Tag: ឆ្នេរសមុទ្រ

មីស៊ីលកូរ៉េខាងជើងធ្វើឱ្យប្រទេសជិតខាងភ័យស្លន់ស្លោ មុនពេលធ្លាក់ចូលសមុទ្របាត់ស្រមោល
កូរ៉េខាងជើងបានបញ្ជាក់ថា រ៉ុក្កែតដឹកផ្កាយរណបយោធាបានធ្លាក់ចូលសមុទ្រ ដោយសារតែមានបញ្ហាក្នុងពេលបាញ់បង្ហោះនៅព្រឹកនេះ។
«រ៉ុក្កែតរុញច្រាន Cheollima-1 ដែលនាំយកផ្កាយរណបឈ្លបយកការណ៍ផ្នែកយោធា បានធ្លាក់ចូលតំបន់សមុទ្រភាគខាងលិច ព្រោះតែបាត់បង់ថាមពល ដោយសារមានបញ្ហាក្នុងការបញ្ឆេះម៉ាស៊ីននៅកំណាត់ទីពីរ» ទីភ្នាក់ងារសារព័ត៌មានមជ្ឈិមកូរ៉េខាងជើង (KCNA) ថ្ងៃទី 31 ឧសភានេះ បានរាយការណ៍ដូច្នេះ។
មុននោះ អគ្គសេនាធិការចម្រុះនៃសាធារណរដ្ឋកូរ៉េ (JSC) ឱ្យដឹងថា នៅវេលាម៉ោង 06:29 (ម៉ោងប្រហែល 4 កន្លះនៅកម្ពុជា) កូរ៉េខាងជើងបានបាញ់បង្ហោះរ៉ុក្កែតពីតំបន់ Tongchang-ri នៅឆ្នេរសមុទ្រភាគខាងលិចប្រទេស ឆ្ពោះទៅទិសខាងត្បូង។
រ៉ុក្កែតកូរ៉េខាងជើង ហោះលើលំហសមុទ្ររបស់កោះ Baengnyeong នៅភាគខាងលិចប្រទេសកូរ៉េខាងត្បូង និងមិនប៉ះពាល់ដល់រដ្ឋធានីសេអ៊ូល។ យោងតាម JSC ក្រុមប្រឹក្សាសន្តិសុខជាតិរបស់កូរ៉េខាងត្បូង ក៏បានប្រកាសបើកកិច្ចប្រជុំបន្ទាន់ផងដែរ។
កងទ័ពកូរ៉េខាងត្បូងក៏បានដឹងថា រ៉ុក្កែតនេះបានបាត់ខ្លួនពីរ៉ាដាមុនពេលហោះទៅដល់គោលដៅដែលបានគ្រោងទុក និងបានសន្និដ្ឋានថា វាបានផ្ទុះលើអាកាស ឬធ្លាក់ចូលសមុទ្រ។
សារ៉ែនប្រកាសអាសន្នបានបន្លឺឡើងនៅរដ្ឋធានីសេអ៊ូល នៅម៉ោងប្រហែល 6 កន្លះ គ្រាដែលអាជ្ញាធរស្នើឱ្យប្រជាជនត្រៀមខ្លួនឱ្យបានរួចរាល់សម្រាប់ការជម្លៀស។ ក្រសួងមហាផ្ទៃកូរ៉េខាងត្បូង ក្រោយមកបានឱ្យដឹងថា ការប្រកាសអាសន្នពីអាជ្ញាធរសេអ៊ូល គឺ «មិនត្រឹមត្រូវ»។ ចំណែកការជូនដំណឹងអំពីការជម្លៀសនៅតំបន់ក្បែរព្រំដែនភាគខាងលិចរបស់កូរ៉េខាងត្បូង ក៏ត្រូវបានដកចេញនៅវេលាម៉ោងប្រហែល 8 ព្រឹក។
នៅប្រទេសជប៉ុនវិញ អាជ្ញាធរក៏បានចេញសេចក្ដីជូនដំណឹងទាក់ទងនឹងបញ្ហាខាងលើតាមរយៈប្រព័ន្ធ J-Alert។ ប៉ុន្តែក្រោយមក ប្រព័ន្ធនេះក៏បានប្រាប់ថា រ៉ុក្កែតនឹងមិនហោះរំលងទឹកដីជប៉ុន ហើយក៏បានដកចោលសេចក្ដីជូនដំណឹងនេះ។
ជប៉ុន មុននោះបានឱ្យដឹងថា កូរ៉េខាងជើងបានជូនដំណឹងមកតូក្យូអំពីគម្រោងបាញ់បង្ហោះផ្កាយរណបចាប់ពីថ្ងៃទី 31 ឧសភា ដល់ 11 មិថុនា។ ជប៉ុនក៏បានប្រកាសថា នឹងបាញ់ទម្លាក់រាល់រ៉ុក្កែតរបស់កូរ៉េខាងជើង បើសិនវាត្រូវបានបញ្ជាក់ថានឹងធ្លាក់ចូលទឹកដីប្រទេសនេះ។
សហរដ្ឋអាម៉េរិក កូរ៉េខាងត្បូង និងជប៉ុន សុទ្ធតែយល់ថា ការបាញ់បង្ហោះផ្កាយរណបរបស់កូរ៉េខាងជើងគឺគ្រាន់តែជា «សម្បក» ដើម្បីសាកល្បងមីស៊ីល ដោយសារតែពួកវាប្រើប្រាស់បច្ចេកវិទ្យាដូចគ្នា។ កូរ៉េខាងជើងធ្លាប់បានបាញ់បង្ហោះរ៉ុក្កែតរុញច្រានដែលមានផ្ទុកផ្កាយរណបកាលពីឆ្នាំ 2012 និង 2016 ហើយរ៉ុក្កែតទាំងនេះសុទ្ធតែបានហោះរំលងខេត្ត Okinawa នៅភាគខាងត្បូងរបស់ប្រទេសជប៉ុន៕
May 31, 2023
អាចម៍ផ្កាយធ្លាក់ និងផ្ទុះឆេះភ្លឺពេញផ្ទៃមេឃនៅអូស្ត្រាលី
កាលពីយប់ថ្ងៃទី 20 ឧសភា ផ្ទៃមេឃនៅពេលរាត្រីក្នុងរដ្ឋ Queensland ភាគខាងជើងប្រទេសអូស្ត្រាលី បែរជាភ្លឺចាំងភ្នែក នៅពេលអាចម៍ផ្កាយមួយដុំហោះកាត់បរិយាកាស ធ្លាក់ទៅលើផែនដី បង្កជាសំឡេងផ្ទុះដ៏ខ្លាំង។
រូបភាពដែលថតបានដោយកាមេរ៉ាតាំងពីទីក្រុង Cairns នៅតំបន់ឆ្នេរសមុទ្រភាគខាងកើត រហូតដល់ Normanton នៅឈូងសមុទ្រ Carpentaria បង្ហាញថា ដុំភ្លើងមួយដុំធំ ធ្លាក់ក្នុងល្បឿនយ៉ាងលឿនចុះមកកាន់ផែនដី ហើយមានពន្លឺមួយខ្សែពណ៌បៃតង ពណ៌ខៀវ និងលឿងលេចចេញតាមពីក្រោយ។
ហេតុការណ៍នេះកើតឡើងនៅវេលាម៉ោង 09:22 យប់ ថ្ងៃទី 20 ឧសភា ឆ្នាំ 2023 (ពេលវេលាក្នុងស្រុក)។ ប្រជាជននៅទីរួមស្រុក Croydon ដែលមានចម្ងាយពី Cairns ប្រហែល 500 គីឡូម៉ែត្រទៅទិសខាងលិច ក៏បានឮសំឡេងផ្ទុះ។
អាចម៍ផ្កាយខាងលើនេះប្រហែលជាមានទំហំពី 0.5 ដល់ 1 ម៉ែត្រ តូចជាងអាចម៍ផ្កាយទំហំមធ្យម និងផ្លាស់ទីក្នុងល្បឿន 150,000 គីឡូម៉ែត្រ/ម៉ោង។ នេះបើតាមបណ្ឌិត Brad Tucker មកពីសាកលវិទ្យាល័យជាតិអូស្ត្រាលី។
អាចម៍ផ្កាយធ្លាក់ និងផ្ទុះឆេះនៅ Queensland ប្រទេសអូស្ត្រាលី
យោងតាមបណ្ឌិត Tucker អាចម៍ផ្កាយនេះនឹងមិនបង្កឱ្យមានរណ្ដៅ ដោយសារតែវាត្រូវបែកជាបំណែកមុនពេលធ្លាក់ដល់ដី ប៉ុន្តែវាក៏អាចនៅសល់បំណែកខ្លះត្រង់កន្លែងធ្លាក់។
កាលពីឆ្នាំ 2013 អាចម៍ផ្កាយមួយដុំទំហំ 20 ម៉ែត្រ បានផ្ទុះនៅខាងលើទីក្រុង Chelyabinsk របស់រុស្ស៊ី។ ការផ្ទុះនេះមានកម្លាំងប្រហាក់ប្រហែលនឹងការផ្ទុះ 500 គីឡូតោន (100,000 តោន) របស់រំសេវ TNT។ ការផ្ទុះនេះបានធ្វើឱ្យមនុស្សជាច្រើនត្រូវប៉ើង និងបំបែកបង្អួចកញ្ចក់របស់អគាររាប់ពាន់ខ្នង ខណៈដែលរោងចក្រមួយក៏ត្រូវបាក់រលំ។ យោងតាមទំព័រ Guardian អាចម៍ផ្កាយ Chelyabinsk ភ្លឺជាងព្រះអាទិត្យ 30 ដង ធ្វើឱ្យប្រជាជននៅឆ្ងាយពីទីនោះជិត 30 គីឡូម៉ែត្រ ក៏ត្រូវរលាកស្បែក និងភ្នែក៕
May 22, 2023
ណាសា (NASA) រកឃើញសញ្ញាទឹកសមុទ្រឡើងកម្ដៅខុសប្រក្រតី El Nino ពីអវកាស
ផ្កាយរណប Sentinel-6 Michael Freilich បានកត់ត្រារលក Kelvin ផ្លាស់ទីទៅកាន់ភាគខាងកើត ឆ្លងកាត់មហាសមុទ្រប៉ាស៊ីហ្វិក។ បាតុភូតនេះតែងត្រូវបានអ្នកវិទ្យាសាស្ត្រចាត់ទុកថាជាសញ្ញារបស់បាតុភូត El Nino។
ណាសាកំណត់បានសញ្ញាដំបូងរបស់ El Nino ពីអវកាស បន្ទាប់ពីមួយក្នុងចំណោមផ្កាយរណបរបស់ស្ថាប័ននេះ ប្រទះឃើញតំបន់ទឹកក្ដៅនៅមហាសមុទ្រប៉ាស៊ីហ្វិក ផ្លាស់ទីទៅទិសខាងកើត ទៅដល់តំបន់ឆ្នេរសមុទ្រភាគខាងលិចរបស់តំបន់អាម៉េរិកខាងត្បូង នៅក្នុងខែមីនា និងមេសា។ ទិន្នន័យពីផ្កាយរណប Sentinel-6 Michael Freilich បង្ហាញថា រលក Kelvin ផ្លាស់ទីឆ្លងកាត់មហាសមុទ្រប៉ាស៊ីហ្វិក។ ប្រភេទរលកនេះមានកម្ពស់តែពី 5-10 សង់ទីម៉ែត្រ ប៉ុន្តែលាតសន្ធឹងទំហំរាប់រយគីឡូម៉ែត្រ។ ពួកវាត្រូវបានចាត់ទុកដូចជាសញ្ញាដំបូងរបស់ El Nino នៅពេលកើតឡើងនៅតំបន់អេក្វាទ័រ និងបញ្ជូនទឹកក្ដៅនៅស្រទាប់ខាងលើរបស់សមុទ្រ ទៅកាន់ភាគខាងលិចនៃមហាសមុទ្រប៉ាស៊ីហ្វិក។ នេះបើតាម Live Science ចុះផ្សាយកាលពីថ្ងៃទី 16 ឧសភា។
El Nino គឺជាបាតុភូតឡើងកម្ដៅខុសប្រក្រតីនៃស្រទាប់លើរបស់ទឹកសមុទ្រនៅតំបន់អេក្វាទ័រ និងភាគខាងកើតនៃមហាសមុទ្រប៉ាស៊ីហ្វិក ហើយក៏ជាផ្នែកមួយនៅក្នុងវដ្ដនៃអាកាសធាតុ ENSO (ENSO គឺជាអាកាសធាតុដែលមានបាតុភូត El Nino និងបាតុភូតទឹកសមុទ្រចុះត្រជាក់ខុសប្រក្រតី La Nina។
El Nino តែងកើតឡើងពី 3-5 ឆ្នាំ/ម្ដង ប៉ុន្តែក៏អាចកើតឡើងញឹកញាប់ជាងមុន។ បាតុភូត El Nino ចុងក្រោយបានកើតឡើងកាលពីឆ្នាំ 2019។ មន្ត្រីតំណាងស្ថាប័នឧតុនិយមអាម៉េរិក (NOAA) បានឱ្យដឹងថា លទ្ធភាពដែល El Nino អាចនឹងកើតឡើងនៅក្នុងឆ្នាំនេះគឺមានរហូតដល់ 90% ហើយអូសបន្លាយដល់រដូវរងានៅអឌ្ឍគោលខាងជើង ដែលអាចធ្វើឱ្យទឹកសមុទ្រឡើងកម្ដៅបន្ថែមចាប់ពី 1 ដល់ 1.5 អង្សាសេ៕
May 20, 2023
ទៅលេងទីក្រុងជាប់ឆ្នេរសមុទ្រដ៏ស្រស់ស្អាត Gold Coast ប្រទេសអូស្ត្រាលី
Gold Cost គឺជាទីក្រុងជាប់ឆ្នេរសមុទ្រដ៏ស្រស់ស្អាតដែលមានទីតាំងនៅក្នុងរដ្ឋ Queensland ប្រទេសអូស្ត្រាលី ហើយភ្ញៀវទេសចរ៍ប្រមាណ១០លាននាក់បានមកកម្សាន្តនៅក្នុងទីក្រុងដ៏ទំនើបមួយនេះជារៀងរាល់ឆ្នាំ។ Gold Coast ត្រូវបានគេទទួលស្គាល់ថាជាទីក្រុងមួយដែលសម្បូរទៅដោយឆ្នេរដ៏ស្រស់ស្អាតជាច្រើនស្ទើរចាំមិនអស់។
ប្រសិនបើអ្នកអញ្ជើញទៅកម្សាន្តនៅទីក្រុង Gold Coast អ្នកនឹងទទួលបាននូវទិដ្ឋភាពថ្មីសន្លាង ស្រលះភ្នែក ស្រស់ស្រាយក្នុងអារម្មណ៍ ដោយសារតែទេសភាពដ៏ស្រស់ត្រកាលនៃឆ្នេរសមុទ្រពណ៌ខៀវស្រងាត់ដាច់កន្ទុយភ្នែក និងឆ្នេរខ្សាច់ពណ៌មាសដ៏ស្រស់ស្អាតខ្នាតអន្តរជាតិ។
នៅក្នុងទីក្រុងជាប់ឆ្នេរសមុទ្រនេះ អ្នកក៏អាចទៅកម្សាន្តនៅកន្លែងដ៏គួរឱ្យចាប់អារម្មណ៍ជាច្រើនកន្លែងទៀតដូចជាៈ កោះ Stradbroke ខាងត្បូង, កំពង់ផែ The Spit, ឆ្នេរខ្សាច់ Main, ឆ្នេរស្ថានសួគ៌ Surfers, ឆ្នេរខ្សាច់ដ៏ស្រស់ស្អាត Broad beach, ឆ្នេរ Mermaid, ឆ្នេរ Nobby, ឆ្នេរ Miami, ឆ្នេរ Burleigh, ឧទ្យានជាតិ Burleigh Heads, ឆ្នេរ Tallebudgera, ឆ្នេរ Palm, ឆ្នេរ Currumbin, សាល Tugun, ឆ្នេរ Billnga, ឆ្នេរ Kirra, ទីក្រុងឆ្នេរ Coolangatta, ឆ្នេរ Greenmount, ឆ្នេរ ្Rainbow Bay, តំបន់ថ្មដុះ Snapper Rocks និងឆ្នេរ Froggies ជាដើម។ នៅទីក្រុង Gold Coast ក៏មានឆ្នេរមួយឈ្មោះថា Duranbah ជាឆ្នេរខ្សាច់ដ៏ល្បីល្បាញ ដែលភ្ញៀវទេសចរភាគច្រើនតែងនិយមទៅសម្រាកកាយ និងកម្សាន្តជាមួយ នឹងការជិះទូកក្តោងលេងយ៉ាងសប្បាយរីករាយ ដោយសារនៅទីនោះទាំងទីកន្លែងទាំងផ្ទៃទឹក និងទាំងអាកាសធាតុគឺមានអំណោយផលដល់ការជិះទូកក្តោងលេងជាខ្លាំង។
មិនថាការកម្សាន្តបែបណានោះទេ នៅក្នុងទីក្រុងជាប់ឆ្នេរសមុទ្រដ៏ស្រស់ស្អាតនេះ ពិតជាអាចផ្តល់ឱ្យអ្នកនូវអារម្មណ៍ដ៏ស្រស់ថ្លា និងសប្បាយ រីករាយគ្រប់ពេលវេលា ជាមួយនឹងទីកន្លែងកម្សាន្តដ៏សម្បូរបែប និងកន្លែងសម្រាកកាយដ៏ស្រស់សោភាដូចអ្នកបានទៅដល់ស្ថានសួគ៌ាដ៏ស្រសស្អាតលើសពីការពិពណ៌នាទៅទៀត។ នៅទីនោះអ្នកក៏អាចជ្រើសរើសរបៀបនៃការកម្សាន្តប្រកបដោយភាពសប្បាយរីករាយ ទៅតាមចំណង់ចំណូលចិត្តរបស់អ្នកថែមទៀតផង។ អ្នកក៏អាចទៅទស្សនាការសម្តែងបែបប្រពៃណីរបស់ជនជាតិដើមនៅលើឆ្នេរខ្សាច់ដ៏ស្រស់ស្អាត នៅពេលរាត្រីដ៏សែនមនោរម្យជាមួយគូស្នេហ៍របស់អ្នក ឬជាមួយក្រុមគ្រួសារប្រកបដោយភាពរ៉ូមែនទិកក្រៃលែង ហើយអ្នកអាចដើរលេងតាមឆ្នេរខ្សាច់នាពេលថ្ងៃរៀបលិច ឬថ្ងៃរៀបរះ, ញ៉ាំអាហារប្លែកៗនៅលើកោះ និងអាហារនៅក្នុងតំបន់នីមួយៗនៅក្នុងទីក្រុង Gold Coast, ដើរមើលពីជីវិត និងការរស់នៅរបស់សត្វព្រៃ, ស្ប៉ាខ្លួនបែបធម្មជាតិ ដើម្បីថែរក្សាសម្រស់ និងជួយអ្នកបន្ធូរអារម្មណ៍ពីការនឿយហត់ផ្សេងៗ, ជួលម៉ូតូ ឬរថយន្តជិះលេងជុំវិញទីក្រុង និងការចូលលេងកម្សាន្តជាមួយល្បែងប្លែកៗរបស់ប្រជាជននៅក្នុងតំបន់-ល-។
ការទៅកម្សាន្តនៅក្នុងទីក្រុង Gold Coast ប្រទេសអូស្ត្រាលីគឺពិតជាមិនធ្វើឱ្យអ្នកខកបំណងនោះទេ ដោយសារតែភាពល្អឥតខ្ចោះនៃទេសភាព និងទីកន្លែងកម្សាន្តបែបធម្មជាតិដ៏សម្បូរបែប ផ្តល់នូវជម្រើសជាច្រើនទៅដល់ភ្ញៀវទេសចរជាតិ និងភ្ញៀវទេសចរអន្តរជាតិ ដែលទៅកម្សាន្តនៅលើទីដីជាប់ឆ្នេរសមុទ្រដ៏ល្បីល្បាញមួយនេះ៕
August 18, 2018