ហ្វូងកូដករដែលបានហែក្បួននៅ ទីក្រុងប៉ារីស ប្រទេសបារាំង បានប្រែទៅជាខឹងខ្លាំង និងប៉ះទង្គិចគ្នានឹងក្រុមប៉ូលិស នាំឱ្យមានការចាប់ខ្លួន នៅពេលពួកគេគាំទ្រការអំពាវនាវឱ្យមានកូដកម្មនៅទូទាំងប្រទេសដើម្បីទាមទារដំឡើងប្រាក់ខែ។
ក្រសួងមហាផ្ទៃបារាំង បានឱ្យដឹងថា មនុស្សប្រមាណជាង ១ សែននាក់នៅទូទាំងប្រទេស បាននាំគ្នាចេញដើរតាមដងផ្លូវដើម្បីធ្វើបាតុកម្មកាលពីម្សិលមិញ ក្នុងនោះមាន ១៣,០០០ នាក់ ហែក្បួននៅ បារីស។
បាតុករមួយចំនួន បានដុតផៅបញ្ចេញពន្លឺនៅពេលហែក្បួនតាមដងផ្លូវនៅ ប៉ារីស។ ក្រុមបាតុករស្នើឱ្យបណ្ដាក្រុមហ៊ុនដំឡើងប្រាក់ខែដល់កម្មករ ដើម្បីទប់ទល់នឹងទំនិញឡើងថ្លៃ។
ក្រុមមន្ត្រីបារាំង បានឱ្យដឹងថា បាតុករមួយចំនួនដែលខឹងខ្លាំង បានប្រើប្រាស់អំពើប្រឆាំងនឹងសមត្ថកិច្ច និងដាក់ពង្រាយធុងសំរាម និងរបស់របរផ្សេងទៀតនៅលើដងផ្លូវដើម្បីរារាំងសកម្មភាពបង្ក្រាបរបស់ក្រុមប៉ូលិស ក្នុងនោះមានអ្នកខ្លះថែមទាំងគប់ដបទៅលើកម្លាំងសន្តិសុខផងដែរ។
ក្រសួងមហាផ្ទៃបារាំង បង្ហើបឱ្យដឹងថា មនុស្សចំនួន ១១ នាក់ត្រូវបានចាប់ខ្លួននៅ ប៉ារីស និង ៤ នាក់ត្រូវបានចាប់ខ្លួននៅកន្លែងផ្សេងៗដែលមានការប៉ះទង្គិចជាមួយប៉ូលិស។ ប៉ូលិស ៩ នាក់បានរងរបួសក្នុងពេលទប់ទល់នឹងហ្វូងបាតុករ។
ចលនាកូដកម្មនៅ ប្រទេសបារាំង ត្រូវបានគេយល់ថាជាឧបសគ្គធំបំផុតសម្រាប់ ប្រធានាធិបតី អេម៉ានុយអែល ម៉ាក្រុង (Emmanuel Macron) រាប់ចាប់តាំងពីលោកបានជាប់ឆ្នោតជាថ្មីកាលពីខែឧសភា ក្នុងគ្រាដែល អឺរ៉ុប កំពុងប្រឈមមុខនឹងការលំបាក ព្រោះតែវិបត្តិថាមពល។
ការស្ទង់មតិមួយនៅលើទូរទស្សន៍បារាំង BFM TV បានបង្ហាញថា មានសាធារណមតិប្រហែលតែ ៣៩% ប៉ុណ្ណោះដែលគាំទ្រកូដកម្មទូទាំងប្រទេសនាថ្ងៃទី ១៨ តុលា ក្នុងពេលដែល ៤៩% បានជំទាស់។
អតិផរណានៅ បារាំង បានឡើងលើសពី ៦% ធ្វើឱ្យទំនិញសំខាន់ៗដូចជាសាច់ និងមីបំពង់ជាដើមឡើងថ្លៃខ្ពស់។ សភាបារាំង បានអនុម័តកញ្ចប់ថវិកាដើម្បីកាត់បន្ថយកំណើនអតិផរណានៅក្នុងរដូវក្ដៅ ប៉ុន្តែមិនអាចប៉ះប៉ូវបានទាំងស្រុងនូវការចំណាយទៅលើថាមពលដែលបានកើនឡើងខ្ពស់ដោយសារសង្គ្រាមរវាង រុស្ស៊ី និង អ៊ុយក្រែន៕
