គ្រូបង្វឹក - La Reine Media

ថៃធ្វើការសូមទោស តែថានឹងវែករកមុខអ្នកបង្កហេតុ មុននឹងពិន័យក្រុមបាល់ទាត់ជម្រើសជាតិ

សហព័ន្ធកីឡាបាល់ទាត់ថៃ (FAT) បានធ្វើការសូមអភ័យទោសពីសំណាក់អ្នកគាំទ្រ បន្ទាប់ពីមានអំពើហិង្សារវាង U22 ថៃ និង U22 ឥណ្ឌូណេស៊ី ក្នុងវគ្គផ្ដាច់ព្រ័ត្រនៅស៊ីហ្គេមលើកទី 32។

«យើងខ្ញុំសូមអភ័យទោសចំពោះទស្សនិកជននៅទីលានប្រកួត និងអ្នកគាំទ្រនៅទូទាំងពិភពលោក។ ហេតុការណ៍នេះបានបង្កការខូចខាតធ្ងន់ធ្ងរសម្រាប់ក្រុមបាល់ទាត់ជម្រើសជាតិថៃ» FAT សរសេរក្នុងសេចក្ដីប្រកាសមួយដែលចុះផ្សាយនៅរសៀលថ្ងៃទី 17 ឧសភានេះ។

FAT ខកចិត្តនៅពេលសមាជិកក្រុមគ្រូបង្វឹកដែលត្រូវបានចាត់ទុកថាជាតំណាងរបស់សហព័ន្ធ បែរជាចូលរួមក្នុងហេតុការណ៍ប្រវាយប្រតប់ជាមួយឥណ្ឌូណេស៊ី។ FAT នឹងបង្កើតគណៈកម្មការវិន័យដើម្បីស៊ើបអង្កេតឱ្យបានហ្មត់ចត់ វែករកមុខអ្នកបង្កហេតុដំបូង ក៏ដូចជាអ្នកដែលបានចូលរួមក្នុងហេតុការណ៍នេះ មុនពេលលើកឡើងនូវទណ្ឌកម្មធ្ងន់ធ្ងរ។

«នឹងមិនមានការលើកលែងចំពោះអ្នកបង្កកំហុស។ គណៈកម្មការស៊ើបអង្កេតនឹងធ្វើការភ្លាម បន្ទាប់ពី U22 ត្រលប់មកប្រទេស» FAT សង្កត់ធ្ងន់ដូច្នេះ និងបន្ថែមថា បានត្រៀមខ្លួនរួចរាល់ក្នុងការទទួលយកយោបល់ដើម្បីទប់ស្កាត់ហេតុការណ៍អាក្រក់នេះកើតឡើងជាថ្មី។ (ព័ត៌មានស្ដីពីការប្រកួតវគ្គផ្ដាច់ព្រ័ត្រប្រកបដោយអំពើហិង្សានេះ សូមចូលអានទីនេះ)៕

May 17, 2023

កំណត់ត្រាចំនួនកាត់ក្រហមនៅស៊ីហ្គេម នៅតិចណាស់ ធៀបនឹងមួយប្រកួតនៅស្រុករបស់ Messi

ការប្រកួតដែលចំណាយពេលយូរ និងប្រកបដោយហិង្សានៅក្នុងវគ្គផ្ដាច់ព្រ័ត្រនៃកីឡាបាល់ទាត់បុរសនៅស៊ីហ្គេមលើកទី 32 បានបង្ខំឱ្យអាជ្ញាកណ្ដាលពិន័យកាតក្រហមរហូតដល់ 7 កាត។

U22 ឥណ្ឌូណេស៊ី បានឈ្នះ U22 ថៃ ដោយលទ្ធផល 5-2 នៅក្នុងវគ្គផ្ដាច់ព្រ័ត្រនៃកីឡាបាល់ទាត់ផ្នែកបុរសរបស់ស៊ីហ្គេមកាលពីយប់ថ្ងៃទី 16 ឧសភា ជួយឱ្យប្រទេសសម្បូរកោះរកបានមេដាយមាសមួយគ្រឿងទៀត។ ប៉ុន្តែ នេះគឺជាការប្រកួតដ៏អាក្រក់ ព្រោះតែមានអំពើហិង្សារវាងក្រុមទាំងពីរ នាំឱ្យអាជ្ញាកណ្ដាលជនជាតិអូម៉ង់ ពិន័យកាតលឿងចំនួន 12 (ប្រភពព័ត៌មានខ្លះថា 17) និងកាតក្រហមចំនួន 7 (ប្រភពព័ត៌មានខ្លះថា 9) ចំពោះកីឡាករ ក៏ដូចជាក្រុមគ្រូបង្វឹកនៃក្រុមទាំងពីរ។ នេះគឺជាតួលេខច្រើនបំផុតសម្រាប់មួយប្រកួតនៅស៊ីហ្គេម។

ទោះជាយ៉ាងណាក៏ដោយ នេះមិនមែនជាកំណត់ត្រាពិភពលោកនោះទេ ព្រោះនៅខាងក្រៅអាស៊ីអាគ្នេយ៍នៅមានការប្រកួតដែលអាជ្ញាកណ្ដាលពិន័យកាត់ក្រហមច្រើនជាងនេះឆ្ងាយណាស់។ កាលពីឆ្នាំ 2009 ការប្រកួតរវាងក្រុម Recreativo (អេស្ប៉ាញ) និង Saladillo (អាហ្សង់ទីន) ទទួលបានកាតក្រហមចំនួន 19។ ឆ្នាំ 1993 Ameliano (ប៉ារ៉ាហ្កាយ) និង General Caballero (ប៉ារ៉ាហ្កាយ) ទទួលបានកាត់ក្រហមចំនួន 20 ឯណោះ។

ចំណែកការប្រកួតដែលមានការពិន័យកាតក្រហមរហូតដល់ 36 កាត ដែលជាចំនួនច្រើនជាងគេបង្អស់លើពិភពលោក បានទៅលើគូប្រកួត Claypole (អាហ្សង់ទីន) – Victoriano Arenas (អាហ្សង់ទីន) កាលពីឆ្នាំ 2011 និងគូ Teniente Farina (ប៉ារ៉ាហ្កាយ) – Libertad (ប៉ារ៉ាហ្កាយ) កាលពីឆ្នាំ 2012៕

May 17, 2023

គ្រូបង្វឹកឥណ្ឌូណេស៊ីថា ថៃធ្វើឱ្យមានអំពើហិង្សា ខណៈគ្រូបង្វឹកថៃថា គូប្រកួតខ្វះស្មារតីកីឡា

គ្រូបង្វឹករបស់ក្រុមបាល់ទាត់ជម្រើសជាតិឥណ្ឌូណេស៊ី លោក Indra Sjafri យល់ថា ការដែលក្រុមគ្រូបង្វឹកថៃចេញអបអរសាទរឌឺដង គឺជាមូលហេតុនាំឱ្យមានការប៉ះទង្គិចគ្នាក្នុងវគ្គផ្ដាច់ព្រ័ត្រនៅស៊ីហ្គេមលើកទី 32 កាលពីយប់មិញ។

«អាជ្ញាកណ្ដាលប្រកាសថាមានការថែមម៉ោង 7 នាទី ទើបនៅពេលអស់ម៉ោងនេះ យើងគិតថាការប្រកួតបានចប់ ក៏រត់ចូលទីលានអបអរ ពុំមែនចង់បង្កហេតុជាមួយអ្នកណាឡើយ។ ភ្លាមនោះ អាជ្ញាកណ្ដាលឱ្យថែមម៉ោងរហូតដល់ 11 នាទី។ ពេលគ្រាប់បាល់ស្មើ 2-2 ថៃក៏រុលមកកន្លែងរបស់យើងដើម្បីឌឺដង ធ្វើឱ្យការប្រកួតប្រែជាច្របូកច្របល់» គ្រូបង្វឹករបស់ឥណ្ឌូណេស៊ី លោក Indra Sjafri និយាយដូច្នេះ បន្ទាប់ពីការប្រកួតបានបញ្ចប់។

លោក Indra Sjafri បន្ថែមថា «ពេលមានគ្រាប់បាល់ទីបី ជំនួយការ និងកីឡាកររបស់ខ្ញុំក៏អបអរឌឺទៅវិញ។ សម្រាប់ខ្ញុំ សកម្មភាពនេះរបស់ក្រុមទាំងពីរគឺមិនអាចទទួលយកបាន»។

ចំណែកលោក Issara Sritaro ដែលជាគ្រូបង្វឹករបស់ក្រុមថៃវិញ និយាយថា «ការដែលយើងត្រូវបានទាត់ចូលទីមុនគឺមិនអាចទទួលយកបាន។ ក៏ប៉ុន្តែ ឥណ្ឌូណេស៊ី ក៏លេងដោយខ្វះស្មារតីកីឡា»។

ទោះជាយ៉ាងណាក៏ដោយ នៅពេលចប់ការប្រកួត ក្រុមទាំងពីរក៏ពុំមានបញ្ហាអ្វីនឹងគ្នាទៀតនោះដែរ។ នេះគឺជាបទពិសោធន៍ដែលគួរយកជាមេរៀន ដែលយើងមិនគួរឱ្យមានករណីបែបនេះកើតឡើង ព្រោះវាប៉ះពាល់ដល់អ្នកគាំទ្រ និងកីឡាករផងដែរ។

កាលពីព្រលប់ថ្ងៃទី 16 ឧសភា ក្នុងការប្រកួតវគ្គផ្ដាច់ព្រ័ត្រនៅលើទីលានបាល់ទាត់របស់ពហុកីឡដ្ឋានជាតិអូឡាំពិក សមាជិកក្រុមកីឡាថៃ និងឥណ្ឌូណេស៊ី បានប៉ះទង្គិចគ្នាពីរលើក។ ក្នុងការថែមម៉ោងនៅតង់ទីពីរ សំឡេងកញ្ចែរបស់អាជ្ញាកណ្ដាលក៏បានធ្វើឱ្យក្រុមឥណ្ឌូណេស៊ីយល់ច្រលំថាអស់ម៉ោងប្រកួត ទើបនាំគ្នារត់ចូលទីលានអបអរសាទរ គ្រាដែលសំឡេងកញ្ចែនោះគឺជាការពិន័យចំពោះក្រុមឥណ្ឌូណេស៊ី។ ស្ថានការណ៍នេះបាននាំទៅរកគ្រាប់បាល់ស្មើ 2-2 ដោយកីឡាករថៃបានស៊ុតបញ្ចូលទីរបស់ឥណ្ឌូណេស៊ី។ បន្ទាប់ពីស៊ុតចូលភ្លាម កីឡាករថៃក៏រត់ទៅខាងមុខតំបន់អ្នកគាំទ្រឥណ្ឌូណេស៊ីដើម្បីសំដែងការអបអរ ឌឺដង ហើយក៏មានការប៉ះទង្គិចគ្នាមួយប្រាវ។

គ្រូបង្វឹករបស់ឥណ្ឌូណេស៊ី លោក Indra Sjafri

ចូលដល់តង់ទីពីរ បន្ទាប់ពីរកបានមួយគ្រាប់ទៀតដែលជួយឱ្យនាំមុខ 3-2 ឥណ្ឌូណេស៊ីក៏អបអរសងសឹក ហើយក៏មានការប្រវាយប្រតប់គ្នាជាថ្មី ធ្វើឱ្យការប្រកួតត្រូវអាក់ខានច្រើននាទី។ ពេលនោះ កាត់ក្រហមជាច្រើនក៏ត្រូវបានហូតចេញជាបន្តបន្ទាប់។

បន្ទាប់ពីស្ថានការណ៍ត្រូវបានគ្រប់គ្រង ថៃក៏ត្រូវបាត់បង់កីឡាករពីររូបដោយសារកាត់ក្រហម។ ដោយមានគ្នាតែ 9 នាក់ ក្រុមថៃក៏ត្រូវចាញ់ 2 គ្រាប់ទៀត នាំឱ្យឥណ្ឌូណេស៊ីឈ្នះ 5-2 ជាស្ថាពរ។ បរាជ័យលើកនេះរបស់ U22 ថៃ នាំឱ្យ U22 ឥណ្ឌូណេស៊ី ដណ្ដើមបានមេដាយមាសលើកទីបីនៅស៊ីហ្គេម៕

May 17, 2023

ក្រុមបាល់ទាត់នារីដែលបានមេដាយមាសនៅស៊ីហ្គេមលើកទី 32 ទទួលបានប្រាក់រង្វាន់ប៉ុន្មានរៀល?

កូនសិស្ស និងគ្រូបង្វឹករបស់ក្រុមបាល់ទាត់នារីជម្រើសជាតិវៀតណាម ទទួលប្រាក់រង្វាន់ចំនួន 3.6 ពាន់លានដុង (ប្រហែល 633,000,000 រៀល ឬ 153,000 ដុល្លារអាម៉េរិក) ពីសហព័ន្ធកីឡាបាល់ទាត់វៀតណាម រួមនឹងប្រាក់រង្វាន់ផ្សេងទៀត បន្ទាប់ពីដណ្ដើមបានមេដាយមាសនៅស៊ីហ្គេមលើកទី 32។

ក្រុមនារីជម្រើសជាតិវៀតណាម បានផ្ដួលមីយ៉ាន់ម៉ា 2-0 ក្នុងវគ្គផ្ដាច់ព្រ័ត្រនៅភ្នំពេញកាលពីព្រលប់ថ្ងៃទី 15 ឧសភា 2023។ លទ្ធផលនេះបានជួយឱ្យក្រុមនារីវៀតណាមក្លាយជាក្រុមនារីដំបូងគេក្នុងប្រវត្តិសាស្ត្រស៊ីហ្គេម ដែលដណ្ដើមបានមេដាយមាសចំនួនបួនរដូវកាលជាប់ៗគ្នា ហើយក៏ជាក្រុមដំបូងគេបង្អស់ដែលដណ្ដើមបានមេដាយមាស 8 លើកនៅស៊ីហ្គេម។

បន្ទាប់ពីការប្រកួតផ្ដាច់ព្រ័ត្រ ប្រធានសហព័ន្ធកីឡាបាល់ទាត់វៀតណាម (VFF) ក៏បានប្រកាសផ្ដល់ប្រាក់រង្វាន់ 2 ពាន់លានដុង ដល់ក្រុមបាល់ទាត់នារីវៀតណាម។ មុននោះ VFF ក៏បានផ្ដល់ប្រាក់រង្វាន់ 1.6 ពាន់លានដុងសម្រាប់បីប្រកួតនៅវគ្គចែកពូល និងវគ្គពាក់កណ្ដាលផ្ដាច់ព្រ័ត្រដែលវៀតណាមបានឈ្នះកម្ពុជា 4-0។ ក្រៅពីនេះ ក៏មានក្រុមហ៊ុនមួយ ប្រកាសផ្ដល់ប្រាក់រង្វាន់ 200 លានដុង (ប្រហែល 8,500 ដុល្លារអាម៉េរិក) ដល់ក្រុមនារីវៀតណាមផងដែរ ក្រោយវគ្គផ្ដាច់ព្រ័ត្រ។ ដូច្នេះ ប្រាក់រង្វាន់សរុបដែលក្រុមបាល់ទាត់នារីវៀតណាមទទួលបានគឺ 3.8 ពាន់លានដុង (ប្រហែល 668,000,000 រៀល ឬ 162,000 ដុល្លារអាម៉េរិក)។

ថ្ងៃទី 16 ឧសភានេះ ក្រុមបាល់ទាត់នារីវៀតណាម ត្រូវត្រលប់ទៅប្រទេសវិញ។ ក្រុមនេះនឹងសម្រាកយកកម្លាំងមួយសប្ដាហ៍ មុននឹងចូលហ្វឹកហាត់ដើម្បីត្រៀមសម្រាប់ការប្រកួតនៅ World Cup ដែលនឹងចាប់ផ្ដើមពីខែកក្កដាខាងមុខ៕

May 16, 2023

គ្រូបង្វឹកថៃ មិនភ្ញាក់ផ្អើលនៅពេលឥណ្ឌូណេស៊ីផ្ដួលវៀតណាមបានសម្រេច

យោងតាមគ្រូបង្វឹក Inssara Sritaro ឥណ្ឌូណេស៊ីមានកម្លាំងកាយល្អជាងដោយសារសម្រាកបានច្រើនថ្ងៃ មុននឹងផ្ដួលវៀតណាមនៅវគ្គពាក់កណ្ដាលផ្ដាច់ព្រ័ត្រនៃវិញ្ញាសាបាល់ទាត់បុរសនៅស៊ីហ្គេមលើកទី 32 នៅកម្ពុជា។

«ខ្ញុំមិនភ្ញាក់ផ្អើលនោះទេ នៅពេលឥណ្ឌូណេស៊ីឡើងដល់វគ្គផ្ដាច់ព្រ័ត្រ។ ពួកគេបានសម្រាកពីរថ្ងៃ ដោយសារតែពូល A ទាត់មុន និងរួចរាល់បានមុន។ ពូល B ចប់ក្រោយ ហើយក្រុមនានាសម្រាកបានតែមួយថ្ងៃ រួចក៏ទាត់វគ្គពាក់កណ្ដាលផ្ដាច់ព្រ័ត្រ។ ជាងនេះ នៅក្នុងការប្រកួតចុងក្រោយនៅពូល B ក្រុមថៃប្រកួតជាមួយវៀតណាមនៅលើទីលានមិនល្អ សើម ទើបកីឡាករត្រូវចំណាយកម្លាំងច្រើន» គ្រូបង្វឹកថៃ Sritaro និយាយដូច្នេះក្រោយពីថៃឈ្នះមីយ៉ាន់ម៉ា 3-0 ក្នុងវគ្គពាក់កណ្ដាលផ្ដាច់ព្រ័ត្រនៅពហុកីឡដ្ឋានជាតិអូឡាំពិក កាលពីព្រលប់ថ្ងៃទី 13 ឧសភា។

វៀតណាម និងថៃប៉ះគ្នាក្នុងការប្រកួតចុងក្រោយនៅពូល B កាលពីថ្ងៃទី 11 ឧសភា និងមានលទ្ធផល 1-1។ លទ្ធផលស្មើគ្នានេះ ធ្វើឱ្យវៀតណាមឈរលំដាប់លេខពីរនៅពូល B ហើយត្រូវប៉ះឥណ្ឌូណេស៊ីនៅវគ្គពាក់កណ្ដាលផ្ដាច់ព្រ័ត្រ ដែលនៅទីនេះ ឥណ្ឌូណេស៊ីបានផ្ដួលវៀតណាមដោយលទ្ធផល 3-2។

ជិតពីរម៉ោងក្រោយពីឥណ្ឌូណេស៊ីយកឈ្នះលើវៀតណាម ក្រុម U22 ថៃក៏បានផ្ដួលមីយ៉ាន់ម៉ា ដោយលទ្ធផល 3-0។ ដូច្នេះ ថៃត្រូវប៉ះឥណ្ឌូណេស៊ីនៅវគ្គផ្ដាច់ព្រ័ត្រនៃវិញ្ញាសាបាល់ទាត់បុរសនៅស៊ីហ្គេមលើកនេះ។

«ឥណ្ឌូណេស៊ីគឺជាគូប្រកួតខ្លាំង។ កីឡាកររបស់ពួកគេលឿនណាស់។ យើងនឹងត្រូវប្រុងប្រយ័ត្ន» គ្រូបង្វឹកថៃ Sritaro និយាយអំពីគូប្រកួតរបស់ខ្លួននៅវគ្គផ្ដាច់ព្រ័ត្រ។ គ្រូបង្វឹកវ័យ 43 ឆ្នាំរបស់ U22 ថៃ និយាយថា បើទោះជាឈ្នះមីយ៉ាន់ម៉ា ប៉ុន្តែ ថៃនៅមានកំហុសច្រើន ត្រូវការដកយកជាបទពិសោធន៍ និងកែតម្រូវ។

វៀតណាមមានអ្នកគាំទ្រ (ខាងក្រោយ) ច្រើនលើសលុប

ក្រុមកីឡាករបាល់ទាត់ជម្រើសជាតិអាយុក្រោម 22 ឆ្នាំ (U22) របស់ថៃ នឹងប្រកួតជាមួយក្រុមឥណ្ឌូណេស៊ីនៅវគ្គផ្ដាច់ព្រ័ត្រនាវេលាម៉ោង 20 ថ្ងៃទី 16 ឧសភាខាងមុខ។ បួនម៉ោងមុននោះ វៀតណាម នឹងដណ្ដើមមេដាយសំរឹទ្ធជាមួយមីយ៉ាន់ម៉ា៕

May 14, 2023

ក្រោយចាញ់វៀតណាម ក្រុមបាល់ទាត់នារីកម្ពុជា គ្មានពេលតូចចិត្ត ព្រោះត្រូវផ្ដួលថៃដើម្បីមេដាយសំរឹទ្ធ

កាលពីព្រលប់ថ្ងៃទី 12 ឧសភា ក្រុមបាល់ទាត់នារីជម្រើសជាតិកម្ពុជា បានប្រឹងអស់ពីសមត្ថភាព ប៉ុន្តែនៅតែចាញ់ក្រុមនារីវៀតណាម ក្នុងលទ្ធផល 0-4 ខណៈដដែល ក្រុមនារីថៃត្រូវចាញ់ក្រុមមីយ៉ាន់ម៉ា 2-4 នាំឱ្យកម្ពុជាត្រូវប៉ះថៃដើម្បីដណ្ដើមមេដាយសំរឹទ្ធ។

«នៅមុនការប្រកួត ខ្ញុំគិតថា នឹងមិនចាញ់ដល់ថ្នាក់នេះ។ ពួកយើងរំពឹងថានឹងស្មើជាមួយវៀតណាម។ ក៏ប៉ុន្តែ ជាក់ស្ដែង គ្រប់គ្នាអាចមើលឃើញគម្លាតសមត្ថភាពរវាងក្រុមទាំងពីរ។ ក្រុមនារីវៀតណាមមានបច្ចេកទេស និងបទពិសោធន៍ច្រើនជាង។ ចំណែកកីឡាការិនីរបស់ខ្ញុំនៅក្មេងខ្ចី» គ្រូបង្វឹកជនជាតិចិនរបស់ក្រុមបាល់ទាត់នារីកម្ពុជា លោក Gao Fulin ថ្លែងដូច្នេះបន្ទាប់ពីចាញ់វៀតណាម 0-4 នៅក្នុងវគ្គពាក់កណ្ដាលផ្ដាច់ព្រ័ត្រនៃវិញ្ញាសាបាល់ទាត់នារីនៅស៊ីហ្គេមលើកទី 32 កាលពីព្រលប់ថ្ងៃទី 12 ឧសភ។

អ្នកគាំទ្រជាច្រើនរបស់កម្ពុជា យល់ថា ក្រុមនារីកម្ពុជាបានបង្ហាញសមត្ថភាពដែលបញ្ជាក់អំពីការរីកចម្រើនជាងមុនឆ្ងាយ ប៉ុន្តែមិនអាចទប់ទល់នឹងវៀតណាមបាន ដោយសារថា ក្រុមនារីវៀតណាមគឺជាជើងខ្លាំង ធ្លាប់ជាម្ចាស់ជើងឯកស៊ីហ្គេមបីជំនាន់ជាប់ៗគ្នាចុងក្រោយនេះ។

គ្រូបង្វឹកកម្ពុជាយល់ថា ក្រុមនារីកម្ពុជាពុំមានពេលសម្រាប់ការតូចចិត្ត ព្រោះនៅចំពោះមុខគឺគោលដៅផ្ដួលក្រុមនារីថៃ ដែលបានចាញ់មីយ៉ាន់ម៉ានៅវគ្គពាក់កណ្ដាលផ្ដាច់ព្រ័ត្រ ដើម្បីដណ្ដើមមេដាយសំរឹទ្ធ។ «យើងនឹងយកកម្លាំងមកវិញឱ្យបានលឿនបន្ទាប់ពីការប្រកួតនេះ និងប្រឹងប្រែងប្រកួតជាមួយថៃ ឱ្យបានល្អបំផុត។ យើងសង្ឃឹមថា អាចធ្វើអ្វីមួយសម្រាប់ទស្សនិកជនម្ចាស់ផ្ទះ» គ្រូបង្វឹករបស់ក្រុមនារីកម្ពុជា ថ្លែងដូច្នេះ។

ទោះជាយ៉ាងណាក៏ដោយ ការរំពឹងទុកពុំមែនជាលទ្ធផលចុងក្រោយឡើយ។ ម្យ៉ាងទៀត ក្រុមនារីកម្ពុជា ក៏ធ្លាប់បានចាញ់ក្រុមថៃ 0-3 នៅក្នុងវគ្គចែកពូល។ ប៉ុន្តែ Admin សូមជូនពរដល់ក្រុមបាល់ទាត់នារីកម្ពុជា ទទួលបានជ័យជម្នះ និងយកបានមេដាយជូនជាតិ!

May 13, 2023

ក្រុមបាល់ទាត់នារីកម្ពុជាអាចទប់ទល់នឹងវៀតណាមបានអត់ នៅព្រលប់នេះ?

ថ្វីបើក្រុមបាល់ទាត់នារីជម្រើសជាតិកម្ពុជា ត្រូវបានវាយតម្លៃថាខ្សោយជាង ប៉ុន្តែពួកគេមានការរីកចម្រើនជាងមុន ហើយមានអ្នកគាំទ្រជួយផ្ដល់កម្លាំងចិត្តនៅពេញកីឡដ្ឋាន ដូច្នេះ ក្រុមនារីវៀតណាម ប្រហែលជាត្រូវការប្រឹងប្រែងជាងមុន ក្នុងការប៉ះគ្នានៅព្រលប់ថ្ងៃទី 12 ឧសភានេះ។

ក្រុមនារីកម្ពុជាបានឡើងដល់វគ្គពាក់កណ្ដាលផ្ដាច់ព្រ័ត្រជាលើកដំបូងក្នុងប្រវត្តិសាស្ត្រស៊ីហ្គេម បន្ទាប់ពីបានផ្ដួលឡាវ 2-0, ផ្ដួលសិង្ហបុរី 1-0 និងចាញ់ថៃ 0-3។

ក្រុមនារីកម្ពុជា មកដល់បច្ចុប្បន្នត្រូវបានវាយតម្លៃថា បានរីកចម្រើនជាងមុនឆ្ងាយ នៅពេលមានគ្រូបង្វឹកចិន Gao Fulin ប៉ុន្តែនៅតែមានចំណុចខ្វះខាតច្រើន ក្នុងនោះ នៅពេលជួបគូប្រកួតខ្លាំងៗ ពួកគេចេះតែការពារ និងវាយបកមិនទាន់ស៊ីចង្វាក់គ្នា។

នៅក្នុងបីប្រកួតចុងក្រោយបង្អស់ដែលបានប៉ះក្រុមនារីវៀតណាម ក្រុមកម្ពុជាសុទ្ធតែត្រូវចាញ់។ ប៉ុន្តែ អាចនិយាយបានថា នេះបណ្ដាលមកពី «បទពិសោធន៍របស់កម្ពុជាមានតិចតួចនៅឡើយ» ព្រោះថា ក្រុមបាល់ទាត់នារីកម្ពុជា ទើបតែប្រកួតកម្រិតជម្រើសជាតិចាប់ពីឆ្នាំ 2018 ប៉ុណ្ណោះ។

ទោះជាយ៉ាងណាក៏ដោយ នៅវគ្គពាក់កណ្ដាលផ្ដាច់ព្រ័ត្ររបស់វិញ្ញាសាបាល់ទាត់នារីរបស់ស៊ីហ្គេមលើកទី 32 ដែលនឹងធ្វើឡើងនាវេលាម៉ោង 19 ថ្ងៃទី 12 ឧសភានេះ ការទាត់លើទីលានម្ចាស់ផ្ទះ និងមានអ្នកគាទ្រប្រហែល 30,000 នាក់ចាំជួយលើកទឹកចិត្ត ក្រុមបាល់ទាត់នារីកម្ពុជា ទំនងជាអាចការពារសំណាញ់ទីបានល្អ ហើយអាចពន្យារការប្រកួតឱ្យដល់វគ្គប៉េណាំងទីម្ដងម្នាក់ក៏ថាបាន៕

May 12, 2023

«យកឈ្នះកម្ពុជាមិនមែនជារឿងងាយឡើយ» នេះជាសម្ដីរបស់ប្រធានក្រុមបាល់ទាត់នារីវៀតណាម

ខ្សែប្រយុទ្ធ និងជាប្រធានក្រុមបាល់ទាត់នារីវៀតណាម បាននិយាយថា ទន្ទឹមនឹងអំណោយផលល្អដោយសារជាម្ចាស់ផ្ទះ កម្ពុជាក៏បានរីកចម្រើនច្រើន ដូច្នេះ នៅថ្ងៃស្អែក វៀតណាមនឹងត្រូវប្រុងប្រយ័ត្នពេលប៉ះគ្នាក្នុងវគ្គពាក់កណ្ដាលផ្ដាច់ព្រ័ត្រនៃវិញ្ញាសាបាល់ទាត់នារីនៅស៊ីហ្គេមលើកទី 32។

កាលពីព្រឹកថ្ងៃទី 11 ឧសភា នៅក្នុងសន្និសីទសារព័ត៌មាននៅភ្នំពេញ ប្រធានក្រុមបាល់ទាត់នារីវៀតណាម កញ្ញា ហ្វឹន ញ៉ឺ (Huynh Nhu) បាននិយាយថា «ក្នុងការប៉ះកម្ពុជាកាលពីឆ្នាំ 2019 ក្រុមនារីវៀតណាមបានឈ្នះយ៉ាងគគ្រឹកគ្រគ្រេង។ ប៉ុន្តែ នោះគឺជារឿងរបស់ប្រាំឆ្នាំមុន។ ពេលនេះ កម្ពុជារីកចម្រើនជាងមុនឆ្ងាយណាស់»។

ប្រធានក្រុមបាល់ទាត់នារីវៀតណាម បានរម្លឹកដល់ការប្រកួតនៅស៊ីហ្គេមឆ្នាំ 2019 ដែលពេលនោះ នាង និងមិត្តរួមក្រុមបានផ្ដួលកម្ពុជា 10-0។ ហើយក្រោយមក ក្រុមនារីវៀតណាមក៏បានឈ្នះកម្ពុជាពីរប្រកួតទៀតនៅក្នុងឆ្នាំ 2022 គឺឈ្នះ 7-0 នៅស៊ីហ្គេមលើកទី 31 និង 3-0 នៅ AFF Cup។

ក្រោមការដឹកនាំរបស់គ្រូបង្វឹកជនជាតិចិន Gao Fulin បច្ចុប្បន្ន ក្រុមបាល់ទាត់នារីជម្រើសជាតិកម្ពុជា បានរីកចម្រើនខ្លាំងដែលគេអាចមើលឃើញនៅក្នុងស៊ីហ្គេមលើកនេះ។ ពួកគេបានចាញ់ថៃ ប៉ុន្តែបានឈ្នះសិង្ហបុរី និងឡាវ ហើយក៏ឈរលំដាប់លេខពីរនៅពូល B ដូច្នេះក៏បានឡើងដល់វគ្គពាក់កណ្ដាលផ្ដាច់ព្រ័ត្រជាលើកដំបូងក្នុងប្រវត្តិសាស្ត្រនៅស៊ីហ្គេម។

«…កម្ពុជាធ្វើបានល្អណាស់នៅពេលប៉ះថៃ និងគូប្រកួតនានានៅពូល B។ ពេលនេះ ការយកឈ្នះលើកម្ពុជាគឺជារឿងមិនងាយស្រួល។ …វៀតណាមនឹងលេងដោយការប្ដេជ្ញាចិត្តខ្ពស់បំផុតដើម្បីដណ្ដើមជ័យជម្នះ» ប្រធានក្រុមបាល់ទាត់នារីវៀតណាម អះអាងដូច្នេះ។

បច្ចុប្បន្ន ខ្សែប្រយុទ្ធវៀតណាម កញ្ញា ហ្វឹន ញ៉ឺ កំពុងលេងនៅពានរង្វាន់ជើងឯកបាល់ទាត់ជាតិព័រទុយហ្កាល់ សម្រាប់ក្លឹប Lank។ ហ្វឹន ញ៉ឺ និងក្រុមនារីវៀតណាម ថ្វីបើបានចាញ់ហ្វ៊ីលីពីន 1-2 នៅក្នុងការប្រកួតជើងចុងក្រោយ ប៉ុន្តែនៅតែឈរកំពូលតារាង A ។ វៀតណាមមាន 6 ពិន្ទុស្មើនឹងមីយ៉ាន់ម៉ា និងហ្វ៊ីលីពីន ប៉ុន្តែមានគ្រាប់បាល់ចំណេញខ្ពស់ជាង។

ហ្វឹន ញ៉ឺ (Huynh Nhu) គឺជាកីឡាការិនីខ្សែប្រយុទ្ធ និងជាប្រធានក្រុមបាល់ទាត់នារីវៀតណាម

ប្រធានក្រុមគ្រូបង្វឹករបស់ក្រុមបាល់ទាត់នារីវៀតណាម លោក ម៉ៃ ឌឺក ជុង (Mai Duc Chung) ក៏យល់ឃើញដូចទៅនឹងប្រធានក្រុមបាល់ទាត់នារីវៀតណាម ហ្វឹន ញ៉ឺ ទាក់ទងនឹងសមត្ថភាពបច្ចុប្បន្នរបស់ក្រុមបាល់ទាត់នារីជម្រើសជាតិកម្ពុជា។

ចំណែកភាគីកម្ពុជាវិញ គ្រូបង្វឹក Gao Fulin ថ្លែងថា «យើងនឹងប្រឹងប្រែងឱ្យអស់ពីសមត្ថភាព។ សង្ឃឹមថា កីឡាការិនីទាំងអស់របស់យើងនឹងប្រកួតបានល្អ»៕

May 11, 2023

គ្រូបង្វឹក Sjafri ថា U22 ថៃ និង U22 វៀតណាម នឹងប្រឹងគេចពី U22 ឥណ្ឌូណេស៊ី

U22 ថៃ និង U22 វៀតណាម នឹងប្រឹងប្រែងដើម្បីនាំមុខគេនៅពូល B ក្នុងបំណងគេចពី U22 ឥណ្ឌូណេស៊ីនៅវគ្គពាក់កណ្ដាលផ្ដាច់ព្រ័ត្រនៃវិញ្ញាសាបាល់ទាត់បុរសរបស់ស៊ីហ្គេមលើកទី 32។

«យើងមិនត្រូវជ្រើសរើសគូប្រកួត។ វៀតណាម និងថៃទេតើ ទើបជាអ្នកត្រូវគិតគូរថាតើចង់ជួបគូប្រកួតមួយណា និងគេចពីគូប្រកួតមួយណានៅវគ្គពាក់កណ្ដាលផ្ដាច់ព្រ័ត្រ» គ្រូបង្វឹក Indra Sjafri របស់ U22 ឥណ្ឌូណេស៊ី និយាយដូច្នេះ បន្ទាប់ពីបានផ្ដួលកម្ពុជាក្នុងលទ្ធផល 2-1 នៅពហុកីឡដ្ឋានជាតិអូឡាំពិក កាលពីព្រលប់ថ្ងៃទី 10 ឧសភា។

ក្រុមបាល់ទាត់បុរសជម្រើសជាតិអាយុក្រោម 22 ឆ្នាំ (U22) របស់ឥណ្ឌូណេស៊ី បានយកឈ្នះ 3-0 លើហ្វ៊ីលីពីន, 5-0 លើមីយ៉ាន់ម៉ា និង 3-0 លើទីម័រខាងកើត ហើយក៏បានឡើងដល់វគ្គពាក់កណ្ដាលផ្ដាច់ព្រ័ត្រឆាប់ជាងគេមួយប្រកួត។ នៅក្នុងការប្រកួតជើងចុងក្រោយនៅពូល A គ្រាដែលមានសំបុត្រសម្រាប់ការប្រកួតវគ្គបន្ត U22 ឥណ្ឌូណេស៊ី ក៏នៅតែផ្ដួលកម្ពុជាក្នុងលទ្ធផល 2-1។

(ពីឆ្វេងទៅស្ដាំ) លោក Sumardji អ្នកគ្រប់គ្រងក្រុម, លោក Indra Sjafri ប្រធានក្រុមគ្រូបង្វឹក និង លោក Bima Sakti ជំនួយការប្រធានក្រុមគ្រូបង្វឹករបស់ U22 ឥណ្ឌូណេស៊ី

ដោយសារតែឈរលើកំពូលតារាង A ដូច្នេះ U22 ឥណ្ឌូណេស៊ីនឹងប្រកួតក្នុងវគ្គពាក់កណ្ដាលផ្ដាច់ព្រ័ត្រជាមួយនឹងក្រុមលេខពីរនៅពូល B គឺ U22 ថៃ ឬ U22 វៀតណាម ដែលមានសំបុត្រឡើងទៅវគ្គបន្តរួចហើយ។ U22 ថៃ និង U22 វៀតណាម នឹងត្រូវប៉ះគ្នានៅម៉ោង 19 យប់ថ្ងៃទី 11 ឧសភានេះ នៅឯកីឡដ្ឋានព្រីនស៍ ដែលស្ថិតនៅភូមិឃ្មួញ សង្កាត់ឃ្មួញ ខណ្ឌសែនសុខ រាជធាននីភ្នំពេញ ដើម្បីដណ្ដើមតំណែងកំពូលតារាង B។ ឱ្យតែមានលទ្ធផលស្មើ U22 ថៃ នឹងក្លាយជាអ្នកគ្រប់គ្រងពូល B ដោយសារមាន 9 ពិន្ទុ ស្មើនឹង U22 វៀតណាម ប៉ុន្តែ ថៃមានគ្រាប់បាល់ចំណេញ (+7) ខ្ពស់ជាងវៀតណាម (+5)។

គ្រូបង្វឹកឥណ្ឌូណេស៊ី លោក Indra Sjafri និយាយថា «ខ្ញុំជឿជាក់ថា កីឡាកររបស់យើងនឹងលេងបានល្អ ហើយដណ្ដើមបានសំបុត្រទៅប្រកួតបន្ត… យើងបានត្រៀមសម្រាប់រាល់ការប្រកួតនៅវគ្គពាក់កណ្ដាលផ្ដាច់ព្រ័ត្រ …តាំងពីថ្ងៃដំបូងមកម្លេះ»។

May 11, 2023

គ្រូបង្វឹក Honda ត្រូវចាកចេញពីវិស័យបាល់ទាត់នៅកម្ពុជា ក្រោយស៊ីហ្គេម 2023

លោក Keisuke Honda គិតចង់ត្រលប់ទៅធ្វើជាកីឡាករវិញ បន្ទាប់ពីចាកចេញពីវិស័យបាល់ទាត់នៅកម្ពុជា ព្រោះមិនអាចជួយឱ្យ U22 កម្ពុជា ឆ្លងផុតវគ្គចែកពូលនៅស៊ីហ្គេមលើកទី 32។

«ខ្ញុំ និង Honda នឹងមិនបន្តដឹកនាំក្រុមកម្ពុជាទៀតទេ ក្រោយពីស៊ីហ្គេមលើកទី 32។ ខ្ញុំមិនទាន់ដឹងថាត្រូវធ្វើអ្វី។ ប៉ុន្តែ Honda វិញ គ្រោងនឹងត្រលប់ទៅធ្វើជាកីឡាករ និងបន្តរៀនយកសញ្ញាបត្រគ្រូបង្វឹក» គ្រូបង្វឹក Ryu Hirose និយាយកាលពីព្រលប់ថ្ងៃទី 10 ឧសភា ក្រោយពី U22 កម្ពុជា បានចាញ់ U22 ឥណ្ឌូណេស៊ី 1-2 ដែលធ្វើឱ្យកម្ពុជាត្រូវបានជម្រុះត្រឹមវគ្គចែកពូលនៅស៊ីហ្គេមលើកទី 32។

លោក Honda កើតឆ្នាំ 1986 គឺជាខ្សែបម្រើដ៏លេចធ្លោនៃវិស័យបាល់ទាត់ជប៉ុនក្នុងអំឡុងឆ្នាំ 2010-2017 នៅពេលទាត់ឱ្យក្លឹប CSKA Moscow និង AC Milan។ លោក Honda ចូលមកក្នុងវិស័យបាល់ទាត់កម្ពុជាក្នុងនាមជាប្រធានបច្ចេកទេសកាលពីឆ្នាំ 2018 ពេលគាត់នៅជាកីឡាករ។ ក្រោយមក លោក Honda ក៏ដឹកនាំក្រុមជម្រើសជាតិកម្ពុជាពីចម្ងាយ ដោយសារតែគាត់ត្រូវនៅទាត់ឱ្យបណ្ដាក្លឹបរបស់អូស្ត្រាលី ប្រេស៊ីល ហូឡង់ អាស៊ែបៃហ្សង់ និងលីទុយអានី។

ក្រោមការដឹកនាំរបស់លោក Honda បាល់ទាត់កម្ពុជាបានឡើងដល់វគ្គពាក់កណ្ដាលផ្ដាច់ព្រ័ត្រជាលើកដំបូងនៅស៊ីហ្គេមឆ្នាំ 2019 ប៉ុន្តែ ត្រូវចាញ់វៀតណាម 0-4។ ស៊ីហ្គេមបន្ទាប់នៅហ្វ៊ីលីពីន លោក Honda នៅតែដឹកនាំក្រុមកម្ពុជាតាមអនឡាញ ខណៈដែលអ្នកដឹកនាំផ្ទាល់គឺ Felix Dalmas ជាគ្រូបង្វឹកវ័យក្មេង និងជាជនជាតិអាហ្សង់ទីន។

លោក Keisuke Honda បង្ហាញទឹកមុខក្រៀមក្រំ នៅពេលកម្ពុជាត្រូវចាញ់ឥណ្ឌូណេស៊ីកាលពីព្រលប់ថ្ងៃទី 10 ឧសភា 2023

គ្រូបង្វឹកជនជាតិជប៉ុនរបស់កម្ពុជា បានមកដឹកនាំក្រុមដោយផ្ទាល់ចាប់ពីឆ្នាំ 2021 បន្ទាប់ពីចូលនិវត្តន៍ពីអាជីពកីឡាករ។ លោក Honda និងកូនសិស្សរបស់គាត់ក៏ត្រូវបានជម្រុះត្រឹមវគ្គចែកពូលនៅស៊ីហ្គេមលើកទី 31 ប៉ុន្តែ អ្នកគាំទ្រនៅតែពេញចិត្តលោកដដែល ដោយសង្ឃឹមថា នៅស៊ីហ្គេមលើកទី 32 លោក Honda នឹងជួយឱ្យក្រុមកម្ពុជាបង្កបានការភ្ញាក់ផ្អើលនៅលើទីលានម្ចាស់ផ្ទះ។

ក៏ប៉ុន្តែ ក្ដីសង្ឃឹមនេះមិនបានក្លាយជាការពិតឡើយ។ បន្ទាប់ពីការប្រកួតបើកឆាកដែលបានឈ្នះទីម័រខាងកើត 4-0 ក្រុមកម្ពុជាក៏ត្រូវទទួលលទ្ធផល 1-1 ពេលប៉ះក្រុមហ្វ៊ីលីពីន មុនពេលត្រូវចាញ់ក្រុមមីយ៉ាន់ម៉ា 0-2 និងចាញ់ឥណ្ឌូណេស៊ី 1-2 ហើយក៏ត្រូវជម្រុះត្រឹមវគ្គចែកពូលកាលពីថ្ងៃទី 10 ឧសភា 2023។

ថ្លែងអំពីបរាជ័យរបស់ក្រុម U22 កម្ពុជា នៅក្នុងការប្រកួតចុងក្រោយកាលពីព្រលប់ម្សិលមិញ គ្រូបង្វឹក Hirose យល់ថា «បញ្ហារបស់យើងគឺការប្រើប្រាស់ឱកាសមិនបានល្អ អាចដោយសារកម្លាំងកាយ បច្ចេកទេស ប៉ុន្តែក៏អាចដោយសារសំណាងមិនល្អ»៕

May 11, 2023

Tag: គ្រូបង្វឹក