ថ្ម - La Reine Media

ចិនបង្កើតម៉ាស៊ីនរថភ្លើងដំណើរការដោយអ៊ីដ្រូសែន «ខ្លាំងបំផុតលើពិភពលោក»

ក្បាលម៉ាស៊ីនអ៊ីដ្រូសែនដំបូងរបស់ប្រទេសចិន Ningdong ដែលកែច្នៃពីម៉ាស៊ីនចំហេះក្នុង បានចាកចេញពីរោងចក្រ Datong ជាក្រុមហ៊ុនបុត្រសម្ព័ន្ធរបស់ CRRC កាលពីថ្ងៃទី 15 មិថុនា 2023។

សារព័ត៌មាន SCMP បានរាយការណ៍ថា Ningdong ត្រូវបានបង្ហាញថាជាក្បាលម៉ាស៊ីនដែលដំណើរការដោយអ៊ីដ្រូសែនកម្លាំងខ្លាំងបំផុតលើពិភពលោក ដែលមានសក្ដានុពលធំធេងក្នុងការជំនួសម៉ាស៊ីនរថភ្លើងទាំងអស់ដែលដំណើរការដោយប្រេងសាំងនៅប្រទេសចិន។ វាអាចផ្ទុកអ៊ីដ្រូសែនចំនួន 270 គីឡូក្រាម និងបើកបរបន្តបន្ទាប់រយៈពេល 190 ម៉ោង។

«អ៊ីដ្រូសែនគឺជាថាមពលស្អាត អាចកកើតឡើងវិញ។ ការចំណាយលើការប្រើប្រាស់ក្បាលម៉ាស៊ីនរថភ្លើងដំណើរការដោយអ៊ីដ្រូសែន គឺប្រហាក់ប្រហែលនឹង ½ នៃការចំណាយលើម៉ាស៊ីនចំហេះក្នុង» Liang Zhenzhong អគ្គនាយករងរបស់ CRRC Datong បញ្ជាក់ដូច្នេះ។

ម៉ាស៊ីនអ៊ីដ្រូសែនដំណើរការនៅពេលឧស្ម័នអ៊ីដ្រូសែនប្រតិកម្មជាមួយនឹងអុកស៊ីសែននៅក្នុងថ្មផ្ទុកថាមពល បង្កើតបានជាអគ្គិសនី និងចំហាយទឹក។ អនុផលរបស់ប្រតិកម្មនេះមិនប៉ះពាល់ដល់បរិស្ថាន ដោយសារបំភាយតែកម្ដៅ និងទឹក។

រថភ្លើងអ៊ីដ្រូសែនដឹកអ្នកដំណើរដំបូងគេលើពិភពលោកបានធ្វើសកម្មភាពពាណិជ្ជកម្មតាំងពីឆ្នាំ 2018 និងធ្វើដំណើរបានជាង 220,000 គីឡូម៉ែត្រ នៅ 8 ប្រទេសក្នុងដំតន់អឺរ៉ុប គិតត្រឹមខែមករា 2023។ នេះបើយោងតាមក្រុមផលិតរថភ្លើងបារាំង Alstom។

June 19, 2023

អ្នកជំនាញរបស់ណាសាថា ព្រះចន្ទអាចមានភាវៈរស់ ពិសេសគឺប្រភពរបស់វា

ភាវៈរស់ក្រៅភពផែនដីមិនមែននៅឆ្ងាយឡើយ តែអាចស្ថិតនៅលើភពរណបរបស់ផែនដី នោះគឺព្រះចន្ទរបស់មនុស្ស។

ប៉ូលខាងត្បូងរបស់ព្រះចន្ទក្លាយជាចំណុចដ៏ទាក់ទាញសម្រាប់បណ្ដាប្រទេសមហាអំណាចអវកាស ពិសេសនៅពេលទីភ្នាក់ងារអវកាសអាម៉េរិក (ណាសា) រៀបគម្រោងនាំមនុស្សឡើងទៅជាន់ដីព្រះចន្ទតាមរយៈបេសកកម្ម Artemis។

ថ្មីៗនេះ អ្នកវិទ្យាសាស្ត្រមួយរូបរបស់ណាសា បានចែករំលែកព័ត៌មានដ៏គួរឱ្យភ្ញាក់ផ្អើលមួយ នោះគឺ នៅលើឋានព្រះចន្ទអាចមានភាវៈរស់ បើទោះមានលក្ខខណ្ឌមិនអំណោយផលសម្រាប់ជីវិត។

យោងតាម Business Insider អ្នកវិទ្យាសាស្ត្រ Prabal Saxena របស់អង្គការណាសា ឱ្យដឹងថា ជីវិតរបស់សត្វល្អិតអាចមានវត្តមាននៅក្នុងបរិស្ថានអាក្រក់ដូចនៅលើព្រះចន្ទ។ លោក Prabal បន្ថែមថា រណ្ដៅនានានៅលើផ្ទៃព្រះចន្ទទំនងជាបានផ្ដល់ជាជម្រកល្អសម្រាប់សត្វល្អិតទាំងនោះ ពិសេសគឺនៅប៉ូលខាងត្បូងដែលពន្លឺព្រះអាទិត្យមិនអាចទៅដល់។

លោក Prabal និងសហការីយល់ថា សត្វល្អិតទាំងនេះមានប្រភពមកពីទីអវកាស ពិសេសគឺផែនដីតែម្ដង។ សត្វល្អិតទាំងនេះ បើសិនជាមាន ពួកវាប្រហែលជាបានទៅកាន់ឋានព្រះចន្ទតាមរយៈយានអវកាស ក្នុងនោះមានយានចុះចតដូចជា Apollo របស់សហរដ្ឋអាម៉េរិក កាលពីឆ្នាំ 1969 ជាដើម។ ប្រសិនបើពេលនេះពុំមានសត្វល្អិត នៅថ្ងៃខាងមុខ ព្រះចន្ទក៏នៅតែមានវត្តមានរបស់ភាវៈរស់ ព្រោះថា អនាគត មនុស្សនឹងបង្កើនវត្តមានរបស់ខ្លួននៅទីនោះ៕

June 16, 2023

រថយន្ត Concept Nyobolt EV បញ្ចូលអគ្គិសនីមួយពេញក្នុងរយៈពេល 6 នាទី

ការចំណាយពេលយូរក្នុងការបញ្ចូលថាមពលថ្មគឺជារឿងដែលត្រូវបានរិះគន់បំផុតរបស់រថយន្តអគ្គិសនី មិនថាជាប្រភេទទំនើប ឬតម្លៃថ្លៃ ហើយវាមិនអាចយកឈ្នះលើរថយន្តប្រើម៉ាស៊ីនចំហេះក្នុង នាបច្ចុប្បន្ន។ ប៉ុន្តែ ពេលនេះមានក្រុមហ៊ុនមួយបានប្រកាសព័ត៌មានដ៏ប្រសើរសម្រាប់រថយន្តអគ្គិសនី។

ក្រុមហ៊ុន Nyobolt ដែលជាអ្នកអភិវឌ្ឍថ្មផ្ទុកអគ្គិសនី មានទីស្នាក់ការកណ្ដាលនៅចក្រភពអង់គ្លេស បានប្រកាសថា ពួកគេមានបច្ចេកវិទ្យាថ្មី អនុញ្ញាតឱ្យបញ្ចូលថាមពលអគ្គិសនីបានរហ័សបំផុត។ ក្រុមហ៊ុននេះកំពុងដាក់តាំងបង្ហាញរថយន្តប្រភេទកីឡាគំរូមួយគ្រឿងដែលដំណើរការដោយអគ្គិសនី បំពាក់ថ្មផ្ទុកថាមពលដែលអាចបញ្ចូលអគ្គិសនីមួយពេញក្នុងរយៈពេលមិនដល់ 6 នាទី។

រថយន្តគំរូនេះមានថ្ម 35 គីឡូវ៉ាតម៉ោង ដែលអាចឱ្យរត់បានចម្ងាយប្រហែល 250 គីឡូម៉ែត្រ ក្រោយពីបញ្ចូលអគ្គិសនីមួយពេញ នៅពេលត្រូវបានដំឡើងក្នុងរថយន្ត coupe កីឡា ដែលមានទម្ងន់ប្រហែលជាង 1,500 គីឡូក្រាម។

Nyobolt ប្រកាសថា ថ្មផ្ទុកថាមពលថ្មីរបស់ពួកគេត្រូវបានធ្វើតេស្តដោយការបញ្ចូលថាមពលអគ្គិសនីជាង 2,000 លើក និងទទួលបានលទ្ធផលល្អ។

June 16, 2023

ស្ថានីយអវកាស ISS ហោះកាត់ពីមុខចំណុចខ្មៅលើព្រះអាទិត្យធំប៉ុនផែនដី

Thierry Legault អ្នកថតរូបតារាសាស្ត្រជនជាតិបារាំង ប្រើប្រាស់តេឡេស្កុបដើម្បីថតរូបភាពរបស់ស្ថានីយអវកាសអន្តរជាតិ (ISS) ដែលកំពុងហោះកាត់ពីមុខព្រះអាទិត្យ កាលពីថ្ងៃទី 09 មិថុនា។

ដោយហោះក្នុងល្បឿនប្រហែល 28,000 គីឡូម៉ែត្រ/ម៉ោង ISS គោចរបានមួយជុំផែនដីក្នុងរយៈពេល 90 នាទី ឬយូរជាងនេះបន្តិច តែវាហោះកាត់ពីមុខព្រះអាទិត្យក្នុងរង្វង់ 0.75 វិនាទីប៉ុណ្ណោះ នៅពេលមើលពីផែនដី។ ដូច្នេះ ការថតរូបភាពដែលមានគុណភាពខ្ពស់ដូច Legault គឺជារឿងលំបាកខ្លាំង។ នេះបើតាម Business Insider ចុះផ្សយកាលពីថ្ងៃទី 14 មិថុនា ឆ្នាំ 2023។

«ការហោះកាត់មានរយៈពេលមិនដល់មួយវិនាទី» Legault បញ្ជាក់ដូច្នេះ។ គាត់សំណាងណាស់ដែលថតបានទិដ្ឋភាពនេះ ព្រោះតែ 45 នាទីក្រោយមក ពពកធំមួយហោះមកបាំងជិតព្រះអាទិត្យ។

នៅក្នុងវីដេអូ ISS ហោះកាត់ខាងមុខចំណុចខ្មៅចំនួនបីលើព្រះអាទិត្យ ក្នុងនោះមានមួយធំល្មមអាចដាក់ផែនដីបាន។ នៅក្នុងពេលនោះ អវកាសចររបស់ណាសា ក៏កំពុងឈានជើងចេញក្រៅស្ថានីយដើម្បីដំឡើងថ្មផ្ទុកថាមពលព្រះអាទិត្យ។

ក្នុងវីដេអូ ISS មើលទៅហាក់ស្ថិតនៅក្បែរព្រះអាទិត្យខ្លាំងណាស់ ប៉ុន្តែតាមពិត វាមានគម្លាតយ៉ាងឆ្ងាយ។ ISS វិលជុំវិញផែនដីក្នុងរយៈកម្ពស់ប្រហែល 400 គីឡូម៉ែត្រ ខណៈដែលព្រះអាទិត្យមានចម្ងាយពីផែនដីប្រហែល 150 លានគីឡូម៉ែត្រ។

យោងតាមណាសា ចំណុចខ្មៅលើព្រះអាទិត្យកើតឡើងនៅពេលតំបន់របស់ពួកវាត្រជាក់ជាងតំបន់ដទៃនៅលើផ្ទៃព្រះអាទិត្យ។ ភាពត្រជាក់នោះកើតឡើងដោយសារតែស្ថិតនៅក្នុងតំបន់ដែលមានដែនម៉ាញ៉េទិចកម្លាំងខ្លាំងក្លា រារាំងកម្ដៅពីខាងក្នុងព្រះអាទិត្យមិនឱ្យភាយមកខាងក្រៅ។ នៅត្រង់ចំណុចខ្មៅ ដែនម៉ាញ៉េទិចមិនមានស្ថិរភាព និងអាចបង្កើតបានជាហេតុការណ៍ផ្ទុះអណ្ដាតភ្លើងព្រះអាទិត្យ (solar flare) និងបាតុភូតជះពពកដ៏ធំដែលមានផ្ទុកភាគល្អិតម៉ាញ៉េទិចទៅក្នុងលំហអវកាស (CME)។ ការផ្ទុះអណ្ដាតភ្លើងព្រះអាទិត្យអាចបង្កើតបានជាបាតុភូតពន្លឺអូរ៉ូរ៉ាលើផែនដី តែក៏អាចប៉ះពាល់ដល់រលកវិទ្យុ ផ្កាយរណប បណ្ដាទូរគមនាគមន៍ បណ្ដាញអគ្គិសនីជាដើម៕

June 16, 2023

អ្នកវិទ្យាសាស្ត្របង្កើតបានទម្រង់ដំបូងរបស់ទារកដោយមិនបាច់មានមេជីវិត

ក្រុមអ្នកជំនាញប្រើប្រាស់កោសិកាដើមដើម្បីបង្កើតអំប្រ៊ីយ៉ុង (ទម្រង់ដំបូងរបស់ទារកក្នុងស្បូន) គំរូ ដោយមិនបាច់មានស៊ុតមេជីវិតញី ឬមេជីវិតឈ្មោល ដើម្បីស្វែងយល់អំពីដំណាក់កាលដំបូងរបស់ទារកក្នុងផ្ទៃ។

លោកស្រី Magdalena Zernicka-Goetz សាស្ត្រាចារ្យនៃសាកលវិទ្យាល័យ Cambridge និងវិទ្យាស្ថានបច្ចេកវិទ្យា California បានអធិប្បាយអំពីលទ្ធផលនៃការស្រាវជ្រាវថ្មីខាងលើ កាលពីថ្ងៃទី 14 មិថុនា 2023 នៅសហរដ្ឋអាម៉េរិក។

លោកស្រី Magdalena ថ្លែងថា «យើងអាចបង្កើតបានអំប្រ៊ីយ៉ុងគំរូ ដែលដូចទៅនឹងទារកក្នុងផ្ទៃមនុស្សដំណាក់កាលដំបូង តាមរយៈការរៀបចំឡើងវិញនូវកោសិកាដើមរបស់អំប្រ៊ីយ៉ុង»។

លទ្ធផលនៃការស្រាវជ្រាវខាងលើនឹងផ្ដល់ព័ត៌មានដ៏មានតម្លៃទាក់ទងនឹងផលប៉ះពាល់នៃបញ្ហាតំណពូជ និងមូលហេតុនៃការរលូតកូនច្រើនដងដោយគ្មានកត្តាពីខាងក្រៅ។ ក៏ប៉ុន្តែ សេចក្ដីលំអិតនៃការសិក្សាស្រាវជ្រាវរបស់ក្រុមអ្នកវិទ្យាសាស្ត្រនេះមិនទាន់ត្រូវបានប្រកាសលើទស្សនាវដ្ដីនៅឡើយ។

June 15, 2023

តម្លៃរថយន្តអគ្គិសនីថយចុះជាង 10% ធៀបនឹងឆ្នាំកន្លង

យោងតាមទិន្នន័យស្ដីពីតម្លៃ និងចំនួនរថយន្តដែលបានលក់ចេញថ្មីបំផុត ដែលស្រាវជ្រាវដោយ Kelley Blue Book ជាមធ្យម រថយន្តអគ្គិសនីបានធ្លាក់ថ្លៃ 14% នៅក្នុងខែឧសភាឆ្នាំ 2023 បើធៀបនឹងដំណាក់ដូចគ្នាក្នុងឆ្នាំ 2022។

ការគណនារបស់ Kelley Blue Book បង្ហាញថា តម្លៃជាមធ្យមរបស់រថយន្តអគ្គិសនីថ្មីមួយគ្រឿងនៅក្នុងខែឧសភា 2023 គឺ 55,488 ដុល្លារ ខ្ពស់ជាងប្រហែល 158 ធៀបនឹងខែមេសា 2023 ប៉ុន្តែទាបជាង 9,370 ដុល្លារ បើធៀបនឹងខែឧសភា 2022។ តម្លៃរថយន្តអគ្គិសនីថ្មីបានឡើងដល់កម្រិតខ្ពស់បំផុតនៅក្នុងខែមិថុនា 2022 ប៉ុន្តែ បច្ចុប្បន្ន តម្លៃនោះបានបាត់បង់ប្រហែល 5,800 ដុល្លារ។

Michelle Krebs អ្នកវិភាគទីផ្សាររបស់ក្រុមហ៊ុន Cox Automotive ឱ្យដឹងថា ចំនួនរថយន្តអគ្គិសនីដែលបានលក់ចេញក្នុងខែឧសភា 2023 កើនប្រហែល 4.7% ធៀបនឹងខែមេសា 2023 និងកើន 44% ធៀបនឹងដំណាក់កាលដូចគ្នាក្នុងឆ្នាំ 2022។

ការធ្លាក់ថ្លៃរបស់រថយន្តអគ្គិសនីអាចបណ្ដាលមកពីកត្តាជាច្រើន ក្នុងនោះមានជាអាទិ៍ អត្រាពន្ធអាករថយចុះ អ្នកទិញមានលក្ខខណ្ឌគ្រប់គ្រាន់ក្នុងការទទួលបានប្រាក់ឧបត្ថម្ភ និងប្រាក់កម្ចីអត្រាការប្រាក់ទាប រាប់ពាន់ដុល្លារពីរដ្ឋជាដើម។ ក្រៅពីនេះ ការបញ្ចុះតម្លៃរថយន្តរបស់ Tesla ក៏បានធ្វើឱ្យក្រុមហ៊ុនដទៃត្រូវកាត់បន្ថយប្រាក់ចំណេញដើម្បីអាចលក់រថយន្តអគ្គិសនីក្នុងតម្លៃដែលអាចប្រកួតប្រជែងបាន៕

June 15, 2023

Gmail របស់ Google បំពាក់បញ្ញាសិប្បនិម្មិត (AI) ដើម្បីជួយសរសេរសំបុត្រដោយស្វ័យប្រវត្ត

អ្នកប្រើប្រាស់គ្រាន់តែអានខ្លឹមសារចម្បងដែលត្រូវផ្ញើ មុខងារ AI (បញ្ញាសិប្បនិម្មិត) នៅលើ Gmail នឹងជួយសរសេរជាសំបុត្រពេញលេញ។

ឧបករណ៍ Help me write ដែលមានជំនួយពី AI របស់ Google ត្រូវបានដាក់ឱ្យប្រើប្រាស់សាកល្បងចាប់ពីសប្ដាហ៍នេះ នៅក្នុងកម្មវិធី Gmail ទាំងនៅលើ Android ទាំងនៅលើ iOS។ មុខងារថ្មីនេះអាចជួយអ្នកប្រើប្រាស់តាមពីរវិធីសំខាន់ រួមមាន កែសម្រួលអ៊ីមេលដែលកំពុងសរសេរ ឬសរសេរថ្មីទាំងស្រុង ដោយយោងទៅតាមសំណើរបស់ម្ចាស់។

ដើម្បីប្រើប្រាស់មុខងារ Help me write អ្នកប្រើប្រាស់ត្រូវតែចុះឈ្មោះកម្មវិធីសាកល្បងនៅលើ Workspace Labs របស់ Google។

កម្មវិធីសរសេរអ៊ីមេលដោយស្វ័យប្រវត្តគឺជាផ្នែកមួយនៅក្នុងចំណោមផលិតផល AI លើ Google Workspace ដែលត្រូវបានបង្ហាញនៅក្នុងព្រឹត្តិការណ៍ I/O 2023 កាលពីខែឧសភា 2023។ ក្រៅពីការសរសេរសារអេឡិចត្រូនិច Help me write ក៏អាចបង្កើតខ្លឹមសារក្នុង Google Docs ឬបង្កើតតារាងគណនារហ័សលើ Google Sheets។ល។

June 15, 2023

ប្រធានាធិបតីបារាំងថ្លែងអំពីរឿងអនាគតរបស់ Kylian Mbappe

ប្រធានាធិបតីបារាំងលោក Emmanuel Macron បានថ្លែងថា លោកនឹងព្យាយាមបញ្ចុះបញ្ចូល Kylian Mbappe ឱ្យនៅជាមួយក្លឹប Paris Saint-Germain ម្ដងទៀត នៅរដូវក្ដៅឆ្នាំនេះ។

លោក Emmanuel Macron បញ្ជាក់ថា លោកបានត្រៀមខ្លួនរួចហើយសម្រាប់ការជជែកគ្នាម្ដងទៀតជាមួយនឹង Mbappe ក្នុងបំណងបញ្ចុះបញ្ចូលឱ្យកីឡាករបារាំងរូបនេះលេងបាល់ឱ្យក្លឹបក្នុងស្រុក។ ប្រសាសន៍របស់លោក Emmanuel Macron ត្រូវបានធ្វើឡើងបន្ទាប់ពី Mbappe កាលពីពេលថ្មីៗនេះ បានប្រកាសជាផ្លូវការថា មិនមានបំណងពន្យារកិច្ចព្រមព្រៀងជាមួយក្លឹប PSG និងត្រូវចាកចេញក្រោយពីចប់កិច្ចសន្យា។ ចំណែក PSG ក៏បានប្រកាសអំពីតម្លៃខ្លួន 200 លានអឺរ៉ូរបស់ Mbappe។

លោក Emmanuel Macron ថ្លែងថា «Mbappe គឺជាកីឡាករឆ្នើម និងស្ថិតក្នុងលំដាប់កំពូល ដូចដែលគ្រប់គ្នាបានដឹង។ ដូច្នេះ គាត់មានទំនោរទៅរកការធ្វើចំណាកស្រុកដើម្បីអភិវឌ្ឍសមត្ថភាព និងយកឈ្នះលើឧបសគ្គថ្មីក្នុងអាជីព»។ លោកបន្ថែមថា «ក៏ប៉ុន្តែ បច្ចុប្បន្ន ខ្ញុំមិនមានដំណឹងល្អណាមួយសម្រាប់គ្រប់គ្នា តែយ៉ាងណាក៏ដោយ ខ្ញុំនឹងប្រឹងប្រែងឱ្យអស់ពីលទ្ធភាព (ក្នុងការបញ្ចុះបញ្ចូល Mbappe) ដូចអ្វីដែលខ្ញុំបានធ្វើកន្លងមក»។

លោក Emmanuel Macron លើកទឹកចិត្ត Kylian Mbappe នៅ World Cup 2022

កាលពីឆ្នាំមុន ប្រធានាធិបតីបារាំង ក៏បានជជែកគ្នាជាមួយ Mbappe ទាក់ទងនឹងអនាគតរបស់កីឡាករនេះ ហើយ PSG ក៏រក្សាបាន Mbappe មួយឆ្នាំទៀត។ ក៏ប៉ុន្តែ លើកនេះ ស្ថានភាពនៅក្លឹប PSG ហាក់មិនល្អប្រសើរ គ្រាដែលកីឡាករកំពូលៗរបស់ក្លឹបនេះ មានដូចជា Messi ជាដើម ត្រូវបានអ្នកគាំទ្ររបស់ PSG ធ្វើបាបផ្លូវចិត្ត ហើយជើងខ្លាំងខ្លះក៏ចាកចេញ ឬមានបំណងចាកចេញជាបន្តបន្ទាប់ ស្របពេលដែលទីផ្សារក្រៅប្រទេសកំពុងមានភាពទាក់ទាញខ្លាំង៕

June 15, 2023

ភាពយន្តរឿង «Transformers 7» ពោរពេញដោយបច្ចេកទេសកុំព្យូទ័រ

ដោយប្រើប្រាស់ខ្ទង់វិនិយោគ 200 លានដុល្លារអាម៉េរិក ភាពយន្ត Transformers វគ្គ 7 មិនទាន់ជាគម្រោងដែលត្រូវចំណាយច្រើនបំផុតរបស់យីហោ Transformers នៅឡើយ ប៉ុន្តែ វាទទួលបានចំណាប់អារម្មណ៍ខ្លាំងដោយសារតែផ្នែករូបភាពត្រូវបានវិនិយោគច្រើន។

ធៀបនឹងវគ្គមុនៗ Transformers 7 (Transformers: Rise of the Beasts) មានប្រព័ន្ធតួអង្កសម្បូរបែប។ Transformers 7 បង្ហាញតួអង្គថ្មីជាច្រើន ដែលទាក់ទាញចំណាប់អារម្មណ៍របស់ទស្សនិកជនដែលស្មោះស្ម័គ្រ។ ក្នុងនោះ លេចធ្លោជាងគេគឺក្រុម Maximals ជាសម្ព័ន្ធមិត្តថ្មីរបស់ក្រុម Autobots ដែលមានក្រុមរ៉ូបូតអាចប្រែកាយជាសត្វសាហាវ។

ផលិតករបញ្ចេញតួអង្គថ្មីជាបន្តបន្ទាប់ ចាប់ពីស្វា Optimus Primal, សត្វឥន្ទ្រី Airazor, ខ្លា Cheetor និងរមាស Rhinox។ តួអង្គនីមួយៗសុទ្ធតែបង្ហាញខ្លួនក្នុងរូបរាងដ៏គួរឱ្យចាប់អារម្មណ៍តាំងពីដំបូង។

បច្ចេកទេសកុំព្យូទ័រដើរតួនាទីសំខាន់នៅក្នុងការបង្កើតតួអង្គរ៉ូបូតខ្នាតយក្ស។ គ្រប់តួអង្គរ៉ូបូតសុទ្ធតែមានភាពរស់រវើកដូចពិតៗ អមនឹងទិដ្ឋភាពប្រែកាយដ៏អស្ចារ្យ។

អ្នកដឹកនាំរឿង Steven Caple Jr. ក៏ដឹកនាំបានល្អនៅក្នុងទិដ្ឋភាពសកម្មនានា នាំមកនូវសកម្មភាពដេញតាម និងប្រយុទ្ធគ្នាដ៏គួរឱ្យជក់ចិត្ត។ កាន់តែជិតដល់ទីបញ្ចប់ ទិដ្ឋភាពផ្ទុះឆេះ វាយប្រហារក៏កាន់តែមានទ្រង់ទ្រាយធំឡើងៗ។

យោងតាមទិន្នន័យពី Comscore ដែលបានប្រកាសកាលពីថ្ងៃទី 11 មិថុនា “Transformers: Rise of the Beasts” រកប្រាក់ចំណូលបាន 170.5 លានដុល្លារក្នុងបីថ្ងៃនៅចុងសប្ដាហ៍ដំបូង ហើយគ្រោងនឹងរកបានច្រើនជាងនេះនាពេលខាងមុខ៕

June 14, 2023

ក្លឹបបាល់ទាត់ PSG ប្រកាសអំពីតម្លៃខ្លួនរបស់កំពូលកីឡាករ Mbappe

ម្ចាស់ជើងឯកពានរង្វាន់ Ligue 1 ទំនងជានឹងទទួលយកការលក់ Kylian Mbappe ក្នុងតម្លៃ 160 លានដុល្លារអាម៉េរិក ក្នុងពេលឆាប់ៗ ព្រោះមិនចង់ប្រឈមនឹងហានិភ័យត្រូវបាត់បង់កីឡាករនេះទទេៗ នៅរដូវក្ដៅឆ្នាំ 2024។

យោងតាម ESPN ប្រធាន Nasser Al Khelaifi យល់ព្រមឱ្យ Mbappe ចាកចេញនៅក្នុងរដូវក្ដៅឆ្នាំ 2023 បើសិនជាទទួលបានប្រាក់ដោះដូរ 150 លានអឺរ៉ូ (ប្រហែល 160 លានដុល្លារអាម៉េរិក) ព្រោះថា សុពលភាពកិច្ចព្រមព្រៀងរបស់ Mbappe នៅក្លឹប PSG នេះ នៅសល់តែមួយឆ្នាំទៀតប៉ុណ្ណោះ។

សារព័ត៌មានខាងលើក៏បានឱ្យដឹងថា ក្លឹបថ្មីរបស់ Mbappe អាចជា Real បើសិនចាកចេញពី PSG។ ចំណែកសារព័ត៌មានបារាំង L’Équipe ក៏បានផ្សាយថា ក្លឹប Real បានត្រៀមខ្លួនរួចរាល់ដើម្បីដោះដូរយក Mbappe ដោយមិនរង់ចាំទិញក្នុងក្រមខណ្ឌកីឡាករសេរីនៅរដូវក្ដៅឆ្នាំក្រោយ។

PSG កំពុងស្ថិតក្នុងការប្រែប្រួលខ្លាំងនៅរដូវកាលនេះ។ Sergio Ramos, Lionel Messi បានចាកចេញទៅតាមទម្រង់សេរី ខណៈដែល Neymar ទទួលបានសំណើទិញក្នុងតម្លៃ 300 លានដុល្លារអាម៉េរិក/ឆ្នាំ ពីក្លឹប Al Hilal នៅអារ៉ាប៊ីសាអូឌីត។ ចំណែក Mbappe វិញក៏បានជូនដំណឹងអំពីការមិនពន្យារកិច្ចព្រមព្រៀងជាមួយក្លឹបនេះផងដែរ។

ទំព័រ ESPN យល់ថា ការចាកចេញរបស់ Mbappe នឹងបង្កការខាតបង់ធំសម្រាប់ PSG ព្រោះថា បច្ចុប្បន្នកីឡាកររូបនេះត្រូវបានចាត់ទុកថា ជានិមិត្តរូបរបស់ប្រទេសបារាំង ដោយត្រូវបានវាយតម្លៃថាជាតារាធំបំផុតបន្ទាប់ពី Messi និង Ronaldo៕

June 14, 2023

Tag: ថ្ម