉ុក្កែត John Bucknell របស់ក្រុមហ៊ុន SpaceX។ តំណាងក្រុមហ៊ុននេះបានអធិប្បាយអំពីគំនិតស្ដីពីការបាញ់បញ្ជូនអគ្គិសនីព្រះអាទិត្យពីទីអវកាស នៅក្នុងសន្និសីទអន្តរជាតិស្ដីពីថាមពលអវកាស ដែលត្រូវបានធ្វើឡើងនៅប្រទេសអង់គ្លេសកាលពីពាក់កណ្ដាលខែមេសា ឆ្នាំ2024។ នេះបើតាមទំព័រ Space ដែលបានចុះផ្សាយកាលពីថ្ងៃទី30 មេសា។

លោក Bucknell យល់ថា នៅពេលការចំណាយសម្រាប់ការបាញ់បង្ហោះផ្កាយរណបឡើងទៅកាន់គន្លងតារាវិថីកម្រិតទាបរបស់ផែនដីថយចុះមកនៅក្រោម 200ដុល្លារក្នុងមួយគីឡូក្រាម អគ្គិសនីព្រះអាទិត្យក្នុងទីអវកាសក៏នឹងមានតម្លៃទាបជាង បើធៀបនឹងអគ្គិសនីពីបណ្ដារោងចក្រថាមពលនុយក្លេអែរ ឬរោងចក្រដែលប្រើប្រាស់ធ្យូងថ្ម និងឧស្ម័នធម្មជាតិនៅលើផែនដី។ បច្ចុប្បន្ន SpaceX យកថ្លៃមិនដល់ 3ពាន់ដុល្លារសម្រាប់ទំនិញមួយគីឡូក្រាមដែលផ្ញើឡើងទៅកាន់ទីអវកាស។ SpaceX បានអះអាងថា បន្ទាប់ពីរ៉ុក្កែត Starship ដំណើរការពេញលេញ ការចំណាយសម្រាប់ការបាញ់បង្ហោះផ្កាយរណបទៅកាន់អវកាស នឹងថយចុះមកនៅ 10ដុល្លារក្នុងមួយគីឡូក្រាម។

ក្រុមហ៊ុន Virtus Solis ចង់អភិវឌ្ឍផ្ទាំងសូឡាដែលមានទទឹងមួយគីឡូម៉ែត្រ អាចដំឡើងនៅលើមេឃដោយរ៉ូបូតម៉ូឌុលដែលមានទំហំ 1.6 ម៉ែត្រ។ ម៉ូឌុលប្រភេទនេះចំនួនរាប់រយ អាចត្រូវបានដឹកជញ្ជូនដោយរ៉ុក្កែត Starship ឡើងទៅកាន់ Molniya ដែលជាគន្លងតារាវិថីរាងពងក្រពើ ដែលមានចំណុចជិតបំផុតគឺ 800 គីឡូម៉ែត្រ និងឆ្ងាយបំផុតគឺ 35ពាន់គីឡូម៉ែត្រ ធៀបនឹងផែនដី។

ដូច្នេះ ផ្កាយរណបចាប់ពីពីរគ្រឿងឡើងទៅនឹងអាចផ្គត់ផ្គង់អគ្គិសនីសម្រាប់មួយតំបន់នៅលើផែនដី។ ប្រព័ន្ធរបស់ក្រុមហ៊ុន Virtus Solis ដែលមានផ្ទាំងសូឡាចំនួន 16ផ្ទាំង នឹងគ្របដណ្ដប់តំបន់នានានៅទូទាំងពិភពលោក ហើយអាចបាញ់បញ្ជូនថាមពលក្នុងទម្រង់រលកមីក្រូវ៉េវ មកកាន់អង់តែនទទួលខ្នាតយក្សនៅលើដី។
យោងតាម Bucknell បច្ចុប្បន្ន ក្រុមហ៊ុន Virtus Solis កំពុងរកវិធីកែលម្អប្រសិទ្ធភាពនៃបច្ចេកវិទ្យាបញ្ជូនអគ្គិសនីដោយមិនប្រើខ្សែ ដែលជាឧបស័គធំចំពោះការផលិតអគ្គិសនីព្រះអាទិត្យក្នុងទីអវកាស។ បណ្ដាប្រព័ន្ធបែបនេះ បច្ចុប្បន្នមានប្រសិទ្ធភាពប្រហែល 5% ប៉ុន្តែដើម្បីអាចប្រើប្រាស់ជាក់ស្ដែង ប្រសិទ្ធភាពនេះត្រូវការកើនឡើងដល់ 20%។

កាលពីខែកុម្ភៈ ឆ្នាំ2024 ក្រុមហ៊ុន Virtus Solis បានប្រកាសអំពីគម្រោងសាកល្បងដំណើរការផ្កាយរណបបាញ់បញ្ជូនអគ្គិសនីនៅក្នុងឆ្នាំ2027 ដើម្បីត្រួតពិនិត្យការដំឡើងផ្ទាំងសូឡាក្នុងទីអវកាស និងបាញ់បញ្ជូនអគ្គិសនីជាងមួយគីឡូវ៉ាត់ មកកាន់ផែនដី។ ក្រុមហ៊ុននេះសង្ឃឹមថា អាចស្ថាបនារោងចក្រអគ្គិសនីព្រះអាទិត្យសម្រាប់ធ្វើពាណិជ្ជកម្ម ក្នុងកម្រិតមេហ្គាវ៉ាត់ នៅក្នុងឆ្នាំ2030។

May 3, 2024

ប្រទេសថៃយកពន្ធអាករ VAT 7% ចំពោះទំនិញនាំចូល

មន្ត្រីក្រសួងពាណិជ្ជកម្មថៃ នាថ្ងៃទី 29 មេសានេះ ឱ្យដឹងថា ប្រទេសនេះនឹងយកពន្ធអាករលើតម្លៃបន្ថែម 7% ចំពោះរាល់ទំនិញនាំចូល ដោយមិនបែងចែកតម្លៃ ចាប់ពីខែឧសភាតទៅ។

លោក Lavaron Sangsnit លេខាអចិន្ត្រៃយ៍នៃក្រសួងពាណិជ្ជកម្មថៃ ថ្លែងថា បច្ចុប្បន្ន ប្រទេសថៃអនុវត្តគោលនយោបាយលើកលែងពន្ធនាំចូល និងអាករលើតម្លៃបន្ថែម (VAT) ចំពោះទំនិញនាំចូលនីមួយៗដែលមានតម្លៃក្រោម 1,500 បាត ដែលប្រហែលនឹង 40.5 ដុល្លារអាម៉េរិក។

ក៏ប៉ុន្តែ ការលើកលែងពន្ធនាំចូលខាងលើនាពេលកន្លង បានធ្វើឱ្យកើតមានបញ្ហាមិនស្មើភាពគ្នា ពិសេសគឺនៅពេលទំនិញតម្លៃទាបរបស់ចិន ត្រូវបាននាំចូលលក់ពាសពេញទីផ្សារប្រទេសថៃ។ បញ្ហានេះបានជំរុញឱ្យអាជ្ញាធរថៃ ចាត់វិធានការជាបន្ទាន់ ហើយការយកពន្ធលើកតម្លៃបន្ថែម 7% ចំពោះទំនិញនាំចូលគ្រប់មុខនឹងត្រូវបានអនុវត្តចាប់ពីថ្ងៃទី1 ខែឧសភាតទៅ។

April 29, 2024

ចិនអនុញ្ញាតឱ្យនាំចូលផ្លែដូងស្រស់ពីកម្ពុជា គ្រាដែលទំនិញនាំចូលពីកម្ពុជា នៅមានទំហំតូចខ្លាំង

ចម្ការដូងចំនួន 13 និងទីតាំងវេចខ្ចប់ចំនួន 5 ដែលបានចុះបញ្ជីសម្រាប់នាំចេញផ្លែដូងស្រស់ពីកម្ពុជាទៅកាន់ប្រទេសចិន ទទួលបានការអនុម័តទទួលស្គាល់ជាផ្លូវការពីអគ្គរដ្ឋបាលគយចិន។ នេះបើតាមលោកជំទាវ អ៊ឹម រចនា អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងកាលពីថ្ងៃទី 22 ខែមេសា ឆ្នាំ 2024។

ការទទួលបានការអនុម័តទទួលស្គាល់ខាងលើ ត្រូវបានធ្វើឡើងបន្ទាប់ ក្រសួងកសិកម្ម រុក្ខាប្រមាញ់ និងនេសាទកម្ពុជា ជាមួយអគ្គរដ្ឋបាលគយយចិន បានចុះហត្ថលេខាលើពិធីសារស្ដីពីលក្ខខណ្ឌតម្រូវភូតគាមអនាម័យ សម្រាប់ការនាំចេញផ្លែដូងស្រស់ពីកម្ពុជាទៅកាន់ប្រទេសចិន កាលពីថ្ងៃទី 15 ខែកញ្ញា ឆ្នាំ 2023។

កន្លងមក ក្រសួងកសិកម្ម រុក្ខាប្រមាញ់ និងនេសាទ បានជូនដំណឹងដល់ភាគីពាក់ព័ន្ធនឹងដូង ដែលមានបំណងផលិត និងកែច្នៃវេចខ្ចប់ផ្លែដូងស្រស់ទៅកាន់ទីផ្សារប្រទេសចិន ឱ្យដាក់ពាក្យស្នើសុំចុះបញ្ជី។

បន្ទាប់ពីទទួលបានពាក្យស្នើសុំ ក្រសួងកសិកម្ម បានចាត់មន្ដ្រីជំនាញចុះវាយតម្លៃស្របតាមនីតិវិធីបច្ចេកទេសដូចមានចែងនៅក្នុងពិធីសារ ហើយបញ្ជូនបញ្ជីឈ្មោះចម្ការ និងរោងចក្រកែច្នៃវេចខ្ចប់ទាំងនោះ ទៅកាន់ភាគីចិន ដើម្បីពិនិត្យ និងវាយតម្លៃបន្ត។

គិតត្រឹមពេលនេះ អគ្គរដ្ឋបាលគយយចិនបានអនុម័តទទួលស្គាល់ជាផ្លូវការ ចម្ការដូងចំនួន 13 និងទីតាំងវេចខ្ចប់ចំនួន 5 របស់កម្ពុជា ដែលបានចុះបញ្ជីសម្រាប់នាំចេញផ្លែដូងស្រស់ទៅកាន់ប្រទេសចិន។

យោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា នៅត្រីមាសទីមួយនៃឆ្នាំ 2024 ស្ថានភាពនៃការនាំចេញទំនិញកម្ពុជាទៅកាន់ទីផ្សារអន្តរជាតិ មានភាពប្រសើរឡើង។ ប្រទេសចិនក្លាយជាដៃគូដោះដូរពាណិជ្ជកម្មធំជាងគេរបស់កម្ពុជា ដោយសម្រេចបានជាង 3ពាន់2រយលានដុល្លារអាម៉េរិក។ ក្នុងនោះ កម្ពុជាបាននាំចេញទៅកាន់ទីផ្សារចិនក្នុងទំហំទឹកប្រាក់តែជាង 3រយលានដុល្លារប៉ុណ្ណោះ ខណៈដែលការនាំចេញរបស់ចិនមកកម្ពុជា សម្រេចបានរហូតជាង 2ពាន់8រយលានដុល្លារ។

ដោយឡែក សហរដ្ឋអាម៉េរិកដែលជាទីផ្សារនាំចេញធំជាងគេរបស់កម្ពុជា បាននាំចូលទំនិញពីកម្ពុជាក្នុងទំហំទឹកប្រាក់ជិត 2ពាន់លានដុល្លារ គ្រាដែលកម្ពុជាបាននាំចូលទំនិញពីសហរដ្ឋអាម៉េរិកក្នុងទំហំទឹកប្រាក់តែជាង 57 លានដុល្លារប៉ុណ្ណោះ នៅត្រីមាសទីមួយនៃឆ្នាំ 2024។

April 23, 2024

ព្រែកជីកហ្វូណនតេជោ «ល្អមើលផង ល្អហូបផង»

(ភ្នំពេញ) – សម្ដេចធិបតី ហ៊ុន ម៉ាណែត បានមានប្រសាសន៍ថា ប្រទេសយើងជាមហាអំណាច ពេលដែលមានសេដ្ឋកិច្ចខ្លាំង ដូច្នេះព្រែកជីក (ហ្វូណនតេជោ) នេះ គឺបម្រើដល់ការបង្កើនសេដ្ឋកិច្ច និងជីវភាពរបស់ប្រជាពលរដ្ឋ។

ប្រសាសន៍របស់សម្ដេចប្រមុខរាជរដ្ឋាភិបាលកម្ពុជា ខាងលើនេះ ត្រូវបានធ្វើឡើងនាព្រឹកថ្ងៃទី 11 ខែមេសា ឆ្នាំ 2024 នៅក្នុងពិធីសម្ពោធកសិដ្ឋានចិញ្ចឹមគោយកទឹកដោះគិរីសួគ៌ ស្ថិតនៅភូមិឱភាសាំង ឃុំកណ្តឹង ស្រុកបាទី ខេត្តតាកែវ។

សម្ដេចធិបតី បានបញ្ជាក់ថា ព្រែកជីកហ្វូណនតេជោ «ល្អមើលផង និងល្អហូបផង» បន្ទាប់ពីមានមតិរិះគន់ខ្លះចំពោះគម្រោងព្រែកជីកនេះ។ គម្រោងនេះនឹងមិនបង្កផលប៉ះពាល់ដល់បរិស្ថាន ក៏ដូចជាមិនបង្កការគំរាមកំហែងដល់ប្រទេសជិតខាង។

សូមរំលឹកថា គម្រោងព្រែកជីកហ្វូណនតេជោ មានប្រវែង 180 គីឡូម៉ែត្រ ចាប់ពីព្រែកតាកែវនៃទន្លេមេគង្គ ឆ្លងកាត់តាមព្រែកតាឯកនៃទន្លៃបាសាក់ រួចចូលតាមព្រែកតាហ៊ីងនៃទន្លេបាសាក់ ស្រុកកោះធំ និងបន្តរហូតដល់សមុទ្រខេត្តកែប ដោយឆ្លងកាត់ខេត្តចំនួន 4 រួមមាន ខេត្តកណ្តាល ខេត្តតាកែវ ខេត្តកំពត និងខេត្តកែប ដែលមានប្រជាជនសរុបប្រមាណ 1.6 លាននាក់ រស់នៅអមសងខាងផ្លូវទឹក។

យោងតាមក្រសួងសាធារណៈការនិងដឹកជញ្ជូន ការដ្ឋានសាងសង់ព្រែកជីកដែលនឹងធ្វើឡើងក្នុងអំឡុងត្រីមាសទី 4 នៃឆ្នាំ 2024 ខាងមុខនេះ មានតម្លៃប្រមាណ 1,700 លានដុល្លារអាម៉េរិក ហើយនឹងត្រូវចំណាយពេល 4 ឆ្នាំ ក្នុងការស្ថាបនា។ គម្រោងនេះគឺជាផ្នែកមួយនៃគម្រោងក្រវាត់ផ្លូវពាណិជ្ជកម្ម (Belt and Road Initiative ឬBRI) របស់រដ្ឋាភិបាលចិន៕

April 11, 2024

ក្រុមហ៊ុន Chery បង្កើតរោងចក្រផលិតរថយន្តអគ្គិសនីនៅវៀតណាម

ក្រសួងពាណិជ្ជកម្មវៀតណាម កាលពីសប្ដាហ៍កន្លង បានឱ្យដឹងថា ក្រុមហ៊ុនផលិតរថយន្តរដ្ឋចិន Chery Automobile បានយល់ព្រមសង់រោងចក្រដំឡើងរថយន្តអគ្គិសនីតម្លៃ 800 លានដុល្លារអាម៉េរិក នៅប្រទេសវៀតណាម តាមរយៈក្រុមហ៊ុនបណ្ដាក់ទុនរួមគ្នាមួយនៅក្នុងស្រុក។

Omoda & Jaecoo របស់ Chery នឹងបង្កើតក្រុមហ៊ុនបណ្ដាក់ទុនរួម ជាមួយនឹង Geleximco ដែលមានទីស្នាក់ការនៅវៀតណាម ដើម្បីគ្រប់គ្រងរោងចក្រខាងលើ។

ដំណាក់កាលសាងសង់ដំបូង គ្រោងនឹងបញ្ចប់នៅក្នុងត្រីមាសទីមួយនៃឆ្នាំ 2026៕

April 8, 2024

ក្រុមហ៊ុនចិន Alibaba នឹងប្រើប្រាស់រ៉ុក្កែតដើម្បីដឹកទំនិញ

ក្រុមហ៊ុនពាណិជ្ជកម្មអេឡិចត្រូនិក (E-Commerce) Alibaba Group Holding កំពុងសហការជាមួយក្រុមហ៊ុនអភិវឌ្ឍរ៉ុក្កែតក្នុងស្រុក ក្នុងបំណងបង្កើតយានដឹកជញ្ជូនទំនិញទៅកាន់គ្រប់ទីកន្លែង ក្នុងរង្វង់មួយម៉ោង។

ការធ្វើតេស្តដែលក្រុមហ៊ុន Taobao របស់ Alibaba សហការជាមួយក្រុមហ៊ុន Space Epoch នៅទីក្រុងប៉េកាំង នឹងត្រូវបានធ្វើឡើងនាពេលអនាគតដ៏ខ្លីខាងមុខ។

ពួកគេនឹងអភិវឌ្ឍរ៉ុក្កែតដែលអាចប្រើប្រាស់ឡើងវិញច្រើនដង និងអាចចុះចតលើសមុទ្រ។ នេះបើតាមទំព័រ Interesting Engineering ចុះផ្សាយកាលពីថ្ងៃទី 4 មេសា។ Alibaba ក៏បានទទួលស្គាល់ព័ត៌មាននេះ កាលពីដើមសប្ដាហ៍។

រ៉ុក្កែតដែលមានលេខសម្គាល់ XZY-1 នឹងផ្គត់ផ្គង់កាប៊ីនផ្ទុកទំនិញទំហំ 120 ម៉ែត្រការ៉េ និងអាចដឹកទំនិញបាន 10 តោន អាចរួមទាំងកូនរថយន្ត ឬរថយន្តដឹកទំនិញខ្នាតតូចជាដើម។ ក៏ប៉ុន្តែ ក្រុមហ៊ុនខាងលើក៏បានទទួលស្គាល់ថា គោលដៅនេះពិតជាពិបាកសម្រេចបានក្នុងរយៈពេលខ្លី។

April 5, 2024

ធនាគារពិភពលោក៖ សេដ្ឋកិច្ចអាស៊ីមិនល្អដូចការរំពឹងទុក

យោងតាមធនាគារពិភពលោក (WB) កំណើនសេដ្ឋកិច្ចអាស៊ីឆ្នាំនេះ ត្រូវបានព្យាករថា នឹងយឺតជាងឆ្នាំកន្លង ប៉ុន្តែនៅតែមានសក្ដានុពលខ្លាំង។

ល្បឿននៃកំណើនសេដ្ឋកិច្ចគ្រោងនឹងថយចុះពី 5.1% ក្នុងឆ្នាំ 2023 មកនៅត្រឹម 4.5% ក្នុងឆ្នាំ 2024 ទាបជាងបើធៀបនឹងដំណាក់កាលមុនកូវីដ-19។ បើទោះនៅតែខ្ពស់ជាងបណ្ដាតំបន់ដទៃ ប៉ុន្តែអាស៊ីក៏នៅតែមិនទាន់សម្រេចបានដូចទៅនឹងសក្ដានុពលរបស់ខ្លួន។

ប្រទេសចិនដែលជាខឿនសេដ្ឋកិច្ចធំជាងគេនៅទ្វីបអាស៊ី បានកំណត់គោលដៅសម្រេចឱ្យបាន 5% ក្នុងឆ្នាំនេះ ទាបជាង បើធៀបនឹង 5.2% របស់ឆ្នាំកន្លង។ ប៉ុន្តែ WB ព្យាករថា GDP របស់ប្រទេសចិននឹងមានកំណើនត្រឹមតែ 4.5% ប៉ុណ្ណោះ។

មូលហេតុដែលនាំឱ្យសេដ្ឋកិច្ចអាស៊ីត្រូវបានព្យាករថានឹងមានកំណើនទាបដូច្នេះ ក៏ដោយសារកត្តាមួយចំនួន រួមមាន៖

បំណុល
រនាំងពាណិជ្ជកម្ម
អស្ថិរភាពគោលនយោបាយ
អតិផរណានៅសហរដ្ឋអាម៉េរិក
ការប្រាក់ខ្ពស់
ការថយចុះនៃភ្ញៀវទេសចរណ៍ចិន
ការថយចុះនៃការវិនិយោគពីវិស័យឯកជន

ដំណោះស្រាយ

ជំរុញផ្នែកហិរញ្ញវត្ថុ
ជំរុញសុខុមាលភាពសង្គមឱ្យបានខ្លាំងក្លាជាងមុន
បង្កើតគោលនយោបាយដែលជួយជំរុញការចំណាយ
លុបបំបាត់រនាំងពាណិជ្ជកម្ម
កែលម្អហេដ្ឋារចនាសម្ព័ន្ធ
កែទម្រង់វិស័យអប់រំ

ការសន្និដ្ឋាន

សេដ្ឋកិច្ចអាស៊ី កំពុងជួបឧបសគ្គច្រើន ប៉ុន្តែនៅតែមានសក្ដានុពលរីកចម្រើនយ៉ាងខ្លាំងក្លា។ បណ្ដាប្រទេសគួរតែអនុវត្តដំណោះស្រាយសមស្រប ដើម្បីជំរុញកំណើនសេដ្ឋកិច្ច និងលើកកម្ពស់ការផលិត។

April 1, 2024

អាម៉េរិកព្រមានថា ចិនលក់បង្ខូចតម្លៃរថយន្តអគ្គិសនី

រដ្ឋមន្ត្រីក្រសួងហិរញ្ញវត្ថុសហរដ្ឋអាម៉េរិក យល់ថា ប្រទេសចិនអាចលក់ផលិតផលអគ្គិសនីលើសតម្រូវការរបស់ខ្លួនក្នុងតម្លៃទាប ទៅកាន់ទីផ្សារអន្តរជាតិ ប៉ះពាល់ដល់ផលប្រយោជន៍អាម៉េរិក។

ក្នុងដំណើរទស្សនកិច្ចនាពេលខាងមុខ លោកស្រី Yellen នឹងពិភាក្សាបញ្ហាខាងលើជាមួយនឹងក្រុមមន្ត្រីចិន។ ប្រការនេះកើតឡើងក្នុងគ្រាដែលអាម៉េរិកកំពុងជំរុញការអភិវឌ្ឍថាមពលបៃតង ប៉ុន្តែនៅតែតាមមិនទាន់ប្រទេសចិន។

ភាពតានតឹងផ្នែកពាណិជ្ជកម្មរវាងអាម៉េរិក និងចិន បន្តជាឧបសគ្គសម្រាប់កិច្ចសហប្រតិបត្តិការ។ បើទោះជាប្រធានាធិបតី បៃដិន បានជួបពិភាក្សាការងារជាមួយមេដឹកនាំចិន លោក ស៊ី ជីនពីង កាលពីខែវិច្ឆិកា 2023 ការព្រួយបារម្ភអំពីបញ្ហាសន្តិសុខជាតិនាពេលថ្មីៗនេះ ដែលជាប់ទាក់ទងនឹងរថយន្តអគ្គិសនីឆ្លាតវៃចិន បង្ហាញថា ពាណិជ្ជកម្មរវាងប្រទេសទាំងពីរនៅមានឧបសគ្គនៅឡើយ។

រដ្ឋមន្ត្រីក្រសួងហិរញ្ញវត្ថុសហរដ្ឋអាម៉េរិក លោកស្រី Janet Yellen ជឿថា ប្រទេសចិនអាចនាំចេញផលិតផលទាក់ទងនឹងអគ្គិសនីបៃតងដែលលើសតម្រូវការរបស់ខ្លួន ទៅកាន់ប្រទេសនានា ដោយលក់ក្នុងតម្លៃទាបខ្លាំង។ ប្រការនេះអាចនឹងធ្វើឱ្យសហរដ្ឋអាម៉េរិក ក៏ដូចជាបណ្ដាប្រទេសលើពិភពលោក ពិបាកប្រកួតប្រជែង ហើយត្រូវខាតបង់ផលប្រយោជន៍ផ្នែកពាណិជ្ជកម្ម។

March 30, 2024

ទំពាំងឫស្សីមានប្រូតេអ៊ីនស្មើនឹងទឹកដោះគោ

ក្រុមអ្នកវិទ្យាសាស្ត្រចិន យល់ថា ទំពាំងឫស្សីអាចដើរតួនាទីសំខាន់នៅក្នុងការផ្គត់ផ្គង់អាហារយូរអង្វែង និងមានជីវជាតិសម្រាប់ប្រជាជនទូទាំងសកលលោក។

ទំពាំងឫស្សីពិតជាមានអត្ថប្រយោជន៍ពិសេសសម្រាប់សុខភាព ព្រោះវាមានផ្ទុកប្រូតេអ៊ីនច្រើន ដូចទៅនឹងទឹកដោះគោ។ នេះបើតាមអត្ថបទសារព័ត៌មានមួយដែលបានចុះផ្សាយលើទស្សនាវដ្ដី និន្នាការវិទ្យាសាស្ត្រ និងបច្ចេកវិទ្យាអាហារ (Trends in Food Science & Technology) កាលពីពេលថ្មីៗកន្លងទៅនេះ។

លោក Wu Liangru ដែលជាអ្នកស្រាវជ្រាវនៅមជ្ឈមណ្ឌលជាតិស្រាវជ្រាវទំពាំងឫស្សីចិន បាននិយាយថា ទំពាំងឫស្សីអាចជាអាហារសំខាន់មួយប្រភេទនាពេលអនាគត។ អត្ថបទលើទំព័រ Trends in Food Science & Technology សរសេរថា «ទំពាំងនាំមកនូវប្រភពអាហារស្ថិរភាព ផ្ដល់ឱកាសដល់ពាណិជ្ជកម្ម និងការនាំចេញ អាចរួមចំណែកទៅក្នុងកំណើនសេដ្ឋកិច្ចក្នុងស្រុក»។

ទំពាំងផ្ដល់អាស៊ីតអាមីនេចាំបាច់ចំនួន 7 ក្នុងចំណោម 9 ដែលមនុស្សត្រូវការ។ ជាក់ស្ដែង អាស៊ីតអាមីនេក្នុងទំពាំងមានបរិមាណខ្ពស់ជាងបណ្ដាមើមមួយចំនួន មានដូចជា ការ៉ុត ស្ពៃក្ដោប និងភ្លៅកង្កែបជាដើម។ ក្រៅពីនេះ ទំពាំងក៏មានផ្ទុកជាតិដែកច្រើនជាងល្ពៅ និងស្ពៃពួយឡេង (spinach) ផងដែរ។

ទំពាំងឫស្សីខ្ចីក៏ជាប្រភពផ្គត់ផ្គង់ជាតិសរសៃដ៏ច្រើន មានជាតិខ្លាញ់តិច ព្រមទាំងមានផ្ទុកវីតាមីនច្រើនប្រភេទទៀតផង។ ទន្ទឹមនឹងនេះ ការស្រាវជ្រាវក៏បានរកឃើញថា ទំពាំងមានសមត្ថភាពទប់ស្កាត់បញ្ហាលើសខ្លាញ់ ឡើងទម្ងន់ លើសជាតិស្ករ និងជំងឺមហារីក ហើយអាចទប់ទល់នឹងអុកស៊ីតកម្ម និងកម្ចាត់មេរោគផងដែរ។

ទំពាំងឫស្សីអាចត្រូវបានកែច្នៃទៅតាមវិធីផ្សេងៗ ក្នុងនោះមានជាអាទិ៍ ទំពាំងជ្រក់ ទំពាំងក្រៀម ទឹកទំពាំងកៀប និងម្សៅទំពាំង ឬចម្អិនជាអាហារដូចទៅនឹងបន្លែដទៃ។ល។

ការសិក្សាស្រាវជ្រាវបានឱ្យដឹងថា ក្នុងចំណោមឫស្សី 800 ប្រភេទដែលត្រូវបានរកឃើញនៅប្រទេសចិន គឺមានតែ 153 ប្រភេទប៉ុណ្ណោះដែលអាចបរិភាគបាន។

March 29, 2024

ថៃ និងហ្វីលីពីន ជំរុញការអភិវឌ្ឍ «ថាមពលនុយក្លេអែរ»

ប្រទេសថៃ និងហ្វ៊ីលីពីន កំពុងរៀបផែនការស្ថាបនារោងចក្រផលិតអគ្គិសនីដើរដោយថាមពលនុយក្លេអែរដំបូងនៅក្នុងតំបន់អាស៊ីភាគអាគ្នេយ៍។

យោងតាមទំព័រ Nikkei Asia នៅក្នុងខែកញ្ញាឆ្នាំនេះ ប្រទេសថៃនឹងប្រកាសឱ្យដឹងអំពីគម្រោងថាមពលជាតិសម្រាប់ដំណាក់កាលពីពេលនេះដល់ឆ្នាំ 2037 ក្នុងនោះ ប្រទេសនេះគ្រោងនឹងដំឡើងរោងចក្រប្រតិកម្មម៉ូឌុលខ្នាតតូច (Small Modular Reactor – SMRs)។

មេដឹកនាំរដ្ឋាភិបាលថៃ លោក Thavisin បានពិនិត្យអំពីលទ្ធភាពសាងសង់រោងចក្រថាមពលនុយក្លេអែរ ជាមួយនឹងរដ្ឋមន្ត្រីពាណិជ្ជកម្មអាម៉េរិក នៅបាងកក កាលពីថ្ងៃទី 14 មីនា។

ប្រទេសថៃ កំពុងតែជំរុញការអភិវឌ្ឍថាមពលនុយក្លេអែរ ក្នុងកាលៈទេសៈដែលអណ្ដូងរ៉ែឧស្ម័នធម្មជាតិរបស់ប្រទេសនេះ កាន់តែខើចទៅៗ ខណៈដែលថៃ បានសន្យាដោយកំណត់គោលដៅធ្វើឱ្យមានតុល្យភាពកាបូននៅត្រឹមឆ្នាំ 2050។

ចំណែកហ្វ៊ីលីពីនវិញ ក៏កំពុងប្រឈមមុខនឹងឧបសគ្គដូចទៅនឹងប្រទេសថៃ។ ទីក្រុងម៉ានីល ក៏រៀងផែនការបង្កើតស្ថានីយថាមពលនុយក្លេអែរពាណិជ្ជកម្មមួយនៅឆ្នាំ 2030 ទន្ទឹមនឹងការបង្កើតមជ្ឈមណ្ឌលអភិវឌ្ឍ SMRs។ ក្រុមហ៊ុន NuSclae Power របស់អាម៉េរិក មានគម្រោងវិនិយោគ 7.5 ពាន់លានដុល្លារ ដើម្បីសាងសង់រោងចក្រប្រតិកម្មនុយក្លេអែរនៅហ្វ៊ីលីពីន។

March 26, 2024

Tag: ពាណិជ្ជកម្ម