ផលិត - La Reine Media

វ៉ែនតា Vision Pro របស់ Apple អាចជំនួសថេប្លេត ទូរទស្សន៍ និងរោងកុន

វ៉ែនតា Vision Pro របស់ Apple បំពាក់មុខងារពិសេសៗជាច្រើនដែលនាំឱ្យវាមានតម្លៃរហូតដល់ 3,500 ដុល្លារអាម៉េរិក។

នៅក្នុងព្រឹត្តិការណ៍ WWDC 2023 Apple បានបង្ហាញ Vision Pro ដែលជាវ៉ែនតាពាក់លើក្បាល នាំមកនូវបទពិសោធន៍ពិតប្រកបដោយភាពចម្រុះ (MR) សម្រាប់អ្នកប្រើប្រាស់។ ដោយមានតម្លៃឡើងដល់ 3,499 ដុល្លារអាម៉េរិក Vision Pro ទំនងជានឹងមិនមានការពេញនិយមឡើយនៅក្នុងស្រទាប់ប្រជាជនក្រីក្រ។

ក៏ប៉ុន្តែ សម្រាប់អ្នកមានវិញ Vision Pro ប្រាកដជានឹងទទួលបានការចាប់អារម្មណ៍ខ្លាំង។ ខាងក្រោមនេះគឺជាមុខងារមួយចំនួនដ៏លេចធ្លោដែលអតិថិជននឹងទទួលបាន ពេលមាន Vision Pro ៖

– មុខងារជ្រើសរើសកម្មវិធី (App) ដោយប្រើភ្នែក ប្រើកាយវិការរបស់ដៃ និងសំឡេងដើម្បីបញ្ជាក់វ៉ែនតា។ អ្នកប្រើប្រាស់មិនបាច់ចាប់កាន់ និងប្រើប្រាស់ iPhone ដូចមុនទៀតឡើយ។

- មាន Vision Pro ដូចជាមានទូរទស្សន៍និម្មិត ហើយទំហំរបស់វាគឺអាស្រ័យលើម្ចាស់វ៉ែនតាជាអ្នកកំណត់។

– Vision Pro អាចបង្កើតបរិយាកាសដែលមានរូបភាពនិម្មិតតែដូចពិតៗទៅតាមការបញ្ជារបស់ម្ចាស់។

- វ៉ែនតា Vision Pro របស់ Apple បង្ហាញរូបភាពច្បាស់ជាងទូរទស្សន៍ 4K ទៅទៀត ព្រមទាំងមានអមជាមួយនឹងកាសដែលបំពាក់បច្ចេកវិទ្យាទំនើបបំផុត និងមានគុណភាពខ្ពស់ផងដែរ។

ផលិតផលថ្មីរបស់ Apple នេះ ប្រាកដជាជួយឱ្យយើងគ្រប់គ្នាមានលេសដើម្បីទទឹងរង់ចាំបដិវត្តន៍ថ្មីមួយនៅក្នុងវិស័យបច្ចេកវិទ្យាពិភពនិម្មិតជំនាន់ X បន្ថែមពីលើ Augmented reality (AR), Virtual Reality (VR), Mixed Reality (MR) និង Extended Reality (XR)៕

June 6, 2023

សហរដ្ឋអាម៉េរិកបាញ់បញ្ជូនអគ្គិសនីពីអវកាសមកកាន់ផែនដីបានជោគជ័យ

អ្នកស្រាវជ្រាវមួយក្រុមនៅវិទ្យាស្ថានបច្ចេកវិទ្យា California (Caltech) បានទទួលជោគជ័យក្នុងការបាញ់បញ្ជូនអគ្គិសនីពីទីអវកាសមកកាន់ផែនដីដោយមិនបាច់ប្រើខ្សែជាលើកដំបូងក្នុងពិភពលោក។

ជាលើកដំបូងហើយដែលអគ្គិសនីអាចត្រូវបានបាញ់បញ្ជូនពីទីអវកាសមកកាន់ផែនដីដោយជោគជ័យ។ នេះបើតាម New Atlas ចុះផ្សាយកាលពីថ្ងៃទី 05 មិថុនា 2023។ គម្រោងអគ្គិសនីបានពីព្រះអាទិត្យក្នុងទីអវកាស (SSPP) មានគោលដៅប្រើប្រាស់ថាមពលស្អាតគ្មានដែនកំណត់នៅក្នុងគន្លងតារាវិថីផែនដី។

អគ្គិសនីបានពីព្រះអាទិត្យក្នុងទីអវកាសអាចដោះស្រាយបញ្ហាថាមពលស្អាតជាច្រើននៅលើផែនដី។ បណ្ដាញផលិតអគ្គិសនីលើគន្លងតារាវិថីផែនដីអាចប្រមូលពន្លឺព្រះអាទិត្យក្នុងរយៈពេល 24/7 ដោយវាមិនមានការរំខានពីបរិយាកាស ឬបញ្ហាអាកាសធាតុ។ យោងតាមទ្រឹស្ដី ផ្ទាំងសូឡាដែលដាក់ក្នុងទីអវកាសអាចផលិតអគ្គិសនីបានច្រើនជាង 8 ដង បើធៀបនឹងផ្ទាំងសូឡាដាក់នៅលើដី។

ស្ថាប័នជាច្រើនកំពុងតែប្រឹងប្រែងអភិវឌ្ឍបច្ចេកវិទ្យាខាងលើ បើទោះត្រូវជួបឧបសគ្គធំៗជាច្រើន។ ក្នុងនោះមានដូចជា ទំហំដ៏ធំរបស់ផ្ទាំងសូឡា ថ្មសម្រាប់ផ្ទុកថាមពលដែលបានពីព្រះអាទិត្យ ប្រព័ន្ធទទួលអគ្គិសនីពីទីអវកាសនៅលើដី។ល។

ប្រព័ន្ធប្រមូល និងបាញ់បញ្ជូនអគ្គិសនីនៅទីអវកាសក៏ត្រូវការការបាញ់បង្ហោះឡើងទៅកាន់គន្លងតារាវិថីផែនដីចំនួន 39 លើក (សម្រាប់ថ្មម៉ូឌុលស្រាល និងឆ្លាតវៃរបស់ Caltech) មុននឹងដំឡើងក្នុងទីអវកាស។

ប្រព័ន្ធ SSPD-1 សម្រាប់ធ្វើតេស្តក្នុងគម្រោងខាងលើដែលមានទម្ងន់ 50 គីឡូក្រាម ត្រូវបានដាក់ក្នុងយានអវកាស Momentus Vigoride និងបាញ់បង្ហោះទៅកាន់គន្លងគោចរកម្រិតទាបដោយរ៉ុក្កែតរបស់ SpaceX កាលពីថ្ងៃទី 03 មករា 2023។

SSPD-1 ត្រូវបានរចនាឡើងដើម្បីត្រួតពិនិត្យម៉ូឌុលតូចៗចំនួនបីគ្រឿង រួមមាន ម៉ូឌុល DOLCE សម្រាប់ធ្វើតេស្តបណ្ដាម៉ូឌុលដែលអាចបត់បាន ខណៈម៉ូឌុល ALBA ធ្វើតេស្តថ្មផ្ទុកថាមពល និងម៉ូឌុល MAPLE ធ្វើតេស្តបច្ចេកវិទ្យាបាញ់បញ្ជូនអគ្គិសនីមិនប្រើខ្សែពីទីអវកាសមកកាន់ស្ថានីយទទួលនៅលើដី។

ការធ្វើតេស្តបាញ់បញ្ជូនអគ្គិសនីពីទីអវកាសមកកាន់ផែនដីដោយមិនប្រើខ្សែ និងទទួលបានជោគជ័យរបស់ក្រុមអ្នកអ្នកជំនាញនៅវិទ្យាស្ថានបច្ចេកវិទ្យា California បញ្ជាក់ថា ការទាញយកថាមពលមិនចេះរីងស្ងួត និងស្អាតពីទីអវកាស បញ្ជូនមកកាន់ផែនដីដើម្បីប្រើប្រាស់ គឺជារឿងដែលទៅរួច 100%៕

June 6, 2023

រថយន្តអគ្គិសនីនឹងមានតម្លៃស្មើនឹងរថយន្តសាំងចាប់ពីឆ្នាំ 2030?

អគ្គនាយកប្រតិបត្តិរបស់ Ford អះអាងថា ដល់ក្រោយឆ្នាំ 2030 ការចំណាយក្នុងការផលិតរថយន្តអគ្គិសនីនឹងអាចប្រហាក់ប្រហែលនឹងការផលិតរថយន្តប្រើម៉ាស៊ីនចំហេះក្នុង។

តម្លៃរថយន្តអគ្គិសនីបានចាប់ផ្ដើមថយចុះ ក្នុងនោះមានម៉ូដែលខ្លះក៏អាចប្រកួតប្រជែងបានយ៉ាងល្អជាមួយនឹងរថយន្តប្រើសាំង។ ថ្លែងប្រាប់ Reuters កាលពីពេលថ្មីៗនេះ CEO របស់ក្រុមហ៊ុន Ford លោក Jim Farley យល់ថា ការចំណាយលើការផលិតរថយន្តអគ្គិសនីនៅតែខ្ពស់ជាងបើធៀបនឹងកំណែប្រពៃណី។

លោក Jim Farley ជឿថា យ៉ាងហោចណាស់ក៏ត្រឹមក្រោយឆ្នាំ 2030 ទើបរថយន្តអគ្គិសនីមានតម្លៃស្មើនឹងរថយន្តប្រេងសាំង នៅពេលរថយន្តអគ្គិសនីជំនាន់ទីពីរ ឬទីបីបង្ហាញខ្លួន។

ប្រហែលពីឆ្នាំ 2030 ដល់ 2035 ការចំណាយលើការផលិតរថយន្តអគ្គិសនីនឹងថយចុះដោយសារតែតម្រូវការកម្មករទាបជាងបច្ចុប្បន្ន ព្រោះថាបរិមាណគ្រឿងបន្លាស់របស់រថយន្តអគ្គិសនីតិចជាងធៀបនឹងរថយន្តប្រេងសាំង។ ទន្ទឹមនឹងនេះ ការដែលថ្មផ្ទុកថាមពលមានទំហំតូចក៏ប្រើប្រាស់វត្ថុធាតុដើមតម្លៃទាប និងតិចជាងធៀបនឹងថ្មធំ ក៏រួមចំណែកធ្វើឱ្យតម្លៃរថយន្តធ្លាក់ចុះ។

ក្រៅពីនេះ ក្រុមហ៊ុននានាក៏អាចកាត់បន្ថយការចំណាយតាមរយៈការលក់រថយន្តតាមអនឡាញ និងលក់សេវាកម្មឌីជីថលសម្រាប់រថយន្តអគ្គិសនីរបស់ពួកគេផងដែរ៕

June 5, 2023

ម៉ូតូអគ្គិសនី Yadea F 200 ABS ជាផលិតផលសហការជាមួយ Porsche

ម៉ូតូអគ្គិសនីថ្មីរបស់ក្រុមហ៊ុន Yadea សហការជាមួយក្រុមហ៊ុន Porsche បំពាក់ម៉ូទ័រអគ្គិសនីកម្លាំង 14.7 សេះ អាចជិះបានចម្ងាយ 129 គីឡូម៉ែត្រ បន្ទាប់ពីបញ្ចូលថាមពលមួយពេញ។

ក្រុមហ៊ុនផលិតម៉ូតូចិន Yadea បានបង្ហាញម៉ូតូអគ្គិសនីម៉ូដែល F 200 ABS មានកម្លាំងប្រហាក់ប្រហែលនឹងម៉ូតូសាំង 125cc។ ម៉ូតូនេះបំពាក់ម៉ូទ័រអគ្គិសនីកម្លាំង 14.7 សេះ, កម្លាំងរមួលកង់ 235 Nm ជួយឱ្យបង្កើនល្បឿនពី 0-50 គីឡូម៉ែត្រ/ម៉ោង ដោយប្រើពេលតែ 2.5 វិនាទី ហើយអាចធ្វើដំណើរបាន 100 គីឡូម៉ែត្រ/ម៉ោង និងរត់បានចម្ងាយ 129 គីឡូម៉ែត្របន្ទាប់ពីបញ្ចូលអគ្គិសនីមួយពេញ។

ក្រៅពីកម្លាំង ចំណុចពិសេសផ្សេងទៀតរបស់ Yadea F 200 ABS គឺរូបរាង។ ក្រុមហ៊ុនចិន Yadea និយាយថា F 200 ABS របស់ខ្លួនគឺជាផលិតផលដែលកើតចេញពីកិច្ចសហការជាមួយក្រុមហ៊ុនផលិតរថយន្តអាល្លឺម៉ង់ Porsche។ រូបរាងរបស់ម៉ូតូនេះយកតាមគំនិតនៅក្នុងកិច្ចការឆ្លាក់ រួមផ្សំនឹងចំណុចលេចធ្លោរបស់រថយន្ត Porsche។

F 200 ABS បំពាក់អំពូលភ្លើងពេលថ្ងៃដ៏លេចធ្លោ និងអំពូល LED មួយគូនៅខាងមុខ ហើយក្បាលរបស់ម៉ូតូនេះក៏មានរបាំងការពារខ្យល់។ ចំណែកអំពូលភ្លើងខាងក្រោយ និងអំពូលភ្លើងហ្វ្រាំង គឺយកតាមគំនិតស្ដីពីពាណិជ្ជសញ្ញារបស់ Yadea។

Yadea F 200 ABS មានតាប្លូឌីជីថល និងឃ្លុបក្រោមកែប ទំហំធំ។ កង់ទីពីររបស់ម៉ូតូនេះត្រូវបានបំពាក់ហ្វាំងឌីស ខណៈថ្មផ្ទុកអគ្គិសនីត្រូវបានដាក់ក្រោមឈ្នាន់។

យោងតាមទំព័រ Paultan ក្រុមហ៊ុន Yadea មិនទាន់បង្ហើបឱ្យដឹងអំពីតម្លៃ ថ្ងៃដាក់លក់ ក៏ដូចជាទីផ្សារដំបូងៗរបស់ F 200 ABS នេះនៅឡើយ៕

June 2, 2023

អាម៉េរិកផ្ដល់ជំនួយជាមីស៊ីលការពារដែនអាកាសបន្ថែមដល់អ៊ុយក្រែន

សហរដ្ឋអាម៉េរិកប្រកាសអំពីកញ្ចប់ជំនួយផ្នែកយោធាតម្លៃ 300 លានដុល្លារទៅឱ្យអ៊ុយក្រែន ក្នុងនោះមានទាំងមីស៊ីលសម្រាប់ប្រព័ន្ធ Patriot និងប្រព័ន្ធការពារដែនអាកាសជាច្រើនប្រភេទផ្សេងទៀត។

កាលពីថ្ងៃទី 31 ឧសភា មន្ទីរបញ្ចកោណបានប្រកាសថា កញ្ចប់ជំនួយតម្លៃ 300 លានដុល្លារសម្រាប់អ៊ុយក្រែន នឹងបន្ថែមមីស៊ីលការពារដែនអាកាសរយៈចម្ងាយឆ្ងាយ Patriot ក៏ដូចជាបន្ថែមប្រព័ន្ធការពារដែនអាកាសរយៈចម្ងាយខ្លី Avenger និងមីស៊ីលបាញ់ពីលើស្មា Stinger។ អាម៉េរិកក៏ផ្ដល់បន្ថែមមីស៊ីលអាកាសប្រឆាំងអាកាសរយៈចម្ងាយមធ្យម AIM-7, រ៉ុក្កែតសម្រាប់ប្រព័ន្ធ HIMARS, គ្រាប់កាំភ្លើងធំ 155 មម និង 105 មម រួមនឹងរ៉ុក្កែត Zuni និងគ្រាប់កាំភ្លើងសម្រាប់ទាហានថ្មើរជើងជាង 30 លានគ្រាប់ផងដែរ។

នេះគឺជាកញ្ចប់ជំនួយជាអាវុធលើកទី 39 របស់អាម៉េរិក សម្រាប់អ៊ុយក្រែន ធ្វើឱ្យជំនួយយោធារបស់វ៉ាស៊ីងតោនសម្រាប់ទីក្រុងកៀវ រាប់ចាប់តាំងពីខែកុម្ភៈ 2022 ឡើងដល់ 37.6 ពាន់លានដុល្លារ។

ប្រកាសខាងលើត្រូវបានធ្វើឡើងក្នុងគ្រាដែលអ៊ុយក្រែនកំពុងត្រៀមខ្លួនសម្រាប់ការវាយបកទ្រង់ទ្រាយធំ ដើម្បីរុញច្រានកងទ័ពរុស្ស៊ី។ ថ្មីៗនេះ ទឹកដីរុស្ស៊ី ចាប់ផ្ដើមរងការវាយប្រហារពីក្រុមប្រដាប់អាវុធអាថ៌កំបាំង។ មូស្គូចោទថា ការវាយប្រហារនេះគឺជាស្នាដៃរបស់ទីក្រុងកៀវ ប៉ុន្តែត្រូវបានអ៊ុយក្រែនបដិសេធ។ ចំណែកទីក្រុងវ៉ាស៊ីងតោនវិញ កន្លងមកក៏ធ្លាប់បានព្រមានដល់ទីក្រុងកៀវថា មិនត្រូវប្រើប្រាស់អាវុធដែលផលិតដោយអាម៉េរិក ទៅវាយប្រហារលើទឹកដីរុស្ស៊ី៕

June 1, 2023

Toyota បង្ហាញរថយន្តដំណើរការដោយអ៊ីដ្រូសែន Mirai Sport គំរូដំបូង

ក្រុមហ៊ុនជប៉ុន Toyota ថ្មីៗនេះបានបង្ហាញរថយន្តបែបកីឡាគំរូដែលយកលំនាំតាមរថយន្ត Mirai នៅក្នុងការប្រកួត Fuji 24 Hours នៅប្រទេសជប៉ុន ហើយនេះគឺជាកំណែដែលដំណើរការដោយថាមពលអ៊ីដ្រូសែន។

ក្រុមហ៊ុននេះពុំបានប្រកាសព័ត៌មានផ្លូវការណាមួយស្ដីពីរថយន្ត Mirai Sport ដូច្នេះ អ្វីដែលយើងអាចដឹង នោះគឺរូបរាងរបស់រថយន្តនេះតាមរយៈវីដេអូដែលត្រូវបានគេបង្ហោះនៅក្នុងបណ្ដាញសង្គម និងនិយាយជាភាសាជប៉ុន។

រថយន្តគំរូ Mirai Sport នេះ គឺយោងទៅតាមរូបរាងរបស់រថយន្ត Toyota Mirai ជំនាន់ទីពីរ ដោយមានការកែប្រែខ្លះត្រង់រូបរាងខាងក្រៅ ពោលគឺថា Toyota Mirai Sport មានលក្ខណៈកីឡាជាង Toyota Mirai។

Toyota Mirai Sport មានប្រព័ន្ធជំរុញថាមពលពីថ្មផ្ទុកអ៊ីដ្រូសែនដែលមានកម្លាំង 182 សេះ (136 គីឡូវ៉ាត់) និងកម្លាំងរមួលកង់ 300 Nm ហើយអាចធ្វើដំណើរបានចម្ងាយ 647 គីឡូម៉ែត្រ ដោយមិនបាច់ចាក់ឥន្ធនៈ។

រថយន្ត Mirai Sport គំរូដំបូងដំណើរការដោយអ៊ីដ្រូសែន

អ៊ីដ្រូសែនដែលត្រូវបានផលិតពីទឹក និងថាមពលព្រះអាទិត្យ គេហៅថា អ៊ីដ្រូសែនបានពីព្រះអាទិត្យ (solar hydrogen)។ ដើម្បីបានអ៊ីដ្រូសែនប្រភេទនេះ គេត្រូវប្រើរូបមន្តមួយចំនួន ក្នុងនោះក៏មាន ការធ្វើអគ្គិសនីវិភាគទឹក (Electrolysis of water) ដែលប្រើប្រាស់អគ្គិសនីក្នុងថ្ម ឬអគុយដែលបានពីផ្ទាំងសូឡាផងដែរ។

May 31, 2023

ក្លឹបបាល់ទាត់វិសាខាធ្វើពិធីបញ្ចុះខណ្ឌសីមានៅមជ្ឈមណ្ឌលហ្វឹកហ្វឺនបាល់ទាត់ថ្មី

កាលពីថ្ងៃទី 30 ឧសភាកន្លងទៅ ថ្នាក់ដឹកនាំក្លឹបបាល់ទាត់វិសាខាបានរៀបចំពិធីសូត្រមន្ដ ក្រុងពាលី និងបញ្ចុះខណ្ឌសីមានៅមជ្ឈមណ្ឌលហ្វឹកហ្វឺនវិសាខា (The Dream Visakha Training Center) ដែលមានទីតាំងក្នុងភូមិអករំដួល សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ (ផ្លូវថ្មីទំនប់កប់ស្រូវ)។

យោងតាមព័ត៌មានពីក្លឹបវិសាខា ពិធីសុំសេចក្ដីសុខ សេចក្ដីចម្រើននេះ មានការអញ្ជើញចូលរួមពីលោកជំទាវ ញ៉ែម សាខន ស ខេង និងលោកជំទាវឧកញ៉ាអគ្គមហាឧបាសិកាពុទ្ធសាសនូបត្ថម្ភក៍ បណ្ឌិត ម៉ៅ ម៉ាល័យ កែ គឹមយ៉ាន ព្រមទាំងលោកជំទាវ កែ សួនសុភី ប្រធានក្លិបកីឡាបាល់ទាត់វិសាខា រួមទាំងគណៈគ្រប់គ្រងក្លឹប បុគ្គលិក និងក្រុមការងារគ្រូផងដែរ។

នៅលើទំព័របណ្ដាញសង្គម ក្លឹបនេះបានសរសេរថា «ពួកយើងសង្ឃឹមថា The Dream Visakha Training Center នឹងក្លាយជាផ្នែកមួយ ដើម្បីរួមចំណែកផលិតធនធានកីឡាករ-កីឡាការិនី និងអភិវឌ្ឍន៍វិស័យកីឡាបាល់ទាត់កម្ពុជាឱ្យកាន់តែរីកចម្រើននាថ្ងៃអនាគត»៕

May 31, 2023

ស្ថានីយបញ្ចូលថាមពលរថយន្តអគ្គិសនី មានរាងដូចដើមឈើ និងស្លឹកប្រវែង 7 ម៉ែត្រ

ក្រុមហ៊ុនធុរកិច្ចថ្មីរបស់អង់គ្លេស SolarBotanic Trees អភិវឌ្ឍស្ថានីយបញ្ចូលថាមពលរថយន្តអគ្គិសនី ដែលអាចប្រមូលកម្ដៅពីព្រះអាទិត្យតាមរយៈដំបូល ឬស្លឹកដែលមានផ្ទាំងសូឡា និងរក្សាអគ្គិសនីនៅក្នុងបង្គោល ឬដើមរបស់វា។

SolarBotanic Trees ទើបតែផលិតបានដើមឈើលោហធាតុគំរូដំបូងសម្រាប់ការសាកល្បងដែលមានទំហំស្មើនឹង ½ នៃទំហំរបស់កំណែផ្លូវការ និងកំពុងប្រឹងប្រែងក្នុងការអភិវឌ្ឍ ធ្វើតេស្តកំណែពេញលេញនៅមុនពេលចាប់ផ្ដើមដំណើរការពាណិជ្ជកម្មនៅចុងឆ្នាំនេះ។ យោងតាម CNN ចុះផ្សាយកាលពីថ្ងៃទី 29 ឧសភា CEO Chris Shelley ឱ្យដឹងថា ក្រុមហ៊ុននេះបានទទួលការកក់ផលិតផលដំបូងចំនួន 200 ដើម ពី Raw Charging Group។

ដោយមានកម្ពស់ 4.5 ម៉ែត្រ និងស្លឹកប្រវែង 7 ម៉ែត្រ ដើមឈើថាមពលរបស់ SolarBotanic Trees អាចត្រូវបានដំឡើងដោយងាយនៅតាមទីសាធារណៈ។ Shelley ឱ្យដឹងថា ដំបូល ឬស្លឹករបស់ដើមឈើលោហធាតុនេះក៏ផ្ដល់ម្លប់ត្រជាក់ និងមានស្រស់ស្អាត។

ដើមឈើសិប្បនិម្មិតនេះមានកម្លាំងផលិតអគ្គិសនី 5 គីឡូវ៉ាត់ អាចបញ្ចូលថាមពលពី 20% ឡើងដល់ 80% ក្នុងរយៈពេលជិត 7 ម៉ោង សម្រាប់រថយន្តអគ្គិសនីដែលមានថ្ម 50 គីឡូវ៉ាត់។ ផលិតផលរបស់ SolarBotanic Trees មានតម្លៃប្រហែលពី 22,000 ទៅ 30,000 ដុល្លារអាម៉េរិក/ឈុត។ ប៉ុន្តែ ក្រុមហ៊ុននេះក៏មានគម្រោងផលិតកំណែដែលតូចជាងនេះ និងមានតម្លៃទាបជាងនេះផងដែរ។

SolarBotanic Trees បញ្ជាក់ថា ចាប់ពីឆ្នាំ 2025 ពួកគេអាចផលិតដើមឈើថាមពលនេះបានយ៉ាងតិច 1,000 ដើមជារៀងរាល់ឆ្នាំ ហើយដំឡើងនៅអង់គ្លេស មុននឹងពង្រីកទៅកាន់ទីផ្សារនានារបស់ទ្វីបអឺរ៉ុប និងអាម៉េរិកខាងជើង៕

May 31, 2023

ទួរប៊ីនខ្យល់ផលិតអគ្គិសនី (Wind Power) ដែលមានអង្កត់ផ្ចិតធំជាងគេបង្អស់នៅលើដីគោក

(ប្រទេសចិន) – ទួរប៊ីនខ្យល់ MySE 10.X-23X របស់ក្រុមហ៊ុន Mingyang Smart Energy ដែលត្រូវបានដឹកចេញពីរោងចក្រនៅទីក្រុង Daqing កាលពីថ្ងៃទី 26 ឧសភា 2023 មានស្លាបដែលមានអង្កត់ផ្ចិតឡើងដល់ 230 ម៉ែត្រ។

ដោយមានអង្កត់ផ្ចិតនៃស្លាបកង្ហារប្រវែង 230 ម៉ែត្រ និងផ្ទៃក្រឡាដែលស្លាបកង្ហារវិលដល់ ទំហំ 42,000 ម៉ែត្រការ៉េ ទួរប៊ីន MySE 10.X-23X មួយគ្រឿងនឹងអាចផលិតអគ្គិសនីបាន 21 គីឡូវ៉ាត់ម៉ោង បន្ទាប់ពីស្លាបកង្ហាររបស់វាវិលបានមួយជុំនៅពេលត្រូវខ្យល់។

តាមការគណនា MySE 10.X-23X មួយគ្រឿងនឹងផលិតអគ្គិសនីស្អាតជាមធ្យមបានជាង 35 លានគីឡូវ៉ាត់ម៉ោង នៅក្នុងមួយឆ្នាំៗ។

ស្លាប់កង្ហារនៃទួរប៊ីនខ្យល់ MySE 10.X-23X របស់ក្រុមហ៊ុន Mingyang Smart Energy

«អង្កត់ផ្ចិតរបស់ស្លាបកង្ហារវែង អនុញ្ញាតឱ្យទួរប៊ីនទទួលបានខ្យល់ច្រើន ដូច្នេះប្រសិទ្ធភាពក្នុងការផលិតអគ្គិសនីដ៏បានប្រសើរឡើង។ ទួរប៊ីនដែលមានសមត្ថភាពខ្លាំងនឹងជួយសន្សំសំចៃផ្ទៃដី ការចំណាយក្នុងការសាងសង់ ក៏ដូចជាការចំណាយសម្រាប់គ្រប់គ្រង និងថែទាំ» Wang Longkuan វិស្វករផ្នែកទួរប៊ីនខ្យល់ ថ្លែងដូច្នេះ។

May 30, 2023

Tesla បើក Showroom លំដាប់ប្រណិតនៅរាជធានីរបស់ប្រទេសថៃ

ក្រុមហ៊ុនផលិតរថយន្តអគ្គិសនី Tesla នឹងបើកសាលតាំងបង្ហាញ (showroom) លំដាប់ប្រណិតនៅប្រទេសថៃ នៅក្រោយខែមិថុនា ក្នុងមជ្ឈមណ្ឌលពាណិជ្ជកម្មនៅភាគខាងកើតរាជធានីបាងកក ដើម្បីជំរុញការលក់រថយន្តអគ្គិសនីដែលកំពុងកើនឡើងយ៉ាងរហ័សនៅប្រទេសថៃ និងដើម្បីតាមទាន់គូប្រកួតចិន ក្នុងនោះមាន BYD ជាដើម។

យោងតាមបណ្ដាញផ្សព្វផ្សាយក្នុងស្រុក ក្រុមហ៊ុនផលិតរថយន្តអាម៉េរិកមួយនេះកំពុងតែជួសជុល និងកែលំអទីតាំងដែលធ្លាប់ជាសាលតាំងបង្ហាញរបស់ Toyota។ នៅប្រទេសថៃ ក្រៅពីសាលតាំងបង្ហាញនេះ Tesla ក៏នឹងមានមជ្ឈមណ្ឌលសេវាកម្ម ឃ្លាំងគ្រឿងបន្លាស់ និងស្ថានីយបញ្ចូលថាមពលរហ័សផងដែរ។

ទាក់ទងនឹងដំណឹងខាងលើ តំណាងមួយរូបរបស់ Tesla បានឱ្យដឹងថា ព័ត៌មានលម្អិតនឹងត្រូវបានប្រកាសឆាប់ៗខាងមុខ។

Tesla បានចាប់ផ្ដើមលក់អនឡាញនូវរថយន្តបែបកីឡាពហុមុខងារប្រភេទមធ្យម Model Y និងរថយន្ត Model 3 នៅប្រទេសថៃ តាំងពីខែធ្នូឆ្នាំមុន ក្នុងតម្លៃចាប់ពីប្រហែល 1.96 លានបាត (56,500 ដុល្លារអាម៉េរិក) និង 1.76 លានបាត (50,700 ដុល្លារអាម៉េរិក)។ តួលេខនេះខ្ពស់ជាងបើធៀបនឹងតម្លៃ 1 លានបាត់របស់បណ្ដារថយន្តចិនដែលមានលក្ខណៈប្រហាក់ប្រហែលនេះ។

យោងតាមរបាយការណ៍របស់ទំព័រ Autolife នៅប្រទេសថៃ ចំនួនរថយន្ត Model Y ក្នុងខែមីនាបានកើនឡើងជិតទ្វេដងធៀបនឹងខែកុម្ភៈ ដោយលក់បាន 1,034 គ្រឿង ជួយឱ្យម៉ូដែលរថយន្តនេះកាន់កាប់ 17% នៅក្នុងទីផ្សាររថយន្តអគ្គិសនីនៅប្រទេសថៃ។ Model Y ក្លាយជាម៉ូដែលរថយន្តអគ្គិសនីដែលលក់ដាច់ជាងគេលំដាប់ទីពីរនៅប្រទេសថៃ បន្ទាប់ពី Atto 3 របស់ BYD និងនៅពីលើ SAIC Motor និង Great Wall Motor។

Showroom របស់ Tesla នៅរាជធានីរបស់ប្រទេសថៃ

May 30, 2023

Tag: ផលិត