ថ្ម - La Reine Media

អាម៉េរិកប្រកាសកញ្ចប់ជំនួយថ្មីតម្លៃជាងមួយពាន់លានដុល្លារសម្រាប់អ៊ុយក្រែន

សហរដ្ឋអាម៉េរិកគ្រោងនឹងផ្ដល់ជំនួយផ្នែកយោធាបន្ថែមចំនួន 1.2 ពាន់លានដុល្លារដល់អ៊ុយក្រែន ដើម្បីបង្កើនសមត្ថភាពការពារដែនអាកាស។

មន្ត្រីអាម៉េរិក កាលពីថ្ងៃទី 08 ឧសភា បានឱ្យដឹងថា ប្រទេសនេះគ្រោងនឹងប្រកាសអំពីកញ្ចប់ជំនួយថ្មីនៅថ្ងៃទី 09 ឧសភា។ កញ្ចប់ជំនួយនេះគ្រោងនឹងត្រូវបានផ្ដល់ឱ្យក្នុងរយៈពេលច្រើនខែ និងច្រើនឆ្នាំទៀតដើម្បីធានាសន្តិសុខក្នុងអនាគតរបស់អ៊ុយក្រែន ខុសពីជំនួយជាអាវុធ និងសម្ភារយោធាដែលត្រូវបានយកពីឃ្លាំងរបស់កងទ័ពអាម៉េរិកដោយផ្ទាល់ដែលធ្លាប់បានធ្វើឡើងនាពេលកន្លង។

កញ្ចប់ជំនួយថ្មីដែលមានតម្លៃ 1.2 ពាន់លានដុល្លារនេះនឹងធ្វើឱ្យកញ្ចប់ជំនួយយោធាសរុបដែលអាម៉េរិកផ្ដល់ឱ្យអ៊ុយក្រែន កើនឡើងដល់ជិត 37 ពាន់លានដុល្លារ រាប់ចាប់តាំងពីរុស្ស៊ីចូលឈ្លានពានអ៊ុយក្រែនកាលពីខែកុម្ភៈ 2022 រហូតដល់បច្ចុប្បន្ន។

ព័ត៌មាននេះត្រូវបានលើកឡើងនៅក្នុងគ្រាដែលប្រព័ន្ធការពារដែនអាកាសរបស់អ៊ុយក្រែនប្រឈមនឹងសម្ពាធខ្លាំងពីការវាយប្រហារតាមផ្លូវអាកាសរបស់រុស្ស៊ី នៅមុនការវាយបកទ្រង់ទ្រាយធំរបស់ទីក្រុងកៀវ។

May 9, 2023

ម៉ាស៊ីនប្រតិកម្មនុយក្លេអែរខ្នាតតូចរបស់ Westinghouse អាចផ្គត់ផ្គង់អគ្គិសនីដល់មនុស្ស 300,000 គ្រួសារ

(សហរដ្ឋអាម៉េរិក) – ម៉ាស៊ីនប្រតិកម្មនុយក្លេអែរ ឬរ៉េអាក់ទ័រនុយក្លេអែរ AP300 របស់ក្រុមហ៊ុន Westinghouse មានកម្លាំង 300 ម៉េហ្គាវ៉ាត់ គ្រប់គ្រាន់សម្រាប់ផ្គត់ផ្គង់អគ្គិសនីដល់តម្រូវការរបស់មនុស្ស 300,000 គ្រួសារ។

ក្រុមហ៊ុន Westinghouse ថ្មីៗនេះ បានបង្ហាញ AP300 ដែលជាកំណែតូចរបស់ម៉ាស៊ីនប្រតិកម្មនុយក្លេអែរ AP1000 នៅក្នុងកិច្ចប្រឹងប្រែងដើម្បីពង្រីកសមត្ថភាពប្រើប្រាស់ថាមពលនុយក្លេអែរ ដោយសារតែតម្រូវការ ថាមពលស្អាតកើនឡើងខ្ពស់។ តាមផែនការ ម៉ាស៊ីនប្រតិកម្មនុយក្លេអែរ AP300 នឹងដំណើរការចាប់ពីឆ្នាំ 2027 និងផ្គត់ផ្គង់អគ្គិសនីក្នុងបរិមាណស្មើនឹង ¼ នៃថាមពលរបស់ម៉ាស៊ីន AP1000។ នេះបើតាមរបាយការណ៍របស់ក្រុមហ៊ុន Westinghouse ដែលបានប្រកាសកាលពីថ្ងៃទី 04 ឧសភា។

ម៉ាស៊ីនប្រតិកម្មនុយក្លេអែរ មិនបញ្ចេញឧស្ម័នផ្ទះកញ្ចក់ ហើយម៉ាស៊ីនកាន់តែតូច ការចំណាយក្នុងការអភិវឌ្ឍក៏កាន់តែទាប។ AP300 នឹងមានការចំណាយប្រហែលមួយពាន់លានដុល្លារអាម៉េរិក/គ្រឿង ខណៈដែល AP1000 ត្រូវចំណាយ 6.8 ពាន់លានដុល្លារ។ AP300 នឹងផលិតអគ្គិសនីបានប្រហែល 300 ម៉េហ្កាវ៉ាត់ ស្មើនឹង ¼ បើធៀបនឹង 1,200 ម៉េហ្កាវ៉ាត់របស់ AP1000។ អគ្គិសនី 300 ម៉េហ្កាវ៉ាត់អាចផ្គត់ផ្គង់ដល់តម្រូវការរបស់មនុស្សប្រហែល 300,000 គ្រួសារ។

ម៉ាស៊ីនប្រតិកម្មនុយក្លេអែរ ឬរ៉េអាក់ទ័រនុយក្លេអែរ AP300 របស់ក្រុមហ៊ុន Westinghouse ធៀបនឹងទីលានបាល់ទាត់

ប្រព័ន្ធបញ្ចុះកម្ដៅរបស់ម៉ាស៊ីនប្រតិកម្មនុយក្លេអែររបស់ក្រុមហ៊ុន Westinghouse នឹងមិនបង្កឱ្យមានបញ្ហាឡើយ បើសិនត្រូវបានប្រើប្រាស់នៅ Fukushima ជាទីដែលរោងចក្រផលិតអគ្គិសនីដើរដោយថាមពលនុយក្លេអែរ…

ហេតុការណ៍កើតឡើងនៅឯរោងចក្រផលិតអគ្គិសនីដើរដោយថាមពលនុយក្លេអែរ Fukushima Daiichi កាលពីឆ្នាំ 2011

…Fukushima Daiichi ត្រូវបានបំផ្លាញ នាំឱ្យវិទ្យុសកម្មសាយភាយពេញមួយតំបន់ធំនៅប្រទេសជប៉ុន បន្ទាប់ពីមានគ្រោះរញ្ជួយដី និងរលកយក្សកើតឡើង កាលពីថ្ងៃទី 11 មីនា 2011។

May 6, 2023

Ford ជិតបង្ហាញរថយន្តអគ្គិសនីប្រភេទ SUV 7 កៅអី

អគ្គនាយកប្រតិបត្តិរបស់ Ford លោក Jim Farley ថ្មីៗនេះបានឱ្យដឹងថា ក្រុមហ៊ុននេះមានគម្រោងផលិតរថយន្ត SUV អគ្គិសនីដែលមានកៅអីបីជួរ និងអង្គុយបាន 7 នាក់ ដែលនេះបង្ហាញថា Ford កំពុងតែពង្រឹងការប្រកួតប្រជែងជាមួយ Tesla និងបណ្ដាក្រុមហ៊ុនផលិតរថយន្តអគ្គិសនីលើពិភពលោក។

នៅពេល Farley ឡើងកាន់អំណាចនៅ Ford ក្រុមហ៊ុននេះក៏បានបញ្ចេញរថយន្តប្រភេទ crossover Mustang ដើរដោយថាមពលអគ្គិសនី និង F-150 Lightning ដែលជារថយន្តភីកអាប់អគ្គិសនីដំបូងរបស់ Ford។

យោងតាមលោក Farley ក្រុមហ៊ុន Ford ត្រូវតែផ្ដោតទៅលើប្រភេទរថយន្តអគ្គិសនីដែលមានកៅអីច្រើនជាងពីរជួរ ព្រោះយល់ថា រថយន្តអគ្គិសនីកៅអីពីរជួរមានច្រើនណាស់ហើយនៅក្នុងទីផ្សារ។ Ford គណនាឃើញថា នឹងមានរថយន្ត SUV អគ្គិសនីដែលមានកៅអីពីរជួរចំនួន 45 ម៉ូដែលក្នុងទីផ្សារនៅឆ្នាំ 2025។

ការសម្រេចចិត្តខាងលើអាចនឹងធ្វើឱ្យ Ford ខាត យ៉ាងហោចណាស់ក៏នៅក្នុងដំណាក់កាលដំបូង។ ប៉ុន្តែ ចុងក្រោយ Ford នឹងចំណេញ។ លោក Farley និយាយថា រថយន្តអគ្គិសនីរបស់ Ford នឹងចំណេញ 8% នៅឆ្នាំ 2026។

May 5, 2023

U-22 ម៉ាឡេស៊ី និង U-22 ឡាវ ដែលនឹងប្រកួតនៅល្ងាចនេះ តើក្រុមណាមានប្រៀបជាង?

បន្ទាប់ពីការប្រកួតដែលបានចាញ់ក្រុមបាល់ទាត់បុរសជម្រើសជាតិអាយុក្រោម 22 ឆ្នាំ (U-22) របស់វៀតណាម ក្រុម U-22 ឡាវ នឹងត្រូវប្រឈមនឹងក្រុមខ្លាំងមួយផ្សេងទៀតនៅពូល B នោះគឺ U-22 ម៉ាឡេស៊ី។

ការប៉ះគ្នារវាង U-22 ម៉ាឡេស៊ី និង U-22 ឡាវ នៅវគ្គចែកពូលនៃការប្រកួតបាល់ទាត់បុរសរបស់ស៊ីហ្គេមលើក 32 នឹងត្រូវធ្វើឡើងនាវេលាម៉ោង 19 ថ្ងៃទី 03 ឧសភា 2023 នៅឯកីឡដ្ឋានព្រីនស៍ ស្ថិតនៅភូមិឃ្មួញ សង្កាត់ឃ្មួញ ខណ្ឌសែនសុខ រាជធានីភ្នំពេញ។

នៅមុនការប្រកួត U-22 ម៉ាឡេស៊ីត្រូវបានវាយតម្លៃថា មានកីឡាករដែលមានកម្លាំងខ្លាំងក្លាបំផុត ខណៈដែល U-22 ឡាវ មានកីឡាករមួយចំនួនមិនមានកម្លាំងខ្លាំងបំផុត បន្ទាប់ពីការប្រកួតចាញ់ U-22 វៀតណាម នាពេលថ្មីៗនេះ។
ប្រវត្តិប៉ះគ្នារវាងក្រុម U-22 ម៉ាឡេស៊ី និង U-22 ឡាវ នៅក្នុងពីរប្រកួតចុងក្រោយ៖

ពេលវេលា	គូប្រកួត	លទ្ធផល
21/02/2022	U-22 ម៉ាឡេស៊ី vs U-22 ឡាវ	0-2
18/02/2022	U-22 ឡាវ vs U-22 ម៉ាឡេស៊ី	2-1

កម្លាំងរបស់ U-22 ម៉ាឡេស៊ី ក្នុងប្រាំប្រកួតចុងក្រោយបំផុត

ពេលវេលា	គូប្រកួត	លទ្ធផល
26/03/2023	U-22 ហុងកុង vs U-22 ម៉ាឡេស៊ី	1-2
24/03/2023	U-22 កម្ពុជា vs U-22 ម៉ាឡេស៊ី	2-4
21/02/2022	U-22 ម៉ាឡេស៊ី vs U-22 ឡាវ	0-2
18/02/2022	U-22 ឡាវ vs U-22 ម៉ាឡេស៊ី	2-1
22/02/2019	U-22 ម៉ាឡេស៊ី vs U-22 ទីម័រខាងកើត	1-0

កម្លាំងរបស់ U-22 ឡាវ ក្នុងប្រាំប្រកួតចុងក្រោយបំផុត

ពេលវេលា	គូប្រកួត	លទ្ធផល
30/04/2023	U-22 វៀតណាម vs U-22 ឡាវ	2-0
24/02/2022	U-22 ឡាវ vs U-22 ថៃ	0-2
21/02/2022	U-22 ឡាវ vs U-22 ម៉ាឡេស៊ី	2-0
18/02/2022	U-22 ឡាវ vs U-22 ម៉ាឡស៊ី	2-1
04/07/2012	U-22 ឡាវ vs U-22 កម្ពុជា	3-3

តាមការស្មានរបស់ Admin ការប្រកួតនៅព្រលប់ថ្ងៃទី 03 ឧសភានេះ U-22 ម៉ាឡេស៊ី អាចនឹងឈ្នះ U-22 ឡាវ 2-1៕

May 3, 2023

រថយន្តអគ្គិសនី Volvo លក់ក្នុងតម្លៃថ្លៃ នៅតែត្រូវអតិថិជនទិញអស់

តម្លៃ 8 ម៉ឺនដុល្លារអាម៉េរិក/គ្រឿង មិនអាចរារាំងអតិថិជនដែលចង់ប្រើរថយន្តអគ្គិសនីដ៏ទំនើបរបស់ក្រុមហ៊ុន Volvo បានឡើយ។

ថ្មីៗនេះ បន្ទាប់ពីដាក់ឱ្យបញ្ជាទិញជាមុនរថយន្តអគ្គិសនី EX90 ក្រុមហ៊ុនផលិតរថយន្ត Volvo ក៏ទទួលបានការគាំទ្រយ៉ាងច្រើនពីអ្នកប្រើប្រាស់ រហូតធ្វើឱ្យក្រុមហ៊ុននេះត្រូវផ្អាកការលក់បណ្ដោះអាសន្ន ព្រោះតែបរិមាណនៃរថយន្តដែលត្រូវបានបញ្ជាទិញ បានលើសពីគម្រោងនៃការផលិតលើកទីមួយ។ ប៉ុន្តែ ក្រុមហ៊ុនបានសន្យាថា នឹងបើកលក់ជាថ្មីនាពេលខាងមុខ។

Volvo EX90 ត្រូវបានអភិវឌ្ឍឡើងដោយយោងទៅតាមតួរថយន្តអគ្គិសនី SPA2 របស់ក្រុមហ៊ុនមេ Geely ដែលដូចទៅនឹង Polestar 3។ ក្នុងពេលដែល Polestar 3 មានកៅអីចំនួនប្រាំ Volvo EX90 មានកៅអីអាចឱ្យអង្គុយបាន 7 នាក់។

កំណែមូលដ្ឋានរបស់ Volvo EX90 ប្រើប្រាស់ម៉ូទ័រអគ្គិសនីដែលអាចផលិតកម្លាំងបាន 402 សេះ ខណៈដែលកំណែ Performance មានកម្លាំង 510 សេះ អាចបង្កើនល្បឿនពី 0-97 គីឡូម៉ែត្រ/ម៉ោង ដោយប្រើពេលតែ 4.7 វិនាទី។ កំណែទាំងពីរនេះប្រើប្រាស់ប្រព័ន្ធថ្មផ្ទុកថាមពល 107 kWh អាចឱ្យបើកបរបាន 580 គីឡូម៉ែត្រ ទៅតាមស្ដង់ដារបស់ WLTP ឬប្រហែល 483 គីឡូម៉ែត្រក្នុងការបើកបរជាក់ស្ដែង។

Volvo EX90 ត្រូវបានបំពាក់ប្រព័ន្ធ LiDAR ((Light Detection and Ranging) ដែលជាសេនស័រ 3D សម្រាប់បាញ់វាស់ចម្ងាយ និងវាស់ជម្រៅរបស់វត្ថុ ក៏ដូចជាដៅសម្គាល់ភាពជ្រៅនៃផ្ទៃលំហជាដើម) រយៈចម្ងាយឆ្ងាយមួយគ្រៀង, រ៉ាដាប្រាំគ្រឿង, កាមេរ៉ា 8 គ្រឿង និងសែនស័រចាប់រលកសញ្ញា 16 គ្រឿង។ ក្រៅពីនេះ រថយន្តអគ្គិសនី EX90 ក៏បំពាក់បច្ចេកវិទ្យាជាច្រើនទៀតនៅខាងក្នុងកាប៊ីន រួមមានទាំងអេក្រង់ទូរទស្សន៍ 14.5 អ៊ីញដែលបំពាក់កម្មវិធីជំនួយការរបស់ Google ផងដែរ៕

May 2, 2023

តួកគីប្រកាសព័ត៌មានលម្អិតថ្មីបំផុតស្ដីពីយុទ្ធនាការកម្ចាត់មេដឹកនាំកំពូលរបស់ «រដ្ឋអ៊ីស្លាម (IS)»

ប្រទេសតួកគីបានប្រកាសអំពីយុទ្ធនាការបួនម៉ោងនៅប្រទេសស៊ីរី ដើម្បីកំណត់ទីតាំង និងកម្ចាត់មេបញ្ជាការកំពូលបច្ចុប្បន្នរបស់ក្រុមភេរវកម្មរដ្ឋអ៊ីស្លាម (Islamic State)។

បណ្ដាផ្សព្វផ្សាយរបស់រដ្ឋតួកគី កាលពីថ្ងៃទី 01 ឧសភា បានបញ្ចេញរូបថតថ្មីបំផុតស្ដីពីផ្ទះដ៏រឹងមាំស្ថិតនៅកណ្ដាលវាលស្រែនៃខេត្ត Afrin ប្រទេសស៊ីរី ជាទីដែលកម្លាំងពិសេសរបស់តួកគីបានធ្វើការវាយប្រហារកម្ចាត់មេបញ្ជាការកំពូលរបស់ក្រុមភេរវកររដ្ឋអ៊ីស្លាម (Islamic State) Abu al-Hussein al-Husseini al-Qurashi។

ទីភ្នាក់ងារសារព័ត៌មាន Anadolu បានឱ្យដឹងថា ក្រោយពីបានកំណត់ទីតាំងផ្ទះនេះ ដែលជាកន្លែងស្នាក់នៅរបស់ Qurashi ស្ថាប័នស៊ើបការណ៍សម្ងាត់របស់តួកគី (MIT) ក៏បានធ្វើយុទ្ធនាការរយៈពេលបួនម៉ោងក្នុងថ្ងៃទី 29 មេសា ដើម្បីឡោមព័ទ្ធមេភេរវករ។

MIT បានបំផ្ទុះជញ្ជាំងជុំវិញផ្ទះ មុននឹងសម្រុកចូលតាមច្រកទ្វារខាងក្រោយ និងតាមបង្អួច។ រូបភាពដែលត្រូវបានបញ្ចេញបង្ហាញថា មួយផ្នែករបស់ផ្ទះពីរជាន់នេះបានខូចខាតច្រើន។

មេបញ្ជាការកំពូលរបស់ក្រុមភេរវកម្មរដ្ឋអ៊ីស្លាម (Islamic State) Abu al-Hussein al-Husseini al-Qurashi

Qurashi បានចុចបំផ្ទុះគ្រាប់បែកអត្តឃាតនៅពេលដឹងថា ខ្លួនជិតត្រូវបានគេចាប់។ ក្នុងការវាយលុកនេះ ភាគីខាងតួកគីពុំមានអ្នកស្លាប់ ឬរងរបួសនោះទេ។

ប្រធានាធិបតីតួកគី Recep Tayyip Erdogan កាលពីថ្ងៃទី 30 មេសា បានប្រកាសថា កម្លាំងស៊ើបការណ៍សម្ងាត់របស់ប្រទេសនេះបានកម្ចាត់ Qurashi នៅក្នុងយុទ្ធនាការមួយនៅប្រទេសស៊ីរី។

Qurashi គឺជាមេបញ្ជាការកំពូលទីបួនរបស់ IS ដែលត្រូវបានតែងតាំងកាលពីខែវិច្ឆិកា 2022 បន្ទាប់ពីការស្លាប់របស់មេដឹកនាំកំពូល Abu al-Hassan al-Hashemi al-Quraishi។ Qurashi បានចូលក្រុម IS ក្នុងឆ្នាំ 2013 និងបានទទួលការតែងតាំងជាបន្តបន្ទាប់យ៉ាងឆាប់រហ័សនៅក្នុងក្រុមភេរវករ។

ផ្ទះរបស់មេភេរវករ រដ្ឋអ៊ីស្លាម (Islamic State) Abu al-Hussein al-Husseini al-Qurashi

តួកគីបានបញ្ជូនទ័ពទៅកាន់ភាគខាងជើងប្រទេសស៊ីរីតាំងពីឆ្នាំ 2020 និងគ្រប់គ្រងតំបន់ដ៏ធំមួយដោយមានការជួយគាំទ្រពីបណ្ដាក្រុមបះបោរនៅប្រទេសស៊ីរី៕

May 2, 2023

ទិញរថយន្តក្នុងក្តីស្រមៃដោយមិនចាំបាច់មានប្រាក់កក់ និងបង់រំលស់គ្មានការប្រាក់ដល់ទៅមួយឆ្នាំ

[ភ្នំពេញ – ថ្ងៃទី ០១ ខែឧសភា ឆ្នាំ២០២៣] ផ្នែករថយន្ត Ford នៃ ក្រុមហ៊ុន អ អិម អេ (ខេមបូឌា) ម.ក បានរៀបចំកម្មវិធី ពិធីចុះអនុស្សរណៈយោគយល់គ្នារវាង ក្រុមហ៊ុន អ អិម អេ (ខេមបូឌា) ម.កដែលជាក្រុមហ៊ុននាំចូល និងចែកចាយផ្តាច់មុខរថយន្ត ហ្វដ ប្រចាំប្រទេសកម្ពុជា និងធនាគារ វីង (ខេមបូឌា) ម.ក ដែលជាធនាគារឈានមុខគេនៅកម្ពុជា។

លោក ហាន ប៉េង ក្វាង អគ្គនាយក ធនាគារ វីង បានមានប្រសាសន៍ថា៖ “យើងពិតជាមានសេចក្តីសោមន្សរីករាយ ដែលបានក្លាយជាដៃគូសហការជាមួយ ក្រុមហ៊ុន អ អិម អេ (ខេមបូឌា) ដើម្បីរួមគ្នាផ្តល់ដំណោះស្រាយដ៏មានសារៈសំខាន់មួយសម្រាប់អតិថិជន” ។

“យើងជឿជាក់ថាគ្រប់គ្នាស័ក្កិសមនឹងទទួលបានឱកាសក្លាយជាម្ចាស់រថយន្តក្នុងក្តីស្រមៃរបស់ពួកគេ។ ហើយយើងចង់ធ្វើឲ្យក្តីស្រមៃនោះក្លាយជាការពិត សម្រាប់អតិថិជនមិនថាជាប្រជាជនកម្ពុជា ឬជនជាតិបរទេសកំពុងរស់នៅប្រទេសកម្ពុជា នោះគឺអតិថិជនមិនបារម្មណ៍លើការចំណាយប្រាក់កក់ ហើយថែមទាំងមិនចំណាយបង់ការប្រាក់រហូតដល់ ១២ ខែ”។

លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) បានមានប្រសាសន៍ថា៖ “ សម្រាប់អតិថិជនដែលមានបំណងចង់ក្លាយជាម្ចាស់រថយន្ត ឥឡូវនេះយើងមានការផ្តល់ជូនពិសេសគឺ ការទិញរថយន្តដោយមិនតម្រូវមានប្រាក់កក់ និងការបង់រំលស់ដោយមិនចំណាយការប្រាក់ពេញមួយឆ្នាំពេញសម្រាប់រថយន្តម៉ូដែល Ford Ranger Wildtrak, Everest, EcoSport, Territory ស៊េរីឆ្នាំ ២០២២ ដែលនេះជាលើកទី១ ដែលមានការសហការបែបនេះកើតឡើងរវាង អ អិម អេ (ខេមបូឌា) ជាមួយធនាគារ វីង ហើយនេះគ្រាន់តែជាការចាប់ផ្តើមតែប៉ុណ្ណោះ ៕

ឆ្លៀតក្នុងឱកាសនេះដែរ លោក លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) ក៏បានបន្ថែមថា “ បច្ចុប្បន្នក្រុមហ៊ុន ហ្វដ បានពង្រីកនូវវិសាលភាពនៃគ្រឿងបន្លាស់ និងសេវាកម្មជួសជុលរថយន្តនៅតាមបណ្តាខេត្តផ្សេងៗដូចជា ខេត្តកំពង់ចាម និងខេត្តសៀមរាប ហើយយើងក៏មានយានដ្ឋានដៃគូសហការជាច្រើននៅទូទាំង២៥ខេត្តក្រុងក្នុងប្រទេសកម្ពុជាផងដែរ។ ជាពិសេស ថ្មីៗនេះយើងក៏បានបង្កើតនូវ ការិយាល័យផ្នែកទំនាក់ទំនងអតិថិជន (Call Center) ដើម្បីផ្តល់នូវសេវាកម្មឆាប់រហ័ស និងផ្តល់ភាពងាយស្រួលដល់អតិថិជនក្នុងការសាកសួរព័ត៌មាន ក៏ដូចជាធ្វើការទំនាក់ទំនងដោយផ្ទាល់ជាមួយអ្នកជំនាញរបស់យើង ។ ”

សម្រាប់អតិថិជនដែលចង់សាកសួរព័ត៌មាន ឬមានបំណងចង់ទិញរថយន្ត Ford អាចធ្វើការទំនាក់ទំនងតាមលេខទូរស័ព្ទ 012 333 975 ឬ 077 666 357 ឬ 078 999 883

សម្រាប់លោកអ្នកដែលមានតម្រូវការកម្ចីឥណទានតាមរយៈធនាគារ វីង សូមធ្វើការទំនាក់ទំនងតាមលេខទូរស័ព្ទ 078 989 767/078 989 511 ឬអញ្ជើញមកកាន់សាខាណាមួយដែលនៅជិតលោកអ្នកបំផុត៕

May 1, 2023

U-22 ឡាវមានការជឿជាក់ បន្ទាប់ពី U-22 វៀតណាមបង្ហាញភាពទន់ខ្សោយមុនស៊ីហ្គេមនៅកម្ពុជា

នៅក្នុងការប្រកួតបើកឆាករបស់ U-22 វៀតណាម ជាមួយនឹង U-22 ឡាវ នៅល្ងាចថ្ងៃទី 30 មេសានេះ ទស្សនិកជនប្រហែលជាបានទស្សនាថ្វីជើងល្អរបស់ក្រុមឡាវ ព្រោះតែពួកគេបានរីកចម្រើនជាងមុន ខណៈដែល U-22 វៀតណាម ហាក់បានថមថយកម្លាំងមុនការប្រកួតនៅស៊ីហ្គេមលើកនេះ។

ក្រោយរយៈពេលប្រាំឆ្នាំដែលលេចធ្លោក្រោមការដឹកនាំរបស់គ្រូបង្វឹកជនជាតិកូរ៉េខាងត្បូង Park Hang-seo ក្រុមបាល់ទាត់ជម្រើសជាតិវៀតណាមបច្ចុប្បន្ននឹងឈានចូលដល់ដំណាក់កាលថ្មីនៅស៊ីហ្គេមលើកទី 32 ដែលចាប់ផ្ដើមដោយការប្រកួតជាមួយ U-22 ឡាវនៅឯកីឡដ្ឋានព្រីនស៍ នារាជធានីភ្នំពេញ ដែលជាការប្រកួតផ្លូវការដំបូងរបស់ក្រុមវៀតណាមក្រោមការដឹកនាំរបស់គ្រូបង្វឹកបារាំង លោក Philippe Troussier ។

ប៉ុន្មានឆ្នាំកន្លងទៅ ក្រុមវៀតណាមបានបង្ហាញកម្លាំងដែលស្ទើរតែមិនមានគូប្រៀបនៅអាស៊ីអាគ្នេយ៍ ប៉ុន្តែថ្មីៗនេះ ពួកគេហាក់បានថមថយកម្លាំងទៅហើយ ពិសេសគឺនៅមុនការប្រកួតនៅស៊ីហ្កេមលើកទី 32 នេះ។ នៅ Doha Cup កាលពីពេលថ្មីៗនេះ ក្រុមជម្រើសជាតិវៀតណាមសុទ្ធតែបរាជ័យ។ ពេលត្រលប់មកប្រទេសទាត់មិត្តភាពជាមួយក្លឹប TP HCM និងក្លឹប Ba Ria – Vung Tau ក្រុមជម្រើសជាតិវៀតណាមក៏បន្តចាញ់បួនគ្រាប់ និងឈ្នះតែពីរគ្រាប់។

នៅស៊ីហ្គេមលើកទី 30 និង 31 ក្រុមជម្រើសជាតិវៀតណាមសុទ្ធតែដណ្ដើមបានមេដាយមាស។ ក៏ប៉ុន្តែ នៅស៊ីហ្គេមលើកនេះ ក្រុមជម្រើសជាតិវៀតណាមត្រូវបានអ្នកខ្លះយល់ថា «បានថមថយកម្លាំង» បើធៀបនឹងក្រុមកីឡាករជំនាន់មុនៗ ព្រោះថា ស៊ីហ្គេមលើកទី 32 មិនអនុញ្ញាតឱ្យប្រើប្រាស់កីឡាករលើសអាយុ ដូច្នេះ ក្រុមកីឡាករសំខាន់ៗមួយចំនួនរបស់វៀតណាមក៏ត្រូវអវត្តមាន ស្របពេលដែលក្រុមកីឡាករវ័យក្មេងបានបង្ហាញភាពទន់ខ្សោយនៅមុនការប្រកួតនៅស៊ីហ្គេមលើកនេះ។

ប្រការខាងលើនេះកំពុងតែជួយឱ្យ U-22 ឡាវមានសង្ឃឹមនៅក្នុងការប៉ះជាមួយ U-22 វៀតណាម នៅល្ងាចថ្ងៃទី 30 មេសានេះ ថ្វីបើពួកគេមិនធ្លាប់បានឈ្នះលើវៀតណាម និងទើបតែឆ្លងផុតវគ្គចែកពូលបានមួយលើកនៅស៊ីហ្គេម (2009)។

«មុននោះ យើងមានគម្លាតឆ្ងាយពីវៀតណាម ប៉ុន្តែចាប់ពីប្រហែលមួយឆ្នាំកន្លង ឡាវចាប់ផ្ដើមរីកចម្រើន ហើយយើងសង្ឃឹមថានឹងធ្វើឱ្យវៀតណាមភ្ញាក់ផ្អើល» គ្រូបង្វឹក Michael Weiss និយាយនៅក្នុងសន្និសិទសារព័ត៌មានកាលពីថ្ងៃទី 29 មេសាដូច្នេះ។

U-22 ឡាវនៅតែមានវត្តមានរបស់ក្រុមកីឡាករច្រើនរូបដែលបានទាត់នៅស៊ីហ្កេមលើកទី 31 ក្នុងនោះមានកីឡាករដើមកំណើតវៀតណាមពីររូបផងដែរ។ ជាងនេះ ពួកគេថែមទាំងមានកីឡាករឡាវដើមកំណើតបរទេសបីរូបផ្សេងទៀតដែលកំពុងទាត់ឱ្យអាល្លឺម៉ង់ អាម៉េរិក និងបារាំង។ ទាំងនេះគឺជាក្ដីសង្ឃឹមមួយផ្សេងទៀតសម្រាប់ឡាវ។

April 30, 2023

Ford Ranger Raptor ម៉ាស៊ីនម៉ាស៊ូត 2.0L Bi-Turbo ត្រូវបានដាក់សម្ពោធជាផ្លូវការ

(ភ្នំពេញ-ថ្ងៃទី 28 ខែមេសា ឆ្នាំ 2023) – ជួបគ្នាម្ដងទៀតហើយជាមួយនឹងព្រឹត្តិការណ៍ដ៏អស្ចារ្យដែលត្រូវបានរៀបចំឡើយដោយក្រុមហ៊ុន អ អិម អេ (ខេមបូឌា) ម.ក ផ្នែករថយន្ត Ford នោះគឺពិធីសម្ពោធជាផ្លូវការរថយន្ត Ford Ranger Raptor ម៉ាស៊ីនម៉ាស៊ូត 2.0L Bi-Turbo (Diesel) ស៊េរីឆ្នាំ 2023 ដែលកម្មវិធីនេះបានប្រារព្ធឡើងនៅ ដឹ ព្រេមៀ សេនធ័រ សែនសុខ ដែលមានភ្ញៀវកិត្តិយសអញ្ជើញចូលរួមប្រមាណជាង 3,000 នាក់។

កម្មវិធីនេះប្រារព្ធឡើងដើម្បីណែនាំនូវជម្រើសម៉ាស៊ីនថ្មីមួយទៀតដល់អតិថិជន នោះគឺម៉ាស៊ីនម៉ាស៊ូត 2.0L Bi-Turbo (Diesel) ស៊េរីឆ្នាំ 2023 ដែលជាប្រភេទម៉ាស៊ីនមានកម្លាំងខ្លាំង សន្សំសំចៃខ្ពស់ និងទទួលបានការពេញនិយមយ៉ាងច្រើនកុះករពីសំណាក់អតិថិជន។ ចំណុចដែលកាន់តែពិសេសគួរឱ្យភ្ញាក់ផ្អើលនោះគឺ តម្លៃបង់ពន្ធផ្លូវសម្រាប់រថយន្តទំនើប Ford Ranger Raptor ស៊េរីឆ្នាំ 2023 ម៉ាស៊ីនម៉ាស៊ូតមួយនេះគឺត្រឹមតែ 20 ម៉ឺនរៀលតែប៉ុណ្ណោះ។

អតិថិជនដែលទទួលបានបទពិសោធន៍ដ៏អស្ចារ្យនៃការបើកបរសាកល្បងរថយន្ត Ford Ranger Raptor ម៉ាស៊ីនម៉ាស៊ូត 2.0L Bi-Turbo (Diesel) ស៊េរីឆ្នាំ 2023 នេះដោយផ្ទាល់ជាមួយនឹងអ្នកជំនាញបច្ចេកទេសរបស់ Ford ដើម្បីសាកល្បងនូវមុខងារនៃប្រព័ន្ធសុវត្ថិភាព និងបច្ចេកវិទ្យាទំនើបចុងក្រោយដែលបានបំពាក់នៅលើរថយន្តនេះ។

ជាពិសេសជាងនេះទៀតគឺអតិថិជនពេញចិត្តជាមួយនឹងកម្លាំងម៉ាស៊ីននៃរថយន្ត Ford Ranger Raptor ស៊េរីឆ្នាំ 2023 ដែលម៉ាស៊ីនជំនាន់ថ្មីនេះជាប្រភេទម៉ាស៊ីនម៉ាស៊ូត 2.0L Bi-Turbo (Diesel0 Inline4 ដែលអាចផលិតកម្លាំងសេះបានរហូតដល់ 210 PS និងកម្លាំងរមួលកង់រហូតដល់ 500 Nm ដែលផ្ដល់នូវសន្ទុះដ៏ខ្លាំងក្នុងការបើកបរ។

មិនតែប៉ុណ្ណោះ នៅមានមុខងារច្រើនទៀតដែលបានទាក់ចិត្តអតិថិជនបន្ទាប់ពីបានធ្វើតេស្តសាកល្បងរួចមកដូចជា៖

ប្រព័ន្ធគ្រប់គ្រងការបើកបរគ្រប់ស្ថានភាពផ្លូវរហូតដល់ 7 ជម្រើសរួមមាន៖ ផ្លូវធម្មតា ស្ព័រ រអិល ភក់ ខ្សាច់ BAJA (ផ្លូវឧបសគ្គ) និងផ្លូវមានថ្ម
បំពាក់នូវបូម Fox Racing Shocks ទំហំ 2.5 អ៊ីញ ដែលផ្ដល់នូវផាសុកភាពក្នុងពេលបើកបរ ជាពិសេសសម្រាប់ការបើកបរលើផ្លូវដែលមានឧបសគ្គ និងផ្លូវ Off-Road Performance
អ្វីដែលអតិថិជនមានការភ្ញាក់ផ្អើល និងពេញចិត្តខ្លាំងមួយទៀតនោះគឺ ប្រអប់លេខអេឡិចត្រូនិចជំនាន់ថ្មី 10 វគ្គអូតូ (E-Shifter) បូករួមជាមួយនឹង Paddle Shift ដែលអាចថែមថយលេខនៅនឹងចង្កូតពិជាធ្វើឱ្យការចុលរលូនខ្លាំង
បំពាក់ជូននូវប្រព័ន្ធគ្រប់គ្រងប៉ុងអេឡិចត្រូនិចជំនាន់ថ្មី (2H, 4H, 4L, 4A)
អ្វីដែលកាន់តែអស្ចារ្យនោះគឺរថយន្ត Ford Ranger Raptor ស៊េរីឆ្នាំ 2023 ម៉ាស៊ីនម៉ាស៊ូតនេះ បានបំពាក់ប្រព័ន្ធជំនួយចូលចតដោយស្វ័យប្រវត្តបែបអក្សរ (P), (T) និងប្រព័ន្ធជំនួយចាកចេញពិចំណតដោយស្វ័យប្រវត្ត ដែលវានឹងដំណើរការហ្វ្រាំង ហ្គ៊ែរ ចង្កូត និងការចូលលេខពីប្រអប់លេខអេឡិចត្រូនិចដោយខ្លួនឯង និងអ្នកបើកបរអាចទស្សនាប្រព័ន្ធកាមេរ៉ាសុវត្ថិភាព 360 ដឺក្រេកម្រិតខ្ពស់ជុំវិញរថយន្ត នៅលើអេក្រង់ Tochscreen 12 អ៊ីញបានយ៉ាងងាយស្រួល
ប្រព័ន្ធផ្ដល់សញ្ញាគ្រោះថ្នាក់ពេលមានឧបសគ្គ និងប្រព័ន្ធជំនួយលើចង្កូតបញ្ចៀសចេញពីគ្រោះថ្នាក់
ប្រព័ន្ធចង្កៀងឆ្លាតដែលអាចរេតាមចង្កូតដោយស្វ័យប្រវត្ត និងអាចបែងចែកពន្លឺដោយស្វ័យប្រវត្ត
ប្រព័ន្ធចាប់ហ្វ្រាំងបន្ទាន់ពេលថយក្រោយដោយស្វ័យប្រវត្ត
ក្រៅពីនេះគឺនៅមានប្រព័ន្ធសុវត្ថិភាព និងបច្ចេកវិទ្យាជំនាន់ចុងក្រោយជាច្រើនទៀតដែលអាចឱ្យរថយន្តនេះជម្នះបានគ្រប់ឧបសគ្គនៃការបើកបរ និងស័ក្ដិសមជាកំពូលរថយន្តភីកអាប់ Off-Road Performance ។

រថយន្ត រថយន្ត Ford Ranger Raptor ស៊េរីឆ្នាំ 2023 ម៉ាស៊ីនម៉ាស៊ូតនេះមានវត្តមាននៅទីផ្សារព្រះរាជាណាចក្រកម្ពុជាជាមួយនឹងជម្រើសពណ៌យ៉ាងច្រើនសម្បូរបែបរហូតដល់ 8 ជម្រើស រួមមាន៖ ពណ៌ក្រហម ទឹកក្រូច ខៀវ ខ្មៅ ប្រផេះស្ងួត ប្រផេះរលោង ទឹកប្រាក់ និងពណ៌ស ជាមួយនឹងតម្លៃពិសេសត្រឹមតែ $75,900 តែប៉ុណ្ណោះ។

សម្រាប់ព័ត៌មានបន្ថែម លោកអ្នកអាចអញ្ជើញទៅសាកសួរ និងបើកបរសាកល្បងរថយន្តFord Ranger Raptor ស៊េរីឆ្នាំ 2023 ម៉ាស៊ីនម៉ាស៊ូត 2.0L Bi-Turbo (Diesel) ស៊េរីឆ្នាំ 2023 នៅតាមបណ្ដាសាខាអគារតាំងបង្ហាញរថយន្ត Ford និងទំនាក់ទំនងទៅតាមលេខទូរស័ព្ទដូចខាងក្រោម៖

អគារតាំងបង្ហាញរថយន្ត Ford សាខា ផ្លូវព្រះមុនីវង្ស ដែលស្ថិតនៅអគារលេខ 444 ផ្លូវព្រះមុនីវង្ស ជាប់ទូតវៀតណាម លេខទូរស័ព្ទ៖ 078 999 773
អគារតាំងបង្ហាញរថយន្ត Ford សាខា ទឹកថ្លា ដែលស្ថិតនៅតាមបណ្ដោយផ្លូវទៅព្រលានយន្តហោះ លេខទូរស័ព្ទ៖ 095 939 939
អគារតាំងបង្ហាញរថយន្ត Ford សាខា ទួលសង្កែ ដែលស្ថិតនៅលើផ្លូវ 105 និងផ្សារសាំហាន់ លេខទូរស័ព្ទ៖ 078 959 935
អគារតាំងបង្ហាញរថយន្ត Ford Trade-In ដែលស្ថិតនៅតាមបណ្ដោយផ្លូវទៅកាន់ព្រលានយន្តហោះ លេខទូរស័ព្ទ៖ 077 722 999 ឬ 011 255 229
អគារតាំងបង្ហាញរថយន្ត Ford សាខា ខេត្តសៀមរាប ដែលស្ថិតនៅអគារលេខ 593 តាមបណ្ដោយផ្លូវជាតិលេខ 6A លេខទូរស័ព្ទ៖ 077 666 357 ឬ 088 9 666 357
អគារតាំងបង្ហាញរថយន្ត Ford សាខា ខេត្តកំពង់ចាម ដែលស្ថិតនៅអគារលេខ 940 តាមបណ្ដោយផ្លូវជាតិលេខ 7 ភូមិបឹងស្នាយ សង្កាត់សំបួមាស ក្រុងកំពង់ចាម លេខទូរស័ព្ទ៖ 078 999 883 ឬ 088 3 999 883 ។

April 29, 2023

ក្រុមបាល់ទាត់ U-22 ថៃ ប្រកាសថា មិនខ្លាចអាជ្ញាកណ្ដាល បើទោះមិនមាន VAR

គ្រូបង្វឹករបស់ក្រុមបាល់ទាត់បុរសជម្រើសជាតិអាយុក្រោម 22 ឆ្នាំ (U-22) របស់ប្រទេសថៃ បានអះអាងថា មិនព្រួយបារម្ភអំពីការងាររបស់ក្រុមអាជ្ញាកណ្ដាល បើទោះមិនមានជំនួយពីបច្ចេកវិទ្យា VAR នៅស៊ីហ្គេមលើកទី 32។

ដើម្បីត្រៀមខ្លួនឱ្យបានល្អបំផុតសម្រាប់ការប្រកួតនៅស៊ីហ្គេមលើកនេះ កាលពីល្ងាចថ្ងៃទី 28 មេសា ក្រុម U-22 ថៃ បានធ្វើការហ្វឹកហាត់ថ្ងៃទីពីរនៅឯកីឡដ្ឋានអគ្គិសនីកម្ពុជា (EDC) នៅរាជធានីភ្នំពេញ ក្រោមការដឹកនាំរបស់គ្រូបង្វឹក Issara Sritaro ។

នៅពេលត្រូវបានសួរអំពីការងាររបស់ក្រុមអាជ្ញាកណ្ដាលនៅស៊ីហ្គេមលើកនេះ គ្រូបង្វឹក Sritaro ឱ្យដឹងថា លោកមិនមានការព្រួយបារម្ភចំពោះអាជ្ញាកណ្ដាល បើទោះបច្ចេកវិទ្យា VAR ដែលជួយផ្ដល់ភាពសុក្រឹតដល់ការកាត់ក្ដីរបស់អាជ្ញាកណ្ដាល មិនត្រូវបានប្រើប្រាស់នៅក្នុងព្រឹត្តិការណ៍ប្រកួតកីឡាអាស៊ីអាគ្នេយ៍ឆ្នាំ 2023។

គ្រូបង្វឹករបស់ U-22 ថៃ និយាយថា «នោះគឺជាកត្តាខាងក្រៅ។ យើងមិនអាចគ្រប់គ្រងបាន ដូច្នេះ U-22 ថៃ នឹងមិនផ្ដោតអារម្មណ៍ច្រើនទៅលើអាជ្ញាកណ្ដាល»។ លោក Sritaro បន្ថែមថា «យើងមិនខ្លាច ហើយយើងនឹងប្រឹងប្រែងឱ្យអស់ពីសមត្ថភាព។ … កីឡាកររបស់យើងក៏ត្រូវបានរម្លឹកអំពីបញ្ហាមួយចំនួន មានដូចជា ការបង្កកំហុសនៅក្នុងតំបន់គ្រោះថ្នាក់ និងអកហ្សឺជាដើម»។

ទន្ទឹមនឹងបញ្ហាខាងលើ គ្រូបង្វឹកអាយុ 43 ឆ្នាំរបស់ U-22 ថៃ ក៏បានឱ្យដឹងថា លោកមិនពេញចិត្តចំពោះទីលានហ្វឹកហាត់ EDC ដែលម្ចាស់ផ្ទះកម្ពុជាផ្ដល់ឱ្យ U-22 ថៃ។ ក្រុមគ្រូបង្វឹកថៃក៏បានសម្រេចចិត្តស្វែងរកទីលានហ្វឹកហាត់ថ្មីដើម្បីមានលក្ខខណ្ឌល្អបំផុតសម្រាប់ U-22 ថៃ នៅស៊ីហ្គេម។

លោក Sritaro ពន្យល់ថា «ទីលានហ្វឹកហាត់ EDC ដែលម្ចាស់ផ្ទះផ្ដល់ជូន U-22 ថៃ ប្រើប្រាស់ស្មៅ carpet ខុសពីស្មៅ bermuda នៅកីឡដ្ឋានព្រីនស៍…។ ផ្ទៃរបស់ទីលាន EDC រឹងខ្លាំងពេក ដូច្នេះហានិភ័យរងរបួសរបស់កីឡាករក៏មានកម្រិតខ្ពស់។ យើងពិតជាព្រួយបារម្ភចំពោះបញ្ហានេះ»។

នៅស៊ីហ្គេមលើកទី 32 U-22 ថៃ ស្ថិតក្នុងពូល B ជាមួយនឹងវៀតណាម ម៉ាឡេស៊ី សិង្ហបុរី និងឡាវ។ ប្រធានសហព័ន្ធបាល់ទាត់ថៃ (FAT) បានដាក់គោលដៅឱ្យក្រុម U-22 ថៃ និងក្រុមបាល់ទាត់នារីជម្រើសជាតិប្រទេសនេះ ត្រូវដណ្ដើមឱ្យបានមេដាយមាសពីស៊ីហ្គេមនៅកម្ពុជា៕

April 29, 2023

Tag: ថ្ម