Tag: ប្រធានាធិបតី

ប្រធានាធិបតីប្រេស៊ីល ត្រូវចូលពេទ្យវះកាត់បន្ទាន់ ព្រោះតែត្អើកជាង 10 ថ្ងៃ
ប្រធានាធិបតីរបស់ ប្រេស៊ីល លោក Jair Bolsonaro ត្រូវចូលសម្រាកព្យាបាលនៅមន្ទីរពេទ្យ បន្ទាប់ពីមានអាការត្អើកជាបន្តបន្ទាប់រយៈពេល 10 ថ្ងៃ ហើយអាចត្រូវធ្វើការវះកាត់ជាបន្ទាន់។
សារព័ត៌មាន RT (រុស្ស៊ី) កាលពីថ្ងៃទី 14 កក្កដា បានចេញផ្សាយថា ការិយាល័យរបស់លោក Bolsonaro បានបញ្ជាក់ថា ប្រធានាធិបតីរូបនេះ ត្រូវបានបញ្ជូនទៅកាន់មន្ទីរពេទ្យមួយនៅ Brasilia ក្នុងថ្ងៃដដែលនោះ។ នៅទីនោះ លោកនឹងត្រូវបានតាមដានសុខភាពចាប់ពី 24 ដល់ 48 ម៉ោង។ ក្នុងប្រកាសថ្មី ការិយាល័យប្រធានាធិបតី ឱ្យដឹងថា លោក Bolsonaro ត្រូវបានបញ្ជូនទៅកាន់ Sao Paulo ដើម្បីវាយតម្លៃសម្រាប់ការវះកាត់បន្ទាន់។
សារព័ត៌មាននៃប្រទេសប្រេស៊ីល បានផ្សាយដែរថា លោក Bolsonaro មានអាការឈឺពោះ និងត្អើក នៅពេលបង្ហាញខ្លួននៅចំពោះមុខសាធារណជន។ ប្រធានាធិបតីរូបនេះ ធ្លាប់បាននិយាយថា អាការត្អើកនេះ គឺមកពីថ្នាំដែលលោកត្រូវលេប នៅក្នុងការវះកាត់ព្យាបាលធ្មេញ កាលពីមួយខែមុន។
លោក Bolsonaro ធ្លាប់បានចូលពេទ្យសង្គ្រោះបន្ទាន់ជាច្រើនលើក ដោយសារតែត្រូវគេចាក់នឹងកាំបិត ការឆ្លង COVID-19 និងត្រូវសត្វព្រៃវាយប្រហារ។
កាលពីឆ្នាំ 2018 ក្នុងពេលកំពុងធ្វើយុទ្ធនាការឃោសនារកសំឡេងឆ្នោត លោក Bolsonaro ត្រូវគេចាក់ចាំពោះ និងក្រោយមកក៏ត្រូវវះកាត់ជាច្រើនលើក។
លោក Bolsonaro ត្រូវគេរកឃើញថា វិជ្ជមាននឹង COVID-19 ជាច្រើនលើក កាលពីរដូវក្ដៅឆ្នាំមុន។ នៅពេលត្រូវធ្វើចត្តាឡីស័ក ប្រធានាធិបតីរូបនេះ ក៏ត្រូវសត្វអូទ្រិសធំមួយក្បាល ខាំផងដែរ។
ការចូលពេទ្យលើកនេះ ទំនងជាមានសភាពធ្ងន់ធ្ងរជាងមុន។ ក្រុមវេជ្ជបណ្ឌិត បានប្រាប់សារព័ត៌មាន ប្រេស៊ីល ថា អាការត្អើកជាបន្តបន្ទាប់របស់លោកប្រធានាធិបតី Bolsonaro អាចជារោគសញ្ញាធ្ងន់ធ្ងរជាងផលប៉ះពាល់ពីការវះកាត់ព្យាបាលធ្មេញ៕
ប្រភព៖ BBC
ប្រែសម្រួល៖ បុត្រា
July 15, 2021
អាមេរិក និង កូឡុំប៊ី បញ្ជូនក្រុមជំនួយទៅស៊ើបអង្កេត ករណីឃាតកម្មលើប្រធានាធិបតី ហៃទី
សហរដ្ឋអាមេរិក និងប្រទេស កូឡុំប៊ី បានបញ្ជូនមន្ត្រីអនុវត្តច្បាប់ រួមនឹងកម្លាំងពិសេសផ្នែកស៊ើបការណ៍សម្ងាត់ ទៅកាន់ប្រទេស ហៃទី ដើម្បីស៊ើបអង្កេតករណីឃាតកម្មលើប្រធានាធិបតី Moise បន្ទាប់ពីពលរដ្ឋរបស់ពួកគេ ត្រូវបានប៉ូលិស ហៃទី ចាប់ខ្លួន។
សហរដ្ឋអាមេរិក បានសន្យាថា នឹងបញ្ជូនក្រុមមន្ត្រីជាន់ខ្ពស់ នៃអង្គភាពស៊ើបអង្កេតសហព័ន្ធ (FBI) និងអង្គភាពសន្តិសុខផ្ទៃក្នុងជាតិ (DHS) ទៅកាន់ប្រទេស ហៃទី ឆាប់ៗនេះ ដើម្បីវាយតម្លៃស្ថានការណ៍ និងពិនិត្យមើលថា តើពួកគេអាចជួយប្រទេស ហៃទី ដោយរបៀបណា។ សេតវិមាន បានឱ្យដឹងដូច្នេះ កាលពីថ្ងៃទី 8 ខែកក្កដា ឆ្នាំ 2021។
ចំណែកប្រធានាធិបតី Ivan Duque នៃប្រទេស កូឡុំប៊ី ឱ្យដឹងថា មេដឹកនាំនៃអង្គភាពស៊ើបការណ៍សម្ងាត់របស់ប្រទេស កូឡុំប៊ី និងប្រធានផ្នែកស៊ើបការណ៍របស់ប៉ូលិសប្រទេសនេះ ក៏នឹងទៅកាន់ ហៃទី ក្នុងបំណងរួមចំណែកជាមួយប៉ូលិសអន្តរជាតិ (Interpol) ដើម្បីជួយដល់ ហៃទី សម្រាប់ការស៊ើបអង្កេតលើករណីធ្វើឃាតប្រធានាធិបតី Moise។
ក្រុមជនសង្ស័យទាក់ទិនករណីធ្វើឃាតប្រធានាធិបតី Moise ត្រូវបានចាប់ខ្លួនកាលពីថ្ងៃទី 9 កក្កដា
ឧត្តមសេនី Luis Fernando Navarro អគ្គមេបញ្ជាការកងទ័ព កូឡុំប៊ី និយាយថា ជនសង្ស័ងចំនួន 17 នាក់ ទាក់ទិននឹងករណីធ្វើឃាតប្រធានាធិបតី Moise គឺជាអតីតទាហានរបស់ប្រទេសនេះ ហើយពួកគេបានឈប់ធ្វើទាហានក្នុងឆ្នាំ 2018-2020។
អគ្គស្នងការប៉ូលិសជាតិ កូឡុំប៊ី Jorge Luis Vargas ឱ្យដឹងថា ជនសង្ស័យចំនួន 11 នាក់ បានទៅកាន់ទីក្រុង Punta Cana នៃប្រទេស ដូមីនិក (Dominica) ដែលគ្រប់គ្រងកោះ Hispaniola ជាមួយនឹង ហៃទី ហើយក៏បានឆ្លងដែនចូលទឹកដី ហៃទី។ ជនសង្ស័យ 2 នាក់ផ្សេងទៀត បានជិះយន្តហោះទៅកាន់ប្រទេស ប៉ាណាម៉ា និងបន្តដំណើរទៅកាន់រដ្ឋធានី Santo Domigo របស់ ដូមីនិក មុននឹងចូលដល់រដ្ឋធានី Port-au-Prince របស់ ហៃទី។
ប្រធានាធិបតីនៃប្រទេស ហៃទី លោក Jovenel Moise ដែលត្រូវបានក្រុមប្រដាប់អាវុធ បាញ់សម្លាប់
សូមរំលឹកថា ប្រធានាធិបតីរបស់ប្រទេស ហៃទី លោក Jovenel Moise ត្រូវបានក្រុមប្រដាប់អាវុធមួយក្រុម បាញ់សម្លាប់ កាលពីថ្ងៃទី 7 ខែកក្កដា នៅក្នុងភូមិគ្រឹះរបស់លោក។ ប៉ូលិស ហៃទី ឱ្យដឹងថា ក្រុមឃាតករមានគ្នាចំនួន 16 នាក់ ដែលជាទាហានស៊ីឈ្នួល ជនជាតិ កូឡុំប៊ី និង 2 នាក់ទៀតជាពលរដ្ឋអាមេរិក ដើមកំណើត ហៃទី ក្នុងនោះមានម្នាក់ឈ្មោះ James Solages អាយុ 35 ឆ្នាំ និងម្នាក់ទៀតឈ្មោះ Joseph Vincent អាយុ 55 ឆ្នាំ មកពីរដ្ឋ Florida សហរដ្ឋអាមេរិក៕
ប្រភព៖ Reuters
ប្រែសម្រួល៖ បុត្រា
July 10, 2021
ក្រុមប្រដាប់អាវុធដែលធ្វើឃាតប្រធានាធិបតី ហៃទី លាក់ខ្លួនក្នុង “ការិយាល័យតំណាងតៃវ៉ាន់”
ក្រុមមនុស្សចំនួន 11 នាក់ ដែលត្រូវគេសង្ស័យថាជា ឃាតករបាញ់សម្លាប់ប្រធានាធិបតីនៃប្រទេស ហៃទី លោក Jovenel Moise បានចូលលាក់ខ្លួនក្នុងការិយាល័យតំណាងកោះតៃវ៉ាន់ ប្រចាំរដ្ឋធានី Port-au-Prince ហើយក៏ត្រូវបានប៉ូលិសចាប់ខ្លួន។
Joanne Ou អ្នកនាំពាក្យក្រសួងការបរទេសតៃវ៉ាន់ ថ្ងៃនេះ បានឱ្យដឹងថា ការិយាល័យតំណាងរបស់កោះនេះប្រចាំនៅរដ្ឋធានីនៃប្រទេស ហៃទី បានបិទទ្វារ ដោយសារតែបញ្ហាអសន្តិសុខ ក្រោយប្រធានាធិបតី Moise ត្រូវគេធ្វើឃាត។
លោកស្រី Ou បានឱ្យដឹងថា បុគ្គលិកសន្តិសុខរបស់ការិយាល័យតំណាងតៃវ៉ាន់ បានឃើញជនប្រដាប់អាវុធមួយក្រុម សម្រុកចូលការិយាល័យនេះ។ បុគ្គលិកសន្តិសុខក៏បានរាយការណ៍ប្រាប់ប៉ូលីស ហៃទី។ ការិយាល័យតំណាងតៃវ៉ាន់ បានអនុញ្ញាតឱ្យប៉ូលិស ហៃទី ចូលទៅខាងក្នុង ដើម្បីចាប់ខ្លួនជនសង្ស័យទាំងនោះ ក្រោយមានការស្នើពីរដ្ឋាភិបាល ហៃទី។
ក្នុងសេចក្ដីប្រកាសមួយដែលបង្ហោះនៅលើគេហទំព័រ ការិយាល័យតំណាង តៃវ៉ាន់ ប្រចាំទីក្រុង Port-au-Prince សរសេរថា ក្រុមខ្មាន់កាំភ្លើងនេះគឺជា «ទាហានស៊ីឈ្នួល» និងជាក្រុមជនសង្ស័យដែលទាក់ទិននឹងអំពើឃាតកម្មលើប្រធានាធិបតី Moise។
អតីតប្រធានាធិបតី ហៃទី លោក Jovenel Moise
ប្រកាសរបស់ការិយាល័យតំណាង តៃវ៉ាន់ ឱ្យដឹងថា «ប៉ូលិសបានចាប់ផ្ដើមធ្វើការនៅម៉ោងប្រហែល 16 នៃថ្ងៃទី 8 ខែកក្កដា និងបានចាប់ខ្លួនជនសង្ស័យចំនួន 11នាក់។ ការចូលចាប់ខ្លួននេះ ដំណើរការដោយរលូន»។ ការិយាល័យនេះ អធិប្បាយថា ករណីឃាតកម្មលើប្រធានាធិបតី Moise គឺពិតជា «ឃោរឃៅ និងគួរឱ្យភ័យខ្លាច»។
ហៃទី គឺជាប្រទេសមួយ ក្នុងចំណោម 15 ប្រទេស ដែលនៅរក្សាទំនាក់ទំនងការទូតផ្លូវការជាមួយកោះតៃវ៉ាន់។ ការិយាល័យតំណាងរបស់ តៃវ៉ាន់ ស្ថិតនៅក្បែរភូមិគ្រឹះលើជម្រាលភ្នំ របស់ប្រធានាធិបតី ហៃទី ជាទីដែលលោក Moise ត្រូវគេធ្វើឃាត។
ប៉ូលិស ហៃទី ឱ្យដឹងថា ជនជាតិ កូឡុំប៊ី ចំនួន 26 នាក់ រួមនឹងជនជាតិអាមេរិកដើមកំណើត ហៃទី ចំនួន 2 នាក់ គឺជាអ្នកនៅពីក្រោយករណីឃាតកម្មលើប្រធានាធិបតី Moise។ «យើងបានចាប់ខ្លួនជនជាតិ កូឡុំប៊ី ចំនួន 15 នាក់ និងជនជាតិអាមេរិក ដើមកំណើត ហៃទី ចំនួន 2 នាក់។ ជនជាតិ កូឡុំប៊ី ចំនួន 3 នាក់ ត្រូវបានសម្លាប់ ខណៈ 8 នាក់ផ្សេងទៀត កំពុងរត់គេចខ្លួន» នេះបើតាមអគ្គស្នងការប៉ូលិសជាតិ ហៃទី លោក Leon Charles។
ក្រសួងការបរទេសរបស់ សហរដ្ឋអាមេរិក បានឱ្យដឹងថា បច្ចុប្បន្ន មិនទាន់អាចបញ្ជាក់បានអំពីករណីពលរដ្ឋអាមេរិកណាខ្លះ ត្រូវបានចាប់ខ្លួន ឬយ៉ាងណានៅឡើយ៕
ប្រភព៖ AFP
ប្រែសម្រួល៖ បុត្រា
July 9, 2021
ប្រធានាធិបតី ហៃទី ត្រូវរងគ្រាប់កាំភ្លើងជាង 10 គ្រាប់! អង្គរក្សរបស់ប្រធានាធិបតី នឹងត្រូវបានសួរចម្លើយឆាប់ៗនេះ
សាកសពរបស់ប្រធានាធិបតី Jovenel Moise មានស្នាមគ្រាប់កាំភ្លើងចំនួន 12 គ្រាប់ នៅត្រង់កន្លែងគ្រោះថ្នាក់ដល់ជីវិត ខណៈបន្ទប់ធ្វើការ និងបន្ទប់គេង សុទ្ធតែត្រូវឆែកឆេរ។
«យើងបានរកឃើញស្នាមគ្រាប់កាំភ្លើងចំនួន 12 កន្លែង នៅលើរាងកាយរបស់ប្រធានាធិបតី» Carl Henry Destin អនុប្រធានតុលាការ នៅ Pétion-Ville ជាយក្រុង Port-au-Prince បានប្រាប់កាសែត ហៃទី Le Nouvelliste ដូច្នេះ។ លោក Carl Henry Destin និយាយថា គ្រាប់កាំភ្លើងទាំងនេះ ត្រូវបានបាញ់ចេញពីអាវុធធុនធ្ងន់»។
«បន្ទប់ធ្វើការ និងបន្ទប់គេងរបស់ប្រធានាធិបតី ត្រូវបានគេឆែកឆេរគ្រប់កន្លែង។ យើងឃើញថា គាត់ស្លាប់ក្នុងឥរិយាបថដេកផ្ងារ ស្លៀកខោពណ៌ខៀវ អាវសាមិពណ៌សធ្លុះធ្លាយដោយគ្រាប់កាំភ្លើង និងមាត់ហាធំ» លោក Destin និយាយបន្ថែម។ គ្រាប់កាំភ្លើងមួយគ្រាប់បាញ់ចំថ្ងាស ពីរគ្រាប់ត្រង់ទ្រូងទាំងសងខាង បីគ្រាប់ត្រង់ត្រគាក និងមួយគ្រាប់ត្រង់ពោះ»។
សម្បកគ្រាប់កាំភ្លើងដែលប៉ូលិស ហៃទី បានរកឃើញ
ប្រធានាធិបតី Moise មានក្រុមអង្គរក្សដោយឡែក រួមមានសមាជិកមកពីអង្គភាពជំនាញរបស់ប៉ូលិស ហៃទី ប៉ុន្តែ ក្នុងករណីឃាតកម្មកាលពីថ្ងៃទី 7 ខែកក្កដា មានតែប្រធានាធិបតី និងភរិយារបស់លោក គឺ លោកស្រី Martine Moise ប៉ុណ្ណោះ ដែលត្រូវបានបាញ់ប្រហារ។
ដូចទៅនឹងគ្រាប់កាំភ្លើងដែលបៀមជាប់នៅក្នុងសាកសពប្រធានាធិបតី «សម្បកគ្រាប់កាំភ្លើងធុន 5.56 និង 7.62មម ជាច្រើនគ្រាប់ ត្រូវបានរកឃើញនៅកណ្ដាលខ្លោងទ្វារ និងនៅក្នុងភូមិគ្រឹះ» លោក Destin បញ្ជាក់។
អគ្គស្នងការប៉ូលិស ហៃទី លោក Leon Charles បានប្រកាសថា៖ «យើងកំពុងតាមចាប់ខ្លួនពួកវា (ក្រុមឃាតករ) ហើយយើងនឹងនៅតែបន្តតាមរក»។
ក្រុមអង្គរក្សរបស់ប្រធានាធិបតី នឹងត្រូវនាំខ្លួនទៅសួរចម្លើយ ឆាប់ៗនេះ
Bed-Ford Claude ប្រធានការិយាល័យរដ្ឋអាជ្ញានៃតុលាការរដ្ឋធានី Port-au-Prince បានឱ្យដឹងកាលពីថ្ងៃទី 8 កក្កដា ថា៖ «ខ្ញុំបានផ្ដល់សិទ្ធិដល់ប៉ូលិស ដើម្បីសួរចម្លើយរាល់បុគ្គលិកសន្តិសុខដែលជិតស្និទ្ធនឹងប្រធានាធិបតី Jovenel Moise»។
លោក Bed-Ford Claude ចោទសួរថា៖ «បើសិនអ្នកទទួលខុសត្រូវក្នុងការការពារសន្តិសុខជូនប្រធានាធិបតី តើអ្នកនៅទីណា? អ្នកបានធ្វើអ្វីខ្លះ ដើម្បីជួយឱ្យប្រធានាធិបតីរួចផុតពីការស្លាប់នេះ?»៕
ប្រភព៖ NY Post, AFP
ប្រែសម្រួល៖ បុត្រា
July 9, 2021
សកម្មភាពក្រុមប្រដាប់អាវុធ ឆ្មក់ចូលធ្វើឃាតប្រធានាធិបតី ហៃទី នៅកណ្ដាលរាត្រី
ស្នូរគ្រាប់កាំភ្លើងដំបូង បានលាន់ឡើងនៅវេលាម៉ោងប្រហែល 1 ទៀបភ្លឺ នៃថ្ងៃទី 7 កក្កដា បានធ្វើឱ្យភាពស្ងប់ស្ងាត់ក្នុងរាត្រីនៅក្នុងតំបន់ដែលមានភូមិគ្រឹះរបស់ប្រធានាធិបតី ហៃទី លោក Jovenel Moise។
នៅពេលឮសំឡេងផ្ទុះនៅពេលកំពុងគេង ប្រជាជនដែលរស់នៅក្បែរនោះ សុទ្ធតែគិតថាជាព្រឹត្តិការណ៍គួរឱ្យភ័យខ្លាច ដែលពួកគេជួបជាញឹកញាប់ នោះគឺ អំពើហិង្សារវាងក្រុមសង្គមងងឹត និងគ្រោះរញ្ជួយដី។ ប៉ុន្តែ នៅពេលថ្ងៃរះ ទើបការពិតត្រូវបានលាតត្រដាង ៖ «ប្រធានាធិបតី ត្រូវបានគេធ្វើឃាត»។
«ជនបរទេស» មួយក្រុម ដែលនិយាយភាសាអង់គ្លេស និងភាសាអេស្ប៉ាញ បានសម្រុកចូលផ្ទះរបស់ប្រធានាធិបតី Moise នៅតំបន់ Pelerin 5 នៃរដ្ឋធានី Port-au-Prince វេលាម៉ោង 1 ទៀបភ្លឺ។ នេះបើតាមប្រកាសរបស់ការិយាល័យនាយករដ្ឋមន្ត្រី ហៃទី Claude Joseph។
វីដេអូដែលត្រូវបានថតដោយសាក្សីម្នាក់ បានបង្ហាញថា ក្បួនរថយន្ត SUV ដែលដឹកក្រុមប្រដាប់អាវុធ បានបរយ៉ាងលឿនចូលទៅចតខាងមុខខ្លោងទ្វារនៃភូមិគ្រឹះប្រធានាធិបតី។ មនុស្សម្នាក់ដែលមានសំឡេងដូចជនជាតិអាមេរិក ក្នុងក្រុមប្រដាប់អាវុធ បាននិយាយតាមឧបករណ៍បំពងសំឡេងថា៖ «នេះជាយុទ្ធនាការរបស់កងកម្លាំងប្រឆាំងគ្រឿងញៀនសហរដ្ឋអាមេរិក (DEA)។ គ្រប់គ្នាថយក្រោយ ចាកចេញពីទីតាំង»។
ក្រុមប្រដាប់អាវុធនោះ បន្ទាប់មកក៏បានសម្រុកចូលភូមិគ្រឹះរបស់ប្រធានាធិបតី Moise។ ក្រោយមកទៀតក៏ស្រាប់តែឮសំឡេងគ្រាប់កាំភ្លើង។
ប្រធានាធិបតីវ័យ 53 ឆ្នាំ ត្រូវបានបាញ់សម្លាប់នៅនឹងកន្លែង ក្នុងគ្រាដែលភរិយារបស់លោក គឺលោកស្រី Martine វ័យ 47 ឆ្នាំ រងរបួសធ្ងន់។ លោកស្រី Martine ត្រូវបានបញ្ជូនទៅកាន់ Miami សហរដ្ឋអាមេរិក ដើម្បីព្យាបាល។ នាយករដ្ឋមន្ត្រី Joseph បានហៅករណីឃាតកម្មនេះថាជា «សកម្មភាពគួរឱ្យស្អប់ខ្ពើម អមនុស្សធម៌ និងគួរឱ្យខ្លាច»។
អនុរដ្ឋមន្ត្រីសារព័ត៌មាន Frantz Exantus បានប្រកាសថា ក្រុមឃាតករដែលបានបាញ់សម្លាប់ប្រធានាធិបតី ត្រូវបានចាប់ខ្លួនរួចហើយ។ ឯកអគ្គរដ្ឋទូត ហៃទី ប្រចាំ សហរដ្ឋអាមេរិក Bocchit Edmond បានឱ្យដឹងថា ឃាតករទាំងនេះ គឺជា ទាហានស៊ីឈ្នួល ដែលបន្លំខ្លួនជាកងកម្លាំងពិសេសរបស់អាមេរិក (DEA)។ អង្គភាពប្រឆាំងគ្រឿងញៀនរបស់ សហរដ្ឋអាមេរិក មានការិយាល័យមួយនៅរដ្ឋធានីរបស់ ហៃទី ដើម្បីជួយគាំទ្រដល់រដ្ឋាភិបាលប្រទេសនេះ ក្នុងការប្រយុទ្ធប្រឆាំងនឹងគ្រឿងញៀន។
ផ្លូវចូលភូមិគ្រឹះរបស់ប្រធានាធិបតី
អគ្គស្នងការនគរបាលជាតិ ហៃទី លោក Leon Charles បានប្រកាសថា ទាហានស៊ីឈ្នួលចំនួន 4 នាក់ ដែលបានធ្វើឃាតប្រធានាធិបតី Moise ត្រូវបានសម្លាប់ និង 2 នាក់ទៀត ត្រូវបានចាប់ខ្លួន ខណៈជនសង្ស័យមួយចំនួនផ្សេងទៀត កំពុងត្រូវបានតាមប្រមាញ់។ ក៏ប៉ុន្តែ សមត្ថកិច្ច មិនទាន់បង្ហើបឱ្យដឹងអំពីអត្តសញ្ញាណរបស់ជនសង្ស័យ ក៏ដូចជាមិនទាន់បង្ហាញភ័ស្ដុតាង បញ្ជាក់អំពីទំនាក់ទំនងរវាងក្រុមជនសង្ស័យ ជាមួយនឹងករណីឃាតកម្មនេះ។
មកដល់បច្ចុប្បន្ន គេមិនទាន់ដឹងច្បាស់ថា ក្រុមប្រដាប់អាវុធ បានប្រើប្រាស់មធ្យោបាយអ្វី ដើម្បីឆ្លងផុតកងកម្លាំងការពារខាងក្រៅរបស់ភូមិគ្រឹះប្រធានាធិបតីនៅឡើយ។
លោក Moise ធ្លាប់បានប្រាប់កាសែត អេស្ប៉ាញ ថា «មានមនុស្សរាប់លាននាក់» ចង់សម្លាប់លោក «ព្រោះតែគោលនយោបាយរបស់លោក ឬកំណែទម្រង់ដែលលោកកំពុងអនុវត្ត» នេះបើតាមអគ្គរដ្ឋទូត Edmond៕
ប្រភព៖ Mirror, NYTimes, Washington Post
ប្រែសម្រួល៖ បុត្រា
July 8, 2021
ប្រធានាធិបតី Donald Trump ផ្ញើសារលាសេតវិមាន
នៅក្នុងសារលាសេតវិមាន លោក Trump បានអំពាវនាវឱ្យពលរដ្ឋអាមេរិកាំង «ចាកចេញផុតពីការចងគំនុំរវាងបក្សនឹងបក្ស» រួមនឹងការកោតសរសើរចំពោះសមិទ្ធផលក្រោមការដឹកនាំរបស់លោក ក៏ដូចជាជូនពរដល់រដ្ឋាភិបាលថ្មីជួបសំណាងល្អ។
«បានបម្រើការងារក្នុងនាមជាប្រធានាធិបតីរបស់គ្រប់គ្នាគឺជាកិត្តិយសដែលមិនអាចអធិប្បាយបាន។ សូមអរគុណគ្រប់គ្នាចំពោះឧបការគុណដ៏ពិសេសនេះ» ប្រធានាធិបតី Donald Trump បានថ្លែងនៅក្នុងវីដេអូមួយមានថេរវេលាជិត 20 នាទី ដែលត្រូវបានសេតវិមានចេញផ្សាយកាលពីថ្ងៃទី 19 មករា។
លោក Trump ក៏មិនភ្លេចកោតសរសើរចំពោះកិច្ចខិតខំក្នុងការកាត់បន្ថយពន្ធ កិច្ចព្រមព្រៀងពាណិជ្ជកម្ម និងគោលនយោបាយសេដ្ឋកិច្ចក្រៅប្រទេសរបស់រដ្ឋាភិបាលលោក ជាមួយនឹងការលើកកម្ពស់សេដ្ឋកិច្ចក្នុងស្រុក ស្ថានភាពទីផ្សារមូលបត្រ និងការដែលវ៉ាក់សាំង Covid-19 ត្រូវបានអភិវឌ្ឍយ៉ាងឆាប់រហ័ស។
«ពួកគេបានហៅប្រការនេះថាជាមន្តអាគមផ្នែកវេជ្ជសាស្ត្រ។ រដ្ឋាភិបាលដទៃនឹងត្រូវចំណាយពេល 3 ឆ្នាំ, 4 ឆ្នាំ, 5 ឆ្នាំ ឬ 10 ឆ្នាំ ដើម្បីអភិវឌ្ឍវ៉ាក់សាំងមួយប្រភេទ ប៉ុន្តែយើងបានធ្វើវាក្នុងរយៈពេលត្រឹមតែ 9 ខែប៉ុណ្ណោះ» លោក Trump បានឱ្យដឹងដូច្នេះ និងថែមទាំងបានវាយតម្លៃខ្ពស់ទៅលើការប្រឹងប្រែងរបស់រដ្ឋាភិបាលក្នុងការស្ដារសេដ្ឋកិច្ចនៅក្នុងវិបត្តិសុខភាព និងធានាសន្តិសុខនៅតាមបន្ទាត់ព្រំដែនភាគខាងត្បូងផងដែរ។
លោក Trump បន្តថា៖ «នៅពេលខ្ញុំត្រៀមប្រគល់អំណាចជូនដល់រដ្ឋាភិបាលថ្មីនៅថ្ងៃត្រង់ ទី 20 មករា ខ្ញុំចង់ប្រាប់គ្រប់គ្នាថា ចលនារបស់យើងទើបតែបានចាប់ផ្ដើមដំណើរការប៉ុណ្ណោះ»។
«ខ្ញុំមានមោទកភាពជាខ្លាំងដោយសារជាប្រធានាធិបតីដំបូងក្នុងអំឡុងជាច្រើនទសវត្សរ៍ដែលមិនបានបញ្ឆេះសង្គ្រាមណាមួយ។ យើងបានបញ្ជាក់ជាថ្មីថា នៅសហរដ្ឋអាមេរិក រដ្ឋាភិបាលបានឆ្លើយតបនឹងការចង់បានរបស់ពលរដ្ឋ» លោក Trump បន្ថែម។
ប្រធានាធិបតី Trump ឱ្យដឹងថា៖ «សប្ដាហ៍នេះ រដ្ឋាភិបាលថ្មីមួយនឹងចូលកាន់អំណាច ហើយយើងបួងសួងឱ្យពួកគេទទួលបានជោគជ័យក្នុងការរក្សាទឹកដីអាមេរិកឱ្យនៅមានសុវត្ថិភាព និងរីកចម្រើន។ យើងសូមផ្ញើពាក្យជូនពរបវរប្រសើរបំផុត និងប្រាថ្នាឱ្យពួកគេជួបសំណាងល្អ ដែលជាប្រការមួយដ៏មានសារសំខាន់»។
លោក Trump កន្លងមកបានប្រកាសថា នឹងមិនចូលរួមពិធីស្បថចូលកាន់តំណែងរបស់លោក Biden នៅថ្ងៃទី 20 មករានេះ។ លោក Trump មានគម្រោងចូលរួមពិធីលាគ្នាជាមួយនឹងកងកម្លាំងប្រដាប់អាវុធនៅមូលដ្ឋានទ័ពអាកាស Andrews នាព្រឹកថ្ងៃទី 20 មករា មុនពេលឡើងយន្តហោះត្រលប់ទៅកាន់ Florida ក្នុងគ្រាប្រធានាធិបតីជាប់ឆ្នោត Joe Biden ស្បថចូលកាន់តំណែង។
នៅក្នុងព្រឹត្តិការណ៍ចុងក្រោយនៃអាណត្តិរបស់លោក Trump លោកស្រី Melania Trump ក៏បានថ្លែងសារលាសេតវិមានផងដែរ។
ពិធីស្បថចូលកាន់តំណែងរបស់លោក Biden នឹងមានការចូលរួមពីក្រុមមន្ត្រីក្នុងចំនួនតិចបំផុត រាប់ចាប់ពីឆ្នាំ 1945 ពោលគឺប្រមាណជា 1,000 នាក់ប៉ុណ្ណោះ។ ប្រការនេះគឺដោយសារអាជ្ញាធរកាត់បន្ថយទំហំនៃព្រឹត្តិការណ៍ ដោយសារឥទ្ធិពលរបស់ Covid-19។
ប្រភព៖ Fox News, Reuters
January 20, 2021
ចាក់ភ្នាល់ជាង1លានដុល្លារអាមេរិកទៅលើការជាប់ឆ្នោតរបស់បេក្ខភាព Joe Biden
មនុស្សម្នាក់ដែលមិនទាន់ត្រូវបានគេបង្ហើបឱ្យដឹងអំពីអត្តសញ្ញាណ បានចាក់ភ្នាល់ប្រាក់យ៉ាងច្រើនសន្ធឹកកាលពីថ្ងៃទី29តុលា នៅលើគេហទំព័រចាក់ភ្នាល់ធំជាងគេបង្អស់ក្នុងពិភពលោក ដែលមានឈ្មោះថា Betfair Exchage។
សារព័ត៌មាន CNN បានចេញផ្សាយថា នៅលើទំព័រ Betfair Exchange មានមនុស្សម្នាក់បានចាក់ភ្នាល់1លានផោន (1.29លានដុល្លារអាមេរិក) ទៅលើបេក្ខភាពមកពីបក្សប្រជាធិបតី Joe Biden ក្លាយជាប្រធានាធិបតីអាមេរិក។ ការចាក់ភ្នាល់នេះត្រូវបានធ្វើឡើងកាលពីថ្ងៃទី29តុលា ប៉ុន្តែអត្តសញ្ញាណរបស់មនុស្សនេះនៅតែត្រូវបានគេរក្សាការសម្ងាត់។ បើសិនជាឈ្នះ អ្នកភ្នាល់រូបនេះនឹងទទួលបានប្រាក់ចំណេញ 540,000ផោន (697,626ដុល្លារអាមេរិក) ទន្ទឺមនឹងការទទួលបានសំណងជាប្រាក់ដើមរបស់ខ្លួនត្រលប់មកវិញ។
ក្រុមអ្នកលេងល្បែងភ្នាល់យល់ថា លោក Biden មានឱកាស65%ដើម្បីឈ្នះ ខណៈលោក Trump មានត្រឹមតែ35%។ ជាងនេះ សារព័ត៌មាន FiveThirtyEight ថែមទាំងយល់ថា លោក Trump មានឱកាសឈ្នះត្រឹមតែ10%ប៉ុណ្ណោះ។
ជនជាតិអាមេរិកាំងមិនត្រូវបានអនុញ្ញាតឱ្យលេងល្បែងភ្នាល់ជាមួយនឹងការបោះឆ្នោតប្រធានាធិបតីនោះទេ។ ប៉ុន្តែ នៅប្រទេសអង់គ្លេសវិញ ការបោះឆ្នោតប្រធានាធិបតីអាមេរិក កំពុងតែក្លាយជាព្រឹត្តិការណ៍ចាក់ភ្នាល់ធំជាងគេមិនធ្លាប់មានពីមុនមក។
នេះគឺជាទឹកប្រាក់ភ្នាល់ធំជាងគេទីបីក្នុងប្រវត្តិរបស់ Betfair ហើយវាស្ថិតនៅពីក្រោយការភ្នាល់1.1លានផោនសម្រាប់ Rafael Nadal នៅក្នុងការប្រកួតដណ្ដើមពានរង្វាន់វាយកូនបាល់ tennis ឆ្នាំ2010 និងជាង1លានផោនសម្រាប់ការប្រកួតប្រដាល់រវាង Floyd Mayweather Jr. និង Connor McGregor កាលពីឆ្នាំ2017។
ប្រាក់ភ្នាល់កំពុងតែរត់ទៅរក Betfair ក្នុងល្បឿនលឿនបំផុតមិនធ្លាប់មានកន្លងមក។ គិតត្រឹមថ្ងៃចន្ទទី2តុលា ប្រាក់ភ្នាល់បានកើនឡើងដល់274លានផោន (ប្រមាណជា 351,396,000ដុល្លារអាមេរិក)។ ខ្ទង់ប្រាក់ភ្នាល់នីមួយៗតែងត្រូវការពេលច្រើនថ្ងៃទើបត្រូវបានគេកត់ត្រា ដូច្នេះ ខ្ទង់ប្រាក់ភ្នាល់ទៅលើការបោះឆ្នោតប្រធានាធីបតីអាមេរិក អាចមានច្រើនជាងពេលនេះ។ Betfair ប៉ាន់ប្រមាណឃើញថា ខ្ទង់ប្រាក់ភ្នាល់នេះអាចឡើងដល់400លានដុល្លារអាមេរិក ពោលគឺខ្ពស់ជាងទ្វេដងបើធៀបនឹងការភ្នាល់លើការបោះឆ្នោតប្រធានាធិបតីអាមេរិកកាលពីឆ្នាំ2016។
ខ្ទង់ប្រាក់ភ្នាល់ដែលធំជាងគេក្នុងវិស័យនយោបាយនៅលើ Betfair Exchange កន្លងមក គឺមានត្រឹម 555,000ផោន សម្រាប់លោក Trump កាលពីឆ្នាំ2016។ មួយខែមុនការបោះឆ្នោតឆ្នាំនោះ ក៏មានមនុស្សម្នាក់បានភ្នាល់550,000ផោនផងដែរសម្រាប់បេក្ខភាព Hillary Clonton៕
ប្រភព៖ CNN
November 3, 2020
ពលរដ្ឋអាមេរិកាំងនៅមូលដ្ឋាន មិនមែនជាអ្នកបោះឆ្នោតជ្រើសរើសប្រធានាធិបតីដោយផ្ទាល់នោះឡើយ
ពលរដ្ឋអាមេរិកាំង មិនបោះឆ្នោតជ្រើសរើសប្រធានាធិបតីដោយផ្ទាល់នោះទេ ប៉ុន្តែ ប្រតិភូតំណាងម្ចាស់ឆ្នោតឯណោះទេដែលមានតួនាទីបោះឆ្នោតជ្រើសរើសប្រធានាធិបតីដោយផ្ទាល់ ដោយយោងទៅលើលទ្ធផលនៃការបោះឆ្នោតនៅមូលដ្ឋានរបស់បណ្ដារដ្ឋ។
ពលរដ្ឋអាមេរិកាំងគ្រប់រូបដែលមានអាយុចាប់ពី18ឆ្នាំឡើងទៅ មានសិទ្ធិទៅបោះឆ្នោតជ្រើសរើសប្រធានាធិបតី ដែលនេះត្រូវបានគេហៅថា “សំឡេងឆ្នោតប្រជាប្រិយ (popular vote)។ ក៏ប៉ុន្តែ តាមច្បាប់ ប្រតិភូដែលជាតំណាងរបស់ម្ចាស់ឆ្នោតប្រជាប្រិយ (electoral vote/electoral college) ឯណោះទេ ទើបជាអ្នកបោះឆ្នោតជ្រើសរើសប្រធានាធិបតីដោយផ្ទាល់។
បេក្ខភាពនីមួយៗត្រូវការសំឡេងឆ្នោតពីប្រតិភូតំណាងម្ចាស់ឆ្នោតចំនួន270សំឡេង ទើបក្លាយជាប្រធានាធិបតី។ ក្រុមមេដឹកនាំប្រទេស បានបង្កើតប្រតិភូតំណាងម្ចាស់ឆ្នោតនេះឡើង ក៏ព្រោះតែពួកគេមានការព្រួយបារម្ភ ខ្លាចបណ្ដារដ្ឋដែលមានប្រជាជនតិចជាង អាចមិនមានអ្នកតំណាងប្រកបដោយយុត្តិធម៌។ ម្យ៉ាងទៀត ពួកគេក៏យល់ថា “មនុស្សធម្មតា” ទទួលព័ត៌មានមិនគ្រប់ជ្រុងជ្រោយដើម្បីធ្វើការសម្រេចចិត្តបោះឆ្នោតជ្រើសរើសប្រធានាធិបតីដែលស័ក្ដិសម។ ដូច្នេះ ពួកគេក៏បង្កើតប្រតិភូតំណាងម្ចាស់ឆ្នោតនេះឡើង ដែលបច្ចុប្បន្នមានចំនួន538រូប ដោយរួមទាំងតំណាងរាស្ត្រមកពីសភាជាន់ខ្ពស់ និងជាន់ទាបរបស់រដ្ឋចំនួន50នៃសហរដ្ឋអាមេរិកផងដែរ។ ដោយឡែក រដ្ឋធានីវ៉ាស៊ីងតោន មានប្រតិភូតំណាងម្ចាស់ឆ្នោតចំនួន3រូប។
ដើម្បីទទួលបានតំណែងប្រធានាធិបតី បេក្ខភាពត្រូវតែទទួលបានសន្លឹកឆ្នោតគាំទ្រយ៉ាងតិច270សំឡេងពីប្រតិភូតំណាងម្ចាស់ឆ្នោត។ ដើម្បីទទួលបានសំឡេងឆ្នោតពីប្រតិភូតំណាង ជាទូទៅ បេក្ខភាពត្រូវតែទទួលបានសន្លឹកឆ្នោតគាំទ្រច្រើនជាងគេពីពលរដ្ឋមូលដ្ឋាននៅក្នុងរដ្ឋនីមួយៗ។
បើសិនជាទទួលបានសំឡេងឆ្នោតគាំទ្រគ្រប់គ្រាន់ពីពលរដ្ឋនៅ California បេក្ខភាពនឹងទទួលបានសន្លឹកឆ្នោតគាំទ្រ55សំឡេងពីប្រតិភូតំណាងម្ចាស់ឆ្នោតរបស់រដ្ឋនេះ។ បើសិនជាទទួលបានសំឡេងឆ្នោតគាំទ្រគ្រប់គ្រាន់ពីពលរដ្ឋនៅ Texas បេក្ខភាពនឹងទទួលបានសន្លឹកឆ្នោតគាំទ្រ35សំឡេងពីប្រតិភូតំណាងម្ចាស់ឆ្នោតរបស់រដ្ឋនេះ។ នេះគឺជាប្រព័ន្ធ “អ្នកឈ្នះទទួលបានគ្រប់យ៉ាង”។
ក៏ប៉ុន្តែ ជួនកាល បេក្ខភាពដែលទទួលបានសំឡេងឆ្នោតគាំទ្រពីពលរដ្ឋច្រើនជាងគេនៅទូទាំងប្រទេស (popular vote) ប៉ុន្តែ មិនទទួលបានសំឡេងឆ្នោតគាំទ្រគ្រប់គ្រាន់ពីប្រតិភូតំណាងម្ចាស់ឆ្នោតផងដែរ។ ករណីនេះបានកើតឡើងកាលពីឆ្នាំ2016 នៅពេលបេក្ខភាពមកពីបក្សប្រជាធិបតេយ្យ លោកស្រី Hillary Clinton ទទួលបានសំឡេងឆ្នោតគាំទ្រពីពលរដ្ឋ (popular vote) ច្រើនជាងគេ ប៉ុន្តែ បេក្ខភាពមកពីបក្សសាធារណរដ្ឋ លោក Donald Trump មានប្រៀបជាងនៅក្នុងបណ្ដារដ្ឋដែលមានប្រជាជនតិចជាង ហើយក៏មានប្រៀបជាងនៅក្នុងការបោះឆ្នោតរបស់ប្រតិភូតំណាងម្ចាស់ឆ្នោត ដោយសារតែប្រព័ន្ធ “អ្នកឈ្នះទទួលបានគ្រប់យ៉ាង” នេះ។
លទ្ធផលនៃការបោះឆ្នោតប្រជាប្រិយ (popular vote) និងការបោះឆ្នោតពីប្រតិភូតំណាងម្ចាស់ឆ្នោត មានលទ្ធផលខុសគ្នាតែ5ដងប៉ុណ្ណោះ នៅក្នុងប្រវត្តិសាស្ត្រសហរដ្ឋអាមេរិក៕
ប្រភព៖ Next
November 3, 2020
Joe Biden នាំមុខ Donald Trump នៅក្នុងថ្ងៃចុងក្រោយនៃយុទ្ធនាការរកសំឡេងឆ្នោត
លោក Joe Biden បន្តនាំមុខគេនៅក្នុងការស្ទង់មតិនានានៅទូទាំងប្រទេស រួមទាំងបណ្ដាតំបន់សំខាន់ៗនៅសហរដ្ឋអាមេរិកផងដែរ ប៉ុន្តែលោក Donald Trump វិញ ក៏បានអះអាងថា លោកនឹងជាប់ឆ្នោតម្ដងទៀត។
លទ្ធផលមធ្យមភាគនៃការស្ទង់មតិនានានៅទូទាំងសហរដ្ឋអាមេរិកដែលត្រូវបានចុះផ្សាយដោយ RealClearPolitics (RCP) ក្នុងថ្ងៃចុងក្រោយនៃយុទ្ធនាការរកសំឡេងឆ្នោត បានបង្ហាញថា បេក្ខភាពមកពីបក្សប្រជាធិបតេយ្យ លោក Joe Biden កំពុងទទួលបានការគាំទ្រដល់ទៅ50.7% ខ្ពស់ជាង6.8% បើធៀបនឹងតួលេខគាំទ្រត្រឹម43.9% របស់ប្រធានាធិបតីអាមេរិក លោក Donald Trump។ RCP ដែលត្រូវបានបង្កើតឡើងកាលពីឆ្នាំ2000 គឺជាគេហទំព័រគួរជាទីទុកចិត្ត ស្ដីអំពីព័ត៌មាននយោបាយ និងមានជំនាញខាងប្រមូលទិន្នន័យស្ទង់មតិនៅសហរដ្ឋអាមេរិក។
លទ្ធផលនៃការស្ទង់មតិរបស់ RCP ក៏ស្រដៀងទៅនឹងគេហទំព័រស្ទង់មតិលំដាប់កំពូលៗផ្សេងទៀត ដូចជា FiveThirtyEight ជាដើម ដោយក្នុងនោះបានបង្ហាញថា លោក Biden កំពុងនាំមុខលោក Trump ដល់ទៅ8.4% នៅទូទាំងប្រទេស។
តួលេខនៃការនាំមុខទូទាំងប្រទេសរបស់លោក Biden ខ្ពស់ជាងជាងទ្វេដងបើធៀបនឹង Hillary Clinton ដែលជាបេក្ខភាពប្រធានាធិបតីនៃបក្សប្រជាធិបតេយ្យកាលពីឆ្នាំ2016។ នៅក្នុងបណ្ដារដ្ឋជាយុទ្ធសាស្ត្រ អតីតអនុប្រធានាធិបតីអាមេរិក Joe Biden ក៏ទំនងជាកំពុងតែមានប្រៀបជាងលោក Donald Trump ផងដែរ។
យោងតាម RCP នៅក្នុងរដ្ឋ Florida លោក Biden កំពុងនាំមុខលោក Trump 1.7%។ ការស្ទង់មតិរបស់សាកលវិទ្យាល័យ Siena/New York Times បានបង្ហាញថា អត្រានៃការគាំទ្រលោក Biden ខ្ពស់ជាងលោក Trump 3% ប៉ុន្តែការស្ទង់មតិរបស់ Washington Post/ABC News បែរជាបង្ហាញថា លោក Trump កំពុងនាំមុខគូប្រជែងចំនួន2%។
រដ្ឋ Florida ដែលមានតំណាងម្ចាស់ឆ្នោត29នាក់ ត្រូវបានគេចាត់ទុកថា ជា “ឧបករណ៍វាស់ស្ទង់” ដ៏គួរទុកចិត្តនៅក្នុងការបោះឆ្នោតកាលពីពេលកន្លេងទៅថ្មីៗនេះ។ នៅពេលបេក្ខភាពណាមួយទទួលបានសំឡេងឆ្នោតនាំមុខនៅក្នុងរដ្ឋនេះ បេក្ខភាពនោះតែងតែជាប់ឆ្នោតជាប្រធានាធិបតី។ លោក Trump ធ្លាប់ទទួលបានជ័យជំនះនៅក្នុងការបោះឆ្នោតឆ្នាំ2016នៅទីនេះ។
Pennsylvania ជាកន្លែងដែលមានតំណាងម្ចាស់ឆ្នោត20នាក់ លោក Biden ក៏កំពុងនាំមុខលោក Trump 2.9% នេះបើតាមលទ្ធផលនៃការស្ទង់មតិរបស់ RCP។ ប្រធានាធិបតី Trump ក៏បានជាប់ឆ្នោតនៅក្នុងរដ្ឋនេះកាលពីឆ្នាំ2016 ដោយទទួលបានការគាំទ្រខ្ពស់ជាងគូប្រជែង0.7%។
ចំណែក Michigan និង Wisconsin គឺជារដ្ឋដែលលោក Trump ធ្លាប់បាននាំមុខក្នុងការបោះឆ្នោតឆ្នាំ2016 ប៉ុន្តែពេលនេះ លទ្ធផលស្ទង់មតិរបស់ RCP បង្ហាញថា លោក Trump កំពុងនៅពីក្រោមលោក Biden។
យ៉ាងណាក៏ដោយ លោក Trump យល់ថា លទ្ធផលនៃការស្ទង់មតិដែលមិនអំណោយផលដល់រូបលោក គឺសុទ្ធតែ “មិនត្រឹមត្រូវ” ហើយថា លោកនឹងជាប់ឆ្នោតជាថ្មី។ ការបោះឆ្នោតកាលពីឆ្នាំ2016 បានបង្ហាញថា លទ្ធផលនៃការស្ទង់មតិនានាកាលពី4ឆ្នាំមុន បានត្រូវជាមួយនឹងលទ្ធផលនៃការបោះឆ្នោតទូទៅ ប៉ុន្តែ លោកស្រី Clinton បានចាញ់លោក Trump ដោយសារតែសន្លឹកឆ្នោតដែលបានមកពីក្រុមអ្នកតំណាងម្ចាស់ឆ្នោត មានចំនួនតិចជាង៕
ប្រភព៖ AFP
November 3, 2020
ប្រធានាធិបតីប្រទេសប្រេស៊ីល ចូលរួមធ្វើបាតុកម្មប្រឆាំងបម្រាមគោចរក្នុងប្រទេសរបស់ខ្លួន
ប្រធានាធិបតី Jair Bolsonaro រួមជាមួយមនុស្សរាប់រយនាក់ នាំគ្នាធ្វើបាតុកម្មនៅខាងក្រៅអគ្គបញ្ជាការដ្ឋានកងទ័ពនៅ Brasilia ដើម្បីប្រឆាំងទៅនឹងបទបម្រាមគោចររបស់អភិបាលរដ្ឋនានាក្នុងប្រទេសនេះ។
មនុស្សប្រមាណជា600នាក់ បាននាំគ្នាធ្វើបាតុកម្មកាលពីថ្ងៃទី19មេសា អំពាវនាវឱ្យកងទ័ព ធ្វើអន្តរាគមន៍ទៅលើវិធានការទប់ទល់នឹង COVID-19 ព្រមទាំងស្នើឱ្យបិទទ្វារសភាជាតិផងដែរ។ មនុស្សមួយចំនួន លើកបដាដែលមានសរសេរថា “យោធាធ្វើអន្តរាគមន៍ជាមួយប្រធានាធិបតី Bolsonaro”។
ក្រុមអ្នកសង្កេតការណ៍នយោបាយ បានឱ្យដឹងថា ក្រុមបាតុករនេះគឺជាអ្នកគាំទ្ររបស់ប្រធានាធបិតី Jair Bolsonaro។ ពួកគេបានអំពាវនាវឱ្យកងទ័ព ជួយដល់ប្រធានាធិបតី ដោយសារពួកគេយល់ថា តុលាការជាន់ខ្ពស់ និងសភាជាតិ កំពុងតែរារាំងប្រធានាធិបតី ក្នុងការប្រឆាំងទៅនឹងបទបញ្ជាបម្រាមគោចរ ទប់ស្កាត់ COVID-19 ដែលអភិបាលរដ្ឋនានាក្នុងប្រទេស បានដាក់ចេញ។
“ខ្ញុំនៅទីនេះ ព្រោះតែជឿជាក់អ្នកទាំងអស់គ្នា ហើយអ្នកទាំងអស់គ្នានៅទីនេះក៏ព្រោះតែជឿជាក់ប្រេស៊ីល” ប្រធានាធិបតី Bolsonaro មានប្រសាសន៍នៅលើរថយន្ត ទៅកាន់ក្រុមបាតុកម្ម។ លោកបន្តថា “ចូរប្រយុទ្ធដើម្បីប្រទេសជាតិ។ ចូរជឿជាក់លើប្រធានាធិបតីរបស់អ្នក ជាមនុស្សដែលនឹងធ្វើអ្វីៗដែលចាំបាច់ដើម្បីការពារខឿនប្រជាធិបតេយ្យ និងសេរីភាព ដែលជាប្រការដ៏សំខាន់សម្រាប់យើងគ្រប់គ្នា”។
ក៏ប៉ុន្តេ ប្រធានាធិបតីរូបនេះ មិនបានបញ្ចេញមតិអ្វីទាំងអស់ជុំវិញការអំពាវនាវរបស់ក្រុមបាតុករ ដែលស្នើឱ្យកងទ័ពធ្វើអន្តរាគមន៍ ក៏ដូចជាការស្នើឱ្យបិទសភាជាតិនោះឡើយ។
ប្រធានាធិបតីប្រេស៊ីល ចូលរួមបាតុកម្មប្រឆាំងបម្រាមគោចរក្នុងប្រទេសរបស់ខ្លួន
Bolsonaro ដែលជាអតីតមន្ត្រីយោធាម្នាក់ដែរនោះ បានរិះគន់ជាបន្តបន្ទាប់ទៅលើវិធានការដាក់បម្រាមគោចរទប់ស្កាត់ COVID-19 ពីសំណាក់អភិបាលរដ្ឋនានានៃប្រទេសនេះ ដែលក្នុងនោះក៏មានបណ្ដារដ្ឋដែលមានប្រជាជនច្រើនបំផុតនៅប្រេស៊ីល ដូចជារដ្ឋ Sao Paulo និងរដ្ឋ Rio de Janeiro ជាដើម។
សូមរំឭកថា កាលពីថ្ងៃទី17មេសា លោក Bolsonaro បានដកតំណែងរដ្ឋមន្ត្រីក្រសួងសុខាភិបាល ដែលជាអ្នកគាំទ្រវិធានការទប់ស្កាត់ COVID-19 ដែលត្រូវបានប្រធានាធិបតី Bolsonaro យល់ថា អាចបំផ្លាញសេដ្ឋកិច្ចប្រទេសនេះ។
គិតត្រឹមថ្ងៃទី20មេសានេះ ប្រេស៊ីលដែលជាប្រទេសមានប្រជាជនសរុបជាង200លាននាក់នេះ បានរកឃើញអ្នកជំងឺកូរ៉ូណាសរុបចំនួន 38,654នាក់ ក្នុងនោះមាន2,462នាក់បានបាត់បង់ជីវិត៕
ប្រភព៖ សារព័ត៌មានបរទេស
April 20, 2020