Tag: ថៃ

U-22 ទីម័រខាងកើតប្រហែលនឹងក្លាយជា «ចំណីឆ្ងាញ់» សម្រាប់ U-22 មីយ៉ាន់ម៉ា នៅថ្ងៃនេះ
នៅល្ងាចម៉ោង 16 ថ្ងៃទី 02 ឧសភានេះ ក្រុមបាល់ទាត់បុរសជម្រើសជាតិអាយុក្រោម 22 ឆ្នាំ (U-22) របស់មីយ៉ាន់ម៉ា នឹងត្រូវប្រកួតជាមួយ U-22 របស់ប្រទេសទីម័រខាងកើត នៅក្នុងជើងទីពីរបស់ពូល A នៃវិញ្ញាសាបាល់ទាត់បុរសនៅស៊ីហ្គេមលើកទី 32។
នៅមុនស៊ីហ្គេមចូលមកដល់ U-22 របស់មីយ៉ាន់ម៉ា បានបោះជំរំហ្វឹកហាត់នៅប្រទេសថៃ ដើម្បីត្រៀមខ្លួនសម្រាប់ស៊ីហ្គេម។ ក៏ប៉ុន្តែ លទ្ធផលដែល U-22 មីយ៉ាន់ម៉ា បានទទួល គឺមិនល្អប៉ុន្មាន ដោយសារតែពួកគេបានឈ្នះតែមួយប្រកួត និងចាញ់រហូតដល់បីប្រកួត។
ទោះជាយ៉ាងណាក៏ដោយ នៅក្នុងពូល «ស្រួលដកដង្ហើម» ដែលរួមមាន ឥណ្ឌូណេស៊ី ទីម័រខាងកើត ហ្វ៊ីលីពីន និងកម្ពុជា គេឃើញថា U-22 មីយ៉ាន់ម៉ា នៅតែមានសង្ឃឹមអាចឡើងដល់វគ្គពាក់កណ្ដាលផ្ដាច់ព្រ័ត្រ ហើយការប្រកួតជាមួយទីម័រខាងកើតនៅល្ងាចថ្ងៃទី 02 ឧសភានេះ ក្រុមមីយ៉ាន់ម៉ាប្រាកដជានឹងបង្ហាញសមត្ថភាពបានល្អបំផុត។
ចំណែក U-22 ទីម័រខាងកើតវិញ ទើបតែចាញ់ក្រុមម្ចាស់ផ្ទះកម្ពុជា នៅក្នុងការប្រកួតបើកឆាក ដោយលទ្ធផល 0-4។ ក្រុមទីម័រខាងកើតបានបង្ហាញយ៉ាងច្បាស់នូវចំណុចខ្សោយដ៏គ្រោះថ្នាក់របស់ខ្លួនទាក់ទងនឹងខ្សែប្រយុទ្ធ និងខ្សែការពារ។ ជាមួយនឹងសមត្ថភាពបច្ចុប្បន្ន ទីម័រខាងកើតហាក់ដូចកំពុងដើរតួជាក្រុម «បម្រើ» នៅស៊ីហ្គេមលើកនេះ។ ដូច្នេះ ក្នុងការប្រកួតនៅថ្ងៃនេះ កូនសិស្សរបស់គ្រូបង្វឹក Park Soon Tae ប្រហែលជាអាច «ជូន» បីពិន្ទុឱ្យ U-22 មីយ៉ាន់ម៉ា ដោយស្រួល។
ការប្រកួតរវាង U-22 មីយ៉ាន់ម៉ា និងទីម័រខាងកើតនៅវេលាម៉ោង 16 ថ្ងៃទី 02 ឧសភា ឆ្នាំ 2023 នឹងធ្វើឡើងនៅពហុកីឡដ្ឋានជាតិមរតកតេជោ ស្ថិតក្នុងសង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ៕
May 2, 2023
U-22 ឡាវដែលមានកីឡាករដើមកំណើតវៀតណាមពីររូប ថា អាច «យកស្មើ» នឹងក្រុមផ្កាយលឿងនៅស៊ីហ្គេម
ខ្សែបម្រើ Damoth Thongkhamsavath របស់ក្រុមបាល់ទាត់ជម្រើសជាតិអាយុក្រោម 22 ឆ្នាំ (U-22) របស់ប្រទេសឡាវ ប្រកាសយ៉ាងជឿជាក់ថា នឹងយកស្មើជាមួយនឹងក្រុម U-22 វៀតណាមនៅក្នុងការប្រកួតបើកឆាកនៅស៊ីហ្គេមលើកទី 32។
កាលពីល្ងាចថ្ងៃទី 28 មេសា U-22 ឡាវ ក្រោមការដឹកនាំរបស់ប្រធានក្រុមគ្រូបង្វឹក Michael Weiss បានហ្វឹកហាត់ក្នុងថ្ងៃសំខាន់ដើម្បីត្រៀមសម្រាប់ការប្រកួតជាមួយវៀតណាមនៅស៊ីហ្គេម។ នៅក្នុងពេលហ្វឹកហាត់នោះ ខ្សែបម្រើដើមកំណើតវៀតណាមរបស់ U-22 ឡាវ Damoth Thongkhamsavath បានលើកឡើងអំពីការប៉ះគ្នារវាង ឡាវ និងវៀតណាមនៅថ្ងៃទី 30 មេសាខាងមុខ។
Damoth Thongkhamsavath បានប្រាប់អ្នកសារព័ត៌មានដោយភាពជឿជាក់ថា «វៀតណាមឆ្នាំនៅតែខ្លាំងនៅស៊ីហ្គេម ពួកគេជាបេក្ខភាពទីមួយ។ ក៏ប៉ុន្តែ ខ្ញុំគិតថា U-22 ឡាវ នៅតែអាចយកស្មើនៅក្នុងការប្រកួតដំបូង។ លទ្ធផលនៃការប្រកួតនឹងជា 0-0»។
Damoth Thongkhamsavath មានជីដូ ជីតាកើតនៅប្រទេសវៀតណាម និងចេះភាសានេះយ៉ាងស្ទាត់ ដោយសារឪពុកម្ដាយតែងនិយាយភាសាវៀតណាមជាមួយគ្នា។ កីឡាកររូបនេះក៏ធ្លាប់បានចូលរួមប្រកួតនៅស៊ីហ្គេមលើកទី 31 ផងដែរ។
Damoth Thongkhamsavath
ទន្ទឺមនឹង Damoth Thongkhamsavath នៅស៊ីហ្គេមលើកនេះ U-22 ឡាវ ក៏មានតារាបាល់ទាត់បីរូបទៀតដែលកំពុងទាត់ឱ្យបរទេស រួមមាន Theo Klein (Omaha Mavericks នៅសហរដ្ឋអាម៉េរិក), Roman Angot (Bahlinger អាល្លឺម៉ង់) និង Victor Yovinasak (Montceau បារាំង)។
ទោះជាយ៉ាងណាក៏ដោយ គ្រូបង្វឹកជនជាតិបារាំងរបស់វៀតណាម លោក Troussier បានសង្កត់ធ្ងន់ថា «ក្រុមកីឡាករវៀតណាមក្មេងបំផុតដែលចូលរួមប្រកួតនៅស៊ីហ្គេម..។ ខ្ញុំពេញចិត្ត។ ក្រុមមានសង្ឃឹម ហើយយើងនឹងប្រឹងប្រែងដើម្បីបានលទ្ធផលល្អបំផុត»។
Nalongsit Chanthalangsy ក៏ជាកីឡាកររបស់ក្រុម U-22 ឡាវ ដែលមានដើមកំណើតវៀតណាម
នៅស៊ីហ្គេមលើកនេះ U-22 ឡាវស្ថិតក្នុងពូល B ជាមួយម្ចាស់មេដាយមាសពីរលើកចុងក្រោយគឺ វៀតណាម រួមនឹង ថៃ ម៉ាឡេស៊ី និងសិង្ហបុរី។ U-22 ឡាវនឹងត្រូវប៉ះវៀតណាមនៅក្នុងការប្រកួតបើកឆាកនៅថ្ងៃទី 30 មេសា 2023 នៅឯកីឡដ្ឋានព្រីនស៍៕
April 29, 2023
ក្រុមបាល់ទាត់ U-22 ថៃ ប្រកាសថា មិនខ្លាចអាជ្ញាកណ្ដាល បើទោះមិនមាន VAR
គ្រូបង្វឹករបស់ក្រុមបាល់ទាត់បុរសជម្រើសជាតិអាយុក្រោម 22 ឆ្នាំ (U-22) របស់ប្រទេសថៃ បានអះអាងថា មិនព្រួយបារម្ភអំពីការងាររបស់ក្រុមអាជ្ញាកណ្ដាល បើទោះមិនមានជំនួយពីបច្ចេកវិទ្យា VAR នៅស៊ីហ្គេមលើកទី 32។
ដើម្បីត្រៀមខ្លួនឱ្យបានល្អបំផុតសម្រាប់ការប្រកួតនៅស៊ីហ្គេមលើកនេះ កាលពីល្ងាចថ្ងៃទី 28 មេសា ក្រុម U-22 ថៃ បានធ្វើការហ្វឹកហាត់ថ្ងៃទីពីរនៅឯកីឡដ្ឋានអគ្គិសនីកម្ពុជា (EDC) នៅរាជធានីភ្នំពេញ ក្រោមការដឹកនាំរបស់គ្រូបង្វឹក Issara Sritaro ។
នៅពេលត្រូវបានសួរអំពីការងាររបស់ក្រុមអាជ្ញាកណ្ដាលនៅស៊ីហ្គេមលើកនេះ គ្រូបង្វឹក Sritaro ឱ្យដឹងថា លោកមិនមានការព្រួយបារម្ភចំពោះអាជ្ញាកណ្ដាល បើទោះបច្ចេកវិទ្យា VAR ដែលជួយផ្ដល់ភាពសុក្រឹតដល់ការកាត់ក្ដីរបស់អាជ្ញាកណ្ដាល មិនត្រូវបានប្រើប្រាស់នៅក្នុងព្រឹត្តិការណ៍ប្រកួតកីឡាអាស៊ីអាគ្នេយ៍ឆ្នាំ 2023។
គ្រូបង្វឹករបស់ U-22 ថៃ និយាយថា «នោះគឺជាកត្តាខាងក្រៅ។ យើងមិនអាចគ្រប់គ្រងបាន ដូច្នេះ U-22 ថៃ នឹងមិនផ្ដោតអារម្មណ៍ច្រើនទៅលើអាជ្ញាកណ្ដាល»។ លោក Sritaro បន្ថែមថា «យើងមិនខ្លាច ហើយយើងនឹងប្រឹងប្រែងឱ្យអស់ពីសមត្ថភាព។ … កីឡាកររបស់យើងក៏ត្រូវបានរម្លឹកអំពីបញ្ហាមួយចំនួន មានដូចជា ការបង្កកំហុសនៅក្នុងតំបន់គ្រោះថ្នាក់ និងអកហ្សឺជាដើម»។
កីឡដ្ឋាន EDC កាលពីឆ្នាំ 2018
ទន្ទឹមនឹងបញ្ហាខាងលើ គ្រូបង្វឹកអាយុ 43 ឆ្នាំរបស់ U-22 ថៃ ក៏បានឱ្យដឹងថា លោកមិនពេញចិត្តចំពោះទីលានហ្វឹកហាត់ EDC ដែលម្ចាស់ផ្ទះកម្ពុជាផ្ដល់ឱ្យ U-22 ថៃ។ ក្រុមគ្រូបង្វឹកថៃក៏បានសម្រេចចិត្តស្វែងរកទីលានហ្វឹកហាត់ថ្មីដើម្បីមានលក្ខខណ្ឌល្អបំផុតសម្រាប់ U-22 ថៃ នៅស៊ីហ្គេម។
លោក Sritaro ពន្យល់ថា «ទីលានហ្វឹកហាត់ EDC ដែលម្ចាស់ផ្ទះផ្ដល់ជូន U-22 ថៃ ប្រើប្រាស់ស្មៅ carpet ខុសពីស្មៅ bermuda នៅកីឡដ្ឋានព្រីនស៍…។ ផ្ទៃរបស់ទីលាន EDC រឹងខ្លាំងពេក ដូច្នេះហានិភ័យរងរបួសរបស់កីឡាករក៏មានកម្រិតខ្ពស់។ យើងពិតជាព្រួយបារម្ភចំពោះបញ្ហានេះ»។
នៅស៊ីហ្គេមលើកទី 32 U-22 ថៃ ស្ថិតក្នុងពូល B ជាមួយនឹងវៀតណាម ម៉ាឡេស៊ី សិង្ហបុរី និងឡាវ។ ប្រធានសហព័ន្ធបាល់ទាត់ថៃ (FAT) បានដាក់គោលដៅឱ្យក្រុម U-22 ថៃ និងក្រុមបាល់ទាត់នារីជម្រើសជាតិប្រទេសនេះ ត្រូវដណ្ដើមឱ្យបានមេដាយមាសពីស៊ីហ្គេមនៅកម្ពុជា៕
April 29, 2023
តម្លៃអគ្គិសនីនៅ ប្រទេសថៃ កើនឡើងខ្ពស់មិនធ្លាប់មាន
ប្រទេសថៃ ថ្មីៗនេះ បានអនុម័តដំឡើងថ្លៃអគ្គិសនីក្នុងអត្រា ១៨% ចាប់ពីខែកញ្ញា ២០២២ នាំឱ្យតម្លៃអគ្គិសនីនៅប្រទេសនេះ ឡើងដល់ ៤.៧២ បាត/គីឡូវ៉ាតម៉ោង។
តម្លៃអគ្គិសនីសម្រាប់ប្រើប្រាស់តាមគ្រួសារនៅ ប្រទេសថៃ នឹងកើនឡើងដល់ ៤.៧២ បាត (៥៥១ រៀល) ក្នុង ១ គីឡូវ៉ាតម៉ោង ខ្ពស់បំផុតមិនធ្លាប់មានពីមុនមករបស់ប្រទេសនេះ នៅពេល គណៈកម្មការគ្រប់គ្រងថាមពល (ERC) ដំឡើងថ្លៃឥន្ធនៈក្នុងអំឡុងពេលពីខែកញ្ញាដល់ខែធ្នូ ២០២២។
តម្លៃឥន្ធនៈនៅ ប្រទេសថៃ បានកើនឡើងខ្ពស់ខ្លាំង ព្រោះតែប្រទេសនេះត្រូវនាំចូលឧស្ម័នធម្មជាតិរាវ (LNG) ពីទីផ្សារដែលមានស្រាប់ ដើម្បីបង្គ្រប់ទៅលើការថយចុះនៃបរិមាណដែលផលិតបានពី ឈូងសមុទ្រថៃ។ ថៃ នាំចូល LNG រហូតដល់ ៦០% ធៀបនឹងឥន្ធនៈសរុបដែលប្រើប្រាស់ដើម្បីផលិតអគ្គិសនីនៅ ប្រទេសនេះ។
ERC បានឱ្យដឹងថា ការផលិត LNG ក្នុងស្រុករបស់ ថៃ បានថយចុះច្រើន បង្ខំឱ្យប្រទេសនេះត្រូវនាំចូល LNG បន្ថែមទៀត ដើម្បីផ្គត់ផ្គង់ដល់បណ្ដារោងចក្រផលិតអគ្គិសនីរបស់ខ្លួន។ ទន្ទឹមនឹងនេះ សង្គ្រាមរវាង រុស្ស៊ី និង អ៊ុយក្រែន ក៏បានរុញច្រានតម្លៃ LNG នៅក្នុងទីផ្សារអន្តរជាតិ ឡើងខ្ពស់ខ្លាំង ធ្វើឱ្យការចំណាយលើការផលិតអគ្គិសនីនៅ ប្រទេសថៃ កើនឡើងថែមមួយកម្រិតទៀត។
REC ព្យាករថា ស្ថានភាពខ្វះ LNG នឹងអូសបន្លាយដល់ឆ្នាំ ២០២៣ ដោយសារប្រភពផ្គត់ផ្គង់នៅ ប្រទេសថៃ និង មីយ៉ានម៉ា នៅតែមិនអាចធានាបាន ហើយស្ថានការណ៍សេដ្ឋកិច្ចបច្ចុប្បន្នក៏មិនទាន់មានអំណោយផលល្អសម្រាប់ការវិនិយោគទៅលើគម្រោងថ្មីដើម្បីស្វែងរក LNG។
បច្ចុប្បន្ន ERC កំពុងស្រាវជ្រាវលើលទ្ធភាពនៃការប្រើប្រាស់ប្រភពឥន្ធនៈជំនួសសម្រាប់បណ្ដារោងចក្រអគ្គិសនីរបស់ ប្រទេសថៃ រួមមាន ប្រេង, ប្រេងម៉ាស៊ូត, ធ្យូង, វារីអគ្គិសនី និងថាមពលកកើតឡើងវិញ។
គណៈកម្មការគ្រប់គ្រងថាមពល (ERC) របស់ ថៃ ក៏បានអំពាវនាវដល់ប្រជាពលរដ្ឋ និងក្រុមហ៊ុន សហគ្រាសទាំងអស់ ឱ្យមានសន្សំសំច័យអគ្គិសនី ដើម្បីកាត់បន្ថយការពឹងផ្អែករបស់ ប្រទេសថៃ ទៅលើប្រភព LNG ពីបរទេស៕
August 16, 2022
ពាណិជ្ជកម្មទ្វេភាគីរវាង ថៃ និង វៀតណាម នឹងសម្រេចបាន ២៥ ពាន់លានដុល្លារអាម៉េរិក ក្នុងឆ្នាំ ២០២៥
លោក Nikorndej Balankura ឯកអគ្គរាជទូតប្រទេសថៃ ប្រចាំ ប្រទេសវៀតណាម នៅក្នុងពិធីសម្ពោធព្រឹត្តិការណ៍សប្ដាហ៍ថៃ ឆ្នាំ ២០២២ នៅ ទីក្រុងព្រៃនគរ (ក្រុងហូជីមិញ) នាពេលថ្មីៗនេះ បានអះអាងថា ក្នុងឆ្នាំ ២០២៥ ការដោះដូរពាណិជ្ជកម្មទ្វេភាគីរវាង ថៃ និង វៀតណាម នឹងសម្រេចបាន ២៥ ពាន់លានដុល្លារអាម៉េរិក។
ទំនាក់ទំនងពិសេសរវាង ប្រទេសថៃ និង វៀតណាម បានឈានដល់ដំណាក់កាលចាស់ទុំ និងត្រូវបានលើកកម្ពស់ទៅជា «ទំនាក់ទំនងយុទ្ធសាស្ត្រកម្រិតជំរុញបន្ថែម» ចាប់តាំងពីឆ្នាំ ២០១៩។
កាលពីឆ្នាំ ២០២១ ប្រទេសថៃ បានបង្កើតសមាគមសហគ្រាសថៃ នៅ ប្រទេសវៀតណាម ឬហៅថា ThaiCham ក្នុងបំណងជំរុញលំហូរពាណិជ្ជកម្ម និងវិនិយោគរវាងប្រទេសទាំងពីរ។
ឯកអគ្គរាជទូតប្រទេសថៃ ប្រចាំ ប្រទេសវៀតណាម ឱ្យដឹងថា ការដោះដូរពាណិជ្ជកម្មទ្វេភាគីរវាង ថៃ និង វៀតណាម ក្នុងឆ្នាំ ២០២១ សម្រេចបាន ១៨.៨ ពាន់លានដុល្លារអាម៉េរិក កើន ១៧.៩% ធៀបនឹងឆ្នាំ ២០២០។ ប្រទសថៃ គឺជាដៃគូពាណិជ្ជកម្មធំជាងគេរបស់ វៀតណាម នៅក្នុងតំបន់អាស៊ីអាគ្នេយ៍ និងជាអ្នកវិនិយោគបរទេសធំលំដាប់ទី ៨ របស់ វៀតណាម។
ទន្ទឹមនឹងប្រការខាងលើ ប្រទេសថៃ និង វៀតណាម កំពុងតែប្រឹងប្រែងដើម្បីសម្រេចបានគោលដៅពាណិជ្ជកម្មទ្វេភាគីឱ្យបាន ២៥ ពាន់លានដុល្លារអាម៉េរិក នៅក្នុងឆ្នាំ ២០២៥ ខាងមុខ នេះបើតាមការអះអាងរបស់លោក Nikorndej Balankura ឯកអគ្គរាជទូតប្រទេសថៃ ប្រចាំ ប្រទេសវៀតណាម។
ពិធីសម្ពោធព្រឹត្តិការណ៍សប្ដាហ៍ថៃ ឆ្នាំ ២០២២ នៅ ទីក្រុងព្រៃនគរ (ក្រុងហូជីមិញ) នាពេលថ្មីៗនេះ
ពិព័រណ៍ពាណិជ្ជកម្មមួយរបស់ ថៃ នៅ វៀតណាម កាលពីពេលថ្មីៗនេះ
August 10, 2022
ឡាវ និង ថៃ ព្រមព្រៀងគ្នាថា នឹងបើកច្រកទ្វារព្រំដែនឡើងវិញឆាប់ៗនេះ
ប្រភពព័ត៌មានពី រដ្ឋធានីវៀងចន្ទន៍ នាថ្ងៃទី ២៤ កុម្ភៈនេះ ឱ្យដឹងថា ប្រទេសឡាវ និង ប្រទេសថៃ បានយល់ព្រមបើកច្រកទ្វារព្រំដែននានាឡើងវិញ ឱ្យបានកាន់តែឆាប់ កាន់តែល្អ។
ការសម្រេចខាងលើនេះត្រូវបានលើកឡើងនៅពេល ឯកអគ្គរដ្ឋទូតឡាវ ប្រចាំ ប្រទេសថៃ Seng Soukhathivong បានចូលសម្ដែងការគួរសម និងពិភាក្សាការងារជាមួយ នាយករដ្ឋមន្ត្រីថៃ លោក Prayut Chan-o-cha។ ក្នុងជំនួបនេះ ភាគីប្រទេសទាំងពីរ បានផ្លាស់ប្ដូរយោបល់គ្នាអំពីសារសំខាន់ និងផលប្រយោជន៍នៃការបើកច្រកព្រំដែនឡើងវិញ ចំពោះវិស័យសេដ្ឋកិច្ច។
នាយករដ្ឋមន្ត្រីថៃ ស្នើឱ្យ ឡាវ ពិចារណាអំពីការអភិវឌ្ឍផ្លូវ R១២ ដែលតភ្ជាប់ប្រទេសចំនួន ៣ គឺ ឡាវ ថៃ និង វៀតណាម ដើម្បីសម្រួលដល់សហគមន៍ក្នុងតំបន់មូលដ្ឋានរបស់ប្រទេសទាំងនេះ។
ឯកអគ្គរដ្ឋទូតឡាវ ប្រចាំ ប្រទេសថៃ Seng Soukhathivong និង នាយករដ្ឋមន្ត្រីថៃ Prayut Chan-o-cha
តាមគម្រោង នាយករដ្ឋមន្ត្រីឡាវ Phankham Viphavanh នឹងធ្វើទស្សនកិច្ច ប្រទេសថៃ នៅពាក់កណ្ដាលឆ្នាំនេះ។ នាយករដ្ឋមន្ត្រីថៃ លោក Prayut បានសម្ដែងការសាទរចំពោះដំណើរទស្សនកិច្ចនោះ និងថា នោះគឺជាឱកាសល្អដើម្បីលើកកម្ពស់ទំនាក់ទំនងរវាងប្រទេសទាំងពីរ ក្នុងគោលដៅរីកចម្រើនយូរអង្វែង៕
February 24, 2022
ការប្ដូរឈ្មោះរាជធានីរបស់ ប្រទេសថៃ ត្រូវបានក្រុមមន្ត្រីពន្យល់បញ្ជាក់
សារព័ត៌មាននៅ ប្រទេសថៃ បានរាយការណ៍ថា រាជធានីបាងកក ត្រូវប្ដូរឈ្មោះទៅជា ក្រុងទេពមហានគរ ប៉ុន្តែ ក្រុមមន្ត្រីឱ្យដឹងថា ការផ្លាស់ប្ដូរនេះគ្រាន់តែទាក់ទងទៅនឹងវណ្ណយុត្តិនៅក្នុងឃ្លាតែប៉ុណ្ណោះ។
Bangkok Post និងបណ្ដាទំព័រសារព័ត៌មានជាច្រើនទៀតនៅ ប្រទេសថៃ កាលពីថ្ងៃទី ១៦ កុម្ភៈ បានចេញផ្សាយថា ប្រទេសនេះនឹងប្ដូរឈ្មោះផ្លូវការរបស់រាជធានីបាងកក ទៅជា ក្រុងទេពមហានគរ (Krung Thep Maha Nakhon) ប៉ុន្តែ ឈ្មោះ បាងកក នៅតែត្រូវបានទទួលស្គាល់។
ដំណឹងខាងលើនេះ ធ្វើឱ្យអ្នកលេងបណ្ដាញសង្គមមានការភ្ញាក់ផ្អើល ក្នុងនោះអ្នកខ្លះមិនដឹងថា គួរតែហៅរាជធានីរបស់ ថៃ ថា បាងកក ដែលជាឈ្មោះត្រូវបានស្គាល់តាំងពីយូរយារមកហើយ ឬឈ្មោះផ្លូវការថ្មី ក្រុងទេពមហានគរ ដែលបង្កការលំបាកក្នុងការចងចាំ។
នៅចំពោះមុខភាពច្របូកច្របល់លើបណ្ដាញសង្គម អ្នកនាំពាក្យរងរបស់រាជរដ្ឋាភិបាលថៃ Rachada Dhnadirek កាលពីថ្ងៃទី ១៧ កុម្ភៈ បានបកស្រាយថា ក្រុងទេពមហានគរ ត្រូវបានដាក់ជាឈ្មោះផ្លូវការរបស់រាជធានី តាំងពីឆ្នាំ ២០០១ និងមិនមានការផ្លាស់ប្ដូរឈ្មោះនោះទេ លើកលែងតែវិធីសរសេរវណ្ណយុត្តនៅក្នុងឃ្លា។
«ចាប់ពីឆ្នាំ ២០០១ យើងប្រើប្រាស់ការសរសេរ ‘ក្រុងទេពមហានគរ; បាងកក’ ដោយមានសញ្ញាចុចក្បៀសនៅកណ្ដាល» Rachada Dhnadirek ពន្យល់។ «ប៉ុន្តែ បច្ចុប្បន្ន វិធីសរសេរនឹងត្រូវប្ដូរទៅជា ‘ក្រុងទេពមហានគរ (បាងកក)’» ដោយមានសញ្ញាវង់ក្រចក»។
ចំណែកនៅលើទំព័រ Facebook របស់ខ្លួន ការិយាល័យព្រះបរមរាជវាំង (ORST) បានឱ្យដឹងថា ប្រជាជនអាចប្រើប្រាស់ឈ្មោះទាំងពីរនេះបាន គឺ ក្រុងទេពមហានគរ និង បាងកក។
កាលពីថ្ងៃទី ១៥ កុម្ភៈ គណៈរដ្ឋមន្ត្រីថៃ បានអនុម័តកំណែទម្រង់នេះ ប៉ុន្តែ ការផ្លាស់ប្ដូរនេះនឹងមិនទាន់មានសុពលភាព រហូតដល់ពេលត្រូវបានគណៈកម្មការតាមដានខ្លឹមសារច្បាប់ ធ្វើការត្រួតពិនិត្យ។
ក្រុងទេពមហានគរ មានន័យថា «ទីក្រុងធំរបស់ពពួកទេវតា» ដែលជាពាក្យកាត់នៃពិធីបុណ្យមួយដែលមានឈ្មោះថា «Krung Thep Mahankhon Amon Rattanakosin Mahinthara Ayuthaya Mahadilok Phop Noppharat Ratchathani Burirom Udomratchniwet Mahasathan Amon Piman Awatan Sathit Sakkathattiya Witsanukam Prasit»៕
February 18, 2022
ទស្សនា «ស្រែកាំជណ្ដើរ លើដំបូងអគារ» ទំហំជាង ២២,០០០ ម៉ែត្រក្រឡា របស់សាកលវិទ្យាល័យ នៅ ប្រទេសថៃ
ដំបូលនៃអគាររបស់សាកលវិទ្យាល័យ ធម្មាសាធ (Thammasat) ត្រូវបានប្ដូរទៅជាទីកន្លែងដាំដំណាំរបស់ក្រុមនិស្សិត និងបុគ្គលិកនៃសាកលវិទ្យាល័យ ដែលមានរូបរាងជាកាំជណ្ដើរដ៏គួរឱ្យចាប់អារម្មណ៍។
ការប្ដូរទៅជាស្រែចំការនៃផ្ទៃដំបូលទំហំជាង ២២,០០០ ម៉ែត្រក្រឡានេះ បានអនុញ្ញាតឱ្យនិស្សិត និងបុគ្គលិករបស់សាលារៀន ដាំដំណាំច្រើនប្រភេទ មានទាំងស្រូវ មានទាំងបន្លែ ផ្លែឈើ។
ដោយមានទម្រង់ជាស្រែកាំជណ្ដើរបែបបុរាណ ផ្លូវ zigzag ទាំងឡាយ បានជួយឱ្យស្រែចំការទាំងមូលនៅលើដំបូងអគារ ទទួលបានទឹកភ្លៀងគ្រប់គ្រាន់ និងនាំទឹកដែលសល់ចុះទៅកាន់បឹងផ្ទុកទឹកពិសេស សម្រាប់ប្រើប្រាស់នៅក្នុងពេលរាំងស្ងួត។
កាលពីប្រហែល ១ សតវត្សរ៍មុន ទីតាំងនៃសាកលវិទ្យាល័យធម្មាសាធ នេះ គឺជាវាលស្រែស្រូវ ដែលផ្គត់ផ្គង់ស្បៀងដល់សហគមន៍ និងស្រូបយកទឹកសល់នៅក្នុងរដូវវស្សា។
https://www.youtube.com/watch?v=080Uy-419SU
បច្ចុប្បន្ន ក្រុមវិស្វករក្នុងតំបន់ កំពុងឆ្ពោះទៅរកធម្មជាតិដើម្បីផ្លាស់ប្ដូរការអភិវឌ្ឍទីក្រុង និងកសាងហេដ្ឋារចនាសម្ព័ន្ធ ជួយគ្រប់គ្រងបាតុភូតធម្មជាតិអាក្រក់ៗ ដែលទាក់ទងនឹងបំរ៉ែបំរួលអាកាសធាតុ៕
December 10, 2021
នាយករដ្ឋមន្ត្រីថៃស្នើឱ្យពលរដ្ឋនៅក្នុងផ្ទះ ក្នុងគ្រាករណីវិជ្ជមាននឹង Covid-19 កំពុងកើនឡើងយ៉ាងខ្ពស់
នាយករដ្ឋមន្ត្រីនៃប្រទេសថៃ បានអំពាវនាវឱ្យពលរដ្ឋរបស់ខ្លួននៅក្នុងផ្ទះដើម្បីទប់ស្កាត់ «រលកធំបំផុត» នៃការឆ្លងរាលដាលរបស់វីរុស Covid-19 បន្ទាប់ពីក្រុមមន្ត្រីបញ្ជាក់អំពីការកើនឡើងខ្ពស់នៃករណីឆ្លងថ្មីដល់ទៅ 745 នាក់ក្នុងថ្ងៃនេះ។
រដ្ឋាភិបាលថៃ ថ្ងៃនេះបានប្រកាសថា ខេត្តក្រុងចំនួន 28 រួមមានទាំងរាជធានីបាងកកផងដែរ គឺជាតំបន់ដែលកំពុងមានហានិភ័យខ្ពស់ក្នុងការឆ្លង Covid-19 ហើយបានអំពាវនាវឱ្យប្រជាជនធ្វើការក្នុងផ្ទះ ចៀសវាងការជួបជុំគ្នា ឬចាកចេញពីខេត្តរបស់ខ្លួនក្នុងគ្រាដែលមានការផ្ទុះឆ្លងរាលដាលខ្លាំង ក្រោយការរកឃើញករណីឆ្លងនៅក្នុងផ្សារត្រីក្បែរទីក្រុងបាងកកកាលពីពេលថ្មីៗនេះ។
នាយករដ្ឋមន្ត្រីថៃ លោក Prayuth Chan-ocha បានប្រាប់ក្រុមអ្នកយកព័ត៌មានថា៖ «យើងមិនចង់បិទទ្វារប្រទេសទាំងមូលនោះទេ ព្រោះយើងដឹងច្បាស់អំពីបញ្ហា ដូច្នេះតើគ្រប់គ្នាអាចបិទទ្វារដោយខ្លួនឯងបានទេ?។ ប្រការនេះអាស្រ័យលើអ្នកគ្រប់គ្នា ហើយបើសិនជាមិនចង់ឆ្លងវីរុស គ្រប់គ្នាគ្រាន់តែនៅផ្ទះក្នុងរយៈពេលពី 14-15 ថ្ងៃ។ បើសិនអ្នកគិតដូច្នេះ នោះគ្រប់យ៉ាងនឹងមានសុវត្ថិភាព ហើយងាយស្រួលក្នុងការគ្រប់គ្រង»។
សម្រាប់ថ្ងៃនេះ ប្រទេសថៃមានអ្នកស្លាប់ថ្មីចំនួន 1 ករណី និងបានរកឃើញករណីវិជ្ជមានថ្មីចំនួន 745 នាក់ ដែលនេះគឺជាកម្រិតខ្ពស់បំផុតរាប់ចាប់ពីថ្ងៃដែលប្រទេសនេះរកឃើញករណីដំបូង។ គិតត្រឹមថ្ងៃនេះ ប្រទេសថៃបានរកឃើញអ្នកវិជ្ជមាននឹង Covid-19 សរុបចំនួន 8,439 នាក់ និងអ្នកស្លាប់សរុបចំនួន 65 នាក់។ យ៉ាងនេះក្ដី ប្រទេសថៃនៅតែស្ថិតក្នុងចំណោមបណ្ដាប្រទេសដែលមានករណីឆ្លងទាបជាងគេនៅអាស៊ី។
ករណីឆ្លងថ្មីភាគច្រើនគឺជាប់ទាក់ទងនឹងក្រុមពលរដ្ឋបរទេសដែលចាប់ផ្ដើមឆ្លងរាលដាលនៅខេត្ត Samut Sakhon នៅភាគនិរតីក្រុងបាងកក និងបានរាលដាលទៅកាន់ខេត្តនានាជាងពាក់កណ្ដាលរបស់ប្រទេសនេះ។ រដ្ឋាភិបាលថៃបានចេញបញ្ជាឱ្យហាងនានា និងអ្នកលក់អាហារនៅតាមដងផ្លូវក្នុងក្រុង ផ្អាកដំណើរការជាបណ្ដោះអាសន្នចាប់ពីម៉ោង 19 យប់ ដល់ម៉ោង 6 ព្រឹកថ្ងៃបន្ទាប់ ដោយផ្ដើមអនុវត្តចាប់ពីថ្ងៃទី 5 ខែមករា ដើម្បីទប់ទល់នឹងការឆ្លងវីរុស។
ការលក់គ្រឿងស្រវឹងនៅក្នុងហាង និងបារ ក៏ដូចជាទីតាំងកម្សាន្តនានានៅក្នុងបណ្ដាខេត្តដែលមានហានិភ័យខ្ពស់ក៏ត្រូវបិទទ្វារបណ្ដោះអាសន្ន។ អភិបាលខេត្ត-ក្រុងនានា ទទួលបានសិទ្ធិក្នុងការចេញបទបញ្ជាដោយឡែកដើម្បីចូលរួមទប់ស្កាត់ Covid-19។
ចំណែកសាលារៀន និងមជ្ឈមណ្ឌលអប់រំនៅទូទាំងប្រទេស ក៏ត្រូវបិទទ្វារ ផ្អាកដំណើរការរយៈពេលពេញមួយខែផងដែរ៕
ប្រភព៖ Reuters
January 4, 2021
ម៉េចបានពិបាកមានកូនម្ល៉េះ? ម៉េចបានមិនមានកូនសោះអ៊ីចឹង?
មូលហេតុពិបាកមានកូន
កំពុងជួបបញ្ហា មែនទេ? កំពុងតែមានអារម្មណ៍តានតឹង មែនទេ? ហេតុអីបានមិនមានកូនសោះអ៊ីចឹង ទាំងរៀបការមកយូរហើយ ជីវិតសិចក៏ទៀងទាត់ល្អ និងមិនបានពន្យារកំណើតទៀត តែក៏នៅតែមិនព្រមមានគភ៌សោះ…នេះបញ្ជាក់ថា អ្នកកំពុងស្ថិតក្នុងសភាវពិបាកមានបុត្រហើយ។ តើហេតុអីបានពិបាកមានបុត្រ? ថ្ងៃនេះ ឡារ៉ែននឹងជួយគូស្វាមីភរិយាគ្រប់រូបមកស្វែងរកពីមូលហេតុនេះ ដើម្បីបើកចំហបញ្ហាពិបាកមានបុត្រនេះដូចតទៅ…។
ពិបាកមានកូនដោយសារនរណា? នរណាជាមូលហេតុនៃការពិបាកមានកូន?
-មូលហេតុពិបាកមានបុត្រដែលបណ្ដាលមកពីខាងស្រី ៈ បណ្ដាលមកពីភាពខុសប្រក្រតីរបស់ក្រពេញអន្តោមញ្ច័ន ដូចជា ហាយប៉ូថាឡាម៉ាស់ ក្រពេញក្រោមខួរក្បាល ក្រពេញថៃរ៉យដ៍ រួមទាំងសាច់ភ្នាសប្រអប់ស្បូនរីកធំធាត់ខុសកន្លែង ដុះសាច់ក្នុងស្បូន បំពង់បញ្ជូនស៊ុតណែនស្ទះ មានបញ្ហាក្នុងការទម្លាក់ស៊ុត ធ្លាប់ឆ្លងកាត់ការវះកាត់ពន្យារកំណើតពីមុន រួមទាំងការជក់បារី ញៀនគ្រឿងញៀន សេពសុរាជាប្រចាំ ឬរោគធាត់ក៏អាចធ្វើឱ្យពិបាកមានបុត្រដែរ។
-មូលហេតុពិបាកមានបុត្រដែលបណ្ដាលមកពីខាងប្រុស ៈ ដោយសារតែភាពខុសប្រក្រតីរបស់ហាយប៉ូថាឡាម៉ាស់ ក្រពេញក្រោមខួរក្បាលធ្វើឱ្យមិនអាចសាងអ័រម៉ូនកូណាដូថ្រូពីន រីលីហ្ស៊ីងដែលគ្រប់គ្រងការធ្វើការរបស់ប្រព័ន្ធបន្តពូជក្នុងមនុស្សបាន។ ក្រៅពីនេះ ការឆ្លងរោគខ្ទុះខាងក្នុងបំពង់បញ្ជូនមេជីវិត ធ្វើឱ្យកើតការណែនស្ទះមិនអាចបញ្ជូនទឹកមេជីវិតបាន ឬឆ្លងមេរោគនៅបរិវេណសរសៃឈាមខ្មៅក្នុងពងស្វាស អាចហុចផលប៉ះពាល់ដល់ការផលិតទឹកមេជីវិត និងការដែលមេជីវិតមានរូបរាងខុសប្លែកពីប្រក្រតី ធ្វើចលនាយឺតយ៉ាវ មេជីវិតមានចំនួនតិច អវយវៈភេទមិនឡើងរឹង ជក់បារីច្រើនហួសហេតុ សេពសុរាជាប្រចាំ ញៀនគ្រឿងញៀនក៏ជាមូលហេតុធ្វើឱ្យពិបាកមានបុត្របានដែរ។
ចង់កែខៃមូលហេតុពិបាកមានបុត្រត្រូវធ្វើយ៉ាងណា?
ដំបូងបង្អស់ ត្រូវទៅប្រឹក្សាជាមួយគ្រូពេទ្យជំនាញដើម្បីរកមូលហេតុនៃការពិបាកមានបុត្រពិតប្រាកដ។
ដឹងពីមូលហេតុពិបាកមានបុត្រហើយ បើចង់មានបុត្រ ត្រូវប្រើវិធីណា?
នៅពេលដឹងពីមូលហេតុហើយថា ខ្លួនពិបាកក្នុងការមានបុត្រដោយសារអ្វី គ្រូពេទ្យជំនាញនឹងផ្ដល់ការប្រឹក្សាក្នុងការរៀបផែនការដើម្បីមានបុត្រ។ ជ្រើសរើសវិធីដែលស័ក្តិសម ដែលបច្ចុប្បន្នតិចណូឡូជីជួយបង្កើនពូជបានចូលមកមានតួនាទីខ្លាំងជាមួយអ្នកដែលពិបាកមានបុត្រ និងមានវិធីជាច្រើនដូចជា ៈ
- ចាក់បញ្ចូលមេជីវិតផ្សំ
- ធ្វើ GIFT
- ធ្វើវិធីចិញ្ចឹមទារកក្នុងប្រអប់កែវ
- ធ្វើ ICSI
- ធ្វើ ZIFT
- ស្វែងរកអ្នកពពោះជំនួសដោយត្រឹមត្រូវតាមច្បាប់
មូលហេតុពិបាកមានបុត្រអាចកើតចំពោះទាំងស្រ្តី និងបុរស ការព្យាបាលត្រូវប្រឹក្សាជាមួយគ្រូពេទ្យជំនាញជាពិសេស ដើម្បីជ្រើសរើសវិធីដែលស័ក្តិសម។ វិធីខ្លះត្រូវប្រើការរៀបចំផែនការរយៈពេលយូរតាំងពីការត្រៀមសភាពរាងកាយ ថ្លៃចាយវាយក៏អាចខ្ពស់ខុសប្លែកគ្នាតាមវិធី និងទីកន្លែង តែបើចង់មានបុត្រពិតប្រាកដ អាចនិយាយបានថា ជាការវិនិយោគដែលមានតម្លៃបំផុត…
ឡារ៉ែនសូមជួយជាកម្លាំងចិត្តគ្រប់គូស្វាមីភរិយា៕
December 4, 2020