ឈ្មោះ - La Reine Media

ឥណ្ឌូណេស៊ីសម្ពោធដាក់ឱ្យប្រើប្រាស់ផ្លូវដែកល្បឿនលឿនដំបូងអាស៊ីអាគ្នេយ៍

ផ្លូវដែកល្បឿនលឿនដំបូងរបស់ប្រទេសឥណ្ឌូណេស៊ី ជិតបើកទ្វារទទួលអ្នកដំណើរ ដែលនេះនឹងជួយកាត់បន្ថយពេលវេលានៃការធ្វើដំណើររវាងទីក្រុងពីរធំជាងគេបង្អស់របស់ប្រទេសនេះ។

គម្រោងផ្លូវដែកដែលមានតម្លៃ 7.3 ពាន់លានដុល្លារអាម៉េរិកនេះនឹងត្រូវបានសម្ពោធដាក់ឱ្យដំណើរការក្នុងថ្ងៃទី 02 តុលា 2023 ក្រោយពីបានពន្យារពេលច្រើនលើក។ នេះគឺជាមួយផ្នែកនៃគំនិតផ្ដួចផ្ដើមហេដ្ឋារចនាសម្ព័ន្ធខ្សែក្រវាត់ និងផ្លូវ ដែលទទួលបានជំនួយភាគច្រើនពីបណ្ដាក្រុមហ៊ុនរដ្ឋចិន។

«យើងនឹងសម្ពោធនៅថ្ងៃទី 02 តុលា ដោយសារប្រធានាធិបតីជាប់រវល់នៅក្នុងថ្ងៃទី 01 តុលា» រដ្ឋមន្ត្រីក្រសួងគមនាគមន៍ឥណ្ឌូណេស៊ី Budi Karya Sumadi កាលពីថ្ងៃទី 29 កញ្ញា ថ្លែងដូច្នេះ។

ផ្លូវដែកសម្រាប់រថភ្លើងល្បឿនលឿនប្រវែង 138 គីឡូម៉ែត្រ និងមានឈ្មោះថា WHOOSH នេះ តភ្ជាប់រវាងរដ្ឋធានីហ្សាការតា និង Bandung នៅខេត្តជ្វាខាងលិច ដែលជាទីក្រុងធំជាងគេលំដាប់ទីពីររបស់ឥណ្ឌូណេស៊ី និងជាមជ្ឈមណ្ឌលសិល្បៈ វប្បធម៌ដ៏ធំរបស់ឥណ្ឌូណេស៊ី។

រថភ្លើងដែលរត់លើផ្លូវដែក WHOOSH ដំណើរការដោយអគ្គិសនី និងមានល្បឿនប្រហែល 350 គីឡូម៉ែត្រ/ម៉ោង នឹងជួយកាត់បន្ថយពេលវេលាក្នុងការធ្វើដំណើររវាង ហ្សាការតា និង Bandung ពីបីម៉ោងមកនៅក្រោមមួយម៉ោង។ WHOOSH ក៏ជាផ្លូវដែកល្បឿនលឿនដំបូងនៅតំបន់អាស៊ីអាគ្នេយ៍ផងដែរ។

គម្រោងខាងលើនេះត្រូវបានគ្រប់គ្រងដោយក្រុមហ៊ុនបណ្ដាក់ទុនរួម PT Kereta Cepat ឥណ្ឌូណេស៊ី – ចិន (PT KCIC)។ តំណាងក្រុមហ៊ុននេះក៏បានឱ្យដឹងថា ស្ថាប័នពាក់ព័ន្ធកំពុងចរចាអំពីការពង្រីកផ្លូវដែកល្បឿនលឿនទៅកាន់ Surabaya ដែលជាទីក្រុងកំពង់ផែធំរបស់ខេត្តជ្វាខាងកើត។

កិច្ចព្រមព្រៀងអភិវឌ្ឍផ្លូវរថភ្លើងល្បឿនលឿននៅឥណ្ឌូណេស៊ី ត្រូវបានចុះហត្ថលេខាកាលពីឆ្នាំ 2015 និងចាប់ផ្ដើមស្ថាបនាតាំងពីចុងឆ្នាំនោះ។ តាមផែនការដំបូង គម្រោងនេះគ្រោងនឹងត្រូវបានដាក់ឱ្យដំណើរការក្នុងឆ្នាំ 2019 ប៉ុន្តែត្រូវបានពន្យារពេលច្រើនលើកដោយសារតែបញ្ហាកូវីដ-19៕

October 2, 2023

អ្នកវិទ្យាសាស្ត្រប្រើប្រាស់បញ្ញាសិប្បនិម្មិត (AI) ដើម្បីអភិវឌ្ឍថ្នាំព្យាបាលទឹកនោមផ្អែម

ដោយមានជំនួយពីបញ្ហាសិប្បនិម្មិត ក្រុមអ្នកវិទ្យាសាស្ត្រចិនបានបង្កើតឱសថបញ្ចុះទម្ងន់ថ្មីមួយប្រភេទ។ ថ្នាំនេះក៏អាចព្យាបាលជំងឺទឹកនោមផ្អែមកម្រិតពីរផងដែរ។

យោងតាមសារព័ត៌មាន SCMP ឱសថថ្មីដែលត្រូវបានស្រាវជ្រាវ អភិវឌ្ឍដោយក្រុមហ៊ុនឱសថ MindRank ដោយមានជំនួយពីបច្ចេកវិទ្យាបញ្ញាសិប្បនិម្មិត (AI) នេះ បានឈានដល់ការពិសោធន៍លើមនុស្សដំណាក់កាលទីពីរ។ ក្រុមហ៊ុនខាងលើឱ្យដឹងថា ឱសថនេះនឹងត្រូវបានដាក់លក់ក្នុងទីផ្សារលឿនជាងឆ្ងាយបើធៀបនឹងថ្នាំធម្មតា។

ត្រូវបានដាក់ឈ្មោះថា MDR-001 ឱសថនេះដំណើរការតាមរយៈការតភ្ជាប់ peptide-1 ដូច glucaon (GLP-1-R) ដែលជួយឱ្យវាជំរុញការបញ្ចេញអាំងស៊ុយលីនពីលំពែង ដើម្បីកាត់បន្ថយបរិមាណជាតិស្ករក្នុងឈាម និងបញ្ចុះទម្ងន់រាងកាយ។

MDR-001 ទទួលបានជោគជ័យក្នុងការពិសោធលើមនុស្សដំណាក់កាលដំបូង ហើយកាលពីដើមខែកញ្ញា 2023 ក្រុមស្រាវជ្រាវបានប្រើប្រាស់ថ្នាំនេះក្នុងការពិសោធដំណាក់កាលទីពីរ។

MDR-001 គឺជាឱសថដំបូងរបស់ក្រុមហ៊ុនចិន MindRank ដែលត្រូវបានអភិវឌ្ឍដោយមានជំនួយពី AI។ ការប្រើប្រាស់ AI កំពុងតែជួយកាត់បន្ថយពេលវេលានៃការអភិវឌ្ឍ កាត់បន្ថយការចំណាយ ប៉ុន្តែនៅតែមានប្រសិទ្ធភាព និងសុវត្ថិភាព៕

September 30, 2023

ពន្ធលើអចលនទ្រព្យនៅប្រទេសមួយចំនួនក្នុងទ្វីបអាស៊ី

ពន្ធលើអចលនទ្រព្យគឺជាពន្ធមួយប្រភេទដែលបង្ហាញវត្តមានតាំងពីបុរាណរហូតដល់បច្ចុប្បន្ន ហើយតែងតែផ្ដោតទៅលើដីធ្លី និងសំណង់នៅលើដីធ្លី។ តាំងពីបណ្ដាឆ្នាំ 200 មុនគ្រិស្តសករាជ ដល់ឆ្នាំ 300 នៃគ្រិស្តសករាជ ជនជាតិរ៉ូម៉ាំងបានយកពន្ធលើដីធ្លី និងសំណង់នៅលើដី។ បច្ចុប្បន្ន ពន្ធលើអចលនទ្រព្យត្រូវបានអនុវត្តនៅក្នុងប្រទេសជាច្រើនលើពិភពលោក ដោយប្រើប្រាស់រូបមន្ត និងឈ្មោះផ្សេងៗគ្នា មានជាអាទិ៍ ពន្ធលើអចលនទ្រព្យប្រចាំឆ្នាំ ពន្ធលើការផ្ទេរសិទ្ធិកាន់កាប់អចលនទ្រព្យ ពន្ធលើការចុះបញ្ជីអចលនទ្រព្យ ពន្ធមរតក ពន្ធលើអំណោយដែលសំដៅលើអចលនទ្រព្យដែលជាមរតក ឬអំណោយជាដើម។

យោងតាមនិយមន័យដែលកំណត់ដោយមូលនិធិរូបិយវត្ថុអន្តរជាតិ (IMF) និងអង្គការសម្រាប់កិច្ចសហប្រតិបត្តិការសេដ្ឋកិច្ច និងការអភិវឌ្ឍ (OECD) ពន្ធលើអចលនទ្រព្យគឺជាខ្ទង់ប្រាក់ដែលរដ្ឋប្រមូលតាមកាលកំណត់ ឬមិនតាមកាលកំណត់ ទាក់ទងនឹងការប្រើប្រាស់ កាន់កាប់ និងផ្ទេរសិទ្ធិកាន់កាប់អចលនទ្រព្យ។ គោលដៅដែលត្រូវជាប់ពន្ធនេះភាគច្រើនគឺជាផ្ទះ និងដី ប៉ុន្តែ អាចខុសគ្នាខ្លះទៅតាមប្រទេសនីមួយៗ។ ឧទាហេរណ៍ នៅប្រទេសចិន ពន្ធដែលទាក់ទងនឹងអចលនទ្រព្យរួមមាន ពន្ធលើការប្រើប្រាស់ដីក្រុង ពន្ធលើគេហដ្ឋាន ពន្ធលើអចលនទ្រព្យក្នុងក្រុង និងពន្ធលើការប្រើប្រាស់ដីកសិកម្មជាដើម។ នៅប្រទេសថៃ មុនឆ្នាំ 2016 អចលនទ្រព្យដែលជាប់ពន្ធរួមមាន ផ្ទះ ដី និងការអភិវឌ្ឍដីធ្លី។ល។

បច្ចុប្បន្ន ពន្ធលើអចលនទ្រព្យកាន់តែមានតួនាទីសំខាន់នៅក្នុងខ្ទង់ប្រាក់ចំណូលសរុបរបស់ប្រទេសនានា ដោយមានអត្រាជាមធ្យមពី 3 ទៅ 4% បើធៀបនឹងប្រាក់ចំណូលសរុបដែលបានពីពន្ធនៅក្នុងបណ្ដាប្រទេសអភិវឌ្ឍ ខណៈប្រទេសខ្លះដូចជប៉ុនជាដើម អត្រានេះឡើងជិតដល់ 8%។

ខាងក្រោមនេះគឺជាតារាងសមាមាត្រនៃចំណូលបានពីពន្ធលើអចលនទ្រព្យ ធៀបនឹងចំណូលសរុបដែលបានពីពន្ធនៅប្រទេសមួយចំនួនក្នុងទ្វីបអាស៊ី៖

ប្រទេស	2005	2006	2007	2008	2009	2010	2011	2012	2013	2014
ជប៉ុន	7.3	6.8	6.8	7.3	7.9	7.7	7.5	7	6.8	6.4
កូរ៉េខាងត្បូង	2.4	3.1	3.6	3.6	3.2	3.1	3.0	3.0	3.1	3.2
ឥណ្ឌូណេស៊ី	4.3	4.8	4.5	3.6	3.6	3.7	3.1	2.7	2.1	1.8
ម៉ាឡេស៊ី	3.9	4.2	4	3.6	3.9	4	3.5	3.2	3.2	3.4
ហ្វ៊ីលីពីន	3	2.6	2.4	2.4	2.6	2.4	2.5	2.4	2.2	2.2
សិង្ហបុរី	7.1	7.0	6.6	7.6	5.4	6.7	8.5	7.5	8.2	8.0

September 28, 2023

មនុស្សជាតិនឹងអាចត្រូវផុតពូជទាំងស្រុងក្រោយពីជាងពីររយលានឆ្នាំទៀត?

ការផុតពូជដ៏មហាវិនាសរបស់ថនិកសត្វ ក្នុងនោះមានមនុស្សជាតិជាដើម អាចកើតឡើងក្រោយរយៈពេល 250 លានឆ្នាំទៀត នៅពេលអាកាសធាតុប្រែប្រួលទាំងស្រុង។

Alexander Farnsworth ដែលជាបុរាណវិទូប្រចាំសាកលវិទ្យាល័យ Bristol រួមនឹងសហការី ព្យាករថា ថនិកសត្វ រួមទាំងមនុស្សផងដែរ អាចនឹងមានវត្តមានត្រឹមតែ 250 លានឆ្នាំទៀតប៉ុណ្ណោះ ព្រោះតែអាកាសធាតុនឹងប្រែជាគ្រោះថ្នាក់ ដោយសារកត្តាចំនួនបី៖ ព្រះអាទិត្យភ្លឺជាងមុន ភូមិសាស្ត្ររបស់ទ្វីបនានាប្រែប្រួល និងឧស្ម័ន CO2 កើនឡើងដល់កំពូល។

មុននោះ ក្រុមអ្នកវិទ្យាសាស្ត្របានព្យាករថា ព្រះអាទិត្យនឹងកាន់តែភ្លឺជាងមុន ហើយក៏ «លេបយក» ផែនដីបន្ទាប់ពី 7.6 ពាន់លានឆ្នាំទៀត។ ប៉ុន្តែ ជីវិតទំនងជាមិនអាចមានវត្តមានបានយូរដូចនេះឡើយ។ នៅពេលព្រះអាទិត្យបញ្ចេញថាមពលច្រើនជាងមុន បរិយាកាសផែនដីនឹងឡើងកម្ដៅ ធ្វើឱ្យទឹកត្រូវហួត។ ទឹកគឺជាឧស្ម័នផ្ទះកញ្ចក់មួយប្រភេទ ដូច្នេះវានឹងរក្សាកម្ដៅកាន់តែច្រើន។ ពីរពាន់លានឆ្នាំទៀត ផែនដីអាចនឹងឡើងកម្ដៅរហូតដល់ទឹកក្នុងមហាសមុទ្រត្រូវពុះ។

ការសិក្សាស្រាវជ្រាវរបស់ Farnsworth ព្យាករថា មហាទ្វីបថ្មីមួយដែលមានឈ្មោះថា Pangea Ultima នឹងកើតឡើងតាមបណ្ដោយខ្សែអេក្វាទ័រក្រោយរយៈពេល 250 លានឆ្នាំទៀត។ Pangea Ultima នឹងមានកម្ដៅខ្ពស់ជាងឆ្ងាយធៀបនឹងបណ្ដាទ្វីបនាបច្ចុប្បន្ន ដោយសារតែព្រះអាទិត្យ។ រៀងរាល់ 110 លានឆ្នាំកន្លង ថាមពលដែលព្រះអាទិត្យបញ្ចេញ នឹងកើនឡើងបន្ថែម 1%។

មហាទ្វីប Pangea Ultima ក៏រួមចំណែកធ្វើឱ្យស្ថានភាពកាន់តែអាក្រក់ ព្រោះដីគោកឡើងកម្ដៅលឿនជាងមហាសមុទ្រ ហើយក៏ធ្វើឱ្យអាកាសធាតុប្រែប្រួលខ្លាំង ដោយសារភ្នំភ្លើងបំភាយ CO2 មានច្រើនជាងមុន។

Pangea Ultima នឹងក្ដៅខ្លាំង ធ្វើឱ្យសត្វចិញ្ចឹមកូនដោយទឹកដោះ ក្នុងនោះមានមនុស្សជាដើម មិនអាចរស់នៅបាន។ ថនិកសត្វទាំងអស់អាចបាត់ខ្លួននៅក្នុងយុគសម័យផុតពូជដ៏មហាវិនាស ហើយត្រូវបានជំនួសដោយប្រភេទសត្វល្មូនឈាមត្រជាក់ដែលអាចស៊ូទ្រាំនឹងកម្ដៅបានល្អ៕

September 26, 2023

ក្រុមហ៊ុនអាម៉េរិកជិតសាកល្បង «បំពាក់ឈីបកុំព្យូទ័រក្នុងខួរក្បាលមនុស្ស»

ក្រុមហ៊ុនបច្ចេកវិទ្យាប្រព័ន្ធប្រសាទ Neuralink ដែលត្រូវបានបង្កើតឡើងដោយមហាសេដ្ឋីអាម៉េរិក Elon Musk កំពុងអភិវឌ្ឍកូនឈីប «អ៊ីនធើហ្វេសខួរក្បាល-កុំព្យូទ័រ» សម្រាប់ដាំក្នុងខួរក្បាលមនុស្ស។

កាលពីខែឧសភា 2023 រដ្ឋបាលចំណីអាហារ និងឱសថអាម៉េរិក (FDA) បានយល់ព្រមផ្ដល់សិទ្ធិឱ្យ Neuralink ធ្វើការសាកល្បងវះកាត់ដាំកូនឈីប «អ៊ីនធើហ្វេសខួរក្បាល-កុំព្យូទ័រ» (brain-computer interface) ក្នុងខួរក្បាលមនុស្សដំបូងគេបង្អស់។

កាលពីថ្ងៃទី 19 កញ្ញា 2023 ក្រុមហ៊ុន Neuralink ប្រកាសថា បានទទួលការអនុញ្ញាតពីក្រុមប្រឹក្សាវាយតម្លៃឯករាជមួយដើម្បីចាប់ផ្ដើមធ្វើតេស្តឈីបខួរក្បាលដំបូងសម្រាប់ក្រុមអ្នកជំងឺដែលស្លាប់អវយវៈ។ ក្រុមហ៊ុននេះក៏ឱ្យដឹងថា បានចាប់ផ្ដើមស្វែងរកអ្នកស្ម័គ្រចិត្តសម្រាប់ការពិសោធនេះហើយ។

អ្នកជំងឺស្ម័គ្រចិត្តដែលចូលរួមការពិសោធនេះនឹងត្រូវបានរ៉ូបូតវះកាត់ដាំកូនឈីបកុំព្យូទ័រទៅក្នុងតំបន់ខួរក្បាលដែលមានតួនាទីបញ្ជាលើការកម្រើករបស់អវយវៈ។ អ្នកជំនាញសង្ឃឹមថា ឧបករណ៍បច្ចេកវិទ្យាដែលមានឈ្មោះថា «The Link» នេះ នឹងអនុញ្ញាតឱ្យអ្នកជំងឺដែលពិការអវយវៈ អាចបញ្ជាគ្រាប់ចុច ឬទស្សន៍ទ្រនិច (Cursor) របស់កុំព្យូទ័របាន ដោយការប្រើកម្លាំងនៃការគិត។

គោលដៅនៃការធ្វើតេស្តខាងលើគឺដើម្បីត្រួតពិនិត្យបញ្ហាសុវត្ថិភាព និងប្រសិទ្ធភាពរបស់ «អ៊ីនធើហ្វេសខួរក្បាល-កុំព្យូទ័រ» របស់ Neuralink។ «The Link» គឺជាឧបករណ៍សម្រាប់បំពាក់ភ្ជាប់ទៅនឹងប្រព័ន្ធសរសៃប្រសាទ ដែលផលិតឡើងដើម្បីបកស្រាយរលកសញ្ញាខួរក្បាល និងជំរុញសកម្មភាពរបស់ខួរក្បាល។

បើសិនទទួលបានជោគជ័យ បច្ចេកវិទ្យារបស់ Neuralink នឹងអាចជាបដិវត្តន៍សម្រាប់វិស័យជាច្រើន មានជាអាទិ៍ វិស័យថែទាំសុខភាព ទូរគមនាគមន៍ និងអន្តរកម្មរវាងមនុស្សជាមួយនឹងកុំព្យូទ័រ ក៏ដូចជាបច្ចេកវិទ្យាទំនើបដទៃទៀត៕

September 22, 2023

វត្ថុអវកាស «ពាក់កណ្ដាលផ្កាយ ពាក់កណ្ដាលភព» ចំនួនពីរ ត្រូវថតបានដោយផ្ទាល់

ប្រព័ន្ធផ្កាយមួយដែលមានវត្ថុអវកាសចម្លែកចំនួនបួន ទើបតែត្រូវបានក្រុមអ្នកតារាសាស្ត្រថតបានដោយផ្ទាល់ ក្នុងនោះមានវត្ថុអវកាសពីរដែលស្ថិតនៅក្នុងស្ថានភាពពាក់កណ្ដាលភព ពាក់កណ្ដាលផ្កាយ។

យោងតាម Sci-News ប្រព័ន្ធផ្កាយដែលទើបត្រូវថតបានដោយផ្ទាល់នេះរួមមាន ប្រព័ន្ធផ្កាយភ្លោះពីរដួងដែលមានឈ្មោះថា HIP 81208 និងវត្ថុអវកាសពីរទៀតដែលនៅក្បែរ មានចម្ងាយពីផែនដីប្រហែល 486 ឆ្នាំពន្លឺ និងនៅក្នុងកញ្ចុំផ្កាយ Scorpius។

នោះគឺជាប្រព័ន្ធផ្កាយដែលមានអាយុទើបតែ 17 លានឆ្នាំ ក្នុងនោះ ផ្កាយដែលភ្លឺជាងគេមានឈ្មោះថា HIP 81208A និងកូនផ្កាយក្រហម HIP 81208C ដែលវិលជុំវិញផ្កាយមេ HIP 81208A។

ប្រព័ន្ធនេះមិនទាន់មានភពពេញលេញ ប៉ុន្តែមានភពដែលកើតពី «ផ្កាយបរាជ័យ» ដែលមានឈ្មោះថា HIP 81208B ស្ថិតនៅក្បែរផ្កាយ A ដែលភ្លឺជាងគេ។ HIP 81208B គឺជាវត្ថុអវកាសដែលត្រូវបានចាត់ទុកថាជាកូនផ្កាយប្រផេះ។

ក្នុងការថតរូបផ្ទាល់ដោយឧបករណ៍ SPHERE ដែលបំពាក់លើតេឡេស្កុប ESO នៅប្រទេសស៊ីលី អ្នកវិទ្យាសាស្ត្របានរកឃើញវត្ថុអវកាសអាថ៌កំបាំងមួយផ្សេងទៀតដែលត្រូវបានហៅថា HIP 81208Cb ស្ថិតនៅក្បែរកូនផ្កាយក្រហម និងមានម៉ាសធំជាងភពព្រហស្បតិ៍ 15 ដង ធ្វើឱ្យវាត្រូវបានចាត់ចូលក្នុងប្រភេទ «ភពព្រហស្បតិ៍យក្ស» និងកូនផ្កាយប្រផេះ។

ផ្កាយប្រផេះគឺជាវិធីហៅវត្ថុអវកាសមួយដែលស្ថិតនៅចន្លោះនិយមន័យរបស់ផ្កាយ និងភព។ ពួកវាតូចខ្លាំង មិនអាចរក្សាការប្រតិកម្មនុយក្លេអែរក្នុងស្នូលដូចផ្កាយមួយដួង ប៉ុន្តែធំខ្លាំងបើធៀបនឹងភព។ ពួកវាកើតចេញពីពពកឧស្ម័នធូលីក្នុងលំហអវកាសដូចទៅនឹងផ្កាយធម្មតានានា ដោយមិនមែនកើតពីថាសធូលីរបស់ផ្កាយ ។ ក៏ប៉ុន្តែ ពួកវាក៏មិនមានលទ្ធភាពធ្វើឱ្យថាសធូលីដែលនៅជុំវិញខ្លួន កើតជាភពដូចបណ្ដាផ្កាយដទៃ។

ដូច្នេះ កូនផ្កាយប្រផេះក៏ត្រូវបានគេប្រដូចទៅនឹង «ផ្កាយបរាជ័យ» មួយដួង ឬ «ភពលំដាប់ខ្ពស់» ដែលមានភាពឯកា និងអាថ៌កំបាំង៕

September 21, 2023

បច្ចេកវិទ្យា «មើលធ្លុះ» ជញ្ជាំងដោយប្រើប្រាស់ WiFi

(សហរដ្ឋអាម៉េរិក) – អ្នកស្រាវជ្រាវមួយក្រុមនៅសាកលវិទ្យាល័យ California Santa Barbara អភិវឌ្ឍវិធីសាស្ត្រថ្មីដែលអាចបង្ហាញត្រាប់តាមរូបភាពនឹង ដែលនៅពីក្រោយជញ្ជាំង ដោយការប្រើប្រាស់ប្រព័ន្ធ WiFi។

ការធ្វើតេស្ត «ឆ្លុះមើល» វត្ថុកំពុងផ្លាស់ទីខាងក្រោយជញ្ជាំងដោយការប្រើប្រាស់រលកសញ្ញា WiFi ទទួលបានលទ្ធផលប្រកបដោយសក្ដានុពល ប៉ុន្តែវាជួបឧបសគ្គនៅពេលប្រើប្រាស់ចំពោះវត្ថុដែលនៅនឹងមួយកន្លែង។ ដើម្បីដោះស្រាយបញ្ហានេះ ក្រុមស្រាវជ្រាវប្រើប្រាស់តួអក្សរអង់គ្លេសធ្វើជាវត្ថុនឹង។ វិធីសាស្ត្រដែលមានឈ្មោះថា Wiffract របស់ពួកគេ ប្រើប្រាស់រលកសញ្ញារបស់ម៉ាស៊ីនផ្សាយ និងទទួល WiFi ដើម្បីធ្វើការពិសោធ។

Wiffract ត្រូវបានអភិវឌ្ឍដោយយោងទៅតាមទ្រឹស្ដី GTD (Geometrical Theory of Diffraction) របស់ Joseph Keller។ វិធីសាស្ត្ររបស់ក្រុមស្រាវជ្រាវខាងលើអនុញ្ញាតឱ្យបង្ហាញរូបភាព WiFi របស់តួអក្សរអង់គ្លេសដែលដាក់នៅខាងក្រោយជញ្ជាំង។

ក្នុងការធ្វើតេស្ត ពួកគេដាក់តួអក្សរ «BELIEVE» នៅខាងក្រោយជញ្ជាំងដើម្បីអានដោយ WiFi។ លទ្ធផលចុងក្រោយបានបង្ហាញអក្សរនេះយ៉ាងច្បាស់។ «…Wiffract ជួយឱ្យអានធ្លុះជញ្ជាំងដោយប្រើប្រាស់ WiFi ដំបូងគេបង្អស់» ក្រុមស្រាវជ្រាវសន្មតដូច្នេះ។

ក្រោយពីទទួលបានរូបថត ក្រុមអ្នកស្រាវជ្រាវអាចធ្វើបច្ចុប្បន្នភាពរូបថតនេះដោយប្រើប្រាស់ឧបករណ៍ចុងក្រោយ។ Wiffract អាចនឹងត្រូវបានអភិវឌ្ឍបន្ថែម និងប្រើប្រាស់ក្នុងការវិភាគក្រុមមនុស្ស កំណត់អត្តសញ្ញាណរបស់មនុស្ស សុខភាព និងបរិយាកាសវៃឆ្លាត៕

September 18, 2023

យន្តហោះប្រភេទប្រណិត ល្បឿន 1,800 គីឡូម៉ែត្រក្នុងមួយម៉ោង

(សហរដ្ឋអាម៉េរិក) – យន្តហោះល្បឿនលឿនជាងសំឡេង S-512 អាចហោះហើរក្នុងរង្វង់ 11,500 គីឡូម៉ែត្រ ដឹកមនុស្សបានពី 12 ដល់ 18 នាក់ និងឆ្ពោះទៅរកប្រណិតភាព។

ក្រុមហ៊ុនអាកាសចរណ៍ និងអវកាសអាម៉េរិក Spike Aerospace ប្រកាសថា ចាប់ផ្ដើមទទួលយកការបញ្ជាទិញជាមុនសម្រាប់យន្តហោះល្បឿនលឿនជាងសំឡេងដែលមានតម្លៃ 100 លានដុល្លាររបស់ខ្លួន។ នេះបើតាម Interesting Engineering ចុះផ្សាយកាលពីថ្ងៃទី 12 កញ្ញា 2023។

ក្ដីស្រមៃអំពីការហោះឆ្លងសមុទ្រក្នុងល្បៀនលឿនជាងសំឡេងរបស់មនុស្សជាតិបានបញ្ចប់កាលពីឆ្នាំ 2003 នៅពេល Concorde ហោះហើរជាលើកចុងក្រោយ។ បច្ចុប្បន្ន ក្រុមហ៊ុនជាច្រើនកំពុងតែប្រឹងប្រែងប្រែក្លាយក្ដីស្រមៃនោះឱ្យក្លាយជាការពិតសាជាថ្មី ក្នុងនោះមានក្រុមហ៊ុន Aerion និង Boom Supersonic ជាដើម ប៉ុន្តែត្រូវជួបឧបសគ្គច្រើន។ ដូច្នេះ ការប្រកាសទទួលយកការបញ្ជាទិញជាមុនរបស់ Spike បានធ្វើឱ្យមានក្ដីសង្ឃឹមដែលថា ជើងហោះហើរដែលមានល្បឿនលឿនជាងសំឡេងនឹងមានការពេញនិយម។

យន្តហោះល្បឿនលឿនជាងសំឡេងរបស់ Spike Aerospace មានឈ្មោះថា S-512 ដែលអាចដឹកមនុស្សបានពី 12 ទៅ 18 នាក់។ យន្តហោះនេះមានការរួមផ្សំរវាងការហោះហើរក្នុងល្បឿនលឿន និងប្រណិតភាព សម្រាប់ក្រុមអតិថិជនដែលជាអ្នកមាន និងមានតម្រូវការហោះហើរក្នុងល្បឿនលឿន។

S-512 គ្រោងនឹងផ្លាស់ទីក្នុងល្បឿន Mach 1.6 (លឿនជាងសំឡេង 1.6 ដង) ដែលប្រហាក់ប្រហែលនឹង 1,800 គីឡូម៉ែត្រ/ម៉ោង។ ដូច្នេះ អតិថិជនអាចធ្វើដំណើរលឿនជាងយ៉ាងហោច 800 គីឡូម៉ែត្រ/ម៉ោង បើធៀបនឹងយន្តហោះស៊ីវិលបច្ចុប្បន្ន។

Spike Aerospace មិនទាន់បង្ហើបឱ្យដឹងច្រើនអំពីបច្ចេកវិទ្យារបស់យន្តហោះ S-512 នៅឡើយ។ ប៉ុន្តែ យោងតាមគេហទំព័ររបស់ក្រុមហ៊ុននេះ កាប៊ីនមិនមានបង្អួចរបស់វារួមចំណែកក្នុងការនាំមកនូវជើងហោះហើរដ៏ស្ងប់ស្ងាត់។ ក្រុមហ៊ុននេះអះអាងថា យន្តហោះរបស់ខ្លួននឹងមិនបង្កសំឡេងផ្ទុះនៅពេលហោះក្នុងល្បឿនលឿនជាងសំឡេង។ ដូច្នេះវាអាចហោះក្នុងល្បឿនលឿនបំផុតទាំងនៅពីលើសមុទ្រ ទាំងនៅពីលើដីគោក៕

September 14, 2023

លទ្ធផលនៃការប្រកួតបញ្ជូនទិន្នន័យរវាងសត្វព្រាប និងអ៊ីនធើណិតខ្សែកាបអុបទិច

ដោយធ្លាប់ត្រូវបានប្រើប្រាស់ក្នុងការបញ្ជូនសារក្នុងរយៈពេលរាប់សិបសតវត្សរ៍កាលពីសម័យមុនៗ សត្វព្រាបច្ចុប្បន្ននៅតែមានសមត្ថភាពខ្ពស់ក្នុងការបញ្ជូនទិន្នន័យ បើធៀបនឹងបណ្ដាញអ៊ីនធើណិតខ្សែកាបកញ្ចក់។

កាលពីសម័យបុរាណ សត្វព្រាបត្រូវបានជ្រើសរើសឱ្យធ្វើជាអ្នកនាំសារ ព្រោះតែវាអាចហោះហើររាប់ពាន់គីឡូម៉ែត្រ ឬឆ្ងាយជាងនេះក្នុងល្បឿនប្រហែល 100 គីឡូម៉ែត្រ/ម៉ោង។ សត្វព្រាបមួយចំនួនអាចហោះក្នុងល្បឿនរហូតដល់ 180 គីឡូម៉ែត្រ/ម៉ោង ជួយបញ្ជូនសារបានយ៉ាងឆាប់រហ័ស។

ក៏ប៉ុន្តែ ក្នុងសម័យបច្ចេកវិទ្យានេះ តើសត្វព្រាបអាចយកឈ្នះលើអ៊ីនធើណិត ឬអត់?

ដើម្បីឆ្លើយនឹងសំនួរខាងលើ ការពិសោធមួយត្រូវបានធ្វើឡើងកាលពីឆ្នាំ 2009 ហើយបន្ទាប់មកក៏ធ្វើឡើងជាថ្មីក្នុងឆ្នាំ 2023។ ក្នុងការប្រកួតលើនេះ សត្វព្រាបនៅតែមិនមានការប្រែប្រួល បើធៀបនឹងឆ្នាំ 2009។ ចំណែកល្បៀនរបស់អ៊ីនធើណិត ពិសេសគឺបណ្ដាញខ្សែកាបអុបទិចដែលធ្វើពីកញ្ចក់ នៅឆ្នាំ 2023 មានល្បឿនលឿនជាង ADSL របស់ឆ្នាំ 2009 ឆ្ងាយណាស់។ កាលនោះ ក្រុមហ៊ុនអ៊ីនធើណិត Telkom នៅអាហ្វ្រិកខាងត្បូងបានវាស់វែងពេលវេលា និងល្បឿននៃការបញ្ជូនទិន្នន័យរបស់សត្វព្រាបមួយក្បាល ដែលបំពាក់អង្គចងចាំ 4 GB ប្រៀបធៀបជាមួយនឹងល្បឿនអ៊ីនធើណិត ADSL របស់ Telkom។

ដោយហោះក្នុងល្បឿនរហូតដល់ 125 គីឡូម៉ែត្រ/ម៉ោង សត្វព្រាបខាងលើបានយកឈ្នះលើអ៊ីនធើណិតរបស់ក្រុមហ៊ុន Telkom។ លទ្ធផលបង្ហាញថា សត្វព្រាបបានចំណាយពេលប្រហែលមួយម៉ោង និង 8 នាទី ដើម្បីហោះដល់ទីតាំងដែលបានកំណត់ដែលមានចម្ងាយពីដើមទីប្រហែល 96 គីឡូម៉ែត្រ។ បើគិតទាំងពេលវេលាផ្ទេរទិន្នន័យ 4GB ដែលស៊ីពេលអស់មួយម៉ោងទៀត ពេលវេលាសរុបសម្រាប់ដំណើរការបញ្ជូនទិន្នន័យតាមសត្វព្រាបគឺប្រហែលជាងពីរម៉ោង។

ក្នុងរយៈពេលដូចគ្នានេះ សេវា ADSL របស់ Telkom ទើបតែផ្ញើ (ឬ upload) បាន 4% ធៀបនឹងទិន្នន័យ 4GB ដែលបញ្ជូនទៅកាន់កុំព្យូទ័រមួយផ្សេងទៀតដែលនៅឆ្ងាយពីនោះ 96 គីឡូម៉ែត្រ។

សត្វព្រាប និងអ៊ីនធើណិតបន្តប្រកួតនឹងគ្នាក្រោយរយៈពេល 14 ឆ្នាំ

14 ឆ្នាំ បន្ទាប់ពីការប្រកួតដំបូង ការប្រកួតមួយទៀតរវាងសត្វព្រាប និងអ៊ីនធើណិតក៏ត្រូវបានធ្វើឡើងជាថ្មីក្នុងឆ្នាំ 2023 ដោយ YouTuber ផ្នែកបច្ចេកវិទ្យា Jeff Geerling។

រូបមន្តនៃការប្រកួតក្នុងឆ្នាំ 2023 គឺដូចទៅនឹងឆ្នាំ 2009 នៅពេល YouTuber ឈ្មោះ Jeff Geerling បានភ្ជាប់ USB, SSD, SanDisk Extreme PRO 1TB (មួយគ្រាប់ទម្ងន់ 5 ក្រាម) ទៅលើជើងសត្វព្រាប និងឱ្យហោះទៅកាន់ទីតាំងមួយដែលមានចម្ងាយ 1.6 គីឡូម៉ែត្រ

លទ្ធផលនៃការប្រកួតលើកនេះបង្ហាញថា សត្វព្រាបចំណាយពេលប្រហែលមួយនាទីដើម្បីហោះដល់គោលដៅ។ បើបូកទាំងពេលវេលាចម្លងទិន្នន័យ 3TB ទៀត ព្រាបនៅតែយកឈ្នះលើបណ្ដាញអ៊ីនធើណិតខ្សែកាប។

September 8, 2023

អ្នកស្រាវជ្រាវអភិវឌ្ឍពីឡុត AI រាងមនុស្សដំបូងគេលើពិភពលោក

ថ្មីៗនេះ ក្រុមអ្នកវិទ្យាសាស្ត្រកូរ៉េខាងត្បូងបានអភិវឌ្ឍរ៉ូបូតទំនើបដោយយោងទៅលើបច្ចេកវិទ្យាបញ្ញាសិប្បនិម្មិតដែលមានសមត្ថភាពជំនួសអ្នកបើកបរនាពេលអនាគត។

រ៉ូបូតដែលមានរូបរាងដូចមនុស្សនេះមានឈ្មោះថា PIBOT និងមានកម្ពស់ 1.6 ម៉ែត្រ, ទម្ងន់ 65 គីឡូក្រាម និងមានប្រព័ន្ធកាមេរ៉ានៅលើក្បាល។ PIBOT ត្រូវបានអភិវឌ្ឍដោយក្រុមអ្នកវិទ្យាសាស្ត្រនៃវិទ្យាស្ថានវិទ្យាសាស្ត្រ និងបច្ចេកវិទ្យាកូរ៉េខាងត្បូង។ បើទោះហាក់នៅយឺត ប៉ុន្តែ PIBOT ចងចាំរាល់សកម្មភាពចាំបាច់របស់ជើងហោះហើរ និងអាចបញ្ជាលើការហោះឡើង និងចុះចត។

សាស្ត្រាចារ្យ David Hyunchul Shim ដែលជាប្រធានក្រុមស្រាវជ្រាវបានឱ្យដឹងថា PIBOT គឺជាពីឡុតរូបរាងមនុស្សដំបូងគេបង្អស់លើពិភពលោក ត្រូវបានអភិវឌ្ឍដោយយោងទៅតាមរូបមន្តភាសាធំ (Large language model (LLM)) អនុញ្ញាតឱ្យវាយល់រាល់សំណេរណែនាំអំពីជើងហោះហើរដែលសរសេរជាភាសាពេញនិយម។

គុណសម្បត្តិរបស់ពីឡុតរ៉ូបូតនេះគឺការរក្សាបានស្ថានភាពនឹងនខ្ពស់បំផុត មានសមត្ថភាពប្រតិកម្មរហ័សនៅចំពោះមុខស្ថានការណ៍អាសន្នដោយមិនមានការស្លន់ស្លោ។ PIBOT ក៏អាចពិនិត្យមើលសំណេរស្ដីពីការហោះហើរបានរហ័សជាងមនុស្សឆ្ងាយណាស់ ដោយសារបំពាក់កម្មវិធី ChatGPT។

បច្ចុប្បន្ន PIBOT អាចបញ្ជាការហោះហើរនៅលើប្រព័ន្ធធ្វើត្រាប់តាមការហោះហើរ។ ក្រុមអ្នកស្រាវជ្រាវមានគម្រោងសាកល្បងបច្ចេកវិទ្យា PIBOT នៅលើយន្តហោះខ្នាតតូចនៅប៉ុន្មានឆ្នាំខាងមុខ៕

September 8, 2023

Tag: ឈ្មោះ