ស្បែករបស់យើង ក្រោយពីត្រូវបានបំផ្លាញដោយពន្លឺព្រះអាទិត្យ និងធាតុអាកាសមិនល្អជុំវិញខ្លួនហើយនោះ វានឹងហុចផលធ្វើឱ្យកើតមានសារធាតុរ៉ាឌីកាល់សេរី ដែលពិតប្រាកដណាស់ថា វាគឺជាបច្ច័យអាក្រក់មួយ ដែលធ្វើឱ្យស្បែករបស់នារីៗយើង កើតមានស្នាមជ្រីវជ្រួញមុនអាយុបាន។ ដូច្នេះថ្ងៃនេះ យើងមានចំណីអាហារល្អៗដែលជួយព្យាបាល និងប្រឆាំងនឹងការកើតស្លាកស្នាម មិនឱ្យឆាប់ចាស់មុនអាយុ មកជម្រាបជូននារីៗយើងទាំងអស់ដូចខាងក្រោម ៖
-ផ្លែល្ហុងទុំ
នៅក្នុងសាច់ល្ហុងទុំ មានសារធាតុ ឃែរ៉ូធីន វិតាមីនC និងសារធាតុរ៉ែ ដែលចាំបាច់ចំពោះអង់ហ្ស៊ីម របស់រាងកាយមនុស្សយើង។ សាច់ល្ហុង ជួយក្នុងរឿងនៃការផ្លាស់ប្តូរកោសិកាស្បែក និងផ្តល់នូវសំណើម នៅពេលបានទទួលទាន ឬប្រើប្រាស់ធ្វើជាគ្រឿងថែបំប៉នស្បែកជាប់ជាប្រចាំហើយនោះ វាអាចជួយប្រឆាំងនឹងការកើតស្នាមជ្រីវជ្រួញ និងចាស់មុនអាយុបាន ហើយផ្លែល្ហុងទុំនៅបានជួយធ្វើឱ្យស្បែករបស់យើងទន់ ភ្លឺថ្លា និងល្អចំពោះសុខភាពទៀតផង។
-ផ្លែប៊័រ ឬផ្លែអាវ៉ូកាដូ
ផ្លែប៊័រ គឺជាប្រភពរួមនៃសារធាតុអាហារ ដែលផ្ទុកទៅដោយ វិតាមីន A , B , D និង E ហើយខ្លាំងជាងនោះទៅទៀត ផ្លែប៊័រនៅមាន ប៉ូតាស្យូមច្រើនជាងផ្លែចេក និងមានសារធាតុខ្លាញ់ ដែលល្អសម្រាប់សុខភាពទៀតផង។ យើងតែងសង្កេតឃើញថា បច្ចុប្បន្ននេះ ផ្លែប៊័រភាគច្រើនត្រូវបានគេយកមកកែច្នៃធ្វើជាឃ្រីមថែបំប៉នស្បែក ព្រោះវាជួយកាត់បន្ថយស្នាមជ្រីវជ្រួញ និងជួយរក្សាព្យាបាលស្នាមជាំ និងស្នាមអុចខ្មៅបានទៀតផង។
-ទឹកឃ្មុំ
ទឹកឃ្មុំជួយស្តារ និងថែទាំសភាពស្បែកឱ្យស្អាត និងមានសំណើម ព្រមទាំងមានសារធាតុប្រឆាំងរ៉ាឌីកាល់សេរី នៅក្នុងនោះស្រាប់ទៀតផង។ គុណសម្បត្តិរបស់ទឹកឃ្មុំ អាចការពារមេរោគបាក់តេរីដែលធ្វើឱ្យកើតមុនបាន ជាការព្យាបាលមុន បែបងាយៗ ដែលនារីៗទាំងឡាយអាចធ្វើដោយខ្លួនឯងបាននៅផ្ទះ។
អាហារទាំងអស់ខាងលើនេះ អាចរកបានដោយងាយ និងនៅក្បែរៗខ្លួនយើងហ្នឹងឯង មែនទេ? ហើយអ្វីដែលសំខាន់នោះគឺ តម្លៃវាមិនថ្លៃទៀតផង។ សូមសាកល្បងជ្រើសរើសទិញ មកទទួលទានម្តងមើល៍ ព្រោះវាសុទ្ធតែជាចំណីអាហារដែលល្អសម្រាប់ស្បែករបស់នារីៗយើងទាំងអស់៕
