បន្ទាប់ពីបានធ្វើការសិក្សាលម្អិតនិងដឹងច្បាស់ពីសក្ដានុពលរវាងក្រុមហ៊ុនអចលនទ្រព្យដ៏ធំនៅកម្ពុជា ស៊ីភីអែល និងក្រុមអភិវឌ្ឍន៍គម្រោងដ៏ធំ THE Forest City នៅប្រទេសម៉ាឡេស៊ី កាលពីពេលកន្លងទី នៅត្រឹមថ្ងៃទី 25 ខែកុម្ភៈ ឆ្នាំ2019 តំណាងក្រុមហ៊ុន ស៊ីភីអែល បានធ្វើដំណើរទស្សនកិច្ចសិក្សា និងការចុះកិច្ចព្រមព្រៀងសហការជាដៃគូរវាងក្រុមហ៊ុនទាំងពីរនៅប្រទេសសង្ហបុរី។
មុនពេលចាកចេញដំណើរនៅព្រលានយន្ដហោះ ភ្នំពេញ-អន្ដរជាតិ លោកឧកញ៉ា ចេង ខេង អគ្គនាយក្រុមហ៊ុន ស៊ីភីអែល បានមានប្រសាសន៍លើកឡើងឱ្យដឹងថា នេះជាគម្រោងធំទី 7 ហើយរបស់ក្រុមអភិវឌ្ឍន៍ និងវិនិយោគក្នុងទំហំទឹកប្រាក់ប្រមាណ 200 ពាន់លាន នៅប្រទេសម៉ាឡេស៊ី និងសិង្ហបុរី ហើយនេះក៏ជាមោទនភាពកូនខ្មែរយើងផងដែរ ដែលត្រូវបានក្រុមហ៊ុនគម្រោងដ៏ធំ THE Forest City អញ្ជើញឱ្យទៅសិក្សាស្វែងយល់អំពីគម្រោងអភិវឌ្ឍន៍មួយនេះ។
លោកឧកញ៉ា ក៏បានបញ្ជាក់ផងដែរថា ៖ នៅទីនោះគឺជាតំបន់មួយដែលមានសភាពស្រដៀងទៅនឹងតំបន់មាត់សមុទ្រនៃខេត្តព្រះសីហនុ ដែលជាដែនសមុទ្ររវាងប្រទេសម៉ាឡេស៊ី ជាប់នឹងសង្ហបុរី។ តំបន់ក្នុងគម្រោងអភិឌ្ឍន៍ខ្នាតធំនេះ ត្រូវបានគេធ្វើឡើងជាកោះសិប្បនិម្មិត ដែលមានអគារខ្ពស់ៗ សួនច្បារធម្មជាតិ ហើយសឹងនិយាយបានថា ជាតំបន់រស់នៅស្ងប់ស្ងាត់ គ្មានសំឡេងរំខានដោយយានយន្ដ ដែលមិនប៉ះពាល់ដល់បរិស្ថាន។ ចំណែកមធ្យោបាយធ្វើដំណើរវិញ គឺតាមរយៈផ្លូវក្រោមដី ដូចជារថភ្លើងល្បឿនលឿន ដែលសម្រួលដល់ការកកស្ទះ និងរួមចំណែកថែរក្សាបរិស្ថាន។ គម្រោងដ៏ធំនេះ អាចឱ្យមនុស្សរស់នៅរហូតដល់ទៅ 70 ម៉ឺននាក់ ហើយយើងអាចសិក្សាស្វែងយល់អំពីគម្រោងនេះ ដើម្បីអភិវឌ្ឍន៍វស័យអចលនទ្រព្យនៅប្រទេសកម្ពុជា និងលក់ជូនក្នុងតម្លៃសមរម្យសម្រាប់ប្រជាជនយើង៕
