ផលិត - La Reine Media

ក្រុមហ៊ុនវៀតណាម សង់រោងចក្រតម្លៃ 4 ពាន់លានដុល្លារនៅអាម៉េរិក ក្នុងសប្ដាហ៍ក្រោយ

នេះនឹងក្លាយជារោងចក្រផលិតរថយន្តអគ្គិសនីដំបូងនៅ Carolina ខាងជើងរបស់ក្រុមហ៊ុនវៀតណាម VinFast ដែលនឹងផ្គត់ផ្គង់សម្រាប់ទីផ្សារអាម៉េរិកខាងជើង។

នៅថ្ងៃទី 19 កក្កដា 2023 នេះ VinFast បានប្រកាសបើកការដ្ឋានសាងសង់រោងចក្រផលិតរថយន្តអគ្គិសនីនៅក្នុងរដ្ឋ Carolina ខាងជើង របស់សហរដ្ឋអាម៉េរិក នៅថ្ងៃទី 28 កក្កដាខាងមុខ។ រោងចក្រនេះមានទីតាំងនៅក្នុងតំបន់ឧស្សាហកម្ម Triangle Innovation Point របស់ស្រុក Chatham ក្នុងរដ្ឋ Carolina ខាងជើង។ គម្រោងដែលស្ថិតនៅលើផ្ទៃដីប្រហែល 733 ហិកតានេះ គ្រោងនឹងផលិតរថយន្តអគ្គិសនីបាន 150,000 គ្រឿង/ឆ្នាំ នៅក្នុងដំណាក់កាលទីមួយ។

យោងតាមក្រុមហ៊ុន VinFast រោងចក្រខាងលើគ្រោងនឹងផ្ដើមការផលិតចាប់ពីឆ្នាំ 2025។ មុននោះ VinFast ក៏បានប្រកាសថា បានទទួលការអនុគ្រោះក្នុងតម្លៃ 1.2 ពាន់លានដុល្លារពីរដ្ឋបាលរដ្ឋ Carolina ខាងជើង, ទីក្រុង Sanford, តំបន់ Chatham និងមូលនិធិ Golden Leaf ផងដែរ សម្រាប់គម្រោងសាងសង់រោងចក្រនេះ។

នៅប្រទេសវៀតណាម VinFast បានប្រគល់រថយន្តអគ្គិសនីដល់ដៃអតិថិជនចំនួនជាង 11 ពាន់គ្រឿង នៅក្នុង 6 ខែដើមឆ្នាំនេះ ក្នុងនោះមាន 3,155 គ្រឿង ត្រូវបានប្រគល់ក្នុងខែមិថុនាកន្លងទៅ៕

July 19, 2023

ស្ថានីយថាមពលព្រះអាទិត្យអាចបាញ់បញ្ជូនអគ្គិសនីទៅឱ្យឋានព្រះចន្ទ

ក្រុមវិស្វកររបស់ប្រទេសស្វ៊ីស កំពុងរៀបគម្រោងសាងសង់ស្ថានីយផលិតអគ្គិសនីពីកម្ដៅព្រះអាទិត្យដែលអាចផ្គត់ផ្គង់អគ្គិសនីជាបន្តបន្ទាប់ទៅឱ្យមូលដ្ឋាននៅលើឋានព្រះចន្ទ ក្នុងទម្រង់រលកមីក្រូវ៉េវ។

ក្រុមវិស្វករនៅក្នុងក្រុមហ៊ុនហ៊ុនស្វ៊ីស Astrostrom បានបង្ហាញសេចក្ដីលំអិតអំពីស្ថានីយអគ្គិសនីព្រះចន្ទ – ផែនដីខ្នាតធំ (GE⊕-LPS)។ ស្ថានីយនេះរួមមានផ្ទាំងសូឡារាងអក្សរ V ជាច្រើនផ្ទាំង ត្រូវបានរៀបជារាងគូទខ្យងនៅក្នុងផ្ទៃក្រឡាមួយគីឡូម៉ែត្រការ៉េ ដែលអាចបាញ់បញ្ជូនថាមពលឡើងដល់ 23 ម៉េហ្គាវ៉ាត់ (MW) ទៅកាន់មូលដ្ឋានរបស់មនុស្សនៅលើផ្ទៃរបស់ឋានព្រះចន្ទ។

យោងតាមការស្រាវជ្រាវរបស់ក្រុមវិស្វករខាងលើ ទាំងស្ថានីយ GE⊕-LPS ទាំងផ្ទាំងសូឡា អាចត្រូវបានផលិតឡើងដោយប្រើប្រាស់វត្ថុធាតុដែលមាននៅលើឋានព្រះចន្ទ។

ស្ថានីយផលិតអគ្គិសនីនឹងត្រូវបានបង្កើតឡើងសម្រាប់អ្នកស្នាក់នៅយូរអង្វែង ហើយស្ថិតនៅក្នុងតំបន់ Lagrange ត្រង់ចន្លោះផែនដី និងព្រះចន្ទ ក្នុងរយៈកម្ពស់ 61,350 គីឡូម៉ែត្រពីផ្ទៃព្រះចន្ទ។

«នៅពេលគម្រោងដូច GE⊕-LPS បានបញ្ជាក់អំពីប្រសិទ្ធភាពនៃដំណើរការផលិត និងដំឡើងផ្កាយរណបថាមពលព្រះអាទិត្យ យើងនឹងអាចបង្កើនវិសាលភាពក្នុងការផលិតផ្កាយរណបថាមពលព្រះអាទិត្យពីវត្ថុធាតុដែលមាននៅលើឋានព្រះចន្ទ ដើម្បីផ្គត់ផ្គង់ដល់ភពផែនដី» Sanjay Vijendran ប្រធានគម្រោងស្រាវជ្រាវថាមពលព្រះអាទិត្យក្នុងទីអវកាស SOLARIS របស់អង្គការ ESA ឱ្យដឹងដូច្នេះ៕

July 19, 2023

ទួរប៊ីនខ្យល់កម្លាំង 15 MW នៅលើសមុទ្រ ផ្លាស់ទីទៅរកខ្យល់ដោយស្វ័យប្រវត្ត

ទួរប៊ីនខ្យល់របស់ X1 Wind មានទម្រដែលមានរូបរាងដូចសជី ឬពីរ៉ាមីត តូចលើធំក្រោម អមនឹងប្រព័ន្ធពោងអណ្ដែតលើទឹក អនុញ្ញាតឱ្យវាផ្លាស់ទីទៅកាន់កន្លែងមានខ្យល់បក់ ដូច្នេះវាអាចផលិតអគ្គិសនីស្ទើរតែមិនឈប់ឈរ។

ទម្រទួរប៊ីនខ្យល់ X1 Wind បំពាក់បច្ចេកវិទ្យា PivotBuoy ដែលក្នុងនោះ គ្រឹះរបស់វាតភ្ជាប់ជាមួយនឹងទីតាំងមួយដែលអនុញ្ញាតឱ្យទម្រផ្លាស់ទីទៅតាមទិសរបស់ខ្យល់។ ប្រព័ន្ធនេះដំណើរការបានល្អបំផុតនៅពេលវាបែរខ្នងដាក់ខ្យល់ដែលបក់មកពីខាងក្រោយ។ ប្រភេទទួរប៊ីនខ្យល់នេះជួយឱ្យវាមិនប្រឈមនឹងការប៉ះទង្គិចរវាងស្លាបកង្ហារ និងដងខ្លួន ព្រមទាំងកាត់បន្ថយការចំណាយក្នុងការផលិត និងដំឡើង ក៏ដូចជាមានប្រសិទ្ធភាពខ្ពស់ក្នុងការផលិតអគ្គិសនី។

កំណែដំបូងរបស់ X1 Wind មានឈ្មោះថា X30 ដែលត្រូវបានដាក់ពង្រាយ និងធ្វើតេស្តនៅប្រជុំកោះ Canary ប្រទេសអេស្ប៉ាញ។ គម្រោងខាងលើបានចាប់ផ្ដើមតាំងពីខែមេសាឆ្នាំ 2019 ហើយដំណើរការផលិតសម្រេចបានកាលពីខែវិច្ឆិកាឆ្នាំ 2020 ខណៈដែលការសាកល្បងប្រព័ន្ធអម និងការដំឡើងគ្រឹះ និងខ្សែកាប ត្រូវបានធ្វើឡើងរួចរាល់កាលពីពាក់កណ្ដាលឆ្នាំ 2022។

តាមផែនការ គម្រោងពាណិជ្ជកម្មរបស់ X1 Wind នឹងត្រូវបានធ្វើឡើងនៅលើតំបន់សមុទ្រមេឌីទែរ៉ាណេរបស់បារាំង នៅឆ្នាំ 2025។ នេះបើយោងតាមទំព័រ Design Boom។

July 18, 2023

យន្តហោះមួយគ្រឿង ជ្រុលទៅបុកឃ្លាំង បណ្ដាលឱ្យមនុស្សជាងដប់នាក់ស្លាប់ និងរងរបួស

(ប៉ូឡូញ) – យន្តហោះ Cessna 208 មួយគ្រឿង បានជ្រុលចង្កូតទៅបុកនឹងរោងដាក់យន្តហោះនៅក្បែររដ្ឋធានីវ៉ាសូវី បណ្ដាលឱ្យមនុស្សចំនួន 5 នាក់បាត់បង់ជីវិត និង 8 នាក់ផ្សេងទៀតរងរបួស។

គ្រោះថ្នាក់នេះកើតឡើងកាលពីថ្ងៃទី 17 កក្កដា នៅឯព្រលានយន្តហោះក្បែរភូមិ Chrcynno ដែលមានចម្ងាយពីរដ្ឋធានីវ៉ាសូវីប្រហែល 45 គីឡូម៉ែត្រទៅទិសពាយព្យ នៅពេលយន្តហោះ Cessna 208 ជ្រុលទៅបុកឃ្លាំងដាក់យន្តហោះ ជាទីដែលមានមនុស្សចំនួន 13 នាក់កំពុងជ្រកព្យុះភ្លៀង។

យោងតាមក្រុមមន្ត្រីប៉ូឡូញ ជនរងគ្រោះ 5 នាក់ដែលបានស្លាប់នៅក្នុងហេតុការណ៍ខាងលើ រួមមាន អ្នកបើកបរយន្តហោះ Cessna 208 ម្នាក់ និង 4 នាក់ទៀតដែលកំពុងជ្រកភ្លៀង។ ក្នុងចំណោមមនុស្ស 8 នាក់រងរបួស ក៏មានក្មេងម្នាក់ផងដែរ។

សមត្ថកិច្ចកំពុងតែស្រាវជ្រាវរកមូលហេតុនៃគ្រោះថ្នាក់ ខណៈក្រុមពន្លត់អគ្គិភ័យ និងក្រុមជំនួយកំពុងបន្តស្វែងរកជនរងគ្រោះ។

Cessna 208 Caravan គឺជាស៊េរីយន្តហោះពហុមុខងារ ដែលផលិតឡើងដោយក្រុមហ៊ុន Cessna របស់សហរដ្ឋអាម៉េរិក។ Cessna 208 Caravan ចំនួនប្រហែល 3,000 គ្រឿងត្រូវបានផលិត និងតែងតែត្រូវបានប្រើប្រាស់សម្រាប់ការហ្វឹកហាត់ ការដឹកអ្នកដំណើរ និងចូលរួមធ្វើសកម្មភាពមនុស្សធ៌។ យន្តហោះនេះអាចមានពីឡុតម្នាក់ ឬពីរនាក់ និងអាចដឹកមនុស្សបានពី 9 ទៅ 13 នាក់។ Cessna 208 Caravan អាចហោះហើរក្នុងល្បឿនអតិបរមា 344 គីឡូម៉ែត្រ/ម៉ោង ហើយអាចហោះបានចម្ងាយ 1,980 គីឡូម៉ែត្រ៕

July 18, 2023

Tesla បង្អួតរថយន្តអគ្គិសនី Cybertruck ដំបូង ក្រោយការពន្យារពេលពីរឆ្នាំ

រថយន្តអគ្គិសនីប្រភេទទ្រុង Cybertruck មួយគ្រឿងដំបូងគេ ត្រូវបានផលិត និងដំឡើងរួចរាល់នៅឯរោងចក្រ Gigafactory របស់ក្រុមហ៊ុន Tesla នៅ Austin រដ្ឋ Texas សហរដ្ឋអាម៉េរិក។

ក្រុមហ៊ុនផលិតរថយន្តអគ្គិសនីអាម៉េរិក Tesla បានបង្ហោះរូបថតមួយសន្លឹកបង្ហាញថា រថយន្តអគ្កីសនីប្រភេទទ្រុងមួយគ្រឿងរបស់ពួកគេ ត្រូវបានផលិតរួចរាល់ អមជាមួយនឹងបុគ្គលិកខ្ទង់រយនាក់ស្ថិតនៅជុំវិញរថយន្ត។

ការផលិត Cybertruck ត្រូវបានពន្យារពេលអស់ពីរឆ្នាំ ដូច្នេះការមើលឃើញរថយន្តដែលត្រូវបានផលិតរួចរាល់នឹងមកនូវភាពធូរស្រាលក្នុងចិត្តសម្រាប់អ្នកដែលបានបញ្ជាទិញ និងកំពុងទន្ទឹងរង់ចាំទទួលទំនិញ។

នាយកប្រតិបត្តិរបស់ Tesla លោក Elon Musk ថ្មីៗនេះបានសន្យាថា ព្រឹត្តិការណ៍ប្រគល់រថយន្តអគ្គិសនីដល់ដៃអតិថិជននឹងត្រូវបានធ្វើឡើងនៅក្នុងត្រីមាសទីបីឆ្នាំនេះ។ ប៉ុន្តែមិនបានលើកឡើងអំពីពេលវេលាជាក់លាក់នៅឡើយ។

Tesla បានបង្ហាញ Cybertruck កាលពីឆ្នាំ 2019 និងកំណត់គោលដៅផលិតក្នុងទ្រង់ទ្រាយធំនៅចុងឆ្នាំ 2021 ប៉ុន្តែកាលបរិច្ឆេទនេះត្រូវបានពន្យារពេលជាច្រើនលើកមកហើយ។

របាយការណ៍នានាបង្ហាញថា Cybertruck របស់ Tesla ត្រូវបានបញ្ជាទិញជាមុនជាងមួយលានគ្រឿង។ Cybertruck មានបីកំណែសម្រាប់ជ្រើសរើស និងមានតម្លៃចាប់ពី 39,900 ដល់ 69,900 ដុល្លារអាម៉េរិក អាស្រ័យទៅលើមុខងារនានារបស់កំណែនីមួយ។

ក៏ប៉ុន្តែ ទិន្នន័យស្ដីពីតម្លៃខាងលើនេះត្រូវបានលុបចេញពីគេហទំព័ររបស់ក្រុមហ៊ុននេះបាត់ទៅហើយ។ មនុស្សជាច្រើនយល់ថា តម្លៃរបស់ Cybertruck នឹងខ្ពស់ជាងតម្លៃដែលបានលុបខាងលើ៕

July 17, 2023

យានអវកាសបីគ្រឿងរបស់អាម៉េរិកដែលនឹងត្រូវដឹកមនុស្សឡើងទៅកាន់ឋានព្រះចន្ទ

ក្រុមហ៊ុនការពារជាតិសហរដ្ឋអាម៉េរិក Lockheed Martin កាលពីថ្ងៃទី 14 កក្កដា បានបង្ហាញរូបថតយានអវកាស Orion 3 គ្រឿងដែលនឹងត្រូវប្រើប្រាស់ក្នុងបេសកកម្មឋានព្រះចន្ទ Artemis II, III និង IV។

«អនាគតរបស់យាន Orion ទំនងជាល្អខ្លាំងណាស់។ ម៉ូឌុលទាំងឡាយដែលនឹងដឹកមនុស្សក្នុងបេសកកម្ម Artemis II, Artemis III និង Artemis IV កំពុងឆ្លងកាត់ដំណាក់កាលផលិតខុសៗគ្នានៅក្នុងមជ្ឈមណ្ឌលអវកាស Kennedy របស់អង្គការណាសា ដើម្បីត្រៀមសម្រាប់ការនាំអវកាសចរត្រលប់ទៅកាន់ឋានព្រះចន្ទ» Lockheed Martin សរសេរនៅលើ Twitter កាលពីថ្ងៃទី 14 កក្កដាដូច្នេះ អមនឹងរូបថតរបស់យានអវកាស Orion។ យានទាំងនេះកំពុងត្រូវបានអភិវឌ្ឍក្រោមការគ្រប់គ្រងរបស់ Lockheed Martin។

ក្នុងបេសកកម្ម Artemis II យានអវកាស Orion គ្រោងនឹងត្រូវបានបាញ់បង្ហោះនៅថ្ងៃទី 11 កុម្ភៈ ឆ្នាំ 2024 នាំយកអ្នកអវកាស 4 នាក់ទៅជាមួយ រួមមាន 3 នាក់មកពីណាសារបស់សហរដ្ឋអាម៉េរិក និងម្នាក់មកពីអង្គការអវកាសកាណាដា។ ចំណែកក្រុមអវកាសចរដែលនឹងចូលរួមក្នុងបេសកកម្ម Artemis III និង Artemis IV មិនទាន់ត្រូវបានបង្ហើបឱ្យដឹងនៅឡើយ។ តាមផែនការ Artemis II នឹងត្រូវបានបាញ់បង្ហោះក្នុងឆ្នាំ 2025 ឬ 2026 អាស្រ័យទៅលើយាន Starship របស់ SpaceX។ Artemis IV គ្រោងនឹងបាញ់បង្ហោះនៅចុងទសវត្សរ៍នេះ។

នៅក្នុងរូបថតខាងលើ ពុំមានយានអវកាស Orion របស់ Artemis I ជាយានដែលបានបំពេញបេសកកម្មឡើងទៅកាន់គន្លងតារាវិថីព្រះចន្ទកាលពីចុងឆ្នាំមុន។ ក្នុងរូបថតនេះក៏មិនមានយាន Orion ដែលត្រូវបានផលិតដំបូង និងជាយានដែលបានហោះជុំវិញផែនដីកាលពីឆ្នាំ 2014 នៅក្នុងជើងហោះហើរសាកល្បង។

ណាសាបានចុះកិច្ចព្រមព្រៀងជាមួយនឹងប្រទេសចំនួន 26 ដើម្បីបង្កើតគោលការណ៍សម្រាប់ការធ្វើដំណើរទៅកាន់ឋានព្រះចន្ទប្រកបដោយសន្តិភាព។ អង្គការអវកាសអឺរ៉ុប និងកាណាដាសុទ្ធតែបានសន្យាផ្គត់ផ្គង់ផ្នែករឹងសម្រាប់ Artemis និង Gateway ជាស្ថានីយអវកាសហោះជុំវិញឋានព្រះចន្ទដែលគ្រោងនឹងត្រូវបាញ់បង្ហោះក្នុងទសវត្សរ៍នេះ៕

July 17, 2023

វីដេអូបកស្រាយអំពីហេតុការណ៍គ្រោះថ្នាក់នាវា Titan ទាក់ទាញអ្នកមើលជាង 14 លានលើក

វីដេអូជាង 6 នាទី បកស្រាយអំពីករណីនាវាមុជទឹក Titan ត្រូវសម្ពាធទឹកគាបរហូតដល់បែកបាក់ខ្ទេចខ្ទី ទាក់ទាញអ្នកចូលមើលបានជាង 14 លាននាក់ បន្ទាប់ពីបានបង្ហោះលើបណ្ដាញសង្គម YouTube កាលពីថ្ងៃទី 01 កក្កដា 2023។

កាលពីថ្ងៃទី 01 កក្កដា គណនី AiTelly បានបង្ហោះវីដេអូដែលមានថេរវេលាជាង 6 នាទី បកស្រាយអំពីហេតុការណ៍គ្រោះថ្នាក់របស់នាវាមុជទឹក Titan ដែលត្រូវបានសម្ពាធទឹកមហាសមុទ្រអាត្លង់ទិកគាបបែកបាក់ខ្ទេចខ្ទីកាលពីខែមិថុនា 2023។ វីដេអូនេះ មានអ្នកចូលមើលជាង 14,148,000 លើក, អ្នកបញ្ចេញមតិជាង 5 ពាន់លើក និងចូលចិត្តជាង 66,000 លើក គិតត្រឹមព្រឹកថ្ងៃទី 17 កក្កដានេះ។

ក្រុមការងាររបស់គណនី AiTelly យកទិន្នន័យពី Google និងគេហទំព័ររបស់ OceanGate ដែលជាក្រុមហ៊ុនគ្រប់គ្រងនាវាមុជទឹក Titan ដើម្បីបង្កើតជាវីដេអូ។ ក្រុមការងារនេះបានចំណាយពេល 12 ម៉ោង នៅក្នុងការធ្វើត្រាប់បែប 3D បង្ហាញអំពីហេតុការណ៍ដែលនាវា Titan ត្រូវរងសម្ពាធទឹកក្នុងជម្រៅ 3,800 ម៉ែត្រ ដែលមានកម្លាំងខ្លាំងជាងប្រហែល 400 ដង ធៀបនឹងសម្ពាធខ្យល់ក្នុងបរិយាកាសរបស់ផែនដី។

វីដេអូនេះផ្ដោតសំខាន់ទៅលើរចនារូបរាងនៃសម្បកខាងក្រៅរបស់ Titan ធ្វើពីសរសៃកាបូន ដែលត្រូវបានចាត់ទុកថាជាមូលហេតុនាំឱ្យនាវានេះត្រូវជួបគ្រោះថ្នាក់។ Titan ត្រូវបានផលិតពីសរសៃកាបូនជំនួសឱ្យដែក និងអាលុយមីញ៉ូម។

សរសៃកាបូនធុនជាងដែកប្រាំដង ប៉ុន្តែនោះមិនមែនជាភាពធុននឹងសម្ពាធនោះឡើយ ដោយវាគ្រាន់តែជួយរក្សាគ្រោងឆ្អឹងមិនឱ្យទាញដាច់ពីគ្នាប៉ុណ្ណោះ។ បញ្ហាប្រេះ រហែកនៃសរសៃកាបូនដែលប្រើសម្រាប់ការផលិតនាវា Titan កើតឡើងយឺតជាង បើធៀបនឹងសរសៃកាបូនសុទ្ធ ព្រោះថា សរសៃកាបូនលើនាវានេះត្រូវបានលាយជាមួយកៅ resin ជាស្រទាប់ៗ។ ដូច្នេះ រចនាសម្ព័ន្ធសរសៃកាបូននៅលើនាវា Titan មិនមែនជាទម្រង់បន្ទះកាបូនសុទ្ធ និងតែមួយស្រទាប់នោះទេ ប៉ុន្តែវាគឺជាទម្រង់ផ្សំរវាងសរសៃកាបូន និងកាវ resin ដែលក្រុមហ៊ុន OceanGate ហៅថា «carbon fiber composite»។

ដោយសារតែជាទម្រង់ល្បាយ ដូច្នេះ ក្នុងរចនាសម្ព័ន្ធសរសៃកាបូននេះក៏មានចន្លោះប្រហោងល្អិតៗដែលកាវ resin មិនអាចលុបបំពេញ និងមិនអាចមើលឃើញពីខាងក្រៅ ថ្វីបើ OceanGate ថា អត្រានៃចន្លោះប្រហោងនេះគឺក្រោម 1% ប៉ុន្តែតួលេខនេះមិនត្រូវបានបញ្ជាក់ច្បាស់លាស់។

ចំណុចប្រេះដ៏ល្អិតនៅក្នុងស្រទាប់សរសៃកាបូនរបស់ Titan ចាប់ផ្ដើមធំឡើងក្នុងល្បឿនយឺតៗ ទៅតាមស្រទាប់សរសៃកាបូននីមួយៗ ហើយវាចេះតែលឿនឡើងៗពីស្រទាប់មួយទៅស្រទាប់មួយទៀត។ ដូច្នេះស្នាមប្រេះនឹងធំឡើងរហូតដល់ធ្វើឱ្យរចនាសម្ព័ន្ធខាងក្នុងបង្អស់ ប្រែជាខ្សោយរហូតដល់ទីបំផុត។

នៅពេលលក្ខខណ្ឌអាក្រក់ទាំងអស់បានប្រមូលផ្ដុំគ្នាពេញលេញ នាវា Titan ក៏ត្រូវសម្ពាធទឹកគាបឱ្យក្រពឹត រួញ បែកបាក់ខ្ទេចខ្ទី បន្ទាប់ពីបានប៉ះទង្គិចនឹងអ្វីមួយនៅបាតសមុទ្រ បណ្ដាលឱ្យមនុស្សទាំង 5 នាក់នៅក្នុងនាវា ត្រូវបាត់បង់ជីវិត៕

July 17, 2023

ប្រព័ន្ធ Li-Fi លឿនជាង Wi-Fi 100 ដង

Li-Fi ដែលជាស្ដង់ដាបញ្ជូនទិន្នន័យដោយមិនប្រើប្រាស់ខ្សែ 802.11bb មានល្បឿន 224 Gb/វិនាទី លឿនជាង 100 ដង បើធៀបនឹង Wi-Fi បច្ចុប្បន្ន។

យោងតាមប្រកាសកាលពីថ្ងៃទី 13 កក្កដា 2023 របស់សមាគមវិស្វករអគ្គិសនី និងអេឡិចត្រូនិច (IEEE) ប្រព័ន្ធ 802.11bb ត្រូវបានដាក់ចូលទៅក្នុងបញ្ជីស្ដង់ដានៃការបញ្ជូនទិន្នន័យតាមអ៊ីនធើណិតដោយមិនប្រើខ្សែប្រភេទថ្មី។ ប្រការនេះនឹងជួយបង្កើនល្បឿននៃការដាក់ពង្រាយ និងការបញ្ចូលស្ដង់ដាបច្ចេកវិទ្យាបញ្ជូនទិន្នន័យថ្មីនេះទៅក្នុងជីវភាពប្រចាំថ្ងៃ។

បច្ចុប្បន្ន ស្ដង់ដាថ្មីបំផុតរបស់ Wi-Fi បានវិវត្តឡើងដល់កម្រិត 802.11be ដែលត្រូវបានហៅថា Wi-Fi 7 ដោយមានល្បឿនខ្ពស់បំផុតត្រឹម 30 Gb/វិនាទី លឿនជាងបីដងធៀបនឹងកម្រិត 9.7 Gb/វិនាទីនៅលើ Wi-Fi 6។ ចំណែកស្ដង់ដា Wi-Fi ដែលពេញនិយមនាបច្ចុប្បន្នគឺ 2.4 GHz និង 5 GHz ដែលមានល្បឿនប្រហែលពី 200 Mb/វិនាទី ទៅ 1.3 Gb/វិនាទី។

ក្នុងគ្រាដែល Wi-Fi ប្រើប្រាស់រលកវិទ្យុ (RF) ដើម្បីបញ្ជូនទិន្នន័យ Li-Fi ឯណោះវិញប្រើប្រាស់បច្ចេកវិទ្យារលកពន្លឺតាមរយៈអំពូលភ្លើង LED។ Li-Fi មិនត្រឹមតែបញ្ជូនទិន្នន័យបានលឿនខ្លាំង (224 Gb/វិនាទី) នោះទេ តែក៏មិនបង្កការរំខានដល់ឧបករណ៍វេជ្ជសាស្ត្រ និងមិនប៉ះពាល់ដល់រលកវិទ្យុដែលមាននាបច្ចុប្បន្ន។

https://www.youtube.com/watch?v=ty1Q_2ORLLk

ទោះជាយ៉ាងណាក៏ដោយ Li-Fi ក៏នៅតែមានចំណុចខ្សោយ។ នៅពេលមានឧបសគ្គដូចជាជញ្ជាំង ឬកន្លែងពុំមានពន្លឺជាដើម ការបញ្ជូនទិន្នន័យក៏ត្រូវជួបបញ្ហា។

មកដល់ពេលនេះ មានក្រុមហ៊ុនមួយចំនួនបានចាប់ផ្ដើមផលិតម៉ូឌុល Li-Fi សម្រាប់បណ្ដាឧបករណ៍បញ្ចេញរលកសញ្ញា និងឧបករណ៍តភ្ជាប់។ ក្នុងនោះ ក្រុមហ៊ុន pureLiFi ផ្គត់ផ្គង់ម៉ូឌុល Light Antenna ONE សម្រាប់បណ្ដា OEM (original equipment manufacturer) ធ្វើការប្រើប្រាស់សាកល្បង និងវាយតម្លៃ។ បណ្ដាឧបករណ៍ Li-Fi ពាណិជ្ជកម្មអាចនឹងបង្ហាញខ្លួនជាលើកដំបូងនៅក្នុងព្រឹត្តិការណ៍តាំងពិព័រណ៍បច្ចេកវិទ្យា MWC 2024 នៅប្រទេសអេស្ប៉ាញនាពេលខាងមុខ៕

July 15, 2023

យានចុះចត Chandrayaan-3 របស់ឥណ្ឌា ឡើងដល់គន្លងតារាវិថិផែនដីដោយជោគជ័យ

អង្គការអវកាសរបស់ប្រទេសឥណ្ឌា បានបាញ់បង្ហោះរ៉ុក្កែតមួយគ្រឿងកាលពីថ្ងៃទី 14 កក្កដា ដើម្បីនាំយានអវកាសឡើងទៅកាន់គន្លងគោចរផែនដី និងនាំយានចុះចតឡើងទៅកាន់ឋានព្រះចន្ទ។

រ៉ុក្កែត LVM3 របស់អង្គការអវកាសឥណ្ឌា (ISRO) ត្រូវបានបាញ់បង្ហោះពីព្រលានអវកាសក្នុងរដ្ឋ Andhra Pradesh នៅភាគខាងត្បូងប្រទេសនេះ កាលពីល្ងាចថ្ងៃទី 14 កក្កដា ឆ្នាំ 2023។

ប្រហែល 16 នាទីបន្ទាប់ពីបានបាញ់បង្ហោះ ISRO ក៏ប្រកាសថា រ៉ុក្កែតបាននាំយានចុះចត Chandrayaan-3 ឡើងដល់គន្លងតារាវិថីផែនដីដោយជោគជ័យ។ យានចុះចតនេះនឹងហោះទៅដល់ឋានព្រះចន្ទនៅខែក្រោយ។

បើសិនជាបេសកកម្មខាងលើប្រព្រឹត្តិទៅដោយរលូន នោះឥណ្ឌានឹងក្លាយជាប្រទេសមួយក្នុងចំណោមប្រទេសដែលបាននាំយានទៅចុះចតលើឋានព្រះចន្ទដោយជោគជ័យ។ បច្ចុប្បន្ន មានប្រទេសចំនួនបីដែលបានទទួលជោគជ័យក្នុងបេសកកម្មដូចគ្នានេះ រួមមាន អាម៉េរិក អតីតសូវៀត និងចិន។

Chandrayaan (ចន្ទ្រយាន) នៅក្នុងភាសាសំស្ក្រឹតមានន័យថា «យានព្រះចន្ទ»។ ចន្ទ្រយានរួមមានយានចុះចតមួយគ្រឿងដែលមានកម្ពស់ពីរម៉ែត្រ ត្រូវបានផលិតឡើងដើម្បីដាក់ពង្រាយយានបើកបរស្វ័យប្រវត្តិមួយគ្រឿងនៅក្បែរប៉ូលខាងត្បូងរបស់ព្រះចន្ទ។

អង្គការអវកាសឥណ្ឌាឱ្យដឹងថា ការចុះចតលើដីនៅឋានព្រះចន្ទ គ្រោងនឹងធ្វើឡើងនៅថ្ងៃទី 23 ខែសីហា ឆ្នាំ 2023៕

July 15, 2023

Tom Cruise មិនប្រើប្រាស់កម្មវិធីធ្វើរូបភាពឱ្យក្មេងជាងវ័យក្នុងរឿង «Mission: Impossible 7»

អ្នកដឹកនាំរឿង «Mission: Impossible 7» និយាយថា មិនប្រើប្រាស់កម្មវិធីបំប្លែងរូបភាព Tom Cruise ឱ្យក្មេងជាងវ័យ ដោយយល់ថា បច្ចេកវិទ្យាមិនអាចជួយដល់ភាពយន្តនៅក្នុងបញ្ហានេះ។

នៅលើទំព័រ GamesRadar+ និង Total Film កាលពីថ្ងៃទី 12 កក្កដា Christopher McQuarrie ដែលជាអ្នកដឹករឿង Mission: Impossible – Dead Reckoning Part One («Mission: Impossible 7») បានឱ្យដឹងថា ដំបូងឡើយ ក្រុមការងារប្រុងប្រើប្រាស់កម្មវិធីកុំព្យូទ័រសម្រាប់ទិដ្ឋភាពបើកឆាក ដែលជាឈុតឆាករម្លឹកអំពីតួអង្គសំខាន់ Ethan Hunt (សម្ដែងដោយ Tom Cruise) កាលពីឆ្នាំ 1989។

ក្រោយពីបានពិចារណា McQuarrie យល់ថា លោកមិនចូលចិត្តការប្រើប្រាស់បច្ចេកវិទ្យាកុំព្យូទ័រដើម្បីធ្វើឱ្យ Tom Cruise ដែលមានវ័យ 61 ឆ្នាំ ប្រែជាកំលោះភ្លាមៗនៅលើអេក្រង់។ អ្នកដឹកនាំរឿងរូបនេះនិយាយថា ប្រការនេះធ្វើឱ្យលោកបាត់បង់ការផ្ដោតអារម្មណ៍សម្រាប់ខ្លឹមសារសំខាន់របស់ភាពយន្ត និងយល់ថា មិនទាន់ចាំបាច់។

បច្ចុប្បន្ន វគ្គ 7 របស់យីហោ «Mission: Impossible» កំពុងតែមានស្ថានភាពល្អនៅឯបញ្ជរលក់សំបុត្រនៅរោងកុន។ Variety អះអាងថា ភាពយន្តរបស់ Tom Cruise អាចរកចំណូលបានយ៉ាងតិច 60 ដុល្លារអាម៉េរិកនៅក្នុង 5 ថ្ងៃដំបូងនៃការចាប់បញ្ចាំង ហើយអាចក្លាយជាវគ្គដែលរកចំណូលបានច្រើនជាងគេរបស់ «Mission: Impossible»។

បច្ចុប្បន្ន ក្រុមការងារកំពុងតែផលិតវគ្គ 8 ដែលមានឈ្មោះថា «Dead Reckoning Part Two» ដែលត្រៀមនឹងចាក់បញ្ចាំងក្នុងរោងកុននៅឆ្នាំក្រោយ។ ចំណែក Tom Cruise វិញ ក៏កំពុងត្រៀមខ្លួនសម្រាប់គម្រោងភាពយន្តដែលត្រូវថតនៅទីអវកាស របស់អ្នកដឹកនាំរឿង Doug Liman៕

July 14, 2023

Tag: ផលិត