បង្ហាញ - La Reine Media

CEO របស់ Xiaomi បង្ហើបឱ្យដឹងតម្លៃរបស់រថយន្តអគ្គិសនីដែលជិតបង្ហាញខ្លួន

អគ្គនាយកប្រតិបត្តិរបស់ក្រុមហ៊ុនចិន Xiaomi នាថ្ងៃនេះ បានឱ្យដឹងថា គោលដៅរបស់លោកសម្រាប់រថយន្តអគ្គិសនីដំបូងរបស់ក្រុមហ៊ុន គឺវានឹងជា «រថយន្តស្អាតបំផុត ងាយស្រួលបើកបរបំផុត និងឆ្លាតវៃបំផុត» ហើយមានតម្លៃក្រោម 69,424 ដុល្លារអាម៉េរិក។

នៅថ្ងៃទី 28 ខាងមុខ Xiaomi នឹងប្រកាសតម្លៃជាផ្លូវការ ហើយក៏ចាប់ផ្ដើមទទួលការបញ្ជាទិញសម្រាប់រថយន្តអគ្គិសនី SU7។

លោក Lei Jun ដែលជា CEO របស់ Xiaomi បានអួតថា SU7 មានបច្ចេកវិទ្យាដែលអាចបង្កើនល្បឿនបានល្អជាងរថយន្តអគ្គិសនី Tesla របស់អាម៉េរិក និង Porsche របស់អាល្លឺម៉ង់ទៅទៀត។

March 25, 2024

បណ្ដាញផ្លូវដែកលើឋានព្រះចន្ទ នឹងបង្ហាញខ្លួននាពេលអនាគត

បណ្ដាញផ្លូវរថភ្លើងលើឋានព្រះចន្ទ អាចដឹកមនុស្ស ទំនិញ និងធនធានធម្មជាតិ សម្រាប់បម្រើដល់សកម្មភាពពាណិជ្ជកម្ម និងរួមចំណែកទៅក្នុងសេដ្ឋកិច្ចអវកាស។

ស្ថាប័នគ្រប់គ្រងបណ្ដាគម្រោងស្រាវជ្រាវការពារជាតិទំនើបអាម៉េរិក (DARPA) បានជ្រើសយកក្រុមហ៊ុនបច្ចេកវិទ្យាការពារជាតិ និងអវកាសចរណ៍ Northrop Grumman ដើម្បីអភិវឌ្ឍគំនិតស្ដីពីការស្ថាបនាផ្លូវដែកលើឋានព្រះចន្ទ។ នេះគឺជាផ្នែកមួយនៅក្នុងការស្រាវជ្រាវអំពីស្ថាបត្យកម្មព្រះចន្ទរយៈពេល 10 ឆ្នាំ (LunA-10) ដែល ADRPA ប្រកាសកាលពីឆ្នាំកន្លង ដោយមានការចូលរួមពីក្រុមហ៊ុនចំនួន 14 ផ្សេងទៀត។ នេះបើតាមការចុះផ្សាយរបស់ Interesting Engineering កាលពីថ្ងៃទី 20 មីនា។

ជាមួយនឹងគម្រោង LunA-10 ស្ថាប័ន DARPA សង្ឃឹមថា អាចរកឃើញដំណោះស្រាយសម្រាប់ការបង្កើតប្រព័ន្ធពហុមុខងារនៅលើឋានព្រះចន្ទ ដោយប្រព័ន្ធមួយអាចបំពេញភារកិច្ចច្រើន តាំងពីការផ្គត់ផ្គង់អគ្គិសនីគ្មានខ្សែ ស្ថានីយទំនាក់ទំនង រហូតដល់តួនាទីជាមជ្ឈមណ្ឌលកំណត់ទិសជាដើម។

Northrop Grumman គឺជាក្រុមហ៊ុនដំបូងដែលបង្ហើបឱ្យដឹងតួនាទីនៅក្នុងគម្រោង ដែលនឹងអភិវឌ្ឍបច្ចេកទេសស្ថាបនាផ្លូវដែកលើឋានព្រះចន្ទ។

ដូចទៅនឹងវត្តមានដំបូងរបស់ផ្លូវដែកកាលពីសតវត្សរ៍ទី 19 ដែលបានជួយបង្កើនសកម្មភាពសេដ្ឋកិច្ចនៅភាគខាងលិចសហរដ្ឋអាម៉េរិក បច្ចេកវិទ្យាថ្មីត្រូវបានរំពឹងថា នឹងចាប់ផ្ដើម ក៏ដូចជារក្សាកំណើនសេដ្ឋកិច្ចនៅលើផ្ទៃព្រះចន្ទ។

យោងតាមក្រុមហ៊ុនខាងលើ បណ្ដាញផ្លូវដែកឋានព្រះចន្ទ អាចដឹកមនុស្ស ទំនិញ និងធនធានធម្មជាតិ សម្រាប់បម្រើដល់សកម្មភាពពាណិជ្ជកម្ម និងរួមចំណែកទៅក្នុងសេដ្ឋកិច្ចអវកាសរបស់សហរដ្ឋអាម៉េរិក និងដៃគូសហការអន្តរជាតិ។

March 22, 2024

ឱសថមានប្រសិទ្ធភាពដូចការហាត់ប្រាណ ជិតមានក្នុងទីផ្សារ!

ក្រុមអ្នកស្រាវជ្រាវឱ្យដឹងថា ពួកគេកំពុងតែឆ្ពោះទៅជិតដល់គោលដៅនៃការអភិវឌ្ឍជោគជ័យនូវប្រភេទថ្នាំដែលមានប្រសិទ្ធភាពដូចទៅនឹងការហាត់ប្រាណ។

យោងតាមទំព័រ Newsweek ចុះផ្សាយកាលពីថ្ងៃទី 18 ខែមីនា ឆ្នាំ 2024 នៅក្នុងកិច្ចប្រជុំរបស់សមាគមគីមីសាស្ត្រអាម៉េរិក (ACS) ក្រុមអ្នកវិទ្យាសាស្ត្របានបង្ហាញប្រភេទថ្នាំដែលពួកគេកំពុងអភិវឌ្ឍ។ ថ្នាំនេះមានផ្ទុកសមាសធាតុដែលមានប្រសិទ្ធភាពប្រហាក់ប្រហែលនឹងការហាត់ប្រាណ។

នៅពេលហាក់ប្រាណ រាងកាយនឹងធ្វើឱ្យមានប្រតិកម្មគីមី ដែលហៅថា មេតាបូលីស។ នៅពេលលេបថ្នាំដែលមានឈ្មោះថា SLU-PP-332 នេះ រាងកាយអ្នកលេបនឹងមានប្រតិកម្មគីមីដូចទៅនឹងការហាត់ប្រាណ។

លទ្ធផលនៃការពិសោធលើសត្វកណ្ដុរបង្ហាញថា ថ្នាំនេះជួយពង្រឹងសរសៃសាច់ដុំ កាត់បន្ថយអាការអស់កម្លាំង និងកែលម្អសុខភាពរបស់សត្វកណ្ដុរ។ ការស្រាវជ្រាវក្រោយមក បានផ្ដោតទៅលើការបង្កើនប្រសិទ្ធភាពនៃស្ថិរភាព និងកាត់បន្ថយហានិភ័យកើតមានជាតិពុលរបស់ថ្នាំ។

ទោះជាយ៉ាងណាក៏ដោយ ក្រុមអ្នកស្រាវជ្រាវឱសថនេះក៏មិនលើកទឹកចិត្តឱ្យប្រើប្រាស់ថ្នាំ SLU-PP-332 ជំនួសឱ្យការហាត់ប្រាណ។ ឱសថនេះផ្ដោតទៅលើតែក្រុមមនុស្សដែលបាត់បង់លទ្ធភាពបញ្ចេញកម្លាំងដោយសារតែបញ្ហាសុខភាព ក៏ដូចជាការបង្កើនប្រសិទ្ធភាពនៃការធ្វើលំហាត់ប្រាណរបស់មនុស្សចាស់ អ្នកស្វិតសាច់ដុំ ឬមានជំងឺប្រចាំកាយណាមួយ។

លោក Bahaa Elgendy សាស្ត្រាចារ្យប្រចាំសាលាវេជ្ជសាស្ត្រនៃសាកលវិទ្យាល័យ Washington ដែលជាប្រធានក្រុមស្រាវជ្រាវនេះ ឱ្យដឹងថា បើសិនជាជោគជ័យក្នុងការអភិវឌ្ឍថ្នាំនេះ ក្រុមអ្នកវិទ្យាសាស្ត្រអាចរកវិធីព្យាបាលជំងឺមួយចំនួន មានជាអាទិ៍ ជំងឺខ្សោយសរសៃប្រសាទ និងខ្សោយបេះដូងជាដើម។

SLU-PP-332 និងសមាសធាតុផ្សេងទៀត ក៏ត្រូវបានគេជឿថា មានប្រសិទ្ធភាពក្នុងការទប់ស្កាត់ជំងឺខ្សោយតម្រងនោម ខ្សោយបេះដូង លើសទម្ងន់ និងជំងឺភ្លេចភ្លាំង (Alzheimer) ទៀតផង។

March 21, 2024

BYD បង្ហាញកំណែថ្មីរបស់ Frigate 07 ជាមួយនឹងតម្លៃទាបជាង 13%

BYD កំពុងអភិវឌ្ឍកំណែចាស់នៃរថយន្តអគ្គិសនីរបស់ខ្លួន។ ពេលនេះ ដល់វេន Frigate ដែលជា SUV លំដាប់កំពូលរបស់គ្រួសារ Ocean ដែលត្រូវបានកែលម្អ។

កាលពីថ្ងៃទី 18 មីនា BYD បានបង្ហាញកំណែថ្មីរបស់ SUV Frigate 07 និងមានឈ្មោះថា Frigate 07 Glory Edition។ កំណែថ្មីនេះមានតម្លៃចាប់ពី 24,980 ដុល្លារអាម៉េរិក។

ទំហំរូបរាងរបស់ Frigate 07 Glory Edition មិនប្រែប្រួល ពោលគឺ មានបណ្ដោយ ទទឹង និងកម្ពស់ជាបន្ទាប់គឺ 4,820, 1,920 និង 1,750 មិល្លីម៉ែត្រ។ ចំណែកប្រវែងបណ្ដោយជាមូលដ្ឋានគឺ 2,820 មិល្លីម៉ែត្រ។

BYD លក់រថយន្តអគ្គិសនីបាន 122,311 គ្រឿងក្នុងខែកុម្ភៈ 2024។ ក្រុមហ៊ុននេះកំពុងជំរុញការបន្ទាន់សម័យរថយន្តអគ្គិសនីរបស់ខ្លួន ដោយសង្ឃឹមថា នឹងអាចពន្លឿនដំណើរការដណ្ដើមយកចំណែកទីផ្សាររបស់រថយន្តអគ្គិសនី ពីរថយន្តប្រើប្រាស់ម៉ាស៊ីនចំហេះក្នុង។

March 19, 2024

ទីផ្សាររថយន្តអគ្គិសនីនៅអាស៊ីអាគ្នេយ៍ នឹងផ្ទុះការពេញនិយមខ្លាំងក្លា

ដោយសារតែមានការបារម្ភអំពីការប្រែប្រួលអាកាសធាតុ រថយន្តអគ្គិសនីកំពុងទទួលបានការយកចិត្តទុកដាក់កាន់តែខ្លាំងពីសំណាក់អ្នកប្រើប្រាស់ រដ្ឋាភិបាល ក្រុមហ៊ុន និងអ្នកវិនិយោគនៅទូទាំងសកលលោក។

នៅតំបន់អាស៊ីអាគ្នេយ៍ ទីផ្សាររថយន្តអគ្គិសនីនៅមានភាពក្មេងខ្ចីនៅឡើយ ដោយរួមចំណែកមិនដល់ 2% នៃរថយន្តអគ្គិសនីទូទាំងពិភពលោក។ ក៏ប៉ុន្តែ ការសិក្សាស្រាវជ្រាវមួយរបស់អង្គការ EY បង្ហាញថា ចំនួនរថយន្តអគ្គិសនីនៅក្នុងប្រទេសចំនួន 6 ក្នុងតំបន់នេះ ដែលរួមមាន ឥណ្ឌូណេស៊ី ម៉ាឡេស៊ី ថៃ សិង្ហបុរី ហ្វ៊ីលីពីន និងវៀតណាម នឹងបានឃើញកំណើនទ្វេគុណជារៀងរាល់ឆ្នាំ ដោយនឹងសម្រេចបានពី 16 ទៅ 39% ក្នុងដំណាក់កាលពីឆ្នាំ 2021 ដល់ 2035។

យោងតាមអង្គការ EY ប្រាក់ចំណូលប្រចាំឆ្នាំនៃវិស័យរថយន្តអគ្គិសនីក្នុងតំបន់អាស៊ីអាគ្នេយ៍ក្នុងដំណាក់កាលខាងលើ គ្រោងនឹងសម្រេចបានពី 80 ទៅ 100 ពាន់លានដុល្លារអាម៉េរិក ខ្ពស់ជាងឆ្ងាយបើធៀបនឹង 2 ពាន់លានដុល្លារក្នុងឆ្នាំ 2021។

នៅកម្ពុជា ក៏មានក្រុមហ៊ុនមួយកំពុងផលិត និងចែកចាយត្រីចក្រយានយន្តអគ្គិសនី

ការកើនឡើងនៃចំនួនយានយន្តអគ្គិសនីនេះ គ្រោងនឹងកើតមានចំពោះយានយន្តអគ្គិសនីទាំងបីប្រភេទ រួមមាន រថយន្តទេសចរណ៍ រថយន្តពាណិជ្ជកម្ម និងទោ/ត្រីចក្រយានយន្ត។

March 19, 2024

រថយន្ត Ford Ranger 2024 បានបង្ហាញខ្លួនក្នុងទីផ្សារប្រទេសកម្ពុជាហើយ!

កាលពីថ្ងៃទី ១៥ ខែមីនា ឆ្នាំ២០២៤ ផ្នែកលក់រថយន្ត ហ្វដ នៃក្រុមហ៊ុន អ អិម អេ (ខេមបូឌា) – RMA (Cambodia) PLC បានធ្វើពិធីដាក់បង្ហាញជាផ្លូវការរថយន្ត Ford Ranger ស៊េរីឆ្នាំ2024 ក្រោមអធិបតីភាពរបស់ លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) និងលោក David Jeffrey នាយកគ្រប់គ្រងប្រចាំតំបន់ទីផ្សារអាស៊ីប៉ាស៊ីហ្វិក និងកូរ៉េខាងត្បូង នៃក្រុមហ៊ុន Ford Motor Company រួមទាំងគណៈគ្រប់គ្រង បុគ្គលិកនៃក្រុមហ៊ុន អ អិម អេ (ខេមបូឌា) ភ្ញៀវកិត្តិយស អតិថិជនហ្វដ និងមិត្តអ្នកសារព័ត៌មានចូលរួមប្រមាណជាង 2,000 នាក់ នៅមជ្ឈមណ្ឌល ដឹ ព្រេមៀ សេនធ័រ សែនសុខ – The Premier Center Sen Sok ។

នៅវេលាម៉ោង ៩ព្រឹក ដល់ ៤ល្ងាច គឺមានការបើកបរសាកល្បងសម្រាប់រថយន្ត Ford Ranger ស៊េរីឆ្នាំ2024 ដែលមានការបង្ហាញអំពីបច្ចេកវិទ្យាទំនើបៗដែលមានបំពាក់ក្នុងរថយន្ត រួមទាំងធ្វើការបង្ហាញនូវសមត្ថភាពជើងក្រោម និង កម្លាំងនៃម៉ាស៊ីនម៉ាស៊ូត 2.0L Bi-Turbo ដែលផ្តល់នូវផាសុកភាពក្នុងការបើកបរ និងបច្ចេក វិទ្យាទំនើបផ្សេងៗទៀតរបស់រថយន្ត Ford Ranger ស៊េរីឆ្នាំ2024។ ជាពិសេស អតិថិជនដែលបានចូលរួមក៏មានការលេងល្បែងកម្សាន្ត និងទទួលបានកាដូវត្ថុអនុសាវរីន៏ជាច្រើនទៀតពីក្រុមហ៊ុន ហ្វដ។ មិនតែប៉ុណ្ណោះ រថយន្ត Ford Ranger Wildtrak ស៊េរីឆ្នាំ2024 និងរថយន្ត Ford Ranger XLT ស៊េរីឆ្នាំ2024 ក៏មានបំពាក់នូវឈ្នាន់ជាន់ជើងផ្នែកចំហៀងខាងក្រោយ ដែលបង្កភាពងាយស្រួលក្នុងការឡើងចុះរថយន្ត ដោយពុំចាំបាច់ឡើងតាមកង់រថយន្តនោះទេ។

ជាកិច្ចចាប់ផ្តើមកម្មវិធី លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) បានមានប្រសាសន៍ ថា៖ “ក្រុមហ៊ុន អ អិម អេ (ខេមបូឌា) គឺជាក្រុមហ៊ុនមួយដែលឈានមុខគេក្នុងទីផ្សាររថយន្តថ្មី ហើយភាពពេញនិយម និងភាពល្បីល្បាញនេះ ដោយសារតែទទួលបានការគាំទ្រ ពីសំណាក់បងប្អូនប្រជាពលរដ្ឋកម្ពុជាមកលើរថយន្ត Ford Ranger និងភាពជឿជាក់ទៅលើគុណភាព និងសេវាកម្មផ្តល់ជូនអតិថិជន។”

លោក David Jeffrey នាយកគ្រប់គ្រងប្រចាំតំបន់ទីផ្សារអាស៊ីប៉ាស៊ីហ្វិក និងកូរ៉េខាងត្បូង នៃក្រុមហ៊ុន Ford Motor Company បានមានប្រសាសន៍ថា៖ “រថយន្ត Ford Ranger គឺជាដៃគូដ៏មានទំនុក ចិត្តសម្រាប់អតិថិជនដែលប្រើប្រាស់ជាលក្ខណៈគ្រួសារ ការងារ ប្រកបអាជីវកម្ម និងជាពិសេស សម្រាប់អ្នកចូលចិត្តធ្វើដំណើរកម្សាន្តបែបផ្សងព្រេងជាដើម។ ការលក់របស់រថយន្ត Ford Ranger ត្រូវបានគ្របដណ្តប់លើទីផ្សារជាង ១៨០ ប្រទេសជុំវិញពិភពលោក ហើយសម្រាប់រថយន្ត Ford Ranger ស៊េរីថ្មីនេះ គឺនៅតែបន្តផ្តល់នូវភាពរឹងមាំ បច្ចេកវិទ្យាទំនើប និងប្រព័ន្ធសុវត្ថិភាពខ្ពស់លើសគេ ដែលបង្កភាពងាយស្រួលដល់អតិថិជនទាំងអស់ ក្នុងការបំពេញកិច្ចការងារផ្សេងៗរបស់ខ្លួន។ ខ្ញុំសូមថ្លែងអំណរគុណចំពោះអតិថិជន ហ្វដ ទាំងអស់ដែលបន្តគាំទ្រ និងជឿជាក់ទៅលើគុណភាព ប្រព័ន្ធសុវត្ថិភាព និងបច្ចេកវិទ្យារបស់រថយន្ត ហ្វដ។”

Ford Ranger ស៊េរីឆ្នាំ 2024 ត្រូវបានរចនាឡើងដោយកំណត់យកបទដ្ឋាន «Built Ford Tough» ដែលផ្តោតសំខាន់លើ ភាពធន់ រឹងមាំ ហាប់ណែន ទំនើបទាន់សម័យ និងប្រកបដោយផាសុកភាព ដែលជាគំនិតមួយដែលទទួលបានការគាំទ្រយ៉ាងច្រើនពីសំណាក់អតិថិជន។ លើសពីនេះទៅទៀត រថយន្ត Ford Ranger ស៊េរីឆ្នាំ 2024 ក៏នៅតែបន្តបំពាក់ដោយបច្ចេកវិទ្យាឆ្លាតវៃជាច្រើន ដើម្បីបង្កនូវភាពងាយស្រួលដល់អតិថិជនដូចជា កុងទ័រឌីជីថល 8អ៊ីញដែលផ្តល់ទិន្នន័យផ្សេងៗ រួមទាំងជម្រើស Mode ទៅតាមស្ថានភាពផ្លូវចំនួន ៦ រួមមាន Normal, Eco, Tow/Hual, Slippery, Mud/Ruts, និង Sand, អេក្រង់ Multi-Touchscreen 12អ៊ីញ ដែលភ្ជាប់ជាមួយបច្ចេកវិទ្យា SYNC4A ដែលអាចភ្ជាប់ជាមួយនឹង Apple Carplay និង Android Auto តាមរយៈ Wireless និងកាមេរ៉ា 360^o រួមជាមួយប្រព័ន្ធសាកថ្មទូរស័ព្ទឥតខ្សែ និងប្រព័ន្ធចាប់ហ្វ្រាំងដោយស្វ័យប្រវត្តនៅពេលឈប់ស្តុប (Auto Hold) ។ល។

ពិសេសជាងនេះទៅទៀត រថយន្ត Ford Ranger ស៊េរីឆ្នាំ 2024 ក៏នៅតែផ្តល់នូវប្រព័ន្ធសុវត្ថិភាពទំនើបៗចុងក្រោយ ដើម្បីសម្រួលដល់ការបើកបររបស់អតិថិជន ដូចជាប្រព័ន្ធចង្កៀងឆ្លាតវៃដែលអាចរេតាមចង្កូត និងបែងចែកពន្លឺដោយស្វ័យប្រវត្ត ប្រព័ន្ធផ្តល់សញ្ញាគ្រោះថ្នាក់ពេលមានឧបសគ្គ ឬអ្នកថ្មើរជើងឆ្លងកាត់ និងប្រព័ន្ធចាប់ហ្រ្វាំងជាបន្ទាន់ដោយស្វ័យប្រវត្ត ប្រព័ន្ធជំនួយលើដៃចង្កូតបញ្ចៀសចេញពីគ្រោះថា្នក់ ប្រព័ន្ធចាប់ហ្រ្វាំងបន្ទាន់ក្រោយពេលមានការប៉ះទង្គិច ប្រព័ន្ធផ្តល់សញ្ញាគ្រោះថ្នាក់ និងប្រព័ន្ធចាប់ហ្រ្វាំងជាបន្ទាន់ដោយស្វ័យប្រវត្ត នៅពេលថយក្រោយ និងប្រព័ន្ធឆ្លាតវៃជាច្រើនទៀត ដើម្បីផ្តល់នូវទំនុកចិត្តដល់អតិថិជន។

រថយន្ត Ford Ranger Wildtrak ស៊េរីឆ្នាំ 2024 មានជម្រើសពណ៌ចំនួន ៦ពណ៌ ដើម្បីជាជម្រើសដល់អតិថិជន រួមមានពណ៌លឿងទុំ ពណ៌ទឹកក្រូច ពណ៌ខ្មៅ ពណ៌ប្រផេះ ពណ៌ទឹកប្រាក់ និងពណ៌ស និងរថយន្ត Ford Ranger XLT ស៊េរីឆ្នាំ2024 មានជម្រើសពណ៌ចំនួន ៦ពណ៌ ដូចគ្នា សម្រាប់ជាជម្រើសដល់អតិថិជន រួមមានពណ៌ខៀវ ពណ៌ទឹកក្រូច ពណ៌ខ្មៅ ពណ៌ប្រផេះ ពណ៌ទឹកប្រាក់ និងពណ៌ស ។ សម្រាប់តម្លៃនៃរថយន្ត Ford Ranger Wildtrak ស៊េរីឆ្នាំ 2024 គឺ $55,900 និងរថយន្ត Ford Ranger XLT ស៊េរីឆ្នាំ 2024 គឺ $46,900។ សូមទំនាក់ទំនងផ្នែកលក់តាមសាខានីមួយៗ: សាខាព្រះមុនីវង្ស 078 999 773, សាខាទឹកថ្លា 095 939 939, សាខាទូលសង្កែ 078 935 935, សាខាជ្រោយចង្វារ 017 999 027, សាខាខេត្តសៀមរាប 077 666 357 ឬ 088 9 666 357, សាខាខេត្តកំពង់ចាម 078 999 883 ឬ 088 3 999 883, សាខាភ្នំពេញថ្មី 011 255 229 / 077 722 999 និងសាខាបឹងបៃតង 099 999 747។

March 18, 2024

កំណប់ 1.1 លានឆ្នាំ ធ្វើឱ្យប្រវត្តិសាស្ត្រមនុស្សជាតិត្រូវចារឡើងវិញ

មនុស្សសម័យបុរាណ បានមកដល់ដែនដីមួយដែលបច្ចុប្បន្នជាប្រទេសចិន ឆាប់ជាងច្រើន បើធៀបនឹងការរកឃើញកន្លងមក និងមានបច្ចេកវិទ្យាជឿលឿនខ្លាំង។

ការសិក្សាស្រាវជ្រាវមួយដែលដឹកនាំដោយសាស្ត្រាចារ្យ PEI Shuwen មកពីសភាវិទ្យាសាស្ត្រចិន និងសាស្ត្រាចារ្យ Ignacio de la Torre មកពីវិទ្យាស្ថានប្រវត្តិសាស្ត្រ នៃក្រុមប្រឹក្សាស្រាវជ្រាវអេស្ប៉ាញ បានធ្វើឱ្យមានការប្រែប្រួលនូវពេលវេលានៃការវិវឌ្ឍរបស់មនុស្សជាតិ ដែលបានចារនាពេលកន្លង។

យោងតាមអត្ថបទនៅលើទស្សនាវដ្ដីវិទ្យាសាស្ត្រ PNAS ពួកគេបានវិភាគទៅលើឃ្លាំងវត្ថុបុរាណមួយដ៏មានតម្លៃ ដែលត្រូវបានរកឃើញនៅតំបន់ Nihewan ស្ថិតក្នុងខេត្ត Hunan ប្រទេសចិន និងរកឃើញថា ពួកវាមានអាយុកាល 1.1 លានឆ្នាំទៅហើយ។

អ្វីដែលគួរឱ្យភ្ញាក់ផ្អើលជាងនេះ គឺថា បច្ចេកវិទ្យាដែលបានប្រើប្រាស់សម្រាប់ច្នៃឧបករណ៍នានាក្នុងយុគថ្ម (Stone Age) គឺ Mode 2 ជាវិធីសាស្ត្រច្នៃឧបករណ៍ដែលទំនើបជាងយុគដំបូងដែលហៅថា Mode 1។

Mode 2 មានចំណុចពិសេស ព្រោះបច្ចេកទេសឆ្លាក់នៅលើដុំថ្មប្រកបដោយការយកចិត្តទុកដាក់ ហើយដំណាក់កាលនៃការផលិតត្រូវបានធ្វើឱ្យមានស្តង់ដា។ ក្រៅពីនេះ ឧបករណ៍មួយចំនួនថែមទាំងមានរន្ធខួងផងដែរ។

យោងតាម SciTech Daily បុរាណវិទូក៏បានរកឃើញបំណែកថ្មដែលបែកចេញពីឧបករណ៍ ជាមួយនឹងភាពស៊ីគ្នា ដែលបញ្ជាក់អំពីស្តង់ដានេះ។

Mode 2 គឺជាជំហានដ៏លេចធ្លោនៅក្នុងបច្ចេកវិទ្យារបស់មនុស្សសម័យដំបូង ដោយមានភាពស្មុគស្មាញ និងមានប្រសិទ្ធភាពក្នុងការប្រើប្រាស់ជាងឆ្ងាយ បើធៀបនឹង Mode 1។

កន្លងមក គេជឿថា ក្នុងមួយរយៈពេលវែង បច្ចេកវិទ្យានៅតំបន់អាស៊ីខាងកើត នៅតែប្រើប្រាស់វិធីសាស្ត្រច្នៃឧបករណ៍បែប Mode 1។

ការរកឃើញខាងលើ នាំមកនូវទិន្នន័យថ្មីសំខាន់ចំនួនពីរ៖

*ទីមួយ មនុស្សបុរាណច្រើនអំបូរបានបង្ហាញវត្តមាននៅអាស៊ីខាងកើត ដែលបច្ចុប្បន្នគឺជាប្រទេសចិន ឆាប់ជាងឆ្ងាយ បើធៀបនឹងការយល់ដឹងកន្លងមក។

*ទីពីរ ពួកមានបច្ចេកវិទ្យាជឿលឿនខ្លាំង ដែលអាចអភិវឌ្ឍសមត្ថភាពច្នៃឧបករណ៍ Mode 2 ឆាប់ជាងយ៉ាងតិចបំផុត 300,000 ឆ្នាំ បើធៀបនឹងទិន្នន័យនៃការសិក្សាស្រាវជ្រាវចាស់។

ដូច្នេះ អាស៊ីខាងកើតអាចមិនមែនជាតំបន់ដំបូងគេលើផែនដី ដែល Mode 2 បង្ហាញវត្តមាន ប៉ុន្តែគឺជាមួយក្នុងចំណោមតំបន់ដែលមនុស្សបាននាំបច្ចេកវិទ្យានេះមករស់នៅឆាប់ជាងគេ។ មូលហេតុនេះហើយ ប្រវត្តិសាស្ត្ររបស់មនុស្សជាតិ អាចត្រូវសរសេរឡើងវិញម្ដងទៀត៕

March 18, 2024

ក្រុមហ៊ុន RMA Cambodia បានប្រារព្ធពិធីសម្ពោធជាផ្លូវការទីតាំងប្រគល់រថយន្ត ហ្វដ លំដាប់អន្តរជាតិ

ក្រុមហ៊ុន អ អិម អេ (ខេមបូឌា) – RMA Cambodia ដែលជាក្រុមហ៊ុននាំចូល និងចែកចាយផ្តាច់មុខនូវរថយន្ត ហ្វដ មកកាន់ទីផ្សារព្រះរាជាណាចក្រកម្ពុជា បានប្រារព្ធពិធី “សម្ពោធជាផ្លូវការទីតាំងប្រគល់រថយន្ត ហ្វដ សាខាបឹងបៃតង” ក្រោមអធិបតីភាពរបស់ លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) និងលោក David Jeffrey នាយកគ្រប់គ្រងប្រចាំតំបន់ទីផ្សារអាស៊ីប៉ាស៊ីហ្វិក និងកូរ៉េខាងត្បូង នៃក្រុមហ៊ុន Ford Motor Company រួមទាំងគណៈគ្រប់គ្រង បុគ្គលិកនៃក្រុមហ៊ុន អ អិម អេ (ខេមបូឌា) ភ្ញៀវកិត្តិយស អតិថិជនហ្វដ និងមិត្តអ្នកសារព័ត៌មានប្រមាណជាង ២០០ នាក់។

លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) បានមានប្រសាសន៍ថា៖ “ក្រុមហ៊ុន អ អិម អេ ជាក្រុមហ៊ុនដែលមានចំណែកទីផ្សាររថយន្តថ្មីធំជាងគេនៅក្នុងប្រទេសកម្ពុជា ដែលទទួលបានចំណាត់ថ្នាក់លេខ១ អស់រយៈពេល៥ឆ្នាំជាប់ៗគ្នា គិតចាប់ពីឆ្នាំ ២០១៩ មកដល់ពេលបច្ចុប្បន្ន។ កត្តាដែលធ្វើអោយយើងទទួលបានចំណែកទីផ្សារលេខ១នេះ មិនមែនដោយសារតែការលក់រថយន្តថ្មី តែមួយមុខប៉ុណ្ណោះទេ ប៉ុន្តែគឺដោយសារគុណភាពនៃសេវាកម្មដែលផ្តល់ជូនទៅកាន់អតិថិជន ដូចជាមជ្ឈមណ្ឌលផ្តល់សេវាកម្មថែទាំ និងជួសជុលរថយន្តគ្រប់ខេត្តក្រុង សេវាជំនួយជួសជុលចល័តដល់កន្លែង ២៤ម៉ោង ទទួលបានអត្ថប្រយោជន៍ និងព័ត៌មានផ្សេងៗពីកម្មវិធី Ford Cambodia Mobile App ចំណេញពេលវេលា និងថវិការក្នុងការប្តូរប្រេងម៉ាស៊ីន (រៀងរាល់ 10,000km ម្តង) មាន‍ឱកាសចូលរួមដំណើរកម្សាន្តគ្រួសារ ហ្វដ ជារៀងរាល់ឆ្នាំ និងសេវាកម្មទទួលយករថយន្តចាស់ផ្លាស់ប្តូរយករថយន្តថ្មីជាដើម។ លើសពីនេះទៅទៀត យើងក៏មានបង្កើតនូវការិយាល័យទំនាក់ទំនងអតិថិជន (Call Center) ដែលមានតួនាទីផ្តល់ប្រឹក្សាយោបល់អំពីចម្ងល់ផ្សេងៗទៅកាន់អតិថិជន មិនអោយលើសពី ១៥នាទី។”

លោក ងន សាំង ក៏បានមានប្រសាសន៍បន្ថែមទៀតថា៖ “ទីតាំងប្រគល់រថយន្ត ហ្វដ នេះ គឺជាមជ្ឈមណ្ឌលប្រគល់រថយន្តធំជាងគេ និងដំបូងគេបង្អស់ក្នុងទីផ្សារប្រទេសកម្ពុជាយើង នៅពេលដែលអតិថិជនចូលមកក្នុងទីតាំងប្រគល់រថយន្តនេះ នោះអតិថិជននឹងមានអារម្មណ៍ហាក់ដូចជា កន្លែងតាំងបង្ហាញរថយន្ត ឬការិយាល័យ ឬក៏ជាហាងកាហ្វេដ៏ធំមួយ ដែលមានកន្លែងអង្គុយបំពាក់នូវគ្រឿងបរិក្ខារទំនើបៗ ផ្តល់នូវផាសុកភាព និងភាពងាយស្រួលដល់អតិថិជនដែលមកទទួលយករថយន្តនៅទីនេះ ដើម្បីទទួលបាននូវបទពិសោធន៍ថ្មី និងសេវាកម្មប្រកបដោយទំនុកចិត្ត ពីក្រុមហ៊ុន អ អិម អេ និងក្រុមហ៊ុន ហ្វដ។”

លោក David Jeffrey នាយកគ្រប់គ្រងប្រចាំតំបន់ទីផ្សារអាស៊ីប៉ាស៊ីហ្វិក និងកូរ៉េខាងត្បូង នៃក្រុមហ៊ុន Ford Motor Company បានមានប្រសាសន៍ថា៖ “ការសម្ពោធជាផ្លូវការនូវទីតាំងប្រគល់រថយន្ត ហ្វដ នេះ គឺជាព្រឹត្តិការណ៍ដ៏សំខាន់មួយរបស់ក្រុមហ៊ុន អ អិម អេ ខេមបូឌា តាមរយៈការបង្តើតនូវស្តង់ដារគុណនៃការប្រគល់រថយន្តលំដាប់អន្តរជាតិដំបូងគេបំផុតសម្រាប់ទីផ្សារប្រទេសកម្ពុជា។ យើងចង់ឱ្យអតិថិជនរបស់យើងមានអារម្មណ៍ថាកក់ក្តៅ និងមានទំនុកចិត្តលើរថយន្តរបស់ពួកគាត់ ជាពិសេសទទួលបានការណែនាំ និងការពន្យល់អំពីរបៀបប្រើប្រាស់មុខងាររថយន្ត បច្ចេកវិទ្យា ក៏ដូចជាប្រព័ន្ធសុវត្ថិភាពផ្សេងៗនៅក្នុងរថយន្តថ្មីរបស់ពួកគាត់ មុនពេលពួកគាត់បើកបររថយន្តនៅលើដងផ្លូវ។”

គួរបញ្ជាក់ផងដែរថា ទីតាំងប្រគល់រថយន្តថ្មីនេះ លាតសន្ធឹងលើផ្ទៃដីទំហំ ៦,៥៧៥ ម៉ែត្រការ៉េ ដែលមានទីតាំងប្រគល់រថយន្តធំ ស្តង់ដារអន្តរជាតិ ចំនួន ១២កន្លែង ដែលមានសមត្ថភាពអាចប្រគល់រថយន្តបានចំនួនច្រើនគ្រឿងក្នុងពេលតែមួយ។ ទីតាំងប្រគល់រថយន្ត ហ្វដ សាខាបឹងបៃតងនេះ គឺមានអាស័យដ្ឋានស្ថិតនៅតាមបណ្តោយវិថីឧកញ៉ាម៉ុងរិទ្ធី (ក្បែរផ្សារបឹងបៃតង) ភូមិត្រពាំងស្វាយ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។ សម្រាប់ព័ត៌មានផ្នែកលក់ សូមទំនាក់ទំនងតាមលេខទួរស័ព្ទ 099 999 747 និងសម្រាប់ផ្នែកសេវាកម្ម សូមទំនាក់ទំនង 078 992 992។

March 16, 2024

គ្រាន់តែលក់ «សំណល់» ទៅឱ្យបរទេស វៀតណាមរកចំណូលជិត 3,000 លានដុល្លារ

មិនត្រឹមតែអ្នកជំនួញចិន ជប៉ុននោះទេ ប៉ុន្តែអ្នកទិញមកពីប្រទេសជាង 10 សុទ្ធតែចង់នាំចូលទំនិញដែលត្រូវបានគេចាត់ទុកថា ជា «សំណល់» នៅវៀតណាម។ នេះបើតាមការអួតអាងរបស់សារព័ត៌មានវៀតណាម។

ទំនិញដែលកំពុងនិយាយនេះ គឺជាគ្រាប់កម្ទេចឈើគាប។ យោងតាមសមាគមឈើ និងផលិតផលធ្វើពីឈើវៀតណាម (Viforest) ក្នុងឆ្នាំ 2023 ប្រទេសនេះបាននាំចេញ «សំណល់ឈើ» ដែលមានតម្លៃរហូតដល់ 2.9 ពាន់លានដុល្លារអាម៉េរិក។

ជាក់ស្ដែង ក្នុងឆ្នាំកន្លង វៀតណាមបាននាំចេញសំណល់ឈើជិត 14.42 លានតោន រកចំណូលបាន 2.22 ពាន់លានដុល្លារ ដែលប្រហែលនឹង 8.8% នៃការនាំចេញសរុបរបស់វិស័យឈើ។ ចំណែកគ្រាប់កម្ទេចឈើគាបវិញ វៀតណាមនាំចេញបាន 4.67 លានតោន រកចំណូលបានជិត 680 លានដុល្លារ ស្មើនឹង 5.2% នៃការនាំចេញសរុបរបស់វិស័យឈើ។

គ្រាប់កម្ទេចឈើគាបរបស់វៀតណាម ត្រូវបាននាំចេញទៅកាន់ទីផ្សារចំនួន 22 ក្នុងឆ្នាំកន្លង។ ក្នុងនោះ ជប៉ុន និងកូរ៉េខាងត្បូង គឺជាអតិថិជនធំជាងគេ។

សមាគម Viforest ឱ្យដឹងថា ការនាំចេញផលិតផលខាងលើរបស់វៀតណាម ក្នុងឆ្នាំកន្លង មានការថយចុះ។ ក៏ប៉ុន្តែ ដើមឆ្នាំ 2024 វិស័យនេះបានបង្ហាញសញ្ញាណវិជ្ជមានឡើងវិញ។

March 15, 2024

Huawei និង BAIC ជិតបង្ហាញវត្តមានរថយន្តសេដានអគ្គិសនី Stelato S9

រថយន្តគំរូដំបូងដែលត្រូវបានសហការផលិតដោយក្រុមហ៊ុន Huawei និង BAIC BluePark (SHA: 600733) ដែលជាសាខាក្រុមហ៊ុនរថយន្តអគ្គិសនីរបស់សាជីវកម្មរថយន្តប៉េកាំង (BAIC Group) គ្រោងនឹងបង្ហាញវត្តមាននៅក្នុងពិព័រណ៍រថយន្តប៉េកាំង នៅថ្ងៃទី 20 តុលាឆ្នាំនេះ។

ក្រសួងឧស្សាហកម្ម និងបច្ចេកវិទ្យាព័ត៌មានចិន (MIIT) កាលពីថ្ងៃទី 12 មីនា បានបង្ហាញបញ្ជីឈ្មោះបណ្ដារថយន្តគំរូថ្មីបំផុតដែលនឹងត្រូវបានអនុញ្ញាតឱ្យលក់ដើម្បីប្រមូលមតិពីអ្នកប្រើប្រាស់ ក្នុងនោះក៏មាន Stelato S9 ផងដែរ។

រថយន្តនេះត្រូវបានផលិតដោយក្រុមហ៊ុន BAIC BluePark និងត្រូវបានហៅថា Xiangjei S9 ហើយមានស្លាកសញ្ញាពាណិជ្ជកម្ម Stelato នៅផ្នែកខាងក្រោយ។

BAIC BluePark ឱ្យដឹងថា ខ្លួនកំពុងសហការជាមួយ Huawei ដើម្បីអភិវឌ្ឍយីហោថ្មីមួយដែលមានឈ្មោះថា Xiangjei (នៅក្នុងភាសាចិន)។ ព័ត៌មាននៅលើឯកសារដែលបានបញ្ជូនទៅកាន់ស្ថាប័នមានសមត្ថកិច្ចបង្ហាញថា ឈ្មោះផ្លូវការជាភាសាអង់គ្លេសរបស់ Xiangjie គឺ Stelato។

Stelato S9 គឺជារថយន្តប្រភេទសេដាន ដំណើរការដោយអគ្គិសនី។ រថយន្តនេះនឹងមាន 3 កំណែសម្រាប់ជ្រើសរើស រួមមាន 2 កំណែមានម៉ាស៊ីន 1 គ្រឿង និងមួយកំណែមានម៉ាស៊ីនពីរគ្រឿង។

March 14, 2024

Tag: បង្ហាញ