ខភាព - La Reine Media

នាវាទេសចរណ៍ខ្នាតធំដែលធ្លាប់ទទួលបានជំនួយពីកម្ពុជាក្នុងសម័យកូវីដ បានត្រឡប់មកជាថ្មី

(ខេត្តព្រះសីហនុ) – នាវាទេសចរណ៍ខ្នាតធំ Westerdam នាថ្ងៃទី 28 ធ្នូ 2023 នេះ ត្រូវបានអនុញ្ញាតឱ្យចូលចតនៅកំពង់ផែស្វយ័តក្រុងព្រះសីហនុ ដើម្បីឱ្យភ្ញៀវនៅលើនាវានេះឡើងមកកម្សាន្តនៅក្នុងខេត្តព្រះសីហនុ និងខេត្តកែប។ នេះបើតាមទំព័រ CPP។

នេះគឺជាការចូលចតជាលើកទីពីររបស់នាវាទេសចរណ៍ Westerdam នៅកំពង់ផែរបស់កម្ពុជា បន្ទាប់ពីការចូលចតលើកទីមួយកាលពីឆ្នាំ 2020 ជាពេលដែលពិភពលោកកំពុងប្រឈមនឹងវិបត្តិសុខភាព និងជាពេលដែលនាវានេះត្រូវបានប្រទេសជាច្រើនបដិសេធការស្នើសូមចូលចត។

ការចូលចតជាលើកទីពីរដែលធ្វើឡើងនៅថ្ងៃទី 28 ខែធ្នូ ឆ្នាំ 2023 របស់ Westerdam គឺមានភ្ញៀវទេសចរណ៍ជាងពីរពាន់នាក់។ ដំណើរចូលចតជាថ្មីនេះ ត្រូវបានក្រសួងទេសចរណ៍ សហការជាមួយរដ្ឋបាលខេត្តព្រះសីហនុ រៀបចំពិធីទទួល ក៏ដូចជារំលឹកខួបបីឆ្នាំនៃការស្នើសូមចូលចតរបស់នាវា Westerdam នៅកម្ពុជា។

យោងតាមឯកឧត្តម សុខ សូកេន រដ្ឋមន្ត្រីក្រសួងទេសចរណ៍ ក្នុងចំណោមភ្ញៀវជាងពីរពាន់នាក់នៅលើនាវានេះ មានភ្ញៀវប្រមាណ 500 នាក់បានឡើងមកទស្សនានៅរមណីយដ្ឋាននានាក្នុងខេត្តព្រះសីហនុ និងខេត្តកែប។

«តាមរយៈការចូលចតជាលើកទីពីររបស់នាវាទេសចរណ៍ Westerdam នេះ នឹងជួយទាក់ទាញនាវាទេសចរណ៍ខ្នាតធំមកកាន់កម្ពុជា នាឆ្នាំក្រោយបន្តបន្ទាប់ទៀត» រដ្ឋមន្ត្រីក្រសួងទេសចរណ៍សង្ឃឹមដូច្នេះ។

យោងតាមឯកឧត្ដមរដ្ឋមន្ត្រី នាវាទេសចរណ៍នេះនឹងចតនៅកម្ពុជាក្នុងរយៈពេលមួយថ្ងៃ ហើយគ្រោងនឹងចាកចេញពីកម្ពុជានៅវេលាម៉ោង 9 យប់នេះ។

នៅក្នុង 11 ខែដំបូងនៃឆ្នាំ 2023 កម្ពុជាទទួលបានភ្ញៀវទេសចរណ៍អន្តរជាតិជាង 4.91 លាននាក់ ក្នុងនោះភ្ញៀវពីប្រទេសថៃមានចំនួនច្រើនជាងគេ ពោលគឺ 1.65 លាននាក់ ខណៈភ្ញៀវពីវៀតណាមច្រើនជាងគេលំដាប់ទីពីរ និងចិនលំដាប់ទីបី៕

December 28, 2023

គេចផុតពីក្ស័យធន ដោយសារគំនិតចិញ្ចឹមអយស្ទើរលើគោក

(ជប៉ុន) – វិះក្ស័យធនព្រោះតែជនជាតិជប៉ុនមិនហ៊ានបរិភោគអយស្ទើរនៅក្នុងវិបត្តិសុខភាពកាលពីឆ្នាំ 2006 ក្រុមហ៊ុន General Oyster ក៏នឹកឃើញ និងងាកទៅចិញ្ចឹមសត្វសមុទ្រនេះនៅលើដីគោក ដើម្បីផ្ដាច់ចេញពីប្រភពជំងឺ។

យោងតាម Le Monde នៅលើកោះ Kumejima ដែលស្ថិតនៅភាគខាងត្បូងប្រទេសជប៉ុន «បដិវត្តន៍នៃការចិញ្ចឹមអយស្ទើរ» មួយកំពុងកើតឡើង។ នៅមិនឆ្ងាយពីឆ្នេរសមុទ្រ មានបណ្ដុំអគារគ្រោងដែក ផ្ទះកញ្ចក់ដែលមានអាងទឹក និងសំណង់បេតុងដ៏ចម្លែកជាច្រើន។

បណ្ដុំហេត្ថារចនាសម្ព័ន្ធនេះគឺជាកម្មសិទ្ធិរបស់ GO Farm ដែលជាក្រុមហ៊ុនបុត្រសម្ព័ន្ធរបស់ General Oyster (GO)។ ពួកគេកំពុងប្រើប្រាស់ទឹកសមុទ្រជ្រៅដើម្បីចិញ្ចឹមអយស្ទើរនៅលើដីគោក ជំនួសឱ្យការចិញ្ចឹមនៅលើសមុទ្រដូចប្រពៃណី។

GO ឱ្យដឹងថា ពួកគេត្រូវចំណាយពេល 10 ឆ្នាំ ដើម្បីរកបច្ចេកទេសចិញ្ចឹមអយស្ទើរលើដីគោក ដែលហៅថា «អយស្ទើរទី 8 2.0»។ យោងតាមក្រុមហ៊ុន ឧបសគ្គធំរបស់វិធីសាស្ត្រនេះគឺការផ្គត់ផ្គង់ទឹក និងចំណីឱ្យបានគ្រប់គ្រាន់ និងគ្រប់គ្រងសីតុណ្ហភាពឱ្យបានល្អ ប៉ុន្តែត្រូវចំណាយទាប។ នៅប្រទេសជប៉ុន និងសហរដ្ឋអាម៉េរិក វិធីចិញ្ចឹមអយស្ទើរលើដីគោករបស់ពួកគេ មានប័ណ្ណប៉ាតង់រួចទៅហើយ។

គំនិតស្ដីពីការចិញ្ចឹមអយស្ទើរលើដីគោកបានកើតឡើងនៅពេល General Oyster ស្ថិតនៅក្បែរមាត់ជ្រោះនៃការដួលរលំ។ ឆ្នាំ 2003 ពួកគេបើកហាងអយស្ទើរនៅក្នុងខណ្ឌ Akasaka នៃរាជធានីតូក្យូ។ ពួកគេជោគជ័យដល់ថ្នាក់បានពង្រីកសាខានៅពាសពេញផ្ទៃប្រទេសជប៉ុន ហើយមកដល់បច្ចុប្បន្នក៏នៅសល់ 26 ហាង។

ក៏ប៉ុន្តែ មកដល់ឆ្នាំ 2006 បណ្ដាកសិដ្ឋានចិញ្ចឹមអយស្ទើរនៅជប៉ុន ត្រូវរងផលប៉ះពាល់ដោយសាររោគរាតត្បាត norovirus។ អតិថិជនដែលបានបរិភោគអយស្ទើរត្រូវធ្លាក់ខ្លួនឈឺ ធ្វើឱ្យហាងរបស់ GO ស្ងាត់ជ្រងំ។ ពុំមានហាងណាមួយជាប់ទាក់ទិននឹងរោគរាតត្បាត ប៉ុន្តែប្រាក់ចំណូលរបស់ GO នៅតែថយចុះ បណ្ដាលឱ្យក្រុមហ៊ុននេះមានហានិភ័យត្រូវក្ស័យធន។

ជំនួសឱ្យការបោះបង់អាហារធ្វើពីអយស្ទើរ GO ខំរកវិធីដើម្បីមានប្រភពផ្គត់ផ្គង់ប្រកបដោយភាពម្ចាស់ការផ្នែកសុវត្ថិភាព។ Kyoko Washiashi បច្ចុប្បន្នជាអ្នកគ្រប់គ្រងរបស់ GO នៅ Kumejima ឱ្យដឹងថា កាលពីឆ្នាំ 2006 «យើងពឹងផ្អែកលើអ្នកផលិត។ យើងមិនអាចធ្វើអ្វីបាន ដូច្នេះក៏សម្រេចចិត្តចិញ្ចឹមអយស្ទើរដោយខ្លួនឯង»។

នៅជប៉ុន អយស្ទើរត្រូវបានចិញ្ចឹមផ្ទាល់នៅឈូងសមុទ្រ ដោយការប្រើប្រាស់ទ្រុងមានពោងបណ្ដែតជាដើម។ ពួកវាអាចត្រូវបានបាញ់ពន្លឺអ៊ុលត្រាវីយូឡេ ឬបាញ់ពពុះទឹកដើម្បីកម្ចាត់កាកសំណល់អាក្រក់។ ប៉ុន្តែ វិធីនេះមិនអាចធានាបានទាំងស្រុងនូវសុវត្ថិភាព ដូច្នេះហើយទើបមេរោគ ពេលខ្លះនៅតែអាចមានក្នុងសាច់អយស្ទើរ។

ដូច្នេះ GO ក៏សម្រេចចិត្តចិញ្ចឹមនៅលើដីគោក ដើម្បីគេចពីមេរោគនៅក្នុងទឹកសមុទ្ររាក់ៗ។ ពួកគេអភិវឌ្ឍវិធីសាស្ត្រចិញ្ចឹមមួយដែលមានពីរជំហាន។ ដំណាក់កាលដំបូង និងដំណាក់កាលអាចលក់បាន គឺជាអយស្ទើរត្រាំក្នុងទឹកសមុទ្រជ្រៅនៅលើដីគោក ក្នុងរយៈពេលខ្លី ហៅថា «អយស្ទើរសមុទ្រទី 8 1.0»។

ចាប់ពីខែកក្កដា 2014 GO យកទឹកសមុទ្រពីជម្រៅជាង 200 ម៉ែត្រ ជាទីដែលកម្រមានវីរុស មកកាន់អាង។ អយស្ទើរនឹងត្រូវបានត្រាំក្នុងអាងទឹកសមុទ្រនេះក្នុងរយៈពេល 48 ម៉ោង ដើម្បីកម្ចាត់បាក់តេរី ដូចជា E. coli និង Vibrio ទៅតាមស្ដង់ដារបស់ក្រុមហ៊ុន ដែលតឹងរ៉ឹងជាងច្បាប់របស់ជប៉ុន។

វិធីសាស្ត្រខាងលើបានជួយឱ្យ GO អាចប្រើប្រាស់អយស្ទើរជាង 6 លានក្បាលជារៀងរាល់ឆ្នាំ។ Hidenori Yoshida អគ្គនាយកក្រុមហ៊ុន GO ឱ្យដឹងថា ឆ្នាំសារពើពន្ធចុងក្រោយបំផុត ក្រុមហ៊ុននេះរកចំណូលបាន 3.7 ពាន់លានយ៉េន (ជិត 26 លានដុល្លារអាម៉េរិក) ក្នុងនោះពួកគេចំណេញ 128 លានយ៉េន (900,000 ដុល្លារអាម៉េរិក)។

ជំហានធំបន្ទាប់ ដែលត្រូវបានធ្វើឡើងក្នុងរដូវក្ដៅឆ្នាំនេះ គឺការចិញ្ចឹមអយស្ទើរនៅលើដីគោកទាំងស្រុង។ អយស្ទើរជំនាន់ថ្មីដែលត្រូវបានហៅថា «អយស្ទើរទី 8 2.0» នេះ ត្រូវបានអ្នកជំនាញវាយតម្លៃថា មានរសជាតិ «ស្រួលបរិភោគខ្លាំងណាស់»។

យោងតាមលោក Yoshida ក្រុមហ៊ុនបានដាក់គោលដៅលក់អយស្ទើរដែលចិញ្ចឹមក្នុងវិធីសាស្ត្រថ្មីបំផុតនេះ តម្លៃ 6.89 ដុល្លារអាម៉េរិក/ក្បាល នៅតាមភោជនីយដ្ឋាន ដែលនេះគឺខ្ពស់ជាងប្រហែល 50% បើធៀបនឹងតម្លៃធម្មតា៕

December 27, 2023

បរិភោគក្រោយម៉ោងនេះ ហានិភ័យដាច់សរសៃឈាមខួរក្បាលនឹងកើនបន្ថែម 28 ភាគរយ

ក្រុមអ្នកវិទ្យាសាស្ត្របានធ្វើការសិក្សាស្រាវជ្រាវរយៈពេល 7 ឆ្នាំ និងបានរកឃើញថា ពេលវេលានៃការបរិភោគអាហារពេលល្ងាច អាចប៉ះពាល់ដល់សុខភាពបេះដូង និងបង្កើនហានិភ័យកើតជំងឺដាច់សរសៃឈាមខួរក្បាល ដែលនាំឱ្យស្លាប់មួយចំហៀងខ្លួនជាដើម។

ក្រុមអ្នកជំនាញមកពីសាកលវិទ្យាល័យ Sorbonne Paris Nord នៃប្រទេសបារាំង បានធ្វើការសិក្សាស្រាវជ្រាវ វាយតម្លៃស្ថានភាពសុខភាពរបស់មនុស្ស 103,389 នាក់ នៅក្នុងរង្វង់ 7 ឆ្នាំ ហើយបានរកឃើញថា ការបរិភោគអាហារពេលល្ងាចមុនម៉ោង 20 (ម៉ោង 8 យប់) នឹងល្អសម្រាប់សុខភាព។ ក្រុមស្រាវជ្រាវបានពិនិត្យមើលកាលវិភាគនៃការបរិភោគអាហាររបស់អ្នកស្ម័គ្រចិត្តដែលបានកត់ត្រាចាប់តាំងពីឆ្នាំ 2009 ដល់ 2022។

យោងតាមរបាយការណ៍របស់វិទ្យាស្ថានជាតិស្រាវជ្រាវផ្នែកសុខាភិបាល និងសុខភាពបារាំង ដែលបានប្រកាសកាលពីថ្ងៃទី 14 ធ្នូ 2023 ក្រុមអ្នកស្រាវជ្រាវរកឃើញថា 1/3 នៃអ្នកស្ម័គ្រចិត្តខាងលើ បរិភោគអាហារពេលល្ងាចមុនម៉ោង 8 យប់ ខណៈដែល 1/3 ផ្សេងទៀតបរិភោគនៅម៉ោង 9 យប់។ ក្នុងដំណាក់កាលនៃការសិក្សាស្រាវជ្រាវ មានប្រហែល 2,000 ករណី កើតជំងឺបេះដូង។

នៅពេលពិនិត្យទៅលើពេលវេលានៃការបរិភោគអាហារពេលល្ងាចរបស់អ្នកដែលកើតជំងឺបេះដូងទាំងនេះ អ្នកស្រាវជ្រាវបានរកឃើញថា អ្នកបរិភោគក្រោយម៉ោង 9 យប់ មានហានិភ័យកើតស្ត្រូក (ជំងឺដាច់សរសៃឈាមខួរក្បាល) ឬអាការខ្វះឈាមខួរក្បាលមួយរយៈពេលខ្លី ខ្ពស់ជាង 28% បើធៀបនឹងអ្នកដែលបរិភោគអាហារមុនម៉ោង 8 យប់៕

December 19, 2023

រកឃើញសាច់បង្កកគ្មានច្បាប់ជិត 400 តោន ក្រោយពីឯកឧត្តមបណ្ឌិត ម៉ុង ឬទ្ធី ថ្លែងទាក់ទិននឹងបញ្ហានេះ

(ភ្នំពេញ) – ក្រុមការងារអន្តរាគមន៍បង្ក្រាបបទល្មើសចលនាសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ បានរកឃើញសាច់បង្កកគ្មានច្បាប់ជិត 400 តោន នៅក្នុងឃ្លាំងមួយកន្លែង នៅ រាជធានីភ្នំពេញ។

កាលពីពេលថ្មីៗនេះ សាច់បង្កកខុសច្បាប់ជាង 377,000 គីឡូក្រាម ត្រូវបានរកឃើញក្នុងឃ្លាំងមួយនៅភូមិសំរោងទាវ សង្កាត់ក្រាំធ្នង់ ខណ្ឌសែនសុខ រាជធានីភ្នំពេញ នៅពេលក្រុមការងារដែលមានការសម្របសម្រួលពីលោក ម៉ុត ដារ៉ា ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ និងដឹកនាំការត្រួតពិនិត្យផ្ទាល់ដោយលោក ហ៊ុន សារ៉ាត់ អនុប្រធាននាយកដ្ឋានសុខភាពសត្វ និងសុខភាពសាធារណៈបសុព្យាបាល បានចុះត្រួតពិនិត្យទីតាំងដែលគួរឱ្យសង្ស័យខាងលើ។

ករណីរកឃើញនេះ បានកើតឡើងតែប៉ុន្មានថ្ងៃប៉ុណ្ណោះ បន្ទាប់ពីឯកឧត្ដមបណ្ឌិត ម៉ុង ឫទ្ធី ប្រធានគណៈកម្មការទីបីនៃព្រឹទ្ធសភា និងជាសហប្រធានក្រុមការងារ (ក) ផ្នែកកសិកម្ម ឧស្សាហកម្ម បានថ្លែងក្នុងកម្មវិធីបើកសិក្ខាសាលាស្ដីពីសុវត្ថិភាពសាច់បង្កក សម្រាប់សុខភាពប្រជាពលរដ្ឋ ដែលបានរៀបចំឡើងកាលពីថ្ងៃទី 30 ខែវិច្ឆិកា ឆ្នាំ 2023។

ក្រុមការងារអន្តរាគមន៍បង្ក្រាបបទល្មើសចលនាសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ កំពុងពិនិត្យសាច់បង្កកនាំចូលពីបរទេស

ក្នុងសិក្ខាសាលាខាងលើនេះ ឯកឧត្ដមបណ្ឌិត ម៉ុង ឫទ្ធី មានប្រសាសន៍ថា វិស័យចិញ្ចឹមសត្វនៅកម្ពុជា បានបាត់បង់ចំណែកយ៉ាងធំនៅក្នុងទីផ្សារភោជនីយដ្ឋាន និងកែច្នៃសាច់ ដោយសារតែការគ្រប់គ្រងការនាំចូលសាច់បង្កក សាច់ខូចគុណភាពមិនបានល្អ៕

December 6, 2023

ចំណីអាហារខូចគុណភាព ឬគុណភាពទាបពីបរទេស នឹងត្រូវបានហាមឃាត់យ៉ាងតឹងរ៉ឹងបន្ថែមទៀត

(ភ្នំពេញ) – ក្នុងឱកាសអញ្ជើញជួបវិស័យឯកជន និងប្រកាសដាក់ចេញកិច្ចអន្តរាគមន៍នានា ដើម្បីលើកកម្ពស់ការធ្វើធុរកិច្ចនៅកម្ពុជា នៅឯវិមានសន្តិភាព កាលពីថ្ងៃទី 13 វិច្ឆិកា 2023 ប្រមុខរាជរដ្ឋាភិបាលកម្ពុជា បានជំរុញឱ្យក្រសួង ស្ថាប័នពាក់ព័ន្ធ ពង្រឹងឱ្យបានម៉ត់ចត់បំផុតនូវការហាមនាំចូលម្ហូប ឬចំណីអាហារណាដែលមានគុណភាពទាប។

នាពេលកន្លង វិស័យឯកជន បានស្នើឱ្យមានការពង្រឹងការគ្រប់គ្រងលើការនាំចូលសាច់ជ្រូកបង្កក មាន់ ស៊ុត និងត្រីខុសច្បាប់ ដែលមានតម្លៃថោក និងគុណភាពទាប។ ព្រោះថា វាធ្វើឱ្យអ្នកចិញ្ចឹមក្នុងស្រុកមិនអាចប្រកួតប្រជែងបានដោយស្មើភាព ព្រមទាំងប៉ះពាល់ដល់សុខភាពរបស់ប្រជាពលរដ្ឋ។ នេះបើតាមប្រសាសន៍របស់សម្ដេច ហ៊ុន ម៉ាណែត។

«…ដើម្បីលើកកម្ពស់ការប្រកួតប្រជែងដោយស្មើភាព និងការពារសុខភាពរបស់ប្រជាពលរដ្ឋ រាជរដ្ឋាភិបាលសម្រេចដាក់ចេញនូវវិធានការ ក្រសួង ស្ថាប័នពាក់ព័ន្ធ ត្រូវពង្រឹងឱ្យបានម៉ត់ចត់ការហាមនាំចូលម្ហូប ឬចំណីអាហារណាដែលខូចគុណភាព ឬគុណភាពទាប ដែលប៉ះពាល់ដល់សុខភាព មិនថាឡើយតែសាច់ជ្រូកបង្កក មាន់ ស៊ុត និងត្រូវខុសច្បាប់មកព្រះរាជាណាចក្រកម្ពុជា» សម្ដេចថ្លែងដូច្នេះដើម្បីជាការឆ្លើយតបនឹងសំណើរបស់វិស័យឯកជនក្នុងស្រុក។

ប្រមុខរាជរដ្ឋាភិបាល ក៏បានបញ្ជាឱ្យអាជ្ញាធរពាក់ព័ន្ធ ត្រូវកំណត់ទ្វារព្រំដែនដែលអនុញ្ញាតឱ្យមានការនាំចូលសាច់ជ្រូក បង្កក មាន់ ស៊ុត និងត្រី ដើម្បីបង្កភាពងាយស្រួលនៅក្នុងការគ្រប់គ្រង និងត្រួតពិនិត្យលើការនាំចូលខុសច្បាប់ក្នុងរូបភាពផ្សេងៗផងដែរ៕

November 14, 2023

កម្ពុជា លើកទឹកចិត្តឱ្យធនាគារ រៀបចំឥណទានឡើងវិញចំពោះអ្នកទិញអចលនទ្រព្យដែលរងផលប៉ះពាល់ពីវិបត្តិសេដ្ឋកិច្ច

(ភ្នំពេញ) – គ្រឹះស្ថានធនាគារ និងហិរញ្ញវត្ថុទទួលបានការលើកទឹកចិត្តពី ប្រមុខរាជរដ្ឋាភិបាលកម្ពុជា ទាក់ទងនឹងការរៀបចំឥណទានឡើងវិញ ជូនដល់អតិថិជនរបស់ខ្លួនដែលបានខ្ចីប្រាក់ដើម្បីទិញអចលនទ្រព្យ និងកំពុងរងផលប៉ះពាល់ដោយសារវិបត្តិសេដ្ឋកិច្ច។

«លើកទឹកចិត្តដល់គ្រឹះស្ថានធនាគារ និងហិរញ្ញវត្ថុ ធ្វើការរៀបចំឥណទានឡើងវិញ តាមលទ្ធភាពជាក់ស្តែងរបស់គ្រឹះស្ថាន ដោយផ្អែកលើគោលការណ៍ស្ម័គ្រចិត្ត និងការព្រមព្រៀងរវាងគ្រឹះស្ថាន និងក្រុមហ៊ុនអចលនទ្រព្យ និងអភិវឌ្ឍន៍លំនៅឋានជាបុរី ដែលអនុលោមតាមប្រកាសលេខធមស 017 3 44 ប្រក. ចុះថ្ងៃទី 01 ខែធ្នូ ឆ្នាំ 2017 ស្តីពីចំណាត់ថ្នាក់ហានិភ័យឥណទាន និងសមវិធានធន់» សម្តេច ហ៊ុន ម៉ាណែត បានថ្លែងដូច្នេះនៅឯវិមានសន្ដិភាព កាលពីព្រឹកថ្ងៃទី 13 វិច្ឆិកា 2023 ក្នុងឱកាសអញ្ជើញជាអធិបតីនៃវេទិកា «រាជរដ្ឋាភិបាល -ផ្នែកឯកជន» លើកទី 19 ដើម្បីបើកការជជែកលើបញ្ហាធុរកិច្ចនៅកម្ពុជា។

ដោយសារតែវិស័យអចលនទ្រព្យបាន និងកំពុងរងផលប៉ះពាល់ធ្ងន់ធ្ងរពីវិបត្តិសុខភាព និងវិបត្តិផ្សេងៗទៀត រាជរដ្ឋាភិបាលក៏ដាក់ចេញនូវវិធានការមួយចំនួនដើម្បីចូលរួមដោះស្រាយ។ វិធានការទាំងនេះ រួមមានដូចខាងក្រោម៖

បន្តពន្យារពេលការបង់ពន្ធជាកញ្ចប់តាមដំណាក់កាលរហូតដល់ដំណាច់ឆ្នាំ 2024 សម្រាប់ក្រុមហ៊ុនអភិវឌ្ឍន៍លំនៅឋានជាបុរី ដែលបាននឹងកំពុងប្រតិបត្តិការគម្រោងអភិវឌ្ឍន៍លំនៅឋាន ដែលមានអាជ្ញាបណ្ណអចលនវត្ថុផ្តល់ដល់និយ័តករអាជីវកម្មអចលនវត្ថុ និងបញ្ចាំ។ល។
បង្កើនរយៈពេលនៃការបង់ពន្ធជាកញ្ចប់តាមដំណាក់កាលពី 12 ខែ ដល់ 18 ខែ សម្រាប់ក្រុមហ៊ុនអភិវឌ្ឍន៍លំនៅឋានជាបុរី ដែលបង់ពន្ធតិចជាងមួយលានដុល្លារ និងពី 24 ខែ ដល់ 38 ខែ សម្រាប់ក្រុមហ៊ុនអភិវឌ្ឍន៍លំនៅឋានជាបុរី ដែលបង់ពន្ធលើសពីមួយលានដុល្លារ។
ក្រុមហ៊ុនអភិវឌ្ឍន៍លំនៅឋានជាបុរីថ្មី ឬក្រុមហ៊ុនមានគម្រោងអភិវឌ្ឍន៍លំនៅឋានជាបុរី ដែលមិនទាន់បានអភិវឌ្ឍន៍ត្រូវបង់ពន្ធស្របតាម និតិវិធីជាព័ត៌មានរបបពិត និងត្រូវកាន់បញ្ជីគណនីឱ្យបានត្រឹមត្រូវ។
បន្តពន្យារពេលការអនុវត្តលើពន្ធចំណេញមូលធន សម្រាប់តែវិស័យអចលនទ្រព្យរហូតដល់ដំណាច់ឆ្នាំ2024។
បន្តលើកលែងពន្ធប្រថាប់ត្រាលើការផ្ទេរសិទ្ធិ ឬសិទ្ធិកាន់កាប់លំនៅឋានគ្រប់ប្រភេទដែលមានលក្ខណៈជាបុរី និងដែលមានតម្លៃក្រោម ឬស្មើនឹង 7 ម៉ឺនដុល្លាររហូតដល់ដំណាច់ឆ្នាំ 2024។
លើកទឹកចិត្ត និងស្នើឱ្យគ្រឹះស្ថានធនាគារ និងហិរញ្ញវត្ថុ ធ្វើការរៀបចំឥណទានឡើងវិញ តាមលទ្ធភាពជាក់ស្តែងរបស់គ្រឹះស្ថាន ដោយផ្អែកលើគោលការណ៍ស្ម័គ្រចិត្ត និងការព្រមព្រៀងរវាងគ្រឹះស្ថាន និងក្រុមហ៊ុនអចលនទ្រព្យ និងអភិវឌ្ឍន៍លំនៅឋានជាបុរី ដែលអនុលោមតាមប្រកាសលេខ 017 3 44 ប្រក. ចុះថ្ងៃទី 01 ខែធ្នូ ឆ្នាំ 2017 ស្តីពីចំណាត់ថ្នាក់ហានិភ័យឥណទាន និងសមវិធានធន។
លើកលែងការផាកពិន័យផ្សេងៗចំពោះគម្រោងអភិវឌ្ឍន៍លំនៅឋានជាបុរី ប៉ុន្តែក្រុមហ៊ុនអភិវឌ្ឍចាំបាច់ត្រូវបំពេញកាតព្វកិច្ចសមស្របតាមប្រកាសស្តីពីការគ្រប់គ្រងអាជីវកម្មអភិវឌ្ឍអចលនវត្ថុ។
ពន្យារពេលអនុវត្តរហូតដល់ដំណាច់ឆ្នាំ 2023 លើសេចក្តីប្រកាសស្តីពីកាតព្វកិច្ចដាក់រាយការណ៍ហិរញ្ញវត្ថុឱ្យសវកម្មឯករាជ្យ ចេញដោយក្រសួងសេដ្ឋកិច្ច និងហិរញ្ញវត្ថុ។

រាជរដ្ឋាភិបាលក៏បានបង្កើតក្រុមការងារអន្តរក្រសួងចំនួនពីរ ដើម្បីតាមដាន ដោះស្រាយបញ្ហាប្រឈម នៅក្នុងវិស័យនេះអចលនទ្រព្យផងដែរ។

សម្តេចធិបតី ក៏បានដាក់ចេញនូវវិធានការមួយចំនួនទៀត ដើម្បីជួយដល់វិស័យអចលទ្រព្យ និងសំណង់ ក្នុងនោះសម្រាប់ផ្ទះមានតម្លៃលើស 7 ម៉ឺនដុល្លារអាមេរិក ត្រូវបានអនុញ្ញាតឱ្យដកតម្លៃ 7 ម៉ឺនដុល្លារអាមេរិកចេញពីមូលដ្ឋាន នៃការគិតពន្ធប្រថាប់ត្រា ក៏ដូចជាការលើកលែងពន្ធប្រថាប់ត្រាដល់អចលនទ្រព្យដែលត្រូវបានទិញ-លក់ក្នុងតម្លៃក្រោម 7 ម៉ឺនដុល្លារ រហូតដល់ឆ្នាំ 2024 ផងដែរ៕

November 14, 2023

អាម៉េរិកអនុម័តឱ្យប្រើប្រាស់វ៉ាក់សាំងដំបូងគេលើពិភពលោកដែលទប់ស្កាត់ជំងឺគ្រុនឈីក

រដ្ឋបាលចំណីអាហារ និងឪសថអាម៉េរិក (FDA) កាលពីថ្ងៃទី 09 វិច្ឆិកា ឆ្នាំ 2023 បានអនុម័តឱ្យប្រើប្រាស់វ៉ាក់សាំងដំបូងគេលើពិភពលោកដែលទប់ស្កាត់ការឆ្លងជំងឺគ្រុនឈីកពីមូសដែលមានផ្ទុកវីរុស Chikungunya។

សារព័ត៌មាន AFP ផ្សាយថា នៅក្នុងរបាយការណ៍មួយ FDA ឱ្យដឹងថា វ៉ាក់សាំងទប់ស្កាត់ជំងឺដែលកើតឡើងដោយសារវីរុស Chikungunya ត្រូវបានអនុម័តឱ្យប្រើប្រាស់សម្រាប់មនុស្សដែលមានអាយុចាប់ពី 18 ឆ្នាំឡើងទៅ ដែលប្រឈមនឹងហានិភ័យឆ្លងខ្ពស់ជាងគេ។ វ៉ាក់សាំងនេះត្រូវបានអភិវឌ្ឍដោយក្រុមហ៊ុន Valneva របស់អឺរ៉ុប ហើយថា នឹងត្រូវបានដាក់លក់ក្នុងទីផ្សារក្រោមឈ្មោះថា Ixchiq។

ការអនុម័តរបស់ FDA នេះ ត្រូវបានរំពឹងថា នឹងបង្កើនល្បឿននៃការដាក់ពង្រាយវ៉ាក់សាំង Ixchiq នៅតាមបណ្ដាប្រទេសដែលសម្បូរវីរុស Chikungunya ជាងគេ មានជាអាទិ៍ ទ្វីបអាហ្វ្រិក តំបន់អាស៊ីអាគ្នេយ៍ និងតំបន់មួយចំនួននៅទ្វីបអាម៉េរិកជាដើម។

ជំងឺគ្រុនឈីកបង្កឡើងដោយវីរុស Chikungunya ឬហៅថា វីរុសឈីក និងបណ្ដាលមកពីមូសខ្លាញី Aedes aegypti (the yellow fever mosquito) ខាំ ជាពិសេសនៅពេលថ្ងៃ ហើយអាចកើតមានចំពោះមនុស្សគ្រប់វ័យ និងឆ្លងពីមនុស្សម្នាក់ទៅមនុស្សម្នាក់ផ្សេងទៀត។

មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្រ្ត និងបាណកសាស្រ្ត នៃក្រសួងសុខាភិបាលកម្ពុជា បានឱ្យដឹងថា ជំងឺគ្រុនឈីកមានរោគសញ្ញាសំខាន់ៗចំនួនបី រួមមាន គ្រុនក្តៅពី 3 ទៅ 4 ថ្ងៃ, ឈឺសន្លាក់ឆ្អឹង និងមានស្នាមកន្ទួល ឬក្រហមលើស្បែកដូចកើតស្អូច ឬកញ្ជ្រឹល។ ជំងឺគ្រុនឈីកមិនបណ្តាលឱ្យអ្នកជំងឺស្លាប់ លើកលែងតែវាកើតរួមគ្នាជាមួយជំងឺផ្សេងៗ ដូចជាជំងឺគ្រុនឈាម គ្រុនចាញ់ ឬជំងឺរលាកស្រោមខួរជាដើម។

យោងតាមអង្គការសុខភាពពិភពលោក (WHO) រាប់ចាប់តាំងពីត្រូវបានរកឃើញលើកដំបូងនៅប្រទេសតង់ហ្សានីកាលពីឆ្នាំ 1952 វីរុសឈីកនេះបានឆ្លងរាលដាលដល់ប្រទេស និងដែនដីជាង 110 រួចហើយ។

AFP ឱ្យដឹងថា អ្នកជំនាញផ្នែកសុខាភិបាលសាធារណៈបានសម្ដែងការព្រួយបារម្ភថា វីរុស Chikungunya អាចបង្កឱ្យមានវិបត្តិសុខភាពសកលនៅក្នុងពេលអនាគត នៅពេលការប្រែប្រួលអាកាសធាតុជំរុញឱ្យមូសចម្លងវីរុសនេះទៅកាន់តំបន់ថ្មីៗនៅទូទាំងពិភពលោក៕

November 14, 2023

ប្រទេសថៃ ត្រៀមកម្លាំងម្ភៃលាននាក់ដើម្បីបង្កើតចំណូលបួនទ្រីលានបាត/ឆ្នាំ

រាជរដ្ឋាភិបាលថៃទើបតែបានប្រកាសផែនការប្រើប្រាស់កម្លាំងទន់ដើម្បីជួយបង្កើតប្រាក់ចំណូលប្រចាំឆ្នាំប្រហែល 4 ទ្រីលាន (4,000,000,000,000.00) បាត នៅក្នុងរង្វង់បួនឆ្នាំខាងមុខ ដោយការចាប់ផ្ដើមអនុវត្តគម្រោងបណ្ដុះបណ្ដាលកម្លាំងពលកម្ម 20 លាននាក់ សម្រាប់ការអភិវឌ្ឍឧស្សាហកម្មច្នៃប្រណិតចំនួន 11 វិស័យ និងជំរុញកម្លាំងទន់របស់ប្រទេសនេះនៅទូទាំងពិភពលោក។

គំនិតថ្មីរបស់រាជរដ្ឋាភិបាលថៃនេះ នឹងត្រូវបានចែកជាបីដំណាក់កាល ក្នុងនោះដំណាក់កាលដំបូងនឹងត្រូវបានអនុវត្តក្នុងរយៈពេល 100 ថ្ងៃ និងផ្ដោតទៅលើការបង្កើតបណ្ដាទីតាំងព្រឹត្តិការណ៍ កែសម្រួលបទបញ្ជានានាដែលទាក់ទងនឹងក្រសួងវប្បធម៌ និងការប្រារព្ធពិធីបុណ្យទាំងឡាយនៅក្នុងរដូវរងា។

ដំណាក់កាលទីពីរដែលអូសបន្លាយដល់ខែមេសាឆ្នាំ 2024 នឹងផ្ដោតលើគំនិតផ្ដួចផ្ដើម «គ្រួសារមួយ – អំណាចទន់មួយ» ដែលនឹងត្រូវអនុវត្តជាមួយនឹងសំណើបង្កើតអាជ្ញាធរគ្រប់គ្រងមាតិកម្មច្នៃប្រឌិតថៃ (THACCA)។

ដំណាក់កាលនេះ មនុស្ស 20 លាននាក់ មកពី 20 លានគ្រួសារ នឹងត្រូវបានបណ្ដុះបណ្ដាល ដើម្បីអភិវឌ្ឍអំណាចទន់របស់ប្រទេសជាតិ ដែលបង្កបង្កើតឡើងពីវិស័យឧស្សាហកម្មច្នៃប្រឌិតចំនួន 11 រួមមាន ម្ហូបអាហារ កីឡា ពិធីបុណ្យ ទេសចរណ៍ តន្ត្រី សៀវភៅ ភាពយន្ត ល្បែងកម្សាន្ត សិល្បៈ ការរចនា និងការច្នៃម៉ូដែលសម្លៀកបំពាក់។ ក្នុងដំណាក់កាលនេះ ពិធីបុណ្យជះទឹក (ចូលឆ្នាំថ្មី) និងវេទិកាអំណាចទន់ នឹងត្រូវបានប្រារព្ធឡើងនៅប្រទេសថៃ។

ដំណាក់កាលចុងក្រោយនៃគំនិតផ្ដួចផ្ដើមនេះគ្រោងនឹងអូសបន្លាយដល់ខែតុលា 2024។ បណ្ដាព្រឹត្តិការណ៍មហោស្រពភាពយន្ត និងតន្ត្រី នឹងត្រូវបានជំរុញបន្ថែមដើម្បីគាំទ្រដល់អំណាចទន់របស់ប្រទេសថៃ ក្នុងការចូលរួមក្នុងព្រឹត្តិការណ៍សកលនានា។ ក្រសួងការបរទេសនឹងទទួលខុសត្រូវទាំងស្រុងតាមរយៈការប្រឹងប្រែងរបស់អ្នកការទូត និងទីប្រឹក្សាពាណិជ្ជកម្មថៃនៅតាមបណ្ដាប្រទេសលើពិភពលោក។

ក្រសួងវប្បធម៌ថៃកំណត់គោលដៅបង្កើតតម្លៃសេដ្ឋកិច្ចនៅក្នុងបណ្ដាវិស័យជាក់លាក់ មានជាអាទិ៍ ភាពយន្ត ការរចនាសម្លៀកបំពាក់ ម្ហូបអាហារ-ភេសជ្ជៈ កីឡា តន្ត្រី ទេសចរណ៍-វប្បធម៌ អក្សរសិល្ប៍ សិល្បៈសហសម័យ សុខាភិបាល-សុខភាព សុសវែរ-ល្បែងកម្សាន្ត ក្នុងបំណងរកប្រាក់ចំណូលឱ្យបាន 300 ដល់ 400 លានបាតពីព្រឹត្តិការណ៍នីមួយៗ។

ក្រសួងវប្បធម៌ថៃក៏សហការជាមួយវិទ្យាស្ថានគ្រប់គ្រងពាណិជ្ជកម្ម Sasin របស់សាកលវិទ្យាល័យ Chulalongkorn ដើម្បីបង្កើតសន្ទស្សន៍ស្ថិតិវប្បធម៌ វាស់ស្ទង់ផលប៉ះពាល់របស់បណ្ដាសកម្មភាពវប្បធម៌ចំពោះសេដ្ឋកិច្ចប្រទេសនេះផងដែរ។ វិធីសាស្ត្រគ្រប់ជ្រុងជ្រោយនេះគឺធ្វើឡើងក្នុងគោលដៅលើកកម្ពស់អំណាចទន់របស់ប្រទេសថៃ ក៏ដូចជាតម្លៃសេដ្ឋកិច្ច និងវប្បធម៌របស់ប្រទេសនេះ នៅលើឆាកអន្តរជាតិ៕

November 8, 2023

IMF ព្យាករថា សេដ្ឋកិច្ចសកលអាចងើបឡើងបែប «ថ្នមៗ»

មូលនិធិរូបិយវត្ថុអន្តរជាតិ (IMF) បានបញ្ជាក់អំពីលទ្ធភាពដែលបណ្ដាធនាគារកណ្ដាលគ្រប់គ្រងបាននូវបញ្ហាអតិផរណា ដោយមិនរុញច្រានពិភពលោកធ្លាក់ក្នុងឱនភាពសេដ្ឋកិច្ច។

ក្នុងកិច្ចប្រជុំនាថ្ងៃទី 10 តុលា IMF យល់ថា សេដ្ឋកិច្ចពិភពលោកអាចមានកំណើន 3% ក្នុងឆ្នាំនេះ ដោយមូលហេតុថា ល្បឿននៃកំណើនខ្ពស់ជាងគេរបស់សហរដ្ឋអាម៉េរិក នឹងប៉ះប៉ូវការរំពឹងថានឹងធ្លាក់ចុះនៃសេដ្ឋកិច្ចរបស់ចិន និងអឺរ៉ុប។

រំលឹកឡើងវិញអំពីការអះអាងកាលពីខែកក្កដា IMF សង្កត់ធ្ងន់ថា សេដ្ឋកិច្ចសកលនៅតែមានជំហររឹងមាំនៅចំពោះមុខវិបត្តិសុខភាពសកល និងសង្គ្រាមនៅអ៊ុយក្រែន។ IMF អះអាងថា កំណើនសេដ្ឋកិច្ច និងអតិផរណាបច្ចុប្បន្ន កាន់តែសមស្របនឹងសេណារីយោ «ងើបឡើងដោយថ្នមៗ» ពិសេសគឺសហរដ្ឋអាម៉េរិក។

សេដ្ឋកិច្ចរបស់សហរដ្ឋអាម៉េរិកត្រូវបានព្យាករថា មានកំណើនលឿនជាងគេក្នុងចំណោមប្រទេសមហាអំណាចសេដ្ឋកិច្ច ដោយនឹងមាន GDP (ផលិតផលក្នុងស្រុកសរុប) កើនឡើង 2.1% ក្នុងឆ្នាំនេះ។

GDP របស់អឺរ៉ុប និងចិន បច្ចុប្បន្នត្រូវបានព្យាករថា អន់ជាងបើធៀបនឹងបីខែមុន ស្របពេលដែលតំបន់នានារបស់ពិភពលោកមានកំណើន GDP មិនស្មើគ្នា៕

October 11, 2023

រដូវកាលលក់បញ្ចុះតម្លៃនៅលើផ្សារអនឡាញទូទាំងពិភពលោកជិតដំណើរការ

ហាងលក់រាយនានាបាន និងកំពុងត្រៀមខ្លួនសម្រាប់ការលក់ទំនិញបញ្ចុះតម្លៃរហូតដល់ 35% ក្នុងរដូវកាលបុណ្យទាននៅចុងឆ្នាំនេះ ក្នុងនោះ ទំនិញប្រភេទអេឡិចត្រូវនិច ឧបករណ៍លេងកម្សាន្ត និងសម្លៀកបំពាក់នឹងត្រូវលក់បញ្ចុះតម្លៃទាបជាងគេ។

យោងតាមការព្យាករដែលត្រូវបាន Adobe Analytics ប្រកាសកាលពីថ្ងៃទី 05 តុលា អ្នកប្រើប្រាស់នឹងអាចទិញទំនិញបញ្ចុះតម្លៃដល់កម្រិតទាបមិនធ្លាប់មានក្នុងរដូវបុណ្យទាននៅចុងឆ្នាំ 2023 ពេលក្រុមអ្នកលក់រាយតាមផ្សារអនឡាញ ព្យាយាមអូសទាញអតិថិជនដែលកំពុងខ្សត់ប្រាក់ដោយសារតែបញ្ហាអតិផរណា។

Adobe Analytics បានព្យាករថា យុទ្ធសាស្ត្រនេះនឹងមានប្រសិទ្ធភាព ព្រោះថា ការលក់តាមអនឡាញក្នុងរដូវបុណ្យទានត្រូវបានរំពឹងថានឹងកើនឡើងជិត 5% ធៀបនឹងដំណាក់កាលដូចគ្នាក្នុងឆ្នាំ 2022។

ក្នុងរបាយការណ៍ប្រចាំឆ្នាំស្ដីពីការរំពឹងទុកផ្នែកជួញដូរក្នុងរដូវបុណ្យទាន Adobe Analytics ឱ្យដឹងថា ហាងលក់រាយនានាបាន និងកំពុងត្រៀមខ្លួនសម្រាប់ការលក់ទំនិញបញ្ចុះតម្លៃរហូតដល់ 35% ក្នុងរដូវកាលបុណ្យទាននៅចុងឆ្នាំនេះ ក្នុងនោះ ទំនិញប្រភេទអេឡិចត្រូវនិច ឧបករណ៍លេងកម្សាន្ត និងសម្លៀកបំពាក់នឹងត្រូវលក់បញ្ចុះតម្លៃទាបជាងគេ។

ក្រុមហ៊ុនវិភាគទិន្នន័យទីផ្សារខាងលើ សង្ឃឹមថា អ្នកប្រើប្រាស់នឹងចាប់យកកម្មវិធីលក់បញ្ចុះតម្លៃនេះ ហើយចំណាយច្រើនសូម្បីតែនៅពេលពួកគេមានការព្រួយបារម្ភអំពីតម្លៃកើនឡើង ក៏ដូចជា «សុខភាព» របស់សេដ្ឋកិច្ច។

យោងតាម Adobe Analytics អ្នកប្រើប្រាស់ទូទាំងសកលលោកអាចនឹងចំណាយ 221.8 ពាន់លានដុល្លារ តាមរយៈការទិញទំនិញពីផ្សារអនឡាញ ចាប់ពីថ្ងៃទី 01 វិច្ឆិកា រហូតដល់ដំណាច់ឆ្នាំនេះ។ ប្រការនេះនឹងជួយឱ្យកំណើនសម្រេចបាន 4.8% ច្រើនជាង 1.3% បើធៀបនឹង 3.5% នៃដំណាក់កាលដូចគ្នាក្នុងឆ្នាំកន្លង៕

October 6, 2023

Tag: ខភាព