ជំរុញ - La Reine Media

អនាគតនៃសកម្មភាពទស្សនាសាកសពកប៉ាល់ Titanic ក្រោយហេតុការណ៍ Titan

ករណីនាវាមុជទឹក Titan ដែលដឹកមនុស្ស 5 នាក់ជួបគ្រោះថ្នាក់នៅបាតមហាសមុទ្រអាត្លង់ទិក បាននាំឱ្យមានការបារម្ភអំពីអនាគតនៃសកម្មភាពផ្សងព្រេងចុះទៅមើលសាកសពកប៉ាល់ Titanic ដែលបានលិចកាលពីជាង 100 ឆ្នាំមុន។

ចាប់តាំងពីកប៉ាល់ Titanic ចាប់ផ្ដើមដំណើរឆ្លងកាត់មហាសមុទ្រអាត្លង់ទិកដំបូងកាលពីថ្ងៃទី 10 មេសា 1912 មនុស្សម្នានៅជុំវិញពិភពលោកក៏ចាប់អារម្មណ៍ខ្លាំងទៅលើកប៉ាល់នេះ ក៏ដូចជាហេតុការណ៍គ្រោះថ្នាក់របស់វា។ រឿងរ៉ាវរបស់ Titanic មិនត្រឹមតែជួយឱ្យគេផលិតបានភាពយន្តក៏អស្ចារ្យនោះទេ តែក៏បានជួយជំរុញវិស័យទេសចរណ៍ផ្សងព្រេងទៅកាន់បាតសមុទ្រនៅកាណាដា សហរដ្ឋអាម៉េរិក និងអង់គ្លេសផងដែរ។

ទេសចររាប់លាននាក់បានទៅកាន់សារមន្ទីរ បូជនីយស្ថានស្ដីពីកប៉ាល់ និងសោកនាដកម្ម Titanic ហើយក៏មានមនុស្សជាច្រើនចង់មើលសាកសពកប៉ាល់នេះដោយផ្ទាល់។ ពួកគេហ៊ានចំណាយរហូតដល់ 250,000 ដុល្លារអាម៉េរិកដើម្បីសម្រេចក្ដីប្រាថ្នាគយគន់សាកសពកប៉ាល់ Titanic នៅជម្រៅជិត 4,000 ម៉ែត្រ ដោយជិះក្នុងនាវាមុជទឹក។

ក៏ប៉ុន្តែ ការស្លាប់របស់មនុស្ស 5 នាក់នៅក្នុងនាវាមុជទឹក Titan ដែលកើតហេតុនៅមិនឆ្ងាយពីសាកសពកប៉ាល់ Titanic ធ្វើឱ្យគ្រប់គ្នាមានការបារម្ភអំពីអនាគតនៃវិស័យទេសចរណ៍នៅបាតសមុទ្រ។

អ្នកស្រី Jean Legg កូនស្រីរបស់បុរសម្នាក់ដែលជាបុគ្គលិកលើកប៉ាល់ Titanic បាននិយាយថា «…កប៉ាល់ Titanic គួរតែត្រូវបានទុកឱ្យនៅក្នុងភាពស្ងប់សុខ។ កប៉ាល់នេះគួរតែត្រូវបានចាត់ទុកជាសុគតិភពរបស់វិញ្ញាណទាំងឡាយនៃមនុស្សដែលបានបាត់បង់ជីវិត»។

ឪពុករបស់អ្នកស្រី Jean Legg មានឈ្មោះថា Sidney Daniels ជាបុគ្គលិកបម្រើការនៅលើកប៉ាល់ Titanic ក្នុងពេលមានអាយុទើបតែ 18 ឆ្នាំ។ ក្នុងយប់កើតហេតុលិចកប៉ាល់ Titanic លោក Daniels បានរួចពីការស្លាប់ ដោយសារបានលោតចូលសមុទ្រ និងហែលដល់ទូកសុវត្ថិភាព។ គាត់បានទទួលមរណភាពកាលពីឆ្នាំ 1983។

ក្រោយពីនាវាមុជទឹក Titan ជួបគ្រោះថ្នាក់កាលពីថ្ងៃទី 18 មិថុនា 2023 ព័ត៌មានជាច្រើនបានឱ្យដឹងថា ក្រុមហ៊ុន OceanGate ដែលគ្រប់គ្រងនាវា Titan មិនបានគោរពគោលការណ៍ស្ដង់ដាធម្មតាស្ដីពីសុវត្ថិភាពរបស់នាវា។

Titan មិនមែនជានាវាដំបូងគេដែលចុះទៅមើលសាកសពកប៉ាល់ Titanic។ Deep Ocean Expeditions បានចាប់ផ្ដើមសកម្មភាពដូចគ្នានេះចាប់ពីឆ្នាំ 1998 ដោយលក់សំបុត្រតម្លៃ 32,000 ដុល្លារ/ម្នាក់។ បណ្ដាក្រុមហ៊ុនដទៃដូចជា Bluefish, RMS Titanic Inc និង Blue Marble Private ក៏ធ្វើសកម្មភាពនេះ។

ក៏ប៉ុន្តែ Deep Ocean Experditions និង Bluefish បានបញ្ឈប់សកម្មភាពតាំងពីឆ្នាំ 2012 ខណៈ RMS Titanic Inc ក៏បានផ្អាកតាំងពីជាងមួយទសវត្សរ៍កន្លង។

អ្នកស្រី Jean Legg ជាកូនស្រីរបស់លោក Sidney Daniels អតីតបុគ្គលិកលើកប៉ាល់ Titanic

នាវាមុជទឹកដែលផ្សងព្រេងចុះទៅទស្សនាសាកសពកប៉ាល់ Titanic ធ្វើសកម្មភាពក្នុងតំបន់សមុទ្រអន្តរជាតិ ដូច្នេះពុំមានស្ថាប័នរដ្ឋណាមួយគ្រប់គ្រងស្ដង់ដាសុវត្ថិភាពរបស់នាវាទាំងនេះ។ ប៉ុន្តែក្រុមហ៊ុននានាបានស្ម័គ្រចិត្តអនុញ្ញាតឱ្យរដ្ឋពិនិត្យនាវារបស់ពួកគេ។

នៅលើពិភពលោកមាននាវាត្រឹមតែ 10 គ្រឿងប៉ុណ្ណោះដែលមានសមត្ថភាពចុះដល់ជម្រៅរបស់សាកសពកប៉ាល់ Titanic។ នេះបើតាមលោក Will Kohnen ប្រធានសមាគមបច្ចេកវិទ្យាផ្លូវទឹក។ លោក Will និយាយថា «នាវាទាំងនេះសុទ្ធតែត្រូវបានត្រួតពិនិត្យ លើកលែងតែ Titan»។

នៅមុន និងក្រោយកើតហេតុការណ៍គ្រោះថ្នាក់នាវាមុជទឹក Titan បុគ្គល និងស្ថាប័នជាច្រើនបានអំពាវនាវឱ្យមានការត្រួតពិនិត្យនាវា Titan និងក្រុមហ៊ុន OceanGate ក៏ដូចជាបណ្ដាក្រុមហ៊ុនដែលផ្សេងព្រេងចុះទៅទស្សនាសាកសព Titanic។ ពួកគេយល់ថា ក្រុមហ៊ុន OceanGate មិនយកចិត្តទុកដាក់លើបញ្ហាសុវត្ថិភាព។

ក៏ប៉ុន្តែ អ្នកខ្លះថា ប្រវត្តិសាស្ត្រនឹងបាត់ស្រមោល បើសិនដំណើរចុះទៅមើលសាកសព Titanic ត្រូវបានបញ្ឈប់ជារៀងរហូត។ ពួកគេយល់ថា វិស័យទេសចរណ៍ប្រភេទនេះនឹងងើបឡើងវិញ។

លោក Alan Whitefield ដែលជាប្រធានក្រុមហ៊ុន Silvercrest Submarines នៅប្រទេសអង់គ្លេស និយាយថា «វាដូចទៅនឹងវិស័យអាកាសចរណ៍។ ពេលមានយន្តហោះធ្លាក់ គ្រប់គ្នាតែងតែព្រួយបារម្ភ…។ ប៉ុន្តែច្រើនខែក្រោយមក ពួកគេក៏បន្តជិះយន្តហោះ និងភ្លេចរឿងរ៉ាវដែលបានកើតឡើង»៕

July 3, 2023

សហរដ្ឋអាម៉េរិកអនុម័តលក់ប្រព័ន្ធមីស៊ីល Patriot តម្លៃ 15 ពាន់លានដុល្លារឱ្យប៉ូឡូញ

សហរដ្ឋអាម៉េរិក បានប្រកាសថា ប្រទេសប៉ូឡូញនឹងទិញប្រព័ន្ធមីស៊ីល Patriot រួមនឹងឧបករណ៍ដែលទាក់ទង ទៅតាមកិច្ចសន្យាមួយដែលមានតម្លៃប្រហែល 15 ពាន់លានដុល្លារអាម៉េរិក។

ការទិញដូរអាវុធនេះនឹងជួយឱ្យប៉ូឡូញបង្កើនសមត្ថភាពការពារមីស៊ីល រួមចំណែកជំរុញឱ្យប្រទេសនេះសម្រេចបានគោលដៅលើកកម្ពស់សមត្ថភាពកងទ័ព។ នេះបើតាមស្ថាប័នសហប្រតិបត្តិការណ៍សន្តិសុខជាតិ (DSCA) នៃក្រសួងការពារជាតិអាម៉េរិក ដែលបានឱ្យដឹងកាលពីថ្ងៃទី 28 មិថុនា 2023។

ការលក់អាវុធតម្លៃ 15 ពាន់លានដុល្លារដែលត្រូវបានក្រសួងការបរទេសអាម៉េរិកយល់ព្រមរួចហើយនេះ នឹងរួមមាន ប្រព័ន្ធមីស៊ីល Patriot PAC-3 ចំនួន 48 គ្រឿង, មីស៊ីលវាយស្កាត់ Patriot PAC-3 MSE ចំនួន 644 គ្រឿង អមនឹងរ៉ាដា និងឧបករណ៍គ្រប់គ្រងក្នុងប្រព័ន្ធ។ ក្រុមហ៊ុនដែលទទួលខុសត្រូវក្នុងការលក់អាវុធនេះគឺ Raytheon និង Lockheed Martin។

ប្រកាសខាងលើរបស់ក្រុមមន្ត្រីអាម៉េរិក មិនបានលើកឡើងថា ពួកគេបានចុះកិច្ចព្រមព្រៀងរួចហើយ ឬការចរចាបានបញ្ចប់ហើយ ឬនៅ។

ក្រុមប្រទេសជាសមាជិកណាតូ នៅអឺរ៉ុបខាងកើត កំពុងតែប្រញាប់បង្កើនសមត្ថភាពការពារជាតិ បន្ទាប់ពីរុស្ស៊ីបានចូលឈ្លានពានអ៊ុយក្រែនតាំងពីខែកុម្ភៈ 2022។

កាលពីខែមករា ឆ្នាំ 2023 ប៉ូឡូញបានចុះកិច្ចព្រមព្រៀងទិញរថក្រោះ M1A1 Abrams ចំនួនជាង 110 គ្រឿងពីសហរដ្ឋអាម៉េរិក រួមនឹងឧបករណ៍យោធាជាច្រើនទៀតដែលមានតម្លៃសរុប 1.4 ពាន់លានដុល្លារ។ កាលពីឆ្នាំ 2022 ទីក្រុងវ៉ាសូវីបានបញ្ជាទិញរថក្រោះ M1A2 Abrams ចំនួន 250 គ្រឿង ដែលគ្រោងនឹងទទួលបានចាប់ពីឆ្នាំ 2025 ដល់ 2026៕

June 29, 2023

មហាសេដ្ឋីកំពូលសំណាង ព្រោះមិនបានស្លាប់ក្នុងនាវាមុជទឹក Titan

Jay Bloom សប្បាយចិត្តនៅពេលបង្អួតកូនប្រុសអំពីគម្រោងចុះទៅទស្សនាសាកសពកប៉ាល់ Titanic នៅបាតមហាសមុទ្រ ដោយជិះក្នុងនាវាមុជទឹក Titan ប៉ុន្តែសំណាងល្អ ព្រោះបានកូនព្រមានទាន់ពេល។

«មូលហេតុដែលឪពុកខ្ញុំមិនទៅក៏ព្រោះតែខ្ញុំបានព្រមានគាត់ថា «ប៉ា កប៉ាល់មុជទឹកនោះមិនអាចនៅសេសសល់ក្នុងជម្រៅជ្រៅបែបនេះនៅក្រោមមហាសមុទ្រនោះទេ» Sean Bloom អាយុ 20 ឆ្នាំ កូនប្រុសរបស់មហាសេដ្ឋី Jay Bloom និយាយកាលពីថ្ងៃទី 24 មិថុនាដូច្នេះ។

Sean បន្ថែមថា «ខ្ញុំព្រួយបារម្ភណាស់ ព្រោះគិតថា កូននាវានេះមិនអាចស៊ូទ្រាំបានជាមួយនឹងសម្ពាធខ្លាំងបែបនេះ។ វាក៏មិនអាចមុជទៅជ្រៅដូច្នេះ»។

Sean ចូលចិត្តស្រាវជ្រាវអំពី Titanic ហើយលោក Jay ដែលជាមហាសេដ្ឋីម្នាក់ដែរនោះ ក៏ចង់ឱ្យកូនប្រុសទៅជាមួយខ្លួន។ Stockton Rush ស្ថាបនិក និងជា CEO របស់ OceanGate ដែលក្រុមហ៊ុនគ្រប់គ្រងនាវា Titan បានទៅជួប Jay កាលពីខែមីនា។ ពួកគេបានទៅមើលពិព័រណ៍ Titanic នៅសណ្ឋាគារ Luxor និងបានពិភាក្សាគ្នាអំពីដំណើរផ្សងព្រេង។

Jay ឱ្យដឹងថា លោក Rush ជំរុញជាបន្តបន្ទាប់ដើម្បីឱ្យគាត់ទិញសំបុត្រទៅមើល Titanic នៅបាតសមុទ្រ។ ក្នុងពេល Rush កំពុងបញ្ចុះបញ្ចូល Jay កូនរបស់ Jay គឺ Sean និងមិត្តរបស់គេក៏ស្វែងយល់បន្ថែមអំពី Titan ហើយពួកគេក៏ចាប់ផ្ដើមព្រួយភ័យ។

«នោះគឺជាកូននាវាដ៏តូច មនុស្ស 5 នាក់អង្គុយប្រជ្រៀតគ្នានៅខាងក្នុង។ វាធ្វើឱ្យខ្ញុំមានអារម្មណ៍ថាគ្មានសុវត្ថិភាព។ អារម្មណ៍របស់ខ្ញុំរម្លឹកខ្ញុំជានិច្ចថា មិនគួរធ្វើដំណើរលើកនេះ» Sean និយាយដូច្នេះ។

Jay Bloom (ឆ្វេង) និងកូនប្រុស Sean Bloom

នៅចំពោះមុខឪពុក Sean បានព្រមាន និងរៀបរាប់អំពីបញ្ហាសុវត្ថិភាពដែល Titan អាចជួបប្រទះ។ ចុងក្រោយ ឪពុក និងកូនក៏យល់ស្របគ្នាថា មិនទៅ។ Rush ក៏បានជំនួសកៅអីរបស់ Sean និង Jay ដោយលក់សំបុត្រឱ្យមហាសេដ្ឋីអង់គ្លេសដើមកំណើតប៉ាគីស្ថាន Shahzada Dawood និងកូនប្រុស Suleman។

នាវាមុជទឹក Titan បានបាត់ខ្លួនកាលពីថ្ងៃទី 18 មិថុនា ពេលកំពុងដឹកមនុស្ស 5 នាក់ ធ្វើដំណើរចុះទៅមើលសាកសពកប៉ាល់ Titanic ក្រោមបាតមហាសមុទ្រអាត្លង់ទិក ជម្រៅជិត 4,000 ម៉ែត្រ និងមានចម្ងាយពី Newfoundland របស់កាណាដា ប្រហែល 600 គីឡូម៉ែត្រ។ ក្រុមមន្ត្រីអាម៉េរិក និងក្រុមហ៊ុន OceanGate កាលពីថ្ងៃទី 22 មិថុនា បានប្រកាសជាផ្លូវការថា នាវា Titan បានផ្ទុះបែក ហើយមនុស្ស 5 នាក់ក្នុងនាវាបានបាត់បង់ជីវិត។

June 26, 2023

នាវាអគ្គិសនីបំពាក់ក្ដោងសូឡាខ្នាតធំ អាចដឹកអ្នកដំណើរបាន 500 នាក់

(ន័រវែស) – ក្រុមហ៊ុន Hurtigruten បង្ហាញនាវាអគ្គិសនីដឹកអ្នកដំណើរមានក្ដោងសូឡាដែលអាចបង្រួមបាន និងគ្រោងដាក់ដំណើរការនៅឆ្នាំ 2030។

ក្រុមហ៊ុនខាងលើ បច្ចុប្បន្នមានក្រុមនាវាចំនួន 8 គ្រឿង ក្នុងនោះ មួយគ្រឿងៗអាចដឹកអ្នកដំណើរបាន 500 នាក់ ដែលផ្លាស់ទីតាមបណ្ដោយឆ្នេរសមុទ្រន័រវែស ចាប់ពី Oslo ដល់តំបន់ប៉ូលខាងជើង។

គម្រោងមានឈ្មោះថា «Sea Zero» ដែលត្រូវបានប្រកាសលើកដំបូងកាលពីឆ្នាំ 2022 ត្រូវបានរំពឹងថា អាចរួមចំណែកក្នុងការបំផុសគំនិត និងជំរុញឱ្យមានយានយន្តមិនបំភាយឧស្ម័ននៅក្នុងវិស័យដឹកជញ្ជូនផ្លូវទឹកទាំងមូល។

នាវាដឹកអ្នកដំណើររបស់ Hurtigruten នឹងដំណើរការដោយថ្ម 60 មេហ្គាវ៉ាត់ អាចបញ្ចូលថាមពលស្អាតនៅឯកំពង់ផែ ដោយសារថាមពលមិនបំភាយឧស្ម័ននេះកំពុងគ្របដណ្ដប់ 98% នៅក្នុងបណ្ដាញអគ្គិសនីរបស់ប្រទេសន័រវែស។

ក្រុមហ៊ុនខាងលើឱ្យដឹងថា ថ្មផ្ទុកអគ្គិសនីរបស់នាវានេះអាចឱ្យធ្វើដំណើរបានពី 555 ដល់ 648 គីឡូម៉ែត្រ គ្រាដែលក្ដោងរបស់វាបំពាក់ផ្ទាំងសូឡាសរុប 1,500 ម៉ែត្រក្រឡា ក៏អាចជួយបន្ថែមអគ្គិសនីបានច្រើនដល់នាវា។

យោងតាម CNN នាវាដែលនឹងមានកាប៊ីនចំនួន 270 អាចដាក់អ្នកដំណើរបាន 500 នាក់ និងក្រុមនាវិក 99 នាក់មួយនេះ នឹងត្រូវបានចាប់ផ្ដើមការផលិតនៅឆ្នាំ 2027 ហើយគ្រោងនឹងដាក់ឱ្យដំណើរការពាណិជ្ជកម្មចាប់ពីឆ្នាំ 2030៕

June 9, 2023

ឥណ្ឌូណេស៊ីវិនិយោគជាង 30 ពាន់លានដុល្លារសម្រាប់វិស័យថ្មរថយន្តអគ្គិសនី

រដ្ឋមន្ត្រីក្រសួងវិនិយោគឥណ្ឌូណេស៊ី កាលពីថ្ងៃទី 30 ឧសភា ប្រកាសថា ប្រទេសនេះអាចទទួលបានខ្ទង់ប្រាក់វិនិយោគប្រមាណ 31.9 ពាន់លានដុល្លារអាម៉េរិក សម្រាប់បណ្ដាគម្រោងដែលជាប់ទាក់ទងនឹងបណ្ដាញផ្គត់ផ្គង់ថ្មរថយន្តអគ្គិសនីនៅឆ្នាំ 2026។

យោងតាមរដ្ឋមន្ត្រីក្រសួងសម្របសម្រួលកិច្ចការសមុទ្រ និងវិនិយោគឥណ្ឌូណេស៊ី លោក Luhut Binsar Pandjaitan ការដែលប្រទេសនេះសម្បូររ៉ែនីកែលដែលប្រើប្រាស់ក្នុងថ្មរថយន្តអគ្គិសនី រដ្ឋាភិបាលឥណ្ឌូណេស៊ី ចង់វិនិយោគកាន់តែច្រើនថែមទៀតទៅក្នុងបណ្ដាវិស័យដែលប្រើប្រាស់នីកែល ដើម្បីជំរុញកំណើនសេដ្ឋកិច្ច។

រដ្ឋមន្ត្រីរូបនេះឱ្យដឹងថា តំបន់ Kalimantan របស់ឥណ្ឌូណេស៊ី អាចនឹងទទួលបានប្រាក់វិនិយោគ 12.35 ពាន់លានដុល្លារអាម៉េរិក ស្របពេលដែលតំបន់ Maluku ខាងជើង និង Sulawesi អាចនឹងទាក់ទាញបានការវិនិយោគបន្តបន្ទាប់គឺ 9.78 ពាន់លានដុល្លារ និង 9.84 ពាន់លានដុល្លារ នៅក្នុងបណ្ដាគម្រោងបណ្ដាញផ្គត់ផ្គង់ថ្មផ្ទុកថាមពលសម្រាប់រថយន្តអគ្គិសនី។

June 1, 2023

Toyota បង្ហាញរថយន្តដំណើរការដោយអ៊ីដ្រូសែន Mirai Sport គំរូដំបូង

ក្រុមហ៊ុនជប៉ុន Toyota ថ្មីៗនេះបានបង្ហាញរថយន្តបែបកីឡាគំរូដែលយកលំនាំតាមរថយន្ត Mirai នៅក្នុងការប្រកួត Fuji 24 Hours នៅប្រទេសជប៉ុន ហើយនេះគឺជាកំណែដែលដំណើរការដោយថាមពលអ៊ីដ្រូសែន។

ក្រុមហ៊ុននេះពុំបានប្រកាសព័ត៌មានផ្លូវការណាមួយស្ដីពីរថយន្ត Mirai Sport ដូច្នេះ អ្វីដែលយើងអាចដឹង នោះគឺរូបរាងរបស់រថយន្តនេះតាមរយៈវីដេអូដែលត្រូវបានគេបង្ហោះនៅក្នុងបណ្ដាញសង្គម និងនិយាយជាភាសាជប៉ុន។

រថយន្តគំរូ Mirai Sport នេះ គឺយោងទៅតាមរូបរាងរបស់រថយន្ត Toyota Mirai ជំនាន់ទីពីរ ដោយមានការកែប្រែខ្លះត្រង់រូបរាងខាងក្រៅ ពោលគឺថា Toyota Mirai Sport មានលក្ខណៈកីឡាជាង Toyota Mirai។

Toyota Mirai Sport មានប្រព័ន្ធជំរុញថាមពលពីថ្មផ្ទុកអ៊ីដ្រូសែនដែលមានកម្លាំង 182 សេះ (136 គីឡូវ៉ាត់) និងកម្លាំងរមួលកង់ 300 Nm ហើយអាចធ្វើដំណើរបានចម្ងាយ 647 គីឡូម៉ែត្រ ដោយមិនបាច់ចាក់ឥន្ធនៈ។

រថយន្ត Mirai Sport គំរូដំបូងដំណើរការដោយអ៊ីដ្រូសែន

អ៊ីដ្រូសែនដែលត្រូវបានផលិតពីទឹក និងថាមពលព្រះអាទិត្យ គេហៅថា អ៊ីដ្រូសែនបានពីព្រះអាទិត្យ (solar hydrogen)។ ដើម្បីបានអ៊ីដ្រូសែនប្រភេទនេះ គេត្រូវប្រើរូបមន្តមួយចំនួន ក្នុងនោះក៏មាន ការធ្វើអគ្គិសនីវិភាគទឹក (Electrolysis of water) ដែលប្រើប្រាស់អគ្គិសនីក្នុងថ្ម ឬអគុយដែលបានពីផ្ទាំងសូឡាផងដែរ។

May 31, 2023

ខ្សែប្រយុទ្ធរបស់ Man Utd ប្ដេជ្ញារារាំង Man City លើកពានទាំងបីក្នុងរដូវកាលនេះ

(អង់គ្លេស) – ខ្សែប្រយុទ្ធ Marcus Rashford ចាត់ទុកថា ការរារាំង Man City បង្កើតឡើងវិញទិដ្ឋភាពលើកពានជើងឯកទាំងបីនៃរដូវកាល 1998-1999 របស់ Manchester United គឺជារឿងសំខាន់បំផុត នៅមុនវគ្គផ្ដាច់ព្រ័ត្រ FA Cup។

«ការធានាថា Man Utd នៅតែជាក្លឹបអង់គ្លេសតែមួយគត់ដែលដណ្ដើមបានពានជើងឯកទាំងបីក្នុងមួយរដូវកាល (Treble) គឺជារឿងសំខាន់បំផុត» Rashford ថ្លែងដូច្នេះនៅពេលត្រូវបានសួរអំពីការជំរុញទឹកចិត្តរបស់គាត់នៅមុនវគ្គផ្ដាច់ព្រ័ត្រ FA Cup (Football Association Challenge Cup)។

ក្រោយពីដណ្ដើមបានពានរង្វាន់ជើងឯកលិគកំពូលអង់គ្លេសបន្តបន្ទាប់ជាលើកទីបី Man City នៅសល់ពីរប្រកួតទៀតដែលនឹងត្រូវប៉ះ Man Utd ក្នុងវគ្គផ្ដាច់ព្រ័ត្រ FA Cup នៅទីលាន Wembley របស់អង់គ្លេស ថ្ងៃទី 03 មិថុនា រួចប្រកួតជាមួយ Inter Milan ក្នុងវគ្គផ្ដាច់ព្រ័ត្រ Champions League នៅប្រទេសតួកគី ថ្ងៃទី 10 មិថុនា។ គ្រូបង្វឹក Pep Guardiola របស់ក្លឹប Man City ធ្លាប់បានសម្ដែងអំពីមហិច្ឆតាលើកពានទាំងបីនេះដើម្បីបង្កើតឡើងវិញទិដ្ឋភាពនៃជ័យជម្នះរបស់ Man Utd នៅរដូវកាល 1998-1999។

ខ្សែប្រយុទ្ធ Marcus Rashford របស់ Manchester United

សម្រាប់ Man Utd វិញ ការផ្ដួល Man City នៅលើទីលាន Wembley របស់ក្រុងឡុងដ៍នៅចុងសប្ដាហ៍នេះ មិនត្រឹមតែជួយឱ្យពួកគេលើកពានជើងឯកបានពីរបន្ទាប់ពី EFL Cup (League Cup) ក្នុងមួយរដូវកាលនោះទេ ប៉ុន្តែក៏រារាំងគូប្រកួតមកពីទីក្រុងជាមួយគ្នា បង្កើតឡើងជាថ្មីនូវជោគជ័យក្រោមការដឹកនាំរបស់ Sir Alex Ferguson កាលពី 24 ឆ្នាំមុនផងដែរ។

ក្នុងពិធីប្រគល់រង្វាន់ចុងរដូវកាលរបស់ Manchester United កាលពីព្រលប់ថ្ងៃទី 19 ឧសភា ខ្សែប្រយុទ្ធ Rashford ដណ្ដើមបានពានរង្វាន់ប្រចាំរដូវកាលចំនួនពីរសំខាន់ៗ គឺ ពានរង្វាន់កីឡាករឆ្នើមបំផុតដែលបោះឆ្នោតដោយអ្នកគាំទ្រ (Sir Matt Busby Player of the Year) និងពានរង្វាន់កីឡាករឆ្នើមបំផុតដែលបោះឆ្នោតដោយសមាជិកក្នុងក្រុម៕

May 31, 2023

Tesla បើក Showroom លំដាប់ប្រណិតនៅរាជធានីរបស់ប្រទេសថៃ

ក្រុមហ៊ុនផលិតរថយន្តអគ្គិសនី Tesla នឹងបើកសាលតាំងបង្ហាញ (showroom) លំដាប់ប្រណិតនៅប្រទេសថៃ នៅក្រោយខែមិថុនា ក្នុងមជ្ឈមណ្ឌលពាណិជ្ជកម្មនៅភាគខាងកើតរាជធានីបាងកក ដើម្បីជំរុញការលក់រថយន្តអគ្គិសនីដែលកំពុងកើនឡើងយ៉ាងរហ័សនៅប្រទេសថៃ និងដើម្បីតាមទាន់គូប្រកួតចិន ក្នុងនោះមាន BYD ជាដើម។

យោងតាមបណ្ដាញផ្សព្វផ្សាយក្នុងស្រុក ក្រុមហ៊ុនផលិតរថយន្តអាម៉េរិកមួយនេះកំពុងតែជួសជុល និងកែលំអទីតាំងដែលធ្លាប់ជាសាលតាំងបង្ហាញរបស់ Toyota។ នៅប្រទេសថៃ ក្រៅពីសាលតាំងបង្ហាញនេះ Tesla ក៏នឹងមានមជ្ឈមណ្ឌលសេវាកម្ម ឃ្លាំងគ្រឿងបន្លាស់ និងស្ថានីយបញ្ចូលថាមពលរហ័សផងដែរ។

ទាក់ទងនឹងដំណឹងខាងលើ តំណាងមួយរូបរបស់ Tesla បានឱ្យដឹងថា ព័ត៌មានលម្អិតនឹងត្រូវបានប្រកាសឆាប់ៗខាងមុខ។

Tesla បានចាប់ផ្ដើមលក់អនឡាញនូវរថយន្តបែបកីឡាពហុមុខងារប្រភេទមធ្យម Model Y និងរថយន្ត Model 3 នៅប្រទេសថៃ តាំងពីខែធ្នូឆ្នាំមុន ក្នុងតម្លៃចាប់ពីប្រហែល 1.96 លានបាត (56,500 ដុល្លារអាម៉េរិក) និង 1.76 លានបាត (50,700 ដុល្លារអាម៉េរិក)។ តួលេខនេះខ្ពស់ជាងបើធៀបនឹងតម្លៃ 1 លានបាត់របស់បណ្ដារថយន្តចិនដែលមានលក្ខណៈប្រហាក់ប្រហែលនេះ។

យោងតាមរបាយការណ៍របស់ទំព័រ Autolife នៅប្រទេសថៃ ចំនួនរថយន្ត Model Y ក្នុងខែមីនាបានកើនឡើងជិតទ្វេដងធៀបនឹងខែកុម្ភៈ ដោយលក់បាន 1,034 គ្រឿង ជួយឱ្យម៉ូដែលរថយន្តនេះកាន់កាប់ 17% នៅក្នុងទីផ្សាររថយន្តអគ្គិសនីនៅប្រទេសថៃ។ Model Y ក្លាយជាម៉ូដែលរថយន្តអគ្គិសនីដែលលក់ដាច់ជាងគេលំដាប់ទីពីរនៅប្រទេសថៃ បន្ទាប់ពី Atto 3 របស់ BYD និងនៅពីលើ SAIC Motor និង Great Wall Motor។

Showroom របស់ Tesla នៅរាជធានីរបស់ប្រទេសថៃ

May 30, 2023

កង់កូនកាត់រថយន្តអគ្គិសនី អាចបើកបរក្នុងល្បឿន 48 គីឡូម៉ែត្រ/ម៉ោង

(អង់គ្លេស) – Iris eTrike គឺជាយានជំនិះផ្ទាល់ខ្លួនដែលមានរូបរាងដូចកង់បន្តិច ដូចរថយន្តបន្តិច អាចផ្ទុកអីវ៉ាន់បាន 100 គីឡូក្រាម និងអាចបើកបរក្នុងល្បឿន 48 គីឡូម៉ែត្រក្នុងមួយម៉ោង។

កង់កូនកាត់រថយនុ្តគំរូ Iris eTrike របស់អ្នករចនា និងជាអ្នកជំនួញផ្នែកបច្ចេកវិទ្យា ជនជាតិអង់គ្លេស Grant Sinclair មានកម្លាំងជាង ធៀបនឹងកង់ធម្មតា ធ្វើឱ្យវាមានល្បឿនលឿនជាង។ យាននេះផ្ដល់ផាសុកភាព និងការពារអ្នកបើកបរពីអាកាសធាតុអាក្រក់។ នេះបើតាម Yahoo ចុះផ្សាយកាលពីថ្ងៃទី 27 ឧសភា 2023។

កំណែសម្រាប់ការផលិតរបស់ Iris eTrike ប្រើប្រាស់គ្រោងឆ្អឹងធ្វើពីដែកថែប chromoly, ដងខ្លួនធ្វើពីជ័រកៅស៊ូទន់ polypropylene ដែលគ្របដណ្ដប់ដោយសម្បក polymer, ដំបូលធ្វើពីជ័រទន់ថ្លាមានស្រទាប់ការពារបញ្ហាជ្រាបទឹក, ប្រព័ន្ធជំរុញកម្លាំង 9 លេខ និងកៅអីខ្ពស់។

Iris eTrike ក៏មានប្រព័ន្ធភ្លើង LED គ្រប់គ្រាន់, ប្រព័ន្ធបន្សុទ្ធខ្យល់, កាមេរ៉ាមើលក្រោយ និងប្រព័ន្ធបញ្ចុះកម្ដៅ នាំខ្យល់ដែលបានបន្សុទ្ធចូលមកកាន់កាប៊ីន។

កម្លាំងឈ្នាន់សម្រាប់ធាក់របស់អ្នកបើកបរត្រូវបានផ្ដល់ដោយម៉ូទ័រកម្លាំង 250, 500 ឬ 750 វ៉ាត់ អាចជួយឱ្យបើកបរក្នុងល្បឿន 48 គីឡូម៉ែត្រ/ម៉ោង។ Iris eTrike ប្រើប្រាស់ថ្ម lithium-ion 48 វ៉ាត់ 20 អំពែរម៉ោង អាចធ្វើដំណើរបានជាង 48 គីឡូម៉ែត្រ។

ថ្វីបើមានរូបរាងតូច តែ Iris eTrike មានកន្លែងដាក់អីវ៉ាន់ដែលមានចំណុះ 100 លីត្រ។ អេក្រង់ LED នៅខាងមុខអ្នកបើកបរបង្ហាញទិន្នន័យស្ដីពីល្បឿន គម្លាត់នៃការបើកបរ និងថាមពលថ្ម។ល។

Iris eTrike មានបណ្ដោយ 260 សង់ទីម៉ែត្រ, ទទឹង 94 សង់ទីម៉ែត្រ, កម្ពស់ 128 សង់ទីម៉ែត្រ, ទម្ងន់ 50 គីឡូក្រាម និងមានពណ៌ខ្មៅ ឬប្រាក់។ ក្រុមហ៊ុននៅ Cardiff ប្រទេសអង់គ្លេសរបស់ Grant Sinclair កំពុងទទួលការកក់សម្រាប់ Iris eTrike ហើយគ្រោងនឹងប្រគល់ជូនអតិថិជននៅក្នុងត្រីមាសទីមួយឆ្នាំក្រោយ៕

May 29, 2023

ដើម្បីត្រៀមសម្រាប់ការប្រកួតជាមួយជើងឯក World Cup ឥណ្ឌូណេស៊ីផ្ដល់សញ្ជាតិដល់កីឡាករបរទេសច្រើននាក់

ឥណ្ឌូណេស៊ីបន្តអនុវត្តគោលនយោបាយដែលមានតាំងពីឆ្នាំ 2021 ដោយការផ្ដល់សញ្ជាតិដល់កីឡាករបាល់ទាត់វ័យក្មេងពីររូបដែលកំពុងទាត់នៅប្រទេសហូឡង់ ហើយពួកគេនឹងបង្ហាញខ្លួនក្នុងការប្រកួតមិត្តភាពក្របខណ្ឌ FIFA Days នៅខែមិថុនា 2023។

កីឡាករពីររូបដែលទើបតែទទួលបានសញ្ជាតិឥណ្ឌូណេស៊ី រួមមាន Ivar Jenner អាយុ 19 ឆ្នាំ កំពុងលេងជាខ្សែបម្រើរបស់ក្លឹប FC Utrecht និង Rafael Struick អាយុ 20 ឆ្នាំ កំពុងលេងជាខ្សែប្រយុទ្ធឱ្យក្លឹប ADO Den Haag។ អ្នកទាំងពីរសុទ្ធតែមានជីដូនជីតាជាជនជាតិឥណ្ឌូណេស៊ី និងបានស្បថចូលក្រុមជម្រើសជាតិក្នុងនាមជាពលរដ្ឋឥណ្ឌូណេស៊ី ចាប់ពីថ្ងៃទី 22 ឧសភា។

សហព័ន្ធបាល់ទាត់ឥណ្ឌូណេស៊ី (PSSI) បានត្រៀមផ្ដល់សញ្ជាតិដល់ Jenner និង Struick កាលពីខែមុនដើម្បីឱ្យពួកគេចូលរួមក្នុងក្រុម U20 ទៅទាត់នៅ U20 World Cup លើទីលានដែលឥណ្ឌូណេស៊ីធ្វើជាម្ចាស់ផ្ទះ។ ប៉ុន្តែ ឥណ្ឌូណេស៊ីត្រូវបាន FIFA ដកហូតសិទ្ធរៀបចំការប្រកួត ធ្វើឱ្យក្រុម U20 របស់ពួកគេខកខានមិនបានទាត់នៅពានរង្វាន់នេះ និងបានពន្យារពេលលើការផ្ដល់សញ្ជាតិដល់កីឡាករពីររូបខាងលើ។

ក្រុមបាល់ទាត់ជម្រើសជាតិឥណ្ឌូណេស៊ី គ្រោងនឹងប្រកួតជាមួយប៉ាឡេស្ទីន និងអាហ្សង់ទីន នៅថ្ងៃទី 14 និង 19 មិថុនាខាងមុខ នៅហ្សាការតា។ គ្រូបង្វឹក Shin Tae-yong មិនទាន់បង្ហាញបញ្ជីឈ្មោះកីឡាករចុងក្រោយ ប៉ុន្តែនឹងប្រមូលកម្លាំងចាប់ពីថ្ងៃទី 05 មិថុនា។

ក្រៅពី Jenner និង Struick PSSI ក៏មានគម្រោងផ្ដល់សញ្ជាតិដល់ Justin Hubner អាយុ 19 ឆ្នាំ សញ្ជាតិហូឡង់ ជាខ្សែការពាររបស់ Wolves លេងនៅពានរង្វាន់លីគកំពូលអង់គ្លេសផងដែរ។

ប្រធាន PSSI លោក Erick Thohir (ឆ្វេង), Rafael Struick (កណ្ដាល) និង Ivar Jenner នៅហ្សាការតា កាលពីថ្ងៃទី 24 ឧសភា 2023

PSSI បានជំរុញគោលនយោបាយផ្ដល់សញ្ជាតិដល់កីឡាករមានឈាមជ័រជាជនជាតិឥណ្ឌូណេស៊ី តាំងពីឆ្នាំ 2021។ កីឡាករជាច្រើនរូបដែលត្រូវបានផ្ដល់សញ្ជាតិទៅតាមគោលនយោបាយនេះ មានជាអាទិ៍ Jordi Amat (ធ្លាប់លេងនៅពានរង្វាន់ La Liga), Elkan Baggott លេងឱ្យ Ipswich Town នៅពានរង្វាន់ League One (អង់គ្លេស) ឬ Marc Klok និង Sandy Walsh ។ល។ PSSI ក៏ផ្ដល់សញ្ជាតិដល់កីឡាករដែលមិនមានឈាមជ័រជាជនជាតិឥណ្ឌូណេស៊ីផងដែរ ក្នុងនោះមានដូចជា ខ្សែប្រយុទ្ធ Ilija Spasojevic ជាដើម។

ថ្មីៗនេះ បាល់ទាត់ឥណ្ឌូណេស៊ីទទួលបានជោគជ័យមួយចំនួន រួមមាន មេដាយមាសស៊ីហ្គេមលើកទី 32 និងដណ្ដើមបានជើងឯក U16 អាស៊ីអាគ្នេយ៍ 2022។ បាល់ទាត់ឥណ្ឌូណេស៊ីក៏កំពុងឆ្ពោះទៅរកជោគជ័យធំជាងនេះនៅវគ្គជម្រុះ World Cup 2026, Asian Cup 2023 និង AFF Cup ផងដែរ។

ការអញ្ជើញក្រុមជម្រើសជាតិអាហ្សង់ទីនមកប្រកួតមិត្តភាពនៅថ្ងៃទី 19 មិថុនា គឺជាសកម្មភាពលើកកម្ពស់មុខមាត់របស់វិស័យបាល់ទាត់ឥណ្ឌូណេស៊ី។ PSSI ក៏បានឱ្យដឹងថា រៀងរាល់ឆ្នាំ ប្រទេសនេះនឹងអញ្ជើញក្រុមជម្រើសជាតិល្បីៗមកប្រកួតមិត្តភាព ក្នុងនោះមាន ព័រទុយហ្កាល់ ប្រស៊ីល ឬម៉ារ៉ុក។ល។

May 29, 2023

Tag: ជំរុញ