Tag: ប្រយោជន៍

  • អបអរសាទរខួប១ឆ្នាំ នៃការបើកដំណើរការជាផ្លូវការរោងចក្រដំឡើងរថយន្ត Ford និងពិធីប្រគល់-ទទួលអំណោយរថយន្តគិលានសង្គ្រោះ Ambulance ជូនដល់កាកបាទក្រហមកម្ពុជា សាខាខេត្តពោធិ៍សាត់

    អបអរសាទរខួប១ឆ្នាំ នៃការបើកដំណើរការជាផ្លូវការរោងចក្រដំឡើងរថយន្ត Ford និងពិធីប្រគល់-ទទួលអំណោយរថយន្តគិលានសង្គ្រោះ Ambulance ជូនដល់កាកបាទក្រហមកម្ពុជា សាខាខេត្តពោធិ៍សាត់

    [ភ្នំពេញ – ថ្ងៃទី ១៣ ខែកក្កដា ឆ្នាំ២០២៣] ក្រុមហ៊ុន RMA (Cambodia)​ PLC ដែលជាក្រុមហ៊ុននាំចូល និងចែកចាយផ្តាច់មុខរថយន្ត Ford ក្នុងទីផ្សារប្រទេសកម្ពុជាបានប្រារព្ធពិធីប្រគល់-ទទួលអំណោយរថយន្តគិលានសង្គ្រោះចំនួន ២ គ្រឿង ជូនទៅដល់កាកបាទក្រហមកម្ពុជា សាខាខេត្តពោធិ៍សាត់ ដែលកម្មវិធីនេះត្រូវបានប្រារព្ធឡើង ក្រោមអធិបតីភាពរបស់ ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងអគ្គនាយកអគ្គីសនីកម្ពុជា និងលោកអភិបាលនៃគណៈអភិបាលខេត្តពោធិ៍សាត់ ព្រមទាំងថ្នាក់ដឹកនាំក្រុមហ៊ុន Ford Motor Company ថ្នាក់ដឹកនាំក្រុមហ៊ុន RMA Group និងក្រុមហ៊ុន RMA (Cambodia) PLC រួមទាំងភ្ញៀវកិត្តិយសជាតិ និងអន្តរជាតិប្រមាណជាង ២០០ នាក់។​ កម្មវិធីនេះបានប្រារព្ធឡើងនៅក្នុងបរិវេនរោងចក្រដំឡើងរថយន្ត Ford ក្នុងភូមិសារវ័ន ឃុំស្នាអន្សារ ស្រុកក្រគរ​ ខេត្តពោធិ៍សាត់ នៅថ្ងៃទី ១១ ខែកក្កដា ឆ្នាំ ២០២៣ ។

    ក្នុងឱកាសនៃពីធីអបអរសាទរខួប១ឆ្នាំ នៃការបើកដំណើរការជាផ្លូវការរោងចក្រដំឡើងរថយន្ត Ford និងពិធីប្រគល់-ទទួលអំណោយរថយន្តគិលានសង្គ្រោះ Ambulance ចំនួន ២​ គ្រឿង ជូនដល់កាកបាទក្រហមកម្ពុជា សាខាខេត្តពោធិ៍សាត់ លោក ងន សាំង អគ្គនាយកក្រុមហ៊ុន RMA (Cambodia)​ PLC បានមានប្រសាសន៍ថា៖​ “ យើងខ្ញុំមានមោទភាពជាពន់ពេកដែលទទួលបានសេចក្ដីទុកចិត្តពីក្រុមហ៊ុន FORD MOTOR COMPANY ក្នុងការដំឡើងរថយន្ត FORD RANGER និង FORD EVEREST ជំនាន់ថ្មីនៅ លើទឹកដីនៃព្រះរាជាណាចក្រកម្ពុជា ស្របតាមស្តង់ដាររបស់ក្រុមហ៊ុន FORD ។ យើងខ្ញុំជឿជាក់ថា ការបោះជំហានវិនិយោគក្នុងវិស័យយានយន្តរបស់ក្រុមហ៊ុនយើងខ្ញុំ ចូលរួមចំណែកយ៉ាងសំខាន់ ក្នុងការអភិវឌ្ឍវិស័យឧសហ្សាកម្មយានយន្តនៅកម្ពុជា និងជាសក្ខីភាពនៃទំនុកចិត្តលើកិច្ចខិតខំប្រឹង ប្រែងរបស់រដ្ឋាភិបាលក្នុងការធ្វើឱ្យប្រសើរឡើង នូវបរិយាកាសធុរកិច្ច និងវិនិយោគ។ វត្តមានរបស់ រោងចក្រយើងខ្ញុំក៏បានចូលរួមចំណែកការកាត់បន្ថយការធ្វើចំណាកស្រុកទៅធ្វើការនៅក្រៅប្រទេស របស់ប្រជាពលរដ្ឋ និងលើកកម្ពស់សេដ្ឋកិច្ចក្នុងតំបន់តាមរយៈការជំរុញសន្ទុះអាជីវកម្មសហគ្រាស ធុនតូច និងមធ្យម ការបង្កើតឱកាសការងារដោយផ្ទាល់និងដោយប្រយោល ក៏ដូចជាការអភិវឌ្ឍន៍ ធនធានមនុស្សនៅក្នុងទឹកដី ខេត្តពោធិ៍សាត់នេះផ្ទាល់ផងដែរ។ ”

    មិនតែប៉ុណ្ណោះ លោកក៏បានបន្ថែមទៀតថា៖ “ ក្រុមហ៊ុនយើងខ្ញុំនឹងបន្តប្តេជ្ញាគាំទ្រ និង ជំរុញវិស័យឧស្សាហកម្មយានយន្តនៅកម្ពុជា ដើម្បីឱ្យកម្ពុជា ផ្លាស់ប្ដូរមុខមាត់ថ្មី ពីប្រទេសដែលដំឡើងរថយន្ត ទៅជាប្រទេសដែលផលិតរថយន្ត ក្នុងពេលអនាគត។ ក្រុមហ៊ុននឹងពង្រីកការវិនិយោគគម្រោងដំឡើងរថយន្ត Ford ដោយបង្កើនការនាំចូលនៃចំនួន គ្រឿងបង្គុំច្រើនជាងមុន បង្កើនចំនួនការងារក្នុងស្រុក ជំរុញការប្រើប្រាស់ធាតុផ្សំក្នុងស្រុក និងបង្កើន ដើមទុនវិនិយោគបន្ថែមទៀត។ យើងខ្ញុំជឿជាក់ថា ការវិនិយោគនេះនឹងបន្តផ្តល់អត្ថប្រយោជន៍ជាច្រើនបន្ថែមទៀតជូនប្រទេសកម្ពុជា ជាពិសេសការអភិវឌ្ឍន៍ខ្សែសង្វាក់ផ្គត់ផ្គង់ និងធ្វើឱ្យប្រសើរ ឡើងនូវខ្សែចង្វាក់ដែលគាំទ្រគោលនយោបាយអភិវឌ្ឍវិស័យឧស្សាហកម្មរបស់រាជរដ្ឋាភិបាលកម្ពុជា។ ការវិនិយោគនេះ នឹងនាំមកនូវផលិតផលថ្មី បច្ចេកវិទ្យាថ្មី ដើម្បីផ្គត់ ផ្គង់តម្រូវការប្រើប្រាស់រថយន្តថ្មីក្នុងស្រុក ជាមួយនឹងមោទភាពផលិតកម្មក្នុងស្រុក រោងចក្រ ដំឡើងរថយន្ត Ford នឹងបន្តទាក់ទាញវិនិយោគិនផ្សេងៗជាច្រើនទៀតមកវិនិយោគនៅកម្ពុជា ជា ពិសេស អ្នកវិនិយោគដែល ពាក់ព័ន្ធនឹងការផលិត និងដំឡើងរថយន្ត ដូចជា៖ សំបកកង់ កង់ឡាន ខ្សែភ្លើងឡាន អាគុយឡាន និងអាជីវកម្មផ្សេងៗទៀត។”

     

    ឆ្លៀតក្នុងឱកាសនេះដែរ លោកស្រី Kay Hart​ ប្រធានគ្រប់គ្រងទីផ្សារអន្តរជាតិនៃក្រុមហ៊ុន Ford Motor Company បានមានប្រសាសន៍ថា៖ “ រថយន្តគិលានសង្គ្រោះ (The Next-Generation Ford Ranger-Converted Ambulances) នេះ បានបំពាក់មកជាមួយនូវបច្ចេកវិទ្យា និងប្រព័ន្ធសុវត្ថិភាពទំនើបជំនាន់ចុងក្រោយដែលធ្វើឱ្យរថយន្តនេះក្លាយជារថយន្តមួយដែលមានលក្ខណៈ ធន់ រឹងមាំ និងមានសមត្ថភាពក្នុងការចល័ត និងដឹកជញ្ជូនអ្នកជំងឺដោយសុវត្ថិភាព។ ”

    លោកស្រីក៏បានបន្តទៀតថា៖ “ រថយន្តគិលានសង្គ្រោះ (The Next-Generation Ford Ranger-Converted Ambulances) នឹងចូលរួមចំណែកយ៉ាងសំខាន់សម្រាប់កាកបាទក្រហមកម្ពុជាក្នុងខេត្តពោធិ៍សាត់ ក្នុងការគាំពារ សង្គ្រោះបន្ទាន់ និងជាជំនួយការដ៏សំខាន់ក្នុងការជួយដល់សកម្មភាពសប្បុរសធម៌ផ្សេងៗដល់ប្រជាពលរដ្ឋ និងអ្នកជំងឺដើម្បីទទួលបាននូវសេវាកម្មសង្គ្រោះបន្ទាន់មួយដែលមាន គុណភាព សុវត្ថិភាព និងប្រសិទ្ធភាព។ ”

    ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងអគ្គនាយកអគ្គីសនីកម្ពុជា បានមានប្រសាសន៍ថា៖ “ ការសាងសង់រោងចក្រដំឡើងរថយន្ត Ford ក្នុងខេត្តពោធិ៍សាត់ គឺជាសក្ខីភាពមួយដែលបានបង្ហាញពីទំនុកចិត្តរបស់ក្រុមហ៊ុន RMA Cambodia មកលើរាជរដ្ឋាភិបាលកម្ពុជា ហើយការផ្តល់ជូននូវរថយន្តគិលានសង្គ្រោះ ២ គ្រឿងក្នុងថ្ងៃនេះនឹងជាការចូលរួមចំណែកដ៏សំខាន់មួយក្នុងការពង្រឹងសមត្ថភាពមូលដ្ឋានសុខាភិបាលបន្ថែមទៀត ក្នុងការឆ្លើយតបទៅនឹងតម្រូវការសេវាថែទាំសុខភាពអោយកាន់តែមានគុណភាព ប្រសិទ្ធភាព និងសុវត្ថិភាព។ ភាពជាដៃគូរវាង RMA Cambodia និងវិទ្យាស្ថានបច្ចេកទេសក្នុងស្រុករបស់យើង បានដើរតួរនាទីយ៉ាងសំខាន់ក្នុងការលើកកម្ពស់ធនធានមនុស្ស តាមរយៈការបង្កើតកម្មវិធីបណ្តុះបណ្តាលដោយផ្ទាល់ពីអ្នកជំនាញដែលគ្រឹះមួយដ៏សំខាន់សម្រាប់យុវជន ក៏ដូចជាយុវនារីក្នុងការត្រៀមខ្លួនរួចជាស្រេចសម្រាប់ភាពជោគជ័យនាពេលខាងមុខ។ ”

    គួរបញ្ជាក់ផងដែរថា ក្រុមហ៊ុន RMA (CAMBODIA) PLC ជាក្រុមហ៊ុនដំបូងគេបំផុត ដែលទទួលបានការទទួលស្គាល់ពី វិទ្យាស្ថានស្ដង់ដារកម្ពុជា នៃ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្នុងនាមជាអ្នក អនុវត្តស្តង់ដារសុវត្ថិភាពយានយន្ត និងស្តង់ដារសុវត្ថិភាពគ្រឿងបង្គុំយានយន្តបានខ្ពស់បំផុត។ ក្នុងឆ្នាំ ២០២០ ក្រុមហ៊ុន RMA (CAMBODIA) PLC បានចុះបញ្ជីលក់មូលបត្រ បំណុលចំនួន ៨០ ពាន់លានរៀល ដែលស្មើនឹង ២០ លានដុល្លារអាមេរិក ក្នុងផ្សារមូលបត្រកម្ពុជា ហើយក្លាយជាក្រុមហ៊ុនមិនមែនស្ថាប័នហិរញ្ញវត្ថុដែលបានបោះផ្សាយមូលបត្របំណុលដំបូងគេបង្អស់នៅប្រទេសកម្ពុជា។ ការបោះផ្សាយមូលបត្របំណុលនេះ បង្ហាញពីកិច្ចខិតខំប្រឹងប្រែងរបស់ក្រុមហ៊ុនយើងខ្ញុំក្នុងការលើកកម្ពស់ទីផ្សារមូលបត្រកម្ពុជា និងចូលរួមចំណែកអភិវឌ្ឍទីផ្សារហិរញ្ញវត្ថុនៅប្រទេសកម្ពុជា។

    តាមរយៈកំណើនសេដ្ឋកិច្ច និងកំរិត GDP របស់ប្រជាជនកម្ពុជាកើនឡើងខ្ពស់ជាបន្តបន្ទាប់ បានធ្វើឱ្យប្រជាជនកម្ពុជាងាកមកប្រើប្រាស់រថយន្តថ្មីមានការកើនឡើងជាលំដាប់។ ក្នុងនោះការប្រើប្រាស់ រថយន្តថ្មីម៉ាក FORD មានកំណើនកាន់តែច្រើនឡើង និងបានក្លាយជាជម្រើសឈានមុខរបស់អតិថិជននៅកម្ពុជា។ ដូច្នេះ ក្រុមហ៊ុនបានសម្រេចចិត្តបង្កើតរោងចក្រដំឡើងរថយន្ត FORD ដែលទទួលបានសិទ្ធិពេញលេញក្នុងការផ្គុំ និងដំឡើងរថយន្តពីក្រុមហ៊ុនម្ចាស់ដើម FORD MOTOR COMPANY។ រោងចក្រនេះ ត្រូវបានសាងសង់ឡើងនៅលើផ្ទៃដីសរុបប្រមាណជាង ៥ ហិកតា ស្ថិតក្នុងភូមិសារវ័ន ឃុំស្នាអន្សា ស្រុកក្រគរ ខេត្តពោធិ៍សាត់ ជាមួយនឹងទុនវិនិយោគចំនួន ២១ លានដុល្លារសហរដ្ឋអាមេរិក ដែលអាចបង្កើតការងារជំនាញបានជាង ៥០០ កន្លែង និងមានសមត្ថភាពអាចដំឡើងរថយន្តបានចំនួនប្រមាណ ៩,០០០ គ្រឿងក្នុងមួយឆ្នាំ។

    រហូតមកដល់ពេលនេះ ក្រុមហ៊ុនបានដំឡើងរថយន្ត Ford Ranger Wildtrak និងរថយន្ត Ford Everest បានចំនួន ៣,០០០ គ្រឿងដើម្បីបម្រើតម្រូវការទីផ្សារក្នុងស្រុក។ ក្រុមហ៊ុនបន្តសហការ ជាមួយនឹងវិទ្យាស្ថានពហុបច្ចេកទេសខេត្តពោធិ៍សាត់ក្នុងការបណ្តុះបណ្តាលអភិវឌ្ឍជំនាញបច្ចេកទេសដល់បុគ្គលិកក្រុមហ៊ុនដើម្បីធានាឱ្យបាននូវធនធានមនុស្សប្រកបដោយគុណភាព។ ថ្មីៗនេះ ក្រុមហ៊ុនបានបញ្ជូនបុគ្គលិកទៅប្រទេស Australia ដើម្បីសិក្សាអំពីបច្ចេកវិទ្យាដំឡើងរថយន្ត ក្នុងគោលបំណងបង្កើនកម្រិតបច្ចេកទេសបុគ្គលិកក៏ដូចជាពាំនាំចំណេះដឹងថ្មី និង បច្ចេកវិទ្យាថ្មីមកប្រទេសកម្ពុជា។ ដើម្បីបន្តចូលរួមលើកកម្ពស់វិស័យយានយន្ត ក្រុមហ៊ុននឹងបង្កើតមជ្ឈមណ្ឌលអប់រំបណ្ដុះបណ្ដាលបច្ចេកទេស និងវិជ្ជាជីវៈដើម្បីផ្ដល់ឱកាសឱ្យប្រជាពលរដ្ឋកម្ពុជាទទួលបានការបណ្តុះបណ្តាលជំនាញបច្ចេកទេសប្រកបដោយគុណភាពដើម្បីចូលរួមចំណែកអភិវឌ្ឍធនធាន មនុស្សនៅកម្ពុជាស្របតាមគោលនយោបាយអភិវឌ្ឍវិស័យឧស្សាហកម្មរបស់រាជរដ្ឋាភិបាលកម្ពុជា។

     

  • ការ​បាញ់​បង្ហោះ​យាន​ចុះ​ចត​លើ​ឋាន​ព្រះចន្ទ​​របស់​ឥណ្ឌា នឹង​ធ្វើ​ឡើង​នៅ​ថ្ងៃ​នេះ

    ការ​បាញ់​បង្ហោះ​យាន​ចុះ​ចត​លើ​ឋាន​ព្រះចន្ទ​​របស់​ឥណ្ឌា នឹង​ធ្វើ​ឡើង​នៅ​ថ្ងៃ​នេះ

    យោងតាម​អង្គការ​ស្រាវជ្រាវ​អវកាស​ឥណ្ឌា (ISRO) បេសកកម្ម Chandrayann 3 បាន​ដោះស្រាយ​បញ្ហា​ធំ​រួចរាល់​ហើយ​នៅមុន​កាលបរិច្ឆេទ​នៃ​ការបាញ់​បង្ហោះ​ដែល​គ្រោង​នឹងធ្វើ​ឡើង​នៅ​ល្ងាច​ថ្ងៃទី 14 កក្កដា 2023។

    បេសកកម្ម Chandrayaan 3 កំណត់​គោលដៅ​នាំ​យានអវកាស​របស់​ឥណ្ឌា ទៅ​ចុះចត​លើ​ផ្ទៃ​ព្រះ​ចន្ទ​ដោយ​ជោគជ័យ​ជា​លើកដំបូង។ «ការវាយតម្លៃ​ចំពោះ​ការត្រៀមខ្លួន​សម្រាប់​បេសកកម្ម បាន​ចប់សព្វគ្រប់។ ការបាញ់​បង្ហោះ​ក៏​ទទួលបាន​ការអនុញ្ញាត» ISRO ប្រកាស​នៅលើ Twitter ដូច្នេះ។

    ការបាញ់​បង្ហោះ​គ្រោង​នឹងធ្វើ​ឡើង​នៅលើ​កោះ Sriharikota ក្បែរ​ឆ្នេរសមុទ្រ​ភាគ​ខាងកើត​របស់​ប្រទេស​ឥណ្ឌា នៅវេលា​ម៉ោង 16 និង 05 នាទី ថ្ងៃទី 14 កក្កដា (ម៉ោង​នៅ​កម្ពុជា) ដោយ​ប្រើប្រាស់​រ៉ុក្កែត LVM3។ ក្នុង​បេសកកម្ម Chandrayaan 3 យានអវកាស-​រ៉ូ​បូត នឹង​ចុះចត​នៅក្បែរ​ប៉ូល​ខាងត្បូង​របស់​ព្រះ​ចន្ទ នៅ​ចុងខែ​សីហា 2023។ បើសិនជា​គ្រប់យ៉ាង​ដំណើរ​ការល្អ ឥណ្ឌា​នឹង​ក្លាយជា​ប្រទេស​ទី​បួន​ដែល​ចុះចត​លើ​ឋាន​ព្រះ​ចន្ទ​ដោយ​ជោគជ័យ បន្ទាប់ពី​សហរដ្ឋ​អាម៉េរិក សូ​វៀត និង​ចិន។

    យាន​ចុះចត​របស់​ឥណ្ឌា នឹង​ប្រមូល​ទិន្នន័យ​ច្រើន​ប្រភេទ​ទាក់ទង​នឹង​បរិស្ថាន​ជុំវិញ ដោយ​ប្រើប្រាស់​ឧបករណ៍​វិទ្យាសាស្ត្រទំនើប។

    Chandrayaan 3 គឺជា​បេសកកម្ម​ព្រះ​ចន្ទ​ទី​បី​របស់​ប្រទេស​ឥណ្ឌា និង​ជាការ​ប្រឹងប្រែង​លើក​ទី​ពីរ​ដើម្បី​អាច​ចុះចត​លើ​ឋាន​ព្រះ​ចន្ទ​ដោយ​ជោគជ័យ។ ការប្រឹងប្រែង​លើកដំបូង​ត្រូវបាន​ធ្វើឡើង​កាលពី​ខែកញ្ញា 2019 និង​បញ្ចប់​ដោយ​បរាជ័យ នៅពេល​យាន​ចុះចត-រ៉ូ​បូត​របស់ Chandrayaan 2 ទម្លាក់ខ្លួន​ទៅបុក​នឹង​ផ្ទៃ​ព្រះ​ចន្ទ​ពេញ​មួយ​ទំហឹង។

    Chandrayaan 2 ក៏មាន​ទាំង​យានអវកាស​ដែល​គោចរ​ជុំវិញ​គន្លង​តារាវិថី​ព្រះ​ចន្ទ ដែល​បច្ចុប្បន្នកំពុង​ប្រមូល​ទិន្នន័យ​នៅ​ជុំវិញ​ឋាន​នេះ។ Chandrayaan 3 មិនមាន​យាន​គោចរ​លើ​គន្លង​តារាវិថី ប៉ុន្តែ​ម៉ូឌុល​រុញច្រាន​របស់​បេសកកម្ម​នេះ​នឹង​នាំ​ឧបករណ៍​ស្រាវជ្រាវ​ផែនដី​ពី​ចម្ងាយទៅ​ជាមួយ​។ ទិន្នន័យ​ដែល​វា​ប្រមូលបាន​នឹងមាន​ប្រយោជន៍​សម្រាប់​បេសកកម្ម​បន្ទាប់៕

  • ជប៉ុន​ចាប់​ផ្ដើម​បង្កើន​ការ​ទាក់ទាញ​កម្លាំង​ពលកម្ម​​ពី​បរទេស

    ជប៉ុន​ចាប់​ផ្ដើម​បង្កើន​ការ​ទាក់ទាញ​កម្លាំង​ពលកម្ម​​ពី​បរទេស

    ប្រទេស​ជប៉ុន​បាន​អនុញ្ញាតឱ្យ​អ្នក​ដែលមាន​ប្រាក់ខែ​ខ្ពស់ ដាក់ពាក្យ​សូម​ប័ណ្ណ​ស្នាក់នៅ ក្រោយពី​ធ្វើការ​នៅ​ប្រទេស​នេះ​បាន​មួយឆ្នាំជា​ដើម​ ដើម្បី​បង្កើន​ការ​ទាក់ទាញ​កម្លាំង​ពលកម្ម​​ពី​បរទេស។

    ដើម្បី​ទប់ទល់​នឹង​បញ្ហា​ក្នុងការ​ទាក់ទាញ​កម្លាំង​ពលកម្ម​ពី​បរទេស រាជរដ្ឋាភិបាល​ជប៉ុន​បាន​បង្កើត​គោលការណ៍​ថ្មី អនុញ្ញាតឱ្យ​អ្នក​ដែលមាន​ប្រាក់ខែ​ខ្ពស់ ដាក់ពាក្យ​សូម​ប័ណ្ណ​ស្នាក់នៅ ក្រោយពី​ធ្វើការ​នៅ​ប្រទេស​នេះ​បាន​មួយឆ្នាំ និង​អនុញ្ញាតឱ្យ​និស្សិត​ដែល​បានបញ្ចប់​ការសិក្សា​ពី​សាកលវិទ្យាល័យ​ដែលមាន​កេរ្តិ៍ឈ្មោះ​ល្អ ស្នាក់នៅ​ប្រទេស​នេះ​ពីរ​ឆ្នាំ​បន្ថែមទៀត ​ដើម្បី​ស្វែងរក​ការងារ​ធ្វើ។

    ជាពិសេស ចំពោះ​កម្មវិធី​ជ្រើសរើស​អ្នក​ហាត់​ការ​ផ្នែក​បច្ចេកទេស ជប៉ុន​ក៏បាន​ជំរុញ​ និង​លើក​កម្ពស់​កម្មវិធី​ជំនាញ​ពិសេស​លេខ​មួយ ​ផ្ដោត​សំខាន់​ទៅលើ​ក្រុម​គោលដៅ​ដែលជា​អ្នក​ហាត់​ការ​បាន​ចប់​កិច្ចសន្យា​ជាមួយ​បណ្ដា​ក្រុម​ហ៊ុន​ រោង​ចក្រ​នៅ​ប្រទេស​នេះ។

    អ្នក​ហាត់​ការដែល​បាន​ចប់​កិច្ចសន្យា​នឹង​ទ​ទូល​បាន​ភាពងាយស្រួល​នៅក្នុង​ការដាក់​ពាក្យ​ស្នើ​សូម​ទិដ្ឋាការ​ជំនាញ​ពិសេស​លេខ​មួយ ដើម្បី​ធ្វើការ​រយៈពេល​ប្រាំ​ឆ្នាំ​ទៀត​នៅ​ប្រទេស​ជប៉ុន ក្នុងនាម​ជា​បុគ្គលិក​ដែល​ទទួលបាន​អត្ថប្រយោជន៍​ពេញលេញ​ដូច​ពលរដ្ឋ​ជប៉ុន។

    ក្រៅពីនេះ ជប៉ុន​ក៏​កំពុង​ពិចារណា​លើ​ការបន្ធូរបន្ថយ​ការកំណត់​នានា​ដែល​ប្រទេស​នេះ​កំពុង​អនុវត្ត​ចំពោះ​កម្លាំង​ពលកម្ម​មកពី​បរទេស​ផងដែរ៕

  • បញ្ហា​ស៊ុយអែត​​សូម​ចូល​ជា​សមាជិក​ណាតូ គឺជា​កូន​អុក​របស់​តួកគី

    បញ្ហា​ស៊ុយអែត​​សូម​ចូល​ជា​សមាជិក​ណាតូ គឺជា​កូន​អុក​របស់​តួកគី

    ការ​រារាំង​ស៊ុយអែត​ចូល​ជា​សមាជិក​ណាតូ (NATO) ក្នុង​រយៈ​ពេល​ច្រើន​ខែ​ ហើយ​ចុង​ក្រោយ​ក៏​យល់​ព្រម​នៅ​មុន​កិច្ច​ប្រជុំ​កំពូល​ណាតូ គឺ​សុទ្ធ​តែ​ស្ថិត​ក្នុង​ផែនការ​របស់​លោក Erdogan។

    ប្រធានាធិបតី​តួកគី លោក Recep Tayyip Erdogan កាល​ពី​ថ្ងៃទី 10 កក្កដា 2023 បាន​ឯកភាព​អនុញ្ញាត​ឱ្យ​​ប្រទេស​ស៊ុយអែត​ចូល​ជា​សមាជិក​របស់​ណាតូ ក្រោយ​ពី​បាន​រារាំង​ពេញ​មួយ​ឆ្នាំ​។

    កិច្ច​ព្រមព្រៀង​ដែល​សម្រេច​បាន​តែប៉ុន្មាន​ម៉ោង​ប៉ុណ្ណោះ នៅ​មុន​កិច្ច​ប្រជុំ​កំពូល​ណាតូនៅ​ប្រទេស​លីទុយអានី​នេះ​ នឹង​ពង្រីក​ទឹក​ដី​របស់​សម្ព័ន្ធ​យោធា​បាន​ជាង 500,000 គីឡូម៉ែត្រ​ការ៉េ​ទៀត​ នៅ​​តំបន់​​សមុទ្រ​បាល់ទិក និង​ផ្លាស់​ប្ដូរ​តុល្យភាព​អំណាច​នៅ​អឺរ៉ុប​ខាង​ជើង​។ វា​ក៏​ជួយ​ឱ្យ​ណាតូ​ដោះ​ស្រាយ​បញ្ហាមិន​ចុះ​សម្រុង​គ្នា​ធំ​មួយ​ គ្រា​ដែល​សម្ព័ន្ធ​យោធា​នេះ​កំពុង​ត្រូវ​ការ​បង្ហាញ​សាមគ្គី​ភាព​ដើម្បី​ប្រឈម​នឹង​រុស្ស៊ី​។

    បន្ទាប់​ពី​មាន​ការ​យល់​ព្រម​ពី​តួកគី ហើយ​ប្រទេស​ហុងគ្រី​ក៏​ធ្លាប់​បាន​និយាយ​ថា ពួក​គេ​នឹង​ដើរ​តាម​គន្លង​របស់​ទីក្រុង​អង់ការ៉ា អគ្គលេខាធិការ​នៃ​អង្គ​ការ​ណាតូ លោក Stoltenberg បាន​វាយ​តម្លៃ​ថា ការសូម​ចូល​ជា​សមាជិក​ណាតូ​ពី​សំណាក់​ស៊ុយអែត​ «នឹង​ត្រូវ​បាន​ដោះ​ស្រាយ​ឆាប់ៗ»។

    យោង​តាម​ក្រុម​អ្នក​ជំនាញ​ ប្រកាស​កាល​ពី​ថ្ងៃទី 10 កក្កដា 2023 គឺជា​រឿង​គួរ​ឱ្យ​ភ្ញាក់​ផ្អើល ប៉ុន្តែ​ព្រឹត្តិការណ៍​នេះ​តែង​តែ​កើត​ឡើង​ចំពោះ​មេដឹក​នាំ​តួកគី។ យុទ្ធសាស្ត្រ​នេះ​បាន​ជួយ​ឱ្យ​លោក Erdogan លើក​កម្ពស់​ឥទ្ធិពល របស់​តួកគី និង​សម្រេច​បាន​ផល​ប្រយោជន៍​ច្រើន​។

    ក្រោយ​ពី​រុស្ស៊ី​បាន​ចូល​ឈ្លាន​ពាន​អ៊ុយក្រែន​ ប្រទេស​ហ្វាំងឡង់ និង​ស៊ុយអែត កាល​ពី​ខែ​ឧសភា 2022 ក៏​បាន​បោះ​បង់​គោលនយោបាយ​មិន​ចូល​បក្ខសម្ព័ន្ធ​យោធា​ដែល​ពួក​គេ​​បា​ន​អនុវត្ត​អស់​ជា​ច្រើន​ទសវត្សរ៍កន្លង​​ ដើម្បី​ស្វែង​រក​ឋានៈ​ជា​សមាជិកភាព​របស់​ណាតូ​។

    គិត​មក​ដល់​បច្ចុប្បន្ន ណាតូ​មាន​សមាជិក​សរុប​ចំនួន 31 ប្រទេស​ (ពណ៌ខៀវចាស់)

    ដំបូង​ឡើយ លោក Erdogan ជំទាស់​ទៅ​នឹង​ការ​អនុញ្ញាត​ឱ្យ​ប្រទេស​ទាំង​ពីរ​ខាង​លើ​ចូល​ជា​សមាជិក​ណាតូ ប៉ុន្តែ​បន្ទាប់​ពី​ការ​ចរចា​អស់​ជា​ច្រើន​ខែ​ ហើយ​តួកគី​ទទួល​បាន​ផល​ប្រយោជន៍​​ច្រើនពី​ស៊ុយអែត​ ក៏​ដូច​ជា​ពី​សហរដ្ឋ​អាម៉េរិក និង​ណាតូ​ លោក Erdogan ក៏​ចាប់​ផ្ដើម​បើក​ភ្លើង​ខៀវ​។ ការ​ទាម​ទារ​ដែល​តួកគី​សម្រេច​បាន​ រួមមាន បញ្ហា​ជនជាតិ​ឃើដ (Kurd) និង​បញ្ហា​តួកគី​បញ្ជា​ទិញ​យន្ត​ហោះ​ចម្បាំង​របស់​សហរដ្ឋ​អាម៉េរិក​ជា​ដើម​។

    Sinan Ulgen ដែល​ជា​សមាជិក​ជាន់​ខ្ពស់​របស់​​អង្គការ Carnegie Europe នៅ​ប្រទេស​បែលហ្ស៊ិក អះអាង​ថា ការ​រារាំង​របស់​លោក Erdogan ចំពោះ​ស៊ុយអែត​ គឺជា​កូន​អុក​ដែល​អង់ការ៉ា​ប្រើ​ប្រាស់​ដើម្បី​សម្រេច​បាន​ផល​ប្រយោជន៍​ជូន​ប្រទេស​ជាតិ​របស់​លោក​។ ចំណែក​ លោក​ស្រី Anna Wieslander នាយិកា​ទទួល​បន្ទុក​តំបន់​អឺរ៉ុប​ខាង​ជើង​របស់​ក្រុម​ប្រឹក្សា​មហា​សមុទ្រ​អាត្លង់ទិក​នៅ​សហរដ្ឋ​អាម៉េរិក​ កាល​ពី​ចុង​សប្ដាហ៍​កន្លង​ក៏​បាន​ព្យាករ​ថា លោក Erdogan នឹង​ផ្លាស់​ប្ដូរ​ជំហរ​នៅ​មុន​កិច្ច​ប្រជុំ​កំពូល​របស់​ណាតូ​ ដោយ​យល់​ថា «លោក Erdogan មាន​ចេតនា​ធ្វើ​បែប​នោះ​គឺ​ដើម្បី​បង្ហាញ​ថា លោក​ជា​មនុស្ស​ល្អ ជា​អ្នក​ដែល​បាន​ជួយ​ស្រោច​ស្រង់​កិច្ច​ប្រជុំ​កំពូល​ ដោយ​ការ​បើក​ភ្លើង​ខៀវ»។

    គិត​មក​ដល់​បច្ចុប្បន្ន ណាតូ​មាន​សមាជិក​សរុប​ចំនួន 31 ប្រទេស​ ហើយ​អាច​កើន​ដល់ 32 ប្រទេស​ បើ​សិន​ស៊ុយអែត​ត្រូវ​បាន​ទទួល​យក​ជា​សមាជិក​៕

  • ដែន​ដី​ដែល​មាន​ស្រីស្អាត​ច្រើន​ជាង​គេ​នៅ​​ប្រទេស​ចិន​

    ដែន​ដី​ដែល​មាន​ស្រីស្អាត​ច្រើន​ជាង​គេ​នៅ​​ប្រទេស​ចិន​

    ស៊ីនជាំង ត្រូវ​បាន​ចាត់ទុក​ថា​ជា​ដែនដី​ដែល​សម្បូរ​ស្រី​ស្អាត​បំផុត​នៅ​ប្រទេស​ចិន​ ព្រោះ​តែភូមិសាស្ត្រ​ពិសេស​ ទើប​ប្រជាជន​នៅ​ទី​នោះ​មាន​សម្រស់​ស្រស់ស្អាត​បែប​​ចម្រុះ​​ជាតិ​សាសន៍​។

    ក្នុង​ចំណោម​មនុស្ស​ម្នា ស្ត្រី​នៅ​តំបន់​ស៊ីជាំង​លេច​ធ្លោ​ជាង​គេ​ដោយ​សារ​តែ​រូប​រាង​ និ​ងសម្រស់​​ដ៏​ស្រស់​ស្អាត​។ ហេតុ​អ្វី​ប្រទេស​ចិន​ធំ​យ៉ាង​នេះ​ ប៉ុន្តែ​ស៊ីនជាំង​បែរ​ជា​មាន​ស្រី​ស្អាត​ច្រើន​ជា​ង​គេ​ទៅវិញ?

    ស៊ីនជាំង​ស្ថិត​នៅ​លើ​តំបន់​ច្រក​ផ្លូវ​ទៅមក​រវាង​អាស៊ី និង​អឺរ៉ុប ជា​តំបន់​ប្រមូល​ផ្ដុំ និង​ទំនាក់​ទំនង​របស់​ជាតិ​សាសន៍​ជា​ច្រើន​។ ដូច្នេះ ហ្សែន​របស់​ស្ត្រី​នៅ​ស៊ីនជាំង​មាន​ផ្ទុក​ចំណុច​ពិសេស​នៃ​ជាតិ​សាសន៍​ជា​ច្រើន​។ ពួក​គេ​មាន​ច្រមុះ​ស្រួច ស្បែក​ស​ដូច​​ជនជាតិ​អឺរ៉ុប និង​មាន​ភ្នែក​ធំៗ រោម​ភ្នែក​វែង​ៗ​ដូច​ជន​ជាតិ​អារ៉ាប់ និង​មាន​សម្រស់​ស្រស់​សោភា​ដូច​ស្ត្រី​ឥណ្ឌា។

    ជាមធ្យម ភ្នែក​របស់​ស្ត្រី​នៅ​អាស៊ី​មាន​ប្រវែង 25.23 មម ប៉ុន្តែ​ស្ត្រី​នៅ​ស៊ីនជាំង​មាន​ភ្នែក​ប្រវែង 31.8 មម វែង​ជាង 6 មម។

    ក្ដោង​ច្រមុះ​របស់​ស្ត្រី​នៅ​ស៊ីនជាំង​ខ្ពស់​ 6 អង្សា ធៀប​នឹង​ស្ត្រីតំបន់​ដទៃ​របស់​​​អាស៊ី ដែល​នេះ​មាន​ន័យ​ថា ទោះ​ជា​ដេក​ផ្អៀង​យំ ក៏​ទឹក​ភ្នែក​មិន​អាច​ហូរ​ឆ្លង​ក្ដោង​ច្រមុះ​ទៅ​ម្ខាង​ទៀត​។

    ភាព​ខុស​គ្នា​រវាង​សីតុណ្ហ​ភាព​ពេល​យប់ និង​ពេល​ថ្ងៃ​នៅ​ស៊ីនជាំង​គឺ​មាន​ខ្ពស់​ខ្លាំង​ ធ្វើ​ឱ្យ​បន្លឺ​ផ្លែ​ឈើ​មួយ​ចំនួន​នៅ​តំបន់​នេះ​មាន​ជាតិស្ករ និង​ជីវជាតិ​ខ្ពស់​ជាង​តំបន់​ដទៃ​។ បន្លែ​ផ្លែ​ឈើ​សម្បូរ​វីតាមីន​គឺ​មាន​ប្រយោជន៍​ជួយ​ពន្យារ​ការ​វិវត្ត​ទៅ​រក​ភាព​ចាស់​របស់​ស្បែក​។ ក្រៅ​ពី​នេះ ស៊ីនជាំង​ក៏​ជា​តំបន់​ដែល​មាន​ដាំ​ផ្លែ​ឈើ​ល្បី​ៗដែល​ផ្អែម​ ឈ្ងុយ​ឆ្ងាញ់​ជាប់​ចិត្ត​។ ការ​បរិភោគ​ផ្លែ​ឈើ​ទាំង​នេះបាន​​ជួយ​ឱ្យស្ត្រី​នៅ​ស៊ីនជាំង​ស្រស់​ស្អាត​ និង​ក្មេង​ជាង​វ័យ​។

    ស៊ីនជាំង​ក៏​ជា​តំបន់​ល្បី​ល្បាញ​ខាង​រាំ​តាំង​ពី​សម័យ​បុរាណ​។ ការ​រាំ​ជួយ​ឱ្យ​ស្ត្រី​នៅ​ទី​នេះ​មាន​រាង​កាយ​មាំមួន សុខភាព​ល្អ រូប​សម្រស់​ស្រស់​ស្អាត៕

  • ក្រុមហ៊ុន​មួយ​ចំណាយ 138 លាន​ដុល្លារ​អាម៉េរិក ដើម្បី​លើកទឹកចិត្ត​បុគ្គលិក​ឱ្យ​បង្កើតកូន

    ក្រុមហ៊ុន​មួយ​ចំណាយ 138 លាន​ដុល្លារ​អាម៉េរិក ដើម្បី​លើកទឹកចិត្ត​បុគ្គលិក​ឱ្យ​បង្កើតកូន

    ក្រុមហ៊ុន​ទេសចរណ៍​ធំ​មួយ​នៅ​ប្រទេស​ចិន បញ្ចេញ​កញ្ចប់​ជំនួយ​សម្រាប់​ការថែទាំ​ក្មេង​តម្លៃ 138 លាន​ដុល្លារ​​អាម៉េរិក ដើម្បី​លើកទឹកចិត្ត​ដល់​បុគ្គលិក 32,000 នាក់ ក្នុងការ​បង្កើតកូន។

    បុគ្គលិក​ធ្វើការ​នៅ Trip.com ដែលជា​ក្រុមហ៊ុន​ទេសចរណ៍​ធំជាងគេ​មួយ​របស់​ពិភពលោក នឹង​ទទួលបាន​ប្រាក់ឧបត្ថម្ភ 1,376 ដុល្លារ​អាម៉េរិក​ក្នុង​មួយឆ្នាំ រយៈពេល​ប្រាំ​ឆ្នាំ សម្រាប់​ទារក​ម្នាក់។ គោលការណ៍​​នេះ​មាន​សុពលភាព​ចាប់ពី​ថ្ងៃនេះ (01) កក្កដា 2023។

    «តាមរយៈ​កញ្ចប់​អត្ថប្រយោជន៍​ស្ដីពី​ការថែទាំ​ក្មេង​ថ្មី​នេះ យើង​មានបំណង​គាំទ្រ​ផ្នែក​ហិរញ្ញវត្ថុ​ដើម្បី​លើកទឹកចិត្ត​ដល់​បុគ្គលិក​ឱ្យ​ចាប់ផ្ដើម ឬ​ពង្រីកទំហំ​​គ្រួសារ​ដោយ​មិន​បង្ក​ផលប៉ះពាល់​ដល់​គោលដៅ និង​សមិទ្ធផល​ការងារ» លោក James Liang ប្រធាន​ក្រុមហ៊ុន Trip.com កាលពី​ថ្ងៃទី 30 កក្កដា 2023 ឱ្យដឹង​ដូច្នេះ។

    គោលការណ៍​ខាងលើនេះ​អនុវត្ត​ចំពោះ​បុគ្គលិក​ពេញសិទ្ធិ​ដែល​ធ្វើការ​យ៉ាងតិច​បី​ឆ្នាំ មិន​កំណត់​ភេទ តំណែង ឬ​ទីតាំង​ធ្វើការ។ ក្រុមហ៊ុន Trip.com បច្ចុប្បន្ន​មាន​បុគ្គលិក​សរុប​ប្រហែល 32,000 នាក់។

    គោលការណ៍​របស់ Trip.com ត្រូវបាន​ធ្វើឡើង​បន្ទាប់ពី​ទីក្រុង​ប៉េកាំង បាន​លុបចោល​គោលនយោបាយ​កូន​មួយ​ដែល​អូសបន្លាយ​ពេល​រាប់​ទសវត្សរ៍ កាលពី​ឆ្នាំ 2015 ដោយ​អនុញ្ញាតឱ្យ​ប្ដី​ប្រពន្ធ​មួយគូ​មានកូន​ពីរ​នាក់​។ ការអនុញ្ញាតរបស់​​រដ្ឋាភិបាល​ចិន​ ក៏​ធ្វើឡើង​ដើម្បី​ដោះស្រាយ​វិបត្តិ​ដែល​ទាក់ទង​នឹង​បញ្ហាធ្លាក់​ចុះ​នៃ​​ចំនួន​ប្រជាជន​​ ដែល​ប៉ះពាល់​ដល់​សេដ្ឋកិច្ចប្រទេស​នេះ​៕

  • ដំណេក​ពេល​ថ្ងៃត្រង់​ជួយ​ឱ្យ​ខួរ​ក្បាលមាន​សុខភាព​ល្អ និង​ក្មេង​ជាង​វ័យ​

    ដំណេក​ពេល​ថ្ងៃត្រង់​ជួយ​ឱ្យ​ខួរ​ក្បាលមាន​សុខភាព​ល្អ និង​ក្មេង​ជាង​វ័យ​

    យោងតាម​ការសិក្សា​ស្រាវជ្រាវ​ថ្មី​បំផុត​របស់​ក្រុម​អ្នកវិទ្យាសាស្ត្រ ការ​ដេក​នៅពេល​ថ្ងៃត្រង់​នឹង​ជួយ​ឱ្យ​ខួរក្បាល​រីកចម្រើន សុខភាព​ល្អ ហើយ​មនុស្ស​មាន​កម្លាំង​ដូច​នៅ​ក្មេង​ជាង​វ័យ​ពី 3 ទៅ 7 ឆ្នាំ។

    ក្រុម​អ្នកស្រាវជ្រាវ​នៃ​សាកលវិទ្យាល័យ College London (ចក្រភព​អង់គ្លេស) និង សាកលវិទ្យាល័យ​សាធារណរដ្ឋ នៃ​ប្រទេស​អ៊ុយ​រូ​ហ្គា​យ ថ្មីៗនេះ​បានបញ្ចប់​ការវិភាគ​ទិន្នន័យ​ដែល​បាន​​ពី​មនុស្ស 35,080 នាក់​ដែល​បាន​ចូលរួម​នៅឯ​ធនាគារ​ជីវសាស្ត្រ​របស់​អង់គ្លេស។

    លទ្ធផល​នៃ​ការ​វិភាគ​ទិន្នន័យ​ខាង​លើ​ បាន​នាំ​ទៅ​រក​ការ​​​សន្និដ្ឋានថា ដំណេក​នៅពេល​ថ្ងៃត្រង់​គឺជា​គន្លឹះ​ដើម្បី​រក្សា​ទម្ងន់​របស់​ខួរក្បាល នៅពេល​ចាស់។ វា​នឹង​ជួយ​ឱ្យ​ខួរក្បាល​រីកចម្រើន សុខភាព​ល្អ ហើយ​មនុស្ស​មាន​កម្លាំង​ដូច​នៅ​ក្មេង​ជាង​វ័យ​ពី 3 ទៅ 7 ឆ្នាំ។

    ទោះជា​យ៉ាងណាក៏ដោយ សាស្ត្រាចារ្យ Simon Smith អ្នកជំនាញ​ខាង​ដំណេក និង​សុខភាព​របស់​សាកលវិទ្យាល័យ Queensland (អូស្ត្រាលី) បានឱ្យដឹងថា លទ្ធផល​នៃ​ការសិក្សា​ស្រាវជ្រាវ​នេះ​មិនមែន​មានន័យថា ដំណេក​រយៈពេល​ខ្លី​នៅ​ថ្ងៃត្រង់ ​សុទ្ធ​តែមាន​ប្រយោជន៍​​ពេញ​លេញ​ដូច​បាន​រៀបរាប់​ខាងលើ​នោះឡើយ។

    សាស្ត្រាចារ្យ Simon Smith បញ្ជាក់​ថា បញ្ហា «ស្វិ​ត​ខួរក្បាល​នៅតែ​អាច​កើតឡើង​ទៅតាម​ស្ថានភាព​សុខភាព​ជាក់ស្ដែង មានដូចជា មនុស្ស​ញៀន​នឹង​ស្រា ជំងឺ​ដាច់​សរសៃឈាម​ខួរក្បាល និង​ជំងឺ​ភ្លេចភ្លាំង​ (Alzheimer) ក៏ដូចជា​ការ​ចាស់​ទៅតាម​អាយុ​ជាដើម៕

  • Great Wall Motor ផលិត​ថ្ម​ផ្ទុក​ថាមពល​សម្រាប់​រថ​យន្ត​អគ្គិសនី​នៅ​ប្រទេស​ថៃ

    Great Wall Motor ផលិត​ថ្ម​ផ្ទុក​ថាមពល​សម្រាប់​រថ​យន្ត​អគ្គិសនី​នៅ​ប្រទេស​ថៃ

    Great Wall Motor (GWM) គ្រោង​នឹង​សាងសង់​រោងចក្រ​ផលិត​ថ្ម​ផ្ទុក​ថាមពល​សម្រាប់​រថ​យន្ត​អគ្គិសនី​អគ្គិសនី​នៅ​ប្រទេស​ថៃ ហើយ​អាច​ស្រាវជ្រាវ និង​អភិវឌ្ឍ​សម្រាប់​រថយន្ត​ទ្រុង​អគ្គិសនី​ផងដែរ។

    ប្រទេស​ថៃ​គឺជា​ខឿនសេដ្ឋកិច្ច​សម្រាប់​ការផលិត​រថយន្ត​ធំជាងគេ​លំដាប់​ទី​ដប់​របស់​ពិភពលោក និង​មាន​គោល ដៅ​ប្ដូរ​ទៅរក​ការផលិត​រថយន្ត​អគ្គិសនី​ឱ្យបាន 30% ក្នុង​រយៈពេល​តែ​ប៉ុន្មាន​ឆ្នាំ​ទៀត​ប៉ុណ្ណោះ។ រាជរដ្ឋាភិបាល​ថៃ​ក៏​កំពុងផ្ដល់​អត្ថប្រយោជន៍​ជាច្រើន​ដល់​អ្នក​ផលិត​ថ្ម​ផ្ទុក​ថាមពល​អគ្គិសនី​នៅក្នុង​ស្រុក។

    GWM បាន​ទិញ​រោងចក្រ​មួយ​របស់ GM កាលពី​ឆ្នាំ 2020 ហើយ​ចាប់ពីពេលនោះ GWM បាន​ផលិត​រថយន្ត hybrid Haval នៅ​ប្រទេស​ថៃ។ ឆ្នាំ 2021 GWM បានបង្ហាញ​រថយន្ត Ora Good Cat នៅ​ប្រទេស​ថៃ ហើយ​បច្ចុប្បន្ន​វា​គឺជា​ម៉ូ​ដែល​រថយន្ត​ដែល​លក់ដាច់​ជាងគេ​នៅ​ប្រទេស​នេះ។ GWM ក៏មាន​គម្រោង​ផលិត​រថយន្ត​អគ្គិសនី Ora Good Cat EV នៅ​ប្រទេស​ថៃ នា​ឆ្នាំ 2024 ដែល​អាច​លក់​ក្នុងតម្លៃ 24,475 ដុល្លារ​អាម៉េរិក/គ្រឿង។

    ការសាងសង់​រោងចក្រ​ដំឡើង​ថ្ម​ផ្ទុក​អគ្គិសនី​ថ្មី​នៅ​ប្រទេស​ថៃ នឹងត្រូវ​ចំណាយ​ប្រាក់​ពី 14 ដល់ 28 លាន​ដុល្លារ។ លោក Narong Sritayon ប្រធាន​ផ្នែក​ពាណិជ្ជកម្ម​របស់ GWM នៅ​ប្រទេស​ថៃ និយាយថា រោងចក្រ​នេះ​អាច​នឹង​ត្រូវបាន​ប្រើប្រាស់​ជា​កន្លែង​ផលិត និង​ផ្គត់ផ្គង់​ថ្ម​ផ្ទុក​ថាមពល​សម្រាប់​រថ​យន្ត​អគ្គិសនី​នាពេលខាងមុខ៕

  • អនុសាសន៍​របស់​ស្ត្រី​​ដោះ​​បំណុល 300,000​ ដុល្លារ​រួច​រាល់​ក្នុង​​បី​ឆ្នាំ​ និង​ក្លាយ​ជា​សេដ្ឋិនី​

    អនុសាសន៍​របស់​ស្ត្រី​​ដោះ​​បំណុល 300,000​ ដុល្លារ​រួច​រាល់​ក្នុង​​បី​ឆ្នាំ​ និង​ក្លាយ​ជា​សេដ្ឋិនី​

    Bernadette Joy បាន​ទូទាត់​បំណុលចំនួន​ 300,000 ដុល្លារ​អាម៉េរិករួច​ស្រេច​ ហើយ​បច្ចុប្បន្ន​សន្សំ​ទ្រព្យ​បាន​មួយ​លាន​ដុល្លារ​អាម៉េរិក។

    នៅ​ពេល​និយាយ​ដល់​អាទិភាព​ក្នុង​ហិរញ្ញវត្ថុ​ អ្នក​ជំនាញ​ស្ទើរ​តែ​ទាំង​អស់​យល់​ស្រប​ថា ការ​​សន្សំ​សំច័យ​ប្រាក់​ និង​ការ​បង្កើត​ខ្ទង់​ប្រាក់​សម្រាប់​ហេតុ​ការណ៍​បន្ទាន់​នៅ​មុនពេល​ផ្ដោត​ទៅ​លើ​ការវិនិយោគ​​គឺជា​គំនិត​ឆ្លាត​វៃ​។

    យោង​តាម​ Bernadette Joy ដែល​ជា​គ្រូបណ្ដុះ​បណ្ដាល​ផ្នែក​ហិរញ្ញវត្ថុ​ និង​ជា​ស្ថាបនិក​របស់ក្រុម​ហ៊ុន​​ Crush Your Money Goals ប្រការ​ខាងលើ​នោះ​ពុំ​មែន​មាន​ន័យ​ថា​ជា​ការ​សំច័យ​ហួស​ហេតុ​នោះ​ទេ​។ Joy បាន​ទូទាត់​បំណុល​ 300,000​ ដុល្លារ​អាម៉េរិកក្នុង​រយៈ​ពេលបីឆ្នាំ​ ហើយ​បច្ចុប្បន្ន​ អ្នក​ស្រី​មាន​ទ្រព្យ​មួយ​លាន​ដុល្លារ​។ អ្នក​ស្រី​ឱ្យ​ដឹង​ថា អតិថិ​ជន​មួយ​ចំនួន​របស់​អ្នក​ស្រី ​សន្សំ​​ប្រាក់​បាន​​ច្រើន​ជាង​តម្រូវ​ការ​ទៅ​ទៀត​។

    អ្នក​ស្រី​ Joy ថ្លែង​ថា​៖ «ពួក​គេ​កំពុង​មាន​ភាព​យឺត​យ៉ាវ​នៅ​ពេល​មាន​លទ្ធភាព​គ្រប់​គ្រាន់​ក្នុង​ការ​វិនិយោគ​។ នៅ​ពេល​អ្នក​សន្សំ​បាន​ប្រាក់​គ្រប់​គ្រាន់​សម្រាប់​ខ្ទង់ហេតុការណ៍​​​បន្ទាន់ អ្នក​អាច​​បង្វែរ​ទ្រព្យ​មួយ​ផ្នែក​ទៅ​កាន់​ខ្ទង់​វិនិយោគ​ ដើម្បី​មាន​មូលដ្ឋាន​ហិរញ្ញវត្ថុ​រឹង​មាំ​ និង​យូរ​អង្វែង​»។

    ​ប្រាក់សន្សំ​​សម្រាប់ខ្ទង់​​​ដោះ​ស្រាយ​បញ្ហា​បន្ទាន់​​ ត្រូវ​មានចំនួន​ប៉ុន្មាន​​ ទើប​ហៅ​ថា ឆ្លាត​វៃ​

    អ្នក​ជំនាញ​ផ្នែក​ហិរញ្ញវត្ថុ​ស្ទើរ​តែ​ទាំង​អស់ រួម​ទាំង​អ្នកស្រី Joy ផងដែរ​ យល់​ថា សន្សំ​ប្រាក់​សម្រាប់​​ខ្ទង់​ចំណាយ​ប្រចាំ​ថ្ងៃ​ ឱ្យ​បាន​ចាប់​ពី​ 3 ​ខែ​ដល់​ 6 ខែ​ គឺជា​រឿង​ឆ្លាត​វៃ​។ ចំណែក Suze Orman ដែល​ជា​ម្ចាស់​សៀវភៅ​ «ស្ត្រី​ និង​ប្រាក់​កាស» បាន​ចែក​រំលែកថា «ការ​ពិត​នៃ​បញ្ហា​គឺ​ថា អ្នកគួរ​មាន​ខ្ទង់ប្រាក់​សម្រាប់​ដោះ​ស្រាយ​ហេតុ​ការណ៍​​បន្ទាន់​ដែល​អាច​ប្រើប្រាស់​បាន​មួយ​ឆ្នាំ​ ចាប់​ពី​ពេល​នេះ​» គឺជា​រឿង​ល្អ។

    ប្រការ​នេះ​ទំនង​ជា​ពិបាក​អនុវត្ត​។ យោង​តាម​ការ​ស្រាវជ្រាវ​មួយ​របស់ Bankrate កាលពី​ឆ្នាំ​ 2021 ពលរដ្ឋ​អាម៉េរិក ជាង​ពាក់​កណ្ដាល​ (51%) ឯណោះ​ ដែល​មាន​ខ្ទង់​ប្រាក់​សម្រាប់​ដោះស្រាយ​បញ្ហា​បន្ទាន់​តិច​ជាង​ខ្ទង់​ចំណាយ​ប្រចាំ​ថ្ងៃ​ រយៈ​ពេល​ 3 ខែ​។ ក្នុង​ចំណោម​ 51% នោះ មាន​ 25% ពុំ​មាន​ខ្ទង់​ប្រាក់​សម្រាប់​ដោះស្រាយ​បញ្ហា​បន្ទាន់​ទាល់​តែ​សោះ​។

    ដើម្បី​សន្សំ​ប្រាក់​ឱ្យ​បាន​គ្រប់គ្រាន់​ អ្នក​អាច​សន្សំ​ដោយ​ខ្លួន​ឯង និង​គោរព​តាម​គោលការ​ 50/20/30 ដែល​ក្នុង​នោះ អ្នក​ត្រូវ​ដាក់​ 20% នៃ​ប្រាក់​ចំណួល​ប្រចាំ​ខែសរុប​ ទៅ​ក្នុង​ខ្ទង់​សន្សំ​ និង​ខ្ទង់​វិនិយោគ, 50% សម្រាប់​ខ្ទង់​ចំណាយ​ប្រចាំ​ថ្ងៃ និង 30% សម្រាប់​ការ​ចំណាយ​តាម​កាលៈទេសៈ​។

    អ្នកស្រី Bernadette Joy

    ក៏ប៉ុន្តែ នៅ​ពេល​អ្នក​មាន​​ខ្ទង់​ប្រាក់​សម្រាប់​ដោះស្រាយ​បញ្ហា​បន្ទាន់​ដែល​អ្នក​បាន​គិត​ថា សម​ស្រប​ហើយ​នោះ អ្នក​មិន​ចាំបាច់​សន្សំ​សម្រាប់​ខ្ទង់​នេះ​ទៀត​ទេ​ ដោយ​​គ្រាន់​តែ​រក្សា​ទុក​ខ្ទង់​នេះ​ឱ្យ​បាន​គង់វង្ស​គឺ​ជា​ការ​ល្អ​។ បន្ទាប់​មក ចូរ​ផ្ដោត​ទៅ​លើ​ការ​វិនយោគ​ បើ​ទោះ​វា​បង្កប់​ទៅ​ដោយ​ហានិភ័យ​ ប៉ុន្តែ វា​ក៏​ផ្ដល់​ឱកាស​សម្រាប់អ្នក​ក្លាយ​ជា​អ្នក​មាន​៖ «ប្រាក់​សុទ្ធ​នឹង​មិន​នាំ​មក​នូវ​ផលប្រយោជន៍ បើ​សិន​វា​មិន​បាន​កើន​ឡើង​» នេះ​បើ​តាម​អ្នកស្រី Joy។

    ចាប់​ផ្ដើមវិនិយោគ​​កាន់​តែ​ឆាប់​ កាន់​តែ​ល្អ​

    ទីផ្សារ​អាច​មាន​ឡើង និង​អាច​មាន​ចុះ​ ដូច្នេះ​ ការ​វិនិយោគ​ដែល​មាន​ប្រសិទ្ធភាព​បំផុត​គឺ​ការ​វិនិយោគ​ក្នុង​រយៈ​ពេល​វែង​។ នេះ​គឺជា​មូលហេតុ​ដែល​អ្នក​ត្រូវ​ចាប់​ផ្ដើម​វិនិយោគ​ឱ្យ​បាន​ឆាប់​។

    Mark La Spisa អ្នក​ឯកទេស​ផ្នែក​ហិរញ្ញវត្ថុ​ដ៏ល្បីឈ្មោះ និង​ជា​ប្រធាន​ក្រុម​ហ៊ុន​ Vermillion Financial Advisors បាន​និយាយ​ថា បើ​សិន​មិនអាច​វិនិយោគ​ច្រើន នោះ​ក៏​មិន​មែនជា​បញ្ហា​៖ ចាប់​ផ្ដើម​កាន់តែ​ឆាប់​ កាន់​តែ​ល្អ​ សូម្បី​នៅ​ក្នុង​ខ្លួនមាន​តែ​ប៉ុន្មាន​ដុល្លារ​ ក៏​ប្រសើរ​ជាង​ការ​ដែល​មិន​បាន​វិនិយោគ​អ្វី​សោះ​ ឬ​រង់ចាំ​រហូត​ដល់​សន្សំ​បាន​ប្រាក់​ច្រើន​»។

    មូលហេតុ​ដែល​ថា​ កាន់​តែ​ឆាប់​វិនិយោគ​ កាន់​តែ​ល្អ​ គឺ​មក​ពី​​​​កម្លាំងនៃ​ការប្រាក់​ត្រួត​ ​ជាការ​​ប្រាក់​ដែល​អ្នក​រក​បាន​​ពី​ប្រាក់​របស់​ខ្លួន​ បូក​នឹង​ការ​ប្រាក់​ដែល​បាន​កើត​ជា​​កូន​ ពូន​ជា​​​ចៅ​៕

  • បី​ទម្លាប់​ជួយ​ឱ្យ​នាយករដ្ឋមន្ត្រី​អង់គ្លេស​មាន​រាងកាយ​មាំមួន​ក្នុង​វ័យ U50

    បី​ទម្លាប់​ជួយ​ឱ្យ​នាយករដ្ឋមន្ត្រី​អង់គ្លេស​មាន​រាងកាយ​មាំមួន​ក្នុង​វ័យ U50

    ដើម្បី​បាន​រាងកាយ​មាំមួន​ក្នុង​មជ្ឈិមវ័យ លោក Sunak ដែលជា​នាយករដ្ឋមន្ត្រី​អង់គ្លេស​ដើមកំណើត​ឥណ្ឌា តែង​បោះបង់​អាហារយូរៗម្ដង និង​បោះបង់​ទម្លាប់​ពិសា​ភេសជ្ជៈ​ផ្អែម។ល។

    កាលពី​ចុងខែ​ឧសភា នាយករដ្ឋមន្ត្រី​អង់គ្លេស លោក Rishi Sunak រួម​នឹង​អត្ត​ព​លិ​កជាង 100 នាក់​បាន​ចូលរួម​ព្រឹត្តិការណ៍​រត់ប្រណាំង​ដែល​ត្រូវបាន​ធ្វើឡើង​នៅ Northallerton ក្នុង​តំបន់ North Yorkshire។ ក្នុង​វ័យ 43 ឆ្នាំ លោក​រត់​បាន​ចម្ងាយ 10 គីឡូម៉ែត្រ ក្នុង​រយៈពេល 47 នាទី​និង 41 វិនាទី។ ក្នុង​វ័យ​កណ្ដាល​នេះ លោក Sunak នៅតែ​រក្សាបាន​រាង​កាយ​​មាំមួន និង​សុខ​ភាពល្អ ដោយសារតែ «ទម្លាប់​បីយ៉ាង» ខាងក្រោម។

    ទី​មួយ​៖ បោះបង់​ការ​ញៀន​នឹង​ភេសជ្ជៈ​កំប៉ុង

    កាលពី​ឆ្នាំ 2019 លោក Sunak ធ្លាប់បាន​សារភាពថា លោក​ជា​មនុ​ស្សញៀន​នឹង​ភេសជ្ជៈ​កំប៉ុង។ ទម្លាប់​នេះ​បានធ្វើឱ្យ​លោក​មាន​បញ្ហា​ធ្មេញ និង​ត្រូវដាក់​ការកំណត់​ពិសា​តែមួយ​កំប៉ុង/សប្ដាហ៍។ អ្នកវិទ្យាសាស្ត្រ​ថា ភេសជ្ជៈ​ផ្អែម​មួយ​កំប៉ុង​មាន​ផ្ទុក​ថាមពល​ប្រហែល 139 កាឡូរី រួម​នឹង​ស្ករ 35 ក្រាម។ ជាតិ​ស្ករ​នេះ​ស្មើនឹង​ស្ករ​ឆុង​កាហ្វេ​ចំនួន 22 កញ្ចប់​តូច។ ដូច្នេះ ការ​ពិសា​ភេសជ្ជៈ​ផ្អែម​ក្នុង​រយៈពេល​យូរ​នឹងធ្វើ​ឱ្យ​ឡើង​ទម្ងន់ ធាត់​ជ្រុល ឬ​អាច​លើស​ជាតិ​ស្ករ។ ការបោះបង់​ទម្លាប់​នេះ​នឹង​ជួយ​ឱ្យ​ជៀស​ផុតពី​ជំងឺ​ទឹកនោមផ្អែម លើស​សម្ពាធ​ឈាម ជំងឺ​បេះដូង ជំងឺ​ដាច់​សរសៃឈាម​ខួរក្បាល​ជាដើម។

    ទីពីរ៖ តម​អាហារ​បណ្ដោះអាសន្ន

    យោងតាម​ប្រភព​ជិតស្និទ្ធ នាយករដ្ឋមន្ត្រី Sunak តែងតែ​បោះបង់​អាហារ​មួយ ឬ​ពីរ​ពេល​ជា​រៀងរាល់​សប្ដាហ៍។ ប្រការនេះ​មាន​ប្រយោជន៍​ច្រើន​ដល់​សុខភាព ព្រោះ​ផ្ដល់​ពេលវេលា​គ្រប់គ្រាន់​សម្រាប់​រាងកាយ​រំលាយ​អាហារ និង​ស្រូបយក​ជីវជាតិ​ក្នុង​អាហារ និង​កាត់បន្ថយ​​ជាតិ​ស្ករ។

    ទី​បី៖ ហាត់ប្រាណ

    «ខ្ញុំ​ពិនិត្យមើល​ព័ត៌មាន ដំណឹង​ក្នុង​ទូរស័ព្ទ រួចហើយ​ខ្ញុំ​នឹង​រត់​លើ​ម៉ាស៊ីន ជិះ​កង់ ឬ​ចូលរួម​ថ្នាក់​លំហាត់ប្រាណ» លោក Sunak ធ្លាប់​ឱ្យដឹង​ដូច្នេះ។

    នាយករដ្ឋមន្ត្រី​អង់គ្លេស​ព្យាយាម​ហាត់ប្រាណ​ប្រើ​កម្លាំង​ខ្លាំង (HIIT) មួយដង និង​រត់​មួយដង​ក្នុង​មួយ​សប្ដាហ៍។ យោងតាម​អ្នកជំនាញ ការរត់​ជា​ញឹកញាប់​នឹង​ជួយ​ដល់​សុខភាព​បេះដូង និង​សរសៃឈាម ជួយ​ឱ្យ​សម្ពាធ​ឈាម និង​ខ្លាញ់​អាក្រក់​ស្ថិតក្នុង​បរិមាណ​ល្អ។ ទម្លាប់​នេះ​ក៏​ជួយ​កែលំអ​ប្រព័ន្ធ​ការពារ​រាងកាយ និង​បង្កើន​កម្លាំង​សាច់ដុំ​ផងដែរ៕