(គួឡាឡាំពួរ, ម៉ាឡេស៊ី)៖ អ្នកសារព័ត៌មាន Fresh News កាសែតភ្នំពេញប៉ុស្តិ៍, វេបសាយ Sabay និងកាសែតឡារ៉េន ព្រមទាំងអ្នកសារព័ត៌មាន មកពីបណ្តាប្រទេសផ្សេងមួយចំនួនផ្សេងទៀត នៅថ្ងៃទី៣ ខែសីហា ឆ្នាំ២០១៩នេះ បានទទួលវិញ្ញាបនបត្រពីប្រទេសម៉ាឡេស៊ី ក្នុងព្រឹត្តិការណ៍ Mega Fam តាមរយៈក្រសួងទេសចរណ៍ នៃប្រទេសនេះ។
វិញ្ញាបនបត្រដែលត្រូវបានផ្ដល់ ដោយក្រសួងទេសចរណ៍ម៉ាឡេស៊ី គឺជាលិខិត ដើម្បីអះអាងថា អ្នកសារព័ត៌មានកម្ពុជាទាំង៤រូប បានចូលរួមយ៉ាងសកម្ម នៅក្នុងព្រឹត្តិការណ៍ Mega Fam «It’s Summertime in Malasysia-Let’s go to the beach visit Malaysia 2020»។ ព្រឹត្តិការណ៍នេះ ត្រូវបានប្រារព្ធធ្វើឡើងរយៈពេល៥ថ្ងៃ ចាប់ពីថ្ងៃទី២ ដល់ថ្ងៃទី៧ ខែកញ្ញា ឆ្នាំ២០១៩ នៅទីក្រុងកូឡាឡាំពួរ ព្រមទាំងតំបន់ទេសចរណ៍មួយចំនួនទៀត របស់ម៉ាឡេស៊ី។
បើតាមលិខិតរបស់អគ្គនាយក នៃអគ្គនាយកដ្ឋានក្រសួងទេសចរណ៍ម៉ាឡេស៊ី បានបញ្ជាក់យ៉ាងដូច្នេះថា «យើងសង្ឃឹមថា បទពិសោធន៍ ដែលអ្នកទទួលបានពីកម្មវិធីនេះ នឹងដឹកនាំទៅរកការបង្កើតចំណេះដឹង កាន់តែអស្ចារ្យជាងមុនអំពីម៉ាឡេស៊ី ព្រមទាំងជួយសម្រួលដល់អ្នក ក្នុងការផ្តល់សេវាកម្ម និងការប្រឹក្សាយោបល់ប្រកបដោយវិជ្ជាជីវៈ អំពីប្រទេសម៉ាឡេស៊ី ដើម្បីឱ្យអតិថិជនរបស់អ្នកពេញចិត្ត»។
ក្រសួងទេសចរណ៍ម៉ាឡេស៊ី តាមរយៈក្រុមប្រឹក្សាផ្សព្វផ្សាយទេសចរណ៍ម៉ាឡេស៊ីប្រចាំកម្ពុជា បានអញ្ជើញអ្នកសារព័ត៌មានកម្ពុជា និងអ្នកសារព័ត៌មានមកពីបណ្តាប្រទេសមួយចំនួន ដើម្បីទៅចូលរួមក្នុងព្រឹត្តិការណ៍ Mega Fam «It’s Summertime in Malasysia-Let’s go to the beach visit Malaysia 2020»។ ដូច្នេះ តាមរយៈលិខិតអញ្ជើញនេះ ក្រសួងទេសចរណ៍ម៉ាឡេស៊ី បានបែងចែក្រុមអ្នកសារព័ត៌មានជា៣ក្រុម ដើម្បីបន្តដំណើរទស្សនកិច្ចនៅតាមគោលដៅទេសចរណ៍ធម្មជាតិ, តំបន់ទេសចរណ៍វប្បធម៌ និងតំបន់ទេសចរណ៍ប្រវត្តិសាស្ត្រផងដែរ។
បើតាមលោក Datuk Musa HJ, Yusof អគ្គនាយកដ្ឋានក្រសួងទេសចរណ៍ម៉ាឡេស៊ី ដែលបានអញ្ជើញជាអធិបតីចែកវិញ្ញាបនបត្រនៅព្រឹកមិញ បានឱ្យដឹងថា វិស័យទេសចរណ៍ ក៏មានកំណើនផងដែរ តាមរយៈភ្ញៀវទេសចរណ៍ម្នាក់ បានចំណាយប្រាក់ ៣,១២១.៦ ringgit ឬកើនឡើង១.៩ភាគរយ ខណៈអាត្រាស្នាក់នៅរយៈពេលវែងកើតឡើងពី០.៤យប់ ដល់៦.២យប់។
លោក បានបន្តថា ភ្ញៀវទេសចរណ៍អន្តរជាតិឈរនៅលំដាប់កំពូលទាំង១០ ដែលមកទេសចរ នៅឆមាសទីមួយនៃឆ្នាំ២០១៩ មានសិង្ហបុរី (៥,៣៨១,៥៦៦នាក់), ឥណ្ឌូណេស៊ី (១,៨៥៧,៨៦៤នាក់), ចិន (១,៥៥៨,៧៨២នាក់), ថៃ (៩៩០,៥៦៥នាក់), ប្រ៊ុយណេ (៦២៧,១២២នាក់), ឥណ្ឌា (៣៥៤,៤៨៦នាក់), កូរ៉េខាងត្បូង (៣២៣,៩៥២នាក់), ហ្វីលីពីន (២១០,៩៧៤នាក់), វៀតណាម (២០០,២១៤នាក់) និងជប៉ុន (១៩៦,៥៦១នាក់)
បន្ថែមពីនេះ ភ្ញៀវទេសចរណ៍មកកាន់តំបន់អាស៊ាន នៅតែបន្តក្ដោបក្ដាប់ការចែករំលែក នៃការមកដល់របស់ភ្ញៀវទេសចរណ៍ មកកាន់ម៉ាឡេស៊ី ជាមួយអាត្រា៧០ភាគរយ។ ទីផ្សារជើងហោះហើររយៈចំងាយមធ្យមមានអាត្រា២១ភាគរយ និងជើងចំងាយឆ្ងាយ៩ភាគរយ។ សម្រាប់ទីផ្សារជើងហោះហើរ រយៈចំងាយខ្លី មានអាត្រាកំណើន ៤.៧ភាគរយ, រយៈចំងាយមធ្យម៧.១ភាគរយ និងរយៈចំងាយឆ្ងាយ ១.៨ភាគរយ នៅឆមាសទីមួយឆ្នាំ២០១៨។
ភ្ញៀវទេសចរណ៍មកពីប្រទេសចំនួន៥ ដែលចំណាយខ្ពស់ធ្វើទេសចរណ៍នៅម៉ាឡេស៊ី មានអារ៉ាប៊ីសាអូឌីត (១១,៣៧៦.៩០ ringgit), អង់គ្លេស (៥,២៤១.៥ ringgit), កាណាដា (៤,៥៩៣.១ ringgit), ចិន (៤,៥៤៦ ringgit) និងសហរដ្ឋអាមេរិក (៤,៥៣៧.៩០ ringgit)៕
