ថ្ម - La Reine Media

មនុស្សជាងពីរពាន់លាននាក់នឹងរស់នៅក្នុងកម្ដៅដ៏គ្រោះថ្នាក់របស់ផែនដី ចាប់ពីឆ្នាំ 2100

កម្ដៅផ្ទៃផែនដីកំពុងស្ថិតក្នុងកំណើន 2.7 អង្សាសេ ធៀបនឹងដំណាក់កាលដំបូងនៃវិស័យឧស្សាហកម្ម នៅឆ្នាំ 2100 ដែលប្រការនេះនឹងរុញច្រានមនុស្សជាងពីរពាន់លាននាក់ (ប្រហែល 22% នៃប្រជាជនសរុបក្នុងពិភពលោក) ឱ្យចេញពីតំបន់អាកាសធាតុស្រួលរស់នៅ។

យោងតាមលទ្ធផលនៃការសិក្សាស្រាវជ្រាវថ្មីដែលត្រូវបានចុះផ្សាយលើទស្សនាវដ្ដី Nature Sustainability ក្រុមអ្នកវិទ្យាសាស្ត្របានឱ្យដឹងថា បណ្ដាប្រទេសមានប្រជាជនច្រើនជាងគេដែលត្រូវប្រឈមនឹងកម្ដៅដ៏គ្រោះថ្នាក់ គឺ ឥណ្ឌា (600 លាននាក់), នីហ្សេរីយ៉ា (300 លាននាក់), ឥណ្ឌូណេស៊ី (100 លាននាក់), ហ្វ៊ីលីពីន និងប៉ាគីស្ថាន (80 លាននាក់ដូច្នេះ)។ នេះបើតាម AFP ចុះផ្សាយកាលពីថ្ងៃទី 22 ឧសភា 2023។

ការកាត់បន្ថយការកើនឡើងកម្ដៅទូទាំងពិភពលោកនៅក្នុងកម្រិត 1.5 អង្សាសេ ទៅតាមគោលដៅរបស់កិច្ចព្រមព្រៀងទីក្រុងប៉ារីសឆ្នាំ 2015 នឹងជួយបន្ថយចំនួនមនុស្សដែលជួបគ្រោះថ្នាក់ដោយសារកម្ដៅព្រះអាទិត្យ ចុះមកនៅ 500 លាននាក់ ដែលស្មើនឹង 5% នៃចំនួនប្រជាជនសរុបប្រមាណ 9.5 ពាន់លាននាក់របស់ពិភពលោក នៅក្នុងរយៈពេលពី 6 ទៅ 7 ទសវត្សរ៍ខាងមុខ។

មកដល់បច្ចុប្បន្ន ការឡើងកម្ដៅក្រោម 1.2 អង្សាសេ ក៏បានបង្កើនកម្រិត ឬពេលវេលារបស់រដូវរលកកម្ដៅ គ្រោះរាំងស្ងួត និងករណីឆេះព្រៃ។ 8 ឆ្នាំកន្លង គឺជាពេលវេលាដែលផែនដីរងកម្ដៅខ្ពស់បំផុតដែលមនុស្សធ្លាប់បានកត់ត្រា។

កម្ដៅដែលបង្កគ្រោះថ្នាក់ទៅតាមការសិក្សាស្រាវជ្រាវថ្មីនេះ នោះគឺនៅពេលសីតុណ្ហភាពមធ្យមប្រចាំឆ្នាំ (MAT) ឡើងដល់ 29 អង្សាសេ។

យោងតាមធនាគារពិភពលោក ប្រទេសឥណ្ឌាបំភាយឧស្ម័ន CO2 (ឧស្ម័នដែលធ្វើឱ្យបរិយាកាសផែនដីឡើងកម្ដៅ) ជាមធ្យមប្រហែលពីរតោន/ម្នាក់/ឆ្នាំ, នីហ្សេរីយ៉ាបំភាយប្រហែលកន្លះតោន ខណៈដែលសហភាពអឺរ៉ុបជិត 7 តោន និងសហរដ្ឋអាម៉េរិក 15 តោន។

ក្រុមអ្នកស្រាវជ្រាវខាងលើក៏ព្រមានថា លទ្ធភាពដែលសីតុណ្ហភាពផ្ទៃផែនដីកើនបន្ថែមលើសពី 2.7 អង្សាសេ គឺអាចកើតឡើង។ បើសិនជាសកម្មភាពបំភាយឧស្ម័នផ្ទះកញ្ចក់អាចនាំឱ្យ «ធ្លុះធ្លាយ» ឃ្លាំងធម្មជាតិផ្ទុកកាបូន មានជាអាទិ៍ ស្រទាប់ Permafrost (ស្រទាប់ដីស្ថិតនៅត្រង់ ឬក្រោមតំបន់ទឹកកដែលកករយៈពេលចាប់ពីពីរឆ្នាំឡើងទៅ) ឬធ្វើឱ្យបរិយាកាសផែនដីក្ដៅជាងការរំពឹងទុក នោះសីតុណ្ហភាពពិភពលោកអាចកើនបន្ថែមជិត 4 អង្សាសេ បើធៀបនឹងកម្ដៅនៅពាក់កណ្ដាលសតវត្សរ៍ទី 19៕

May 23, 2023

អនាគតបេក្ខភាពប្រធាន FAT របស់ថៃ៖ «បើថៃមិនបានចូលរួម World Cup ខ្ញុំនឹងលាលែងពីតំណែង»

អតីតកីឡាករឆ្នើម Piyapong Pew On ធ្វើឱ្យមានការចាប់អារម្មណ៍បន្ទាប់ពីបានប្រកាសឈរឈ្មោះជាបេក្ខភាពសម្រាប់តំណែងប្រធានសហព័ន្ធកីឡាបាល់ទាត់របស់ប្រទេសថៃ។

យោងតាមប្រព័ន្ធផ្សព្វផ្សាយថៃ បើទោះជាការបោះឆ្នោតជ្រើសរើសប្រធានសហព័ន្ធបាល់ទាត់ថៃ (FAT) ត្រូវធ្វើឡើងនៅខែមេសា ឆ្នាំ 2024 ប៉ុន្តែស្ថានការណ៍ប្រែប្រួលនៅមុនការបោះឆ្នោតនេះ កំពុងតែឡើង «កម្ដៅ»។ Piyapong Pew On ដែលជាអតីតកីឡាករឆ្នើមរបស់បាល់ទាត់ថៃ នឹងក្លាយជាបេក្ខភាពសម្រាប់តំណែងនេះ។

ចែករំលែកអំពីការសម្រេចចិត្តខាងលើ លោក Piyapong Pew On បានបង្កការចាប់អារម្មណ៍ខ្លាំងនៅពេលប្រកាសថា នឹងលាលែងពីតំណែង បើសិនមិនអាចជួយឱ្យបាល់ទាត់ថៃបានចូលរួមប្រកួតនៅ World Cup។

«… ខ្ញុំបានត្រៀមខ្លួនរួចហើយសម្រាប់ការកាន់តំណែងប្រធាន FAT។ បើសិនសមាជិក សមាជិកាគាំទ្រ ខ្ញុំសន្យាចំពោះគ្រប់គ្នាថា នឹងបំពេញកាតព្វកិច្ចក្នុងរង្វង់បួនឆ្នាំ។ បើសិនក្រុមជម្រើសជាតិថៃមិនបានចូលរួម World Cup ខ្ញុំនឹងលាលែងពីតំណែង ហើយធ្វើកិច្ចការក្នុងវិស័យបាល់ទាត់ជាមួយនឹងតួនាទីផ្សេង» អតីតកីឡាករឆ្នើមរបស់ប្រទេសថៃ លោក Piyapong Pew On អះអាងដូច្នេះ។

លោក Piyapong Pew On បញ្ជាក់ថា លោកមិនប្រជែងដើម្បីមុខតំណែង ប៉ុន្តែលោកមានភាពម៉ឺងម៉ាត់ដោយរំពឹងថានឹងអភិវឌ្ឍ និងបង្កើតវប្បធម៌បាល់ទាត់ថៃទៅតាមស្មារតី «ភាពត្រឹមត្រូវ ភាពស្មោះត្រង់ តម្លាភាព និងមានការផ្ទៀងផ្ទាត់»។

លោក Piyapong Pew On ក៏ជាអ្នកដែលបានរិះគន់ទៅលើក្រុមគ្រូបង្វឹករបស់ក្រុមបាល់ទាត់ U22 ថៃ នៅក្នុងករណីវាយតប់គ្នាក្នុងការប្រកួតវគ្គផ្ដាច់ព្រ័ត្រនៅស៊ីហ្គេមលើកទី 32 រវាង U22 ថៃ និង U22 ឥណ្ឌូណេស៊ី កាលពីថ្ងៃ 16 ខែឧសភា 2023។

«ករណីហិង្សាកើតឡើងក្នុងវគ្គផ្ដាច់ព្រ័ត្ររវាង U22 ថៃ និង U22 ឥណ្ឌូណេស៊ី។ នោះគឺជារឿងដែលកីឡាករថៃត្រូវរៀនសូត្រ ពិសេសគឺការគ្រប់គ្រងកំហឹង។ ប៉ុន្តែ នោះគឺជាបញ្ហាដែលមិនគួរកើតឡើង និងមិនអាចលើកលែងទោស នៅពេលក្រុមគ្រូបង្វឹកទាំងមូលសម្រុកចូលបង្កហេតុជាមួយឥណ្ឌូណេស៊ី។ ពួកគេគួរណាស់តែរារាំងកីឡាករក្មេងៗ តែបែរជាធ្វើឱ្យមានកំហុសដោយខ្លួនឯងទៅវិញ» លោក Piyapong Pew On ថ្លែងដូច្នេះ។

លោក Piyapong Pew On បន្ថែមថា «ទោះជាយ៉ាងណាក៏ដោយ គេត្រូវតែផ្លាស់ប្ដូរគ្រូបង្វឹក ថៃត្រូវការមនុស្សហ្មត់ចត់ជាងដើម្បីដឹកនាំក្រុមកីឡាករក្មេង មិនដូច្នេះទេ យើងនឹងត្រូវបានបំផ្លាញដូចនៅក្នុងការប្រកួតផ្ដាច់ព្រ័ត្រនៅស៊ីហ្គេមលើកនេះ»។

លោក Piyapong Pew On អាចនឹងត្រូវប្រកួតប្រជែងដណ្ដើមតំណែងប្រធានសហព័ន្ធបាល់ទាត់ថៃ ជាមួយនឹងអតីតប្រធាន FAT លោក Worawee Makudi អាយុ 72 ឆ្នាំ។ កន្លងមក លោក Worawee Makudi ក៏បានបញ្ជាក់ថា នឹងឈរឈ្មោះជាបេក្ខភាពសម្រាប់តំណែងនេះជាថ្មី បើទោះផ្ទុយពីការកំណត់ដែលហាមបេក្ខភាពដែលមានអាយុលើសពី 70 ឆ្នាំ។ ប្រធាន FAT បច្ចុប្បន្នដែលត្រូវចប់អាណត្តិនៅខែកុម្ភៈ ឆ្នាំ 2024 គឺលោក Somyot Poompanmoung៕

May 23, 2023

SpaceX ធ្វើតេស្តបច្ចេកវិទ្យាខែលការពារប្រព័ន្ធទម្រយាន Starship

(សហរដ្ឋអាម៉េរិក) – SpaceX កំពុងពិសោធបច្ចេកវិទ្យាដែលជួយពង្រឹងផ្ទៃខាងក្រោមនៃប្រព័ន្ធទម្រដើម្បីអាចទ្រាំទ្រកម្លាំងដ៏ខ្លាំងរបស់ម៉ាស៊ីនរុញច្រានរ៉ុក្កែត Starship នៅពេលបាញ់បង្ហោះម្ដងៗ។

ប្រព័ន្ធទម្រនៅមូលដ្ឋាន Starbase របស់ SpaceX ក្នុងតំបន់ Texas ខាងត្បូង បានរងការខូចខាតធ្ងន់ធ្ងរក្នុងការបាញ់បង្ហោះសាកល្បងដំបូងរបស់យាន Starship ដែលជារ៉ុក្កែតកម្លាំងខ្លាំងបំផុត កាលពីថ្ងៃទី 20 មេសា 2023។ កម្លាំងដ៏ខ្លាំងរបស់ម៉ាស៊ីន Raptor ចំនួន 33 គ្រឿងនៅជាន់ក្រោមបង្អស់របស់ Starship បានទម្លុះជារណ្ដៅនៅខាងក្រោមជើងរបស់ប្រព័ន្ធទម្រ ធ្វើឱ្យផ្ទាំងបេតុងត្រូវបែកបាក់ និងប៉ើងចេញឆ្ងាយពីកន្លែងដើម។ មួយថ្ងៃក្រោយការបាញ់បង្ហោះសាកល្បងខាងលើ SpaceX ក៏បានឱ្យដឹងថា ពួកគេកំពុងរកវិធីបង្កើតខែលទប់ទល់នឹងបញ្ហានេះ។

ការប្រឹងប្រែងរកវិធីទប់ទល់ក៏បានចាប់ផ្ដើមតាំងពីបីខែមុន។ ប្រព័ន្ធខែលនេះមិនទាន់បានត្រៀមខ្លួនរួចរាល់នៅឡើយសម្រាប់ការបាញ់បង្ហោះកាលពីថ្ងៃទី 20 មេសា ប៉ុន្តែ SpaceX នៅតែសម្រេចចិត្តធ្វើតេស្ត ព្រោះយល់ថា ស្រទាប់បេតុងខាងក្រោមប្រព័ន្ធជើងទម្រ Starship អាចទ្រាំទ្រការបាញ់បង្ហោះបានពីរលើក។ ក៏ប៉ុន្តែ បញ្ហានៅតែកើតឡើង ដូច្នេះ SpaceX ក៏បង្កើនសកម្មភាពដើម្បីបង្ហើយកិច្ចការបង្កើតខែលការពារដែលធ្វើពីដែកថែប។

ថ្មីៗនេះ SpaceX បានពិសោធកម្លាំងរបស់ខែលទប់ទល់កំណែដំបូង ដោយការប្រើប្រាស់កម្លាំងរបស់ម៉ាស៊ីន Raptor មួយគ្រឿង។ នៅក្នុងវីដេអូ 20 វិនាទី ដែល SpaceX បានចែករំលែកកាលពីថ្ងៃទី 19 ឧសភា គេឃើញថា នៅពេលចំហាយទឹកបានរសាត់អស់ នៅខាងចុងវីដេអូ ខែលនេះហាក់នៅរក្សាបានទម្រង់ដើម។

SpaceX កំពុងតែអភិវឌ្ឍយាន Starship ដើម្បីដឹកអ្នកអវកាសឡើងទៅកាន់ឋានព្រះចន្ទ និងភពអង្គារ។ ណាសាក៏ជ្រើសរើស Starship ធ្វើជាស្ថានីយចុះចតដំបូងដែលនាំមនុស្សទៅជាន់ដីរបស់ឋានព្រះចន្ទនៅក្នុងកម្មវិធី Artemis។

ការធ្វើតេស្តបច្ចេកវិទ្យាខែលការពារប្រព័ន្ធទម្រយាន Starship

បច្ចុប្បន្ន SpaceX កំពុងដុតដៃដុតជើងនៅក្នុងការផលិតយាន Starship ជាច្រើនគ្រឿងនៅឯមូលដ្ឋាន Starbase ហើយគ្រោងនឹងបាញ់បង្ហោះកំណែបន្ទាប់នៅប្រហែលពីរខែទៀត បើសិនប្រព័ន្ធខែលដែកការពារផ្ទៃជើងទម្របានត្រៀមខ្លួនរួចរាល់ និងបន្ទាប់ពីទទួលបានការអនុញ្ញាតពីរដ្ឋបាលអាកាសចរណ៍អាម៉េរិក៕

May 23, 2023

រូបភាពវាយតប់គ្នានៅស៊ីហ្គេមមិនទាន់បាត់ពីភ្នែកផង បាល់ទាត់នៅអាស៊ានក៏បន្តកើតអំពើហិង្សា

វិស័យបាល់ទាត់នៅអាស៊ីអាគ្នេយ៍បន្តកើតមានករណីប្រើអំពើហិង្សានៅលើទីលានប្រកួត នាំឱ្យកម្លាំងប៉ូលិសចូលធ្វើអន្តរាគមន៍។ ហេតុការណ៍នេះកើតឡើងនៅប្រទេសម៉ាឡេស៊ី។

ថ្មីៗនេះ ការប្រកួតបាល់ទាត់ពានរង្វាន់ជាតិម៉ាឡេស៊ី កើតមានហេតុការណ៍ប៉ះទង្គិចគ្នារវាងអ្នកគាំទ្រពីរក្រុមនៅក្នុងការប្រកួតរវាង Perak FC និង Selangor FC។

ថ្វីបើមិនទាន់រកឃើញមូលហេតុពិតប្រាកដនៃករណីវាយតប់គ្នានេះ ប៉ុន្តែនៅក្នុងវីដេអូ 12 វិនាទីដែលត្រូវបានលាតត្រដាង គេអាចដឹងបានថា ករណីនេះកើតឡើងនៅនាទីទី 24 នៅពេលអ្នកគាំទ្រក្រុមម្ចាស់ផ្ទះ Perak មួយក្រុមស្រាប់តែវាយប្រហារទៅលើអ្នកគាំទ្ររបស់ Selangor នៅលើតំបន់សម្រាប់ទស្សនិកជន។

កងកម្លាំងសន្តិសុខក៏បានចូលធ្វើអន្តរាគមន៍ និងប្រើផ្សែងបង្ហូតទឹកភ្នែកដើម្បីកាត់បន្ថយភាពតានតឹង។ ប៉ូលិសបានឃាត់ខ្លួនបុរសបួននាក់ដែលមានអាយុពី 18 ដល់ 26 ឆ្នាំនៅក្នុងហេតុការណ៍នេះ។

ទន្ទឹមនឹងនេះ សមត្ថកិច្ចក៏បានអំពាវនាវដល់សាធារណជន ចូលរួមសហការជាមួយអាជ្ញាធរ ដើម្បីគាំទ្រដល់ការស៊ើបអង្កេត បើសិនមានព័ត៌មានដែលទាក់ទិននឹងអំពើហិង្សាខាងលើ។

នៅក្នុងការប្រកួតនេះ ក្រុមម្ចាស់ផ្ទះ Perak FC បានចាញ់ក្រុម Selangor FC 0-4 ក្នុងនោះមាន 2 គ្រាប់ត្រូវបានទាត់ចូលនៅចុងតង់ទីមួយ (នាទីទី 40 និង 45+1)។

ចូលដល់តង់ទីពីរ Selangor FC រកបាន 2 គ្រាប់ទៀតនៅនាទីទី 51 និង 70។ លទ្ធផលនេះធ្វើឱ្យ Perak FCត្រូវឈរលំដាប់លេខ 11 ជាបណ្ដោះអាសន្ន ក្នុងចំណោម 14 ក្រុមដែលបានចូលរួមប្រកួតនៅ Malaysia Super League នារដូវកាលឆ្នាំនេះ។

មុននោះ បាល់ទាត់នៅអាស៊ីអាគ្នេយ៍ក៏បានឆ្លងកាត់ករណីវាយតប់គ្នានៅក្នុងការប្រកួតវគ្គផ្ដាច់ព្រ័ត្រស៊ីហ្គេមលើកទី 32 រវាង U22 ថៃ និង U22 ឥណ្ឌូណេស៊ី។ បច្ចុប្បន្ន សហព័ន្ធកីឡាបាល់ទាត់អាស៊ី បានបង្កើតក្រុមស្រាវជ្រាវមួយដើម្បីស៊ើបអង្កេត និងពិន័យដល់កីឡាកររបស់ក្រុមទាំងពីរ៕

May 22, 2023

នៅស៊ីហ្គេមលើកទី 33 ប្រទេសថៃនឹងរឹតបន្តឹងចំពោះ «អត្តពលិកចូលសញ្ជាតិ»

អនុប្រធានគណៈកម្មាធិការជាតិអូឡាំពិកថៃ បានឱ្យដឹងថា នឹងមានការកាត់បន្ថយចំនួនអត្តពលិកចូលសញ្ជាតិនៅស៊ីហ្គេមលើកទី 33 ដែលប្រទេសនេះធ្វើជាម្ចាស់ផ្ទះ។

នៅក្នុងស៊ីហ្គេមលើកទី 32 កន្លងទៅ មានប្រទេសជាច្រើនប្រើប្រាស់កីឡាករចូលសញ្ជាតិដើម្បីអាចដណ្ដើមបានលទ្ធផលល្អនៅក្នុងការប្រកួត។ នៅក្នុងប្រកាសថ្មីបំផុត អនុប្រធានគណៈកម្មាធិការជាតិអូឡាំពិកថៃ លោក Chaiyaphak Siriwat ឱ្យដឹងថា «ប្រទេសនីមួយៗនឹងមានគោលនយោបាយផ្សេងគ្នាសម្រាប់អត្តពលិកចូលសញ្ជាតិ។ យើងត្រូវតែគោរពចំពោះប្រការនេះ។ ការបញ្ចូលសញ្ជាតិដើម្បីប្រកួតនៅក្នុងវិស័យកីឡាក៏មិនមែនជារឿងថ្មីនោះដែរ»។

ក៏ប៉ុន្តែ លោក Chaiyaphak Siriwat បានសង្កត់ធ្ងន់ថា នៅស៊ីហ្គេមលើកទី 33 នឹងមិនមានមេដាយមាសច្រើនសម្រាប់ប្រភេទកីឡាក្នុងស្រុកទៀតឡើយ។ «យើងចង់ផ្ដោតសំខាន់លើការជំរុញវិញ្ញាសាកីឡាដូចនៅ ASIAD ឬ Olympic» អនុប្រធានគណៈកម្មាធិការជាតិអូឡាំពិកថៃ បញ្ជាក់ដូច្នេះ។

យោងតាមមន្ត្រីថៃ វិញ្ញាសាកីឡាក្នុងស្រុកនានានឹងមានតែ 4 ប្រភេទប៉ុណ្ណោះ ហើយមេដាយសម្រាប់ប្រភេទកីឡានេះនឹងមានតែ 8 ឈុត។

ព្រឹត្តិការណ៍ប្រកួតកីឡាអាស៊ីអាគ្នេយ៍ (ស៊ីហ្គេម) លើកទី 33 នឹងត្រូវបានរៀបចំឡើងនៅបាងកក ឈុនបុរី (Chonburi) និង សុងក្លា (Songkhla) ប្រទេសថៃ ចាប់ពីថ្ងៃទី 09 ដល់ 20 ធ្នូ ឆ្នាំ 2025។ នេះបើតាម ស្ថាប័នគ្រប់គ្រងវិស័យកីឡារបស់ប្រទេសថៃ (SAT) ដែលបានប្រកាសកាលពីថ្ងៃទី 16 ឧសភា 2023៕

May 22, 2023

យន្តហោះអវកាសដ៏អាថ៌កំបាំងរបស់ចិន បង្ហោះវត្ថុ «សម្ងាត់» ទៅក្នុងគន្លងគោចរ

យោងតាមមជ្ឈមណ្ឌលស្រាវជ្រាវអន្តរជាតិ និងយុទ្ធសាស្ត្រនៅសហរដ្ឋអាម៉េរិក យន្តហោះអវកាសប្រើប្រាស់ឡើងវិញរបស់ប្រទេសចិន បានបង្ហោះវត្ថុមួយចូលទៅក្នុងគន្លងគោចរកាលពីខែតុលា ឆ្នាំ 2022។

ក្រោយរយៈពេល 9 ខែនៅលើគន្លងគោចរ យន្តហោះអវកាសដ៏អាថ៌កំបាំងរបស់ប្រទេសចិនក៏បានចុះចត ជួយឱ្យប្រទេសនេះក្លាយជាមួយក្នុងចំណោមប្រទេសដ៏តិចតួចដែលបានបាញ់បង្ហោះ និងបញ្ជាឱ្យចុះចតដោយជោគជ័យនូវយន្តហោះអវកាសដែលអាចប្រើប្រាស់ឡើងវិញ។ យន្តហោះអវកាសនេះបានត្រលប់មកកាន់ផែនដីវិញកាលពីព្រឹកថ្ងៃទី 08 ឧសភា 2023 បន្ទាប់ពីស្ថិតនៅលើគន្លងគោចរអស់រយៈពេល 276 ថ្ងៃ យូរជាង 100 ដង ធៀបនឹងជើងហោះហើរដំបូងកាលពីជិត 3 ឆ្នាំមុន។

ក៏ប៉ុន្តែ រដ្ឋាភិបាលចិនមិនបានប្រកាសព័ត៌មានច្រើនទាក់ទងនឹងយន្តហោះអវកាសនេះទេ។ នេះបើតាម Live Science ចុះផ្សាយកាលពីថ្ងៃទី 20 ឧសភា។

Kevin Pollpeter អ្នកវិទ្យាសាស្ត្រប្រចាំមជ្ឈមណ្ឌលវិភាគផ្នែកទ័ពជើងទឹករបស់សហរដ្ឋអាម៉េរិក ឱ្យដឹងថា យន្តហោះអវកាសរបស់អាម៉េរិក Boeing X-37B ដែលបានបង្ហាញខ្លួនកាលពីឆ្នាំ 2010 អាចជាកត្តាជំរុញឱ្យរដ្ឋាភិបាលចិនអភិវឌ្ឍយន្តហោះអវកាសផ្ទាល់ខ្លួន។

ដូចទៅនឹង Boeing X-37B យន្តហោះអវកាសរបស់ចិនទំនងជាមិនមានមនុស្សបើកបរ និងតូច។ វាប្រហែលជាបានហោះហើរលើកដំបូងកាលពីខែកញ្ញា 2020 និងចុះចតវិញក្រោយការហោះហើរបាន 2 ថ្ងៃ។ បេសកកម្មថ្មីបំផុតរបស់យន្តហោះអវកាសចិន ចាប់ផ្ដើមពីខែសីហា 2022 ដែលហោះឡើងដោយសាររ៉ុក្កែត Long March 2F។ នេះបើតាមរបាយការណ៍របស់មជ្ឈមណ្ឌលស្រាវជ្រាវអន្តរជាតិ និងយុទ្ធសាស្ត្រ (CSIS) នៅសហរដ្ឋអាម៉េរិក។ គោលដៅពិតប្រាកដរបស់បេសកកម្មនេះនៅតែជារឿងអាថ៌កំបាំង។

CSIS បានឱ្យដឹងថា យន្តហោះអវកាសចិន បានទម្លាក់វត្ថុមួយទៅក្នុងគន្លងគោចរកាលពីខែតុលា 2022។ វត្ថុនេះទំនងជាបានបាត់ខ្លួនកាលពីខែមករា 2023 ហើយក្រោយមកក៏បានបង្ហាញខ្លួនជាថ្មីនៅលើរ៉ាដាកាលពីខែមីនា 2023។ ក្រុមអ្នកជំនាញយល់ថា ប្រការនេះអាចបង្ហាញថា យន្តហោះអវកាសចិនមានសមត្ថភាពបំផ្លាស់ទីវត្ថុដោយដៃយន្តរបស់វា៕

May 22, 2023

ការរីកចម្រើនផ្នែកអវកាសរបស់សហរដ្ឋអាម៉េរិក ធៀបនឹងប្រទេសចិន

នៅក្នុងផ្នែកសំខាន់ៗ សហរដ្ឋអាម៉េរិកមិនត្រឹមតែមានប្រៀបលើសលុបលើប្រទេសចិននោះទេ ប៉ុន្តែក៏មានប្រៀបជាងបណ្ដាប្រទេសបូកចូលគ្នាផងដែរនៅក្នុងវិស័យអវកាស។

អំពីថវិកា៖ ឆ្នាំ 2021 ថវិកាសម្រាប់ផ្នែកអវកាសរបស់សហរដ្ឋអាម៉េរិកគឺប្រមាណ 59.8 ពាន់លានដុល្លារ ខណៈប្រទេសចិន មានប្រហែល 16.18 ពាន់លានដុល្លារប៉ុណ្ណោះ។ នេះបើតាម Svetla Ben-Itzhak សាស្ត្រាចារ្យរងផ្នែកអវកាស និងទំនាក់ទំនងអន្តរជាតិ ប្រចាំសាកលវិទ្យាល័យ Air (AU) របស់សហរដ្ឋអាម៉េរិក។

ផ្កាយរណប៖ គិតត្រឹមខែមេសា ឆ្នាំ 2023 នៅលើគន្លងតារាវិថីផែនដី មានផ្កាយរណបសរុប 5,465 គ្រឿងកំពុងដំណើរការ។ ក្នុងនោះ សហរដ្ឋអាម៉េរិកមាន 3,433 គ្រឿង ស្មើនឹង 63% ហើយឈរលំដាប់លេខមួយលើពិភពលោក។ ចំណែកប្រទេសចិនវិញ មានតែ 541 គ្រឿងប៉ុណ្ណោះ។

អវកាសយានដ្ឋាន៖ សហរដ្ឋអាម៉េរិកមានអវកាសយានដ្ឋានសម្រាប់បាញ់បង្ហោះយានអវកាសចំនួន 7 កំពុងដំណើរការក្នុង និងក្រៅប្រទេស គ្រាដែលយ៉ាងតិច 13 កន្លែងផ្សេងទៀតកំពុងស្ថាបនា។ ប្រទេសចិនមានអាកាសយានដ្ឋានកំពុងដំណើរការចំនួន 4 កន្លែង និង 2 កន្លែងទៀតកំពុងអភិវឌ្ឍទៅតាមផែនការ ហើយទាំងអស់សុទ្ធតែស្ថិតក្នុងទឹកដីប្រទេសនេះ។

ដៃគូសហការ៖ រដ្ឋាភិបាលអាម៉េរិកបានចុះហត្ថលេខាលើកិច្ចព្រមព្រៀងចំនួន 169 ជាមួយរដ្ឋ និងអង្គការអន្តររដ្ឋាភិបាលចំនួន នឹង 33, 129 ជាមួយនឹងដៃគូពាណិជ្ជកម្ម និង 7 ជាមួយនឹងស្ថាប័នស្រាវជ្រាវ។ ប្រទេសចិន មានកិច្ចសហការជាមួយប្រទេសរុស្ស៊ី អ៊ីរ៉ង់ ប៉ាគិស្ថាន ថៃ និងតួកគី។

បេសកកម្មឡើងទៅឋានព្រះចន្ទ៖ រុស្ស៊ី និងចិន សហការគ្នានៅក្នុងគម្រោងឡើងទៅកាន់ឋានព្រះចន្ទនៅឆ្នាំ 2028។ ស្ថានីយស្រាវជ្រាវព្រះចន្ទអន្តរជាតិរបស់ប្រទេសទាំងពីរនេះ បើកទ្វារទទួលយកដៃគូសហការអន្តរជាតិ ប៉ុន្តែមកដល់ពេលនេះមិនទាន់មានដៃគូថ្មីណាមួយឡើយ។ ចំណែកកម្មវិធីព្រះចន្ទ Artemis ដែលនឹងនាំអ្នកអវកាសឡើងទៅកាន់ឋានព្រះចន្ទនៅឆ្នាំ 2025 របស់សហរដ្ឋអាម៉េរិកវិញ គិតចាប់ពីឆ្នាំ 2020 មានប្រទេសចំនួន 24 បានចូលរួម។

ចំនួនលើកនៃការបាញ់បង្ហោះយានអវកាស៖ ឆ្នាំ 2021 ប្រទេសចិនបានបាញ់បង្ហោះយានអវកាសចំនួន 55 លើក ច្រើនជាងសហរដ្ឋអាម៉េរិកចំនួន 4 លើក។

ស្ថានីយអវកាស៖ ចាប់ពីឆ្នាំ 2022 ប្រទេសចិនមានស្ថានីយអវកាសពេញលេញផ្ទាល់ខ្លួន ឈ្មោះ ធានហ្គង់ (Tiangong) ដែលគ្រប់គ្រងតែឯង។ ចាប់ពីឆ្នាំ 1990 សហរដ្ឋអាម៉េរិកបានសហការជាមួយប្រទេសចំនួន 14 ក្នុងនោះមានរុស្ស៊ីផងដែរ ដើម្បីដំណើរការស្ថានីយអវកាសអន្តរជាតិ (ISS)។ ប្រទេសចិនអាចនឹងមានប្រៀបជាងសហរដ្ឋអាម៉េរិក យ៉ាងឆាប់ត្រឹមឆ្នាំ 2045 បើសិនវ៉ាស៊ីងតោនមិនធ្វើសកម្មភាព។ ប៉ុន្តែ យោងតាម Space លទ្ធភាពនេះប្រហែលជានឹងមិនអាចកើតឡើង ព្រោះថា សហរដ្ឋអាម៉េរិកកំពុងតែបង្កើនការវិនិយោគទៅលើវិស័យអវកាស៕

May 20, 2023

ក្រុមហ៊ុនវៀតណាមនាំចេញរថយន្តអគ្គិសនី VinFast VF8 ជើងដំបូងទៅកាន់កាណាដា

កាលពីថ្ងៃទី 18 ឧសភា (17 ឧសភានៅកាណាដា) ក្រុមហ៊ុន VinFast Canada បានប្រកាសថា កប៉ាល់ដឹករថយន្តអគ្គិសនី VinFast VF8 ចំនួន 781 គ្រឿង បានចូលចតនៅកំពង់ផែ Nanaimo ក្នុងតំបន់ British Columbia។

រថយន្តអគ្គិសនីម៉ូដែល VF8 របស់ VinFast ត្រូវបាន EPA ទទួលស្គាល់ថា អាចរត់បានចម្ងាយ 425 គីឡូម៉ែត្រសម្រាប់កំណែ Eco, 391 គីឡូម៉ែត្រសម្រាប់កំណែ Plus 300 kW និង 354 គីឡូម៉ែត្រសម្រាប់កំណែ Plus 260 kW បន្ទាប់ពីបញ្ចូលថាមពលអគ្គិសនីមួយពេញ។

នៅកាណាដា កំណែ VF8 Eco មានតម្លៃចាប់ពី 39,680 ដុល្លារអាម៉េរិក គ្រាដែលកំណែ VF8 Plus 260 kW មានតម្លៃចាប់ពី 43,820 ដុល្លារអាម៉េរិក។

រថយន្តអគ្គិសនី 781 គ្រឿងខាងលើនេះគឺជាការនាំចេញលើកទីពីរទៅកាន់ទីផ្សារអន្តរជាតិរបស់ក្រុមហ៊ុន VinFast ដែលបានចេញដំណើរពីវៀតណាមកាលពីថ្ងៃទី 16 មេសា ឆ្នាំ 2023។ មុននោះ VinFast VF8 ចំនួន 1,098 គ្រឿងក៏បានទៅដល់សហរដ្ឋអាម៉េរិកកាលពីថ្ងៃទី 12 ឧសភា។

VinFast VF8 ត្រូវបានបំពាក់មុខងារបច្ចេកវិទ្យាទំនើបៗ ក្នុងនោះមានទាំងប្រព័ន្ធជំនួយការបើកបរ (ADAS) ព្រមទាំងត្រូវបានធានា 10 ឆ្នាំ ឬ 200,000 គីឡូម៉ែត្រសម្រាប់រថយន្ត និង 10 ឆ្នាំ ឬមិនកំណត់ចំនួនគីឡូម៉ែត្រសម្រាប់ថ្មផ្ទុកថាមពល។ សេវាជួសជុលចល័ត និងសង្គ្រោះ 24/7 ក៏ស្ថិតនៅក្នុងការធានានេះ៕

May 19, 2023

FIFA ជិតចាប់ផ្ដើមចូលស៊ើបអង្កេត ខណៈ U22 ឥណ្ឌូណេស៊ីប្ដេជ្ញាប្ដឹងប្រឆាំង U22 ថៃ ក្នុងករណីនៅស៊ីហ្គេម 2023

ភាគីខាង U22 ឥណ្ឌូណេស៊ី កំពុងតែមានបំណងពឹង FIFA កាត់ក្ដីករណីអំពើហិង្សារវាងក្រុមបាល់ទាត់បុរសជម្រើសជាតិប្រទេសនេះ និងក្រុមបាល់ទាត់ថៃ នៅក្នុងការប្រកួតវគ្គផ្ដាច់ព្រ័ត្រនៅស៊ីហ្គេមលើកទី 32។

ហេតុការណ៍វាយតប់គ្នារវាង U22 ថៃ និង U22 ឥណ្ឌូណេស៊ី មិនទាន់ត្រូវបានដោះស្រាយរួចរាល់នៅឡើយ បើទោះវគ្គផ្ដាច់ព្រ័ត្រនៅស៊ីហ្គេមឆ្នាំ 2023 បានចប់សព្វគ្រប់។ បន្ទាប់ពីសហព័ន្ធកីឡាបាល់ទាត់អាស៊ី (AFC) ចាប់ផ្ដើមស៊ើបអង្កេត ហើយក្រុមទាំងពីរអាចត្រូវទទួលការពិន័យ ភាគីឥណ្ឌូណេស៊ីក៏បែរជាចង់អញ្ជើញទាំង FIFA មកចូលរួមដោះស្រាយ។

ភាគីឥណ្ឌូណេស៊ីចង់ឱ្យថៃទទួលខុសត្រូវនៅក្នុងករណីនេះ។ ប្រធានគណៈកម្មាធិការអូឡាំពិកឥណ្ឌូណេស៊ី (NOC) Raja Sapta Oktohari បានបើកកិច្ចប្រជុំមួយជាមួយសមាជិករបស់សហព័ន្ធបាល់ទាត់ឥណ្ឌូណេស៊ី (PSSI) ដើម្បីធ្វើការសម្រេចលើការស្នើសុំអន្តរាគមន៍របស់ FIFA ក្នុងករណីហិង្សានៅវគ្គផ្ដាច់ព្រ័ត្រផ្នែកបាល់ទាត់បុរសនៅស៊ីហ្គមលើកទី 32 និងកាត់ក្ដីចុងក្រោយ។

ប្រធាន NOC ឱ្យដឹងថា «ពេលនេះ យើងមិនទាន់បញ្ជូនរបាយការណ៍ឡើងទៅកាន់ FIFA ប៉ុន្តែរឿងនេះនឹងកើតឡើងឆាប់ៗខាងមុខ។ កិច្ចប្រជុំផ្ទៃក្នុងបានបញ្ចប់ ខ្ញុំ និងប្រធាន PSSI – Erick Thohir សុទ្ធតែមិនចង់នៅស្ងៀមក្នុងករណីនេះ។ បើសិនខាងឥណ្ឌូណេស៊ីខុស យើងនឹងទទួលខុសត្រូវ ប៉ុន្តែបើថៃខុស ពួកគេក៏នឹងត្រូវធ្វើដូច្នេះ»។

ភាគីឥណ្ឌូណេស៊ីទំនងជាកំពុងជឿជាក់ថា ខ្លួនមិនមានកំហុសនៅក្នុងការវាយតប់គ្នាជាមួយក្រុមថៃនៅវគ្គផ្ដាច់ព្រ័ត្រនៅស៊ីហ្គេមឆ្នាំ 2023។ ចំណែកថៃវិញ បច្ចុប្បន្នក៏កំពុងមានភាពតានតឹងខ្លាំង ទាក់ទងនឹងបញ្ហានេះ។ អនុប្រធានសហព័ន្ធកីឡាបាល់ទាត់ថៃ Yuttana Yimkarun ថ្មីៗនេះបានសរសេរលិខិតសុំលាលែងពីតំណែង។ ប្រធានសមាគមបាល់ទាត់ថៃ (FAT) យល់ថា ពួកគេត្រូវទទួលខុសត្រូវ បន្ទាប់ពីបានបណ្ដោយឱ្យកីឡាករ U22 ថៃ បាត់បង់ការគ្រប់គ្រងអារម្មណ៍ក្នុងវគ្គផ្ដាច់ព្រ័ត្រ ហើយបង្កើតឱ្យមានរូបភាពអាក្រក់នៅកម្ពុជា។

ការប្រកួតវគ្គផ្ដាច់ព្រ័ត្ររវាង U22 ឥណ្ឌូណេស៊ី និងថៃ ត្រូវបានគេចាត់ទុកថាមានភាពទាក់ទាញបំផុតក្នុងប្រវត្តិសាស្ត្រស៊ីហ្គេម។ ក្នុងការប្រកួតនេះ ឥណ្ឌូណេស៊ីបានឈ្នះថៃ 5-2 ខណៈអាជ្ញាកណ្ដាលបានពិន័យកាតលឿងជាង 10 និងកាតក្រហមចំនួន 7 ដោយសារតែមានការប៉ះទង្គិចគ្នាច្រើន និងការប្រើអំពើហិង្សា៕

May 19, 2023

ដើម្បីជំនួស Messi ក្លឹប PSG ត្រៀមទិញយកកីឡាករឆ្នើមរបស់ Arsenal ?

Paris Saint-Germain ត្រូវបានគេជឿថា បានបញ្ចូលឈ្មោះប្រធានក្រុមរបស់ Arsenal ទៅក្នុងបញ្ជីសម្រាំងចុងក្រោយរបស់ខ្លួនដើម្បីជំនួស Lionel Messi។

យោងតាមការចុះផ្សាយរបស់ទំព័រ Mirror Football តារាបាល់ទាត់អាហ្សង់ទីន លោក Messi ត្រូវគេជឿថា នឹងចាកចេញពី PSG នៅពេលកិច្ចព្រមព្រៀងបានផុតកំណត់នៅចុងរដូវកាលនេះ។ បើទោះជា Barcelona នៅតែចង់ចុះកិច្ចព្រមព្រៀងជាមួយ Messi ប៉ុន្តែ «ផ្ទះថ្មី» របស់តារាបាល់ទាត់អាហ្សង់ទីនរូបនេះ ក៏នៅមិនទាន់ច្បាស់លាស់។

PSG កំពុងធ្វើការដើម្បីចុះកិច្ចព្រមព្រៀងជាមួយកីឡាករម្នាក់ក្នុងបំណងជំនួស Messi នៅរដូវក្ដៅឆ្នាំនេះ។ ព័ត៌មានចចាមអារ៉ាមនាពេលថ្មីៗនេះ យល់ថា Bernardo Silva របស់ Manchester City កំពុងក្លាយជាគោលដៅរបស់ក្លឹបនៅប៉ារីស តែមិនទាន់សម្រេចចិត្តចុងក្រោយ។

ចំណែកទំព័រ El Nacional វិញ យល់ថា PSG បានដាក់គោលដៅលើកីឡាករន័រវែស Martin Odegaard ដែលជាប្រធានក្រុមរបស់ Arsenal។ Martin Odegaard បានក្លាយជាកីឡាករឆ្នើមបំផុតនៅ Premier League កាលពីខែមីនាកន្លងទៅ។

ទោះជាយ៉ាងនេះក៏ដោយ គ្រូបង្វឹក Mikel Arteta របស់ Arsenal បានច្រានចោលព័ត៌មានខាងលើ និងបានធានាថា កិច្ចព្រមព្រៀងជាមួយ Martin Odegaard ដែលនៅសល់ពីរឆ្នាំទៀត នឹងនៅតែរឹងមាំ៕

May 18, 2023

Tag: ថ្ម