កិច្ចព្រមព្រៀង - La Reine Media

កំពូលតារាបាល់ទាត់អាហ្សង់ទីន ទទួលបានសារល្អស្ដីពីអនាគត ពីក្លឹបធំនៅអឺរ៉ុប

មួយក្នុងចំណោមក្លឹបបាល់ទាត់ដែលមានអំណាចបំផុតនៅអឺរ៉ុប បានលើកឡើងនូវសារដែលប្រកបដោយវិជ្ជាជីវៈ ទាក់ទិននឹងអនាគតរបស់ Lionel Messi។

អនាគតរបស់ M10 បន្តក្លាយជាប្រធានបទនៃដំណឹងចចាមអារ៉ាមក្នុងវិស័យបាល់ទាត់ពិភពលោកក្នុងរយៈពេលកន្លង។ គ្រូបង្វឹករបស់ក្លឹប Barcelona លោក Xavi Hernandez បាននិយាយអំពីលទ្ធភាពដែលកំពូលតារាបាល់ទាត់ជនជាតិអាហ្សង់ទីន ត្រលប់ទៅកាន់ក្លឹបចាស់នៅតំបន់ស្វយ័តកាតាឡូញ៉ា បើទោះជាអ្នកយុទ្ធសាស្ត្រជនជាតិអេស្ប៉ាញរូបនេះមានការប្រុងប្រយ័ត្ន និងដឹងច្បាស់អំពីភាពស្មុគស្មាញជុំវិញរឿងអនាគតរបស់ Messi។

ថ្មីៗនេះ លោក Xavi Hernandez បាននិយាយថា ការវិលត្រលប់របស់ Messi គឺជារឿង «ងាយកើតឡើង» និងអាស្រ័យលើកត្តាមួយចំនួន ក្នុងនោះមានដូចជា បំណងរបស់ El Pulga កិច្ចសន្យា និងកិច្ចការនៅពីក្រោយដែលអាចនាំទៅរកកិច្ចព្រមព្រៀងថ្មី។

លោក Xavi Hernandez បានសម្ដែងការចង់ឃើញ Messi ត្រលប់មកកាន់ខ្សែប្រយុទ្ធរបស់ Barcelona ខណៈដែលគណៈគ្រប់គ្រងរបស់ក្លឹបនេះក៏គាំទ្រគំនិតនេះ។ លោក Xavi Hernandez ជឿជាក់លើការសម្រេចចិត្តចុងក្រោយរបស់ Messi នៅពេលកិច្ចព្រមព្រៀងរវាង M10 ជាមួយ PSG អស់សុពលភាព គ្រាដែលទំនាក់ទំនងរបស់ Messi និងអ្នកគាំទ្ររបស់ PSG មិនបានល្អដូចមុន៕

May 23, 2023

មនុស្សជាងពីរពាន់លាននាក់នឹងរស់នៅក្នុងកម្ដៅដ៏គ្រោះថ្នាក់របស់ផែនដី ចាប់ពីឆ្នាំ 2100

កម្ដៅផ្ទៃផែនដីកំពុងស្ថិតក្នុងកំណើន 2.7 អង្សាសេ ធៀបនឹងដំណាក់កាលដំបូងនៃវិស័យឧស្សាហកម្ម នៅឆ្នាំ 2100 ដែលប្រការនេះនឹងរុញច្រានមនុស្សជាងពីរពាន់លាននាក់ (ប្រហែល 22% នៃប្រជាជនសរុបក្នុងពិភពលោក) ឱ្យចេញពីតំបន់អាកាសធាតុស្រួលរស់នៅ។

យោងតាមលទ្ធផលនៃការសិក្សាស្រាវជ្រាវថ្មីដែលត្រូវបានចុះផ្សាយលើទស្សនាវដ្ដី Nature Sustainability ក្រុមអ្នកវិទ្យាសាស្ត្របានឱ្យដឹងថា បណ្ដាប្រទេសមានប្រជាជនច្រើនជាងគេដែលត្រូវប្រឈមនឹងកម្ដៅដ៏គ្រោះថ្នាក់ គឺ ឥណ្ឌា (600 លាននាក់), នីហ្សេរីយ៉ា (300 លាននាក់), ឥណ្ឌូណេស៊ី (100 លាននាក់), ហ្វ៊ីលីពីន និងប៉ាគីស្ថាន (80 លាននាក់ដូច្នេះ)។ នេះបើតាម AFP ចុះផ្សាយកាលពីថ្ងៃទី 22 ឧសភា 2023។

ការកាត់បន្ថយការកើនឡើងកម្ដៅទូទាំងពិភពលោកនៅក្នុងកម្រិត 1.5 អង្សាសេ ទៅតាមគោលដៅរបស់កិច្ចព្រមព្រៀងទីក្រុងប៉ារីសឆ្នាំ 2015 នឹងជួយបន្ថយចំនួនមនុស្សដែលជួបគ្រោះថ្នាក់ដោយសារកម្ដៅព្រះអាទិត្យ ចុះមកនៅ 500 លាននាក់ ដែលស្មើនឹង 5% នៃចំនួនប្រជាជនសរុបប្រមាណ 9.5 ពាន់លាននាក់របស់ពិភពលោក នៅក្នុងរយៈពេលពី 6 ទៅ 7 ទសវត្សរ៍ខាងមុខ។

មកដល់បច្ចុប្បន្ន ការឡើងកម្ដៅក្រោម 1.2 អង្សាសេ ក៏បានបង្កើនកម្រិត ឬពេលវេលារបស់រដូវរលកកម្ដៅ គ្រោះរាំងស្ងួត និងករណីឆេះព្រៃ។ 8 ឆ្នាំកន្លង គឺជាពេលវេលាដែលផែនដីរងកម្ដៅខ្ពស់បំផុតដែលមនុស្សធ្លាប់បានកត់ត្រា។

កម្ដៅដែលបង្កគ្រោះថ្នាក់ទៅតាមការសិក្សាស្រាវជ្រាវថ្មីនេះ នោះគឺនៅពេលសីតុណ្ហភាពមធ្យមប្រចាំឆ្នាំ (MAT) ឡើងដល់ 29 អង្សាសេ។

យោងតាមធនាគារពិភពលោក ប្រទេសឥណ្ឌាបំភាយឧស្ម័ន CO2 (ឧស្ម័នដែលធ្វើឱ្យបរិយាកាសផែនដីឡើងកម្ដៅ) ជាមធ្យមប្រហែលពីរតោន/ម្នាក់/ឆ្នាំ, នីហ្សេរីយ៉ាបំភាយប្រហែលកន្លះតោន ខណៈដែលសហភាពអឺរ៉ុបជិត 7 តោន និងសហរដ្ឋអាម៉េរិក 15 តោន។

ក្រុមអ្នកស្រាវជ្រាវខាងលើក៏ព្រមានថា លទ្ធភាពដែលសីតុណ្ហភាពផ្ទៃផែនដីកើនបន្ថែមលើសពី 2.7 អង្សាសេ គឺអាចកើតឡើង។ បើសិនជាសកម្មភាពបំភាយឧស្ម័នផ្ទះកញ្ចក់អាចនាំឱ្យ «ធ្លុះធ្លាយ» ឃ្លាំងធម្មជាតិផ្ទុកកាបូន មានជាអាទិ៍ ស្រទាប់ Permafrost (ស្រទាប់ដីស្ថិតនៅត្រង់ ឬក្រោមតំបន់ទឹកកដែលកករយៈពេលចាប់ពីពីរឆ្នាំឡើងទៅ) ឬធ្វើឱ្យបរិយាកាសផែនដីក្ដៅជាងការរំពឹងទុក នោះសីតុណ្ហភាពពិភពលោកអាចកើនបន្ថែមជិត 4 អង្សាសេ បើធៀបនឹងកម្ដៅនៅពាក់កណ្ដាលសតវត្សរ៍ទី 19៕

May 23, 2023

ការរីកចម្រើនផ្នែកអវកាសរបស់សហរដ្ឋអាម៉េរិក ធៀបនឹងប្រទេសចិន

នៅក្នុងផ្នែកសំខាន់ៗ សហរដ្ឋអាម៉េរិកមិនត្រឹមតែមានប្រៀបលើសលុបលើប្រទេសចិននោះទេ ប៉ុន្តែក៏មានប្រៀបជាងបណ្ដាប្រទេសបូកចូលគ្នាផងដែរនៅក្នុងវិស័យអវកាស។

អំពីថវិកា៖ ឆ្នាំ 2021 ថវិកាសម្រាប់ផ្នែកអវកាសរបស់សហរដ្ឋអាម៉េរិកគឺប្រមាណ 59.8 ពាន់លានដុល្លារ ខណៈប្រទេសចិន មានប្រហែល 16.18 ពាន់លានដុល្លារប៉ុណ្ណោះ។ នេះបើតាម Svetla Ben-Itzhak សាស្ត្រាចារ្យរងផ្នែកអវកាស និងទំនាក់ទំនងអន្តរជាតិ ប្រចាំសាកលវិទ្យាល័យ Air (AU) របស់សហរដ្ឋអាម៉េរិក។

ផ្កាយរណប៖ គិតត្រឹមខែមេសា ឆ្នាំ 2023 នៅលើគន្លងតារាវិថីផែនដី មានផ្កាយរណបសរុប 5,465 គ្រឿងកំពុងដំណើរការ។ ក្នុងនោះ សហរដ្ឋអាម៉េរិកមាន 3,433 គ្រឿង ស្មើនឹង 63% ហើយឈរលំដាប់លេខមួយលើពិភពលោក។ ចំណែកប្រទេសចិនវិញ មានតែ 541 គ្រឿងប៉ុណ្ណោះ។

អវកាសយានដ្ឋាន៖ សហរដ្ឋអាម៉េរិកមានអវកាសយានដ្ឋានសម្រាប់បាញ់បង្ហោះយានអវកាសចំនួន 7 កំពុងដំណើរការក្នុង និងក្រៅប្រទេស គ្រាដែលយ៉ាងតិច 13 កន្លែងផ្សេងទៀតកំពុងស្ថាបនា។ ប្រទេសចិនមានអាកាសយានដ្ឋានកំពុងដំណើរការចំនួន 4 កន្លែង និង 2 កន្លែងទៀតកំពុងអភិវឌ្ឍទៅតាមផែនការ ហើយទាំងអស់សុទ្ធតែស្ថិតក្នុងទឹកដីប្រទេសនេះ។

ដៃគូសហការ៖ រដ្ឋាភិបាលអាម៉េរិកបានចុះហត្ថលេខាលើកិច្ចព្រមព្រៀងចំនួន 169 ជាមួយរដ្ឋ និងអង្គការអន្តររដ្ឋាភិបាលចំនួន នឹង 33, 129 ជាមួយនឹងដៃគូពាណិជ្ជកម្ម និង 7 ជាមួយនឹងស្ថាប័នស្រាវជ្រាវ។ ប្រទេសចិន មានកិច្ចសហការជាមួយប្រទេសរុស្ស៊ី អ៊ីរ៉ង់ ប៉ាគិស្ថាន ថៃ និងតួកគី។

បេសកកម្មឡើងទៅឋានព្រះចន្ទ៖ រុស្ស៊ី និងចិន សហការគ្នានៅក្នុងគម្រោងឡើងទៅកាន់ឋានព្រះចន្ទនៅឆ្នាំ 2028។ ស្ថានីយស្រាវជ្រាវព្រះចន្ទអន្តរជាតិរបស់ប្រទេសទាំងពីរនេះ បើកទ្វារទទួលយកដៃគូសហការអន្តរជាតិ ប៉ុន្តែមកដល់ពេលនេះមិនទាន់មានដៃគូថ្មីណាមួយឡើយ។ ចំណែកកម្មវិធីព្រះចន្ទ Artemis ដែលនឹងនាំអ្នកអវកាសឡើងទៅកាន់ឋានព្រះចន្ទនៅឆ្នាំ 2025 របស់សហរដ្ឋអាម៉េរិកវិញ គិតចាប់ពីឆ្នាំ 2020 មានប្រទេសចំនួន 24 បានចូលរួម។

ចំនួនលើកនៃការបាញ់បង្ហោះយានអវកាស៖ ឆ្នាំ 2021 ប្រទេសចិនបានបាញ់បង្ហោះយានអវកាសចំនួន 55 លើក ច្រើនជាងសហរដ្ឋអាម៉េរិកចំនួន 4 លើក។

ស្ថានីយអវកាស៖ ចាប់ពីឆ្នាំ 2022 ប្រទេសចិនមានស្ថានីយអវកាសពេញលេញផ្ទាល់ខ្លួន ឈ្មោះ ធានហ្គង់ (Tiangong) ដែលគ្រប់គ្រងតែឯង។ ចាប់ពីឆ្នាំ 1990 សហរដ្ឋអាម៉េរិកបានសហការជាមួយប្រទេសចំនួន 14 ក្នុងនោះមានរុស្ស៊ីផងដែរ ដើម្បីដំណើរការស្ថានីយអវកាសអន្តរជាតិ (ISS)។ ប្រទេសចិនអាចនឹងមានប្រៀបជាងសហរដ្ឋអាម៉េរិក យ៉ាងឆាប់ត្រឹមឆ្នាំ 2045 បើសិនវ៉ាស៊ីងតោនមិនធ្វើសកម្មភាព។ ប៉ុន្តែ យោងតាម Space លទ្ធភាពនេះប្រហែលជានឹងមិនអាចកើតឡើង ព្រោះថា សហរដ្ឋអាម៉េរិកកំពុងតែបង្កើនការវិនិយោគទៅលើវិស័យអវកាស៕

May 20, 2023

ដើម្បីជំនួស Messi ក្លឹប PSG ត្រៀមទិញយកកីឡាករឆ្នើមរបស់ Arsenal ?

Paris Saint-Germain ត្រូវបានគេជឿថា បានបញ្ចូលឈ្មោះប្រធានក្រុមរបស់ Arsenal ទៅក្នុងបញ្ជីសម្រាំងចុងក្រោយរបស់ខ្លួនដើម្បីជំនួស Lionel Messi។

យោងតាមការចុះផ្សាយរបស់ទំព័រ Mirror Football តារាបាល់ទាត់អាហ្សង់ទីន លោក Messi ត្រូវគេជឿថា នឹងចាកចេញពី PSG នៅពេលកិច្ចព្រមព្រៀងបានផុតកំណត់នៅចុងរដូវកាលនេះ។ បើទោះជា Barcelona នៅតែចង់ចុះកិច្ចព្រមព្រៀងជាមួយ Messi ប៉ុន្តែ «ផ្ទះថ្មី» របស់តារាបាល់ទាត់អាហ្សង់ទីនរូបនេះ ក៏នៅមិនទាន់ច្បាស់លាស់។

PSG កំពុងធ្វើការដើម្បីចុះកិច្ចព្រមព្រៀងជាមួយកីឡាករម្នាក់ក្នុងបំណងជំនួស Messi នៅរដូវក្ដៅឆ្នាំនេះ។ ព័ត៌មានចចាមអារ៉ាមនាពេលថ្មីៗនេះ យល់ថា Bernardo Silva របស់ Manchester City កំពុងក្លាយជាគោលដៅរបស់ក្លឹបនៅប៉ារីស តែមិនទាន់សម្រេចចិត្តចុងក្រោយ។

ចំណែកទំព័រ El Nacional វិញ យល់ថា PSG បានដាក់គោលដៅលើកីឡាករន័រវែស Martin Odegaard ដែលជាប្រធានក្រុមរបស់ Arsenal។ Martin Odegaard បានក្លាយជាកីឡាករឆ្នើមបំផុតនៅ Premier League កាលពីខែមីនាកន្លងទៅ។

ទោះជាយ៉ាងនេះក៏ដោយ គ្រូបង្វឹក Mikel Arteta របស់ Arsenal បានច្រានចោលព័ត៌មានខាងលើ និងបានធានាថា កិច្ចព្រមព្រៀងជាមួយ Martin Odegaard ដែលនៅសល់ពីរឆ្នាំទៀត នឹងនៅតែរឹងមាំ៕

May 18, 2023

សីតុណ្ហភាពទូទាំងសកលលោកនឹងរុញកម្ដៅផែនដីឡើងខ្ពស់ខ្លាំងមិនធ្លាប់មាន

អង្គការឧតុនិយមពិភពលោកបានព្រមានថា El Nino ក្ដៅ ដែលកើនឡើងក្នុងប៉ុន្មានខែខាងមុខ និងការប្រែប្រួលអាកាសធាតុដែលកើតឡើងដោយសារមនុស្ស នឹងជំរុញសីតុណ្ហភាពឱ្យកើនឡើងដល់កម្រិតខ្ពស់មិនធ្លាប់បានជួបពីមុនមក ហើយឡើងដល់កំណត់ត្រាថ្មីក្នុងរយៈពេលប្រាំឆ្នាំទៀត។

កំណើនសីតុណ្ហភាពទូទាំងពិភពលោកអាចនឹងឡើងផុតពី 1.5 អង្សាសេ ដែលបានកំណត់នៅក្នុងកិច្ចព្រមព្រៀងទីក្រុងប៉ារីស ក្នុងប្រាំឆ្នាំខាងមុខ នេះបើតាមរបាយការណ៍របស់អង្គការសហប្រជាជាតិ (UN)។ អង្គការឧតុនិយមពិភពលោក (WMO) របស់ UN បានព្រមានដូច្នេះនៅក្នុងការវាយតម្លៃប្រចាំឆ្នាំលើកចុងក្រោយបង្អស់។ WMO បានឱ្យដឹងថា លទ្ធភាពដែលសីតុណ្ហភាពលើផ្ទៃផែនដីនឹងកើនឡើងប្រចាំឆ្នាំខ្ពស់ជាង 1.5 អង្សាសេ ធៀបនឹងសម័យមុនឧស្សាហកម្ម គឺមានរហូតដល់ 66%។ ការកើនឡើងកម្ដៅនេះនឹងក្លាយជាកំណត់ត្រាមិនធ្លាប់មានពីមុននៅក្នុងប្រវត្តិសាស្ត្រមនុស្សជាតិ។

អ្នកវិទ្យាសាស្ត្រព្រមានថា កម្ដៅប្រចាំឆ្នាំដែលកើនជាង 1.5 អង្សាសេ នឹងធ្វើឱ្យពិភពលោកប្រឈមនឹងហានិភ័យធំៗ អាចបង្កឱ្យមានបម្រែបម្រួលអាកាសធាតុដែលមិនអាចប្រសើរឡើងវិញបាន មានដូចជា ហេតុការណ៍បាក់ផ្ទាំងទឹកកកនៅ Greenland និងនៅអង់តាទិកខាងលិច, កម្ដៅព្រះអាទិត្យមានកម្រិតខ្ពស់ខ្លាំង គ្រោះរាំងស្ងួតធ្ងន់ធ្ងរ បញ្ហាខ្វះទឹក និងអាកាសធាតុអាក្រក់ខ្លាំងក្នុងទ្រង់ទ្រាយធំនៅលើពិភពលោក។

ប្រទេស និងដែនដីប្រហែល 200 បានសន្យាកាត់បន្ថយកំណើននៃសីតុណ្ហភាពសកល 1.5 អង្សាសេ ឬទាបជាងនេះ ទៅតាមកិច្ចព្រមព្រៀងទីក្រុងប៉ារីស កាលពីឆ្នាំ 2015។ បច្ចប្បន្ន ដែនកំណត់នោះអាចនឹងត្រូវឆ្លងផុតជាលើកដំបូង បើទោះជាបណ្ដោះអាសន្នក៏ដោយ។

តាមការព្យាករ រដូវកាល El Nino ក្ដៅដែលនឹងរីកធំឡើងក្នុងរង្វង់ច្រើនខែខាងមុខ នឹងរួមផ្សំជាមួយបម្រែបម្រួលអាកាសធាតុដែលបង្កឡើងដោយមនុស្ស រុញច្រានកម្ដៅផែនដីឡើងដល់ចំណុចខ្ពស់មិនធ្លាប់មានពីមុនមក នេះបើតាម Petteri Taalas អគ្គលេខាធិការនៃអង្គការ WMO។ ប្រការនោះនឹងបង្កផលវិបាកធ្ងន់ធ្ងរដល់សុខភាព សន្តិសុខស្បៀង ការគ្រប់គ្រងទឹក និងបរិស្ថាន។

បាតុភូត El Nino កើតឡើងនៅពេលរបបខ្យល់អាលីសេ (trade winds) ចុះខ្សោយ នាំឱ្យទឹកក្ដៅកាន់តែច្រើនស្ថិតនៅមួយកន្លែង។ បាតុភូតនេះប៉ះពាល់ខ្លាំងដល់រូបមន្តអាកាសធាតុពិភពលោក បណ្ដាលឱ្យតំបន់អាម៉េរិកខាងត្បូងមានសំណើមជាងធម្មតា និងបង្កគ្រោះរាំងស្ងួតនៅតាមតំបន់នានា មានដូចជា អូស្ត្រាលី ឥណ្ឌូណេស៊ី ភាគខាងជើងប្រទេសចិន និងភាគឦសានប្រទេសប្រេស៊ីលជាដើម៕

May 18, 2023

កាណាដាបន្តកិច្ចព្រមព្រៀងស្តីពីការសម្រួលពាណិជ្ជកម្មដល់កម្ពុជា

បន្ទាប់ពីផុតសុពលភាពកាលពីថ្ងៃទី30 ខែកញ្ញា ឆ្នាំ2018 កន្លងទៅថ្មីៗនេះ ប្រទេសកាណាដាបានឯកភាពជាថ្មីឡើងវិញទៀតដល់កម្ពុជា លើកិច្ចព្រមព្រៀងស្តីពីការសម្រួលពាណិជ្ជកម្ម ដើម្បីពង្រឹង និងពង្រីកកិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងប្រទេសទាំង2។

ការឯកភាពបន្តកិច្ចព្រមព្រៀងនេះធ្វើឡើងនៅក្នុងជំនួបពិភាក្សាការងារទ្វេភាគីរវាងឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្មកម្ពុជា ជាមួយលោកជំទាវ ដូនីកា ប៉ូទី (Donica Pottie) ឯកអគ្គរដ្ឋទូតកាណាដា ប្រចាំព្រះរាជាណាចក្រកម្ពុជាកាលពីម្សិលមិញ។

លោកជំទាវ ដូនីកា ប៉ូទី ឯកអគ្គរដ្ឋទូតនៃប្រទេសកាណាដាបានសម្តែងការកោតសរសើរ ចំពោះគោលនយោបាយរដ្ឋាភិបាលកម្ពុជាក្នុងការលើកទឹកចិត្តដល់អ្នកវិនិយោគបរទេសដែលចូលមកបណ្តាក់ទុនរកស៊ីនៅកម្ពុជា។ លោកជំទាវក៏បានលើកទឹកចិត្តរដ្ឋាភិបាលកម្ពុជាបន្តប្រឹងប្រែង និងប្រកាន់និយាមការងារនេះបន្តទៀត ដើម្បីនាំមកនូវភាពឈ្នះ-ឈ្នះ ដល់គ្រប់តួអង្គពាក់ព័ន្ធ សម្រាប់ឧស្សាហកម្មមួយនេះ ហើយលោកជំទាវនឹងពិនិត្យលទ្ធភាពជួយកៀងគរវិនិយោគិនកាណាដាឱ្យចូលមកបណ្តាក់ទុនលើការកែច្នៃវត្ថុធាតុដើមសំខាន់ៗ ដើម្បីបម្រើការអភិវឌ្ឍឧស្សាហកម្មវាយនភណ្ឌ និងការធ្វើទំនើបកម្មវិស័យកសិកម្ម នៅកម្ពុជា។

ឯកឧត្តមរដ្ឋមន្ត្រី ប៉ាន សូរស័ក្តិ បានលើកឡើងពីកិច្ចប្រឹងប្រែងរបស់រាជរដ្ឋាភិបាលកម្ពុជា ក្នុងការគាំទ្រវិស័យវាយនភណ្ឌ តាមរយៈការបន្តស្វែងរកទីផ្សារសក្តានុពលបន្ថែម និងការបង្កើនប្រាក់បៀវត្សរ៍អប្បបរមាជូនកម្មករ-និយោជិត ចាប់ពី 140ដុល្លារ ក្នុងឆ្នាំ2016 ដល់ 170ដុល្លារ ក្នុងឆ្នាំ2018 ហើយគ្រោងនឹងបង្កើនឱ្យបាន 182ដុល្លារ នៅដើមឆ្នាំ2019 ខាងមុខថែមទៀត។

ឯកឧត្តម ប៉ាន សូរស័ក្តិ បានគូសបញ្ជាក់ថា រាជរដ្ឋាភិបាលកម្ពុជាបានអនុលោមតាមកាតព្វកិច្ចការងារដែលអង្គការ ILO បានកំណត់តាំងពីឆ្នាំ1999 និងបានគាំទ្រការអនុវត្តគម្រោងធ្វើឱ្យប្រសើរឡើងនៃរោងចក្រកម្ពុជា (Better Factory Cambodia) ដើម្បីលើកស្ទួយលក្ខខណ្ឌការងារ និងការប្រកួតប្រជែងក្នុងវិស័យនេះ។

សូមជម្រាបថា កាលពីឆ្នាំ2017 ទំហំពាណិជ្ជកម្មទ្វេភាគីរវាងកម្ពុជា និងកាណាដា សម្រេចបានទឹកប្រាក់សរុប 1.04ប៊ីលានដុល្លារអាមេរិក ជាមួយអត្រាកំណើនប្រចាំឆ្នាំ គិតជាមធ្យម 11%។ ក្នុងនោះ ទឹកប្រាក់នាំចេញពីកម្ពុជាទៅកាណាដាមានចំនួន 1ប៊ីលានដុល្លារអាមេរិក និងនាំចូលមានចំនួន 40លានដុល្លារអាមេរិក។ ចំពោះផលិតផលសក្តានុពលនាំចេញរបស់កម្ពុជា រួមមាន៖ សម្លៀកបំពាក់ ស្បែកជើង គ្រឿងផ្គុំយានយន្ត គ្រឿងសង្ហារិម ប្លាស្ទិក ផលិតផលក្មេងលេង និងទំនិញកសិកម្មជាដើម៕