តំបន់ - La Reine Media

បញ្ហាស៊ុយអែតសូមចូលជាសមាជិកណាតូ គឺជាកូនអុករបស់តួកគី

ការរារាំងស៊ុយអែតចូលជាសមាជិកណាតូ (NATO) ក្នុងរយៈពេលច្រើនខែ ហើយចុងក្រោយក៏យល់ព្រមនៅមុនកិច្ចប្រជុំកំពូលណាតូ គឺសុទ្ធតែស្ថិតក្នុងផែនការរបស់លោក Erdogan។

ប្រធានាធិបតីតួកគី លោក Recep Tayyip Erdogan កាលពីថ្ងៃទី 10 កក្កដា 2023 បានឯកភាពអនុញ្ញាតឱ្យប្រទេសស៊ុយអែតចូលជាសមាជិករបស់ណាតូ ក្រោយពីបានរារាំងពេញមួយឆ្នាំ។

កិច្ចព្រមព្រៀងដែលសម្រេចបានតែប៉ុន្មានម៉ោងប៉ុណ្ណោះ នៅមុនកិច្ចប្រជុំកំពូលណាតូនៅប្រទេសលីទុយអានីនេះ នឹងពង្រីកទឹកដីរបស់សម្ព័ន្ធយោធាបានជាង 500,000 គីឡូម៉ែត្រការ៉េទៀត នៅតំបន់សមុទ្របាល់ទិក និងផ្លាស់ប្ដូរតុល្យភាពអំណាចនៅអឺរ៉ុបខាងជើង។ វាក៏ជួយឱ្យណាតូដោះស្រាយបញ្ហាមិនចុះសម្រុងគ្នាធំមួយ គ្រាដែលសម្ព័ន្ធយោធានេះកំពុងត្រូវការបង្ហាញសាមគ្គីភាពដើម្បីប្រឈមនឹងរុស្ស៊ី។

បន្ទាប់ពីមានការយល់ព្រមពីតួកគី ហើយប្រទេសហុងគ្រីក៏ធ្លាប់បាននិយាយថា ពួកគេនឹងដើរតាមគន្លងរបស់ទីក្រុងអង់ការ៉ា អគ្គលេខាធិការនៃអង្គការណាតូ លោក Stoltenberg បានវាយតម្លៃថា ការសូមចូលជាសមាជិកណាតូពីសំណាក់ស៊ុយអែត «នឹងត្រូវបានដោះស្រាយឆាប់ៗ»។

យោងតាមក្រុមអ្នកជំនាញ ប្រកាសកាលពីថ្ងៃទី 10 កក្កដា 2023 គឺជារឿងគួរឱ្យភ្ញាក់ផ្អើល ប៉ុន្តែព្រឹត្តិការណ៍នេះតែងតែកើតឡើងចំពោះមេដឹកនាំតួកគី។ យុទ្ធសាស្ត្រនេះបានជួយឱ្យលោក Erdogan លើកកម្ពស់ឥទ្ធិពល របស់តួកគី និងសម្រេចបានផលប្រយោជន៍ច្រើន។

ក្រោយពីរុស្ស៊ីបានចូលឈ្លានពានអ៊ុយក្រែន ប្រទេសហ្វាំងឡង់ និងស៊ុយអែត កាលពីខែឧសភា 2022 ក៏បានបោះបង់គោលនយោបាយមិនចូលបក្ខសម្ព័ន្ធយោធាដែលពួកគេបានអនុវត្តអស់ជាច្រើនទសវត្សរ៍កន្លង ដើម្បីស្វែងរកឋានៈជាសមាជិកភាពរបស់ណាតូ។

គិតមកដល់បច្ចុប្បន្ន ណាតូមានសមាជិកសរុបចំនួន 31 ប្រទេស (ពណ៌ខៀវចាស់)

ដំបូងឡើយ លោក Erdogan ជំទាស់ទៅនឹងការអនុញ្ញាតឱ្យប្រទេសទាំងពីរខាងលើចូលជាសមាជិកណាតូ ប៉ុន្តែបន្ទាប់ពីការចរចាអស់ជាច្រើនខែ ហើយតួកគីទទួលបានផលប្រយោជន៍ច្រើនពីស៊ុយអែត ក៏ដូចជាពីសហរដ្ឋអាម៉េរិក និងណាតូ លោក Erdogan ក៏ចាប់ផ្ដើមបើកភ្លើងខៀវ។ ការទាមទារដែលតួកគីសម្រេចបាន រួមមាន បញ្ហាជនជាតិឃើដ (Kurd) និងបញ្ហាតួកគីបញ្ជាទិញយន្តហោះចម្បាំងរបស់សហរដ្ឋអាម៉េរិកជាដើម។

Sinan Ulgen ដែលជាសមាជិកជាន់ខ្ពស់របស់អង្គការ Carnegie Europe នៅប្រទេសបែលហ្ស៊ិក អះអាងថា ការរារាំងរបស់លោក Erdogan ចំពោះស៊ុយអែត គឺជាកូនអុកដែលអង់ការ៉ាប្រើប្រាស់ដើម្បីសម្រេចបានផលប្រយោជន៍ជូនប្រទេសជាតិរបស់លោក។ ចំណែក លោកស្រី Anna Wieslander នាយិកាទទួលបន្ទុកតំបន់អឺរ៉ុបខាងជើងរបស់ក្រុមប្រឹក្សាមហាសមុទ្រអាត្លង់ទិកនៅសហរដ្ឋអាម៉េរិក កាលពីចុងសប្ដាហ៍កន្លងក៏បានព្យាករថា លោក Erdogan នឹងផ្លាស់ប្ដូរជំហរនៅមុនកិច្ចប្រជុំកំពូលរបស់ណាតូ ដោយយល់ថា «លោក Erdogan មានចេតនាធ្វើបែបនោះគឺដើម្បីបង្ហាញថា លោកជាមនុស្សល្អ ជាអ្នកដែលបានជួយស្រោចស្រង់កិច្ចប្រជុំកំពូល ដោយការបើកភ្លើងខៀវ»។

គិតមកដល់បច្ចុប្បន្ន ណាតូមានសមាជិកសរុបចំនួន 31 ប្រទេស ហើយអាចកើនដល់ 32 ប្រទេស បើសិនស៊ុយអែតត្រូវបានទទួលយកជាសមាជិក៕

July 12, 2023

រកឃើញវត្ថុចម្លែកក្រោមសមុទ្រ សង្ស័យថាជាបច្ចេកវិទ្យារបស់មនុស្សភពដទៃ

អ្នកវិទ្យាសាស្ត្រអាម៉េរិកដើមកំណើតអ៊ីស្រាអែលបានរកឃើញដុំមូលៗចំនួន 10 គ្រាប់ដែលមានរូបរាង និងល្បឿនខុសប្រក្រតី នៅតំបន់សមុទ្រដែលមានអាចម៍ផ្កាយធ្លាក់កាលពីឆ្នាំ 2014។

អ្នកវិទ្យាសាស្ត្រ Avi Loeb មកពីសាកលវិទ្យាល័យ Harvard យល់ថា លោកទំនងជាបានរកឃើញភស្ដុតាងស្ដីពីបច្ចេកវិទ្យារបស់មនុស្សក្រៅភពផែនដី នៅពេលបានរកឃើញអាចម៍ផ្កាយ IM1 ដែលបានធ្លាក់នៅលើតំបន់សមុទ្ររបស់ Papua New Guinea កាលពីឆ្នាំ 2014។ នេះបើតាម Business Insider ចុះផ្កាយកាលពីថ្ងៃទី 08 កក្កដា។

អង្គភាពអវកាសរបស់សហរដ្ឋអាម៉េរិក បានឱ្យដឹងថា បំណែកអាចម៍ផ្កាយទាំងនេះទំនងជាមានប្រភពពីប្រព័ន្ធផ្កាយដទៃ។

ដុំបាល់ទាំងនេះមានផ្ទុកសារធាតុដែក 84%, ស៊ីលីកុន 8%, ម៉ាញេស្យូម 4%, ទីតានីញ៉ូម 2% រួមនឹងសារធាតុដទៃមួយចំនួនទៀត

ការវិភាគបង្ហាញថា គ្រាប់បាល់ទាំងនេះរួមមាន សារធាតុដែក 84%, ស៊ីលីកុន 8%, ម៉ាញេស្យូម 4%, ទីតានីញ៉ូម 2% រួមនឹងសារធាតុដទៃមួយចំនួនទៀត។ ដុំបាល់ទាំងនេះមានទំហំមិនដល់ 1 មិល្លីម៉ែត្រ និងមានពណ៌លឿង ខៀវ ប្រផេះ ហើយមួយចំនួនទៀតមានរូបរាងដូចទៅនឹងផែនដី។ នេះបើតាម Loeb។

Loeb បានប្រៀបធៀបករណីនេះជាមួយនឹងយាន Voyager របស់ណាសាដែលត្រូវបានបាញ់បង្ហោះកាលពីឆ្នាំ 1977។ លោកគិតថា Voyager នឹងធ្លាក់ទៅលើភពដ៏សែនឆ្ងាយមួយនៅក្នុងរយៈពេលមួយពាន់លានឆ្នាំទៀត ហើយពួកវានឹងធ្លាក់ដូចអាចម៍ផ្កាយ។

«មនុស្សយើងនឹងត្រូវចំណាយពេលរាប់ម៉ឺនឆ្នាំដើម្បីហោះចេញផុតពីប្រព័ន្ធព្រះអាទិត្យ និងទៅដល់ប្រព័ន្ធផ្កាយមួយផ្សេងទៀត តាមរយៈបច្ចេកវិទ្យារបស់យានអវកាសទំនើប។ ដុំវត្ថុធាតុនេះប្រហែលជាបានចំណាយពេលប្រហាក់ប្រហែលនេះដើម្បីមកដល់ភពរបស់យើង» Loed និយាយដូច្នេះ។

លោក Loed គឺជាសមាជិករបស់ក្រុមប្រឹក្សាវិទ្យា និងបច្ចេកវិទ្យារបស់ប្រធានាធិបតី និងជាប្រធាន Galileo ដែលជាគម្រោងស្វែងរកភស្ដុតាំងស្ដីពីមនុស្សភពក្រៅ និងបច្ចេកវិទ្យារបស់ពួកគេ។ លោកធ្លាប់បាននិយាយច្រើនដងថា «Oumuamua (វត្ថុអវកាសអន្តរតារាដំបូងគេដែល «មកលេង» ប្រព័ន្ធព្រះអាទិត្យ) អាចជាឧទាហរណ៍អំពីបច្ចេកវិទ្យារបស់មនុស្សភពដទៃ៕

July 11, 2023

រោងចក្រផលិតអគ្គិសនីដោយកម្ដៅថ្ងៃ 1,000 ម៉េហ្គាវ៉ាត់ តភ្ជាប់នឹងបណ្ដាញអគ្គិសនីនៅប្រទេសចិន

រោងចក្រផលិតអគ្គិសនីពីថាមពលព្រះអាទិត្យថ្មីនៅ Tianjin មានកម្លាំង 1,000 ម៉េហ្គាវ៉ាត់ អាចផ្គត់ផ្គង់អគ្គិសនីដល់ពលរដ្ឋ 1.5 លានគ្រួសារ។

យោងតាមសារព័ត៌មានចិន រោងចក្រផលិតអគ្គិសនីដោយផ្ទាំងសូឡា Huadian Tianjin Haijing ត្រូវបានតភ្ជាប់ជាមួយនឹងបណ្ដាញអគ្គិសនីនៅ Tianjin កាលពីថ្ងៃទី 08 កក្កដា 2023។ សកម្មភាពរបស់រោងចក្រដែលមានកម្លាំង 1,000 ម៉េហ្គាវ៉ាត់ (MW) នេះ រួមមាន រូបមន្តឧស្សាហកម្មរួមផ្សំនឹងការផលិតអគ្គិសនីពីផ្ទាំងសូឡា ការផលិត halogen លើផ្ទៃទឹក និងក្នុងទឹក ទន្ទឹមនឹងការកែលំអសមត្ថភាពផ្គត់ផ្គង់អគ្គិសនីនៅភាគខាងជើងប្រទេសចិន។

ស្ថិតនៅតំបន់ស្រែអំបិល Changlu រោងចក្រ Huadian Tianjin Haijing គ្រប់ដណ្ដប់លើផ្ទៃដីប្រហែល 1,333 ហិកតា និងអាចផ្គង់ផ្គង់អគ្គិសនីស្អាត 1.5 ពាន់លានគីឡូវ៉ាត់ម៉ោងជារៀងរាល់ឆ្នាំ អាចឆ្លើយតបនឹងតម្រូវការប្រើប្រាស់របស់មនុស្ស 1.5 លានគ្រួសារ និងកាត់បន្ថយឧស្ម័នកាបូនឌីអុកស៊ីដបានប្រហែល 1.25 លានតោន ធៀបនឹងការប្រើប្រាស់ធ្យូងថ្ម។

យោងតាម Yang Fan ប្រធានគម្រោងខាងលើ រោងចក្រនេះនឹងជួយជំរុញការកែប្រែរចនាសម្ព័ន្ធថាមពលស្អាតនៅភាគខាងជើងប្រទេសចិន។ រោងចក្រនេះក៏ផ្សារភ្ជាប់ការផលិតអគ្គិសនីជាមួយនឹងការផលិតអំបិល និងនេសាទផងដែរ៕

July 10, 2023

យន្តហោះលឿនជាងសំឡេងជំនាន់ថ្មីរបស់ណាសា ត្រៀមធ្វើតេស្តដំបូង

យន្តហោះល្បឿនលឿនជាងសំឡេងជំនាន់ថ្មីរបស់ទីភ្នាក់ងារអវកាសអាម៉េរិក (NASA) បានចាប់ផ្ដើមត្រៀមខ្លួនសម្រាប់ការហោះហើរលើកដំបូង។

តាំងពីឆ្នាំ 2018 គម្រោងយន្តហោះ X-59 របស់ណាសា ទទួលបានការចាប់អារម្មណ៍ច្រើនពីសហគមន៍អ្នកសារព័ត៌មាន ហើយវាក៏បាន និងកំពុងរុញច្រានវិស័យទេសចរណ៍ល្បឿនលឿនជាងសំឡេងឱ្យខិតចូលជិតដល់ភាពជាក់ស្ដែង។

ថ្មីៗនេះ ណាសាបានឱ្យដឹងថា កាលពីថ្ងៃទី 19 មិថុនា យន្តហោះ X-59 ត្រូវបាននាំពីរោងចក្រដំឡើងរបស់ Lockheed Martin ទៅកាន់ព្រលានយន្តហោះ។ ក្រោយមក យន្តហោះនេះនឹងត្រូវត្រួតពិនិត្យបច្ចេកទេសនៅលើដីដើម្បីធានាថា បានត្រៀមខ្លួនរួចរាល់សម្រាប់បេសកកម្មហោះហើរនាពេលខាងមុខ។

គោលដៅរបស់ណាសា គឺការបញ្ជាក់ថា យន្តហោះល្បឿនលឿនជាងសំឡេងរបស់ពួកគេអាចហោះបានលឿនជាងល្បឿនរបស់សំឡេង ប៉ុន្តែមិនលាន់ឮខ្លាំងដូចយន្តហោះល្បឿនលឿនជាងសំឡេងដទៃទៀត។

យន្តហោះ X-59 របស់ណាសា ដែលមានបណ្ដោយ 30 ម៉ែត្រ ទទឹង 9 ម៉ែត្រ និងបំពាក់ម៉ាស៊ីនប្រតិកម្មតែមួយគត់ ត្រូវបានរចនាឡើងដោយ General Electric Aviation ដែលជាក្រុមហ៊ុនបុត្រសម្ព័ន្ធរបស់ General Electric។

យន្តហោះនេះត្រូវបានផលិតឡើងដើម្បីអាចហោះក្នុងល្បឿន Mach 1.4 ឬ 1,488 គីឡូម៉ែត្រ/ម៉ោង និងអាចហោះដល់កម្ពស់ 16,764 ម៉ែត្រ។ នៅពេលបញ្ឆេះម៉ាស៊ីន X-59 នឹងបង្កើតជាសំឡេងមួយដ៏តូច ដែលប្រហាក់ប្រហែលនឹងសំឡេងបិទទ្វារឡាន ចំពោះអ្នកដែលស្ដាប់នៅលើដី។ ចំណែកយន្តហោះល្បឿនលឿនជាងសំឡេងដទៃអាចធ្វើឱ្យបែកកញ្ចក់បង្អួច នៅពេលវាហោះឆ្លងកាត់។

ណាសាសង្ឃឹមថា បច្ចេកវិទ្យាខាងលើនេះ អាចឱ្យពួកគេបញ្ចុះបញ្ចូលអាជ្ញាធរគ្រប់គ្រងអាកាសចរណ៍ អនុញ្ញាតឱ្យយន្តហោះល្បឿនលឿនជាងសំឡេង X-59 ហោះហើរពីលើតំបន់ដែលមានមនុស្សរស់នៅ។

បើសិនជាការធ្វើតេស្តនានាទទួលបានជោគជ័យ នោះ X-59 អាចក្លាយជាយន្តហោះល្បឿនលឿនជាងសំឡេងដំបូងគេដែលដឹកអ្នកដំណើរនៅទូទាំងពិភពលោក៕

July 10, 2023

អាម៉េរិកកម្ចាត់មេដឹកនាំជាន់ខ្ពស់របស់ IS នៅប្រទេសស៊ីរី

សហរដ្ឋអាម៉េរិកបានឱ្យដឹងថា បានកម្ចាត់មេដឹកនាំជាន់ខ្ពស់មួយរូបរបស់អង្គការភារវកម្មរដ្ឋអ៊ីស្លាមនៅប្រទេសស៊ីរី ក្រោយពីការវាយប្រហារតាមផ្លូវអាកាសដោយយន្តហោះគ្មានមនុស្សបើក (UAV)។

ការវាយប្រហារតាមអាកាសកាលពីថ្ងៃទី 07 កក្កដា បានកម្ចាត់ Osam al-Muhajer មេដឹកនាំរបស់ក្រុមដែលហៅខ្លួនឯងថា អង្គការរដ្ឋអ៊ីស្លាម (IS) នៅភាគខាងកើតប្រទេសស៊ីរី។ នេះបើតាមបញ្ជាការដ្ឋានកងទ័ពអាម៉េរិក (CENTCOM) ប្រកាសកាលពីថ្ងៃទី 09 កក្កដា 2023។

«យើងបាននិយាយយ៉ាងច្បាស់ថា យើងនៅតែសន្យាថាកម្ចាត់ IS ទាំងអស់នៅទូទាំងតំបន់។ IS នៅតែជាការគំរាមកំហែង មិនត្រឹមតែក្នុងតំបន់ ប៉ុន្តែនៅឆ្ងាយជាងនេះទៅទៀត» មេដឹកនាំរបស់ CENTCOM លោក Michael Kurilla បញ្ជាក់ដូច្នេះ។

យោងតាម CENTCOM ក្នុងការវាយប្រហារខាងលើ ពុំមានជនស៊ីវិលណាម្នាក់បានស្លាប់ ប៉ុន្តែកងកម្លាំងនេះ «កំពុងវាយតម្លៃរបាយការណ៍អំពីការបាត់បង់ធនធានមនុស្ស»។

CENTCOM ឱ្យដឹងថា យុទ្ធនាការវាយប្រហារត្រូវបានធ្វើឡើងដោយ UAV MQ-9 Reaper ជាយន្តហោះគ្មានមនុស្សបើកមួយគ្រឿងដែលត្រូវបានយន្តហោះចម្បាំងរុស្ស៊ីរំខានជិតពីរម៉ោងមុននោះ។ រុស្ស៊ីគឺជាសម្ព័ន្ធមិត្តសំខាន់របស់ប្រធានាធិបតីស៊ីរី Bashar al-Assad។

របាយការណ៍មួយរបស់អង្គការសហប្រជាជាតិកាលពីខែកុម្ភៈ បានឱ្យដឹងថា IS មានសមាជិក និងអ្នកគាំទ្រប្រហែលពី 5,000 ទៅ 7,000 នាក់នៅស៊ីរី និងអ៊ីរ៉ាក់ ក្នុងនោះមានជិតពាក់កណ្ដាលគឺជាខ្មាន់កាំភ្លើង។ ការគំរាមកំហែងពី IS និងសាខារបស់ក្រុមនេះចំពោះសន្តិភាព និងសន្តិសុខអន្តរជាតិគឺមានខ្ពស់ខ្លាំងនៅពាក់ កណ្ដាលចុងឆ្នាំ 2022។

កាលពីចុងឆ្នាំ 2022 IS ប្រកាសថា បានតែងតាំង Abu al-Hussein al-Husseini al-Quraishi ជាមេដឹកនាំកំពូល បន្ទាប់ពីមេដឹកនាំមុននោះត្រូវបានធ្វើឃាតនៅភាគខាងត្បូងប្រទេសស៊ីរី៕

July 10, 2023

BYD ចាប់ផ្ដើមលក់រថយន្តអគ្គិសនី Dolphin នៅសិង្ហបុរី

ក្រុមហ៊ុនផលិតរថយន្តអគ្គិសនីចិន BYD បានបង្ហាញវត្តមានរថយន្ត Dolphin នៅប្រទេសសិង្ហបុរី ក្នុងយុទ្ធនាការបញ្ជ្រាបផលិតផលទៅគ្រប់ទីផ្សារ។

BYD បានប្រារព្ធកម្មវិធីបង្ហាញរថយន្តអគ្គិសនី Dolphin ជាមួយនឹងតំណាងចែកចាយ Vantage Automotive របស់សិង្ហបុរី កាលពីថ្ងៃទី 03 កក្កដា។ Dolphin ដែលជារថយន្តអគ្គិសនីទីពីររបស់ក្រុមហ៊ុននេះដែលត្រូវបានដាក់លក់នៅប្រទេសសិង្ហបុរី បន្ទាប់ពី Atto 3។

BYD បានដាក់លក់ Atto 3 នៅសិង្ហបុរីតាំងពីឆ្នាំ 2022 ហើយវាគឺរថយន្តអគ្គិសនីដែលលក់ដាច់ជាងគេនៅក្នុងតំបន់ នៅក្នុង 5 ខែដើមឆ្នាំ។

BYD ឱ្យដឹងថា Dolphin នឹងក្លាយជារថយន្តអគ្គិសនីដែលទទួលបានការពេញនិយមខ្លាំងពីអតិថិជនគ្រប់វ័យនៅសិង្ហបុរី ហើយវានឹងត្រូវបានប្រជាជននៅទីនេះស្គាល់កាន់តែច្រើន។

BYD Dolphin ត្រូវបានដាក់លក់តាំងពីថ្ងៃទី 29 សីហា 2021។ វាគឺជារថយន្តខ្នាតតូចល្មម និងដំណើរការទាំងស្រុងដោយអគ្គិសនី ហើយបច្ចុប្បន្នមានតម្លៃចាប់ពី 16,120 ដុល្លារអាម៉េរិក នៅប្រទេសចិន។ នៅសិង្ហបុរី BYD Dolphin មានតម្លៃចាប់ពី 156,888 ដុល្លារសិង្ហបុរី (115,900 ដុល្លារអាម៉េរិក)។

BYD លក់រថយន្តអគ្គិសនីបាន 253,046 គ្រឿងក្នុងខែមិថុនា កើន 88.79% ធៀបនឹង 134,036 គ្រឿងក្នុងដំណាក់កាលដូចគ្នាកាលពីឆ្នាំ 2022។

July 7, 2023

បើសិនយកទឹកទាំងអស់របស់ផែនដី ទៅជះលើព្រះអាទិត្យ តើនឹងមានរឿងអ្វីកើតឡើង?

ការពន្លត់ភ្លើងដោយប្រើប្រាស់ទឹកពិតជាមធ្យោបាយមួយសម្រាប់ករណីអគ្គិភ័យនៅលើផែនដី ប៉ុន្តែអណ្ដាតភ្លើងនៅលើព្រះអាទិត្យគឺជារឿងដោយឡែក ហើយការយកទឹកទាំងអស់របស់ផែនដី ទៅជះលើព្រះអាទិត្យនឹងកើតមានហេតុការណ៍ដែលស្ទើរគ្រប់គ្នានឹកស្មានមិនដល់។

យោងតាមអ្នកវិទ្យាសាស្ត្រ ចម្លើយគឺថា យើងមិនអាចយកទឹកទៅពន្លត់ភ្លើងព្រះអាទិត្យឱ្យថមថយកម្ដៅបានឡើយ។ ព្រោះថា ព្រះអាទិត្យមិនមែនជាអណ្ដាតភ្លើងដែលឆេះដោយសារអុកស៊ីសែនដូចនៅលើផែនដីនោះទេ។ នៅក្នុងលំហដែលពុំមានអុកស៊ីសែន ព្រះអាទិត្យរក្សាវត្តមានរបស់ខ្លួនបានគឺមកពីប្រតិកម្មនុយក្លេអែរដែលប្រែក្លាយអ៊ីដ្រូសែនទៅជាអេល្យូម។

ដូច្នោះហើយ បើសិនយើងជះទឹកទៅលើព្រះអាទិត្យគឺស្មើនឹងការបន្ថែមឥន្ធនៈឱ្យផ្កាយមួយដួងនេះកាន់តែឆេះខ្លាំងឡើង និងធ្វើឱ្យធ្ងន់ជាងមុនថែមមួយកម្រិតទៀត នាំឱ្យភពនានានៅក្បែរព្រះអាទិត្យប្រឈមនឹងការឆេះខ្លោចឆាប់ជាងធម្មតា។

បើទោះជាបន្ថែមទឹកឱ្យព្រះអាទិត្យយ៉ាងណាក៏ដោយ ផ្កាយនេះក៏នៅតែត្រូវអស់ថាមពល នៅប្រហែល 5 ពាន់លានឆ្នាំទៀត បន្ទាប់ពីឆេះអស់អ៊ីដ្រូសែនដែលមាន 73% និងអេល្យូមដែលមាន 25%។ ក៏ប៉ុន្តែ មុននឹងក្លាយជាកូនផ្កាយពណ៌ស ហើយបន្តចុះត្រជាក់រហូតក្លាយជាកូនផ្កាយពណ៌ប្រផេះ ព្រះអាទិត្យនឹងរីកមាឌ លេបយកភពពុធ និងភពសុក្រ។ ចំណែកភពអង្គារក៏ត្រូវខ្ទាតចេញពីតំបន់ទទួលឥទ្ធិពលពីព្រះអាទិត្យ ខណៈដែលជីវិតនៅលើផែនដីក៏ត្រូវសាបសូន្យសុង៕

July 5, 2023

ក្រុមហ៊ុនតៃវ៉ាន់ Foxconn ផលិតគ្រឿងរថយន្តអគ្គិសនីនៅវៀតណាម

Foxconn ត្រៀមវិនិយោគប្រហែល 250 លានដុល្លារអាម៉េរិក ទៅលើគម្រោងពីរនៅប្រទេសវៀតណាម ក្នុងនោះក៏មានការផលិតគ្រឿងបន្លាស់សម្រាប់រថយន្តអគ្គិសនីផងដែរ។

ឥរិយាបថខាងលើនេះបញ្ជាក់អំពីផែនការធ្វើសកលភាវូបនីយកម្មរបស់ Foxconn ដើម្បីក្លាយជា «អ្នកលេង» នៅក្នុងវិស័យឧស្សាហកម្មរថយន្តអគ្គិសនី ក្រោយពីបានចំណាយពេលច្រើនឆ្នាំក្នុងការផ្ដោតលើការដំឡើងផលិតផលឱ្យ Apple និងបណ្ដាក្រុមហ៊ុនធំៗដទៃទៀត។

ក្រុមហ៊ុនខ្នាតយក្សរបស់តៃវ៉ាន់ តាមរយៈ Foxconn Singapore នឹងវិនិយោគប្រហែល 250 លានដុល្លារអាម៉េរិក ទៅលើតំបន់ឧស្សាហកម្មមួយនៅភាគខាងជើងប្រទេសវៀតណាម ដែលនឹង «ផ្ដោតលើការផលិតគ្រឿងបន្លាស់សម្រាប់យានយន្តអគ្គិសនី ប្រព័ន្ធបញ្ជា និងបណ្ដាផលិតផលបច្ចេកវិទ្យាដទៃទៀត ដើម្បីឆ្លើយតបនឹងតម្រូវការទីផ្សារអនាគត»។ នេះបើតាមទំព័រ Reuters។

គម្រោងខាងលើនេះនឹងជួយបង្កើនខ្ទង់វិនិយោគសរុបរបស់ Foxconn នៅអាស៊ីអាគ្នេយ៍ ឡើងដល់ 3 ពាន់លានដុល្លារអាម៉េរិក៕

July 5, 2023

លាក់បាំងរឿងម្ដាយស្លាប់ បន្លំខ្លួនជាង 30 ឆ្នាំ ស៊ីប្រាក់រដ្ឋជាង 8 សែនដុល្លារ

(សហរដ្ឋអាម៉េរិក) – បុរសម្នាក់នៅ California បានសារភាពថា បានលាក់បាំងរឿងម្ដាយស្លាប់ជាង 30 ឆ្នាំ ដើម្បីទទួលបានប្រាក់របបសន្តិសុខសង្គម និងប្រាក់ខែចូលនិវត្តន៍របស់ម្ដាយ។

Randy Grossman រដ្ឋអាជ្ញានៅ California ខាងត្បូង បានឱ្យដឹងថា Donald Felix Zampach អាយុ 65 ឆ្នាំ រស់នៅតំបន់ Poway បានបន្លំជាម្ដាយ ទទួលប្រាក់មូលនិធិសាធារណៈចំនួន 830,000 ដុល្លារ និងប្រាក់ជិត 30,000 ដុល្លារ ពីប័ណ្ណឥណទាន ក្នុងរយៈពេល 30 ឆ្នាំ។ នេះបើតាម Guardian ចុះផ្សាយកាលពីថ្ងៃទី 03 កក្កដា 2023។

ករណីនេះចាប់ផ្ដើមតាំងពីឆ្នាំ 1990 នៅពេលម្ដាយរបស់ Zampach បានទទួលមរណភាពនៅប្រទេសជប៉ុន។ មុនពេលម្ដាយស្លាប់ លោក Zampach បានប្ដូរឈ្មោះកម្មសិទ្ធិកាន់កាប់ផ្ទះរបស់ម្ដាយនៅ California ខាងត្បូង មកជាឈ្មោះខ្លួន។

ច្រើនឆ្នាំក្រោយមក បុរសនេះនៅតែរក្សាគណនីធនាគាររបស់ម្ដាយ និងបន្លំហត្ថលេខារបស់ម្ដាយ។ Zampach មិនបានរាយការណ៍ប្រាប់សមត្ថកិច្ចអំពីការស្លាប់របស់ម្ដាយដើម្បីឱ្យរដ្ឋឈប់ផ្ដល់ប្រាក់ខែ និងប្រាក់ឧបត្ថម្ភ។ ម្ដាយរបស់ Zampach ធ្លាប់បម្រើការក្នុងជួរកងទ័ព។

«នេះគឺជាសកម្មភាពបោកប្រាសដែលមានផែនការក្នុងរយៈពេល 30 ឆ្នាំ ហើយត្រូវតែចាត់ការឱ្យបានម៉ឺងម៉ាត់» Grossman ថ្លែងដូច្នេះ។

Zampach បានសារភាពកំហុស និងត្រូវបានការអនុញ្ញាតឱ្យនៅក្រៅឃុំ។ បុរសនេះនឹងត្រូវបានកាត់ទោសនៅថ្ងៃទី 20 កញ្ញាខាងមុខ ហើយអាចប្រឈមនឹងការជាប់ពន្ធនាគារ 25 ឆ្នាំ។ ជននេះក៏នឹងត្រូវរដ្ឋរឹបអូសយកផ្ទះនៅ Poway ដើម្បីជាសំណង 830,000 ដុល្លារដែលបានបន្លំយក។

ក្នុងឆ្នាំ 2020 ពលរដ្ឋជិត 70 លាននាក់បានទទួលប្រាក់ខែចូលនិវត្តន៍នៅសហរដ្ឋអាម៉េរិក ក្នុងនោះមានករណីបន្លំក្រោម 1%៕

July 4, 2023

យានជំនិះដំណើរការដោយអ៊ីដ្រូសែន បរបានជិត 2,500 គីឡូម៉ែត្រដោយមិនបន្ថែមឥន្ធនៈ

(ហូឡង់) – យានជំនិះអ៊ីដ្រូសែន Eco-Runner XIII របស់សាកលវិទ្យាល័យ TU Delft បរបានចម្ងាយ 2,488 គីឡូម៉ែត្រ ស៊ីឥន្ធនៈអស់មិនដល់មួយលីត្រ។

ក្រុមនិស្សិតមកពីសាកលវិទ្យាល័យ TU Delft បង្ហាញយានជំនិះគំរូថ្មីបំផុតដែលមានឈ្មោះថា Eco-Runner XIII ដែលអភិវឌ្ឍពីយានគំរូខ្នាតតូចដែលដំណើរការដោយអ៊ីដ្រូសែន Eco-Runner កាលពីខែឧសភា 2023។ យានជំនិះនេះបានបំបែកកំណត់ត្រាពិភពលោក Guinness ស្ដីពីចម្ងាយផ្លូវ មួយខែប៉ុណ្ណោះបន្ទាប់ពីកំណត់ត្រាចាស់បានបង្កើតឡើង។

Eco-Runner ត្រូវបានរចនាឡើងដើម្បីសន្សំសំចៃឥន្ធនៈឱ្យបានខ្ពស់ជាង 100 ដង ធៀបនឹងរថយន្តប្រើប្រាស់ប្រេងសាំង។ នេះបើយោងតាម New Atlas ចុះផ្សាយកាលពីថ្ងៃទី 03 កក្កដា 2023។

ការបំបែកកំណត់ត្រាខាងលើត្រូវបានធ្វើឡើងនៅប្រទេសអាល្លឺម៉ង់កាលពីថ្ងៃទី 22 មិថុនា 2023។ ថ្ងៃបន្ទាប់ ចាប់ពីម៉ោង 04 ទៀតភ្លឺ យាន Eco-Runner XIII ចាប់ផ្ដើមបរជុំវិញទីតាំងធ្វើតេស្ត ក្នុងល្បឿន 45 គីឡូម៉ែត្រ/ម៉ោង លឿនជាងជិតទ្វេដង បើធៀបនឹងយាន Eco-Runner។

កំណត់ត្រាមុននោះគឺល្បឿន 2,056 គីឡូម៉ែត្រ/ម៉ោង ត្រូវបានបំបែកកាលពីថ្ងៃទី 25 មិថុនា ប៉ុន្តែនៅសល់ឥន្ធនៈ។ ដូច្នេះ Eco-Runner XIII ក៏បន្តរត់។ យាននេះបានឈប់នៅម៉ោង 08 និង 26 នាទី ថ្ងៃទី 26 មិថុនា (ម៉ោងក្នុងតំបន់) ដោយរត់បានចម្ងាយ 2,488.48 គីឡូម៉ែត្រ ប្រើប្រាស់អ៊ីដ្រូសែនអស់ 950 ក្រាម ហើយក៏បង្កើតបានកំណត់ត្រាថ្មី៕

July 4, 2023

Tag: តំបន់