បំណុល - La Reine Media

តម្លៃប្រេងឆៅ និងមាសរងឥទ្ធិពលធ្ងន់ធ្ងរពីសង្គ្រាមហាម៉ាស – អ៊ីស្រាអែល

សង្គ្រាមរវាងអ៊ីស្រាអែល និងចលនាហាម៉ាស ជាកងកម្លាំងប្រដាប់អាវុធកំពុងកាន់កាប់តំបន់ហ្គាហ្សា ដែលបានផ្ទុះឡើង កំពុងតែជាកត្តាសំខាន់គាំទ្រដល់តម្លៃប្រេងឆៅ និងមាស ព្រោះថា នេះជាទ្រព្យសុវត្ថិភាពសម្រាប់អ្នកវិនិយោគ នៅពេលតម្លៃភាគហ៊ុន មូលបត្របំណុលតែងតែប្រែប្រួលជាអវិជ្ជមានដោយសារឥទ្ធិពលនៃភូមិសាស្ត្រនយោបាយ។

នៅទ្វីបអាស៊ី ក្នុងការជួញដូរនាព្រឹកថ្ងៃទី 09 តុលា 2023 តម្លៃប្រេងឆៅ Brent បានកើន 4.7% ឡើងដល់ 86.65 ដុល្លារអាម៉េរិក/ធុងបារ៉ែល គ្រាដែលតម្លៃប្រេងឆៅ WTI ក៏កើន 4.5% ឡើងដល់ 88.39 ដុល្លារ/ធុង។

ក្រុមអ្នកវិភាគរបស់ធនាគារ ANZ Bank អះអាងថា ហានិភ័យផ្នែកភូមិសាស្ត្រនយោបាយកើនឡើងនៅមជ្ឈិមបូព៌ានឹងគាំទ្រដល់តម្លៃប្រេងឆៅ ដោយវានឹងប្រែប្រួលខ្លាំងជាងនេះក្នុងពេលដ៏ខ្លីខាងមុខ។ ចំណែកធនាគារ CBA របស់អូស្ត្រាលីវិញ យល់ថា កត្តានានាដែលបាន និងកំពុងកើតឡើងនឹងអាចរុញតម្លៃប្រេងឆៅ Brent អនាគត ឡើងលើសពី 100 ដុល្លារ/ធុង ក្នុងរយៈពេលខ្លី។

រីឯមាសវិញ តម្រូវការរបស់ពិភពលោកបានចាប់ផ្ដើមកើនឡើង ធ្វើឱ្យតម្លៃរបស់លោហធាតុនេះកើន 0.8% ឡើងដល់ 1,848 ដុល្លារ/អោន ដែលមួយអោន (ounce) ស្មើនឹង 8.29426 ជី។

ក្រុមអ្នកជំនាញអះអាងថា ហេតុដែលនាំឱ្យតម្លៃមាសកើនឡើងបើទោះមូលបត្របំណុល និងរូបិយប័ណ្ណដុល្លារអាម៉េរិកឡើងថ្លៃ ក៏ព្រោះតែសង្គ្រាមអ៊ីស្រាអែល – ហាម៉ាស (ប៉ាលេស្ទីន) ដែលបានផ្ទុះឡើងកាលពីថ្ងៃទី 07 តុលាកន្លងទៅ។ ការកើនឡើងនៃភាពតានតឹងផ្នែកភូមិសាស្ត្រនយោបាយនឹងជះឥទ្ធិពលដល់សកម្មភាពសេដ្ឋកិច្ចពិភពលោក ដោយសារថា ប្រភពផ្គត់ផ្គង់ទំនិញជាច្រើនត្រូវអាក់ខាន៕

October 9, 2023

មហាសេដ្ឋីមួយរូបថា អ្នកវិនិយោគគួរតែរក្សាសាច់ប្រាក់ជាបណ្ដោះអាសន្ន

ក្នុងស្ថានភាពដែលមានការព្រួយបារម្ភអំពីការប្រាក់ និងអតិផរណាដែលចេះតែកើនឡើង មហាសេដ្ឋី Ray Dalio ដែលបច្ចុប្បន្នមានទ្រព្យជាង 15 ពាន់លានដុល្លារ យល់ថា អ្នកវិនិយោគគួរតែរក្សាសាច់ប្រាក់ក្នុងដៃជាបណ្ដោះអាសន្ន។

ជាក់ស្ដែង នៅក្នុងព្រឹត្តិការណ៍មួយរបស់វិទ្យាស្ថាន Milken ដែលធ្វើឡើងនៅសឹង្ហបុរីកាលពីថ្ងៃទី 14 កញ្ញា 2023 ទស្សនិកជនបានសួរ លោក Ray Dalio ថា «លោកនឹងបណ្ដាក់ទុនបែបណានៅក្នុងស្ថានការណ៍បច្ចុប្បន្ន?»។

មហាសេដ្ឋីអាម៉េរិក លោក Ray Dalio ដែលជាស្ថាបនិកនៃមូលនិធិការពារហានិភ័យ Bridgewater Associates ឆ្លើយថា «ខ្ញុំមិនចង់ទិញមូលបត្របំណុល និងទ្រព្យប្រហាក់ប្រហែលនេះ។ ក្នុងកាលៈទេសៈនេះ ខ្ញុំគិតថា យើងគួរតែរក្សាសាច់ប្រាក់ជាបណ្ដោះអាសន្ន…»។

ការយល់ឃើញនេះត្រូវបានលើកឡើងក្នុងគ្រាដែលអត្រាការប្រាក់មូលបត្របំណុលនៅរតនាគារអាម៉េរិកប្រភេទ 30 ឆ្នាំ បានកើនឡើងដល់ 5% ហើយអ្នកវិនិយោគអាចទទួលបានអត្រាចំណេញ 4% ពីសញ្ញាប័ណ្ណ ក៏ដូចជាគណនីបញ្ញើសន្សំ។

មហាសេដ្ឋីខាងលើនិយាយថា កំហុសធំបំផុតដែលអ្នកវិនិយោគស្ទើរតែទាំងអស់ជួបប្រទះគឺ «ជឿថា ទីផ្សារដែលដំណើរការល្អគឺជាខ្ទង់វិនិយោគដែលមានប្រសិទ្ធភាពបំផុត មិនមែនថ្លៃបំផុត»។ ជាងនេះ លោកក៏បានអះអាងថា មូលបត្របំណុលរយៈកាលយូរគឺជាខ្ទង់វិនិយោគដែលមិនគួរឱ្យចាប់អារម្មណ៍ ក្នុងកាលៈទេសៈបច្ចុប្បន្ន៕

September 18, 2023

តម្លៃមាសកើនឡើងបន្តិចក្នុងថ្ងៃទី 14 កញ្ញា ដោយសារទិន្នន័យសេដ្ឋកិច្ចអាម៉េរិកមិនល្អ

ទិន្នន័យសេដ្ឋកិច្ចអាម៉េរិកមានភាពអវិជ្ជមាន ក្នុងនោះ នៅលើផ្សារ COMEX សម្រាប់ទីផ្សារ New York តម្លៃមាសប្រគល់ក្នុងខែធ្នូ 2023 បានកើនឡើង 0.30 ដុល្លារ (0.02%) និងបិទទ្វារក្នុងតម្លៃ 1,932.80 ដុល្លារនៅក្នុងមួយអោន។

តម្លៃមាសប្រគល់មានកាលកំណត់នៅលើផ្សារ COMEX សម្រាប់ទីផ្សារ New York (សហរដ្ឋអាម៉េរិក) បានកើនឡើងបន្តិចនៅក្នុងការជួញដូរនាថ្ងៃទី 14 កញ្ញា 2023 ព្រោះតែទិន្នន័យស្ដីពីសេដ្ឋកិច្ចអាម៉េរិកមានភាពអវិជ្ជមានច្រើន។

ជាក់ស្ដែង មាសប្រគល់ក្នុងខែធ្នូ 2023 បានឡើងថ្លៃ 0.30 ដុល្លារ (0.02%) និងបិទទ្វារក្នុងតម្លៃ 1,932.80 ដុល្លារក្នុងមួយអោន (ounce)។ មួយអោន = 8.29426 ជី ដូច្នេះ ក្នុងករណីនេះ មួយជីមានតម្លៃប្រហែល 233.0286 ដុល្លារអាម៉េរិក។

ក្រសួងការងារអាម៉េរិកទើបតែបានប្រកាសឱ្យដឹងថា សន្ទស្សន៍តម្លៃអ្នកផលិត (Producer’s price index – PPI) របស់សហរដ្ឋអាម៉េរិក បានកើនឡើង 0.7% ដោយត្រូវបានកែសម្រួលទៅតាមរដូវក្នុងខែសីហា 2023 ខ្ពស់ជាងការរំពឹងទុក 0.4% និងជាសន្ទស្សន៍ប្រចាំខែខ្ពស់បំផុតរាប់ចាប់ពីខែមិថុនា 2022។

ក្រសួងខាងលើក៏បានរាយការណ៍ថា តួលេខនៃពាក្យស្នើសូមជំនួយពេលបាត់បង់ការងារនៅសហរដ្ឋអាម៉េរិក បានកើន 3,000 ពាក្យ នាំឱ្យតួលេខសរុបឡើងដល់ 220,000 ពាក្យ នៅក្នុងសប្ដាហ៍ដែលបញ្ចប់នៅថ្ងៃទី 09 កញ្ញា។

ធនាគារកណ្ដាលអឺរ៉ុប (ECB) បានដំឡើងការប្រាក់ 25 ពិន្ទុ ធ្វើឱ្យការប្រាក់នៃប្រាក់បញ្ញើកើនឡើងដល់ 4% កាលពីថ្ងៃទី 14 កញ្ញា។ ការដំឡើងការប្រាក់បាននាំឱ្យប្រាក់អឺរ៉ូធ្លាក់ថ្លៃ និងធ្វើឱ្យប្រាក់ដុល្លារអាម៉េរិកហក់ឡើង បណ្ដាលឱ្យមាសមិនអាចឡើងថ្លៃខ្ពស់ខ្លាំង។

សន្ទស្សន៍នៃរូបិយប័ណ្ណដុល្លារអាម៉េរិកកើន 0.6% ឡើងដល់កម្រិតខ្ពស់បំផុតក្នុងរយៈពេលជាង 6 ខែមកនេះ ធ្វើឱ្យកម្លាំងទាក់ទាញរបស់មាសចំពោះអ្នកវិនិយោគបរទេស ហើយអត្រាការប្រាក់នៃមូលបត្របំណុលរយៈពេលដប់ឆ្នាំនៅសហរដ្ឋអាម៉េរិក ក៏កើនឡើងផងដែរ។

ក៏ប៉ុន្តែ ក្រុមអ្នកវិភាគយល់ថា តម្លៃ 1,900 ដុល្លារ/អោនរបស់មាស ត្រូវបានគាំទ្រពីកត្តានានា ហើយថា នឹងទាក់ទាញអ្នកវិនិយោគបានច្រើនទៀត៕

September 15, 2023

អបអរសាទរខួប១ឆ្នាំ នៃការបើកដំណើរការជាផ្លូវការរោងចក្រដំឡើងរថយន្ត Ford និងពិធីប្រគល់-ទទួលអំណោយរថយន្តគិលានសង្គ្រោះ Ambulance ជូនដល់កាកបាទក្រហមកម្ពុជា សាខាខេត្តពោធិ៍សាត់

[ភ្នំពេញ – ថ្ងៃទី ១៣ ខែកក្កដា ឆ្នាំ២០២៣] ក្រុមហ៊ុន RMA (Cambodia) PLC ដែលជាក្រុមហ៊ុននាំចូល និងចែកចាយផ្តាច់មុខរថយន្ត Ford ក្នុងទីផ្សារប្រទេសកម្ពុជាបានប្រារព្ធពិធីប្រគល់-ទទួលអំណោយរថយន្តគិលានសង្គ្រោះចំនួន ២ គ្រឿង ជូនទៅដល់កាកបាទក្រហមកម្ពុជា សាខាខេត្តពោធិ៍សាត់ ដែលកម្មវិធីនេះត្រូវបានប្រារព្ធឡើង ក្រោមអធិបតីភាពរបស់ ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងអគ្គនាយកអគ្គីសនីកម្ពុជា និងលោកអភិបាលនៃគណៈអភិបាលខេត្តពោធិ៍សាត់ ព្រមទាំងថ្នាក់ដឹកនាំក្រុមហ៊ុន Ford Motor Company ថ្នាក់ដឹកនាំក្រុមហ៊ុន RMA Group និងក្រុមហ៊ុន RMA (Cambodia) PLC រួមទាំងភ្ញៀវកិត្តិយសជាតិ និងអន្តរជាតិប្រមាណជាង ២០០ នាក់។ កម្មវិធីនេះបានប្រារព្ធឡើងនៅក្នុងបរិវេនរោងចក្រដំឡើងរថយន្ត Ford ក្នុងភូមិសារវ័ន ឃុំស្នាអន្សារ ស្រុកក្រគរ ខេត្តពោធិ៍សាត់ នៅថ្ងៃទី ១១ ខែកក្កដា ឆ្នាំ ២០២៣ ។

ក្នុងឱកាសនៃពីធីអបអរសាទរខួប១ឆ្នាំ នៃការបើកដំណើរការជាផ្លូវការរោងចក្រដំឡើងរថយន្ត Ford និងពិធីប្រគល់-ទទួលអំណោយរថយន្តគិលានសង្គ្រោះ Ambulance ចំនួន ២ គ្រឿង ជូនដល់កាកបាទក្រហមកម្ពុជា សាខាខេត្តពោធិ៍សាត់ លោក ងន សាំង អគ្គនាយកក្រុមហ៊ុន RMA (Cambodia) PLC បានមានប្រសាសន៍ថា៖ “ យើងខ្ញុំមានមោទភាពជាពន់ពេកដែលទទួលបានសេចក្ដីទុកចិត្តពីក្រុមហ៊ុន FORD MOTOR COMPANY ក្នុងការដំឡើងរថយន្ត FORD RANGER និង FORD EVEREST ជំនាន់ថ្មីនៅ លើទឹកដីនៃព្រះរាជាណាចក្រកម្ពុជា ស្របតាមស្តង់ដាររបស់ក្រុមហ៊ុន FORD ។ យើងខ្ញុំជឿជាក់ថា ការបោះជំហានវិនិយោគក្នុងវិស័យយានយន្តរបស់ក្រុមហ៊ុនយើងខ្ញុំ ចូលរួមចំណែកយ៉ាងសំខាន់ ក្នុងការអភិវឌ្ឍវិស័យឧសហ្សាកម្មយានយន្តនៅកម្ពុជា និងជាសក្ខីភាពនៃទំនុកចិត្តលើកិច្ចខិតខំប្រឹង ប្រែងរបស់រដ្ឋាភិបាលក្នុងការធ្វើឱ្យប្រសើរឡើង នូវបរិយាកាសធុរកិច្ច និងវិនិយោគ។ វត្តមានរបស់ រោងចក្រយើងខ្ញុំក៏បានចូលរួមចំណែកការកាត់បន្ថយការធ្វើចំណាកស្រុកទៅធ្វើការនៅក្រៅប្រទេស របស់ប្រជាពលរដ្ឋ និងលើកកម្ពស់សេដ្ឋកិច្ចក្នុងតំបន់តាមរយៈការជំរុញសន្ទុះអាជីវកម្មសហគ្រាស ធុនតូច និងមធ្យម ការបង្កើតឱកាសការងារដោយផ្ទាល់និងដោយប្រយោល ក៏ដូចជាការអភិវឌ្ឍន៍ ធនធានមនុស្សនៅក្នុងទឹកដី ខេត្តពោធិ៍សាត់នេះផ្ទាល់ផងដែរ។ ”

មិនតែប៉ុណ្ណោះ លោកក៏បានបន្ថែមទៀតថា៖ “ ក្រុមហ៊ុនយើងខ្ញុំនឹងបន្តប្តេជ្ញាគាំទ្រ និង ជំរុញវិស័យឧស្សាហកម្មយានយន្តនៅកម្ពុជា ដើម្បីឱ្យកម្ពុជា ផ្លាស់ប្ដូរមុខមាត់ថ្មី ពីប្រទេសដែលដំឡើងរថយន្ត ទៅជាប្រទេសដែលផលិតរថយន្ត ក្នុងពេលអនាគត។ ក្រុមហ៊ុននឹងពង្រីកការវិនិយោគគម្រោងដំឡើងរថយន្ត Ford ដោយបង្កើនការនាំចូលនៃចំនួន គ្រឿងបង្គុំច្រើនជាងមុន បង្កើនចំនួនការងារក្នុងស្រុក ជំរុញការប្រើប្រាស់ធាតុផ្សំក្នុងស្រុក និងបង្កើន ដើមទុនវិនិយោគបន្ថែមទៀត។ យើងខ្ញុំជឿជាក់ថា ការវិនិយោគនេះនឹងបន្តផ្តល់អត្ថប្រយោជន៍ជាច្រើនបន្ថែមទៀតជូនប្រទេសកម្ពុជា ជាពិសេសការអភិវឌ្ឍន៍ខ្សែសង្វាក់ផ្គត់ផ្គង់ និងធ្វើឱ្យប្រសើរ ឡើងនូវខ្សែចង្វាក់ដែលគាំទ្រគោលនយោបាយអភិវឌ្ឍវិស័យឧស្សាហកម្មរបស់រាជរដ្ឋាភិបាលកម្ពុជា។ ការវិនិយោគនេះ នឹងនាំមកនូវផលិតផលថ្មី បច្ចេកវិទ្យាថ្មី ដើម្បីផ្គត់ ផ្គង់តម្រូវការប្រើប្រាស់រថយន្តថ្មីក្នុងស្រុក ជាមួយនឹងមោទភាពផលិតកម្មក្នុងស្រុក រោងចក្រ ដំឡើងរថយន្ត Ford នឹងបន្តទាក់ទាញវិនិយោគិនផ្សេងៗជាច្រើនទៀតមកវិនិយោគនៅកម្ពុជា ជា ពិសេស អ្នកវិនិយោគដែល ពាក់ព័ន្ធនឹងការផលិត និងដំឡើងរថយន្ត ដូចជា៖ សំបកកង់ កង់ឡាន ខ្សែភ្លើងឡាន អាគុយឡាន និងអាជីវកម្មផ្សេងៗទៀត។”

ឆ្លៀតក្នុងឱកាសនេះដែរ លោកស្រី Kay Hart ប្រធានគ្រប់គ្រងទីផ្សារអន្តរជាតិនៃក្រុមហ៊ុន Ford Motor Company បានមានប្រសាសន៍ថា៖ “ រថយន្តគិលានសង្គ្រោះ (The Next-Generation Ford Ranger-Converted Ambulances) នេះ បានបំពាក់មកជាមួយនូវបច្ចេកវិទ្យា និងប្រព័ន្ធសុវត្ថិភាពទំនើបជំនាន់ចុងក្រោយដែលធ្វើឱ្យរថយន្តនេះក្លាយជារថយន្តមួយដែលមានលក្ខណៈ ធន់ រឹងមាំ និងមានសមត្ថភាពក្នុងការចល័ត និងដឹកជញ្ជូនអ្នកជំងឺដោយសុវត្ថិភាព។ ”

លោកស្រីក៏បានបន្តទៀតថា៖ “ រថយន្តគិលានសង្គ្រោះ (The Next-Generation Ford Ranger-Converted Ambulances) នឹងចូលរួមចំណែកយ៉ាងសំខាន់សម្រាប់កាកបាទក្រហមកម្ពុជាក្នុងខេត្តពោធិ៍សាត់ ក្នុងការគាំពារ សង្គ្រោះបន្ទាន់ និងជាជំនួយការដ៏សំខាន់ក្នុងការជួយដល់សកម្មភាពសប្បុរសធម៌ផ្សេងៗដល់ប្រជាពលរដ្ឋ និងអ្នកជំងឺដើម្បីទទួលបាននូវសេវាកម្មសង្គ្រោះបន្ទាន់មួយដែលមាន គុណភាព សុវត្ថិភាព និងប្រសិទ្ធភាព។ ”

ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងអគ្គនាយកអគ្គីសនីកម្ពុជា បានមានប្រសាសន៍ថា៖ “ ការសាងសង់រោងចក្រដំឡើងរថយន្ត Ford ក្នុងខេត្តពោធិ៍សាត់ គឺជាសក្ខីភាពមួយដែលបានបង្ហាញពីទំនុកចិត្តរបស់ក្រុមហ៊ុន RMA Cambodia មកលើរាជរដ្ឋាភិបាលកម្ពុជា ហើយការផ្តល់ជូននូវរថយន្តគិលានសង្គ្រោះ ២ គ្រឿងក្នុងថ្ងៃនេះនឹងជាការចូលរួមចំណែកដ៏សំខាន់មួយក្នុងការពង្រឹងសមត្ថភាពមូលដ្ឋានសុខាភិបាលបន្ថែមទៀត ក្នុងការឆ្លើយតបទៅនឹងតម្រូវការសេវាថែទាំសុខភាពអោយកាន់តែមានគុណភាព ប្រសិទ្ធភាព និងសុវត្ថិភាព។ ភាពជាដៃគូរវាង RMA Cambodia និងវិទ្យាស្ថានបច្ចេកទេសក្នុងស្រុករបស់យើង បានដើរតួរនាទីយ៉ាងសំខាន់ក្នុងការលើកកម្ពស់ធនធានមនុស្ស តាមរយៈការបង្កើតកម្មវិធីបណ្តុះបណ្តាលដោយផ្ទាល់ពីអ្នកជំនាញដែលគ្រឹះមួយដ៏សំខាន់សម្រាប់យុវជន ក៏ដូចជាយុវនារីក្នុងការត្រៀមខ្លួនរួចជាស្រេចសម្រាប់ភាពជោគជ័យនាពេលខាងមុខ។ ”

គួរបញ្ជាក់ផងដែរថា ក្រុមហ៊ុន RMA (CAMBODIA) PLC ជាក្រុមហ៊ុនដំបូងគេបំផុត ដែលទទួលបានការទទួលស្គាល់ពី វិទ្យាស្ថានស្ដង់ដារកម្ពុជា នៃ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្នុងនាមជាអ្នក អនុវត្តស្តង់ដារសុវត្ថិភាពយានយន្ត និងស្តង់ដារសុវត្ថិភាពគ្រឿងបង្គុំយានយន្តបានខ្ពស់បំផុត។ ក្នុងឆ្នាំ ២០២០ ក្រុមហ៊ុន RMA (CAMBODIA) PLC បានចុះបញ្ជីលក់មូលបត្រ បំណុលចំនួន ៨០ ពាន់លានរៀល ដែលស្មើនឹង ២០ លានដុល្លារអាមេរិក ក្នុងផ្សារមូលបត្រកម្ពុជា ហើយក្លាយជាក្រុមហ៊ុនមិនមែនស្ថាប័នហិរញ្ញវត្ថុដែលបានបោះផ្សាយមូលបត្របំណុលដំបូងគេបង្អស់នៅប្រទេសកម្ពុជា។ ការបោះផ្សាយមូលបត្របំណុលនេះ បង្ហាញពីកិច្ចខិតខំប្រឹងប្រែងរបស់ក្រុមហ៊ុនយើងខ្ញុំក្នុងការលើកកម្ពស់ទីផ្សារមូលបត្រកម្ពុជា និងចូលរួមចំណែកអភិវឌ្ឍទីផ្សារហិរញ្ញវត្ថុនៅប្រទេសកម្ពុជា។

តាមរយៈកំណើនសេដ្ឋកិច្ច និងកំរិត GDP របស់ប្រជាជនកម្ពុជាកើនឡើងខ្ពស់ជាបន្តបន្ទាប់ បានធ្វើឱ្យប្រជាជនកម្ពុជាងាកមកប្រើប្រាស់រថយន្តថ្មីមានការកើនឡើងជាលំដាប់។ ក្នុងនោះការប្រើប្រាស់ រថយន្តថ្មីម៉ាក FORD មានកំណើនកាន់តែច្រើនឡើង និងបានក្លាយជាជម្រើសឈានមុខរបស់អតិថិជននៅកម្ពុជា។ ដូច្នេះ ក្រុមហ៊ុនបានសម្រេចចិត្តបង្កើតរោងចក្រដំឡើងរថយន្ត FORD ដែលទទួលបានសិទ្ធិពេញលេញក្នុងការផ្គុំ និងដំឡើងរថយន្តពីក្រុមហ៊ុនម្ចាស់ដើម FORD MOTOR COMPANY។ រោងចក្រនេះ ត្រូវបានសាងសង់ឡើងនៅលើផ្ទៃដីសរុបប្រមាណជាង ៥ ហិកតា ស្ថិតក្នុងភូមិសារវ័ន ឃុំស្នាអន្សា ស្រុកក្រគរ ខេត្តពោធិ៍សាត់ ជាមួយនឹងទុនវិនិយោគចំនួន ២១ លានដុល្លារសហរដ្ឋអាមេរិក ដែលអាចបង្កើតការងារជំនាញបានជាង ៥០០ កន្លែង និងមានសមត្ថភាពអាចដំឡើងរថយន្តបានចំនួនប្រមាណ ៩,០០០ គ្រឿងក្នុងមួយឆ្នាំ។

រហូតមកដល់ពេលនេះ ក្រុមហ៊ុនបានដំឡើងរថយន្ត Ford Ranger Wildtrak និងរថយន្ត Ford Everest បានចំនួន ៣,០០០ គ្រឿងដើម្បីបម្រើតម្រូវការទីផ្សារក្នុងស្រុក។ ក្រុមហ៊ុនបន្តសហការ ជាមួយនឹងវិទ្យាស្ថានពហុបច្ចេកទេសខេត្តពោធិ៍សាត់ក្នុងការបណ្តុះបណ្តាលអភិវឌ្ឍជំនាញបច្ចេកទេសដល់បុគ្គលិកក្រុមហ៊ុនដើម្បីធានាឱ្យបាននូវធនធានមនុស្សប្រកបដោយគុណភាព។ ថ្មីៗនេះ ក្រុមហ៊ុនបានបញ្ជូនបុគ្គលិកទៅប្រទេស Australia ដើម្បីសិក្សាអំពីបច្ចេកវិទ្យាដំឡើងរថយន្ត ក្នុងគោលបំណងបង្កើនកម្រិតបច្ចេកទេសបុគ្គលិកក៏ដូចជាពាំនាំចំណេះដឹងថ្មី និង បច្ចេកវិទ្យាថ្មីមកប្រទេសកម្ពុជា។ ដើម្បីបន្តចូលរួមលើកកម្ពស់វិស័យយានយន្ត ក្រុមហ៊ុននឹងបង្កើតមជ្ឈមណ្ឌលអប់រំបណ្ដុះបណ្ដាលបច្ចេកទេស និងវិជ្ជាជីវៈដើម្បីផ្ដល់ឱកាសឱ្យប្រជាពលរដ្ឋកម្ពុជាទទួលបានការបណ្តុះបណ្តាលជំនាញបច្ចេកទេសប្រកបដោយគុណភាពដើម្បីចូលរួមចំណែកអភិវឌ្ឍធនធាន មនុស្សនៅកម្ពុជាស្របតាមគោលនយោបាយអភិវឌ្ឍវិស័យឧស្សាហកម្មរបស់រាជរដ្ឋាភិបាលកម្ពុជា។

July 14, 2023

ក្លឹបបាល់ទាត់របស់អេស្ប៉ាញ នៅជំពាក់ប្រាក់ខែ Lionel Messi

(សេស្ប៉ាញ) – Joan Laporta ដែលជាប្រធានក្លឹប Barca បាននិយាយថា ក្លឹបនេះនៅជំពាក់ប្រាក់បៀវត្សរ៍របស់កីឡាករខ្សែប្រយុទ្ធ Lionel Messi និងត្រូវបន្តសងរហូតដល់ឆ្នាំ 2025។

កាលពីខែវិច្ឆិកា 2017 Messi បានចុះកិច្ចព្រមព្រៀងតម្លៃ 675 លានដុល្លារអាម៉េរិកជាមួយក្លឹប Barca ដែលមានសុពលភាពដល់ខែមិថុនា 2021។ កិច្ចព្រមព្រៀងនេះរួមមាន ប្រាក់បៀវត្សរ៍ ប្រាក់ឧបត្ថម្ភក្រៅផ្លូវការ (Kickback) និងប្រាក់សម្រាប់ភាពស្មោះត្រង់ នេះមិនទាន់គិតដល់ប្រាក់រង្វាន់។ ក្នុងនោះ ប្រាក់បៀវត្សរ៍ប្រចាំឆ្នាំរបស់ Messi គឺ 167 លានដុល្លារអាម៉េរិក ខ្ពស់ជាងឆ្ងាយធៀបនឹង 86 លានដុល្លារដែល Football Leaks ធ្លាប់បានបង្ហើបឱ្យដឹង។ តារាបាល់ទាត់អាហ្សង់ទីន ក្រោយមកក៏បានយល់ព្រមកាត់បន្ថយប្រាក់ខែដើម្បីជួយដល់ក្លឹប ព្រោះតែផលវិបាកដែលកើតឡើងដោយសារកូវីដ។

មកដល់រដូវក្ដៅឆ្នាំ 2021 Messi បានចាកចោលកីឡដ្ឋាន Camp Nou ទៅតាមទម្រង់សេរី ព្រោះតែបញ្ហាហិរញ្ញវត្ថុរបស់ក្លឹប Barca ចេះតែអាក្រក់ទៅៗ។ M10 បានលេងឱ្យក្លឹប PSG ពីរឆ្នាំ មុនពេលទៅទាត់ឱ្យក្លឹបអាម៉េរិក Inter Miami។

បើទោះជាមិនលេងឱ្យក្លឹប Barca ក្នុងរយៈពេលជាងពីរឆ្នាំកន្លង ប៉ុន្តែ Messi នៅតែទទួលបានប្រាក់ខែពីក្លឹបនេះ។ «យើងនៅសល់ខ្ទង់ប្រាក់ដែលមិនទាន់ទូទាត់ជូន Messi ដែលត្រូវសងរហូតដល់ឆ្នាំ 2025» លោក Laporta ប្រាប់ទំព័រ La Vanguardia ដូច្នេះ។ លោកបន្តថា «អ្វីដែលនៅជំពាក់ គឺការពន្យារពេលទូទាត់ប្រាក់បៀវត្សរ៍ដែលបានព្រមព្រៀងគ្នាជាមួយនឹងក្រុមប្រឹក្សាភិបាលមុននោះ ហើយប្រការនេះបានបង្កើតឱ្យមានខ្ទង់បំណុលមិនទាន់ទូទាត់ដែលនឹងបញ្ចប់នៅឆ្នាំ 2025»៕

July 4, 2023

ករណីទិញដូរក្លឹប Man Utd ចាត់ទុកថា «បានសម្រេច» បន្ទាប់ពីគ្រួសារត្រកូល Glazer យល់ព្រម

យោងតាមសារព័ត៌មានរបស់កាតា Sheikh Jassim បានទទួលជោគជ័យក្នុងការប្រជែងទិញក្លឹបបាល់ទាត់អង់គ្លេស Manchester United។

ក្នុងមួយរយៈពេលកន្លង Qatari Sheikh Jassim bin Hamad al-Thani បានប្រកួតប្រជែងជាមួយនឹង Sir Jim Ratcliffe ដើម្បីទិញយកបីសាចក្រហម Man Utd។

សម្រាប់ Ineos (ក្រុមហ៊ុនវិនិយោគអង់គ្លេស) ការដែល Jim Ratcliffe ចង់ទិញភាគហ៊ុន 60% របស់ Man United គឺនៅតែអនុញ្ញាតឱ្យគ្រួសារត្រកូល Glazer បន្តដើរតួជាអ្នកគ្រប់គ្រងនៅ Old Trafford។ ប៉ុន្តែ បើតាមសារព័ត៌មាន Al-Watan ដែលជាកម្មសិទ្ធិរបស់ឪពុកលោក Sheikh Jassim ករណីទិញដូរក្លឹប Man United គឺបានជោគជ័យទៅហើយ។

ប្រភពព័ត៌មានខាងលើបានឱ្យដឹងថា សេចក្ដីប្រកាសមួយស្ដីពីការចូលកាន់កាប់របស់ Sheikh Jassim នឹងត្រូវបានធ្វើឡើងឆាប់ៗនេះ។ សំណើថ្មីបំផុតរបស់អ្នកជំនួញជនជាតិកាតា គឺការទិញភាគហ៊ុន 100% របស់ក្លឹប Man Utd ក្នុងតម្លៃប្រហែល 5 ពាន់លានផោនអង់គ្លេស។

បើសិនជាសេចក្ដីរាយការណ៍នៅកាតាត្រូវបានទទួលស្គាល់ នោះ Ratcliffe នឹងបាត់បង់ឱកាសក្នុងការទិញក្លឹបបាល់ទាត់ដែលលោកស្រឡាញ់ចូលចិត្តតាំងពីវ័យកុមារ។

មូលនិធិ Qatari របស់អ្នកវិនិយោគនៅកាតាបានសន្យាថា នឹងប្រគល់ប្រាក់ជាមុន ព្រមទាំងជួយសងបំណុលទាំងអស់ដែលបីសាចក្រហមកំពុងជំពាក់ ហើយថា នឹងស្ថាបនាឡើងវិញនូវមជ្ឈមណ្ឌលហ្វឹកហាត់ រួមនឹងហេដ្ឋារចនាសម្ព័ន្ធនានាដែលទាក់ទងផងដែរ៕

June 13, 2023

អនុសាសន៍របស់ស្ត្រីដោះបំណុល 300,000 ដុល្លាររួចរាល់ក្នុងបីឆ្នាំ និងក្លាយជាសេដ្ឋិនី

Bernadette Joy បានទូទាត់បំណុលចំនួន 300,000 ដុល្លារអាម៉េរិករួចស្រេច ហើយបច្ចុប្បន្នសន្សំទ្រព្យបានមួយលានដុល្លារអាម៉េរិក។

នៅពេលនិយាយដល់អាទិភាពក្នុងហិរញ្ញវត្ថុ អ្នកជំនាញស្ទើរតែទាំងអស់យល់ស្របថា ការសន្សំសំច័យប្រាក់ និងការបង្កើតខ្ទង់ប្រាក់សម្រាប់ហេតុការណ៍បន្ទាន់នៅមុនពេលផ្ដោតទៅលើការវិនិយោគគឺជាគំនិតឆ្លាតវៃ។

យោងតាម Bernadette Joy ដែលជាគ្រូបណ្ដុះបណ្ដាលផ្នែកហិរញ្ញវត្ថុ និងជាស្ថាបនិករបស់ក្រុមហ៊ុន Crush Your Money Goals ប្រការខាងលើនោះពុំមែនមានន័យថាជាការសំច័យហួសហេតុនោះទេ។ Joy បានទូទាត់បំណុល 300,000 ដុល្លារអាម៉េរិកក្នុងរយៈពេលបីឆ្នាំ ហើយបច្ចុប្បន្ន អ្នកស្រីមានទ្រព្យមួយលានដុល្លារ។ អ្នកស្រីឱ្យដឹងថា អតិថិជនមួយចំនួនរបស់អ្នកស្រី សន្សំប្រាក់បានច្រើនជាងតម្រូវការទៅទៀត។

អ្នកស្រី Joy ថ្លែងថា៖ «ពួកគេកំពុងមានភាពយឺតយ៉ាវនៅពេលមានលទ្ធភាពគ្រប់គ្រាន់ក្នុងការវិនិយោគ។ នៅពេលអ្នកសន្សំបានប្រាក់គ្រប់គ្រាន់សម្រាប់ខ្ទង់ហេតុការណ៍បន្ទាន់ អ្នកអាចបង្វែរទ្រព្យមួយផ្នែកទៅកាន់ខ្ទង់វិនិយោគ ដើម្បីមានមូលដ្ឋានហិរញ្ញវត្ថុរឹងមាំ និងយូរអង្វែង»។

ប្រាក់សន្សំសម្រាប់ខ្ទង់ដោះស្រាយបញ្ហាបន្ទាន់ ត្រូវមានចំនួនប៉ុន្មាន ទើបហៅថា ឆ្លាតវៃ

អ្នកជំនាញផ្នែកហិរញ្ញវត្ថុស្ទើរតែទាំងអស់ រួមទាំងអ្នកស្រី Joy ផងដែរ យល់ថា សន្សំប្រាក់សម្រាប់ខ្ទង់ចំណាយប្រចាំថ្ងៃ ឱ្យបានចាប់ពី 3 ខែដល់ 6 ខែ គឺជារឿងឆ្លាតវៃ។ ចំណែក Suze Orman ដែលជាម្ចាស់សៀវភៅ «ស្ត្រី និងប្រាក់កាស» បានចែករំលែកថា «ការពិតនៃបញ្ហាគឺថា អ្នកគួរមានខ្ទង់ប្រាក់សម្រាប់ដោះស្រាយហេតុការណ៍បន្ទាន់ដែលអាចប្រើប្រាស់បានមួយឆ្នាំ ចាប់ពីពេលនេះ» គឺជារឿងល្អ។

ប្រការនេះទំនងជាពិបាកអនុវត្ត។ យោងតាមការស្រាវជ្រាវមួយរបស់ Bankrate កាលពីឆ្នាំ 2021 ពលរដ្ឋអាម៉េរិក ជាងពាក់កណ្ដាល (51%) ឯណោះ ដែលមានខ្ទង់ប្រាក់សម្រាប់ដោះស្រាយបញ្ហាបន្ទាន់តិចជាងខ្ទង់ចំណាយប្រចាំថ្ងៃ រយៈពេល 3 ខែ។ ក្នុងចំណោម 51% នោះ មាន 25% ពុំមានខ្ទង់ប្រាក់សម្រាប់ដោះស្រាយបញ្ហាបន្ទាន់ទាល់តែសោះ។

ដើម្បីសន្សំប្រាក់ឱ្យបានគ្រប់គ្រាន់ អ្នកអាចសន្សំដោយខ្លួនឯង និងគោរពតាមគោលការ 50/20/30 ដែលក្នុងនោះ អ្នកត្រូវដាក់ 20% នៃប្រាក់ចំណួលប្រចាំខែសរុប ទៅក្នុងខ្ទង់សន្សំ និងខ្ទង់វិនិយោគ, 50% សម្រាប់ខ្ទង់ចំណាយប្រចាំថ្ងៃ និង 30% សម្រាប់ការចំណាយតាមកាលៈទេសៈ។

ក៏ប៉ុន្តែ នៅពេលអ្នកមានខ្ទង់ប្រាក់សម្រាប់ដោះស្រាយបញ្ហាបន្ទាន់ដែលអ្នកបានគិតថា សមស្របហើយនោះ អ្នកមិនចាំបាច់សន្សំសម្រាប់ខ្ទង់នេះទៀតទេ ដោយគ្រាន់តែរក្សាទុកខ្ទង់នេះឱ្យបានគង់វង្សគឺជាការល្អ។ បន្ទាប់មក ចូរផ្ដោតទៅលើការវិនយោគ បើទោះវាបង្កប់ទៅដោយហានិភ័យ ប៉ុន្តែ វាក៏ផ្ដល់ឱកាសសម្រាប់អ្នកក្លាយជាអ្នកមាន៖ «ប្រាក់សុទ្ធនឹងមិននាំមកនូវផលប្រយោជន៍ បើសិនវាមិនបានកើនឡើង» នេះបើតាមអ្នកស្រី Joy។

ចាប់ផ្ដើមវិនិយោគកាន់តែឆាប់ កាន់តែល្អ

ទីផ្សារអាចមានឡើង និងអាចមានចុះ ដូច្នេះ ការវិនិយោគដែលមានប្រសិទ្ធភាពបំផុតគឺការវិនិយោគក្នុងរយៈពេលវែង។ នេះគឺជាមូលហេតុដែលអ្នកត្រូវចាប់ផ្ដើមវិនិយោគឱ្យបានឆាប់។

Mark La Spisa អ្នកឯកទេសផ្នែកហិរញ្ញវត្ថុដ៏ល្បីឈ្មោះ និងជាប្រធានក្រុមហ៊ុន Vermillion Financial Advisors បាននិយាយថា បើសិនមិនអាចវិនិយោគច្រើន នោះក៏មិនមែនជាបញ្ហា៖ ចាប់ផ្ដើមកាន់តែឆាប់ កាន់តែល្អ សូម្បីនៅក្នុងខ្លួនមានតែប៉ុន្មានដុល្លារ ក៏ប្រសើរជាងការដែលមិនបានវិនិយោគអ្វីសោះ ឬរង់ចាំរហូតដល់សន្សំបានប្រាក់ច្រើន»។

មូលហេតុដែលថា កាន់តែឆាប់វិនិយោគ កាន់តែល្អ គឺមកពីកម្លាំងនៃការប្រាក់ត្រួត ជាការប្រាក់ដែលអ្នករកបានពីប្រាក់របស់ខ្លួន បូកនឹងការប្រាក់ដែលបានកើតជាកូន ពូនជាចៅ៕

June 13, 2023

បំណុលរបស់ចិនមានទំហំធំដល់កម្រិតណា ហើយអ្នកណាជាម្ចាស់បំណុល?

យោងតាមវិទ្យាស្ថានហិរញ្ញវត្ថុអន្តរជាតិ IIF (Institute of International Finance) បំណុលសរុបរបស់ប្រទេសចិន បានកើនឡើងខ្ពស់ជាង3ដងបើធៀបនឹង GDP ក្នុងត្រីមាសដំបូងនៃឆ្នាំ2020។

South China Morning Post (SCMP) បានឱ្យដឹងថា បំណុលរបស់ចិនត្រូវបានចែកជា2ប្រភេទ៖ បំណុលក្នុងប្រទេស និងបំណុលបរទេស។ បំណុលក្នុងប្រទេសរបស់ចិន រួមមាន បំណុលក្រុមហ៊ុន បំណុលគ្រួសារ និងបំណុលរដ្ឋាភិបាល។

បំណុលបរទេសរបស់ចិន រួមមាន បណ្ដាក្រុមហ៊ុនឯកជនខ្ចីលុយពីធនាគារបរទេស ឥណទានដែលទាក់ទងនឹងពាណិជ្ជកម្មសម្រាប់បណ្ដាក្រុមហ៊ុនចិនពីបណ្ដាដៃគូបរទេស និងមូលបត្របំណុលដែលបណ្ដាក្រុមហ៊ុនរដ្ឋ និងឯកជនរបស់ចិនបានបោះផ្សាយសម្រាប់ក្រុមវិនិយោគិនបរទេស។

ពិភពលោកជំពាក់បំណុលចិនចំនួនប៉ុន្មាន?

SCMP ចុះផ្សាយថា ក្នុងអំឡុងច្រើនឆ្នាំកន្លងទៅ ប្រទេសចិនបានបង្កើនការផ្ដល់ប្រាក់កម្ចីទៅឱ្យបណ្ដាប្រទេសដែលទើបតែមានសេដ្ឋកិច្ចលូតលាស់ថ្មីនៅអាហ្វ្រី។ ខ្ទង់ឥណទាននេះ ភាគច្រើនបានមកពីរដ្ឋាភិបាលចិន ឬក្រុមហ៊ុនដែលរដ្ឋចិនគ្រប់គ្រង។

ក្រៅពីនេះ ប្រទេសចិនក៏ជាម្ចាស់បំណុលធំមួយរបស់រដ្ឋាភិបាលសហរដ្ឋអាមេរិក។ គិតដល់ដំណាច់ខែមីនា2020 ប្រទេសចិនបានក្លាយជាម្ចាស់បំណុលប្រមាណជា 1.1លានលាន (1,100,000,000,000.00) ដុល្លារអាមេរិករបស់រដ្ឋាភិបាលសហរដ្ឋអាមេរិក។

ជាងនេះ ប្រទេសចិនក៏កំពុងពង្រីងវិសាលភាពនៃគម្រោងសាងសង់ហេដ្ឋារចនាសម្ព័ន្ធនៅបរទេស ដោយខ្ទង់ឥណទានដែលគាំទ្រដោយរដ្ឋ ទៅតាមគំនិត “ខ្សែក្រវាត់មួយ ផ្លូវមួយ” ដែលជាផែនការវិនិយោគប្រកបដោយមហិច្ឆតា ដើម្បីតភ្ជាប់ផ្លូវនានាពីប្រទេសចិនទៅកាន់អាស៊ី អាហ្វ្រិក និងអឺរ៉ុប។

ដូច្នេះ បច្ចុប្បន្ន ប្រទេសចិនគឺជាម្ចាស់បំណុលធំជាងគេបង្អស់ក្នុងពិភពលោករបស់បណ្ដាប្រទេសក្រីក្រ នេះបើតាមរបាយការណ៍របស់ IIF ដែលបានប្រកាសផ្សាយកាលពីខែឧសភា2020។ បំណុលចាស់ដែលប្រទេសចិនបានឱ្យបណ្ដាប្រទេសផ្សេងៗខ្ចីក្រៅពីប្រទេសក្រីក្រ បានឡើងដល់5.5លានលានដុល្លារ មានន័យថា កើនជាង 875ពាន់លានដុល្លារក្នុងដំណាក់កាល 2004-2019។ តួលេខនេះ ជិតស្មើនឹង 6% នៃ GDP ទូទាំងពិភពលោក។

បើទោះចិនជាម្ចាស់បំណុលធំជាងគេក្នុងពិភពលោក ប៉ុន្តែ ប្រទេសនេះក៏ជាកូនបំណុល “យក្ស” ផងដែរ។ IIF បានរាយការណ៍ថា បំណុលក្នុងប្រទេសរបស់ចិន ស្មើនឹង 317% នៃ GDP ក្នុងត្រីមាសទី1 ឆ្នាំ2020។ មុននោះ ក្នុងត្រីមាសទី4នៃឆ្នាំ2019 បំណុលក្នុងប្រទេសរបស់ចិន មានចំនួន300% ធៀបនឹងត្រីមាសមុន ដែលនេះជាកំណើនប្រចាំត្រីមាសធំបំផុតក្នុងប្រវត្តិសាស្ត្រ។

បំណុលដែលចិនខ្ចីពីបរទេសបានកើនឡើងយ៉ាងគំហុក

បំណុលក្នុងគ្រួសារ បានកើនឡើង 54,3% ធៀបនឹង GDP របស់ចិនក្នុងត្រីមាសចុងក្រោយនៃឆ្នាំ2019 ខណៈអំឡុងពេលដូចគ្នានៅឆ្នាំ2018 គឺត្រឹម 51.4%។ បំណុលដែលចិនខ្ចីពីបរទេស រួមមានខ្ទង់បំណុលគិតជាប្រាក់ដុល្លារ គឺប្រមាណជា 2.05លានលាន (2,050,000,000,000.00 USD) ដុល្លារនៅចុងឆ្នាំ2019 ខណៈត្រីមាសទី3 នៃឆ្នាំ2019 មានត្រឹម 2.03លានលានដុល្លារ។ នេះបើតាមស្ថិតិរបស់នាយកដ្ឋានគ្រប់គ្រងអត្រាប្ដូរប្រាក់របស់ប្រទេសចិន។

ខ្ទង់បំណុលរបស់រដ្ឋភិបាលមូលដ្ឋានចិន ត្រូវបានកាន់កាប់ដោយស្ថាប័នហិរញ្ញវត្ថុរបស់រដ្ឋ ឬគ្រប់គ្រងដោយរដ្ឋ។ ក្នុងចំណោមនោះ មានខ្ទង់ប្រាក់ឥណទានជាច្រើនមិនមានតម្លាភាព។ តាមការប៉ាន់ប្រមាណ ខ្ទង់បំណុលអាថ៌កំបាំងទាំងនេះ អាចមានចន្លោះពី 30លានលាន ទៅ 40លានលាន (30,000,000,000,000-40,000,000,000,000) យន់ (4.2លានលាន ទៅ 5.6លានលានដុល្លារអាមេរិក)។ ប្រទេសចិនក៏បានបោះពុម្ភផ្សាយមូលបត្រក្នុងស្រុកដែលមានតម្លៃ 2.36លានលានយន់ (614ពាន់លានដុល្លារ) ក្នុងឆ្នាំ2019 ផងដែរ។

ម្ចាស់នៃបំណុលទាំងនេះ ភាគច្រើនជាអ្នកវិនិយោគក្នុងប្រទេស ដូចជា ធនាគារពាណិជ្ជកម្ម ឬធនាគារគោលនយោបាយដែលគាំទ្រដោយរដ្ឋាភិបាលចិន។

ផ្សារមូលបត្រចិន រួមមាន មូលបត្ររដ្ឋាភិបាល មូលបត្រនៅមូលដ្ឋាន មូលបត្ររបស់ក្រុមហ៊ុនឯកជន រួមនឹងបណ្ដាភាគហ៊ុនផ្សេងៗទៀត។ ផ្សារមូលបត្រចិន ជាប់ចំណាត់ថ្នាក់ទី3 ក្នុងចំណោមផ្សារមូលបត្រធំៗរបស់ពិភពលោក ដោយមានកំណើនជាប្រចាំ ជាង 13លានលានដុល្លារ។

ក្រុមអ្នកវិនិយោគបរទេស រួមមានមូលនិធិវិនិយោគ ក្រុមហ៊ុនគ្រប់គ្រងទ្រព្យសម្បត្តិ មូលនិធិការពារហានិភ័យជាដើម កាន់កាប់ភាគហ៊ុននៅប្រទេសចិនចំនួន 2.19លានលានយន់ (308ពាន់លានដុល្លារអាមេរិក) ក្នុងឆ្នាំ2019 ពោលគឺកើនឡើងច្រើនបើធៀបនឹង 457.8ពាន់លានយន់ (64.4ពាន់លានដុល្លារ) ក្នុងឆ្នាំ2018៕

ប្រភព៖ សារព័ត៌មានបរទេស

June 3, 2020

អាមេរិកាំងត្រៀមទាមទារឱ្យចិនសងបំណុលរាប់លានលានដុល្លារដែលចិនបានខ្ចីពីអាមេរិកកាលពីអតីតកាល

ខ្ទង់បំណុលសរុប 1.6លានលានដុល្លារដែលចិនបានខ្ចីពីសហរដ្ឋអាមេរិក ពេលនេះត្រូវបានអាមេរិកាំងចាត់ទុកជាឧបករណ៍មួយដែលអាចយកមកដាក់ទណ្ឌកម្មចិនទាក់ទិននឹងវិធានការទប់ទល់នឹង COVID-19 ក្នុងដំណាក់កាលដំបូងដ៏ធូររលុងរបស់ចិន បណ្ដាលឱ្យសេដ្ឋកិច្ចពិភពលោករងផលវិបាកធ្ងន់ធ្ងរ។

នៅពេលដែលមេរោគរាតត្បាត COVID-19 កំពុងតែវាយប្រហារពិភពលោក ក្រុមមន្ត្រីចិន និងអាមេរិកាំងក៏កំពុងតែទម្លាក់កំហុងដាក់គ្នាទាក់ទិននឹងប្រភព ក៏ដូចជាវិធានការទប់ទល់នឹងវីរុសនេះ។ រដ្ឋាភិបាលអាមេរិកាំងថ្មីៗនេះយល់ថា ខ្ទង់ប្រាក់បំណុល1.6លានលានដុល្លារ(1,600,000,000,000) ដែលចិនបានខ្ចីពីសហរដ្ឋអាមេរិកកាលពីជិត1សតវត្សមុននឹងជួយឱ្យអាមេរិកាំងមានហេតុផលកាន់តែច្រើនដើម្បីដាក់សម្ពាធទៅលើទីក្រុងប៉េកាំង។

មូលនិធិមូលបត្រអាមេរិកាំងដែលមានទីស្នាក់ការនៅ Lewisburg ក្នុងរដ្ឋ Tennessee បច្ចុប្បន្នក្ដោបក្ដាប់ឯកសារបំណុលទាំងដើមទាំងការសរុប1.6លានលានដុល្លារអាមេរិកដែលប្រទេសចិនជំពាក់នៅមុនពេលបក្សសាធារណរដ្ឋប្រជាមានិតចិនត្រូវបានបង្កើតឡើង។

មូលនិធិនេះមានបំណងឱ្យរដ្ឋសភាអាមេរិកាំងជួយជ្រោមជ្រែកពួកគេក្នុងការទាមទារប្រាក់បំណុលនេះមកវិញ។ មូលបត្របំណុលនេះត្រូវបានខ្ចីដោយសាធារណរដ្ឋចិន(សាធារណរដ្ឋចិន/Republic of China/ROC ដែលបានផ្ដួលរំលំរាជរដ្ឋាភិបាលក្នុងព្រឹត្តិការណ៍រដ្ឋប្រហារមួយ) ចាប់ពីឆ្នាំ1912 រហូតដល់រដ្ឋាភិបាលនេះក្ស័យធននៅឆ្នាំ1938។ រដ្ឋាភិបាលនៃសាធារណរដ្ឋចិនបានរត់ទៅកាន់កោះតៃវ៉ាន់ ដែលកាលណោះនៅជាទីស្នាក់ការរបស់រដ្ឋាភិបាលផ្លូវការនោះឡើយ ក្រោយពីប្រទេសចិនដីគោកត្រូវបានបក្សកុម្មុយនិស្តរបស់លោកម៉ៅសេទុងដណ្ដើមយកមកគ្រប់គ្រងទាំងស្រុង ក្រោយពីបានបញ្ចប់បដិវត្តន៍នាឆ្នាំ1949។

យោងតាមច្បាប់ ទីក្រុងប៉េកាំងចាត់ទុកកោះតៃវ៉ាន់ជាផ្នែកមួយរបស់ប្រទេសចិន។ មិនត្រឹមតែប៉ុណ្ណោះ រដ្ឋាភិបាលដែលឡើងកាន់កាប់អំណាចបន្ទាប់ត្រូវទទួលខុសត្រូវចំពោះខ្ទង់បំណុលដែលរដ្ឋាភិបាលមុនៗបានខ្ចីពីបរទេស។

ប្រធានាធិបតី Trump គឺជាមនុស្ស “ម៉ាត់ណាម៉ាត់ហ្នឹង (កាន់ពាក្យសច្ច) ហើយគាត់ថ្លែងថានឹងអនុវត្តកិច្ចព្រមព្រៀងនេះដើម្បីឱ្យចិនទទួលខុសត្រូវ” នេះបើតាមសម្ដីរបស់លោក Jon Jonna Bianco ដែលជាប្រធានមូលនិធិមូលបត្រអាមេរិកាំង ដែលបានឆ្លើយតបទៅនឹងសារព័ត៌មាន Fox Business។

Bianco ដែលជាអ្នកកាន់កាប់ឯកសារ និងមានសិទ្ធិគ្រប់គ្រងមូលបត្របំណុលចំនួន95% ដែលបរទេសខ្ចីពីសហរដ្ឋអាមេរិក យល់ថា ការជំរុញឱ្យចិនសងបំណុលខាងលើ មិនមែនជាការដាក់ទណ្ឌកម្មនោះទេ ប៉ុន្តែវាគឺជាការទារបំណុលអន្តរជាតិតាមធម្មតាតែប៉ុណ្ណោះ។

កន្លងមកក៏ធ្លាប់មានបញ្ហាស្រដៀងគ្នានេះដែរ៖ នាយករដ្ឋមន្ត្រីអង់គ្លេស Margaret Thatcher កាលពីឆ្នាំ1987 បានតម្រូវឱ្យទីក្រុងប៉េកាំងរកប្រាក់ពីមូលបត្រនានាដែលជារបស់ប្រទេសអង់គ្លេស ឱ្យបាន 23.5លានផោន បើមិនដូច្នេះទេប្រទេសចិននឹងបាត់បង់សិទ្ធិក្នុងការរកស៊ីក្នុងទីផ្សារអង់គ្លេស។ ប្រធានាធិបតីចិនពេលនោះគឺលោក Li Xiannian។

ខាងលើនេះគឺជាសកម្មភាពបន្ថែមខ្លះៗនៅក្នុងសង្គ្រាមផ្សេងៗក្រៅពីគ្រាប់រំសេវរវាងអាមេរិកាំង និងចិន ដែលចាប់ផ្ដើមដោយសង្គ្រាមពាណិជ្ជកម្ម សង្គ្រាមហិរញ្ញវត្ថុ។ល។

ប្រភព៖ សារព័ត៌មានបរទេស

May 18, 2020

សហរដ្ឋអាមេរិក “ទាមទារ” ឱ្យចិនលុបចោលបំណុលដើម្បីជាសំណងសម្រាប់ការខាតបង់ដោយសារ COVID-19

ក្រុមមន្ត្រីសេតវិមានបានពិនិត្យទៅលើគំនិតមួយដែលថា នឹងទាមទារឱ្យមានការលុបចោលទាំងស្រុង ឬមួយផ្នែកនៃបំណុលដែលមានទំហំ1.1លានលានដុល្លារដែលអាមេរិកាំងបានខ្ចីពីចិន។

ក្រុមអ្នកវិភាគបានឱ្យដឹងថា ប្រទេសចិនអាចនឹងកាត់បន្ថយបរិមាណនៃការក្ដោបក្ដាប់ភាគហ៊ុននៅក្នុងរតនាគារជាតិនៃសហរដ្ឋអាមេរិកក្នុងអំឡុងប៉ុន្មានខែខាងមុខ ដើម្បីទប់ទល់នឹងភាពតានតឹងនៃសង្គ្រាមពាណិជ្ជកម្មដែលកំពុងកើនកម្ដៅ និងសង្គ្រាមពាក្យសម្ដីរវាងប្រទេសទាំងពីរទាក់ទិននឹងប្រភពរបស់វីរុសCOVID-19។

របាយករណ៍សារព័ត៌មានរបស់សហរដ្ឋអាមេរិកបានឱ្យដឹងថា ក្រុមមន្ត្រីនៅសេតវិមាន កំពុងតែពិភាក្សាគ្នាអំពីវិធានការសំខាន់មួយចំនួន ដើម្បីប៉ះប៉ូវទៅលើប្រាក់ចំណាយសម្រាប់ទប់ទល់នឹងវិបត្តិសុខភាព ក្នុងនោះមានវិធានការលុបចោលទាំងស្រុង ឬមួយផ្នែកនៃបំណុលសរុបប្រមាណជាជិត1.1លានលានដុល្លារ ដែលរដ្ឋាភិបាលអាមេរិកាំងកំពុងជំពាក់ប្រទេសចិន។

ក្រុមអ្នកវិភាគយល់ថា សហរដ្ឋអាមេរិកពិបាកក្នុងការលើកឡើង “ជម្រើសធ្ងន់ធ្ងរ” បែបនេះ ព្រោះថា ជាក់ស្ដែងគំនិតនេះអាចជំរុញឱ្យទីក្រុងប៉េកាំងស្វែងរកវិធីការពារខ្លួនពីហានិភ័យ ដោយធ្វើការកាត់បន្ថយប្រាក់កម្ចីសម្រាប់រដ្ឋាភិបាលអាមេរិកាំង។

ប្រការខាងលើអាចបង្កបញ្ហាធំដល់ទីផ្សារមូលបត្ររបស់រដ្ឋាភិបាលអាមេរិកាំងនៅក្នុងអំឡុងពេលបច្ចុប្បន្ន ខណៈដែលទីក្រុងវ៉ាស៊ីងតោនកំពុងបង្កើនការបោះពុម្ភផ្សាយមូលបត្រថ្មីដើម្បីយកប្រាក់មកប្រើប្រាស់ក្នុងសកម្មភាពទប់ទល់នឹងវីរុសកូរ៉ូណា និងប៉ះប៉ូវការខូចខាតផ្នែកសេដ្ឋកិច្ចដែលបង្កឡើងដោយមេរោគរាតត្បាតនេះ។

កិច្ចពិភាក្សាទាក់ទិននឹងបញ្ហាហិរញ្ញវត្ថុរវាងប្រទេសចិន និងសហរដ្ឋអាមេរិក ត្រូវបានក្រុមមន្ត្រីអាមេរិកាំងធ្វើឡើងស្របពេលដែលប្រធានាធិបតី Donald Trump និងក្រុមមន្ត្រីរដ្ឋាភិបាលជាច្រើនរូបផ្សេងទៀត បានរិះគន់ទីក្រុងប៉េកាំងដែលបានបណ្ដោយឱ្យវីរុសCOVID-19 ផ្ទុះឆ្លងរាលដាល និងព្រមានថានឹងយកពន្ធនាំចូលថ្មី ដើម្បីដាក់ទណ្ឌកម្មប្រទេសចិន។

ក្រុមអ្នកវិភាគបានព្រមានថា “រាល់សកម្មភាពដែលធ្វើឡើងដើម្បីលុបបំណុលរបស់ចិន នឹងធ្វើឱ្យមានប្រតិកម្មផ្ទុយពីការចង់បានរបស់សហរដ្ឋអាមេរិក។ ព្រោះថា ប្រការនោះអាចបំផ្លាញទំនុកចិត្តរបស់អ្នកវិនិយោគទៅលើសមត្ថភាពផ្នែកហិរញ្ញវត្ថុរបស់សហរដ្ឋអាមេរិក ហើយពួកគេនឹងយល់ថា ប្រទេសនេះមិនអាចទូទាត់ការចំណាយរបស់ខ្លួនបាន ដោយត្រូវពឹងផ្អែកទៅលើការលុបបំណុលរបស់ចិន”។

ក្រសួងរតនាគារជាតិសហរដ្ឋអាមេរិក(United States Department of the Treasury)

បញ្ហាខាងលើក៏នឹងរុញច្រានអត្រាការប្រាក់ឱ្យឡើងខ្ពស់ បណ្ដាលឱ្យមានការខាតបង់ច្រើននៅពេលរដ្ឋាភិបាល ក៏ដូចជាក្រុមហ៊ុន និងអ្នកប្រើប្រាស់នៅសហរដ្ឋអាមេរិកត្រូវការប្រាក់កម្ចី ហើយពេលនោះ បញ្ហាទាក់ទិនទាំងឡាយក៏នឹងកើតឡើង ក្លាយជាបន្ទុកដ៏ធ្ងន់ធ្ងរទៅលើខឿនសេដ្ឋកិច្ចសហរដ្ឋអាមេរិកថែមមួយកម្រិតទៀត ខណៈដែលវាកំពុងតែខ្សោយស្រាប់។

ដំណឹងខាងលើនេះ ប្រហែលជាធ្វើឱ្យថ្នាក់ដឹកនាំប្រទេសចិន មានការព្រួយបារម្ភអំពីហានិភ័យកាន់តែមានច្រើនឡើងទាក់ទិននឹងការដែលប្រទេសចិនកំពុងកាន់កាប់ខ្ទង់បំណុលដ៏ធំរបស់រដ្ឋាភិបាលអាមេរិកាំងក្នុងអំឡុងទំនាក់ទំនងរបស់ប្រទេសទាំងពីរ ហាក់កំពុងល្អក់កករយ៉ាងឆាប់រហ័ស នេះបើតាមមតិរបស់ក្រុមអ្នកវិភាគ។

នៅក្នុងទសវត្សរ៍កន្លងទៅ មានការអំពាវនាវជាច្រើនដែលស្នើឱ្យប្រទេសចិនលុបខ្ទង់បំណុលដ៏ធំដែលចិនបាន និងកំពុងកាន់កាប់នៅក្នុងរតនាគារជាតិអាមេរិកាំង។

ប្រទេសចិនអាចសងសឹកចំពោះការគំរាមរបស់សហរដ្ឋអាមេរិក ដោយការបង្កឱ្យមានវិបត្តិទាក់ទិននឹងតម្លៃរូបិយប័ណ្ណដុល្លារអាមេរិក និងទីផ្សារហិរញ្ញវត្ថុ ដោយការបញ្ចេញលក់មូលបត្ររបស់ខ្លួននៅក្នុងរតនាគារជាតិអាមេរិកាំង។ កត្តានេះនឹងរុញច្រានតម្លៃមូលបត្ររបស់រដ្ឋាភិបាលអាមេរិកាំងឱ្យធ្លាក់ចុះ និងបង្កើតបានជាមហន្តរាយហិរញ្ញវត្ថុជាសកល។

កន្លងមក ធ្លាប់មានការអំពាវនាវដល់ប្រទេសចិន ឱ្យធ្វើពិពិធកម្មទៅលើទុនបម្រុងនៅបរទេសរបស់ខ្លួនដើម្បីចៀសវាងហានិភ័យអាក្រក់កើតឡើង។ បច្ចុប្បន្ន ក្នុងចំណោមទុនបម្រុងអន្តរជាតិចំនួន3លានលានដុល្លាររបស់ចិន នៅបរទេស គឺមានដល់ទៅ1ភាគ3ឯណោះដែលនៅក្នុងរតនាគារជាតិនៃសហរដ្ឋអាមេរិក។

របាយការណ៍ថ្មីបំផុតរបស់ក្រសួងហិរញ្ញវត្ថុសហរដ្ឋអាមេរិកបានឱ្យដឹងថា ចំនួនមូលបត្រនៃរដ្ឋាភិបាលអាមេរិកាំងដែលកំពុងត្រូវបានកាន់កាប់ដោយប្រទេសចិន បានថយចុះមកនៅត្រឹម1.09លានលានដុល្លារក្នុងខែកុម្ភៈ គឺតិចជាងបើធៀបនឹង1.32លានលានដុល្លារកាលពីខែវិច្ឆិកា ឆ្នាំ2013។ ប្រទេសចិន ធ្លាប់ត្រូវបានប្រទេសជប៉ុននាំមុខកាលពីឆ្នាំមុន ក្នុងនាមជាម្ចាស់បរទេសធំបំផុតរបស់រតនាគារជាតិនៃសហរដ្ឋអាមេរិក៕

ប្រភព៖ សារព័ត៌មានបរទេស

May 9, 2020

Tag: បំណុល