កូវីដ - La Reine Media

ធនាគារពិភពលោក៖ សេដ្ឋកិច្ចអាស៊ីមិនល្អដូចការរំពឹងទុក

យោងតាមធនាគារពិភពលោក (WB) កំណើនសេដ្ឋកិច្ចអាស៊ីឆ្នាំនេះ ត្រូវបានព្យាករថា នឹងយឺតជាងឆ្នាំកន្លង ប៉ុន្តែនៅតែមានសក្ដានុពលខ្លាំង។

ល្បឿននៃកំណើនសេដ្ឋកិច្ចគ្រោងនឹងថយចុះពី 5.1% ក្នុងឆ្នាំ 2023 មកនៅត្រឹម 4.5% ក្នុងឆ្នាំ 2024 ទាបជាងបើធៀបនឹងដំណាក់កាលមុនកូវីដ-19។ បើទោះនៅតែខ្ពស់ជាងបណ្ដាតំបន់ដទៃ ប៉ុន្តែអាស៊ីក៏នៅតែមិនទាន់សម្រេចបានដូចទៅនឹងសក្ដានុពលរបស់ខ្លួន។

ប្រទេសចិនដែលជាខឿនសេដ្ឋកិច្ចធំជាងគេនៅទ្វីបអាស៊ី បានកំណត់គោលដៅសម្រេចឱ្យបាន 5% ក្នុងឆ្នាំនេះ ទាបជាង បើធៀបនឹង 5.2% របស់ឆ្នាំកន្លង។ ប៉ុន្តែ WB ព្យាករថា GDP របស់ប្រទេសចិននឹងមានកំណើនត្រឹមតែ 4.5% ប៉ុណ្ណោះ។

មូលហេតុដែលនាំឱ្យសេដ្ឋកិច្ចអាស៊ីត្រូវបានព្យាករថានឹងមានកំណើនទាបដូច្នេះ ក៏ដោយសារកត្តាមួយចំនួន រួមមាន៖

បំណុល
រនាំងពាណិជ្ជកម្ម
អស្ថិរភាពគោលនយោបាយ
អតិផរណានៅសហរដ្ឋអាម៉េរិក
ការប្រាក់ខ្ពស់
ការថយចុះនៃភ្ញៀវទេសចរណ៍ចិន
ការថយចុះនៃការវិនិយោគពីវិស័យឯកជន

ដំណោះស្រាយ

ជំរុញផ្នែកហិរញ្ញវត្ថុ
ជំរុញសុខុមាលភាពសង្គមឱ្យបានខ្លាំងក្លាជាងមុន
បង្កើតគោលនយោបាយដែលជួយជំរុញការចំណាយ
លុបបំបាត់រនាំងពាណិជ្ជកម្ម
កែលម្អហេដ្ឋារចនាសម្ព័ន្ធ
កែទម្រង់វិស័យអប់រំ

ការសន្និដ្ឋាន

សេដ្ឋកិច្ចអាស៊ី កំពុងជួបឧបសគ្គច្រើន ប៉ុន្តែនៅតែមានសក្ដានុពលរីកចម្រើនយ៉ាងខ្លាំងក្លា។ បណ្ដាប្រទេសគួរតែអនុវត្តដំណោះស្រាយសមស្រប ដើម្បីជំរុញកំណើនសេដ្ឋកិច្ច និងលើកកម្ពស់ការផលិត។

April 1, 2024

គុយបា នឹងដំឡើងតម្លៃសាំងរហូតដល់ 500%

អាជ្ញាធរប្រទេសគុយបា នឹងដំឡើងតម្លៃសាំងរហូតដល់ 500% ចាប់ពីថ្ងៃទី 01 ខែមីនា ឆ្នាំ 2024 យឺតជាងមួយខែបើធៀបនឹងគម្រោងដំបូង ប៉ុន្តែតម្លៃសំបុត្រយានជំនិះសាធារណៈនៅតែដដែល។

រដ្ឋមន្ត្រីហិរញ្ញវត្ថុគុយបា Vladimir Regueiro កាលពីថ្ងៃទី 28 កុម្ភៈ ប្រកាសថា ទន្ទឹមនឹងការដំឡើងតម្លៃសាំង តម្លៃអគ្គិសនីក៏នឹងត្រូវដំឡើង 25% ធៀបនឹងដំណាក់កាលដូចដដែល ចំពោះអតិថិជនដែលប្រើប្រាស់អគ្គិសនីច្រើននៅក្នុងតំបន់ប្រជុំជន។ ក៏ប៉ុន្តែ ថ្លៃធ្វើដំឡើងតាមយានជំនិះសាធារណៈនឹងនៅតែរក្សាដូចដើម ហើយការដំឡើងថ្លៃឧស្ម័នធម្មជាតិក៏ត្រូវពន្យារពេល។

រដ្ឋាភិបាលគុយបា ដែលជាអ្នកផ្ដល់ការឧបត្ថម្ភទំនិញ និងសេវាកម្មសំខាន់ៗស្ទើរតែទាំងអស់ ប្រកាសដំឡើងថ្លៃសាំងខ្ពស់ជាងមុន 5 ដង រាប់ចាប់ពីថ្ងៃទី 01 ខែកុម្ភៈ ដើម្បីរួមចំណែកកាត់បន្ថយឱនភាពថវិកាជាតិ។ តម្លៃសាំងធម្មតាមួយលីត្រនឹងកើនពី 25 ប៉េសូ (0.2 ដុល្លារអាម៉េរិក) ឡើងដល់ 132 ប៉េសូ ខណៈដែលសាំងល្អបំផុតកើនពី 30 ប៉េសូ ឡើងដល់ 156 ប៉េសូ ខ្ពស់ជាង 5 ដង ធៀបនឹងតម្លៃចាស់។ ទេសចរបរទេសដែលមកលេងប្រទេសគុយបា នឹងត្រូវទូទាត់ថ្លៃសាំងដោយរូបិយប័ណ្ណបរទេស។

ក៏ប៉ុន្តែ គម្រោងដំឡើងតម្លៃសាំងកាលពីខែមុនត្រូវបានពន្យារពេល ដោយសារតែ «បញ្ហាសន្តិសុខអ៊ីនធើណិត»។ បញ្ហានេះបានធ្វើឱ្យរដ្ឋមន្ត្រីក្រសួងសេដ្ឋកិច្ច Alejandro Gil បាត់បង់តំណែង នៅពីរបីថ្ងៃក្រោយមក។

យោងតាមអ្នកសេដ្ឋកិច្ចនៅសាកលវិទ្យាល័យ Havana របស់គុយបា សាំងនៅប្រទេសនេះមានតម្លៃទាបខ្លាំង បើធៀបនឹងបណ្ដាប្រទេសដទៃលើពិភពលោក ប៉ុន្តែគឺជាតម្លៃដែលខ្ពស់ខ្លាំង បើធៀបនឹងប្រាក់បៀវត្សរ៍ក្នុងស្រុក។ តម្លៃសាំងថ្មីនេះនឹងប៉ះពាល់ដល់សង្គមទាំងមូលនៅគុយបា។

ប្រទេសកោះដែលមានប្រជាជន 11 លាននាក់នេះ កំពុងឆ្លងកាត់ការលំបាកច្រើនក្នុងវិស័យសេដ្ឋកិច្ច ដោយសារតែវិបត្តិកូវីដ-19 និងទណ្ឌកម្មពីសហរដ្ឋអាម៉េរិក។ តាមការប៉ាន់ស្មាន សេដ្ឋកិច្ចគុយបា បានធ្លាក់ចុះ 2% ក្នុងឆ្នាំ 2023 ស្របពេលដែលអតិផរណាកើនឡើង 30%។

February 29, 2024

យុទ្ធសាស្ត្រ «លើកលែងទិដ្ឋាការ» របស់ថៃ និងសិង្ហបុរី អូសទាញភ្ញៀវចិនបានច្រើនជាងមុន

ដោយការអនុវត្តយុទ្ធសាស្ត្រលើកលែងទិដ្ឋាការ (visa) ប្រទេសមួយចំនួននៅអាស៊ីអាគ្នេយ៍កំពុងតែក្លាយជាជម្រើសដំបូងរបស់ទេសចរចិន។

នៅក្នុងរដូវបុណ្យចូលឆ្នាំប្រពៃណីចិនឆ្នាំនេះ ទេសចរចិនត្រូវគិតគូរដល់កត្តាជាច្រើនដែលទាក់ទងនឹងភូមិសាស្ត្រ គោលនយោបាយ និងការចំណាយផ្សេងៗ។ ចំពោះបញ្ហាទាំងនេះ តំបន់ទេសចរណ៍ល្បីៗមួយចំនួនដូចជាអូស្ត្រាលីជាដើម មិនអាចប្រកួតប្រជែងបានជាមួយនឹងអាស៊ីអាគ្នេយ៍។ នេះបើតាមប្រភពព័ត៌មានទេសចរណ៍ និងទិន្នន័យរបស់ Reuters។

អូស្ត្រាលីធ្លាប់ជា «ដែកឆក់» ចំពោះភ្ញៀវពីប្រទេសចិន។ ក៏ប៉ុន្តែ លក្ខខណ្ឌនៃទិដ្ឋាការបានកាត់បន្ថយភាពទាក់ទាញរបស់ប្រទេសនេះ។ ផ្ទុយទៅវិញ ប្រទេសមួយចំនួននៅអាស៊ីអាគ្នេយ៍ ដូចជា សិង្ហបុរី ថៃ និងម៉ាឡេស៊ី ជាដើម បានប្រើប្រាស់កត្តាតម្លៃទាបជាង ក៏ដូចជាគោលនយោបាយបន្ធូរបន្ថយទិដ្ឋាការ ដើម្បីអូសទាញភ្ញៀវពីប្រទេសចិន។

លោក John Nee ប្រធានក្រុមហ៊ុនទេសចរណ៍ Easy Going នៅតំបន់ Perth ភាគខាងលិចរបស់អូស្ត្រាលី បានទទួលស្គាល់អំពីបរាជ័យរបស់អូស្ត្រាលីនៅចំពោះមុខអាស៊ីអាគ្នេយ៍។ លោកបានឱ្យដឹងថា គិតត្រឹមរដូវបុណ្យចូលឆ្នាំចិនកន្លង ក្រុមហ៊ុនរបស់លោកបានងើបឡើងវិញត្រឹមតែ 40% ប៉ុណ្ណោះ បើធៀបនឹងដំណាក់កាលមុនកូវីដ-19។ ផ្ទុយទៅវិញ សិង្ហបុរី ថៃ និងម៉ាឡេស៊ី បានឃើញកំណើនភ្ញៀវបរទេស និងការចំណាយច្រើនជាង បើធៀបនឹងដំណាក់កាលមុនវិបត្តិសុខភាពសកលទៅទៀត។

«គោលនយោបាយលើកលែងទិដ្ឋាការរបស់ប្រទេសថៃ និងសិង្ហបុរី ទាក់ទាញភ្ញៀវបានច្រើន ហើយខ្ញុំគិតថា ប្រការនោះបានជួយអូសទាញភ្ញៀវចិនឱ្យចេញផុតពីប្រទេសអូស្ត្រាលី» លោក John Nee អះអាងដូច្នេះ។

នៅក្នុងរដូវបុណ្យចូលឆ្នាំចិនឆ្នាំនេះ ភ្ញៀវចិនរួមចំណែក 26% ធៀបនឹងភ្ញៀវបរទេសសរុបដែលមកលេងប្រទេសអូស្ត្រាលី។ តួលេខនេះទាបខ្លាំង បើធៀបនឹងជាង 50% កាលពីដំណាក់កាលមុនកូវីដ-19 ឆ្នាំ 2019។

បណ្ដាក្រុមហ៊ុនទេសចរណ៍ក្នុងប្រទេសអូស្ត្រាលី រកបានប្រាក់ចំណូលទាបជាង 50% បើធៀបនឹងឆ្នាំ 2019៕

February 21, 2024

ថៃ ម៉ាឡេស៊ី សិង្ហបុរី លើកលែងទិដ្ឋាការដើម្បីទាក់ទាញទេសចរចិន

ប្រទេសសិង្ហបុរី ម៉ាឡេស៊ី និងប្រទេសថៃ កំពុងអនុវត្តយុទ្ធសាស្ត្រមួយដើម្បីអូសទាញភ្ញៀវទេសចរណ៍មកពីប្រទេសចិន នោះគឺគោលនយោបាយលើកលែងទិដ្ឋាការ (Visa) ដែលមិនធ្លាប់មានពីមុនមក។

ដោយការលើកលែងទិដ្ឋាការនេះ ប្រទេសនៅអាស៊ីអាគ្នេយ៍ទាំងបីខាងលើ កំពុងប្រើប្រាស់ភាពទាក់ទាញនៃការដើរហើរដោយសេរី ដើម្បីជំរុញ និងស្ដារវិស័យទេសចរណ៍ ដែលបានរងផលប៉ះពាល់ធ្ងន់ធ្ងរដោយសារវិបត្តិសុខភាពនាប៉ុន្មានឆ្នាំកន្លង។ នេះបើតាម Reuters ចុះផ្សាយកាលពីថ្ងៃទី 09 កុម្ភៈ 2024។

វិស្វករជនជាតិចិន លោក Wei Ming គឺជាសាក្សីមួយសម្រាប់បញ្ជាក់អំពីប្រសិទ្ធភាពនៃយុទ្ធសាស្ត្រខាងលើ នៅពេលគាត់ប្ដូរគម្រោងទេសចរណ៍របស់ខ្លួនពីអូស្ត្រាលី មកសិង្ហបុរី គ្រាដែលទិដ្ឋាការត្រូវបានលើកលែង។ ថ្នាក់ដឹកនាំរបស់ប្រទេសថៃ សិង្ហបុរី និងម៉ាឡេស៊ី សង្ឃឹមថា ការលើកលែងទិដ្ឋាការនឹងទាក់ទាញទេសចរចិនបានច្រើននៅក្នុងរដូវបុណ្យនិទាឃរដូវឆ្នាំនេះ ដែលជារដូវឈប់សម្រាកដំបូង រាប់ចាប់តាំងពីទីក្រុងប៉េកាំង បានបន្ធូរបន្ថយការរឹតត្បិតលើការដើរហើរព្រោះតែកូវីដ-19។

ទោះជាយ៉ាងណាក៏ដោយ ក្រុមអ្នកវិភាគព្រមានថា ឱនភាពសេដ្ឋកិច្ចរបស់ប្រទេសចិន ស្ថានភាពអស្ថិរភាពក្នុងមុខរបរ ការងារ និងប្រាក់ចំណូលធ្លាក់ចុះ អាចកាត់បន្ថយដំណើរទេសចរណ៍ក្រៅប្រទេសរបស់ពលរដ្ឋចិន នាំឱ្យគោលនយោបាយលើកលែងទិដ្ឋាការខាងលើមិនសូវមានប្រសិទ្ធភាព៕

February 9, 2024

កម្ពុជាទទួលបានទុនវិនិយោគជិតបួនពាន់លានដុល្លារអាម៉េរិក រាប់ចាប់ពីខែសីហាឆ្នាំ 2023 ដល់បច្ចុប្បន្ន

ប្រមុខរាជរដ្ឋាភិបាលកម្ពុជា បានអះអាងថា ចាប់តាំងពីសម្តេចបានឡើងកាន់តំណែងជានាយករដ្ឋមន្ត្រីពោលគឺ ចាប់ពីខែសីហា ឆ្នាំ 2023 មកដល់បច្ចុប្បន្ន កម្ពុជាទាក់ទាញបានការវិនិយោគប្រមាណ 172គម្រោង ដែលមានទុនសរុបជិត 4 ពាន់លានដុល្លារ និងអាចបង្កើតការងារបានជាង 19 ម៉ឺនកន្លែង។

ការអះអាងរបស់សម្ដេចធិបតីនាយករដ្ឋមន្រ្ដីដូចខាងលើនេះ ត្រូវបានលើកឡើងនៅក្នុងពិធី «បិទសន្និបាតបូកសរុបការងារឆ្នាំ 2023 និងលើកទិសដៅការងារបន្តសម្រាប់ឆ្នាំ 2024 របស់ក្រសួងការងារ និងបណ្តុះបណ្តាលវិជ្ជាជីវៈ» និងប្រកាសដាក់ឱ្យអនុវត្តន៍ «ផែនការយុទ្ធសាស្រ្តអភិវឌ្ឍន៍វិស័យការងារ សន្តិសុខសង្គម» នារសៀលថ្ងៃទី 08 ខែកុម្ភៈឆ្នាំ 2024 នៅសណ្ឋាគារសុខាភ្នំពេញ។

សម្ដេចធិបតី ហ៊ុន ម៉ាណែត បានបញ្ជាក់ថា គោលដៅធំបំផុតរបស់រាជរដ្ឋាភិបាល គឺជំរុញកំណើនសេដ្ឋកិច្ចនិងបង្កើតការងារជូនប្រជាពលរដ្ឋ។

យោងតាមប្រមុខរាជរដ្ឋាភិបាលកម្ពុជា កន្លងមក កំណើនសេដ្ឋកិច្ចរបស់កម្ពុជាគឺមានប្រមាណ 7% រាប់ចាប់តាំងពីពេលដែលកម្ពុជាទទួលបានសន្តិភាព រហូតមកទល់ពេលផ្ទុះជំងឺកូវីដ-19៕

February 8, 2024

សេដ្ឋកិច្ចចិនក្នុងឆ្នាំ 2023 មានកំណើនជាងប្រាំភាគរយ

បើទោះជាជួបឧបសគ្គច្រើន ប៉ុន្តែផលិតផលក្នុងស្រុកសរុបរបស់ប្រទេសចិន ដែលជាខឿនសេដ្ឋកិច្ចធំជាងគេលំដាប់ទីពីរក្នុងពិភពលោក នៅតែមានកំណើនជាង 5% នៅក្នុងឆ្នាំ 2023 ស្របនឹងគោលដៅដែលបានកំណត់។

តួលេខខាងលើត្រូវបាននាយកដ្ឋានជាតិស្ថិតិចិន ប្រកាសកាលពីព្រឹកថ្ងៃទី 17 មករានេះ។ គោលដៅកំណើនសេដ្ឋកិច្ចក្នុងឆ្នាំ 2023 ដែលប្រទេសនេះបានដាក់ចេញគឺក្នុងរង្វង់ 5%។

កាលពីថ្ងៃទី 16 មករា 2024 នាយករដ្ឋមន្ត្រីចិន លោក Li Qiang ក៏បាននិយាយថា សេដ្ឋកិច្ចប្រទេសចិនក្នុងឆ្នាំកន្លង មានកំណើន 5.2%។ កំណើននេះស្របទៅនឹងការព្យាករនានារបស់ធនាគារធំៗនៅលើពិភពលោក ក្នុងនោះមានទាំង Goldman Sachs និង Morgan Stanley ផងដែរ។

កាលពីឆ្នាំ 2022 សេដ្ឋកិច្ចរបស់ចិន មានកំណើនតែ 3% ដោយសារតែគោលនយោបាយរឹតបន្តឹងការគ្រប់គ្រងកូវីដ-19។ ល្បឿននៃកំណើននេះមិនសម្រេចបានគោលដៅ 5.5% ដែលបានដាក់ចេញក្នុងឆ្នាំនោះ៕

January 17, 2024

នាវាទេសចរណ៍ខ្នាតធំដែលធ្លាប់ទទួលបានជំនួយពីកម្ពុជាក្នុងសម័យកូវីដ បានត្រឡប់មកជាថ្មី

(ខេត្តព្រះសីហនុ) – នាវាទេសចរណ៍ខ្នាតធំ Westerdam នាថ្ងៃទី 28 ធ្នូ 2023 នេះ ត្រូវបានអនុញ្ញាតឱ្យចូលចតនៅកំពង់ផែស្វយ័តក្រុងព្រះសីហនុ ដើម្បីឱ្យភ្ញៀវនៅលើនាវានេះឡើងមកកម្សាន្តនៅក្នុងខេត្តព្រះសីហនុ និងខេត្តកែប។ នេះបើតាមទំព័រ CPP។

នេះគឺជាការចូលចតជាលើកទីពីររបស់នាវាទេសចរណ៍ Westerdam នៅកំពង់ផែរបស់កម្ពុជា បន្ទាប់ពីការចូលចតលើកទីមួយកាលពីឆ្នាំ 2020 ជាពេលដែលពិភពលោកកំពុងប្រឈមនឹងវិបត្តិសុខភាព និងជាពេលដែលនាវានេះត្រូវបានប្រទេសជាច្រើនបដិសេធការស្នើសូមចូលចត។

ការចូលចតជាលើកទីពីរដែលធ្វើឡើងនៅថ្ងៃទី 28 ខែធ្នូ ឆ្នាំ 2023 របស់ Westerdam គឺមានភ្ញៀវទេសចរណ៍ជាងពីរពាន់នាក់។ ដំណើរចូលចតជាថ្មីនេះ ត្រូវបានក្រសួងទេសចរណ៍ សហការជាមួយរដ្ឋបាលខេត្តព្រះសីហនុ រៀបចំពិធីទទួល ក៏ដូចជារំលឹកខួបបីឆ្នាំនៃការស្នើសូមចូលចតរបស់នាវា Westerdam នៅកម្ពុជា។

យោងតាមឯកឧត្តម សុខ សូកេន រដ្ឋមន្ត្រីក្រសួងទេសចរណ៍ ក្នុងចំណោមភ្ញៀវជាងពីរពាន់នាក់នៅលើនាវានេះ មានភ្ញៀវប្រមាណ 500 នាក់បានឡើងមកទស្សនានៅរមណីយដ្ឋាននានាក្នុងខេត្តព្រះសីហនុ និងខេត្តកែប។

«តាមរយៈការចូលចតជាលើកទីពីររបស់នាវាទេសចរណ៍ Westerdam នេះ នឹងជួយទាក់ទាញនាវាទេសចរណ៍ខ្នាតធំមកកាន់កម្ពុជា នាឆ្នាំក្រោយបន្តបន្ទាប់ទៀត» រដ្ឋមន្ត្រីក្រសួងទេសចរណ៍សង្ឃឹមដូច្នេះ។

យោងតាមឯកឧត្ដមរដ្ឋមន្ត្រី នាវាទេសចរណ៍នេះនឹងចតនៅកម្ពុជាក្នុងរយៈពេលមួយថ្ងៃ ហើយគ្រោងនឹងចាកចេញពីកម្ពុជានៅវេលាម៉ោង 9 យប់នេះ។

នៅក្នុង 11 ខែដំបូងនៃឆ្នាំ 2023 កម្ពុជាទទួលបានភ្ញៀវទេសចរណ៍អន្តរជាតិជាង 4.91 លាននាក់ ក្នុងនោះភ្ញៀវពីប្រទេសថៃមានចំនួនច្រើនជាងគេ ពោលគឺ 1.65 លាននាក់ ខណៈភ្ញៀវពីវៀតណាមច្រើនជាងគេលំដាប់ទីពីរ និងចិនលំដាប់ទីបី៕

December 28, 2023

យុវវ័យសិង្ហបុរី ចូលចិត្តជួលរថយន្តជាជាងទិញរថយន្ត

យោងតាមស្ថិតិនាពេលថ្មីៗនេះ នៅប្រទេសសិង្ហបុរី សេវាចែករំលែករថយន្ត និងរថយន្តសម្រាប់ជួល កំពុងតែ «ផ្ទុះ» ការគាំទ្រពីសំណាក់យុវវ័យ ដោយសារតែមូលហេតុច្រើនយ៉ាង។

ទំព័រ Straits Times ឱ្យដឹងថា ចំនួនរថយន្តសម្រាប់ជួលនៅប្រទេសសិង្ហបុរី បានកើន 11.3% បើធៀបនឹងដំណាក់កាលដូចគ្នានៅក្នុងឆ្នាំកន្លង ដោយកើនជិតដល់ 73,000 គ្រឿង។

តំណាងរបស់ក្រុមហ៊ុនរថយន្តឈ្នួល GetGo ឱ្យដឹងថា ក្រុមហ៊ុននេះកំពុងបន្តការពង្រីងសេវាកម្មរបស់ខ្លួន។ កាលពីខែកុម្ភៈ GetGo ប្រមូលទុនបាន 20 លានដុល្លារអាម៉េរិក ដើម្បីអភិវឌ្ឍក្រុមរថយន្តឈ្នួលរបស់ខ្លួន ហើយបច្ចុប្បន្ន មានជាង 2,100 គ្រឿង។ ក្រុមហ៊ុននេះបានកំណត់គោលដៅ មានរថយន្តអគ្គិសនី 10,000 គ្រឿងនៅត្រឹមឆ្នាំ 2030។

ចំណែកតំណាងក្រុមហ៊ុនរថយន្តឈ្នួលរយៈពេលយូរ Kinto Singapore វិញ បានឱ្យដឹងថា សេវារថយន្តឈ្នួលរបស់ពួកគេកំពុងកើន 20% ជារៀងរាល់ខែ ចាប់ពីឆ្នាំ 2022។ បច្ចុប្បន្ន តម្លៃជួលរថយន្តទាបបំផុតគឺចាប់ពី 1,600 ដុល្លារអាម៉េរិក ក្នុងមួយខែ។

យោងតាម PGS Walter Theseira របស់សាកលវិទ្យាល័យវិទ្យាសាស្ត្រសង្គមសិង្ហបុរី ចំនួនរថយន្តឈ្នួល កន្លងមកធ្លាប់បានធ្លាក់ចុះនៅក្នុងអំឡុងវិបត្តិសុខភាពសាកល ប៉ុន្តែក្រោយមកក៏ងើបឡើងវិញយ៉ាងលឿន ដោយសារកត្តាជាច្រើន។

មូលហេតុសំខាន់ៗមួយចំនួនដែលបានជួយជំរុញកំណើននៃរថយន្តឈ្នួលឱ្យងើបឡើងវិញ រួមមាន ការងើបឡើងវិញនៃវ័យទេសចរណ៍ ក្រោយសម័យកូវីដ-19 ពិសេសគឺភ្ញៀវមកពីប្រទេសចិន។ មូលហេតុទីពីរនោះគឺ លិខិតអនុញ្ញាតសម្រាប់ការក្លាយជាម្ចាស់រថយន្តនៅប្រទេសសិង្ហបុរី មានតម្លៃខ្ពស់ខ្លាំង។ បញ្ហានេះធ្វើឱ្យប្រជាជនជាច្រើនមិនពេញចិត្ត ប៉ុន្តែក៏មានមនុស្សជាច្រើនយល់ថា នេះជាវិធីល្អដើម្បីជួយទប់ទល់នឹងការកកស្ទះចរាចរណ៍។

យោងតាមក្រុមហ៊ុន GetGo «ការផ្លាស់ប្ដូរគំនិតស្ដីពីការក្លាយជាម្ចាស់រថយន្ត និងការយកចិត្តទុកដាក់ទៅលើស្ថិរភាព» របស់យុវវ័យ ក៏រួមចំណែកជួយឱ្យសេវាកម្មជួលរថយន្តមានការកើនឡើងខ្ពស់។

និន្នាការខាងលើនេះមិនមែនកើតមានតែនៅក្នុងប្រទេសសិង្ហបុរីឡើយ។ យោងតាមសារព័ត៌មាន Washington Post នៅសហរដ្ឋអាម៉េរិក យុវវ័យក៏កំពុងមាននិន្នាការដូចនៅសិង្ហបុរី។ ក្រៅពីនេះ ក៏អាចនៅមានប្រទេសជាច្រើនផ្សេងទៀតដែលកំពុង «ចូលចិត្តជួលរថយន្តជាងទិញរថយន្ត»៕

December 18, 2023

អាជ្ញាធរថៃអនុញ្ញាតឱ្យក្លឹបរាត្រី និងបារ បើកទ្វារដល់ម៉ោងបួនទៀបភ្លឺដើម្បីទាក់ទាញទេសចរ

គណៈរដ្ឋមន្ត្រីថៃ អនុម័តសេចក្ដីសម្រេចថ្មីដែលអនុញ្ញាតឱ្យទីតាំងកម្សាន្ត រួមមាន ក្លឹបរាត្រី និងបារជាដើម បើកទ្វារដល់ម៉ោង 4 ទៀបភ្លឺ ដើម្បីទាក់ទាញភ្ញៀវ និងជំរុញវិស័យទេសចរណ៍។

យោងតាមសារព័ត៌មាន Reuters សេចក្ដីសម្រេចថ្នាក់ក្រសួងនេះត្រូវបានអនុម័តកាលពីថ្ងៃទី 28 វិច្ឆិកា 2023 ។

អ្នកនាំពាក្យរបស់រាជរដ្ឋាភិបាលថៃ លោកស្រី Traisulee Traisaranakul ឱ្យដឹងថា ទីតាំងកម្សាន្តដូចជា ក្លឹបរាត្រី បារ ហាងការ៉ាអូខេជាដើម នៅរាជធានីបាងកក និងបណ្ដាទីក្រុង Phuket, Pattaya, Chiang Mai និង Samui ត្រូវបានអនុញ្ញាតឱ្យបើកទ្វារ 2 ម៉ោងទៀតបន្ថែមទៀត ពោលគឺរហូតដល់ម៉ោង 4 ទៀបភ្លឺ។ សេចក្ដីសម្រេចនេះគឺជាយុទ្ធសាស្ត្រមួយរបស់រាជរដ្ឋាភិបាលថៃ ដើម្បីទាក់ទាញភ្ញៀវបរទេសបន្ថែមទៀត។

មុននោះ កាលពីខែកញ្ញា 2023 អាជ្ញាធរថៃបានលើកលែងទិដ្ឋាការចំពោះភ្ញៀវទេសចរណ៍ចិន ដែលជាប្រភពទេសចរសំខាន់របស់ប្រទេសនេះ។

នៅមុនវិបត្តិកូវីដ-19 ប្រទេសថៃធ្លាប់ទទួលភ្ញៀវបរទេសបាន 39.9 លាននាក់/ឆ្នាំ ក្នុងនោះមាន 11 លាននាក់មកពីប្រទេសចិន។

ទេសចរណ៍គឺជាកត្តាជំរុញសំខាន់បំផុតរបស់សេដ្ឋកិច្ចថៃ។ ប៉ុន្តែ បច្ចុប្បន្ន ល្បឿននៃកំណើនរបស់វិស័យនេះ មានភាពយឺតយ៉ាវជាងវិស័យដទៃ។ ដូច្នេះ រដ្ឋាភិបាលរបស់លោកនាយករដ្ឋមន្ត្រី Srettha Thavisin កំពុងប្រឹងប្រែងចាត់វិធានការដើម្បីជំរុញកំណើនវិស័យទេសចរណ៍បន្ថែមទៀត។

រាប់ចាប់ពីដើមឆ្នាំ 2023 រហូតដល់បច្ចុប្បន្ន ប្រទេសថៃទទួលបានភ្ញៀវបរទេសប្រមាណ 24.5 លាននាក់ ហើយត្រូវបានព្យាករថា នឹងកើនដល់ 28 លាននាក់នៅដំណាច់ឆ្នាំនេះ៕

November 29, 2023

កម្ពុជា លើកទឹកចិត្តឱ្យធនាគារ រៀបចំឥណទានឡើងវិញចំពោះអ្នកទិញអចលនទ្រព្យដែលរងផលប៉ះពាល់ពីវិបត្តិសេដ្ឋកិច្ច

(ភ្នំពេញ) – គ្រឹះស្ថានធនាគារ និងហិរញ្ញវត្ថុទទួលបានការលើកទឹកចិត្តពី ប្រមុខរាជរដ្ឋាភិបាលកម្ពុជា ទាក់ទងនឹងការរៀបចំឥណទានឡើងវិញ ជូនដល់អតិថិជនរបស់ខ្លួនដែលបានខ្ចីប្រាក់ដើម្បីទិញអចលនទ្រព្យ និងកំពុងរងផលប៉ះពាល់ដោយសារវិបត្តិសេដ្ឋកិច្ច។

«លើកទឹកចិត្តដល់គ្រឹះស្ថានធនាគារ និងហិរញ្ញវត្ថុ ធ្វើការរៀបចំឥណទានឡើងវិញ តាមលទ្ធភាពជាក់ស្តែងរបស់គ្រឹះស្ថាន ដោយផ្អែកលើគោលការណ៍ស្ម័គ្រចិត្ត និងការព្រមព្រៀងរវាងគ្រឹះស្ថាន និងក្រុមហ៊ុនអចលនទ្រព្យ និងអភិវឌ្ឍន៍លំនៅឋានជាបុរី ដែលអនុលោមតាមប្រកាសលេខធមស 017 3 44 ប្រក. ចុះថ្ងៃទី 01 ខែធ្នូ ឆ្នាំ 2017 ស្តីពីចំណាត់ថ្នាក់ហានិភ័យឥណទាន និងសមវិធានធន់» សម្តេច ហ៊ុន ម៉ាណែត បានថ្លែងដូច្នេះនៅឯវិមានសន្ដិភាព កាលពីព្រឹកថ្ងៃទី 13 វិច្ឆិកា 2023 ក្នុងឱកាសអញ្ជើញជាអធិបតីនៃវេទិកា «រាជរដ្ឋាភិបាល -ផ្នែកឯកជន» លើកទី 19 ដើម្បីបើកការជជែកលើបញ្ហាធុរកិច្ចនៅកម្ពុជា។

ដោយសារតែវិស័យអចលនទ្រព្យបាន និងកំពុងរងផលប៉ះពាល់ធ្ងន់ធ្ងរពីវិបត្តិសុខភាព និងវិបត្តិផ្សេងៗទៀត រាជរដ្ឋាភិបាលក៏ដាក់ចេញនូវវិធានការមួយចំនួនដើម្បីចូលរួមដោះស្រាយ។ វិធានការទាំងនេះ រួមមានដូចខាងក្រោម៖

បន្តពន្យារពេលការបង់ពន្ធជាកញ្ចប់តាមដំណាក់កាលរហូតដល់ដំណាច់ឆ្នាំ 2024 សម្រាប់ក្រុមហ៊ុនអភិវឌ្ឍន៍លំនៅឋានជាបុរី ដែលបាននឹងកំពុងប្រតិបត្តិការគម្រោងអភិវឌ្ឍន៍លំនៅឋាន ដែលមានអាជ្ញាបណ្ណអចលនវត្ថុផ្តល់ដល់និយ័តករអាជីវកម្មអចលនវត្ថុ និងបញ្ចាំ។ល។
បង្កើនរយៈពេលនៃការបង់ពន្ធជាកញ្ចប់តាមដំណាក់កាលពី 12 ខែ ដល់ 18 ខែ សម្រាប់ក្រុមហ៊ុនអភិវឌ្ឍន៍លំនៅឋានជាបុរី ដែលបង់ពន្ធតិចជាងមួយលានដុល្លារ និងពី 24 ខែ ដល់ 38 ខែ សម្រាប់ក្រុមហ៊ុនអភិវឌ្ឍន៍លំនៅឋានជាបុរី ដែលបង់ពន្ធលើសពីមួយលានដុល្លារ។
ក្រុមហ៊ុនអភិវឌ្ឍន៍លំនៅឋានជាបុរីថ្មី ឬក្រុមហ៊ុនមានគម្រោងអភិវឌ្ឍន៍លំនៅឋានជាបុរី ដែលមិនទាន់បានអភិវឌ្ឍន៍ត្រូវបង់ពន្ធស្របតាម និតិវិធីជាព័ត៌មានរបបពិត និងត្រូវកាន់បញ្ជីគណនីឱ្យបានត្រឹមត្រូវ។
បន្តពន្យារពេលការអនុវត្តលើពន្ធចំណេញមូលធន សម្រាប់តែវិស័យអចលនទ្រព្យរហូតដល់ដំណាច់ឆ្នាំ2024។
បន្តលើកលែងពន្ធប្រថាប់ត្រាលើការផ្ទេរសិទ្ធិ ឬសិទ្ធិកាន់កាប់លំនៅឋានគ្រប់ប្រភេទដែលមានលក្ខណៈជាបុរី និងដែលមានតម្លៃក្រោម ឬស្មើនឹង 7 ម៉ឺនដុល្លាររហូតដល់ដំណាច់ឆ្នាំ 2024។
លើកទឹកចិត្ត និងស្នើឱ្យគ្រឹះស្ថានធនាគារ និងហិរញ្ញវត្ថុ ធ្វើការរៀបចំឥណទានឡើងវិញ តាមលទ្ធភាពជាក់ស្តែងរបស់គ្រឹះស្ថាន ដោយផ្អែកលើគោលការណ៍ស្ម័គ្រចិត្ត និងការព្រមព្រៀងរវាងគ្រឹះស្ថាន និងក្រុមហ៊ុនអចលនទ្រព្យ និងអភិវឌ្ឍន៍លំនៅឋានជាបុរី ដែលអនុលោមតាមប្រកាសលេខ 017 3 44 ប្រក. ចុះថ្ងៃទី 01 ខែធ្នូ ឆ្នាំ 2017 ស្តីពីចំណាត់ថ្នាក់ហានិភ័យឥណទាន និងសមវិធានធន។
លើកលែងការផាកពិន័យផ្សេងៗចំពោះគម្រោងអភិវឌ្ឍន៍លំនៅឋានជាបុរី ប៉ុន្តែក្រុមហ៊ុនអភិវឌ្ឍចាំបាច់ត្រូវបំពេញកាតព្វកិច្ចសមស្របតាមប្រកាសស្តីពីការគ្រប់គ្រងអាជីវកម្មអភិវឌ្ឍអចលនវត្ថុ។
ពន្យារពេលអនុវត្តរហូតដល់ដំណាច់ឆ្នាំ 2023 លើសេចក្តីប្រកាសស្តីពីកាតព្វកិច្ចដាក់រាយការណ៍ហិរញ្ញវត្ថុឱ្យសវកម្មឯករាជ្យ ចេញដោយក្រសួងសេដ្ឋកិច្ច និងហិរញ្ញវត្ថុ។

រាជរដ្ឋាភិបាលក៏បានបង្កើតក្រុមការងារអន្តរក្រសួងចំនួនពីរ ដើម្បីតាមដាន ដោះស្រាយបញ្ហាប្រឈម នៅក្នុងវិស័យនេះអចលនទ្រព្យផងដែរ។

សម្តេចធិបតី ក៏បានដាក់ចេញនូវវិធានការមួយចំនួនទៀត ដើម្បីជួយដល់វិស័យអចលទ្រព្យ និងសំណង់ ក្នុងនោះសម្រាប់ផ្ទះមានតម្លៃលើស 7 ម៉ឺនដុល្លារអាមេរិក ត្រូវបានអនុញ្ញាតឱ្យដកតម្លៃ 7 ម៉ឺនដុល្លារអាមេរិកចេញពីមូលដ្ឋាន នៃការគិតពន្ធប្រថាប់ត្រា ក៏ដូចជាការលើកលែងពន្ធប្រថាប់ត្រាដល់អចលនទ្រព្យដែលត្រូវបានទិញ-លក់ក្នុងតម្លៃក្រោម 7 ម៉ឺនដុល្លារ រហូតដល់ឆ្នាំ 2024 ផងដែរ៕

November 14, 2023

Tag: កូវីដ