តារា - La Reine Media

រ៉ុក្កែត Space One របស់ជប៉ុន ផ្ទុះខ្ទេច ពេលទើបហោះឡើងពីប្រព័ន្ធទម្រ

ការបាញ់បង្ហោះរ៉ុក្កែតជាលើកដំបូងរបស់ Space One ដែលជាក្រុមហ៊ុនធុរកិច្ចថ្មី មានមូលដ្ឋាននៅប្រទេសជប៉ុន បានទទួលបរាជ័យ នៅពេលរ៉ុក្កែតផ្ទុះ ខណៈទើបហោះឡើងពីជើងទ្រ។

កាលពីព្រឹកថ្ងៃទី 13 មីនា ក្រុមហ៊ុនអវកាសជប៉ុន បានបាញ់បង្ហោះរ៉ុក្កែតមួយគ្រឿងដែលមានឈ្មោះថា KAIROS លេខ 1 ដើម្បីនាំយកផ្កាយរណបសិប្បនិម្មិតទៅកាន់គន្លងគោចរ។

បើសិនបានឆ្លងផុតឧបសគ្គនេះ Space One នឹងក្លាយជាក្រុមហ៊ុនឯកជនដំបូងគេរបស់ជប៉ុន ដែលបាញ់បង្ហោះរ៉ុក្កែតឡើងទៅកាន់គន្លងតារាវិថីដោយជោគជ័យ។

នៅក្នុងដំណាក់កាលត្រៀម ក្រុមការងារមិនបានរកឃើញបញ្ហាណាមួយឡើយ។ រ៉ុក្កែតដែលមាន 4 ជាន់ ប្រវែង 18 ម៉ែត្រ និងទម្ងន់ 23 តោន របស់ Space One ក៏ហោះឡើងត្រូវទៅតាមការគ្រោងទុក នៅវេលាម៉ោង 11:01 (ម៉ោងនៅប្រទេសជប៉ុន)។

ក៏ប៉ុន្តែ រ៉ុក្កែតបានផ្ទុះ បន្ទាប់ពីហោះឡើងពីប្រព័ន្ធទម្របានតែប៉ុន្មានវិនាទីប៉ុណ្ណោះ។ បំណែកខ្លះរបស់វាបានធ្លាក់ទៅលើភ្នំនៅក្បែរនោះ ចំណែកខ្លះទៀតក៏ធ្លាក់ទៅលើសមុទ្រ។

នេះត្រូវបានចាត់ទុកថា ជាបរាជ័យដ៏ធំមួយសម្រាប់ការប្រឹងប្រែងរបស់ជប៉ុន ដើម្បីចូលប្រកួតប្រជែងក្នុងទីផ្សារបាញ់បង្ហោះផ្កាយរណប ដែលមានសក្តានុពលក្នុងការរកផលចំណេញ។

March 14, 2024

រកឃើញ «សមុទ្រអវកាស» មានទឹកច្រើនជាងបីដង ធៀបនឹងផែនដី

នៅទីឋានដែលភពមួយ ឬច្រើនជិតកកើតឡើង ក្រុមអ្នកតារាសាស្ត្របានរកឃើញទឹកក្នុងបរិមាណច្រើនជាងបីដង បើធៀបនឹងទឹកទាំងអស់នៅក្នុងមហាសមុទ្រលើភពផែនដី។

ដោយការប្រើប្រាស់ស្ថានីយតារាសាស្ត្រ ALMA ដែលជាឧបករណ៍សង្កេតរលកវិទ្យុអានុភាពខ្លាំងបំផុតលើពិភពលោក និងមានទីតាំងនៅលើសមុទ្រខ្សាច់ Atacama របស់ប្រទេសស៊ីលី (Chile) ក្រុមអ្នកវិទ្យាសាស្ត្របានរកឃើញ «សមុទ្រអវកាស» ដ៏មហិមា ស្ថិតនៅតំបន់មួយដែលមានចម្ងាយពីផែនដី 450 ឆ្នាំពន្លឺ នៅក្នុងបណ្ដុំផ្កាយ Taurus។

នោះគឺជាកូនផ្កាយវ័យក្មេងមួយដួង ត្រូវបានព័ទ្ធជុំវិញដោយថាសធូលីដែលបង្ហាញថា ភពថ្មីដំបូងជិតកកើតឡើង និងត្រូវបានហៅថា HL Tauri ហើយនៅទីនោះមានផ្ទុកទឹកក្នុងបរិមាណដ៏ច្រើន នឹកស្មានមិនដល់។

តាមការគណនារបស់ក្រុមអ្នកវិទ្យាសាស្ត្រ បរិមាណទឹកនៅទីនោះអាចស្មើនឹងទឹកទាំងអស់នៅក្នុងមហាសមុទ្រប៉ាស៊ីហ្វិក អាត្លង់ទិក មហាសមុទ្រឥណ្ឌា អង់តាកទិក និងមហាសមុទ្រខាងត្បូង (Southern Ocean) បូកចូលគ្នា រួចគុណនឹងបី។

យោងតាមអ្នកវិទ្យាសាស្ត្រមកពីសាកលវិទ្យាល័យ Milan ប្រទេសអ៊ីតាលី ការរកឃើញនេះបង្ហាញថា វត្តមានរបស់ទឹកអាចជះឥទ្ធិពលយ៉ាងដូចម្ដ៉េច ដល់ការរីកចម្រើនរបស់ប្រព័ន្ធផ្កាយ។

អ្វីដែលយើងកំពុងមើលឃើញនៅក្នុងបណ្ដុំផ្កាយ Taurus អាចជារូបភាពដូចប្រព័ន្ធព្រះអាទិត្យកាលពី 4.5 ពាន់លានឆ្នាំមុន គ្រាដែល «ពន្លក» របស់ភពផែនដី ក៏ដូចជាបណ្ដាភពជាបងប្អូន កំពុងកកើតពីថាសធូលីដ៏សែនក្រាស់។

ពិសេសជាងនេះ យើងក៏ទំនងជាកំពុងសម្លឹងមើលទៅលើរូបភាពកាលពីវ័យក្មេងជាង 4.5 ពាន់លានឆ្នាំរបស់ភពផែនដី។

បរិមាណទឹកក្នុង HL Tauri មិនបានបែងចែកស្មើគ្នា ដោយទឹកប្រមូលផ្ដុំច្រើនជាងគេនៅត្រង់ចង្អូរមួយក្នុងថាសធូលីដែលជាដើមកំណើតរបស់ភព (protoplanetary disk)។ នេះបើតាមទំព័រ Space.com ។

បណ្ដាចង្អូរក្នុងថាសដើមកំណើតភពនេះ បានកកើតឡើងគ្រាដែលទីឋានណាមួយនោះ ឧស្ម័ន ធូលីប្រមូលផ្ដុំគ្នាក្លាយជាពន្លកភព។ ដូច្នេះ នៅក្នុងតំបន់ដែលមានទឹកច្រើននោះ ភពមួយទំនងជាកំពុងចាប់កំណើត។

យើងពិតជាកំពុងសម្លឹងមើលចំភពមួយដែលរាប់ពាន់លានឆ្នាំក្រោយ នឹងមានអរិយធម៌មួយដែលដូចទៅនឹងមនុស្សជាតិបច្ចុប្បន្ន ជាទីដែលមានភ្នំ បឹង ទន្លេនៅលើទ្វីប និងមហាសមុទ្រធំធេង។

ការរកឃើញនេះមិនត្រឹមតែជាជំហានដ៏សំខាន់ក្នុងការយល់ដឹងរបស់មនុស្សជាតិអំពីការកកើតរបស់ភព ប៉ុន្តែក៏ជាសមិទ្ធផលធំរបស់ ALMA។

March 12, 2024

រកឃើញព្រះចន្ទថ្មីចំនួនបីដួងទៀត នៅក្នុងប្រព័ន្ធព្រះអាទិត្យ

សហព័ន្ធតារាសាស្ត្រអន្តរជាតិ (IAU) ទើបតែបានទទួលស្គាល់ «ពលរដ្ឋ» ថ្មីចំនួន 3 ទៀត របស់ប្រព័ន្ធព្រះអាទិត្យ ដែលរួមមាន ព្រះចន្ទពីរដួងរបស់ភពណិបទូន និងព្រះចន្ទមួយដួងរបស់ភពអ៊ុយរ៉ានុស។

ព្រះចន្ទថ្មីចំនួនបីដួងនេះ នឹងត្រូវបានដាក់ឈ្មោះទៅតាមតួអង្គក្នុងទេវកថាក្រិក និងល្ខោន Shakespeare។

ព្រះចន្ទវិលជុំវិញភពអ៊ុយរ៉ានុសដែលមានស្លាកលេខ S/2023 U1 គឺជាព្រះចន្ទទី 28 ដែលត្រូវបានរកឃើញរបស់ភពនេះ។ ព្រះចន្ទដែលមានអង្កត់ផ្ចិតប្រហែលតែ 8 គីឡូម៉ែត្រនេះ គឺជាមួយក្នុងចំណោមព្រះចន្ទតូចបំផុតរបស់ប្រព័ន្ធព្រះអាទិត្យ។ S/2023 U1 ត្រូវការពេលវេលាប្រហែល 680 ថ្ងៃ ដើម្បីគោចរបានមួយជុំភពអ៊ុយរ៉ានុស។

ជាធម្មតា ព្រះចន្ទរបស់ភពអ៊ុយរ៉ានុស នឹងត្រូវបានដាក់ឈ្មោះផ្លូវការទៅតាមតួអង្គណាមួយនៅក្នុងល្ខោន Shakespeare ដូចទៅនឹង Titania, Oberon និង Puck ដែលជាបងប្អូនរបស់វា។

ព្រះចន្ទថ្មីរបស់ភពណិបទូនដែលមានស្លាកលេខ S/2022 N5 និង S/2021 N1 ដែលមានអង្កត់ផ្ចិត 23 និង 14 គីឡូម៉ែត្រ ចំណាយពេល 9 ឆ្នាំ និងជិត 27 ឆ្នាំ ដើម្បីគោចរបានមួយជុំភពមេដ៏ធំរបស់ពួកវា។

ព្រះចន្ទទាំងពីរដួងខាងលើនេះ នឹងត្រូវបានដាក់ឈ្មោះទៅតាមឈ្មោះបុត្រីរបស់ព្រះម៉ែនាគី Nereus នៅក្នុងទេវកថាក្រិក។ មុននោះ អ្នកវិទ្យាសាស្ត្របានរកឃើញព្រះចន្ទចំនួន 16 របស់ភពណិបទូន។

កន្លងមក កាលពីដើមឆ្នាំ 2023 IAU ក៏ធ្លាប់បានបង្កើនតួលេខព្រះចន្ទរបស់ភពព្រហស្បតិ៍ឡើងដល់ 92 ដួង ក្រោយពីបានរកឃើញព្រះចន្ទថ្មីចំនួន 12 ដួងទៀតរបស់ភពនេះ។ ច្រើនខែបន្ទាប់មក ភពសៅរ៍ក៏បន្តមានព្រះចន្ទថ្មីចំនួន 62 ដួង ធ្វើឱ្យភពនេះក្លាយជាភពដែលមានព្រះចន្ទច្រើនជាងគេនៅក្នុងប្រព័ន្ធព្រះអាទិត្យ ដោយមានព្រះចន្ទសរុប 145 ដួង៕

March 11, 2024

ប្រព័ន្ធផ្កាយមានភព 6 នេះ ត្រូវបានសង្ស័យថា «មានជីវិតឆ្លាតវៃ»

អ្នកវិទ្យាសាស្ត្រជឿថា អាចរកឃើញបច្ចេកវិទ្យាពីភពផែនដី នៅក្នុងប្រព័ន្ធផ្កាយ HD 110067 ជាទីដែលមានភពរហូតដល់ 6 កំពុងវិលជុំវិញគ្នាយ៉ាងល្អឥតខ្ចោះ។

ត្រូវបានរកឃើញកាលពីឆ្នាំ 2023 ប្រព័ន្ធ HD 110067 ដែលមានផ្កាយក្រិនពណ៌ទឹកក្រូចនៅចំកណ្ដាល ហើយនៅជុំវិញគឺជាភពចំនួន 6 ដែលមានគន្លងគោចរប្រទាក់ក្រឡាគ្នាយ៉ាងល្អឥតខ្ចោះ ដែលហៅថា orbital resonance ត្រូវបានអ្នកវិទ្យាសាស្ត្រយល់ថា អាចមានវត្តមាននៃភាវៈរស់។

ភពមួយដែលស្ថិតនៅក្បែរផ្កាយមេរបស់វាបំផុត បញ្ចប់ការវិលមួយជុំ (មួយឆ្នាំ) ក្នុងរយៈពេល 9.1 ថ្ងៃរបស់ផែនដី ខណៈបណ្ដាភពជាបន្តបន្ទាប់មានគន្លងគោចរដែលមានរយៈពេល 13.6 ថ្ងៃ, 20.5 ថ្ងៃ, 30.8 ថ្ងៃ, 41 ថ្ងៃ និង 54.7 ថ្ងៃ។ ដូច្នេះ សមាមាត្រនៃឥទ្ធិពលរវាងភពដែលនៅក្បែរគ្នាក្នុងប្រព័ន្ធផ្កាយនេះគឺ 3:2, 3:2, 3:2, 4:3 និង 4:3 ។

យោងតាមលទ្ធផលនៃការស្រាវជ្រាវដែលទើបត្រូវបានប្រកាសលើទស្សនាវដ្ដីវិទ្យាសាស្ត្រ Research Notes of the AAS ភាពប្រទាក់ក្រឡាគ្នាល្អឥតខ្ចោះនេះ ជួយឱ្យភពទាំង 6 ដែលមានទំហំជិតស្មើនឹងភពណិបទូន (Neptune) មានបរិស្ថាននឹងនរអស់រាប់ពាន់លានឆ្នាំមកហើយ។

ភពខ្លះនៅក្នុងប្រព័ន្ធផ្កាយ HD 110067 ថែមទាំងមានសញ្ញាណរបស់ទឹកនៅលើផ្ទៃរបស់ពួកវាទៀតផង។ ពួកវាក៏ស្ថិតក្នុងស្ថានភាពនឹងនរ មិនច្របូកប្របល់យ៉ាងតិចមួយពាន់លានឆ្នាំកន្លង បន្ទាប់ពីកកើតរូបរាងល្អឥតខ្ចោះ និងវិលជុំវិញផ្កាយមេដែលមានអាយុបួនពាន់លានឆ្នាំ។

ប្រព័ន្ធផ្កាយ HD 110067 – (រូបភាព៖ Thibaut Roger, NCCR Planets)

អ្នកវិទ្យាសាស្ត្រនៅវិទ្យាស្ថានស្វែងរកជីវិតឆ្លាតវៃក្រៅភពផែនដី (SETI) របស់សហរដ្ឋអាម៉េរិក គណនាឃើញថា ភាពនឹងនរ និងពេលវេលានោះ គឺគ្រប់គ្រាន់ដែលអាចនាំមកនូវឱកាសល្អសម្រាប់ការកកើតជីវិត ការវិវត្ត និងការរីកចម្រើន។ ជាងនេះ ភាវៈរស់នោះទំនងជាបានវិវឌ្ឍដល់កម្រិតមួយដែលក្លាយជាអរិយធម៌ធំៗ ជាជីវិតដែលមានបច្ចេកវិទ្យាដែលអាចត្រូវបានរកឃើញពីចម្ងាយ។

ទំព័រ Science Alert បានផ្សាយថា ក្រុម SETI ក៏បានព្យាយាមស្វែងរករលកសញ្ញាពីបច្ចេកវិទ្យារបស់មនុស្សពិភពផ្កាយដែលស្ថិតក្នុងប្រព័ន្ធ HD 110067 តាមរយៈស្ថានីយតារាសាស្ត្រ Green Bank នៅសហរដ្ឋអាម៉េរិក ប៉ុន្តែមិនទាន់ចាប់បានប្រការដែលកំពុងទន្ទឹងរង់ចាំ។

March 8, 2024

សេដ្ឋកិច្ចសិង្ហបុរី ទទួលបានរាប់រយលានដុល្លារពីការប្រគំតន្ត្រី Taylor Swift

ការសម្ដែង និងច្រៀងរបស់តារាចម្រៀង Taylor Swift ត្រូវបានរំពឹងថា នឹងនាំមកនូវផលប្រយោជន៍ផ្នែកសេដ្ឋកិច្ចជិត 400 លានដុល្លារអាម៉េរិក សម្រាប់សិង្ហបុរី នៅពេលសេវាកម្មជាច្រើនផ្ទុះការពេញនិយម។

នាថ្ងៃទី 04 មីនា រដ្ឋមន្ត្រីក្រសួងវប្បធម៌ សហគមន៍ និងយុវជនសិង្ហបុរី Edwin Tong បានថ្លែងចំពោះមុខសភាប្រទេសនេះថា សេដ្ឋកិច្ចនឹងទទួលផលធំពីការប្រគំតន្ត្រីរបស់តារាចម្រៀងស្រី Taylor Swift នៅទីនេះ។ «ខ្ញុំអាចធានាបានថា ផលប្រយោជន៍ផ្នែកសេដ្ឋកិច្ចសម្រាប់សិង្ហបុរីគឺពិតជាធំណាស់ ហើយលើសពីទឹកប្រាក់ដែលបានចំណាយសម្រាប់ Taylor Swift មកសម្ដែងនៅទីនេះ» លោកថ្លែងដូច្នេះ។

លោករដ្ឋមន្ត្រីក៏មិនភ្លេចលើឡើងអំពីផលប្រយោជន៍ផ្ទាល់ផ្នែកសេដ្ឋកិច្ច ដែលរួមមាន ចំនួនភ្ញៀវទេសចរណ៍ ប្រាក់ចំណូលពីសំបុត្រយន្តហោះ សំបុត្រចូលទស្សនាការសម្ដែង កន្លែងស្នាក់នៅ ក៏ដូចជាប្រាក់ចំណូលដែលបានពីសេវាកម្សាន្ត ការទិញដូរទំនិញ និងការហូបចុកនៅសិង្ហបុរីជាដើម។ មន្ត្រីនៅធានាគារ Maybank ឱ្យដឹងថា ប្រមាណ 70% នៃភ្ញៀវដែលមកទស្សនាការសម្ដែងនេះគឺជាជនបរទេស។

កាលពីខែកន្លង Strait Times ចេញផ្សាយថា អ្នកសេដ្ឋកិច្ចប៉ាន់ស្មានថា ការប្រគំតន្ត្រីរបស់ Taylor Swift នាំមកនូវប្រាក់ចំណូលពី 350 ដល់ 500 លានដុល្លារសិង្ហបុរី (ពី 260 ដល់ 371.9 លានដុល្លារអាម៉េរិក) សម្រាប់សេដ្ឋកិច្ចសិង្ហបុរី។

តួលេខពីក្រុមហ៊ុនទិន្នន័យសណ្ឋាគារ Smith Travel Research ឱ្យដឹងថា បន្ទាប់ពី Swift បានប្រកាសកាលបរិច្ឆេទសម្ដែងភ្លាម ចំនួនភ្ញៀវដែលបានកក់បន្ទប់សណ្ឋាគារនានានៅសិង្ហបុរី ក្នុងខែមីនា 2024 បានកើន 10%។

លើទំព័រ CNBC ក្រុមហ៊ុនអាកាសចរណ៍ Singapore Airlines និង Scoot ឱ្យដឹងថា តម្រូវការហោះហើរទៅកាន់សិង្ហបុរី ក្នុងខែមីនា កើនឡើងខ្ពស់ខ្លាំង ពិសេសអ្នកដំណើរពីតំបន់អាស៊ីអាគ្នេយ៍។ Jetstar Asia ក៏បង្ហើបឱ្យដឹងដែរថា តម្រូវការហោះហើរកើន 20% ចំពោះបណ្ដាជើងហោះហើរពីបាងកក ម៉ានីល និងហ្សាការតា ទៅកាន់សិង្ហបុរី។

ដំណើរសម្ដែងរបស់ Taylor swift នៅសិង្ហបុរី នឹងអូសបន្លាយពេល 6 ថ្ងៃ ចាប់ពីថ្ងៃទី 02 ដល់ទី 09 ខែមីនា ឆ្នាំ 2024។ សំបុត្រទាំង 300,000 សន្លឹកសម្រាប់ទស្សនាការសម្ដែង 6 យប់ ត្រូវបានលក់អស់គ្មានសល់។ តម្លៃសំបុត្រពិសេស (VIP) គឺជាង 900 ដុល្លារអាម៉េរិក។

Eras Tour របស់ Taylor បានចាប់ផ្ដើមពីខែមីនាឆ្នាំ 2023 ហើយគ្រោងនឹងបញ្ចប់នៅក្នុងខែធ្នូឆ្នាំ 2024 ក្នុងនោះមានការសម្ដែងចំនួន 151 យប់។ ក្នុងការសម្ដែងមួយយប់ មានទស្សនិកជនប្រហែល 72,000 នាក់ ដែលគ្រោងនឹងរកបានចំណូល 17 លានដុល្លារអាម៉េរិក៕

March 4, 2024

ផ្កាយមួយដួងនឹងផ្ទុះក្នុងឆ្នាំ 2024 ហើយអាចមើលឃើញដោយភ្នែកទទេ

នៅកណ្ដាលកញ្ចុំផ្កាយ Hercules នឹងមានវត្ថុអវកាសមួយដែលមើលទៅដូចផ្កាយថ្មីទើបបង្ហាញខ្លួននៅលើផ្ទៃមេឃ។

យោងតាម Science Alert ហេតុការណ៍ផ្ទុះផ្កាយជិតនឹងកើតឡើងរបស់ T Coronae Borealis ដែលជាផ្កាយមួយគូ រួមមាន «ផ្កាយខ្មោចឆៅ» មួយដួង និងជនរងគ្រោះរបស់វា នឹងបញ្ចេញពន្លឺរហូតដល់ថ្នាក់មនុស្សនៅលើផែនដីអាចមើលឃើញវាដោយភ្នែកទទេ។

T Coronae Borealis ធ្លាប់បានផ្ទុះម្ដងរួចហើយកាលពីឆ្នាំ 1946។ យោងតាមការគណនារបស់អ្នកវិទ្យាសាស្ត្រនៅអង្គការណាសា ផ្កាយភ្លោះ T Coronae Borealis នឹងត្រូវផ្ទុះម្ដងទៀត នៅចន្លោះពីខែកុម្ភៈ ដល់ខែកញ្ញា ឆ្នាំ 2024។

បច្ចុប្បន្ន វាមិនទាន់ផ្ទុះ ដូច្នេះ អ្នកដែលចូលចិត្តវិស័យតារាសាស្ត្រ អាចទន្ទឹមរង់ចាំមើលព្រឹត្តិការណ៍នេះ ចាប់ពីពេលនេះរហូតដល់ដាច់ខែកញ្ញា។

តាមរយៈភ្នែកទទេ អ្នកនឹងបានឃើញចំណុចដែលភ្លឺមួយដូចទៅនឹងផ្កាយថ្មីមួយដួងទើបរះនៅកណ្ដាលកញ្ចុំផ្កាយ Hercules ជាទីដែលផ្កាយមួយគូខាងលើកំពុងស្ថិតនៅ។ ក្នុងនោះ ពន្លឺរបស់វា ភ្លឺស្មើនឹងផ្កាយ North Star។

T Coronae Borealis គឺជាប្រព័ន្ធផ្កាយមួយដែលបានឈានចូលដល់ដំណាក់កាលស្លាប់។ បច្ចុប្បន្ន វារួមមាន ផ្កាយយក្សក្រហមមួយដួង និងកូនផ្កាយក្រិនពណ៌ស (White Dwarf) មួយដួង។ កូនផ្កាយក្រិនពណ៌សនេះ ដើរតួជាផ្កាយខ្មោចឆៅ ខណៈដែលផ្កាយយក្សក្រហមគឺជាជនរងគ្រោះរបស់វា។

កូនផ្កាយក្រិនពណ៌សនេះ ចេះតែជះកម្លាំងសម្ពាធ ហែកសាច់ផ្កាយយក្សក្រហមជាបន្តបន្ទាប់។ នៅពេលសម្ពាធធំគ្រប់គ្រាន់ ផ្កាយយក្សក្រហមនឹងផ្ទុះទៅតាមវដ្ដមួយនៅក្នុងព្រឹត្តិការណ៍ដែលត្រូវបានហៅថា ហេតុការណ៍ផ្ទុះណូវ៉ា ដោយបញ្ចេញវត្ថុធាតុមួយផ្នែករបស់វាទៅក្នុងបរិយាកាស។

វត្ថុធាតុពីផ្កាយយក្សក្រហមដែលត្រូវបានបំបែកចេញ ក៏ត្រូវបានកូនផ្កាយក្រិនពណ៌ស ស៊ីជាចំណី ក្នុងរយៈពេលខ្លី។ ដូច្នេះ អ្នកអាចតាមដានគយគន់ព្រឹត្តិការណ៍នេះជាច្រើនថ្ងៃផងដែរ។

រហូតដល់ថ្ងៃណាមួយនោះ ផ្កាយយក្សក្រហមនឹងត្រូវផ្កាយក្រិនពណ៌ស ហែកស៊ីវត្ថុធាតុរហូតដល់ឆ្អែត «បែកពោះ»។ ពេលនោះ ផ្កាយមួយគូនេះនឹងត្រូវផ្ទុះដំណាលគ្នា និងខ្លាំងក្លាជាងការផ្ទុះរបស់វានាពេលកន្លង នៅក្នុងព្រឹត្តិការណ៍មួយដែលហៅថា «ហេតុការណ៍ផ្ទុះស៊ុបពើណូវ៉ា»។

ផ្កាយយក្សក្រហមគឺជាបណ្ដាផ្កាយដែលកំពុងស្ថិតក្នុងដំណាក់កាល «ដង្ហើមចង្រិត» ពេលដែលជិតអស់ថាមពល។ ព្រះអាទិត្យរបស់មនុស្ស នៅសល់ 5 ពាន់លានឆ្នាំទៀត ក៏នឹងក្លាយជាផ្កាយយក្សក្រហម។

ក្រោយការផ្ទុះណូវ៉ា និងការផ្ទុះស៊ុបពើណូវ៉ា អ្វីដែលនៅសេសសល់ នឹងប្រមូលផ្ដុំគ្នា ក្លាយជាកូនផ្កាយក្រិនពណ៌ស ដែលមានទំហំប្រហាក់ប្រហែលនឹងភពផែនដី ប៉ុន្តែមានផ្ទុកថាមពលមហិមា។

តាមការគណនា ក្រោយរយៈពេលប្រហែល 10 ពាន់លានឆ្នាំទៀត ពោលគឺប្រហែល 5 ពាន់លានឆ្នាំដែលបានក្លាយជាផ្កាយយក្សក្រហម ព្រះអាទិត្យរបស់មនុស្សនឹងក្លាយទៅជាកូនផ្កាយក្រិនពណ៌ស៕

March 4, 2024

យានអវកាសឯកជនអាម៉េរិក បញ្ជូនរូបថតដំបូងពីឋានព្រះចន្ទមកកាន់ផែនដី

យាន Odysseus បញ្ជូនរូបថតពីរសន្លឹកស្ដីពីផ្ទៃព្រះចន្ទ មកកាន់ផែនដី នៅមុនពេលបញ្ចប់បេសកកម្មឆាប់ជាងច្រើនថ្ងៃ បើធៀបនឹងគម្រោងដំបូង។

យោងតាមសារព័ត៌មាន Space កាលពីថ្ងៃទី 26 កុម្ភៈ ក្រុមហ៊ុន Intuitive Machines ប្រកាសលើបណ្ដាញសង្គម X ថា យាន Odysseus នៅតែភ្ជាប់ទំនាក់ទំនងជាមួយនឹងក្រុមគ្រប់គ្រងនៅលើផែនដី បើទោះវាដួលផ្អៀងទៅម្ខាង បន្ទាប់ពីបានចុះចតលើផ្ទៃព្រះចន្ទ។ យាននេះក៏បញ្ជូនរូបថតពីរសន្លឹកពីឋានព្រះចន្ទមកកាន់ផែនដី ក្នុងនោះមានមួយសន្លឹកត្រូវបានថតនៅពេលយានចុះដល់ទីតាំងចុះចតដែលមានឈ្មោះថា Malapert A ខណៈរូបមួយសន្លឹកទៀតគឺជារូបថតលើផ្ទៃព្រះចន្ទដោយផ្ទាល់ជាលើកដំបូងស្ដីពីផ្ទៃភពរណបនេះ។

យាន Lunar Reconnaissance របស់ណាសា ដែលមានជំនាញខាងស្កេនព្រះចន្ទពីគន្លងតារាវិថីតាំងពីឆ្នាំ 2009 ក៏បានថតរូបភាពរបស់យាន Odysseus ពីកម្ពស់ 90 គីឡូម៉ែត្រ។ រូបភាពពីកាម៉េរិករបស់យាន Lunar Reconnaissance បញ្ជាក់ថា Odysseus បានចុះចតដោយជោគជ័យ ពីកម្ពស់ 2,759 ម៉ែត្រ។

Intuitive Machines ឱ្យដឹងថា ក្រោយពីបានហោះហើរជាង 965,600 គីឡូម៉ែត្រ យាន Odysseus ក៏បានចុះចតលើទីតាំងដែលមានចម្ងាយពីគោលដៅ Malapert A 1.5 គីឡូម៉ែត្រ។ ក្រុមគ្រប់គ្រងបេសកកម្មបញ្ជាក់ថា Odysseus រអិលដួលផ្អៀងទៅម្ខាង សង្កត់លើថ្មមួយដុំ ធ្វើឱ្យអង់តែនមួយចំនួនរបស់វាត្រូវបែរទិសខុសពីការកំណត់។ ផ្អែកលើទីតាំងរបស់ផែនដី និងព្រះចន្ទ ក្រុមហ៊ុនខាងលើគណនាឃើញថា ក្រុមអ្នកគ្រប់គ្រងយានអាចបន្តទាក់ទងជាមួយ Odysseus រហូតដល់ព្រឹកថ្ងៃទី 27 កុម្ភៈ 2024 ឆាប់ជាងច្រើនថ្ងៃ បើធៀបនឹង 9 ថ្ងៃ ដែលជាការគ្រោងទុកដំបូង។

យាន Odysseus ត្រូវបានបាញ់បង្ហោះលើរ៉ុក្កែត Falcon 9 របស់ SpaceX ពីមជ្ឈមណ្ឌលអវកាស Kennedy របស់ណាសា នៅ Cape Canaveral រដ្ឋ Florida កាលពីថ្ងៃទី 15 កុម្ភៈ 2024 និងហោះចូលដល់គន្លងតារាវិថីព្រះចន្ទកាលពីថ្ងៃទី 21 កុម្ភៈ។ យាននេះបានចុះចតលើដីក្បែរមាត់រណ្ដៅ Malapert A នៅប៉ូលខាងត្បូងរបស់ព្រះចន្ទ។ យោងតាមណាសា នេះគឺជាតំបន់ដែលទាក់ទាញចំណាប់អារម្មណ៍របស់អ្នកវិទ្យាសាស្ត្រតាំងពីយូរមកហើយ ព្រោះតែវត្តមានរបស់ផ្ទាំងទឹកកក ដែលអាចបំបែកទៅជាអ៊ីដ្រូសែន និងអុកស៊ីសែន សម្រាប់ប្រើប្រាស់ជាឥន្ធនៈរបស់រ៉ុក្កែតនាពេលអនាគត។

បេសកកម្ម Odysseus ស្ថិតក្នុងកម្មវិធី Commercial Lunar Payload Services របស់ណាសា ដែលជួយជំរុញការអភិវឌ្ឍយានចុះចតឯកជន។ ណាសាបានចុះកិច្ចព្រមព្រៀងជាមួយនឹងបណ្ដាក្រុមហ៊ុនឯកជន ដើម្បីដឹកទំនិញ និងឧបករណ៍វិទ្យាសាស្ត្រឡើងទៅកាន់ឋានព្រះចន្ទ។ នៅមុនជោគជ័យរបស់ Odysseus ក៏មានយាន 5 គ្រឿងបានបរាជ័យក្នុងការចុះចតលើផ្ទៃព្រះចន្ទនាពេលថ្មីៗនេះ ក្នុងនោះក៏មានបេសកកម្មឯកជន Peregrine ដែលបានបរាជ័យកាលពីខែមុនផងដែរ៕

February 27, 2024

ព្រឹត្តិការណ៍ពិសេសៗពីការសម្ពោធជាផ្លូវការនូវស្មាតហ្វូន OPPO Reno11 Series 5G

កម្មវិធីសម្ពោធស្មាតហ្វូនស៊េរីថ្មី OPPO Reno11 Series 5G បានសម្ពោធជាផ្លូវការហើយ ជាមួយនឹងបរិយាកាសដ៏អធិកអធម ក្រោមការយាងចូលរួមពីភ្ញៀវកិត្តិយសពិសេស ព្រះនាងតូច ជេនណា ជាមួយនឹងវត្តមានទូតសុច្ឆន្ទៈប្រចាំក្រុមហ៊ុន OPPO ទាំង 3 រូបគឺ ពេជ្រ វត្តីសារ៉ាវឌ្ឍី, ថេណា និងរ៉េត ស៊ូហ្សាណា ព្រមទាំងតារាប្រុសស្រីល្បីៗជាច្រើនរូប ដែលបានអញ្ជើញចូលរួមនៅក្នុងកម្មវិធីនេះ។

OPPO បានដាក់បង្ហាញស្មាតហ្វូន OPPO Reno11 Series 5G ជំនាន់ថ្មីរបស់ខ្លួនរហូតទៅដល់ 3 ម៉ូដែល ដែលរួមមាន Reno11 5G, Reno11 F និង Reno11 Pro 5G ទាំងការឌីហ្សាញ ប្រព័ន្ធកាមេរ៉ា កម្លាំងម៉ាស៊ីន និងបច្ចេកវិទ្យា AI គឺសុទ្ធសឹងតែជាបច្ចេកវិទ្យាចុងក្រោយ។

សម្រាប់ការរចនាឌីហ្សាញដ៏ថ្មីស្រឡាងដែលមិនធ្លាប់មានពីមុនមក បានបំផុសគំនិតពីធម្មជាតិពិតៗ ដែលផ្តល់ជូននូវភាពស្រស់ស្រាយរាល់ពេលដែលយើងសម្លឹងមើល។ រីឯ គុណភាពប្រព័ន្ធកាមេរ៉ាថតរូប Portrait បានអាប់ដេតកាន់តែប្រសើរជាងមុន ដែលធ្វើឲ្យអ្នកទទួលបានរូបភាពហាក់ដូចជាថតរូបក្នុងស្ទីឌីយោ ទាំងគុណភាព ការចាប់ប្លង់ និងពន្លឺនោះទេ។ បន្ថែមពីនេះជាមួយមុខងារ 2x optical zoom អាចទាញផ្ទៃខាងក្រោយមកកាន់តែកៀករូបមនុស្ស និងធ្វើឲ្យព្រាលផ្ទៃខាងក្រោយ ធ្វើឲ្យរូបភាព Portrait កាន់តែលេចធ្លោ និងនៅតែអាចរក្សាទម្រង់មុខមនុស្សបានស្អាតធម្មជាតិ មិនធ្វើឲ្យខូចទ្រង់ទ្រាយនោះទេ។ លើសពីនេះ OPPO Reno11 Series 5G ទាំងនៅលើកាមេរ៉ាមុខ និងក្រោយអាចថតវីដេអូបានកម្រិត 4K ។ ចំពោះអេក្រង់វិញ OPPO Reno11 Series 5G បំពាក់ជាមួយអេក្រង់ប្រភេទ 3D គាំទ្រដោយកញ្ចក់ AMOLED Display មានគែមកោង និងមានទំហំ 6.7Inch ព្រមទាំងមានសមត្ថភាពខ្ពស់អាចបង្ហាញរូបភាព និងវីដេអូចេញបានក្នុងកម្រិត FHD+ ថែមទៀតផង។ ចំណែកថាមពលថ្មវិញ Reno11 និង Reno11 F មានកម្លាំង 5000mAh និងគាំទ្របច្ចេកវិទ្យា 67W SUPERVOOC ដោយឡែក Reno11 Pro មានកម្លាំងថ្ម 4600mAh និងគាំទ្របច្ចេកវិទ្យា 80W SUPERVOOC ។

ក្រៅពីនេះ OPPO ក៏មានសម្ពោធប្រព័ន្ធប្រតិបត្តិការថ្មី ColorOS 14 ដែលមានមុខងារពិសេសៗជាច្រើនដូចជា Smart Image Matting, File Dock, Smart Touch និងមុខងារ LinkBoost ។ លើសពីនេះទៅទៀត ក៏មានការប្រកាសផលិតផល IOT ដូចជា OPPO Pad Neo, OPPO Watch X និងកាសឥតខ្សែ OPPO Enco Bud2 ពណ៌ថ្មីផងដែរ។

សម្រាប់ថេប្លេតជំនាន់ថ្មី OPPO Pad Neo រចនាមកជាមួយអេក្រង់ ReadFit កម្រិត 2.4K ទំហំ 14” និងអាចប្រើប្រាស់ស៊ីមកាតដោយគាំទ្រសេវា 4G LTE និង Wifi ជាមួយថាមពលថ្មធំ 8000mAh ដែលមានបច្ចេកវិទ្យាសាកថ្មរហ័ស 33W SUPERVOOC ព្រមទាំង RAM 16GB ((8+8GB) និង ROM 128GB ផ្តល់ជូនលោកអ្នកនូវភាពរីករាយគ្មានដែនកំណត់គ្រប់ទីកន្លែង។
សម្រាប់ OPPO Enco Buds2 ជាកាសឥតខ្សែជំនាន់ថ្មីនឹងផ្តល់ឲ្យអ្នកនូវបទពិសោធសំឡេងដ៏អស្ចារ្យឥតដែនកំណត់ និងអាចឲ្យអ្នកប៉ះបញ្ជាផ្ទាល់លើកាស រាល់ពេលចង់ផ្លាស់ប្តូរបទចម្រៀង បន្ថយឬបន្ថែមសំឡេង និងទទួលការហៅចូលបានយ៉ាងងាយស្រួលដោយមិនចាំបាច់ចុចផ្ទាល់លើទូរស័ព្ទ។
សម្រាប់ OPPO Watch X នាឡិកាវៃឆ្លាតជំនាន់ថ្មី ដែលមានរចនាបថរូបរាងកាលីបស្រស់ស្អាត ទាន់សម័យ កម្រាស់ស្តើង ស័ក្កសមជាមួយជីវិតប្រចាំថ្ងៃ ដោយភ្ជាប់មកនូវមុខងារប្រើប្រាស់ទំនើបៗជាច្រើន។

តោះ! កក់ទុកមុនចាប់ពីថ្ងៃនេះរហូតដល់ថ្ងៃទី02 មីនា 2024 លើស្មាតហ្វូនស៊េរីថ្មី OPPO Reno11 Series 5G ទាំង 3 ម៉ូដែល Reno11 Pro 5G $599 | Reno11 5G $449 | Reno11 F 5G $339 នឹងទទួលបានកាដូរួមមានដូចជា ៖

រាល់ការកក់ទុកមុន Reno11 Pro 5G | Reno11 5G ថែមជូន ៖
បណ្ណប្តូរអេក្រង់ 1ឆ្នាំ តម្លៃ $89
កាតាបស្ពាយដ៏ស្រស់ស្អាត តម្លៃ $39
ស៊ីមស្មាតលេខពិសេស Bronze តម្លៃ $54
រាល់ការកក់ទុកមុន Reno11 F 5G ថែមជូន ៖
បណ្ណប្តូរអេក្រង់ 1ឆ្នាំ តម្លៃ $69
កាតាបស្ពាយដ៏ស្រស់ស្អាត តម្លៃ $39
ស៊ីមស្មាតលេខពិសេស Bronze តម្លៃ $54

សម្រាប់ផលិតផល IoT រួមមាន OPPO Pad Neo តម្លៃ $299 | OPPO Watch X | OPPO Enco Buds2 អាចរកទិញបានចាប់ពីថ្ងៃទី03 ខែមីនា 2024 នេះតទៅ៕

February 24, 2024

រោងចក្រផលិតឱសថក្នុងទីអវកាស ហោះត្រឡប់មកកាន់ផែនដី

(សហរដ្ឋអាម៉េរិក) – កាប៊ីនយាន W-1 ដែលដឹកធាតុរាវនៃថ្នាំព្យាបាល HIV និងជំងឺរលាកថ្លើមប្រភេទ C របស់ក្រុមហ៊ុន Varda Space Industries ត្រឡប់មកកាន់ផែនដី ក្រោយរយៈពេលជិត 8 ខែ ដែលបានស្ថិតនៅលើគន្លងតារាវិថី ហើយគ្រោងនឹងចុះដល់ដីដោយប្រើប្រាស់ឆត្រយោង នៅវេលាម៉ោង 03:40 ថ្ងៃទី 22 កុម្ភៈ ម៉ោងនៅកម្ពុជា។

យោងតាម Space កាប៊ីនយានពីបេសកកម្ម W-1 របស់ក្រុមហ៊ុន Varda Space Industries ចុះចតពីលើតំបន់ភាគខាងជើងរបស់រដ្ឋ Utah កាលពីល្ងាចថ្ងៃទី 21 កុម្ភៈ នាំមកជាមួយនូវធាតុរាវរបស់ឱសថប្រឆាំងវីរុសដែលអភិវឌ្ឍនៅលើគន្លងតារាវិថីផែនដី។ ជោគជ័យនេះធ្វើឱ្យ Varda ក្លាយជាក្រុមហ៊ុនទីបីដែលបញ្ជាឱ្យយានអវកាសត្រឡប់មកវិញប្រកបដោយសុវត្ថិភាព។ ក្រុមហ៊ុនទីមួយ និងទីពីរដែលបានទទួលជោគជ័យដូចគ្នានេះគឺ SpaceX ដែលមានកាប៊ីនយាន Dragon និង Boeing ដែលមានកាប៊ីនយាន Starliner។

Varda បានរៀបគម្រោងក្លាយជាក្រុមហ៊ុនធំមួយដែលផលិតនៅខាងក្រៅផែនដី។ «ការចាត់ចែងវត្ថុធាតុក្នុងបរិស្ថានមានទំនាញផែនដីតិចបំផុត ផ្ដល់នូវបរិស្ថានពិសេសដែលនៅលើផែនដីមិនមាន។ ផលប្រយោជន៍ភាគច្រើនគឺបានមកពីការមិនមានបាតុភូតចរន្តជាដើមនៅក្នុងវត្ថុធាតុរាវ ដោយសារទំនាញផែនដី ក៏ដូចជាលទ្ធភាពកកើតរចនាសម្ព័ន្ធល្អជាង ដោយសារការថយចុះនៃសម្ពាធ» ក្រុមហ៊ុនខាងលើពន្យល់ដូច្នេះ។

ក្រោយពីការចុះចត កាប៊ីនយានអវកាសនេះនឹងត្រូវបាននាំយកទៅកាន់មូលដ្ឋានរបស់ Varda នៅ Los Angeles ដើម្បីវិភាគ។ ទិន្នន័យដែលប្រមូលបានពីបេសកកម្មនេះនឹងត្រូវបានចែករំលែកជាមួយនឹងទ័ពអាកាសអាម៉េរិក និងណាសា ទៅតាមកិច្ចព្រមព្រៀងរវាងស្ថាប័នទាំងនេះ៕

February 22, 2024

សិង្ហបុរី បង្ហើបឱ្យដឹងពីវិធីអញ្ជើញ Taylor Swift មកបើកខនសឺតផ្ដាច់មុខនៅអាស៊ីអាគ្នេយ៍

សិង្ហបុរីចំណាយប្រាក់យ៉ាងច្រើនដើម្បីបញ្ចុះបញ្ចូលកំពូលតារាចម្រៀង Taylor Swift មកបើកខនសឺននៅប្រទេសនេះ ដែលក្លាយជាទីសំចតតែមួយគត់របស់នាងនៅតំបន់អាស៊ីអាគ្នេយ៍។

«ដំណើរសម្ដែងនេះអាចនាំមកនូវផលប្រយោជន៍ច្រើនដល់សេដ្ឋកិច្ចសិង្ហបុរី…។ នេះគឺជាអ្វីដែលបានកើតឡើងនៅតាមបណ្ដាទីក្រុងដែល Taylor Swift ធ្លាប់បានទៅសម្ដែង» ក្រសួងវប្បធម៌ និងទេសចរណ៍សិង្ហបុរី ប្រកាលកាលពីថ្ងៃទី 20 កុម្ភៈដូច្នេះ។

ក្រសួងនេះបានឱ្យដឹងថា បានធ្វើការជាមួយ AEG Presents ដែលជាស្ថាប័នប្រារព្ធកម្មវិធី Eras Tour របស់ Taylor Swift ដើម្បីបញ្ចុះបញ្ចូលតារាចម្រៀងនេះមកសម្ដែងនៅសិង្ហបុរី។ ក្រសួងនេះបានឱ្យដឹងថា បានចំណាយប្រាក់ឧបត្ថម្ភសម្រាប់ Taylor Swift ប៉ុន្តែមិនបានបង្ហើបឱ្យដឹងអំពីតួលេខជាក់លាក់។

កាលពីសប្ដាហ៍កន្លង នាយករដ្ឋមន្ត្រីថៃ លោក Srettha Thavisin បានថ្លែងនៅក្នុងវេទិកាជំនួញថា សិង្ហបុរីបានចំណាយប្រាក់សម្រាប់ Taylor 100 លានបាត (ជាង 2.7 លានដុល្លារអាម៉េរិក) សម្រាប់ការសម្ដែងមួយយប់នៅប្រទេសនេះ អមនឹងលក្ខខណ្ឌ «សិង្ហបុរីត្រូវតែជាទីសំចតតែមួយគត់របស់តារាចម្រៀងស្រីរូបនេះនៅអាស៊ីអាគ្នេយ៍»។ ក៏ប៉ុន្តែ រដ្ឋាភិបាលសិង្ហបុរីមិនទាន់មានការអធិប្បាយអ្វីនៅឡើយ ទាក់ទងនឹងការលើកឡើងរបស់នាយករដ្ឋមន្ត្រីថៃ។

ដំណើរសម្ដែងរបស់ Taylor swift នៅសិង្ហបុរី នឹងអូសបន្លាយពេល 6 ថ្ងៃ ចាប់ពីថ្ងៃទី 02 ដល់ទី 09 ខែមីនា ឆ្នាំ 2024។ សំបុត្រទាំង 300,000 សន្លឹកសម្រាប់ទស្សនាការសម្ដែង 6 យប់ ត្រូវបានលក់អស់គ្មានសល់។ តម្លៃសំបុត្រពិសេស (VIP) គឺជាង 900 ដុល្លារអាម៉េរិក។

Eras Tour របស់ Taylor បានចាប់ផ្ដើមពីខែមីនាឆ្នាំ 2023 ហើយគ្រោងនឹងបញ្ចប់នៅក្នុងខែធ្នូឆ្នាំ 2024 ក្នុងនោះមានការសម្ដែងចំនួន 151 យប់។ ក្នុងការសម្ដែងមួយយប់ មានទស្សនិកជនប្រហែល 72,000 នាក់ ដែលគ្រោងនឹងរកបានចំណូល 17 លានដុល្លារអាម៉េរិក៕

February 21, 2024

Tag: តារា