កងកម្លាំងល្បាតសមុទ្រអាម៉េរិក បានឱ្យដឹងថា បណ្ដាបំណែកដែលពួកគេប្រមូលបានបង្ហាញថា នាវាមុជទឹក Titan ត្រូវរងសម្ពាធខ្លាំងរហូតដល់បែកខ្ទេច ធ្វើឱ្យមនុស្សប្រាំនាក់ក្នុងនាវានេះបាត់បង់ជីវិត។
ក្នុងសន្និសីទសារព័ត៌មាននៅទីក្រុង Boston រដ្ឋ Massachusetts កាលពីវេលាទៀបភ្លឺថ្ងៃទី 23 មិថុនា (ម៉ោងនៅកម្ពុជា) ឧត្ដមនាវី John Mauger របស់កងកម្លាំងល្បាតឆ្នេរអាម៉េរិក និយាយថា ឧបករណ៍ផ្លាស់ទីស្វ័យប្រវត្តក្រោមសមុទ្ររបស់កាណាដា បានរកឃើញបំណែកពីនាវាមុជទឹក Titan ដែលស្ថិតនៅចម្ងាយប្រហែល 488 ម៉ែត្រ ពីសាកសពកប៉ាល់ Titanic ក្នុងជម្រៅ 4,000 ម៉ែត្រ នៅមហាសមុទ្រអាត្លង់ទិកខាងជើង។
យោងតាមក្រុមជំនាញ បំណែកសំខាន់ចំនួនប្រាំរបស់នាវាមុជទឹកប្រវែង 6.7 ម៉ែត្រ ត្រូវបានរកឃើញនៅក្នុងចំណោមបំណែកមួយក្រុមដែលនៅសល់បន្ទាប់ពីនាវាបានបែកបាក់។ «បំណែកទាំងនេះបង្ហាញថា មានហេតុការណ៍រងសម្ពាធដ៏ខ្លាំងក្លាកើតឡើងនៅក្នុងកាប៊ីនប្រឆាំងសម្ពាធ» លោក Mauger ឱ្យដឹងដូច្នេះ។
ចំណែក OceanGate ដែលជាក្រុមហ៊ុនគ្រប់គ្រងនាវាមុជទឹក Titan ក៏ប្រកាសថា ពុំមានអ្នកណាម្នាក់នៅមានជីវិតឡើយ ក្នុងនោះក៏មានស្ថាបនិក និងជានាយកប្រតិបត្តិរបស់ OeanGate លោក Stockton Rush ផងដែរ។
នាវាមុជទឹក Titan បានបាត់ខ្លួនកាលពីថ្ងៃទី 18 មិថុនា ពេលកំពុងដឹកមនុស្ស 5 នាក់ ធ្វើដំណើរចុះទៅមើលសាកសពកប៉ាល់ Titanic ក្រោមបាតមហាសមុទ្រអាត្លង់ទិក ជម្រៅជិត 4,000 ម៉ែត្រ និងមានចម្ងាយពី Newfoundland របស់កាណាដា ប្រហែល 600 គីឡូម៉ែត្រ។
