ក្រុម EDM Cambodia បានសហការជាមួយក្រុមហ៊ុនស្រាបៀរ Heneken រៀបចំព្រឹត្តិការណ៍រាំរែកដ៏រំភើបអស្ចារ្យ ដែលមានឈ្មោះថា “Afterlife: Asylum” ដែលប្រព្រឹត្តទៅនៅសណ្ឋាគារកាំបូឌីយ៉ាណាកាលពីថ្ងៃសៅរ៍ទី 28 ខែតុលា ចាប់ពីម៉ោង 4 ល្ងាចរហូតដល់ម៉ោង 11យប់។
“Afterlife: Asylum” គឺជាកម្មវិធីរាំរែកដ៏ធំបំផុត ដែលមិនធ្លាប់មាននៅក្នុងព្រះរាជាណាចក្រកម្ពុជា។ កម្មវិធីនេះបាននាំមកជូនអ្នកចូលរួមនូវបទពិសោធន៍រាំរែកដ៏វិសេសវិសាល ជាមួយនឹងតន្ត្រីអេឡិចត្រូនិកសុទ្ធសាធ ប្រកបដោយគុណភាពខ្ពស់ និងផលិតកម្មលំដាប់ថ្នាក់ពិភពលោក ដែលមានឈ្មោះថា Three 6 ព្រមទាំងការសម្តែងពិសេសៗដ៏អស្ចារ្យជាច្រើនទៀត។
ក្រុម EDM Cambodia បានប្រាប់ឱ្យដឹងថា តារាល្បីប្រចាំកម្មវិធីនេះ គឺជា DJ មកពីប្រទេសហូឡង់ ដែលមានឈ្មោះថា Debris ។ នៅក្នុងស្នាដៃតន្ត្រីរបស់គាត់ Debris បានច្របាច់បញ្ចូលគ្នារវាងប្រភេទតន្ត្រី EDM ទឹកសំឡេង និងសំនៀងដើមមកពីចក្រភពអង់គ្លេស ដែលធ្លាប់ទទួលបានជោគជ័យជាច្រើនលើកច្រើនសារមកហើយ។ មានបទចម្រៀង DJ. Mag ដែលជា DJ ឆ្នើម Top 3 នៅក្នុងតារាងចំណាត់ថ្នាក់ប្រចាំក្រុម EDM រួមជាមួយក្រុម “Lucky Strike” លោក Debris បានធ្វើដំណើរជាច្រើនជុំវិញទ្វីបអាស៊ី ។
នៅក្នុងការសម្តែងរួមគ្នាលើឆាក ដែលមាន DJ ក្នុងតំបន់ Botcash មកពីប្រទេសថៃ ក៏ដូចជា DJ ល្បីៗជាច្រើនរូបប្រចាំព្រះរាជាណាចក្រកម្ពុជា ព្រមទាំងការសម្តែងពិសេសៗពីក្រុមរាំ Universo Robot Team of Pyrotechnics ជាមួយនឹងបច្ចេកវិទ្យា LED ដ៏អស្ចារ្យ បានធ្វើឱ្យទស្សនិកជនមានការភ្ញាក់ផ្អើលយ៉ាងខ្លាំង។
ដោយឡែកសម្រាប់ទីតាំងកម្មវិធី គឺត្រូវបានរៀបចំឡើងនៅសណ្ឋាគារកាំបូធីយ៉ាណា ដែលជាកន្លែងល្អបំផុតនៅក្នុងទីក្រុងភ្នំពេញសម្រាប់រៀបចំដ៏ព្រឹត្តិការណ៍ពិសេសនេះ។ ទីធ្លាខាងក្រៅដែលបានកែលម្អជាថ្មីមានឆាកទំហំ 22 ម៉ែត្រ និងជាទីកន្លែងសម្រាប់រៀបចំកម្មវិធីផ្សេងៗយ៉ាងមានសុវត្ថិភាព ហើយអាចទទួលភ្ញៀវបានរាប់ពាន់នាក់។ សណ្ឋាគារនេះក៏មានកន្លែងដើរកម្សាន្តដ៏ធំមួយដែលមានទីវាលដ៏ធំដែលអាចរៀបចំព្រឹត្តិការណ៍ធំៗដូចជាកម្មវិធីប្រគំតន្ត្រី កម្មវិធីតាំងពិព័រណ៍ ពិធីអាពាហ៍ពិពាហ៍ និងព្រឹត្តិការណ៍ពិសេសផ្សេងទៀតដែលលោកអ្នកចង់រៀបចំ។
ព្រឹត្តិការណ៍ពិសេសនេះ បានក្លាយជាបទពិសោធន៍ដ៏អស្ចារ្យមួយក្នុងការកម្សាន្ត សប្បាយរីករាយ ជាមួយនឹងកម្មវិធីជប់លៀង និងតន្ត្រី ដែលតម្លៃសំបុត្រត្រឹមតែ 15$ ហើយថែមទាំងទទួលបានស្រាបៀរ Heineken 1 ដបសម្រាប់ទទួលទានកម្សាន្តយ៉ាងសប្បាយ៕
