ព្រះអង្គម្ចាស់ al-Shaalan ព្រមានបស្ចិមលោកកុំឱ្យគំរាមកំហែងដល់ អារ៉ាប៊ីសាអូឌីត ដោយសង្កត់ធ្ងន់ថា ប្រទេសមជ្ឈិមបូព៌ាមួយនេះគឺជាទឹកដីរបស់អ្នកដើរតាម «Jihad និងស្លាប់ដើម្បីសាសនា»។
«ផ្ញើទៅកាន់លោកខាងលិច អ្នកណាក៏ដោយឱ្យតែប្រឆាំងនឹងការរស់រានរបស់រាជាណាចក្រ ចូរចាំថា យើងខ្ញុំគឺជាអ្នកដើរតាម Jihad និងស្លាប់ដើម្បីសាសនា» រាជបុត្រារបស់ អារ៉ាប៊ីសាអីឌីត Saud al-Shaalan កាលពីថ្ងៃទី ១៧ តុលា ប្រកាសដូច្នេះ។ «នោះគឺជាសារដែលខ្ញុំផ្ញើទៅកាន់អ្នកទាំងឡាយដែលគិតថា ពួកគេអាចគំរាមកំហែងយើងខ្ញុំ»។
ប្រភពព័ត៌មានមួយពី អារ៉ាប៊ីសាអូឌីត បានឱ្យដឹងថា ព្រះអង្គម្ចាស់ al-Shaalan មិនមែនជាតំណាងរបស់រដ្ឋាភិបាលប្រទេសនេះ។ ប្រភពព័ត៌មានបាននិយាយថា រដ្ឋាភិបាលអារ៉ាប៊ីសាអូឌីត អាចប្រកាសច្រានចោលសម្ដីរបស់ព្រះអង្គម្ចាស់ al-Shaalan។
ព្រះអង្គម្ចាស់ al-Shaalan បានរៀបអភិសេកជាមួយចៅស្រីរបស់ អតីតមហាក្សត្រ Abdulaziz Al Saud ដែលជាអ្នកបង្កើត អារ៉ាប៊ីសាអូឌីត កាលពីឆ្នាំ ១៩៣២។
សាររបស់ ព្រះអង្គម្ចាស់ al-Shaalan ត្រូវបានលើកឡើងក្នុងគ្រាដែលភាពតានតឹងមិនធ្លាប់មានរវាង សហរដ្ឋអាម៉េរិក និង អារាប៊ីសាអូឌីត បានកើតឡើង ក្រោយពីប្រទេសនៅមជ្ឈិមបូព៌ាមួយនេះនាំមុខ OPEC+ ក្នុងការសម្រេចចិត្តកាត់បន្ថយបរិមាណប្រេង បើទោះជា សហរដ្ឋអាម៉េរិក ស្នើសុំឱ្យបង្កើនការផលិត និងការនាំចេញ ទាក់ទិននឹងតម្លៃប្រេងឆៅនៅលើពិភពលោក៕