ដី - La Reine Media

រ៉ុក្កែតពាណិជ្ជកម្មកម្លាំងខ្លាំងបំផុតរបស់ចិន បាញ់បង្ហោះបានជោគជ័យ

ប្រទេសចិន កាលពីថ្ងៃទី 11 មករា 2024 បានបាញ់បង្ហោះរ៉ុក្កែតឥន្ធនៈរឹង Gravity-1 ដែលមានកម្លាំងរុញច្រាន 600 តោន ចេញពីតំបន់សមុទ្ររបស់ខេត្តសានទុង (Shandong) ដោយជោគជ័យ។

ក្នុងជើងហោះហើរដំបូង រ៉ុក្កែត Gravity-1 ដែលអភិវឌ្ឍដោយក្រុមហ៊ុនអវកាសពាណិជ្ជកម្មចិន Orienspace បាននាំយកផ្កាយរណបឧតុនិយម Yunyao-1 ចំនួន 3 គ្រឿង ឡើងទៅកាន់គន្លងតារាវិថីដោយជោគជ័យ។ ការសម្រេចបាននេះបានជួយឱ្យ Gravity-1 ក្លាយជារ៉ុក្កែតពាណិជ្ជកម្មដែលមានកម្លាំងខ្លាំងបំផុតរបស់ប្រទេសចិន និងជារ៉ុក្កែតដែលប្រើប្រាស់ឥន្ធនៈរឹងដែលមានកម្លាំងខ្លាំងបំផុតដែលធ្លាប់បានទទួលជោគជ័យក្នុងបេសកកម្មអវកាស។

រ៉ុក្កែតនេះមានកម្ពស់ប្រហែល 30 ម៉ែត្រ ខណៈដែលទម្ងន់គឺប្រហែល 400 តោន និងមានសមត្ថភាពរុញច្រាន 600 តោន។ វាអាចនាំយកបន្ទុកប្រហែល 6,500 គីឡូក្រាមឡើងទៅកាន់គន្លងតារាវិថីផែនដីកម្រិតទាប (LEO) ឬ 4,200 គីឡូក្រាមឡើងទៅកាន់គន្លងតារាវិថីសមកាលកម្មព្រះអាទិត្យ (Sun Synchronous Orbit – SSO) ដែលមានកម្ពស់ពីផែនដីប្រហែល 500 គីឡូម៉ែត្រ។

ប្រភេទគន្លងតារាវិថីជុំវិញផែនដី

Gravity-1 អាចនាំយកផ្កាយរណប 30 គ្រឿង ដែលក្នុងមួយគ្រឿងៗមានទម្ងន់ 100 គីឡូក្រាម ឡើងទៅកាន់គន្លងតារាវិថីកម្រិតទាប និងមធ្យម។

យោងតាម Orienspace រ៉ុក្កែតនេះមានបីជាន់សំខាន់ៗ និងប្រព័ន្ធរុញច្រានចំនួនបួន ដែលទាំងអស់សុទ្ធតែទទួលបានថាមពលពីម៉ូទ័រឥន្ធនៈរឹង។ ក្រុមហ៊ុនផលិតនិយាយថា ម៉ូទ័ររបស់ជាន់ទីបីអាចត្រូវបានផ្លាស់ប្ដូរដោយម៉ាស៊ីនម៉ាស៊ូត kerosene និងអុកស៊ីសែន ដើម្បីបង្កើនកម្លាំងដឹកជញ្ជូន៕

January 13, 2024

ក្រសួងសាធារណការ ដាក់ឱ្យប្រើប្រាស់ចំណតផែរណបពហុបំណងចំនួនបីរបស់កំពង់ផែស្វយ័តភ្នំពេញ

(ត្បូងឃ្មុំ)៖ នាព្រឹកថ្ងៃទី 12 មករា 2024 ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូនបានអញ្ជើញជាអធិបតីក្នុងពិធីសម្ពោធបើកឱ្យប្រើប្រាស់ជាផ្លូវការនូវចំណតផែរណបពហុបំណង TS11, UM2 និង LM26 របស់កំពង់ផែស្វយ័តភ្នំពេញ (ក.ស.ភ.) ដោយមានការអញ្ជើញចូលរួមពីសំណាក់ឯកឧត្តម លោកជំទាវ លោក លោកស្រីជាមន្ត្រី និងបុគ្គលិក កម្មករ និយោជិតនៃកំពង់ផែ។

យោងតាមក្រសួងសាធារណការ និងដឹកជញ្ជូន ចំណតផែរណបពហុបំណងទាំង 03 ទីតាំងខាងលើនេះ គឺជាសមិទ្ធផលថ្មីបន្ថែមទៀតរបស់កំពង់ផែស្វយ័តភ្នំពេញ ដែលនឹងបម្រើឱ្យប្រតិបត្តិការផ្ទេរ ផ្ទុកទំនិញ និងលើកដាក់កុងតឺន័រ។

ក្រសួងសាធារណការ បានឱ្យដឹងថា ចំណតផែរណបពហុបំណង TS11 មានទីតាំងស្ថិតនៅសង្កាត់គីឡូម៉ែត្រលេខ6 ខណ្ឌឫស្សីកែវ រាជធានីភ្នំពេញ មានផ្ទៃដីទំហំ 4 ហិកតា ខណៈដែលចំណតផែរណបពហុបំណង UM2 មានទីតាំងស្ថិតនៅ ភូមិដូនម៉ៅលើ ឃុំទន្លេបិទ ស្រុកត្បូងឃ្មុំ ខេត្ត ត្បូងឃ្មុំ មានផ្ទៃដីទំហំ16.3 ហិកតា និងចំណតផែរណបពហុបំណង LM26 មានទីតាំងស្ថិតនៅ ឃុំកោះរកា ស្រុកពាមជរ ខេត្តព្រៃវែង មានផ្ទៃដីទំហំ 18.6 ហិកតា។

គោលបំណងនៃការបង្កើតចំណតផែរណបពហុបំណងទាំងនេះ គឺដើម្បីធ្វើប្រតិបត្តិការផ្ទេរ-ផ្ទុក លើកដាក់ កុងតឺន័រ និងទំនិញរាយ មានដូចជា គ្រឿងសំណង់ ដំឡូងមី ចំណីសត្វ កៅស៊ូ ស្រូវ ផលិតផលកសិផលផ្សេងទៀត។ល។

January 12, 2024

តម្លៃថ្មីសម្រាប់សេវា និងការប្រើប្រាស់ផ្លូវចូល-ចេញអាកាសយានដ្ឋានអន្តរជាតិសៀមរាប-អង្គរ

នាថ្ងៃទី 11 មករា 2024 នេះ អ្នកនាំពាក្យរាជរដ្ឋាភិបាលកម្ពុជា បានចេញសេចក្តីប្រកាសព័ត៌មាន ស្តីពី “ដំណោះស្រាយលើបញ្ហាតម្លៃសេវា ការប្រើប្រាស់ផ្លូវចូល-ចេញអាកាសយានដ្ឋានអន្តរជាតិសៀមរាប-អង្គរ និងតម្លៃចំណតយានយន្ត”។ នេះបើតាមក្រសួងព័ត៌មាន ចុះផ្សាយនៅថ្ងៃនេះ។

សេចក្ដីប្រកាសព័ត៌មានខាងលើ រួមមាន៖

ទីមួយ៖ ក្រុមហ៊ុនបានឯកភាពមិនយកថ្លៃចំណតសម្រាប់ការចូលទៅក្នុងអាកាសយានដ្ឋានអន្តរជាតិសៀមរាប-អង្គរ ក្រោមរយៈពេល 15 នាទី សម្រាប់រថយន្តធុនតូចមិនលើស 7 កៅអី និងរយៈពេល 30 នាទី សម្រាប់ប្រភេទរថយន្តផ្សេងៗទៀត។

ទីពីរ៖ ក្រុមហ៊ុនបានយល់ព្រមបញ្ចុះតម្លៃបន្ថែមទៀត ក្នុងការប្រើប្រាស់ផ្លូវសម្រាប់គ្រប់ប្រភេទយានយន្តដែលមានព័ត៌មានលម្អិតដូចមានភ្ជាប់ក្នុងតារាងខាងក្រោម សម្រាប់រយៈពេលពីរឆ្នាំ (ឆ្នាំ 2024 និងឆ្នាំ 2025)។ ចំពោះតម្លៃថ្មីនេះនឹងត្រូវអនុវត្តចាប់ពីថ្ងៃទី 15 មករា 2024៕

January 11, 2024

ភ្លៀងត្បូងពេជ្រនឹងកើតមានញឹកញាប់ជាងមុននៅក្នុងទីអវកាស

ក្រុមអ្នកវិទ្យាសាស្ត្របានរកឃើញថា ភ្លៀងត្បូងពេជ្រនឹងកើតឡើងញឹកញាប់ជាងមុននៅក្នុងទីអវកាស បន្ទាប់ពីពួកគេបានធ្វើការសិក្សាស្រាវជ្រាវថ្មី ស្ដីពីលក្ខខណ្ឌនៃការកកើតភ្លៀងត្បូងពេជ្រ។

យោងតាម IFL Science ការពិសោធនានានៅក្នុងបន្ទប់ពិសោធន៍បង្ហាញថា ភ្លៀងត្បូងពេជ្រកើតឡើងនៅក្នុងសីតុណ្ហភាព និងសម្ពាធទាបជាង បើធៀបនឹងការពិសោធមុនៗ។

ប្រការខាងលើនេះមានន័យថា ភ្លៀងត្បូងពេជ្រកើតឡើងញឹកញាប់នៅក្នុងអវកាស។ ក្នុងនោះ វាមិនត្រឹមតែកើតនៅក្នុងប្រព័ន្ធព្រះអាទិត្យរបស់មនុស្សនោះទេ ប៉ុន្តែក៏កើតឡើងនៅទីដទៃក្នុងអវកាស។ ភ្លៀងនេះក៏អាចប៉ះពាល់ដល់ដែនទំនាញរបស់ភពនានាផងដែរ៕

January 11, 2024

យានអវកាសសង្កេតមើលព្រះអាទិត្យដំបូងរបស់ឥណ្ឌា ហោះដល់គោលដៅដោយជោគជ័យ

ស្ថានីយសង្កេតព្រះអាទិត្យដំបូងរបស់ប្រទេសឥណ្ឌា បានហោះដល់គន្លងជុំវិញព្រះអាទិត្យដូចបានគ្រោងទុក។ នេះបើតាមអង្គការស្រាវជ្រាវអវកាសឥណ្ឌា (ISRO) ដែលបានប្រកាសកាលពីចុងសប្ដាហ៍កន្លង។

យានអវកាស Aditya-L1 បានហោះដល់ចំណុច Lagrange Point L1 ជាទីតាំងក្នុងអវកាសដែលមានចម្ងាយពីផែនដីប្រហែល 1.5 លានគីឡូម៉ែត្រ និងមើលឃើញព្រះអាទិត្យដោយពុំមានអ្វីមករារាំង។ នេះគឺជាការបើកផ្លូវឱ្យអ្នកវិទ្យាសាស្ត្របង្កើនការស្រាវជ្រាវអំពីព្រះអាទិត្យ-ផែនដី ពិសេសគឺអ្វីៗដែលកើតឡើងដោយសារព្រះអាទិត្យ។

Aditya-L1 ត្រូវបានបាញ់បង្ហោះកាលពីថ្ងៃទី 02 កញ្ញា 2023 បន្ទាប់ពី ISRO បានបញ្ជាឱ្យយានChandrayaan-3 ចុះចតនៅប៉ូលខាងត្បូងរបស់ព្រះចន្ទ កាលពីជិតពីរសប្ដាហ៍មុននោះ។

January 10, 2024

នៅសល់ 92 ថ្ងៃទៀត ស្ពានអាកាសព្រះមុនីវង្ស នឹងបញ្ចប់ការសាងសង់ដំណាក់កាលទីមួយ

(ភ្នំពេញ) ៖ ស្ពានអាកាសព្រះមុនីវង្ស ដែលស្ថិតនៅទីតាំងប្រសព្វគ្នារវាងមហាវិថីព្រះមុនីវង្ស មហាវិថីសម្តេចតេជោ ហ៊ុន សែន (ផ្លូវ 60 ម៉ែត្រ) និងមហាវិថីកងយោធពលខេមរភូមិន្ទ (ផ្លូវ 271) គ្រោងនឹងបញ្ចប់ដំណាក់កាលទីមួយមុនកាលកំណត់រយៈពេល 4 ខែ ពោលគឺនៅសល់ 92 ថ្ងៃទៀត បើរាប់ចាប់ពីថ្ងៃទី 11 ខែមករា 2024។

ស្ពានអាកាសព្រះមុនីវង្សដែលមានកម្ពស់ 2 ជាន់នេះ ត្រូវបានបើកការដ្ឋានសាងសង់កាលពីថ្ងៃទី 31 សីហា 2022។ តាមផែនការ ជំហានទីមួយនៃគម្រោងនេះ នឹងបញ្ចប់មុនចូលឆ្នាំថ្មីប្រពៃណីខ្មែរក្នុងឆ្នាំ 2024 ខណៈដែលជំហានទីពីរនឹងបញ្ចប់មុនបុណ្យចូលឆ្នាំខ្មែរ ក្នុងឆ្នាំ 2025។

ស្ពានអាកាសព្រះមុនីវង្ស សាងសង់ដោយក្រុមហ៊ុនវិនិយោគទុនអាណិកជនកម្ពុជា (OCIC) គ្រោងចំណាយថវិកា 36,775,000 ដុល្លារអាម៉េរិក និងចំណាយពេលសាងសង់ជាង 30 ខែ គ្រោងនឹងបញ្ចប់ដំណាក់កាលទីមួយមុនកាលកំណត់រយៈពេល 4 ខែ ពោលគឺនៅសល់ 92 ថ្ងៃទៀត បើរាប់ចាប់ពីថ្ងៃទី 11 ខែមករា 2024។

បន្ទាប់ពីត្រូវបានដាក់ឱ្យប្រើប្រាស់ ស្ពានអាកាសស្ថិតក្នុងទឹកដីខណ្ឌចំការមន និងខណ្ឌមានជ័យនេះ នឹងរួមចំណែកយ៉ាងធំក្នុងការកាត់បន្ថយស្ថានភាពកកស្ទះចរាចរណ៍នៅរាជធានីភ្នំពេញ៕

January 10, 2024

ភាគហ៊ុនរបស់ក្រុមហ៊ុនផលិតរថយន្តអគ្គិសនីចិន ដាំក្បាលចុះជាង 20%

ក្រោយពីមានព័ត៌មានស្ដីពីអនុប្រធានក្រុមហ៊ុនត្រូវបានចាប់ខ្លួន ភាគហ៊ុន China Evergrande New Energy Vehicle Group ក៏ដាំក្បាលចុះនៅក្នុងការជួញដូរនាថ្ងៃទី 08 មករានេះ។

បន្ទាប់ពីបើកការជួញដូរសម្រាប់ថ្ងៃទី 08 មករា ភាគហ៊ុន China Evergrande New Energy Vehicle Group (Evergrande NEW) ដែលចុះឈ្មោះនៅផ្សារហ៊ុនហុងកុង បានធ្លាក់ថ្លៃរហូរដល់ 23%។ បច្ចុប្បន្ន ភាគរយនេះបានកាត់បន្ថយគម្លាតចុះមកនៅ 8.4%។

ភាគហ៊ុននេះដាំក្បាលចុះ បន្ទាប់ពី Evergrande NEV បានជូនដំណឹងទៅកាន់ស្ថាប័នគ្រប់គ្រងផ្សារមូលបត្រហុងកុងថា អនុប្រធាន Liu Yongzhuo ត្រូវបានចាប់ខ្លួនដើម្បីស៊ើបអង្កេតលើ «ទង្វើដែលសង្ស័យថា ជាការបំពានច្បាប់»។

គ្រាន់តែក្នុងសប្ដាហ៍ដំបូងរបស់ឆ្នាំនេះ ភាគហ៊ុន Evergrande NEV បានដាំក្បាលចុះ 18.6% ក្រោយពីបានប្រកាសលុបចោលគម្រោងលក់ភាគហ៊ុនទៅឱ្យក្រុមហ៊ុនរថយន្ត Dubai NWTN ដែលបច្ចុប្បន្នបានចុះឈ្មោះបញ្ជីនៅផ្សារហ៊ុនអាម៉េរិក។

January 8, 2024

ថៃអនុម័តថវិកាជាតិជាង 101 ពាន់លានដុល្លារ សម្រាប់ឆ្នាំ 2024

សភាជាន់ទាបថៃ កាលពីថ្ងៃទី 05 មករា 2024 បានបោះឆ្នោតអនុម័តយល់ស្របនឹងការអានដំបូងនូវសេចក្ដីស្នើច្បាប់ថវិកាជាតិសម្រាប់ឆ្នាំសារពើពន្ធ 2024 ដែលមានតម្លៃសរុបជាង 101 ពាន់លានដុល្លារអាម៉េរិក ដោយមានការគាំទ្រចំនួន 311 សំឡេង, ប្រឆាំង 177 សំឡេង និងអនុបវាទ 4 សំឡេង។

សភាជាន់ទាបថៃ បានបោះឆ្នោតអនុម័តសេចក្ដីព្រាងច្បាប់ថវិកាជាតិសម្រាប់ឆ្នាំសារពើពន្ធ 2024 ក្រោយពីការជជែកតឹងសរសៃករយៈពេលបីថ្ងៃ (3-5 មករា) រវាងសម្ព័ន្ធភាពបក្សកាន់អំណាច និងបក្សប្រឆាំង។

យោងតាមគោលការណ៍ សេចក្ដីស្នើច្បាប់នេះនឹងត្រូវបានសភាជាន់ទាបថៃពិភាក្សា និងអនុម័តទៅលើការអានខ្លឹមសារជាលើកទីពីរ និងទីបី នៅក្នុងថ្ងៃទី 3 និងទី 4 ខែមេសាខាងមុខ។ ក្រោយមក សេចក្ដីព្រាងច្បាប់នេះនឹងត្រូវបញ្ជូនឡើងទៅកាន់សភាជាន់ខ្ពស់ និងព្រះមហាក្សត្រថៃ ដើម្បីពិនិត្យ អនុម័តនៅក្នុងខែឧសភា 2024។

តាមការគណនា ថវិកាជាតិសម្រាប់ឆ្នាំ 2024 របស់រាជរដ្ឋាភិបាលថៃ មានតម្លៃសរុប 3.48 លានលាន (ទ្រីលាន) បាត (ប្រហែលនឹង 101.46 ពាន់លានដុល្លារអាម៉េរិក) ខណៈដែលប្រភពចំណូលក្នុងឆ្នាំគ្រោងនឹងសម្រេចបាន 2.787 លានលានបាត (ប្រហែល 81.25 ពាន់លានដុល្លារអាម៉េរិក)។

ឆ្នាំសារពើពន្ធ 2024 របស់ប្រទេសថៃ ជាក់ស្ដែងបានចាប់ផ្ដើមពីថ្ងៃទី 01 តុលា 2023។ ការយឺតយ៉ាវនៃការអនុម័តសេចក្ដីស្នើច្បាប់ថវិកាជាតិសម្រាប់ឆ្នាំ 2024 គឺដោយសារផលប៉ះពាល់ពីការបោះឆ្នោតជាតិក្នុងឆ្នាំ 2023 ក៏ដូចជាដំណើរការបង្កើតសភាជាន់ទាប និងរាជរដ្ឋាភិបាល ក្រោយការបោះឆ្នោតនេះ៕

January 6, 2024

ណាសាបង្ហាញគំរូយន្តហោះប្រើថាមពលព្រះអាទិត្យសម្រាប់ភពអង្គារ

យន្តហោះ MAGGIE អាចហោះចម្ងាយ 179 គីឡូម៉ែត្រ នៅលើកម្ពស់ 1,000 ម៉ែត្រ ជួយស្រាវជ្រាវបរិយាកាស និងភូគព្ភសាស្ត្រនៃភពអង្គារ។

ក្រោយពីជោគជ័យរបស់ឧទ្ធម្ភាគចក្រ Ingenuity នៅលើភពអង្គារ ក្រុមអ្នកជំនាញកំពុងឆ្ពោះទៅរកការផលិតយន្តហោះប្រើប្រាស់ថាមពលព្រះអាទិត្យ។ នេះបើតាម Interesting Engineering ចុះផ្សាយកាលពីថ្ងៃទី 05 មករា 2024។ យន្តហោះនេះមានឈ្មោះថា អ្នកស្រាវជ្រាវឆ្លាតវៃលើដី និងលើអាកាសភពអង្គារ (MAGGIE) នេះ ត្រូវបានប្រកាសនៅក្នុងកម្មវិធីគំនិតច្នៃប្រឌិតកម្រិតខ្ពស់របស់ណាសា (NASA Innovative Advanced Concepts – NIAC)។

នេះគឺជាយន្តហោះដែលមានប្រសិទ្ធភាពខ្ពស់ ប្រើប្រាស់ថាមពលព្រះអាទិត្យ អាចហោះនៅក្នុងបរិយាកាសភពអង្គារ។ គំរូយន្តហោះ MAGGIE ដែលស្នើដោយក្រុមហ៊ុនអាកាសចរណ៍អវកាសអាម៉េរិក Coflow Jet អាចស្រាវជ្រាវបរិយាកាសទូទាំងភពអង្គារ។ បច្ចេកវិទ្យា CoFlow Jet (CFJ) អនុញ្ញាតឱ្យយន្តហោះនេះហោះហើរក្នុងបរិយាកាសស្ដើងរបស់ភពក្រហមនេះ។

តាមគម្រោង MAGGIE អាចហោះបាន 179 គីឡូម៉ែត្រ នៅលើកម្ពស់ 1,000 ម៉ែត្រ បន្ទាប់ពីបានបញ្ចូលថាមពលមួយពេញដែលប្រើពេល 7.6 ថ្ងៃនៅលើភពអង្គារ។ យន្តហោះនេះអាចដំណើរការឡើងដល់ 16,048 គីឡូម៉ែត្រនៅក្នុងមួយឆ្នាំនៃភពក្រហម។

តាមផែនការបឋម យន្តហោះនេះនឹងបំពេញភារកិច្ចស្រាវជ្រាវយ៉ាងតិចចំនួនបី ទាក់ទងនឹងបរិយាកាស និងភូគព្ភសាស្ត្រ។ ទិន្នន័យដែលប្រមូលបាន នឹងជួយលើកកម្ពស់ការយល់ដឹងអំពីភពអង្គារ បង្កើនសមត្ថភាពស្រាវជ្រាវក្នុងអនាគត៕

January 6, 2024

ឱកាសល្អសម្រាប់អ្នកជំនួញដែលចង់ពង្រីកអាជីវកម្មនៅខេត្តបាត់ដំបង

ចាប់ពីថ្ងៃទី 14 ដល់ 16 កុម្ភៈ 2024 សភាពាណិជ្ជកម្មកម្ពុជា នឹងរៀបចំដំណើរទស្សនកិច្ចពាណិជ្ជកម្មទៅកាន់ខេត្តបាត់ដំបង ដែលនេះគឺជាឱកាសល្អសម្រាប់អ្នកជំនួញទាំងឡាយណាដែលចង់ពង្រីកអាជីវកម្មទៅកាន់ខេត្តនេះ។

កាលពីថ្ងៃទី 03 មករា 2024 សភាពាណិជ្ជកម្មកម្ពុជា បានចេញសេចក្ដីជូនដំណឹងមួយជាសាធារណៈ ទាក់ទងនឹងដំណើរទស្សនកិច្ចពាណិជ្ជកម្មទៅកាន់ខេត្តបាត់ដំបង ក្នុងបំណងស្វែងយល់ពីសង្វាក់ផលិតកម្មចំណីអាហារ សក្ដានុពលសេដ្ឋកិច្ច កសិកម្ម ទំនាក់ទំនងដៃគូពាណិជ្ជកម្ម និងឱកាសវិនិយោគនានានៅក្នុងខេត្តបាត់ដំបង។

យោងតាមសេចក្ដីជូនដំណឹង ដំណើរទស្សនកិច្ចពាណិជ្ជកម្មនេះនឹងត្រូវធ្វើឡើងរយៈពេលពីរយប់ បីថ្ងៃ គឺចាប់ពីថ្ងៃទី 14 ដល់ 16 កុម្ភៈ 2024។ សភាពាណិជ្ជកម្មកម្ពុជា ក៏បានបញ្ជាក់ថា តម្លៃសំបុត្រសម្រាប់ការចូលរួមដំណើរទស្សនកិច្ចពាណិជ្ជកម្មនេះគឺ 185 ដុល្លារ/ម្នាក់។

January 5, 2024

Tag: ដី