ប្រជាពលរដ្ឋនៅក្នុងភូមិ Gumatapura សប្បាយរីករាយជាខ្លាំងក្នុងការចូលរួមពិធីបុណ្យគប់លាមកគោ Gorehabba ជាព្រឹត្តិការណ៍បញ្ចប់រដូវបុណ្យ Diwali ដែលជាបុណ្យដ៏សំខាន់បំផុតមួយរបស់សាសនាហិណ្ឌូ។
ពិធីបុណ្យ Gorehabba ចាប់ផ្ដើមដោយការប្រមូល «អាវុធ» ជាលាមកគោ ពីគ្រួសារទាំងឡាយដែលចិញ្ចឹមសត្វនេះ។ លាមកគោដែលប្រមូលបាន ត្រូវបាននាំយកទៅកាន់វិហារក្នុងតំបន់ដើម្បីឱ្យក្រុមបព្វជិតប្រសិទ្ធពរ។
បន្ទាប់ពីពិធីប្រសិទ្ធីនេះ លាមកគោក៏ត្រូវបានគេចាក់គរលើដី ហើយបុរសទាំងឡាយក្នុងភូមិនឹងនាំគ្នាចូលទៅកាន់គំនរលាមកគោដើម្បីត្រៀមសម្រាប់ពិធីគប់លាមក។
ពលរដ្ឋឥណ្ឌា រាប់រយនាក់នាំគ្នាមកកាន់ភូមិ Gumatapura ដើម្បីចូលរួមពិធីបុណ្យគប់លាមកគោ ដោយយល់ថា នេះមិនត្រឹមតែជារឿងអស្ចារ្យ ប៉ុន្តែក៏នាំមកនូវផលប្រយោជន៍ផ្នែកសុខភាព។
https://www.youtube.com/watch?v=FfGSE1Cb2Mk
«បើសិនជាមានជំងឺ យើងនឹងត្រូវបានព្យាបាលជាសះស្បើយ» Mahesh ជាពលរដ្ឋម្នាក់ដែលបានចូលរួមពិធីគប់លាមកគោ ឱ្យដឹងដូច្នេះ។
ប្រជាជនឥណ្ឌា មួយចំនួនដែលកាន់សាសនាហិណ្ឌូ មានជំនឿថា សត្វគោ និងគ្រប់យ៉ាងរបស់សត្វនេះសុទ្ធតែជាវត្ថុស័ក្ដិសិទ្ធិ និងមានប្រសិទ្ធភាពក្នុងការជម្រះភាពអាក្រក់ សៅហ្មង។
នាយករដ្ឋមន្ត្រីឥណ្ឌា លោក Narendra Modi ដែលជាហិណ្ឌូសាសនិកមួយរូបដែរនោះ បានជំរុញឱ្យមានការការពារសត្វមួយប្រភេទនេះ។ រដ្ឋជាច្រើនរបស់ ឥណ្ឌា តាំងពីយូរមកហើយ បានហាមការសម្លាប់សត្វគោដើម្បីយកសាច់។
សមាជិកជាច្រើនរូបនៅក្នុងបក្សរបស់នាយករដ្ឋមន្ត្រី Modi ក៏ធ្លាប់បានអះអាងថា ទឹកនោមគោគឺជាឱសថដែលអាចទប់ស្កាត់ និងព្យាបាលជំងឺ COVID-19 រួមនឹងជំងឺផ្សេងៗទៀត។ ចំណែករដ្ឋាភិបាលរបស់លោក ក៏កំពុងស្វែងរកវិធីដើម្បីលើកទឹកចិត្តឱ្យមានការផលិតថ្នាំដុសធ្មេញ សាប៊ូកក់សក់ និងថ្នាំសម្លាប់មូសពីកាកសំណល់របស់សត្វគោទៀតផង៕