កីឡាបាល់ទាត់

ព្រះចន្ទអាចរៀបចំព្រឹត្តិការណ៍បាល់ទាត់ដំបូងនៅឆ្នាំ 2035?

បាល់ទាត់គឺជាកីឡាដែលទទួលបានការនិយមចូលចិត្តបំផុតនៅលើពិភពលោក ដូច្នេះតើវាអាចត្រូវបានរៀបចំការប្រកួតនៅលើភព ឬទីឋានដទៃក្រៅពីផែនដី ឬអត់?

នេះគឺជាអ្វីដែលក្រុមអ្នកវិទ្យាសាស្ត្រកំពុងគិតដល់។ ពួកគេជឿថា បាល់ទាត់អាចលេងនៅលើឋានព្រះចន្ទយ៉ាងឆាប់នៅឆ្នាំ 2035។

ក្រុមអ្នកជំនាញមកពីវិទ្យាស្ថានបច្ចេកទេស និងបច្ចេកវិទ្យា (IET) ដែលមានទីស្នាក់ការកណ្ដាលនៅប្រទេសអង់គ្លេស បានរៀបគម្រោងពិសេសមួយស្ដីពីការរៀបចំព្រឹត្តិការណ៍ប្រកួតកីឡាបាល់ទាត់នៅលើឋានព្រះចន្ទ។ ពួកគេថា ការប្រកួតនេះនឹងមានថេរវេលា 90 នាទី ប៉ុន្តែមិនប្រើប្រាស់ឈុតសម្លៀកបំពាក់ធម្មតាដូចនៅលើផែនដី។

ការប្រកួតនៅខាងក្រៅភពផែនដីនឹងត្រូវបានចែកចេញជាបួនតង់ ហើយក្នុងមួយតង់មាន 10 នាទី និងសម្រាក 20 នាទីនៅចន្លោះតង់នីមួយៗ។ ក្រុមបាល់ទាត់នីមួយៗនឹងមានកីឡាករ 5 នាក់។

សម្លៀកបំពាក់កីឡាដូចនៅលើផែនដីនឹងត្រូវបានជំនួសដោយឈុតអ្នកអវកាស ដែលបំពាក់មុខងារទំនើបៗជាច្រើន ក្នុងនោះមានទាំងឧបករណ៍បញ្ចុះកម្ដៅផងដែរ។

ចំណែកអាជ្ញាកណ្ដាលវិញ នឹងមានលក្ខណៈស្រដៀងទៅនឹងបច្ចេកវិទ្យា VAR។ ព្រោះថា ពួកគេនឹងបង្ហាញខ្លួនលើទីលានប្រកួតក្នុងទម្រង់ជារូបភាព 3D។

យោងតាម IET ការប្រកួតបាល់ទាត់លើឋានព្រះចន្ទនឹងធ្វើឡើងនៅពេលថ្ងៃត្រង់ ដើម្បីងាយស្រួលមើល គ្រាដែលទំហំរបស់ទីលានក៏នឹងត្រូវបានបន្ថយមកនៅត្រឹម 1/8 នៃទីលាននៅលើផែនដី។

ខ្សែបន្ទាត់ជុំវិញទីលានអាចត្រូវបានគូសសញ្ញាដោយធាតុ polymer ពណ៌ខ្មៅ-ស។ ទីលានបាល់ទាត់ក៏នឹងត្រូវការបាំងដោយសំណាញ់ និងប្រក់ដំបូល ដើម្បីជៀសវាងបាល់ខ្ទាត់ចេញទៅបាត់។ រីឯគ្រាប់បាល់វិញ នឹងត្រូវមានទំហំធំជាងជិតទ្វេដង ធៀបនឹងបាល់ធម្មតា ដើម្បីងាយស្រួលមើល។

ដើម្បីគាំទ្រដល់គម្រោងខាងលើ IET កំពុងតែអំពាវនាវសូមឱ្យក្មេងនៅប្រទេសអង់គ្លេសដែលមានអាយុពី 4 ទៅ 13 ឆ្នាំ ចូលរួមការរចនាឈុតសម្លៀកបំពាក់ផ្លូវការដំបូងគេសម្រាប់ព្រឹត្តិការណ៍បាល់ទាត់នៅលើឋានព្រះចន្ទ៕

July 25, 2023

AFC ពិន័យធ្ងន់ធ្ងរចំពោះករណីវាយតប់គ្នានៅវគ្គផ្ដាច់ព្រ័ត្រស៊ីហ្គេមនៅកម្ពុជា

កីឡាករចំនួនប្រាំរូប និងសមាជិក 9 រូបក្នុងក្រុមគ្រូបង្វឹករបស់ក្រុមបាល់ទាត់ជម្រើសជាតិថៃ និងឥណ្ឌូណេស៊ី ត្រូវបានសហព័ន្ធកីឡាបាល់ទាត់ទ្វីបអាស៊ី (AFC) ហាមការចូលរួមប្រកួតចំនួន 6 ប្រកួត និងបង់ប្រាក់ពិន័យយ៉ាងតិច 1,000 ដុល្លារអាម៉េរិក។

កាលពីព្រលប់ថ្ងៃទី 11 កក្កដា 2023 គណៈកម្មការវិន័យ និងក្រមសីលធម៌របស់ AFC បានបើកកិច្ចប្រជុំ និងបានសម្រេចពិន័យទាក់ទងនឹងហេតុការណ៍ប្រវាយប្រតប់គ្នាក្នុងវគ្គផ្ដាច់ព្រ័ត្រនៃការប្រកួតបាល់ទាត់ផ្នែកបុរសនៅស៊ីហ្គេមលើកទី 32 រវាងថៃ និងឥណ្ឌូណេស៊ី ដែលបានធ្វើឡើងនៅកម្ពុជា។

សមាជិកចំនួន 7 រូបរបស់ឥណ្ឌូណេស៊ី ក្នុងនោះមានកីឡាករ 3 រូប និងក្រុមមន្ត្រី គ្រូបង្វឹកចំនួន 4 រូប ត្រូវបានហាមមិនឱ្យចូលរួមការប្រកួតចំនួន 6 លើក។ កីឡាករពីររូប និងសមាជិកក្រុមគ្រូបង្វឹក 3 រូប ក៏ត្រូវបង់ប្រាក់ពិន័យចំនួន 1,000 ដុល្លារអាម៉េរិក។

សមាជិកក្រុមបាល់ទាត់ជម្រើសជាតិថៃចំនួន 7 រូប ក៏ត្រូវទទួលការពិន័យដូចគ្នានេះដែរ។ ក្នុងនោះ អ្នកចាំទី មួយរូប និងជំនួយការគ្រូបង្វឹកពីររូប ត្រូវបានហាមចូលរួមប្រកួត 6 លើក និងបង់ប្រាក់ពិន័យ 1,000 ដុល្លារអាម៉េរិក។ ចំណែកកីឡាករ និងសមាជិកពាក់ព័ន្ធចំនួន 4 នាក់ទៀត ត្រូវបានហាមចូលរួមប្រកួត ប៉ុន្តែមិនត្រូវបង់ប្រាក់ពិន័យ។

AFC ក៏បានតម្រូវឱ្យសហព័ន្ធកីឡាបាល់ទាត់ថៃ (FAT) បង់ប្រាក់ពិន័យ 10,000 ដុល្លារអាម៉េរិក ខណៈដែលសហព័ន្ធកីឡាបាល់ទាត់ឥណ្ឌូណេស៊ី (PSSI) មិនត្រូវបានពិន័យ។

វគ្គផ្ដាច់ព្រ័ត្របាល់ទាត់បុរសស៊ីហ្គេមទី 32 នៅលើទីលានបាល់ទាត់នៅរាជធានីភ្នំពេញ កាលពីព្រលប់ថ្ងៃទី 16 ឧសភា 2023 ត្រូវបានបញ្ចប់ដោយលទ្ធផល 5-2 ដែលជ័យជម្នះបានទៅលើក្រុមឥណ្ឌូណេស៊ី ក្រោយពីការប្រកួត 120 នាទី។ ការប្រកួតនេះត្រូវបានគេចាប់អារម្មណ៍ខ្លាំង នៅពេលសមាជិករបស់ក្រុមទាំងពីរវាយតប់គ្នាពីរលើក។ បញ្ហានេះបានធ្វើឱ្យវិស័យបាល់ទាត់របស់ប្រទេសថៃ និងឥណ្ឌូណេស៊ី ក៏ដូចជាស៊ីហ្គេមទាំងមូលរងផលប៉ះពាល់។

ក្រោយការប្រកួតមួយថ្ងៃ ក្រុមថៃបានចេញមុខសូមអភ័យទោសចំពោះហេតុការណ៍ខាងលើ។ ក្រោយមក FAT ក៏បានដាក់ពិន័យលើក្រុមថៃ។ ចំណែកឥណ្ឌូណេស៊ីវិញ មិនបានពិន័យលើក្រុមជម្រើសជាតិរបស់ខ្លួន ដោយគិតថា មូលហេតុមិនមែនបង្កឡើងដោយភាគីខាងឥណ្ឌូណេស៊ី៕

July 13, 2023

កំពូលកីឡាការិនីបាល់ទាត់ 10 រូបនៅ World Cup នារី 2023

ទីភ្នាក់ងារសារព័ត៌មាន AP បានបង្ហាញបញ្ជីឈ្មោះកំពូលកីឡាការិនីបាល់ទាត់ចំនួន 10 រូបដែលត្រូវបានគេរំពឹងច្រើនជាងគេនៅ World Cup នារី 2023 ក្នុងនោះមានទាំង Alex Morgan និង Marta ផងដែរ។

Alex Morgan បានជួយឱ្យសហរដ្ឋអាម៉េរិកដណ្ដើមបានតំណែងជើងឯក World Cup នារីចំនួនពីរលើក ហើយឆ្នាំនេះគឺជាលើកទីបួនដែលនាងចូលរួមប្រកួត។ Alex Morgan ដណ្ដើមបានមេដាយមាសនៅអូឡាំពិកចំនួនមួយគ្រឿង និងជាកីឡាការិនីបាល់ទាត់ដែលឆ្នើមជាងគេគ្រប់សម័យកាល។ ការប្រកួតនៅអូស្ត្រាលី និងនូវែលសេឡង់នាពេលខាងមុខនឹងអាចជួយឱ្យកីឡាការិនីរូបនេះមានឱកាសបង្កើតកំណត់ត្រាដណ្ដើមបានជើងឯក World Cup ចំនួនបីជាបន្តបន្ទាប់ ដែលនេះមិនទាន់មានកីឡាកររូបណាអាចធ្វើបាន។ ខ្សែប្រយុទ្ធវ័យ 34 ឆ្នាំរូបនេះ ដណ្ដើមបានពានរង្វាន់អន្តរជាតិចំនួន 11 និងពានរង្វាន់ជើងឯក Champions League ជាមួយនឹងក្លឹប Lyon។

កំពូលកីឡាការិនីមួយរូបផ្សេងទៀតដែលនឹងត្រូវប្រកួតនៅ World Cup 2023 គឺខ្សែប្រយុទ្ធ Christine Sinclair តំណាងរបស់កាណាដា។ ពុំទាន់មានកីឡាករ កីឡាការិនីណាម្នាក់ដែលរកបានគ្រាប់បាល់ច្រើនដូច Sinclair សម្រាប់ក្រុមជម្រើសជាតិ។ Sinclair រកបាន 190 គ្រាប់ក្នុងចំណោម 319 ប្រកួត ជូនប្រទេសកាណាដា។ Sinclair នឹងចូលរួមទាត់នៅ World Cup លើកទី 6 ក្នុងអាជីព។ Sinclair ដណ្ដើមបានពានរង្វាន់អន្តរជាតិចំនួន 8 ជាមួយនឹងក្រុមជម្រើសជាតិកាណាដា ក្នុងនោះមានទាំងមេដាយមាសអូឡាពិក 2021 ផងដែរ។

នៅព្រឹត្តិការណ៍ប្រកួតកីឡាបាល់ទាត់ពិភពលោកផ្នែកនារីឆ្នាំ 2023 មានខ្សែប្រយុទ្ធខ្លាំងៗជាច្រើន ប៉ុន្តែ Sam Kerr ត្រូវបានសង្ឃឹមច្រើនថានឹងក្លាយជាម្ចាស់ពានរង្វាន់កីឡាការិនីដែលរកបានគ្រាប់បាល់ច្រើនជាងគេ។ ខ្សែប្រយុទ្ធវ័យ 30 រូបនេះគឺជាកីឡាការិនីអូស្ត្រាលីដំបូងគេដែលបង្កើតបាន hat-trick នៅ World Cup មិនថាកីឡាករ ឬកីឡាការិនី។ នាងគឺជាស្ដេចកម្ទេចសំណាញ់ទីនៅពានរង្វាន់បាល់ទាត់ទ្វីបអាស៊ីឆ្នាំ 2022 ដោយរកបាន 7 គ្រាប់ ក្លាយជាកីឡាការិនីដែលរកបានគ្រាប់បាល់ច្រើនជាងគេនៅអូស្ត្រាលី។ Sam Kerr គឺជាកីឡាការិនីរបស់ Chelsea ដែលឆ្នើមជាងគេនៅអង់គ្លេស ក្នុងពីររដូវកាលកន្លង ដោយធ្លាប់បានស៊ុតបញ្ចូលទីជួយឱ្យក្រុមនេះឈ្នះ Man Utd នៅវគ្គផ្ដាច់ព្រ័ត្រ FA Cup។ ដោយបានលេងលើទីលានរបស់ប្រទេសខ្លួន Sam Kerr នឹងមានឱកាសច្រើនដែលអាចជួយឱ្យអូស្ត្រាលីឡើងដល់វគ្គខ្ពស់។

ក្រៅពីកីឡាការិនីខាងលើ World Cup នារី 2023 ក៏នៅមានកំពូលជើងខ្លាំងជាច្រើនផ្សេងទៀត រួមមាន Wendie Renard របស់បារាំង, Ada Hegerberg របស់ន័រវែស, Alexia Putellas របស់អេស្ប៉ាញ, Marta Vieira da Silva របស់ប្រេស៊ីល, Debinha Miri របស់ប្រេស៊ីល, Alexandra Poppp របស់អាល្លឺម៉ង់ និង Lucy Bronze របស់អង់គ្លេស៕

July 6, 2023

គ្រូបង្វឹក Mourinho ត្រូវបានពិន័យធ្ងន់ធ្ងរ ព្រោះតែជេរអាជ្ញាកណ្ដាល បន្ទាប់ពីវគ្គផ្ដាច់ព្រ័ត្រ Europa League

គ្រូបង្វឹករបស់ក្រុមបាល់ទាត់ Roma (អ៊ីតាលី) លោក Jose Mourinho បានទទួលពិន័យជាផ្លូវការពីសហព័ន្ធកីឡាបាល់ទាត់អឺរ៉ុប (UEFA) ដោយសារតែបង្ហាញទង្វើជេរប្រមាថអាជ្ញាកណ្ដាល បន្ទាប់ពីការប្រកួតវគ្គផ្ដាច់ព្រ័ត្រនៅពានរង្វាន់ Europa League 2022-2023។

ក្លឹបបាល់ទាត់ AS Roma បានចាញ់ Sevilla (អេស្ប៉ាញ) នៅក្នុងការប្រកួតទាត់ប៉េណាំងទី ក្នុងវគ្គផ្ដាច់ព្រ័ត្រ Europa League 2022-2023 ធ្វើឱ្យគ្រូបង្វឹក Jose Mourinho ផ្ទុះការខឹងនៅក្រោយការប្រកួត។ គ្រូបង្វឹកជនជាតិព័រទុយហ្កាល់រូបនេះ បានរង់ចាំអាជ្ញាកណ្ដាលនៅចំណត់ឡាន ហើយបានជេរប្រមាថលោក Anthony Taylor។ លោក Mourinho ក៏និយាយបញ្ឆិតបញ្ឆៀងក្នុងន័យថា អាជ្ញាកណ្ដាល Anthony Taylor កាន់ជើងខាងអេស្ប៉ាញ។

ពេលនោះ អ្នកគាំទ្ររបស់ក្រុម Roma ក៏បានស្រែកចំអកឱ្យអាជ្ញាកណ្ដាល Taylor ហើយថែមទាំងគប់កៅអីសំដៅអាជ្ញាកណ្ដាល នៅពេលគាត់ និងគ្រួសារព្យាយាមចាកចេញពីហុងគ្រីត្រលប់ទៅផ្ទះ។

គ្រូបង្វឹក Mourinho ជេរប្រមាថគ្រូបង្វឹក Taylor នៅចំណត់ឡាន

ថ្មីៗនេះ សហព័ន្ធកីឡាបាល់ទាត់អឺរ៉ុប បានសម្រេចចិត្តពិន័យលើគ្រូបង្វឹក Mourinho ដោយមិនឱ្យដឹកនាំបួនប្រកួតនៅអឺរ៉ុប ខណៈដែល Roma ឈរលំដាប់ទី 6 នៅ Serie A កាលពីរដូវកាលមុន ហើយមានលក្ខខណ្ឌគ្រប់គ្រាន់ដើម្បីចូលប្រកួតនៅ Europa League។

ក្រៅពីនេះ ក្លឹប Roma ក៏ត្រូវ UEFA ពិន័យ។ ពួកគេត្រូវបានហាមលក់សំបុត្រនៅឯទីលានដទៃក្នុងការប្រកួតបន្ទាប់នៅអឺរ៉ុប និងពិន័យជាប្រាក់ 5,000 អឺរ៉ូផងដែរ ហើយពួកគេក៏ត្រូវបានតម្រូវឱ្យទាក់ទងទៅកាន់សហព័ន្ធបាល់ទាត់ហុងគ្រីដើម្បីដោះស្រាយការខូចខាតដែលអ្នកគាំទ្ររបស់ Roma បានធ្វើឡើង៕

June 22, 2023

Beckham ចំណាយមួយពាន់លានដុល្លារដើម្បី «បម្រើ» ដល់ Messi ក្នុងការប្រកួតនៅសហរដ្ឋអាម៉េរិក

កីឡាដ្ឋានថ្មីរបស់ក្លឹប Inter Miami ដែលត្រូវចំណាយប្រាក់ឡើងដល់មួយពាន់លានដុល្លារអាម៉េរិក កំពុងស្ថិតក្នុងដំណាក់កាលបង្ហើយការងារចុងក្រោយ មុននឹងដាក់ឱ្យ Messi និងមិត្តរួមក្រុមប្រើប្រាស់។

គម្រោងស្ថាបនាកីឡាដ្ឋានថ្មីស្ថិតនៅលើដីមួយកន្លែងមានឈ្មោះថា Miami Freedom Park លាតសន្ធឹងក្បែរឆ្នេរសមុទ្ររបស់រដ្ឋ Florida ទំហំ 73,000 ហិកតា អមនឹងអ្វីៗជាច្រើនទៀតដែលនឹងទាក់ទាញសាធារណជនក្នុងពេលខាងមុខ។ ក្នុងនោះមានជាអាទិ៍ ឧទ្យានធំបំផុតប្រចាំទីក្រុង សណ្ឋាគារ ហាង និងភោជនីយដ្ឋានលំដាប់ប្រណិត។ល។

កីឡដ្ឋានថ្មីនេះនឹងជាកន្លែងសម្រាប់ហ្វឹកហាត់របស់ក្រុមទីមួយក្នុងក្លឹប Inter Miami និងបណ្ដាក្រុមវ័យក្មេងរបស់វិទ្យាស្ថាន Inter Miami ដែលរួមមានចាប់ពីក្រុម U12 ដល់ U17 និងស្ថិតក្នុងកម្មវិធីអភិវឌ្ឍកីឡាបាល់ទាត់យូរអង្វែងនៅ Miami និងសហរដ្ឋអាម៉េរិក ដែលមានឈ្មោះថា MLS NEXT។

David Beckham និង Lionel Messi កាលពីឆ្នាំ 2013

Lionel Messi ក្លាយជាមនុស្សរបស់ក្លឹប Inter Miami នៅថ្ងៃដំបូងរបស់ខែកក្កដា ឆ្នាំ 2023 ក្រោយពីកិច្ចព្រមព្រៀងជាមួយក្លឹបបារាំង PGS អស់សុពលភាព។

កីឡដ្ឋានបាល់ទាត់ខាងលើគ្រោងនឹងដាក់ឱ្យប្រើប្រាស់នៅឆ្នាំក្រោយ បន្ទាប់ពីបានចាប់ផ្ដើមស្ថាបនាតាំងពីឆ្នាំ 2019៕

June 19, 2023

កីឡាករ CR7 អះអាងពីរឿងត្រលប់ទៅកាន់វាលស្មៅអឺរ៉ុប

បណ្ដាញផ្សព្វផ្សាយអន្តរជាតិផ្នែកកីឡាបាល់ទាត់ ឱ្យដឹងថា Cristiano Ronaldo បានបញ្ជាក់អំពីអនាគតទាក់ទិននឹងរឿងចាកចេញពីក្លឹបនៅតំបន់អារ៉ាប់ ទៅកាន់តំបន់អឺរ៉ុប។

ក្នុងសប្ដាហ៍នេះ ទំព័រ El Nacional បានផ្សាយថា កីឡាករខ្សែប្រយុទ្ធជនជាតិព័រទុយហ្កាល់ Cristiano Ronaldo នៅតែគោរពទាំងស្រុងចំពោះកិច្ចព្រមព្រៀងបច្ចុប្បន្នរវាងខ្លួន និងក្លឹប Al Nassr នៅអារ៉ាប៊ីសាអូឌីត ក្រោយពីមានពាក្យចចាមអារ៉ាមថា CR7 អាចនឹងវិលទៅទាត់ឱ្យក្លឹបនៅអឺរ៉ុបឆាប់ៗនេះ។

ទំព័រសារព័ត៌មានខាងលើបន្ថែមថា Cristiano Ronaldo បានបញ្ជាក់ដែរថា នឹងមិនបង្ហាញវត្តមាននៅលើវាលស្មៅអឺរ៉ុបឡើយ សម្រាប់រដូវកាលទិញដូរកីឡាករនារដូវក្ដៅឆ្នាំនេះ។

បច្ចុប្បន្ន Cristiano Ronaldo ទទួលបានប្រាក់ 3.3 លានផោនក្នុងមួយសប្ដាហ៍ពីក្លឹប Al Nassr នៅអារ៉ាប៊ីសាអូឌីត នៅក្នុងកិច្ចព្រមព្រៀងតម្លៃ 428 លានដុល្លារអាម៉េរិកសម្រាប់ពីររដូវកាល។

June 16, 2023

UEFA ប្រកាសអំពីម្ចាស់ពានរង្វាន់ «កីឡាករឆ្នើមបំផុតនៅ Champions League»

ក្នុងនាមជាម្ចាស់ជើងឯកបាល់ទាត់ Champions League យើងងាយយល់បានថា ហេតុអ្វីកីឡាកររបស់ Man City ក្លាយជាម្ចាស់ពានរង្វាន់កីឡាឆ្នើមបំផុតប្រចាំព្រឹត្តិការណ៍នេះ។

Man City បានក្លាយជាម្ចាស់ជើងឯកពានរង្វាន់បាល់ទាត់ Champions League ជាលើកដំបូងក្នុងប្រវត្តិសាស្ត្រ បន្ទាប់ពីបានផ្ដួល Inter Milan ដោយលទ្ធផល 1-0 នៅវគ្គផ្ដាច់ព្រ័ត្រកាលពីវេលាទៀបភ្លឺថ្ងៃទី 11 មិថុនា 2023 (ម៉ោងនៅកម្ពុជា)។ នេះគឺជាសមិទ្ធផលដ៏សក្ដិសមសម្រាប់កូនសិស្ស និងគ្រូបង្វឹក Pep Guardiola ក្រោយពីអ្វីដែលពួកគេបានធ្វើនៅក្នុងរដូវកាលនេះ។

មិនយូរប៉ុន្មានបន្ទាប់ពីពានរង្វាន់ជើងឯកបាល់ទាត់ Champions League ត្រូវបានប្រគល់ សហព័ន្ធកីឡាបាល់ទាត់អឺរ៉ុប (UEFA) ក៏បានប្រកាសឈ្មោះម្ចាស់ជ័យលាភី «កីឡាករឆ្នើមបំផុតរបស់ Champions League 2022/2023»។ កំពូលកីឡាករ Erling Haaland ពុំមែនជាអ្នកបានទទួលពានរង្វាន់នេះ បើទោះរកបាន 12 គ្រាប់ឱ្យ Man City។ ពានរង្វាន់នេះបានទៅលើកីឡាករ Rodri (Rodrigo Hernández Cascante)។

Rodri គឺជាអ្នកបានជួយឱ្យ Man City ឈ្នះនៅវគ្គផ្ដាច់ព្រ័ត្រ Champions League។ នេះក៏ជាលើកទីមួយក្នុងប្រវត្តិសាស្ត្រដែល Man City បានក្លាយជាក្រុមបាល់ទាត់ទីពីរនៅអង់គ្លេស ដែលដណ្ដើមបានពានរង្វាន់ជើងឯកចំនួនបីក្នុងមួយរដូវកាល បន្ទាប់ពី Man Utd ដណ្ដើមបានកាលពីឆ្នាំ 1999៕

June 12, 2023

ប្រាក់រង្វាន់ Champions League 2022-2023 ៖ ក្រុមនីមួយៗនឹងទទួលបានប៉ុន្មាន?

ការដែលបានឡើងទាត់ដណ្ដើមពានរង្វាន់ Champions League មិនត្រឹមតែជាកិត្តិយសនោះទេ ប៉ុន្តែក៏អមជាមួយនឹងផលប្រយោធន៍ជាច្រើនដែលទាក់ទងនឹងហិរញ្ញវត្ថុផងដែរ។

UEFA Champions League គឺជាគោលដៅធំរបស់ក្រុមបាល់ទាត់ជាច្រើន នៅពេលពួកគេចាត់ទុកថា នេះគឹជាឱកាសល្អដើម្បីបង្កើនប្រាក់ចំណូល។ កាន់តែចូលដល់វគ្គសំខាន់ៗ ក្លឹបនីមួយៗទទួលបានប្រាក់រង្វាន់កាន់តែច្រើន។

នៅក្នុងរដូវកាលនេះ Man City និង Inter Milan បានឡើងដល់វគ្គផ្ដាច់ព្រ័ត្រដែលគ្រោងនឹងប្រកួតនៅឯទីលាន Ataturk Olympic នៃប្រទេសតួកគី នៅវេលាម៉ោង 02 ថ្ងៃទី 11 មិថុនា (ម៉ោងនៅកម្ពុជា)។

ថ្មីៗនេះ សហព័ន្ធកីឡាបាល់ទាត់អឺរ៉ុប (UEFA) ទើបតែបានប្រកាសទិន្នន័យស្ដីពីប្រាក់រង្វាន់សម្រាប់សម្រាប់ក្រុមដែលទាត់នៅ Champions League រដូវកាល 2022-2023 ដែលមានតម្លៃរហូតដល់ 2.032 ពាន់លានអឺរ៉ូ (ប្រហែល 1.98 ពាន់លានដុល្លារអាម៉េរិក)។

ខាងក្រោមនេះគឺជាស្ថិតិស្ដីពីខ្ទង់ប្រាក់ដែលក្រុមបាល់ទាត់នីមួយៗនឹងអាចទទួលបានពេលចូលរួមលេងនៅឯពានរង្វាន់ Champions League រដូវកាល 2022-2023។

ប្រាក់រង្វាន់នៅ Champions League 2022-2023
វគ្គ	ប្រាក់រង្វាន់
ផ្ដាច់ព្រ័ត្រ	20 លានអឺរ៉ូ
លេខពីរ	15.5 លានអឺរ៉ូ
ពាក់កណ្ដាលផ្ដាច់ព្រ័ត្រ	12.5 លានអឺរ៉ូ
8 ក្រុមចុងក្រោយ	10.6 លានអឺរ៉ូ
16 ក្រុម	9.6 លានអឺរ៉ូ
ឈ្នះនៅវគ្គវិលជុំ	2.8 លានអឺរ៉ូ
ស្មើនៅវគ្គវិលជុំ	930 ពាន់អឺរ៉ូ
ចូលរួមនៅវគ្គវិលជុំ	15.64 ពាន់អឺរ៉ូ

June 10, 2023

ក្លឹបបាល់ទាត់វិសាខាធ្វើពិធីបញ្ចុះខណ្ឌសីមានៅមជ្ឈមណ្ឌលហ្វឹកហ្វឺនបាល់ទាត់ថ្មី

កាលពីថ្ងៃទី 30 ឧសភាកន្លងទៅ ថ្នាក់ដឹកនាំក្លឹបបាល់ទាត់វិសាខាបានរៀបចំពិធីសូត្រមន្ដ ក្រុងពាលី និងបញ្ចុះខណ្ឌសីមានៅមជ្ឈមណ្ឌលហ្វឹកហ្វឺនវិសាខា (The Dream Visakha Training Center) ដែលមានទីតាំងក្នុងភូមិអករំដួល សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ (ផ្លូវថ្មីទំនប់កប់ស្រូវ)។

យោងតាមព័ត៌មានពីក្លឹបវិសាខា ពិធីសុំសេចក្ដីសុខ សេចក្ដីចម្រើននេះ មានការអញ្ជើញចូលរួមពីលោកជំទាវ ញ៉ែម សាខន ស ខេង និងលោកជំទាវឧកញ៉ាអគ្គមហាឧបាសិកាពុទ្ធសាសនូបត្ថម្ភក៍ បណ្ឌិត ម៉ៅ ម៉ាល័យ កែ គឹមយ៉ាន ព្រមទាំងលោកជំទាវ កែ សួនសុភី ប្រធានក្លិបកីឡាបាល់ទាត់វិសាខា រួមទាំងគណៈគ្រប់គ្រងក្លឹប បុគ្គលិក និងក្រុមការងារគ្រូផងដែរ។

នៅលើទំព័របណ្ដាញសង្គម ក្លឹបនេះបានសរសេរថា «ពួកយើងសង្ឃឹមថា The Dream Visakha Training Center នឹងក្លាយជាផ្នែកមួយ ដើម្បីរួមចំណែកផលិតធនធានកីឡាករ-កីឡាការិនី និងអភិវឌ្ឍន៍វិស័យកីឡាបាល់ទាត់កម្ពុជាឱ្យកាន់តែរីកចម្រើននាថ្ងៃអនាគត»៕

May 31, 2023

ក្រោយស៊ីហ្គេមលើកទី 32 ឥណ្ឌូណេស៊ីថា នឹងឡើងដល់វគ្គផ្ដាច់ព្រ័ត្រនៅ U23 អាស៊ីអាគ្នេយ៍ឆ្នាំ 2023

ប្រធានសហព័ន្ធកីឡាបាល់ទាត់ឥណ្ឌូណេស៊ីបានប្រកាសថា កីឡាកររបស់ប្រទេសនេះនឹងបញ្ចេញថ្វីជើងដ៏ល្អបន្ថែមទៀតក្នុងការប្រកួតដណ្ដើមពានរង្វាន់បាល់ទាត់យុវជនអាយុក្រោម 23 ឆ្នាំ (U23) នៅតំបន់អាស៊ីអាគ្នេយ៍ឆ្នាំ 2023។

នៅពានរង្វាន់បាល់ទាត់ U23 អាស៊ីអាគ្នេយ៍ឆ្នាំ 2023 (AFF U23 Championship 2023) ក្រុម U23 ឥណ្ឌូណេស៊ីធ្លាក់ទៅក្នុងពូល B ដែលមាន U23 ម៉ាឡេស៊ី និង U23 ទីម័រខាងកើត បន្ទាប់ពីការចាប់ឆ្នោតបានធ្វើឡើងរួចរាល់។ ប្រធានសហព័ន្ធបាល់ទាត់ឥណ្ឌូណេស៊ី (PSSI) លោក Erick Thohir បាននិយាយថា «បើទោះគូប្រកួតជាអ្នកណា យើងក៏ត្រូវតែត្រៀមឱ្យបានហ្មត់ចត់បំផុត»។

លោក Erick Thohir បន្តថា «ខ្ញុំមានសុទិដ្ឋិនិយម ព្រោះថា បរិយាកាសរបស់បាល់ទាត់ឥណ្ឌូណេស៊ីនៅតែល្អ បន្ទាប់ពីដណ្ដើមបានមេដាយមាសនៅស៊ីហ្គេមលើកទី 32។ ខ្ញុំជឿជាក់ថា ប្រការនេះនឹងបន្ថែមថាមពលវិជ្ជមានដើម្បីក្រុមជម្រើសជាតិ U23 បន្តដណ្ដើមបានលទ្ធផលល្អបំផុត និងដណ្ដើមបានសិទ្ធិឡើងទៅវគ្គផ្ដាច់ព្រ័ត្រ»។

ប្រធានសហព័ន្ធបាល់ទាត់ឥណ្ឌូណេស៊ី (PSSI) លោក Erick Thohir (អាវក្រហម)

ពានរង្វាន់ជើងឯកបាល់ទាត់ U23 អាស៊ីអាគ្នេយ៍ឆ្នាំ 2023 នឹងជាឈ្នាន់ដើម្បីក្រុមបាល់ទាត់ឥណ្ឌូណេស៊ីមានការត្រៀមខ្លួនបានល្អបំផុតសម្រាប់មហាព្រឹត្តិការណ៍ប្រកួតកីឡាទ្វីបអាស៊ីឆ្នាំ 2023 (ASIAD លើកទី 19) ក៏ដូចជាវគ្គផ្ដាច់ព្រ័ត្រ U23 ទ្វីបអាស៊ីផងដែរ។

ការប្រកួតបាល់ទាត់នៃពានរង្វាន់យុវជនអាយុក្រោម 23 ឆ្នាំនៅតំបន់អាស៊ាន (AFF U23 Championship 2023) នឹងធ្វើឡើងនៅប្រទេសថៃ ចាប់ពីថ្ងៃទី 17 សីហា ដល់ 26 សីហា។ ក្រុម U23 របស់កម្ពុជា ត្រូវស្ថិតនៅក្នុងពូល A ជាមួយនឹងព្រុយណេ មីយ៉ាន់ម៉ា និងម្ចាស់ផ្ទះថៃ៕

May 30, 2023

Tag: កីឡាបាល់ទាត់