ដី - La Reine Media

យន្តហោះអវកាសអាម៉េរិកលេចមុខមុនជើងហោះហើរដំបូង

យន្តហោះអវកាស Dream Chaser ដែលអាចប្រើប្រាស់ឡើងវិញបានច្រើនដង និងអាចផ្ទុកទំនិញបាន 5,215 គីឡូក្រាម ត្រូវបានបង្ហាញនៅមុនបេសកកម្មហោះទៅកាន់ស្ថានីយអវកាសអន្តរជាតិ (ISS) ជាលើកដំបូង នៅចុងឆ្នាំនេះ។

ទីភ្នាក់ងារអវកាសអាម៉េរិក (ណាសា) និងក្រុមហ៊ុន Sierra Space នៅ Colorado កាលពីថ្ងៃទី 01 កុម្ភៈ 2024 បានអញ្ជើញក្រុមអ្នកយកព័ត៌មានទៅទស្សនា Dream Chaser ដោយផ្ទាល់។ នេះបើតាមទំព័រសារព័ត៌មាន Space។

ព្រឹត្តិការណ៍នេះកើតឡើងនៅក្នុងមូលដ្ឋានធ្វើតេស្ត Neil Armstrong របស់ណាសា នៅ Sandusky។ យន្តហោះអវកាស Dream Chaser និងម៉ូឌុលដឹកទំនិញដែលមានរហ័សនាមថា «Tenacity» និង «Shooting Star» ត្រូវបានដំឡើងបញ្ឈរត្រង់ដូចពេលត្រៀមបាញ់បង្ហោះ។ យានមួយគូនេះមានកម្ពស់ 16.8 ម៉ែត្រ ដែលប្រហាក់ប្រហែលនឹងរថយន្តដឹកសិស្សសាលាខ្នាតធំ។

ជើងហោះហើរដំបូងរបស់ Tenacity នឹងដឹកទំនិញរបស់ណាសា ឡើងទៅកាន់ ISS។ ក៏ប៉ុន្តែ មុនពេលហោះហើរជើងដំបូង Tenacity និង Shooting Star នឹងត្រូវឆ្លងកាត់ការធ្វើតេស្តជាច្រើនទៀតនៅ Sandusky។

តាមផែនការ Shooting Star នឹងឆេះខ្ទេចនៅក្នុងបរិយាកាសផែនដី បន្ទាប់ពីបានបំពេញភារកិច្ចតែមួយលើកគត់។ ចំណែក Tenacity នឹងចុះចតលើផែនដី ហើយត្រៀមសម្រាប់បេសកកម្មបន្ទាប់។ យន្តហោះអវកាស Tenacity ត្រូវបានអភិវឌ្ឍឡើងដើម្បីអាចហោះហើរបាន 15 ជើង។ យាននេះនឹងដឹកទំនិញជាង 3,540 គីឡូក្រាម នៅក្នុងជើងហោះហើរដំបូង បើទោះជាវាអាចដឹកបានរហូតដល់ 5,215 គីឡូក្រាម។ សំរាមជាង 3,950 គីឡូក្រាម អាចនឹងត្រូវបានទម្លាក់ចោលពីម៉ូឌុលដឹកទំនិញរបស់វា នៅក្នុងពេលហោះត្រឡប់មកកាន់ផែនដី។

តាមគម្រោង Tenacity និង Shooting Star នឹងត្រូវបានបាញ់បង្ហោះនៅពាក់កណ្ដាលដើមឆ្នាំនេះ។ ក្រោយពីបេសកកម្មនេះបានបញ្ចប់ សំណើសុំអាជ្ញាបណ្ណសម្រាប់ប្រព័ន្ធដឹកជញ្ជូននេះក៏នឹងត្រូវបានធ្វើឡើងផងដែរ៕

February 5, 2024

រថភ្លើង «ហោះលើផ្លូវដែក» របស់ចិន បង្កើតបានកំណត់ត្រាល្បឿនថ្មី

សាជីវកម្មឧស្សាហកម្ម និងវិទ្យាសាស្ត្រអវកាសចិន (CASIC) បង្កើតបានកំណត់ត្រាល្បឿនថ្មីរបស់រថភ្លើងអណ្ដែតដើរដោយកម្លាំងមេដែក ឬហៅថា Maglev Train (Maglev ជាពាក្យកាត់របស់ពាក្យ magnetic levitation) បើកផ្លូវសម្រាប់ប្រព័ន្ធរថភ្លើង Hyperloop ល្បឿនមហាលឿន នាពេលអនាគត។

បើទោះជាល្បឿនពិតប្រាកដដែលខ្សែរថភ្លើងនេះសម្រេចបានគឺជាព័ត៌មានសម្ងាត់ ប៉ុន្តែ CASIC ឱ្យដឹងថា ពួកគេបានឈានដល់ជំហានដ៏សំខាន់នៅក្នុងការធ្វើតេស្តនាពេលថ្មីៗនេះ។ នេះបើតាម Sun ចុះផ្សាយកាលពីថ្ងៃទី 22 កុម្ភៈ 2024។

យោងតាម CASIC នេះគឺជាលើកដំបូងដែលរថភ្លើង Maglev ឈានដល់កម្រិតអណ្ដែតស្ថិរភាព នៅពេលផ្លាស់ទីក្នុងបំពង់សុញ្ញកាសកម្រិតទាប ដោយប្រើប្រាស់ផ្លូវរថភ្លើងសម្រាប់ការពិសោធ ប្រវែង 2 គីឡូម៉ែត្រ ដែលស្ថាបនារួចរាល់កាលពីខែវិច្ឆិកា 2023។ CASIC បង្ហើបឱ្យដឹងថា លទ្ធផលបានបំបែកកំណត់ត្រាមុននោះ (623 គីឡូម៉ែត្រ/ម៉ោង) របស់រថភ្លើង Maglev មួយខ្សែដែលធ្វើដំណើរក្នុងបរិស្ថានធម្មតាកាលពីខែតុលា 2023។

ទូរថភ្លើងដែលត្រូវបានធ្វើតេស្តលើផ្លូវដែកសុញ្ញកាសកម្រិតទាប

បច្ចេកវិទ្យា Maglev ជួយឱ្យរថភ្លើងអណ្ដែតពីលើផ្លូវដែក លុបបំបាត់ភាពកកិតនៅពេលធ្វើដំណើរតាមបំពង់សុញ្ញកាសកម្រិតទាប។ ស្ថានភាពក្បែរសុញ្ញកាស (ស្ទើរតែគ្មានខ្យល់ ឬម៉ូលេគុល) កាត់បន្ថយកម្លាំងកកិតរបស់ខ្យល់ បង្កើតបានជា «ជើងហោះហើរទាបក្បែរដី» ក្នុងល្បឿនលឿនខ្លាំង។

February 3, 2024

យានចុះចតលើឋានព្រះចន្ទរបស់ជប៉ុន ថតយករូបភាពចុងក្រោយ

យានអវកាស SLIM នឹងឆ្លងកាត់រាត្រីត្រជាក់ដ៏វែងនៅលើឋានព្រះចន្ទ ដោយការស្ថិតនៅស្ងៀមមួយកន្លែង ហើយប្រហែលជាមិនអាចដំណើរការឡើងវិញបាន នាពេលខាងមុខ។

យានចុះចត SLIM របស់ប្រទេសជប៉ុន បានអស់ថាមពលមុនពេលរាត្រីត្រជាក់លើឋានព្រះចន្ទចូលមកបញ្ចប់បេសកកម្ម ប៉ុន្តែវានៅតែអាចបញ្ជូនរូបថតចុងក្រោយមួយចំនួន រួមនឹងទិន្នន័យវិទ្យាសាស្ត្រ មកកាន់ផែនដីដល់ពេល។ នេះបើតាម Space ចុះផ្សាយកាលពីថ្ងៃទី 01 កុម្ភៈ 2024។

SLIM (Smart Lander for Investigating Moon) បានជោគជ័យក្នុងការចុះចតនៅលើឋានព្រះចន្ទកាលពីថ្ងៃទី 19 មករា 2024 បើទោះផ្ទាំងសូឡាជួបបញ្ហា ធ្វើឱ្យយាននេះត្រូវផ្អាកសកម្មភាពលើឋានព្រះចន្ទជាបណ្ដោះអាសន្ន។ ប៉ុន្តែ SLIM បានដំណើរការឡើងវិញ បន្ទាប់ពីការចុះចតបានជិតដប់ថ្ងៃ នៅពេលព្រះអាទិត្យបានជះពន្លឺមកលើផ្ទាំងសូឡារបស់វា។

អង្គការស្រាវជ្រាវអវកាសជប៉ុន (JAXA) បានចែករំលែករូបថតចុងក្រោយដែលបានពីយាន SLIM កាលពីថ្ងៃទី 31 មករា។ ពួកគេក៏បានបញ្ជាក់ថា យាននេះបានឈានដល់ស្ថានភាពដេកស្ងៀមដូចការគ្រោងទុក។ JAXA នឹងត្រូវរង់ចាំមួយរាត្រីនៅលើឋានព្រះចន្ទ ដែលប្រហែលនឹង 14.5 ថ្ងៃនៅលើផែនដី រួមនឹងលក្ខខណ្ឌកម្ដៅព្រះអាទិត្យនៅថ្ងៃបន្ទាប់ ដែលចាប់ផ្ដើមពីថ្ងៃទី 15 កុម្ភៈ មុនពេល SLIM អាចភ្ញាក់ខ្លួនជាថ្មី។ សីតុណ្ហភាពពេលយប់នៅលើឋានព្រះចន្ទគឺប្រហែល -130 អង្សាសេ។

រូបភាពដែល SLIM បានថតពេលចុះចត (ឆ្វេង) និងពេលដំណើរការឡើងវិញ

ក៏ប៉ុន្តែ បើទោះ SLIM អាច ឬមិនអាចដឹងខ្លួនជាថ្មី យាននេះក៏បានបំពេញភារកិច្ចទាំងស្រុងដោយជោគជ័យរួចហើយ ក្នុងនោះមានដូចជា ការចុះចតត្រូវតាមផែនការ ការដាក់ពង្រាយរ៉ូបូតខ្នាតតូចចំនួនពីរគ្រឿង និងប្រមូលបានទិន្នន័យផ្នែកវិទ្យាសាស្ត្រជាច្រើនជាដើម៕

February 2, 2024

អ្នកជំនួញបោះទុនជាង 187 លានដុល្លារ វិនិយោគនៅកម្ពុជា ក្នុងខែមករា ឆ្នាំ 2024

គម្រោងថ្មី និងគម្រោងពង្រីកផលិតកម្មចំនួន 32 គម្រោង ដែលមានទុនវិនិយោគសរុបប្រមាណជាង 187 លានដុល្លារអាម៉េរិក ត្រូវបានអនុម័តដោយក្រុមប្រឹក្សាអភិវឌ្ឍន៍កម្ពុជា នៅក្នុងខែមករា ឆ្នាំ 2024។

ខាងលើនេះគឺជាសេចក្ដីប្រកាសព័ត៌មានរបស់ ក្រុមប្រឹក្សាអភិវឌ្ឍន៍កម្ពុជា (CDC) ចេញផ្សាយនាថ្ងៃទី 01 កុម្ភៈ 2024។

យោងតាមសេចក្ដីប្រកាសនេះ គម្រោងវិនិយោគដែលលេចធ្លោជាងគេប្រចាំខែមករា រួមមាន គម្រោងបង្កើតរោងចក្រផលិតគ្រឿងអេឡិចត្រូនិចនៅស្រុកសំរោង ខេត្តតាកែវ, គម្រោងបង្កើតរោងចក្រផ្គុំដំឡើងម៉ូតូ កង់ រ៉ឺម៉ក (អគ្គិសនី) និងឧបករណ៍បញ្ចូល ឬសាកថ្ម នៅស្រុកកៀនស្វាយ ខេត្តកណ្ដាល, គម្រោងបង្កើតរោងចក្រកែច្នៃអាលុយមីញ៉ូំ ដែក និងទង់ដែង នៅស្រុកគងពិសី ខេត្តកំពង់ស្ពឺ និងគម្រោងបង្កើតរោងចក្រតម្បាញក្រណាត់ និងកាត់ដេរសម្លៀកបំពាក់នៅស្រុកកំពង់សីលា ខេត្តព្រះសីហនុ។

CDC ក៏បានឱ្យដឹងថា នៅក្នុងខែមករាកន្លងទៅ ទុនវិនិយោគប្រមាណ 2.73% មានប្រភពពីក្នុងស្រុក, ជាង 78% មានប្រភពពីប្រទេសចិន, 9.65% មកពីសិង្ហបុរី, 5.34% មកពីសហរដ្ឋអាម៉េរិក និង 3.55% មកពីសាធារណរដ្ឋកូរ៉េ។

គម្រោងវិនិយោគចំនួន 32 គម្រោង ដែលមានទុនវិនិយោគសរុបប្រមាណជាង 187 លានដុល្លារអាម៉េរិក និងអាចបង្កើតការងារបានប្រមាណជិត 29 ពាន់កន្លែងនេះ គឺសុទ្ធតែស្ថិតនៅក្នុងវិស័យឧស្សាហកម្ម៕

February 1, 2024

យន្តហោះអ៊ីដ្រូសែនរបស់ចិន បានទទួលជោគជ័យក្នុងការហោះហើរជើងដំបូង

កំណែគំរូនៃយន្តហោះអ៊ីដ្រូសែនដែលក្រុមវិស្វករចិនអភិវឌ្ឍ មានល្បឿន 180 គីឡូម៉ែត្រ/ម៉ោង និងមានរំញ័រតិចជាង បើធៀបនឹងបណ្ដាយន្តហោះដែលមានល្បឿនប្រហាក់ប្រហែលនេះ។

យន្តហោះគំរូដែលប្រើប្រាស់ម៉ាស៊ីនចំហេះក្នុងអ៊ីដ្រូសែន 4 កៅអី របស់ចិន បានបញ្ចប់ជើងហោះហើរដំបូងដោយជោគជ័យ នៅលើទឹកដីនៃខេត្ត Liaoning ភាគឦសានប្រទេសនេះកាលពីថ្ងៃទី 29 មករា។ យោងតាមអ្នកបើកបរ Xu Xiaoben នៅពេលស្ថិតលើកម្ពស់ 200 ម៉ែត្រ យន្តហោះនេះមានកម្រិតរំញ័រអាចទទួលយកបាន និងមានប្រសិទ្ធភាពខ្ពស់។

យន្តហោះនេះមានបណ្ដោយប្រវែង 8.2 ម៉ែត្រ និងអាចផ្ទុកអ៊ីដ្រូសែនសម្ពាធខ្ពស់រហូតដល់ 4.5 គីឡូក្រាម។ ល្បឿនរបស់វាគឺប្រហែល 180 គីឡូម៉ែត្រក្នុងមួយម៉ោង។ ថាមពលរបស់ម៉ាស៊ីនឈានដល់ 120 គីឡូវ៉ាត់ ជួយឱ្យយន្តហោះអាចហោះឡើង និងចុះចតនៅលើព្រលានយន្តហោះភាគច្រើន ក៏ដូចជាអាចដំណើរការរៀងរាល់ថ្ងៃ។

យន្តហោះគំរូនេះនឹងត្រូវបានបង្ហាញនៅក្នុងពិព័រណ៍អាកាសចរណ៍ 2024AERO ក្នុងប្រទេសអាល្លឺម៉ង់ នៅក្នុងខែមេសាខាងមុខ។ នេះគឺជាយន្តហោះអាចប្រើប្រាស់អាកាសយានដ្ឋានរួម និងដំណើរការដោយអ៊ីដ្រូសែនដំបូងដែលចិនអភិវឌ្ឍដោយខ្លួនឯង៕

February 1, 2024

IMF ថា សេដ្ឋកិច្ចទូទាំងពិភពលោក បាន «ចាកឆ្ងាយពីសេណារីយ៉ូវិបត្តិ»

មូលនិធិរូបិយវត្ថុអន្តរជាតិ (IMF) មានសុទិដ្ឋិនិយមជាមួយនឹងសេដ្ឋកិច្ចពិភពលោកនាឆ្នាំនេះ ដោយសារតែកំណើននៃការប្រើប្រាស់ ការងារ និងបណ្ដាញផ្គត់ផ្គង់មានភាពប្រសើរឡើង។

ក្នុងរបាយការណ៍ធ្វើបច្ចុប្បន្នភាពស្ដីពីទស្សនវិស័យសេដ្ឋកិច្ចសកល ដែលប្រកាសកាលពីថ្ងៃទី 30 មករា 2024 IMF បានបង្កើនតួលេខនៃការព្យាករណ៍អំពីកំណើនសេដ្ឋកិច្ចពិភពលោក។ យោងតាមរបាយការណ៍នេះ ផលិតផលក្នុងស្រុកសរុប (GDP) សកល អាចកើន 3.1% ក្នុងឆ្នាំ 2024 កើន 0.2 ពិន្ទុភាគរយ បើធៀបនឹងការព្យាករដែលលើកឡើងកាលពីខែតុលា 2023។

ការព្យាករណ៍អំពីកំណើនសេដ្ឋកិច្ចសកលសម្រាប់ឆ្នាំ 2025 គឺ 3.2% ពោលគឺមិនមានការប្រែប្រួល។ ដូច្នេះ កំណើននៅតែក្រោមកម្រិតមធ្យមភាគនៃដំណាក់កាលឆ្នាំ 2000-2019 ដែលកើន 3.8%។

ចំណែកពាណិជ្ជកម្មវិញ ត្រូវបានព្យាករថា នឹងកើន 3.3% ក្នុងឆ្នាំនេះ និង 3.6% ក្នុងឆ្នាំ 2025។ ភាគរយនេះសុទ្ធតែនៅក្រោមកម្រិតមធ្យមគឺ 4.9% ដោយសារតែសម្ពោធពីរនាំងពាណិជ្ជកម្មថ្មីនានាដែលបាន និងកំពុងអនុវត្តនៅទូទាំងពិភពលោក។

IMF រក្សាការតួលេខ 5.8% នៃការព្យាករអំពីអតិផរណាសកលនៅក្នុងឆ្នាំនេះ និងថយចុះនៅត្រឹម 4.4% ក្នុងឆ្នាំ 2025។

យោងតាម Reuters GDP របស់សហរដ្ឋអាម៉េរិក ត្រូវបានព្យាករថា នឹងមានកំណើន 2.1% ក្នុងឆ្នាំ 2024 ខណៈ GDP ប្រទេសចិនគឺអាចមានកំណើន 4.6%៕

January 31, 2024

គម្រោងព្រះពុទ្ធប្បដិមាខ្ពស់ជាងគេនៅកម្ពុជា ទទួលបានការនិមន្តមកទតពីព្រះប្រធានកិត្តិយសនៃសម្ព័ន្ធពុទ្ធសាសនិកពិភពលោក

ព្រះប្រធានកិត្តិយសសម្ព័ន្ធពុទ្ធសាសនិកពិភពលោក World Alliance of Buddhists – WAB កាលពីពេលថ្មីៗនេះ បាននិមន្តមកពីប្រទេសភូមា ដើម្បីទតការដ្ឋានសាងសង់សំណង់ ព្រះពុទ្ធប្បដិមា ដែលខ្ពស់ជាងគេបង្អស់នៅកម្ពុជា។

យោងតាមសមាគមឧកញ៉ាកម្ពុជា អ្នកឧកញ៉ា សុខ គង់ ទីប្រឹក្សាជាន់ខ្ពស់នៃសមាគមឧកញ៉ាកម្ពុជា រួមនឹងឧកញ៉ា និងបុគ្គលល្បីឈ្មោះមួយចំនួនទៀត បានអញ្ជើញទទួលបដិសណ្ឋារកិច្ចចំពោះការនិមន្តមកដល់របស់សម្តេចសង្ឃព្រះនាម Ven. Sayadaw Pandawontha (Aungzabu) Mahasadhamajotikadaja ព្រះប្រធានកិត្តិយសសម្ព័ន្ធពុទ្ធសាសនិកពិភពលោក World Alliance of Buddhists – WAB និមន្តមកពីប្រទេសភូមា (មីយ៉ាន់ម៉ា) ដើម្បីទតការដ្ឋានសាងសង់សំណង់ ព្រះពុទ្ធប្បដិមាកម្ពស់ 108 ម៉ែត្រ នៅលើភ្នំបូកគោ។

គម្រោងសាងសង់ព្រះពុទ្ធប្បដិមាកម្ពស់ 108 ម៉ែត្រ នៅលើខ្នងភ្នំបូកគោ ស្ថិតនៅក្នុងឧទ្យានជាតិព្រះមុនីវង្ស «បូកគោ» នេះ ជាគំនិតផ្តួចផ្តើមរបស់អ្នកឧកញ៉ា សុខ គង់។ ព្រះពុទ្ធប្បដិមានេះ នឹងខ្ពស់ជាងគេនៅកម្ពុជាហើយក៏នឹងស្ថិតក្នុងចំណោមព្រះពុទ្ធប្បដិមាខ្ពស់ៗនៅលើពិភពលោក។ នេះបើតាមទំព័រ Preahputhpadima108monbokor។

ទំព័រ Preahputhpadima108monbokor ឱ្យដឹងថា ព្រះពុទ្ធប្បដិមានេះមានទម្រង់ជា ព្រះពុទ្ធមារវិជ័យ ឬ ផ្ចាញ់មារនៃរចនាប័ទ្មបាយ័ន ដែលជារចនាប័ទ្មកំពូលនៃព្រះពុទ្ធសាសនាក្នុងរជ្ជកាលព្រះបាទជ័យវ័រ្មនទី 7 នាសតវត្សរ៍ទី 13។

ព្រះពុទ្ធប្បដិមានេះ នឹងសាងសង់អំពីបេតុងអាម៉េ មានពណ៌មាស បែរព្រះភក្រ្តទៅទិសខាងកើត មានកម្ពស់108 ម៉ែត្រ ពីនីវ៉ូសូន្យនៃខឿនផ្ទាល់ដីដល់កំពូលព្រះមោលី ដែលតំណាងមង្គលទាំង 108 របស់ព្រះអង្គ ទ្រង់គង់ភ្នែននៅលើបល្ល័ងផ្កាឈូករាងរង្វង់(វដ្តសង្ខារ) ដែលទម្រង់ក្បាច់រចនាបល្ល័ងនេះ យកលំនាំតាមផ្នែកមួយរបស់សសរពេជ្រប្រាសាទដំរីក្រាបនៃរចនាប័ទ្មគូលែន ក្នុងរជ្ជកាលព្រះបាទជ័យវ័រ្មនទី 2 នាសតវត្សរ៍ទី 9។

ចំពោះខឿនជាន់ទី 1 មានក្តារបែន ឬ រានហាលនៅចំពីមុខ សម្រាប់ប្រារព្ធពិធីសាសនា ហើយមានព្រះពុទ្ធរូប 7 អង្គ ព្រះអសីតិសាវ័ក 5 អង្គ និងព្រះ 2 អង្គទៀត សរុបចំនួន 12 អង្គ (តំណាងឱ្យខែឆ្នាំទាំង 12) គង់ក្នុងបុស្បុក តម្កល់ជុំវិញព្រះពុទ្ធប្បដិមាអង្គធំ និងមានជណ្តើរចំនួន 8 (តំណាងឱ្យទិសទាំង 8 និងអរិយមគ្គទាំង 8) សម្រាប់ឡើងឆ្ពោះទៅកាន់ទីសក្ការៈនៃព្រះពុទ្ធប្បដិមា។

ជារួម គម្រោងសាងសង់ព្រះពុទ្ធប្បដិមាដែលនឹងត្រូវចំណាយពេលវេលាសាងសង់ប្រមាណ 4 ឆ្នាំនេះ គឺជាការរក្សានូវអត្តសញ្ញាណជាតិនៃវប្បធម៌សាសនា ដោយឈរលើមូលដ្ឋានរក្សាចាស់ បង្កើតថ្មី៕

January 30, 2024

ជប៉ុនប្រកាសថា យាន SLIM នៅលើឋានព្រះចន្ទបានដំណើរការឡើងវិញ

យានចុះចតលើឋានព្រះចន្ទ SLIM របស់ប្រទេសជប៉ុន ដំណើរការឡើងវិញ និងបានថតរូបភាពថ្មមួយផ្ទាំងដែលស្ថិតនៅក្បែរនោះ កាលពីថ្ងៃទី 28 មករា 2024។

ក្រោយពីបានចុះចតលើឋានព្រះចន្ទកាលពីថ្ងៃទី 20 មករា 2024 អង្គការស្រាវជ្រាវអវកាសជប៉ុន (JAXA) ប្រកាសថា SLIM មានបញ្ហាប្រព័ន្ធសូឡា នាំឱ្យយានចុះចតរបស់ពួកគេមិនអាចផលិតអគ្គិសនី។ ក៏ប៉ុន្តែ JAXA បានភ្ជាប់ទំនាក់ទំនងជាមួយ SLIM ដោយជោគជ័យ និងបើកដំណើរការយាននេះឡើងវិញ។ នេះបើតាមប្រកាសរបស់ JAXA នាថ្ងៃនេះ។ JAXA ក៏បានចែករំលែករូបថតមួយសន្លឹកដែលបង្ហាញពីថ្មមួយផ្ទាំងនៅក្បែរយាន SLIM ផងដែរ។

យានអវកាស SLIM ឬហៅថា Moon Sniper បានចុះចតលើឋានព្រះចន្ទដោយជោគជ័យកាលពីវេលាម៉ោង 22 និង 20 នាទី ថ្ងៃទី 19 មករា 2024 ជួយឱ្យជប៉ុនក្លាយជាប្រទេសទីប្រាំដែលមានយានធ្វើសកម្មភាពនៅលើទីឋានរណបធម្មជាតិរបស់ផែនដី បន្ទាប់ពី សហរដ្ឋអាម៉េរិក សូវៀត ចិន និងឥណ្ឌា។

បច្ចុប្បន្ន ការបញ្ជូនយានទៅចុះចតលើឋានព្រះចន្ទ កំពុងក្លាយជារឿងប្រកួតប្រជែងមួយលើពិភពលោក។ ប្រទេសរុស្ស៊ី កូរ៉េខាងត្បូង និងអេមីរ៉ាតអារ៉ាប់រួម ក៏កំពុងរកវិធីបញ្ជូនយានទៅចុះចតលើឋានព្រះចន្ទ។ ក្នុងខែមករានេះ យានចុះចតលើឋានព្រះចន្ទ Peregrine របស់ក្រុមហ៊ុនអាម៉េរិក Astrobotic ជួបបញ្ហាលេចធ្លាយឥន្ធនៈ បន្ទាប់ពីបានហោះឡើង នាំឱ្យបេសកកម្មរបស់វាត្រូវបរាជ័យ។ ចំណែក NASA វិញក៏បានពន្យារពេលចំពោះគម្រោងនាំមនុស្សឡើងទៅជាន់ដីព្រះចន្ទនៅក្នុងកម្មវិធី Artemis ផងដែរ៕

January 29, 2024

រូបភាពដំបូងៗរបស់យានអវកាសជប៉ុននៅលើឋានព្រះចន្ទ

យានចុះចត SLIM បានទទួលជោគជ័យក្នុងការចុះចតយ៉ាងត្រឹមត្រូវនៅលើផ្ទៃនៃឋានព្រះចន្ទ និងបានបញ្ជូនទិន្នន័យមកកាន់ផែនដី បើទោះជួបបញ្ហាផ្ទាំងសូឡាមិនផលិតអគ្គិសនី និងត្រូវផ្អាកដំណើរការបណ្ដោះអាសន្ន។

អង្គការស្រាវជ្រាវអវកាសជប៉ុន (JAXA) នាថ្ងៃនេះបានប្រកាសថា យាន SLIM បានចុះចតនៅចម្ងាយប្រហែល 55 ម៉ែត្រប៉ុណ្ណោះ ពីទីតាំងដែលបានកំណត់ ព្រមទាំងបានប្រកាសបង្ហាញរូបភាពដំបូងៗមួយចំនួនពីបេសកកម្មនេះ។

ក្នុងចំណោមរូបថតដំបូងៗដែល JAXA បានប្រកាស រូបដែលត្រូវបានថតដោយកាមេរ៉ា SORA-Q បង្ហាញពីស្ថានភាពរបស់ SLIM។ យានចុះចតនេះនៅរក្សាបានទ្រង់ទ្រាយដើម ស្ថិតនៅលើផ្ទៃដីពណ៌ប្រផេះ និងមានដុំថ្មច្រើន ខណៈឯនាយគឺជាជម្រាលភ្នំលើឋានព្រះចន្ទ។

«យោងតាមការគណនាបច្ចុប្បន្ន យើងកំពុងត្រៀមសម្រាប់ការតភ្ជាប់សកម្មភាពរបស់យានចុះចតនេះប្រហែលនៅថ្ងៃទី 01 កុម្ភៈ» JAXA ឱ្យដឹងដូច្នេះ។

យានអវកាស SLIM ឬហៅថា Moon Sniper បានចុះចតលើឋានព្រះចន្ទដោយជោគជ័យកាលពីវេលាម៉ោង 22 និង 20 នាទី ថ្ងៃទី 19 មករា 2024 ជួយឱ្យជប៉ុនក្លាយជាប្រទេសទីប្រាំដែលមានយានធ្វើសកម្មភាពនៅលើទីឋានរណបធម្មជាតិរបស់ផែនដី បើទោះជួបបញ្ហាផ្ទាំងសូឡាមិនផលិតអគ្គិសនី និងត្រូវផ្អាកដំណើរការ បន្ទាប់ពីចុះចតបានតែប៉ុន្មានម៉ោងប៉ុណ្ណោះ៕

January 25, 2024

Hyundai បង្ហាញតាក់ស៊ីហោះ 193 គីឡូម៉ែត្រ/ម៉ោង អាចហោះឡើង-ចុះចតដូចឧទ្ធម្ភាគចក្រ

តាក់ស៊ីហោះគំរូថ្មីរបស់ក្រុមហ៊ុនកូរ៉េខាងត្បូង Hyundai ដែលហោះឡើង និងចុះចតបែបបញ្ឈរត្រង់ ដំណើរការបានស្រួលជាងឆ្ងាយបើធៀបនឹងឧទ្ធម្ភាគចក្រ និងធ្វើដំណើរបានចម្ងាយពី 40 ទៅ 64 គីឡូម៉ែត្រ ក្នុងល្បឿន193 គីឡូម៉ែត្រ/ម៉ោង។

តាក់ស៊ីហោះឡើង ចុះចតបញ្ឈរត្រង់ដែលប្រើប្រាស់អគ្គិសនី (eVTOL) មានកៅអីចំនួនបួន និងត្រូវបានផលិតដោយក្រុមហ៊ុន Supernal របស់ Hyundai ឈ្មោះ SA-2 នេះ នឹងមានវត្តមានក្នុងទីផ្សារចាប់ពីឆ្នាំ 2028 បន្ទាប់ពីបានហោះហើរសាកល្បងនៅចុងឆ្នាំ 2024។ នេះបើតាមការផ្សាយកាលពីថ្ងៃទី 22 មករា របស់ Live Science ដែលបានដកស្រង់សម្ដីរបស់តំណាងនៃក្រុមហ៊ុន Hyundai ដែលបានឱ្យដឹងនៅក្នុងពិព័រណ៍អេឡេចត្រូនិច CES 2024 នាពេលថ្មីៗកន្លងទៅនេះ។

SA-2 ត្រូវបានផលិតឡើងដើម្បីអាចហោះធម្មតាក្នុងល្បឿន 193 គីឡូម៉ែត្រ/ម៉ោង នៅលើកម្ពស់ 457 ម៉ែត្រ និងបញ្ចប់ជើងហោះហើរពី 40 ទៅ 64 គីឡូម៉ែត្រ។ យោងតាមអាជ្ញាធរគ្រប់គ្រងអាកាសចរណ៍សហរដ្ឋអាម៉េរិក (FAA) តាក់ស៊ីហោះនេះបញ្ចេញសំឡេងរំខានតិចជាងឆ្ងាយបើធៀបនឹងឧទ្ធម្ភាគចក្រ។

បច្ចុប្បន្ន Supernal កំពុងរៀបគម្រោងសម្រាប់ការហោះហើរសាកល្បងនៅចុងឆ្នាំនេះ។ ក្រុមហ៊ុនក៏មានគម្រោងដាក់ឯកសារជូន FAA ក្នុងឆ្នាំ 2024 មុនពេលស្នើសុំច្បាប់ហោះហើរពិសេសនៅឆ្នាំ 2025 ខណៈការធ្វើតេស្តលម្អិតបំផុតនឹងចាប់ផ្ដើមនៅដើមឆ្នាំ 2027។ Hyundai មានគោលដៅផលិត SA-2 នៅឆ្នាំ 2028 ប៉ុន្តែការទិញដូរ និងប្រើប្រាស់យន្តហោះអគ្គិសនីនេះក៏អាស្រ័យទៅលើស្ថានភាពច្បាប់ស្ដីពី eVTOL ផងដែរ៕

January 24, 2024

Tag: ដី