ផ្សារ - La Reine Media

យន្តហោះដឹកមេក្រុមទាហានស៊ីឈ្នួល Wagner ដែលបានធ្លាក់ «មិនធ្លាប់ជួបបញ្ហាសុវត្ថិភាព»

ប្រភេទយន្តហោះ Legacy 600 ដែលត្រូវបានមេក្រុមទាហានស៊ីឈ្នួល Wagner ប្រើប្រាស់ជាញឹកញាប់ក្នុងការធ្វើដំណើរ មិនធ្លាប់កើតមានគ្រោះថ្នាក់ស្លាប់មនុស្សឡើយ នៅមុនករណីធ្លាក់នៅរុស្ស៊ី។

សារព័ត៌មានរុស្ស៊ី TASS កាលពីថ្ងៃទី 23 សីហា បានរាយការណ៍ថា មេក្រុមទាហានស៊ីឈ្នួល Wagner លោក Yevgeny Prigozhin មានឈ្មោះក្នុងបញ្ជីអ្នកដំណើរលើយន្តហោះឯកជន Embraer Legacy 600 ដែលបានធ្លាក់នៅក្នុងខេត្ត Tver។ ក្រសួងស្ថានការណ៍បន្ទាន់រុស្ស៊ីបានឱ្យដឹងថា មនុស្សទាំង 10 នាក់លើយន្តហោះនេះបានបាត់បង់ជីវិត។

ទិន្នន័យពីទំព័រតាមដានជើងហោះហើរ Flightradar24 បង្ហាញថា យន្តហោះ Embraer Legacy 600 ដែលមានលេខសម្គាល់ RA-02795 បានបាត់ខ្លួនពីរ៉ាដាវេលាម៉ោង 18 និង 11 នាទី ថ្ងៃទី 23 សីហា (ម៉ោង 22 និង 11 នាទី នៅកម្ពុជា)។ វីដេអូមួយដែលបានបង្ហោះលើបណ្ដាញសង្គមបង្ហាញថា យន្តហោះនេះបាក់ស្លាបម្ខាង និងធ្លាក់បុកដី។

Grey Zone ដែលជាទំព័រ Telegram ផ្សារភ្ជាប់នឹង Wagner ប្រកាសថា លោក Prigozhin បានបាត់បង់ជីវិត។ មេបញ្ជាការជាន់ខ្ពស់របស់ Wagner លោក Dmitry Utkin ដែលជាដៃស្ដាំរបស់លោក Prigozhin ក៏មានឈ្មោះក្នុងបញ្ជីអ្នកដំណើរលើយន្តហោះនេះផងដែរ។ គណៈកម្មការស៊ើបអង្កេតរុស្ស៊ីប្រកាសថា បានបើកការស្រាវជ្រាវលើករណីធ្លាក់យន្តហោះនេះហើយ។

យោងតាមទំព័រ International Aviation HQ យន្តហោះ Legacy 600 ត្រូវបានដាក់ឱ្យប្រើប្រាស់ចាប់ពីឆ្នាំ 2002 ក្នុងនោះជិត 300 គ្រឿងត្រូវបានលក់ រហូតដល់ឈប់ផលិតនៅឆ្នាំ 2020។ ក្នុងរយៈពេលជាង 20 ឆ្នាំ ក្នុងចំណោមយន្តហោះ Legacy 600 មានតែមួយករណីប៉ុណ្ណោះដែលបានជួបគ្រោះថ្នាក់៕

August 24, 2023

យន្តហោះបុគ្គលមានរាងដូចស៊ុត អាចហោះក្នុងល្បឿនមួយរយគីឡូម៉ែត្រ/ម៉ោង

Airscooter ដែលត្រូវបានរចនាឡើងដើម្បីជំនួសកូនរថយន្ត អាចហោះហើរក្នុងល្បឿន 100 គីឡូម៉ែត្រក្នុងមួយម៉ោង ដោយហោះឡើង និងចុះចតត្រង់ដូចឧទ្ធម្ភាគចក្រ។

អ្នកស្រាវជ្រាវជនជាតិបារាំង Franky Zapata បានបង្ហាញយន្តហោះលក្ខណៈបុគ្គលថ្មីមួយប្រភេទ មានកាប៊ីនសម្រាប់អ្នកបើកបរដែលមានរូបរាងដូចស៊ុត និងអាចហោះក្នុងកម្ពស់ 2,900 ម៉ែត្រ។ យោងតាម Mail ដែលបានចុះផ្សាយកាលពីថ្ងៃទី 21 សីហា 2023 យន្តហោះ Airscooter អាចជួយឱ្យការធ្វើដំណើរប្រហែលពីរម៉ោងតាមរថយន្តនៅក្នុងពេលចរាចរណ៍ចង្អៀត ចុះមកនៅត្រឹម 10 នាទី។

ក្រុមហ៊ុន Zapata ឱ្យដឹងថា យានជំនិះថ្មីនេះកំពុងស្ថិតក្នុងដំណាក់កាលអភិវឌ្ឍ។ Airscooter គឺជាយន្តជំនិះដែលហោះឡើង និងចុះចត់ត្រង់ដូចឧទ្ធម្ភាគចក្រ (VTOL)។ នេះគឺជាយន្តហោះកូនកាត់ (ហាយព្រីដ) ប្រើប្រាស់អគ្គិសនី និងប្រេងឥន្ធនៈ ដើម្បីផ្ដល់ថាមពលដល់រ៉ូទ័រ 6 គ្រឿងដែលបំពាក់ពីខាងលើកាប៊ីន។ Airscooter អាចហោះហើររយៈពេលពីរម៉ោងបន្តបន្តបន្ទាប់ យូរជាងយាន VTOL ដទៃ។

Airscooter មានទម្ងន់ 115 គីឡូក្រាម។ គ្រប់គ្នាអាចបើកបរយន្តហោះនេះបាន បន្ទាប់ពីឆ្លងកាត់ការហ្វឹកហាត់រយៈពេលខ្លី។ បើទោះជាផលិតឡើងក្នុងបំណងជំនួសកូនរថយន្ត ប៉ុន្តែ Airscooter នឹងមិនត្រូវបានដាក់លក់ក្នុងទីផ្សារនោះទេ។ ជំនួសមកវិញ អ្នកប្រើប្រាស់នឹងត្រូវបង់ប្រាក់មួយចំនួនសម្រាប់ការបើកបរ 40 នាទីដោយផ្ទាល់ដៃ និងគយគន់ទេសភាពតាមបង្អួច។

ចាប់ពីដើមឆ្នាំក្រោយ Zapata នឹងបើកមជ្ឈមណ្ឌលហោះហើរនៅសហរដ្ឋអាម៉េរិក ដើម្បីផ្ដល់សេវាកម្មហោះហើរកម្សាន្តដល់អតិថិជន។ មជ្ឈមណ្ឌលដំបូងនឹងមាននៅក្នុងទីក្រុង Lake Havasu រដ្ឋ Arizona៕

August 23, 2023

សូមប្រយ័ត្នពេលទិញថ្នាំស៊ីរ៉ូព្យាបាលផ្ដាសាយ-ក្អកឱ្យកូនលេប

អង្គការសុខភាពពិភពលោក (WHO) បានព្រមានអំពីថ្នាំស៊ីរ៉ូព្យាបាលជំងឺផ្ដាសាយ Cold Out ដែលកំពុងត្រូវបានដាក់លក់ក្នុងទីផ្សារ ពិសេសគឺនៅប្រទេសអ៊ីរ៉ាក់ ដោយសារមានផ្ទុកជាតិពុលក្នុងកម្រិតខ្ពស់។

កាលពីថ្ងៃទី 07 សីហា WHO បានឱ្យដឹងថា ថ្នាំស៊ីរ៉ូក្អកកំពុងដាក់លក់នៅអ៊ីរ៉ាក់ ដែលបន្ទប់ពិសោធន៍ Fourrts នៅប្រទេសឥណ្ឌា ផលិតឱ្យក្រុមហ៊ុន Dabilife Pharma មានផ្ទុកសារធាតុពុលកម្រិតខ្ពស់។ ជាក់ស្ដែង ទំនិញនេះមានផ្ទុក diethylene glycol 0.25% និង ethylene glycol 2.1% ខណៈបរិមាណសុវត្ថិភាពដែលត្រូវបានអនុញ្ញាតសម្រាប់សារធាតុទាំងពីរនេះគឺ 0.1%។ WHO បន្ថែមថា អ្នកផលិត និងអ្នកចែកចាយមិនអាចធានាអំពីសុវត្ថិភាព និងគុណភាពរបស់ផលិតផល។

នេះគឺជាសេចក្ដីប្រកាសថ្មីបំផុតនៅក្នុងការព្រមានជាច្រើនដែលត្រូវបានស្ថាប័នសុខាភិបាលរបស់អង្គការសហប្រជាជាតិលើកឡើងអំពីប្រភេទថ្នាំគុណភាពទាបដែលនាំចេញពីប្រទេសឥណ្ឌា និងត្រូវបានដាក់លក់លើពិភពលោក។ មុននោះ មានថ្នាំស៊ីរ៉ូយ៉ាងតិច 5 ប្រភេទ ស្ថិតក្នុងការស៊ើបអង្កេត ដោយមានជាប់ទាក់ទងនឹងក្រុមហ៊ុនផលិតនៅឥណ្ឌា។

Propylene glycol មិនពុល ប៉ុន្តែ diethylene glycol (DEG) និង Ethylene glycol (EG) គឺមានពិតជាគ្រោះថ្នាក់ខ្លាំង។ អ្នកស្រាវជ្រាវអះអាងថា ពេលចូលដល់ក្នុងរាងកាយ ពួកវានឹងធ្វើឱ្យខ្សោយតម្រងនោម និងស្លាប់ បើសិនមិនបានព្យាបាលទាន់ពេល។ បរិមាណដែលអាចបង្កឱ្យស្លាប់គឺអាស្រ័យលើទម្ងន់របស់រាងកាយ។ ក្មេងតូចងាយរងគ្រោះជាងមនុស្សធំ៕

August 8, 2023

ភ្ញាក់ផ្អើលខ្លាំងពេលអាវធ្លាប់ពាក់លេងពីក្មេង បែរជាមានតម្លៃខ្ពស់បែបនេះ

កាលពីថ្ងៃអាទិត្យ (30 កក្កដា) ភ្ញៀវដែលចូលរួមកម្មវិធី Antiques Roadshow (កម្មវិធីវាយតម្លៃវត្ថុបុរាណរបស់ BBC 1 នៅប្រទេសអង់គ្លេស) បានមានឱកាសទស្សនាវត្ថុនានាដែលភ្ញៀវទាំងឡាយបាននាំយកមកទីនេះ។

យោងតាម Daily Mail ព្រឹត្តិការណ៍វាយតម្លៃវត្ថុបុរាណត្រូវបានធ្វើឡើងនៅឯវិមាន Ham House ក្នុងតំបន់ Richmond ក្បែរទន្លេ Thames នៃទីក្រុងឡុងដ៍ ដែលសាងសង់តាំងពីសតវត្សរ៍ទី 17 ដោយមានការចូលរួមរបស់អ្នកជំនាញខាងវត្ថុបុរាណ Lee Young។

គូស្វាមីភរិយាវ័យចំណាស់មួយគូ បាននាំយកអាវសម្រាប់រាជវង្សានុវង្សនៅប្រទេសចិនតាំងពីបុរាណ មកឱ្យអ្នកជំនាញ Lee Young ធ្វើការពិនិត្យ និងវាយតម្លៃ។

យោងតាមបុរសជាស្វាមី ភូសា (អាវ) នេះគឺជាវត្ថុដែលត្រូវបានជីតារបស់ភរិយាគាត់ (ជាអ្នកដែលធ្លាប់កាន់តំណែងនាយកប្រតិបត្តិរបស់ធនាគារ Standard នៅប្រទេសឥណ្ឌា) នាំយកមកកាន់ប្រទេសអង់គ្លេស កាលពីដើមទសវត្សរ៍ឆ្នាំ 1930 នៃសហស្សវត្សរ៍មុន។

អ្នកស្រី Sara ភរិយារបស់បុរសខាងលើ ឱ្យដឹងថា អ្នកស្រីបានរក្សាទុកអាវក្រៅនេះនៅក្នុងប្រអប់ដាក់សម្លៀកបំពាក់ ហើយកាលពីនៅក្មេង គាត់តែងតែយកវាមកពាក់លេង។

«អាវនេះត្រូវបានផលិតឡើងក្នុងអំឡុងទសវត្សរ៍ឆ្នាំ 1750 ដែលពិតជាភូសាសម្រាប់រាជវង្សានុវង្ស។ វាជាអាវក្រៅសម្រាប់ស្ត្រី ហើយអាវធំដែលត្រូវបានផលិតឡើងកាលពីអំឡុងទសវត្សរ៍ឆ្នាំ 1750 គឺជាវត្ថុដ៏កម្រ។ អាវបែបនេះមាននៅសល់តែប៉ុន្មានឈុតប៉ុណ្ណោះ។ បើតាមខ្ញុំដឹង ដើម្បីបានមើលភូសាប៉ុន្មានឈុតនោះ អ្នកត្រូវធ្វើដំណើរទៅកាន់រដ្ឋធានីប៉េកាំង និងសារមន្ទីរវាំងចាស់។ វាពិតជាវត្ថុដែលមានតែនៅក្នុងសារមន្ទីរ» អ្នកជំនាញ Lee បន្ថែមដូច្នេះ។

យោងតាមលោក Lee ពណ៌លឿងរបស់ភូសានេះគឺជាពណ៌សម្រាប់តែមហេសីស្ដេច ឬស្នំដែលមានឋានៈខ្ពស់។ រូបភាពនាគមានក្រញ៉ាំជើងប្រាំនៅលើភូសា ក៏ជានិមិត្តរូបបង្ហាញថា វាជាវត្ថុសម្រាប់រាជវង្សានុវង្ស។

ប្រការដែលអ្នកជំនាញ Lee Young ត្រៀមនឹងប្រកាស ធ្វើឱ្យម្ចាស់អាវនេះមិនភ្ញាក់ផ្អើលមិនបាន។ «បើសិនយកទៅលក់ដេញថ្លៃក្នុងទីផ្សារនាបច្ចុប្បន្ន ភូសានេះនឹងអាចលក់បានក្នុងតម្លៃ 200,000 ផោន (ប្រហែល 256.000 ដុល្លារអាម៉េរិក)» លោក Lee បញ្ជាក់ដូច្នេះ។

ស្ដាប់ដល់ត្រឹមនេះ អ្នកស្រី Sara មានការភ្ញាក់ផ្អើលខ្លាំង និងនិយាយថា «ពិតជាភ្ញាក់ផ្អើលណាស់។ ព្រះអឺយ! សូមអរគុណលោកច្រើនណាស់។ ពួកយើងប្រាកដជាលែងដាក់វាទៅក្នុងប្រអប់សម្លៀកបំពាក់ទៀតហើយ»៕

August 1, 2023

ម៉ូតូអគ្គិសនីទំនើប ផលិតដោយក្រុមហ៊ុនវៀតណាម

NU-E មានរូបរាងបែបអនាគតកាល លាយនឹងបុរាណកាល ខណៈគ្រឿងម៉ាស៊ីន ថ្មផ្ទុកអគ្គិសនី និងគ្រឿងដទៃជាច្រើនទៀត សុទ្ធតែមានស្រាប់នៅក្នុងទីផ្សារ។

ម៉ូតូអគ្គិសនី NU-E គឺជាម៉ូតូអគ្គិសនីបែបគំរូរបស់ក្រុមហ៊ុនវៀតណាម Nuen Moto នៅទីក្រុងព្រៃនគរ (ហូជីមិញ)។ ម៉ូតូនេះត្រូវបានផលិតឡើងដោយយោងទៅតាមរូបមន្តដែលមានស្រាប់ ដោយក្រុមហ៊ុននេះគ្រាន់តែរចនារូបរាង និងផលិតគ្រោងឆ្អឹង គ្រាដែលគ្រឿងផ្គុំនានាដែល NU-E ប្រើប្រាស់ គឺជារបស់អាចរកទិញបាននៅក្នុងទីផ្សារ។ គ្រឿងផ្គុំដែល NU-E ប្រើប្រាស់ រួមមាន គ្រឿងដែលផលិតដោយក្រុមហ៊ុនស៊ុយអែត អង់គ្លេស ជប៉ុន ចិន។ល។

NU-E មានទម្ងន់ប្រហែល 160 គីឡូក្រាម។ ម៉ូទ័រមានកម្លាំងពី 6 ទៅ 10 គីឡូវ៉ាត់។ ថ្មរបស់វាអាចផ្ទុកថាមពល 72 វ៉ុល 120 អំពែរម៉ោង ស្មើនឹង 8.64 គីឡូវ៉ាត់ម៉ោង។ ម៉ូតូនេះអាចបើកបរក្នុងល្បឿន 150 គីឡូម៉ែត្រ/ម៉ោង និងធ្វើដំណើរបានចម្ងាយ 100 គីឡូម៉ែត្រពេលបរលឿន និង 200 គីឡូម៉ែត្រពេលបើកបរយឺត។

យោងតាមក្រុមហ៊ុន Nuen ម៉ូតូអគ្គិសនី NU-E នេះ គ្រាន់តែជាកំណែសម្រាប់បង្ហាញពីនិន្នាការរបស់ក្រុមហ៊ុនប៉ុណ្ណោះ។ ប៉ុន្តែ Nuen នឹងដាក់លក់ម៉ូតូអគ្គិសនីដំបូងរបស់ខ្លួននៅប៉ុន្មានឆ្នាំខាងមុខ៕

July 28, 2023

ម៉ូតូអគ្គិសនីរបស់ជប៉ុននឹងវាយលុកទីផ្សារអាស៊ីអាគ្នេយ៍ឆាប់ៗនេះ

Honda Motor នឹងបង្ហាញម៉ូដែលនានារបស់ម៉ូតូអគ្គិសនីដំបូងរបស់ខ្លួននៅឥណ្ឌូណេស៊ី ព្រោះចាត់ទុកថា អាស៊ីអាគ្នេយ៍គឺជាទីផ្សារដែលមានសក្ដានុពលខ្លាំងសម្រាប់ម៉ូតូអគ្គិសនី។

ម៉ូតូអគ្គិសនីប្រភេទ scooter ដែលមានឈ្មោះថា EM1 e: របស់ Honda ដែលគ្រោងនឹងត្រូវបានដាក់លក់នៅប្រទេសជប៉ុននៅចុងខែសីហាខាងមុខ ក៏ជាម៉ូតូអគ្គិសនីដំបូងដែល Honda ផលិតឡើងសម្រាប់ទីផ្សារឥណ្ឌូណេស៊ី។ ម៉ូតូដែលអាចឱ្យធ្វើដំណើរបាន 53 គីឡូម៉ែត្រនេះ នឹងមានតម្លៃប្រហែល 300,000 យេន (2,100 ដុល្លារអាម៉េរិក) នៅប្រទេសជប៉ុន។

បើទោះព័ត៌មានលម្អិតស្ដីពីលក្ខណៈបច្ចេកទេសរបស់ EM1 e: មិនទាន់ត្រូវបានបង្ហើបឱ្យដឹង ប៉ុន្តែ តំណាងរបស់ Honda បានហៅម៉ូតូអគ្គិសនីនេះថា ជាម៉ូដែលមហាជនដំបូងរបស់ខ្លួន។

ក្រុមហ៊ុន Honda មានគម្រោងបញ្ចេញម៉ូតូអគ្គិសនីចំនួន 7 ម៉ូដែល និងលក់ឱ្យបាន 3.5 លានគ្រឿង ចាប់ពីពេលនេះដល់ឆ្នាំ 2030 ហើយគ្រោងនឹងផលិតតែម៉ូតូអគ្គិសនីសុទ្ធនៅពាក់កណ្ដាលទសវត្សរ៍ឆ្នាំ 2040៕

July 27, 2023

ប្រទេសណាខ្លះជាអ្នកផលិត និងលក់អាវុធច្រើនជាងគេលើពិភពលោក?

រុស្ស៊ីគឺជាប្រទេសដែលឈរលំដាប់ទីពីរនៅក្នុងតារាងចំណាត់ថ្នាក់ស្ដីពីបណ្ដាប្រទេសដែលផលិត និងលក់លសព្វាវុធច្រើនជាងគេលើពិភពលោក បន្ទាប់ពីសហរដ្ឋអាម៉េរិក។

យោងតាមស្ថិតិរបស់វិទ្យាស្ថានស្រាវជ្រាវសន្តិភាពអន្តរជាតិ Stockholm (SIPRI) សហរដ្ឋអាម៉េរិកកំពុងនាំមុខគេនៅក្នុងវិស័យផលិត និងលក់អាវុធរបស់ពិភពលោក។ បន្ទាប់ពីសហរដ្ឋអាម៉េរិក គឺរុស្ស៊ី បារាំង ចិន និងអាល្លឺម៉ង់។

បរិមាណអាវុធរបស់សហរដ្ឋអាម៉េរិក ក្ដោបក្ដាប់ 40% លើទីផ្សារទូទាំងសកលលោក ក្នុងដំណាក់កាលពីឆ្នាំ 2018 ដល់ 2022 ហើយកើន 33% បើធៀបនឹង 5 ឆ្នាំមុននោះ។ ទីក្រុងវ៉ាស៊ីងតោន បច្ចុប្បន្នគឺជាអ្នកផ្គត់ផ្គង់អាវុធសំខាន់ជាងគេរបស់ប្រទេស និងដែនដីចំនួន 103 នៅទូទាំងពិភពលោក។

យោងតាម SIPRI 41% នៃសព្វាវុធដែលសហរដ្ឋអាម៉េរិកបានលក់ចេញគឺបាននាំចូលតំបន់មជ្ឈិមបូព៌ា ចាប់ពីឆ្នាំ 2018 ដល់ 2022។ តួលេខនេះនៅអាស៊ី និងអូសេអានីគឺ 32% ខណៈអឺរ៉ុបបានទិញចំនួន 23%។ ចាប់ពីឆ្នាំ 2022 ការផ្គត់ផ្គង់អាវុធរបស់សហរដ្ឋអាម៉េរិកសម្រាប់អ៊ុយក្រែន បានកើនឡើងខ្ពស់ខ្លាំង។

រុស្ស៊ីគឺជាប្រទេសដែលឈរលំដាប់ទីពីរនៅក្នុងការផ្គត់ផ្គង់អាវុធ ដោយកាន់កាប់ 16% នៃបរិមាណអាវុធសរុបដែលបានលក់ចេញនៅទូទាំងពិភពលោក។ ចំណែកលំដាប់ទីបីវិញ បានទៅលើប្រទេសបារាំង ដោយកាន់កាប់ចំណែកទីផ្សារ 11%។ ប្រទេសចិនឈរលេខរៀងទីបួន ដោយកាន់កាប់ 5.2% នៃទីផ្សារអាវុធ។ រីឯអាល្លឺម៉ង់វិញ ក្ដោបក្ដាប់ចំណែកទីផ្សារប្រមាណ 4.2% ត្រូវជាប់លេខប្រាំ៕

July 25, 2023

ក្រុមហ៊ុនវៀតណាម សង់រោងចក្រតម្លៃ 4 ពាន់លានដុល្លារនៅអាម៉េរិក ក្នុងសប្ដាហ៍ក្រោយ

នេះនឹងក្លាយជារោងចក្រផលិតរថយន្តអគ្គិសនីដំបូងនៅ Carolina ខាងជើងរបស់ក្រុមហ៊ុនវៀតណាម VinFast ដែលនឹងផ្គត់ផ្គង់សម្រាប់ទីផ្សារអាម៉េរិកខាងជើង។

នៅថ្ងៃទី 19 កក្កដា 2023 នេះ VinFast បានប្រកាសបើកការដ្ឋានសាងសង់រោងចក្រផលិតរថយន្តអគ្គិសនីនៅក្នុងរដ្ឋ Carolina ខាងជើង របស់សហរដ្ឋអាម៉េរិក នៅថ្ងៃទី 28 កក្កដាខាងមុខ។ រោងចក្រនេះមានទីតាំងនៅក្នុងតំបន់ឧស្សាហកម្ម Triangle Innovation Point របស់ស្រុក Chatham ក្នុងរដ្ឋ Carolina ខាងជើង។ គម្រោងដែលស្ថិតនៅលើផ្ទៃដីប្រហែល 733 ហិកតានេះ គ្រោងនឹងផលិតរថយន្តអគ្គិសនីបាន 150,000 គ្រឿង/ឆ្នាំ នៅក្នុងដំណាក់កាលទីមួយ។

យោងតាមក្រុមហ៊ុន VinFast រោងចក្រខាងលើគ្រោងនឹងផ្ដើមការផលិតចាប់ពីឆ្នាំ 2025។ មុននោះ VinFast ក៏បានប្រកាសថា បានទទួលការអនុគ្រោះក្នុងតម្លៃ 1.2 ពាន់លានដុល្លារពីរដ្ឋបាលរដ្ឋ Carolina ខាងជើង, ទីក្រុង Sanford, តំបន់ Chatham និងមូលនិធិ Golden Leaf ផងដែរ សម្រាប់គម្រោងសាងសង់រោងចក្រនេះ។

នៅប្រទេសវៀតណាម VinFast បានប្រគល់រថយន្តអគ្គិសនីដល់ដៃអតិថិជនចំនួនជាង 11 ពាន់គ្រឿង នៅក្នុង 6 ខែដើមឆ្នាំនេះ ក្នុងនោះមាន 3,155 គ្រឿង ត្រូវបានប្រគល់ក្នុងខែមិថុនាកន្លងទៅ៕

July 19, 2023

Ford បញ្ចុះតម្លៃរថយន្ត F-150 Lightning ពេល «សង្គ្រាមរថយន្តអគ្គិសនី» កំពុងតានតឹង

កាលពីថ្ងៃទី 17 កក្កដា ក្រុមហ៊ុន Ford បានបញ្ចុះតម្លៃរថយន្តអគ្គិសនី F-150 Lightning (បញ្ចុះតម្លៃ 17% សម្រាប់កំណែស្ដង់ដា) ព្រោះតែចង់បង្កើនចំណែកទីផ្សាររបស់ខ្លួន នៅក្នុងទីផ្សារដែលត្រូវបានគ្រប់គ្រងដោយ Tesla។

Ford បានដំឡើងថ្លៃ Lightning កាលពីដើមឆ្នាំនេះ ហើយក្រោយមក ក្រុមហ៊ុននេះក៏ឱ្យដឹងថា ពួកគេអាចបញ្ចុះតម្លៃបន្ទាប់ពីការកែលំអនានាសម្រាប់រថយន្តនេះ។ ក្នុងត្រីមាសទីពីរ ចំនួនរថយន្តអគ្គិសនី Ford ដែលបានលក់ចេញ បានថយចុះ 2.8%។

ការបញ្ចុះតម្លៃរបស់ Ford កើតឡើងក្នុងគ្រាដែលការប្រកួតប្រជែកតម្លៃដែលបានចាប់ផ្ដើមដោយ Tesla កាលពីប៉ុន្មានខែមុន ធ្វើឱ្យរថយន្តអគ្គិសនីរបស់បណ្ដាក្រុមហ៊ុនចាស់ៗត្រូវគរលើគ្នានៅតាមទីតាំងចែកចាយ ដោយសារតែល្បឿននៃការលក់ចេញបានថមថយ។

បច្ចុប្បន្ន កំណែ Lightning Pro មានតម្លៃចាប់ពី 49,995 ដុល្លារអាម៉េរិក ទាបជាងបន្តិចបើធៀបនឹងតម្លៃ 59,974 ដុល្លារដែលបានលក់មុននោះ។ ចំណែកកំណែ Platinum លំដាប់ប្រណិតជាងនឹងមានតម្លៃ 91,995 ដុល្លារ។ ដោយឡែក ភាគហ៊ុនរបស់ Ford ក៏បានធ្លាក់ថ្លៃនៅសល់ 14.09 ដុល្លារ/ហ៊ុន នៅពេលបញ្ចប់ការជួញដូរកាលពីម្សិលមិញ៕

July 18, 2023

Messi នាំភរិយា និងកូនៗ ដើរផ្សារនៅសហរដ្ឋអាម៉េរិក

(សហរដ្ឋអាម៉េរិក) – Lionel Messi ចាប់ផ្ដើមផ្ស៊ាំនឹងជីវភាពថ្មីនៅ Miami នៅពេលជូនភរិយា Antonella Roccuzzo និងកូនៗដើរផ្សារ។

Messi បានទៅដល់សហរដ្ឋអាម៉េរិកកាលពីថ្ងៃទី 11 កក្កដា 2023 ដើម្បីត្រៀមខ្លួនសម្រាប់ការពិនិត្យសុខភាព និងចុះហត្ថលេខាលើកិច្ចព្រមព្រៀងជាផ្លូវការជាមួយនឹងក្លឹបបាល់ទាត់ Inter Miami។ M10 ហាក់ស៊ាំនឹងជីវភាពថ្មីបានលឿនជាង បើធៀបនឹងពេលទាត់ឱ្យក្លឹប PSG និងការរស់នៅក្នុងទឹកដីបារាំង។

កាលពីថ្ងៃទី 14 កន្លងទៅ Messi បានបង្ហាញខ្លួនពេលកំពុងដើរទិញទំនិញក្នុងផ្សារទំនើប Publix។ កំពូលតារាបាល់ទាត់អាហ្សង់ទីនរូបនេះ បានដើរផ្សារជាមួយនឹងភរិយា Antonella និងកូនប្រុសទាំងបីនាក់រួមមាន Thiago, Mateo និង Ciro។

គ្រួសាររបស់ Messi បានបង្ហាញភាពសប្បាយរីករាយនៅពេលដើរឆ្លងកាត់ហាងមួយចំនួនក្នុងផ្សារទំនើប Publix។ ពួកគេក៏បានថតរូបជាមួយនឹងអ្នកគាំទ្រមួយចំនួនដែលបានស្គាល់ផងដែរ។

ក្រោយពីចប់កិច្ចសន្យាជាមួយ PSG លោក Messi ក៏សម្រេចចិត្តមកទាត់ឱ្យ Inter Miami ដោយមានកិច្ចព្រមព្រៀងរយៈពេលពីរឆ្នាំ អមនឹងជម្រើសពន្យារកិច្ចសន្យាថែមពីរឆ្នាំ ដែលនេះមានន័យថា M10 មានសិទ្ធិចាកចេញពីក្លឹបនេះនៅរដូវក្ដៅឆ្នាំ 2024 ឬ 2025 បើសិនគាត់ចង់។

កំពូលតារាបាល់ទាត់អាហ្សង់ទីនរូបនេះនឹងបង្ហាញខ្លួនជាផ្លូវការនៅក្នុងមហាព្រឹត្តិការណ៍មួយដែលមានឈ្មោះថា «The Unveil» នៅឯកីឡដ្ឋានរបស់ Inter Miami នាថ្ងៃទី 16 កក្កដាខាងមុខ៕

July 15, 2023

Tag: ផ្សារ