ប្រើប្រាស់ - La Reine Media

ពិធីសម្ពោធដាក់ឱ្យប្រើប្រាស់ជាផ្លូវការ ស្ពានកោះពេជ្រ – កោះនរា នឹងធ្វើនៅថ្ងៃទី 15 ខែនេះ

នៅថ្ងៃទី 15 ខែវិច្ឆិកា ឆ្នាំ 2023 ស្ពានបេតុងខ្សែកាបឆ្លងទន្លេ ពីតំបន់អភិវឌ្ឍន៍កោះពេជ្រ ទៅតំបន់អភិវឌ្ឍន៍កោះនរា នឹងត្រូវដាក់សម្ពោធឱ្យប្រើប្រាស់ជាផ្លូវការ ក្រោមអធិបតីភាពដ៏ខ្ពង់ខ្ពស់របស់ សម្តេចមហាបរវធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

ខាងលើនេះគឺជាការបញ្ជាក់របស់លោក កើត ឆែ អភិបាលរងរាជធានីភ្នំពេញ ក្នុងពេលអញ្ជើញជាអធិបតីភាពសម្ពោធបើកឱ្យដំណើរការអគារពង្រីកបន្ថែមថ្មី ផ្សារទំនើប អ៊ីអនម៉លភ្នំពេញ កាលពីថ្ងៃទី 04 ខែវិច្ឆិកា ឆ្នាំ 2023។

ស្ពានកោះពេជ្រ – កោះនរា ត្រូវបានប្រមុខរដ្ឋាភិបាលកម្ពុជា អនុញ្ញាតឱ្យប្រើប្រាស់ជាបណ្តោះអាសន្នកាលពីថ្ងៃទី 20 ខែតុលា ឆ្នាំ 2023 ដើម្បីបញ្ជៀសការកកស្ទះចរាចរណ៍នៅស្ពានព្រះមុនីវង្ស និងស្ពានអាកាសក្បាលថ្នល់។ បច្ចុប្បន្ន ស្ពាននេះកំពុងទទួលបានចំណាប់អារម្មណ៍ខ្លាំងពីសាធារណជន ពិសេសគឺពលរដ្ឋដែលត្រូវធ្វើដំណើរឆ្លងកាត់តំបន់ផ្សារច្បារអំពៅនាពេលកន្លង។ ស្ពាននេះក៏កំពុងតែក្លាយជាស្ពានដ៏សំខាន់ដែលតភ្ជាប់ទីក្រុងរណបកោះនរា ក៏ដូចជាផ្លូវជាតិលេខ 1 ទៅនឹងចំណុចកណ្តាលនៃរាជធានីភ្នំពេញ។

ស្ពានដែលសាងសង់ដោយក្រុមហ៊ុន OCIC និងមានបណ្ដោយ 824 ម៉ែត្រ និងទទឹង 24.50 ម៉ែត្រនេះ ត្រូវបានបើកការដ្ឋានសាងសង់កាលពីថ្ងៃទី 26 ខែតុលា ឆ្នាំ 2020 ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុនសែន អតីតនាយករដ្ឋមន្ត្រី នៃព្រះរាជាណាចក្រកម្ពុជា។ ការសាងសង់ស្ពាននេះត្រូវចំណាយថវិកាសរុបចំនួន 38 លានដុល្លារអាម៉េរិក។

November 13, 2023

យន្តហោះដែលអាចបត់ទៅជាយានជំនិះកង់បី មានល្បឿនពី 200 ដល់ជាង 300 គីឡូម៉ែត្រ/ម៉ោង

(សហរដ្ឋអាម៉េរិក) – យានជំនិះ Switchblade អាចធ្វើដំណើរក្នុងល្បឿន 200 គីឡូម៉ែត្រ/ម៉ោងពេលបត់ជាត្រីចក្រយានយន្តបរលើដងផ្លូវលើដី និង 322 គីឡូម៉ែត្រ/ម៉ោង ពេលហោះលើអាកាស។

យាន Switchblade របស់ក្រុមហ៊ុន Samson Sky បានហោះហើរជាផ្លូវការលើកដំបូង បន្ទាប់ពីទទួលបានការអនុញ្ញាតកាលពីមួយឆ្នាំមុន ពីអគ្គនាយករដ្ឋានអាកាសចរណ៍អាម៉េរិក (FAA) និង 14 ឆ្នាំក្រោយពីបង្ហាញខ្លួនជាលើកទីមួយ។ នេះបើតាមសារព័ត៌មាន Sun ចុះផ្សាយកាលពីថ្ងៃទី 11 វិច្ឆិកា។

យានជំនិះនេះអាចប្រែពីត្រីចក្រយានយន្តមកជាយន្តហោះ ដោយគ្រាន់តែចុចលើគ្រាប់ចុចមួយគ្រាប់។ យាន Switchblade អាចបើកបរក្នុងល្បឿន 200 គីឡូម៉ែត្រ/ម៉ោងពេលស្ថិតក្នុងរូបរាងជាត្រីចក្រយានយន្តបរលើដងផ្លូវលើដី និង 322 គីឡូម៉ែត្រ/ម៉ោង ពេលប្រែខ្លួនជាយន្តហោះ ហោះលើអាកាស។

នៅឯព្រលានយន្តហោះអន្តរជាតិក្នុងខណ្ឌ Grant របស់ទីក្រុង Moses Lake នៃរដ្ឋ Washington យាន Switchblade បានហោះឡើងនៅក្នុងជើងហោះហើរដំបូង កម្ពស់ 150 ម៉ែត្រ និងហោះជុំវិញគោលដៅចំនួន 6 នាទី មុននឹងចុះចតលើដី។

ក្រុមហ៊ុន Samson Sky ឱ្យដឹងថា បានទទួលការបញ្ជាទិញសម្រាប់ Switchblade ពី 57 ប្រទេសរួចហើយ នៅក្នុងតម្លៃ 170,000 ដុល្លារអាម៉េរិក/គ្រឿង។ យានដែលមានកៅអីពីរនេះអាចហោះដល់កម្ពស់ 400 ម៉ែត្រ។ ដោយប្រើប្រព័ន្ធអគ្គិសនីកូនកាត់ Switchblade អាចធ្វើដំណើរបាន 805 គីឡូម៉ែត្រ ពេលចាក់ឥន្ធនៈមួយពេញ 125 លីត្រ។

យោងតាម New Atlas យន្តហោះកូនកាត់យានជំនិះកង់បី Switchblade នេះ មិនមែនជាយានជំនិះដែលអាចហោះឡើង និងចុះចតដោយឈរត្រង់នោះទេ ប៉ុន្តែវាត្រូវការផ្លូវរត់ដែលមានប្រវែង 335 ម៉ែត្រ។

Samson Sky ឱ្យដឹងថា ទិន្នន័យដែលបានពីជើងហោះហើរនេះនឹងត្រូវបានប្រើប្រាស់ដើម្បីកំណត់យកបច្ចេកទេសក្នុងការផលិត និងអភិវឌ្ឍគំរូដំបូងមួយចំនួន៕

November 13, 2023

កម្ពុជានឹងទទួលបានការវិនិយោគពីក្រុមហ៊ុន «តាក់ស៊ីអគ្គិសនី» GSM នៅដើមឆ្នាំក្រោយ

កម្ពុជានឹងជាទីផ្សារបន្ទាប់របស់ក្រុមហ៊ុនតាក់ស៊ីអគ្គិសនីបៃតង GSM ដែលគ្រោងនឹងដំណើរការនៅឆ្នាំក្រោយ។ នេះបើតាមលោក ង្វៀន វ៉ាន់ថាញ់ អគ្គនាយករបស់ក្រុមហ៊ុន Green, Smart and Mobility។

យោងតាមលោក វ៉ាន់ថាញ់ GSM (Green, Smart and Mobility) គឺជាក្រុមហ៊ុនតាក់ស៊ីដែលប្រើប្រាស់រថយន្តអគ្គិសនីរបស់ក្រុមហ៊ុនវៀតណាម VinFast 100%។ ក្រៅពីរថយន្តអគ្គិសនី VinFast ក្រុមហ៊ុន GSM ក៏មានប្រព័ន្ធកំណត់ទីតាំងដែលអាចចែករំលែកព័ត៌មានស្ដីពីការធ្វើដំណើរ ជួយឱ្យអ្នកប្រើប្រាស់តាមដាន និងគ្រប់គ្រងការធ្វើដំណើរប្រកបដោយសុវត្ថិភាព និងប្រសិទ្ធភាព។

ក្រុមហ៊ុន GSM របស់មហាសេដ្ឋីវៀតណាម ហ្វាំ ញ៉ឹតវឿង បានជ្រើសរើសប្រទេសឡាវជាទីផ្សារអន្តរជាតិដំបូងរបស់ខ្លួន។ បច្ចុប្បន្ន នៅក្នុងទីផ្សារមួយនេះ GSM មានស្ថានីយបញ្ចូលអគ្គិសនីចំនួន 6 កន្លែង ដែលអាចបញ្ចូលអគ្គិសនីឱ្យរថយន្តចំនួន 36 គ្រឿងក្នុងពេលតែមួយ។ តាមផែនការ រហូតដល់ដំណាច់ត្រីមាសទីមួយនៃឆ្នាំ 2024 ក្រុមហ៊ុននេះគ្រោងនឹងសាងសង់ស្ថានីយថ្មីចំនួន 13 កន្លែងដែលអាចបញ្ចូលអគ្គិសនីឱ្យរថយន្ត 72 គ្រឿងក្នុងពេលតែមួយ បន្ថែមទៀត។

លោក ង្វៀន វ៉ាន់ថាញ់ ដែលជាអគ្គនាយករបស់ក្រុមហ៊ុន GSM ឱ្យដឹងថា «បន្ទាប់ពីបានបោះជំហានដំបូងនៅប្រទេសឡាវ យើងបានរៀបគម្រោងពង្រីកទៅកាន់ទីផ្សារកម្ពុជា នៅដើមឆ្នាំក្រោយ។ សម្រាប់ទីផ្សារនានា មានជាអាទិ៍ អាម៉េរិកខាងជើង និងអឺរ៉ុបជាដើម GSM មិនទាន់ប្រកាសព័ត៌មានលម្អិតនៅឡើយ»៕

November 10, 2023

ប្រទេសចិនធ្វើតេស្តរ៉ុក្កែតរុញច្រានអាចប្រើប្រាស់ឡើងវិញដោយជោគជ័យ

កាលពីថ្ងៃទី 02 វិច្ឆិកា ប្រទេសចិនបានទទួលជោគជ័យក្នុងការសាកល្បងដំណើរការហោះឡើង និងចុះចតដោយឈរត្រង់នៃរ៉ុក្កែតពាណិជ្ជកម្ម SQX-2Y ដែលអាចប្រើប្រាស់ឡើងវិញ។ នេះគឺជាជំហានថ្មីរបស់ប្រទេសចិននៅក្នុងវិស័យអវកាស។

រ៉ុក្កែត SQX-2Y ត្រូវបានអភិវឌ្ឍដោយក្រុមហ៊ុន Beijing Interstellar Glory Space Technology។ រ៉ុក្កែតនេះមានអង្កត់ផ្ចិតប្រវែង 3.35 ម៉ែត្រ, បណ្ដោយប្រហែល 17 ម៉ែត្រ និងបំពាក់ម៉ាស៊ីនប្រើប្រាស់មេតានអុកស៊ីសែនរាវ។ នេះគឺជាលើកដំបូងដែលប្រទេសចិនធ្វើតេស្តលើការហោះឡើង ចុះចតដោយឈរត្រង់ និងប្រើប្រាស់ឡើងវិញបាននូវរ៉ុក្កែតប្រើឥន្ធនៈរាវមួយជាន់ក្នុងទម្រង់ពេញលេញ។

ការសាកល្បងខាងលើនេះត្រូវបានធ្វើឡើងក្នុងមជ្ឈមណ្ឌលបាញ់បង្ហោះផ្កាយរណប Tửu Tuyền នៅភាគពាយព្យប្រទេសចិន។ ក្នុងការធ្វើតេស្តនេះ រ៉ុក្កែតបានហោះឡើងដល់កម្ពស់ 178.42 ម៉ែត្រ ខណៈរយៈពេលហោះហើរគឺ 50.82 វិនាទី និងសុក្រឹតភាពនៃទីតាំងចុះចតគឺប្រហែល 1.68 ម៉ែត្រ រួមនឹងល្បឿនចុះចតគឺ 0.025 ម៉ែត្រ/វិនាទី។

ក្រុមហ៊ុន Beijing Interstellar Glory Space Technology ឱ្យដឹងថា ការធ្វើតេស្តនេះមិនត្រឹមតែជួយដល់ការវាយតម្លៃលើគម្រោងអភិវឌ្ឍរ៉ុក្កែតដែលអាចប្រើឡើងវិញបាននោះទេ ប៉ុន្តែក៏ប្រមូលបាននូវទិន្នន័យសំខាន់ និងផ្ដល់ជាជំនួយផ្នែកបច្ចេកទេសសម្រាប់ការអភិវឌ្ឍរ៉ុក្កែតខ្នាតមធ្យម និងធំ ក៏ដូចជាការប្រើប្រាស់មេតានអុកស៊ីសែនរាវ ដែលអាចប្រើប្រាស់ឡើងវិញបានផងដែរ។

រ៉ុក្កែតមានពីរប្រភេទគឺ រ៉ុក្កែតឥន្ធនៈរឹង និងរ៉ុក្កែតឥន្ធនៈរាវ បើសិនបែងចែកទៅតាមប្រភេទឥន្ធនៈដែលប្រើប្រាស់សម្រាប់ម៉ាស៊ីន។ រ៉ុក្កែតឥន្ធនៈរាវមានចំណុចវិជ្ជមានត្រង់ថា វាជួយកាត់បន្ថយការចំណាយ កម្រិតនៃការស៊ីឥន្ធនៈ ការកែប្រែកម្លាំងរុញច្រាន និងលទ្ធភាពនៃការប្រើប្រាស់ឡើងវិញ។ បច្ចុប្បន្ន ប្រទេសនានាកំពុងផ្ដោតទៅលើការស្រាវជ្រាវ អភិវឌ្ឍរ៉ុក្កែតរុញច្រានពាណិជ្ជកម្មដែលអាចប្រើប្រាស់ឡើងវិញបាន។ ការប្រើប្រាស់ឡើងវិញនេះ មិនត្រឹមតែកាត់បន្ថយការចំណាយលើផ្នែករឹងរបស់រ៉ុក្កែតនោះទេ ប៉ុន្តែក៏ធ្វើឱ្យសកម្មភាព និងឧបករណ៍នៅលើដីមានភាពសាមញ្ញ ដូច្នេះក៏កាត់បន្ថយការចំណាយលើដំណើរការនៅលើដី និងបង្កើនការបាញ់បង្ហោះ៕

November 7, 2023

Honda បង្ហាញកង់អគ្គិសនីដំបូងបង្អស់របស់ខ្លួន

ក្រុមហ៊ុនជប៉ុន Honda កំពុងតែពង្រីកមុខជំនួញរបស់ខ្លួននៅក្នុងវិស័យយានយន្តប្រើប្រាស់ថាមពលអគ្គិសនី ដោយការបញ្ចេញកង់អគ្គិសនីដំបូងបង្អស់របស់ខ្លួន នោះគឺ Honda e-MTB Concept។

កង់អគ្គិសនីនេះទើបតែត្រូវបានដាក់បង្ហាញនៅក្នុងព្រឹត្តិការណ៍តាំងពិព័រណ៍ Japan Mobility Show នៅតូក្យូ ជាទីដែល Honda រួមនឹងបណ្ដាក្រុមហ៊ុនផលិតម៉ូតូ និងរថយន្តលំដាប់កំពូលៗដទៃទៀតនៅប្រទេសជប៉ុន បង្ហាញផលិតផលដែលមានលក្ខណៈជាអនាគត និង/ឬពង្រីកយីហោរបស់ពួកគេ។

កង់អគ្គិសនី Honda e-MTB Concept ត្រូវបានគេជឿថា ប្រើប្រាស់ម៉ូទ័រ Brose ដែលមានស្រាប់នាបច្ចុប្បន្ន។ វាប្រើប្រាស់ប្រព័ន្ធបើកបរ SRAM Eagle AXS, ហ្វ្រាំងកម្លាំងទឹក Shimano, ប្រព័ន្ធជើងទប់ក្រោម Fox នៅខាងមុខ និងខាងក្រោយ, ទម្រកែប RockShox Reverb, កង់ DT Swiss XM 1700 និងសំបកកង់ Maxxis Minion DHF។

សម្រាប់ Honda គោលដៅរបស់ពួកគេគឺការបូកបញ្ចូលគ្នារវាងម៉ូតូ និងកង់ទៅក្នុងផលិតផលមួយដែលអាចជិះលើភ្នំ នៅតំបន់ដែលមានឧបសគ្គច្រើន។

Honda មិនមែនជាអ្នកផលិតរថយន្ត ឬម៉ូតូដំបូងគេដែលយកកង់អគ្គិសនីធ្វើជាអ្នកនាំផ្លូវដ៏មានសក្ដានុពលដើម្បីពង្រីកយីហោនោះទេ។ ក្រុមហ៊ុនជាច្រើនបានធ្វើដូច្នេះ ក្នុងនោះមានដូចជា Harley-Davidson, Porsche និង Peugeot ជាដើម។

ថ្មីៗនេះ HUMMER និង Jeep ក៏បាន និងកំពុងប្រឹងប្រែងដើម្បីពង្រីកយីហោរបស់ខ្លួនទៅកាន់វិស័យកង់អគ្គិសនីផងដែរ។

November 6, 2023

យានហោះអវកាសរបស់ Sierra Space បានត្រៀមរួចហើយសម្រាប់ជើងហោះហើរដំបូង

(សហរដ្ឋអាម៉េរិក) – យន្តហោះ Dream Chaser ដែលមានជំនាញខាងដឹកទំនិញឡើងទៅកាន់ ISS នឹងបំពាក់ម៉ាស៊ីនរ៉ុក្កែតតូចៗជាច្រើនគ្រឿង អាចដឹកទំនិញបាន 5,550 គីឡូក្រាមក្នុងមួយជើង។

Dream Chaser ដែលជាយន្តហោះអវកាសពាណិជ្ជកម្មផលិតដោយក្រុមហ៊ុន Sierra Space នៅសហរដ្ឋអាម៉េរិក កំពុងឆ្ពោះទៅជិតដល់ថ្ងៃបាញ់បង្ហោះ។ Dream Chaser ដែលត្រូវបានអភិវឌ្ឍដើម្បីបំពេញភារកិច្ចបាន 15 ជើង នឹងដឹកជញ្ជូនទំនិញឡើងទៅកាន់ស្ថានីយអវកាសអន្តរជាតិ (ISS) ហើយអាចដើរតួនាទីសំខាន់ចំពោះបណ្ដាស្ថានីយអវកាសនាពេលអនាគត។ នេះបើតាម Interesting Engineering ចុះផ្សាយកាលពីថ្ងៃទី 02 វិច្ឆិកា 2023។

យន្តហោះអវកាសនេះមានដងខ្លួនប្រវែង 9 ម៉ែត្រ និងស្លាបប្រវែង 7 ម៉ែត្រ។ ស្លាបរបស់វាអាចបត់បាន អនុញ្ញាតឱ្យគេប្រើប្រាស់វាដូចទៅនឹងទំនិញដែលដាក់លើរ៉ុក្កែត។ Dream Chaser ត្រូវបានណាសាជ្រើសរើសជាយានដឹកទំនិញទីបីសម្រាប់ឆ្នាំ 2026។ វាក៏នឹងត្រូវបានប្រើប្រាស់ក្នុងការដឹកសំរាមពី ISS មកបញ្ឆេះចោលក្នុងស្រទាប់បរិយាកាសផែនដីផងដែរ។

តាមផែនការ ជើងហោះហើរដំបូងរបស់ Dream Chaser នឹងធ្វើឡើងនៅក្នុងឆ្នាំ 2019 ប៉ុន្តែត្រូវអាក់ខានច្រើនលើកដោយសារបញ្ហាកូវីដ-19។ វានឹងត្រូវបានដឹកទៅកាន់មជ្ឈមណ្ឌលសាកល្បង Neil Armstrong របស់ណាសា នៅ Ohio ដើម្បីធ្វើតេស្តពីមួយទៅបីខែ មុនពេលវិលត្រលប់ទៅកាន់មជ្ឈមណ្ឌលអវកាស Kennedy នៅ Florida ដើម្បីធ្វើការហោះហើរជើងដំបូងដែលគ្រោងនឹងធ្វើឡើងនៅខែមេសាឆ្នាំក្រោយ តាមរយៈរ៉ុក្កែត Vulcan របស់ក្រុមហ៊ុន United Launch Alliance៕

November 3, 2023

កម្ពុជានឹងខ្ចីលុយជាងពីរពាន់លានដុល្លារអាម៉េរិកទៀត ដើម្បីអភិវឌ្ឍប្រទេសក្នុងឆ្នាំ 2024

កម្ពុជា មានគម្រោងខ្ចីលុយ 1,700 លាន SDR (Special Drawing Rights) របស់ IMF ដែលស្មើនឹងជាង 2.2 ពាន់លានដុល្លារអាម៉េរិក ឬប្រមាណជិត 9,3 ទ្រីលានរៀល ដើម្បីអភិវឌ្ឍវិស័យជាអាទិភាពមួយចំនួននៅក្នុងឆ្នាំ 2024។

យោងតាមសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ 2024 កម្ចីខាងលើនេះ នឹងត្រូវបានប្រើប្រាស់សម្រាប់ការអភិវឌ្ឍវិស័យសំខាន់ៗមួយចំនួន រួមមានជាអាទិ៍ វិស័យថាមពលចំនួនមួយគម្រោង, វិស័យធារាសាស្ត្រចំនួនបីគម្រោង, វិស័យហេដ្ឋារចនាសម្ព័ន្ធរូបវន្តចំនួន 16 គម្រោង, វិស័យអប់រំនិងបណ្តុះបណ្តាលវិជ្ជាជីវៈចំនួនពីរគម្រោង រួមនឹង កម្មវិធីជំរុញពាណិជ្ជកម្ម និងការប្រកួតប្រជែងផងដែរ។

គិតត្រឹមត្រីមាសទីបី ឆ្នាំ 2023 កម្ពុជាមានបំណុលសាធារណៈក្រៅប្រទេស ចំនួនជាង 10.74 ពាន់លានដុល្លារអាម៉េរិក ស្មើនឹង 34% នៃផលិតផលក្នុងស្រុកសរុប។

ស្ថានភាពបំណុលសាធារណៈបច្ចុប្បន្នរបស់កម្ពុជា នៅតែត្រូវបានវាយតម្លៃថា ស្ថិតក្នុងភាពអាចគ្រប់គ្រងបាននៅឡើយ។ នេះបើតាមក្រសួងហិរញ្ញវត្ថុកម្ពុជា៕

November 3, 2023

ម៉ាឡេស៊ី និងសិង្ហបុរី បង្កើតតំបន់សេដ្ឋកិច្ចពិសេសរួមនៅជាប់ព្រំដែន

ថ្នាក់ដឹកនាំនៃប្រទេសម៉ាឡេស៊ី និងសិង្ហបុរី បានព្រមព្រៀងបង្កើតតំបន់សេដ្ឋកិច្ចពិសេសរួមដែលមានឈ្មោះថា តំបន់សេដ្ឋកិច្ចពិសេស Johor – Singapore (SEZ)។

ក្រោយជំនួបពិភាក្សាកាលពីថ្ងៃទី 30 តុលា នាយករដ្ឋមន្ត្រីសិង្ហបុរី លី សៀនឡុង និងសមភាគីម៉ាឡេស៊ី អាន់វ៉ា អ៊ីប្រាហ៊ីម បានចេញសេចក្ដីថ្លែងការណ៍រួមស្ដីពីការព្រមព្រៀងឆ្ពោះទៅរកការបង្កើតតំបន់សេដ្ឋកិច្ចពិសេស SEZ ។ តំបន់សេដ្ឋកិច្ចពិសេសនេះនឹងត្រូវបានបង្កើតឡើងនៅក្នុងតំបន់ Iskandar រដ្ឋ Johor របស់ប្រទេសម៉ាឡេស៊ី ក្បែរព្រំដែនជាមួយនឹងសិង្ហបុរី។

«SEZ នឹងប្រើប្រាស់កម្លាំងបន្ថែមរបស់ប្រទេសទាំងពីរ ដើម្បីជំរុញការតភ្ជាប់សេដ្ឋកិច្ច តាមរយៈការកែលម្អលំហូរទំនិញ វិនិយោគ និងមនុស្សឆ្លងព្រំដែន» សេចក្ដីប្រកាសរួមលើកឡើងដូច្នេះ។

លោក លី សៀនឡុង អះអាងថា «ប្រការនេះនឹងធ្វើឱ្យប្រសើរឡើងនូវកម្លាំងទាក់ទាញផ្នែកសេដ្ឋកិច្ចសម្រាប់សិង្ហបុរី និងរដ្ឋ Johor របស់ម៉ាឡេស៊ី»។ លោកបន្ថែមថា ភាគីទាំងពីរកំពុងសហការគ្នាសិក្សាអំពីលទ្ធភាពនៃគម្រោង ដើម្បីកំណត់ចំណុចស្នូលរបស់តំបន់ពិសេស ជាពិសេសគឺផលប្រយោជន៍របស់អ្នកវិនិយោគ និងតម្រូវការទីផ្សារ។

នាយករដ្ឋមន្ត្រីសិង្ហបុរី លី សៀនឡុង (ស្ដាំ) និងសមភាគីម៉ាឡេស៊ី អាន់វ៉ា អ៊ីប្រាហ៊ីម

នាយករដ្ឋមន្ត្រីម៉ាឡេស៊ី លោក អានវ៉ា អ៊ីប្រាហ៊ីម ឱ្យដឹងថា ភាគីទាំងពីរគ្រោងនឹងចុះហត្ថលេខាលើអនុស្សរណៈនៃការយោគយល់គ្នានៅក្នុងខែមករាឆ្នាំក្រោយ។

សិង្ហបុរី និងម៉ាឡេស៊ី គឺជាដៃគូសហការផ្នែកពាណិជ្ជកម្មធំជាងគេលំដាប់ទីពីររបស់គ្នាកាលពីឆ្នាំ 2022 ដោយចំណូយបានពីពាណិជ្ជកម្មសម្រេចបានជាង 83.5 ពាន់លានដុល្លារអាម៉េរិក។ សិង្ហបុរីក៏ជាមួយក្នុងចំណោមប្រភពវិនិយោគផ្ទាល់ពីបរទេសលំដាប់កំពូលរបស់ម៉ាឡេស៊ីផងដែរ ដោយរួមចំណែកប្រមាណ 8.3% នៃទុនវិនិយោគបរទេសសរុបកាលពីឆ្នាំកន្លង៕

November 1, 2023

ណាសារកឃើញផ្កាយពីរដួងបុកគ្នាយ៉ាងខ្លាំងក្លារហូតដល់ «បង្កើតបានជាមាស»

ដោយការប្រើប្រាស់តេឡេស្កុបអវកាស James Webb (JWST) ក្រុមអ្នកវិទ្យាសាស្ត្របានរកឃើញករណីផ្ទុះកាំរស្មីហ្គាម៉ា (GRB) ដ៏មហាចែងចាំង។ នេះគឺជាករណីប៉ះទង្គិចគ្នាដ៏ខ្លាំងក្លារវាងផ្កាយណឺត្រុងពីរដួង។

ករណីផ្ទុះក្នុងទីអវកាសដ៏កម្រដែលត្រូវបានហៅថា គីឡូណូវ៉ា (Kilonova) នេះ ខ្លាំងរហូតដល់អាចបង្កើតបានជាមាស ប្លាទីន និងអ៊ុយរ៉ាញ៉ូមក្នុងទីអវកាស។

ការស្លាប់របស់ផ្កាយណឺត្រុងពីរដួង

ករណីផ្ទុះគីឡូណូវ៉ា កើតឡើងនៅពេលផ្កាយណឺត្រុងពីរដួង (ជាផ្កាយខ្នាតយក្សដែលត្រូវបែកធ្លាយ) ស្រូបទាញគ្នា ហើយចុងក្រោយក៏ប៉ះទង្គិចនឹងគ្នា។ ការប៉ះទង្គិចខ្លាំងក្លានេះត្រូវបានហៅថា ការផ្ទុះកាំរស្មីហ្គាម៉ា ដែលបញ្ចេញរលកថាមពលនៃកាំរស្មីអ៊ុលត្រាវីយូឡេ អ៊ីនហ្វ្រារ៉េដ និងកាំរស្មីអ៊ិច។ ករណីផ្ទុះនេះត្រូវបានណាសាដាក់ឈ្មោះឱ្យថា GRB 230307A។

អ្នកវិទ្យាសាស្ត្រប្រើប្រាស់តេឡេស្កុបអវកាស James Webb (JWST) ក្នុងការតាមរកករណីផ្ទុះកាំរស្មីហ្គាម៉ា (GRB) ដ៏មហាចែងចាំងនេះ។

ក្រុមអ្នកវិទ្យាសាស្ត្រខាងលើបានប្រើប្រាស់តេឡេស្កុបអវកាស James Webb ដើម្បីតាមដានការធ្វើដំណើររបស់បណ្ដាផ្កាយណឺត្រុង មុនពេលពួកវាផ្ទុះ។ ពួកវាគឺជាផ្កាយពីរដួងនៅក្នុងប្រព័ន្ធផ្កាយភ្លោះដែលស្ថិតនៅក្នុងកាឡាក់ស៊ីរាងគូទខ្យងមួយ។ ផ្កាយមួយដួងក្នុងចំណោមនេះបានផ្ទុះ បន្សល់ទុកផ្កាយណឺត្រុងមួយដួង ហើយក្រោយមក ការផ្ទុះនេះក៏បានកើតឡើងចំពោះផ្កាយដែលនៅសល់។

អ្នកវិទ្យាសាស្ត្រមានបំណងស្វែងរកបន្ថែមនូវករណីប៉ះទង្គិចនានាដែលបង្កើតបានជាការផ្ទុះកាំរស្មីហ្គាម៉ា ដើម្បីកំណត់មូលហេតុ ក៏ដូចជាឱ្យដឹងច្បាស់ថា តើធាតុនានាមានការពាក់ព័ន្ធទៅនឹងដំណើរការនេះ ឬអត់៕

November 1, 2023

ម្ចាស់ SpaceX ចង់លុបបំបាត់ធនាគារចាប់ពីឆ្នាំក្រោយដោយបណ្ដាញសង្គម X

មហាសេដ្ឋីអាម៉េរិកដើមកំណើតអាហ្វ្រិកខាងត្បូង លោក Elon Musk ចង់ប្រែក្លាយបណ្ដាញសង្គម X (អតីត Twitter) ឱ្យទៅជាមជ្ឈមណ្ឌលហិរញ្ញវត្ថុរបស់អ្នកប្រើប្រាស់ ក្នុងមហិច្ឆតាលុបបំបាត់គណនីធនាគារចាប់ពីចុងឆ្នាំ 2024។

The Verger ដកស្រង់សម្ដីរបស់លោក Elon Musk ដែលបានថ្លែងទៅកាន់បុគ្គលិកកាលពីថ្ងៃទី 26 កក្កដាថា លោកចង់ឱ្យបណ្ដាញសង្គម X អាចដោះស្រាយគ្រប់កិច្ចការដែលទាក់ទងនឹងប្រាក់កាសនៅក្នុងជីវភាពប្រចាំថ្ងៃ ហើយអ្នកប្រើប្រាស់ «នឹងត្រូវភ្ញាក់ផ្អើលនៅចំពោះមុខឥទ្ធិពលរបស់វា»។

លោក Elon Musk បកស្រាយថា ការទូទាត់ប្រាក់លើ X នឹងកែប្រែទាំងស្រុងនូវវិធីផ្ទេរប្រាក់របស់អ្នកប្រើប្រាស់។ បើសិនអ្នកលេងបណ្ដាញសង្គម X ណាម្នាក់ចង់ផ្ញើលុយ 20 ដុល្លារឱ្យមិត្តភក្ដិ ពួកគេនឹងមិនចាំបាច់មានគណនីធនាគារឡើយ។

ទាក់ទងនឹងរឿងនេះដែរ CEO របស់ X អ្នកស្រី Linda Yaccarino ក៏បានចាត់ទុកថា ឱកាសនេះនឹងអាចអនុវត្តបានចាប់ពីឆ្នាំ 2024។

យោងតាម The Verge លោក Elon Musk ចង់ផ្ដួល PayPal ដែលលោកបានបង្កើតឡើងកាលពីពីរទសវត្សរ៍មុន។ គំនិតរបស់ម្ចាស់ Tesla ដែលចង់ឱ្យ X ក្លាយជាមជ្ឈមណ្ឌលហិរញ្ញវត្ថុនេះ បានដក់ជាប់ក្នុងបេះដូងរបស់គាត់ ហើយគាត់បាននិយាយអំពីរឿងនេះតាំងពីកិច្ចប្រជុំដំបូងនៅ Twitter ៕

October 29, 2023

Tag: ប្រើប្រាស់