ជម្លោះរវាង Miss Grand Cambodia (MGC) និង Miss Grand International (MGI) បានធ្វើឱ្យមានភាពចម្រូងចម្រាសយ៉ាងខ្លាំង ជាពិសេសបន្ទាប់ពី MGI បានលុបចោលតួនាទីជាសហម្ចាស់ផ្ទះសម្រាប់កម្មវិធីប្រកួត Miss Grand International 2024 ដែលដើមឡើយគ្រោងនឹងធ្វើឡើងនៅក្នុងប្រទេសកម្ពុជា និងបន្តទៅប្រទេសថៃ។ MGI បានលើកឡើងពីការព្រួយបារម្ភអំពីសមត្ថភាពក្នុងការរៀបចំរបស់កម្ពុជា ដោយលើកឡើងថា ពួកគេមានអារម្មណ៍ថា អ្នករៀបចំរបស់ប្រទេសកម្ពុជាមិនបំពេញតាមស្តង់ដារចាំបាច់សម្រាប់ការធ្វើជាម្ចាស់ផ្ទះ រួមទាំងបញ្ហានៃការទទួលភ្ញៀវ ការគ្រប់គ្រងមិនបានល្អនៅអាកាសយានដ្ឋាន និងដំណើរកម្សាន្ត Gala Dinner ដែលមិនមានការរៀបចំឱ្យបានល្អ និងគ្រប់ជ្រុងជ្រោយទៅតាមស្តង់ដារដែលខ្លួនចង់បាន ជាពិសេសជុំវិញការទទួលទានអាហារពេលល្ងាចនៅលើទូកក្នុងទីក្រុងភ្នំពេញ ដែលធ្វើឱ្យប្រធាន MGI លោក Nawat Itsaragrisil រិះគន់ដល់ការរៀបចំរបស់ប្រទេសកម្ពុជា ដោយអះអាងថាមិនមានស្តង់ដារ និងការព្រួយបារម្ភអំពីសុវត្ថិភាព។ ជាលទ្ធផល MGI បានសម្រេចចិត្តផ្លាស់ប្តូរសកម្មភាពទាំងអស់ទៅប្រទេសថៃជំនួសវិញ។
ជាការឆ្លើយតប លោកស្រី អ៊ឹម សុគន្ធា នាយិកានៃ Miss Grand Cambodia បានរិះគន់ជាសាធារណៈចំពោះការសម្រេចចិត្តរបស់ MGI ហើយបានប្រកាសថា MGC នឹងដកបេក្ខនារីរបស់កម្ពុជា គឺកញ្ញា ប៊ី សុធារី ចេញពីការប្រកួត Miss Grand International 2024។ ការសម្រេចចិត្តបែបនេះ ដោយសារលោកស្រី អ៊ឹម សុគន្ធា និងអ្នករៀបចំកម្មវិធីរបស់ប្រទេសកម្ពុជាមិនពេញចិត្តនឹងទង្វើរបស់លោក Nawat Itsaragrisil ដែលជាប្រធាន MGI ដែលមានភាពអយុត្តិធម៌ និងការខ្វះការគោរពចំពោះប្រទេសកម្ពុជាយើង។ លោកស្រីក៏បានបញ្ជាក់ប្រាប់អ្នកសារព័ត៌មាន ឡារ៉ែន មេឌា ផងដែរថា “ខ្ញុំសូមប្រកាសថាខ្ញុំឈប់រៀបចំកម្មវិធី Miss Grand International តទៅទៀតហើយ ទោះជាខ្ញុំនៅមានកុងត្រាទទួលបានសិទ្ធិពេញលេញក្នុងការរៀបចំកម្មវិធីនេះនៅក្នុងឆ្នាំ2025ក៏ដោយ ដូច្នេះនៅក្នុងឆ្នាំ2025នេះ ខ្ញុំនឹងមិនរៀបចំកម្មវិធីនេះ ឬបញ្ជូនបេក្ខភាពរបស់យើងទៅចូលរួមនោះទេ តែបន្ទាប់ពីឆ្នាំ2026ទៅបើមានខាងក្រុមហ៊ុន ឬស្ថាប័នណាមួយនៅក្នុងប្រទេសកម្ពុជាយើងគេចង់ទិញសិទ្ធិរៀបចំកម្មវិធីនេះ ក៏តាមតែខាងគេទៅ និងទៅតាមការសម្រេចចិត្តរបស់ក្រសួងដែលពាក់ព័ន្ធ ព្រមទាំងប្រជាជនកម្ពុជាយើងជាអ្នកសម្រេចចិត្តចុះ តែសម្រាប់រូបខ្ញុំ និងស្ថាប័នរបស់ខ្ញុំគឺនឹងមិនចូលរួមកម្មវិធីនេះតទៅទៀតទេ។ កម្ពុជាយើងមានសមត្ថភាពក្នុងការបង្កើតកម្មវិធីប្រកួតលំដាប់អន្តរជាតិដោយខ្លួនឯង ដោយមិនចាំបាច់ពឹងលើកម្មវិធីរបស់អ្នកដែលមិនឱ្យតម្លៃយើងនោះទេ”។
ដោយឡែកចំពោះអ្នកលេងបណ្តាញអ៊ីនធឺណិត និងអ្នកគាំទ្រកម្មវិធី Miss Grand International នៅប្រទេសកម្ពុជារាប់ពាន់នាក់បានសម្ដែងការខកចិត្ត និងផ្ទុះកំហឹងជាខ្លាំងតាមរយៈបណ្តាញអ៊ីនធឺណិត ដោយគាំទ្រ និងអំពាវនាវឱ្យនាយិកានៃ Miss Grand Cambodia 2024 បញ្ឈប់ការចូលរួម ក៏ដូចជាបញ្ជូន កញ្ញា ប៊ី សុធារី ឱ្យទៅចូលរួមការប្រកួត Miss Grand International 2024 នៅប្រទេសថៃនោះទេ ព្រោះថៃមើលងាយ និងមិនឱ្យតម្លៃ Miss Grand កម្ពុជាយើង ក្រុមការងាររបស់កម្ពុជា និងនាយិកានៃ Miss Grand Cambodia ហើយពួកគេក៏បន្តសំណូមពរឱ្យប្រជាជនកម្ពុជាយើងទាំងអស់បញ្ឈប់ការគាំទ្រដល់កម្មវិធីប្រកួត Miss Grand International រួមទាំងបញ្ឈប់ការបញ្ជូន Miss Grand របស់ប្រទេសកម្ពុជាយើងទៅចូលរួមប្រកួតគ្រប់ការប្រកួតរបស់ MGI តទៅទៀត ហើយមានអ្នកខ្លះថែមទាំងបានComment ថា “Buy Buy MGI!… Buy MGI Forever” ថែមទៀតផង។
ដើម្បីឆ្លើយតបទៅនឹងជម្លោះពាក់ព័ន្ធនឹងព្រឹត្តិការណ៍ Miss Grand International (MGI) 2024 នៅកម្ពុជា ក្រសួងទេសចរណ៍កម្ពុជា បានចេញសេចក្តីថ្លែងការណ៍ផ្លូវការមួយ ដោយរដ្ឋមន្ត្រីក្រសួងទេសចរណ៍ ឯកឧត្តម ហួត ហាក់ បានបញ្ជាក់យ៉ាងច្បាស់ថា ឯកឧត្តមមិនដែលសន្យាថានឹងចូលរួមសន្និសីទសារព័ត៌មាន ឬព្រឹត្តិការណ៍បន្ថែមលើសពីកិច្ចប្រជុំជាក់លាក់ជាមួយតំណាង និងបេក្ខនារីរបស់ MGI នៅថ្ងៃទី៦ ខែតុលានោះទេ។ ឯកឧត្តម ហួត ហាក់ បានបញ្ជាក់បន្ថែមទៀតថា ការធ្វើជាម្ចាស់ផ្ទះរៀបចំកម្មវិធីប្រកួត Miss Grand International 2024 នេះគឺក្នុងគោលបំណងបង្ហាញពីសក្តានុពលវប្បធម៌ និងទេសចរណ៍របស់កម្ពុជាជាសាកល ដែលជាគោលដៅដែលនៅតែមិនផ្លាស់ប្តូរ ទោះបីជាមានភាពចម្រូងចម្រាសគ្នាក៏ដោយ។
ក្នុងនោះដែរ ក្លឹបអ្នកកាសែតកម្ពុជា និងសមាគមអ្នកកាសែតថៃ ក៏បានជំរុញឱ្យអ្នកសារព័ត៌មាន និងអ្នកប្រើប្រាស់ប្រព័ន្ធផ្សព្វផ្សាយសង្គម សូមធ្វើការដោះស្រាយរឿងនេះឱ្យបានហ្មត់ចត់ ដើម្បីបញ្ចៀសភាពតានតឹងរវាងប្រទេសកម្ពុជា និងប្រទេសថៃ និងបញ្ឈប់នូវវិវាទរបស់ពួកគេឱ្យបានឆាប់រហ័សបំផុតតាមដែលអាចធ្វើទៅបាន ព្រោះបញ្ហាជម្លោះនេះគឺជាជម្លោះរវាងស្ថាប័ន MGC និងស្ថាប័ន MGI ប៉ុណ្ណោះ មិនមែនជាជម្លោះរវាងប្រទេសកម្ពុជា និងប្រទេសថៃនោះទេ៕
