ក្រោយពេលមើលឃើញពីតម្រូវការនៃការស្នើសុំផ្ទេរសិទ្ធរថយន្តរបស់ប្រជាពលរដ្ឋមានចំនួនច្រើន និងមាននីតិវិធីច្រើន ក្រសួងសាធារណការ និងដឹកជញ្ជូនបានសម្រេចរៀបចំសម្រួលនីតិវិធីឱ្យកាន់តែងាយស្រួល និងបន្ថែមពេលវេលាសម្រាប់អ្នករកម្ចាស់ដើមមិនឃើញរហូតដល់ថ្ងៃទី 30ខែកញ្ញា។
ថ្មីៗនេះ ក្រសួងសាធារណការ និងដឹកជញ្ជូន និងពន្ធដារកម្ពុជា បានសម្រេចរួមគ្នាលើលំហូរនីតិវិធីក្នុងការផ្តល់សេវាផ្ទេរកម្មសិទ្ធយានជំនិះ និងបង់ពន្ធប្រថាប់ត្រាផ្ទេរសិទ្ធយានជំនិះរួមគ្នា ដោយប្រើប្រាស់ប្រព័ន្ធស្វ័យប្រវត្តិកម្មរបស់ក្រសួងសាធារណការ និងដឹកជញ្ជូន តភ្ជាប់ជាមួយនឹងប្រព័ន្ធបច្ចេកវិទ្យារបស់អគ្គនាយកដ្ឋានពន្ធដារ ដើម្បីសម្រួលដល់ប្រជាពលរដ្ឋឱ្យកាន់តែមានភាពឆាប់រហ័ស និងមិនសូវស្មុគស្មាញច្រើន។
ថ្នាក់ដឹកនាំនៃស្ថាប័នទាំង2 សង្ឃឹមថាបច្ចេកទេសផ្តល់សេវាតាមលំហូរចរន្តការងារដំណើរការផ្ទេរកម្មសិទ្ធយានជំនិះតាមបច្ចេកវិទ្យានេះ នឹងរួមចំណែកសំខាន់ដល់ការគ្រប់គ្រងការផ្តល់សេវាសាធារណៈ ការគ្រប់គ្រងការធ្វើដំណើរ និងការគ្រប់គ្រងទិន្នន័យសន្តិសុខជាតិ រួមទាំងជួយពង្រឹងការប្រមូលពន្ធដារផងដែរ៕
