សម្ដេចសង្ឃរ៉ូម៉ាំងកាតូលិកប៉ាប Francis យល់ថា តម្រូវការស្ដីពីការកែទម្រង់អង្គការសហប្រជាជាតិ «បានក្លាយជារឿងច្បាស់លាស់ណាស់ទៅហើយ» ក្រោយពីជំងឺរាតត្បាតសកលកូវីដ-១៩ និង សង្គ្រាមរវាង រុស្ស៊ី និង អ៊ុយក្រែន។
នៅក្នុងសៀវភៅមួយក្បាលដែលជិតត្រូវបានផ្សព្វផ្សាយ សម្ដេចប៉ាប Francis ឱ្យដឹងថា យុទ្ធនាការយោធាដែល រុស្ស៊ី បានធ្វើឡើងនៅ អ៊ុយក្រែន កាលពីខែកុម្ភៈ បានសង្កត់ធ្ងន់ទៅលើសារសំខាន់នៃការធានានូវយន្តការពហុភាគីនាបច្ចុប្បន្ន ពិសេសគឺ ក្រុមប្រឹក្សាសន្តិសុខនៃអង្គការសហប្រជាជាតិ ក្នុងការស្វែងរកឱ្យឃើញនូវវិធីក្នុងរយៈពេលខ្លី និងមានប្រសិទ្ធភាពដើម្បីដោះស្រាយការខ្វែងគំនិតគ្នា។
«ក្នុងជម្លោះ ត្រូវតែបញ្ជាក់ថា យើងត្រូវការលទ្ធិពហុភាគីជាងមុន ក៏ដូចជាលទ្ធិពហុភាគីដែលមានប្រសិទ្ធភាពជាងមុន ប៉ុន្តែ អង្គការសហប្រជាជាតិ លែងសមស្របជាមួយនឹង «ការពិតថ្មីនេះទៀតហើយ»» សម្ដេចប៉ាប Francis អះអាងដូច្នេះ។
យោងតាមសម្ដេចប៉ាប Francis អង្គការសហប្រជាជាតិ ត្រូវបានបង្កើតឡើងដើម្បីទប់ស្កាត់មហន្តរាយដែលដូចទៅនឹងសង្គ្រាមលោកលើកទីពីរ។ ក៏ប៉ុន្តែ បើទោះជាការគំរាមកំហែងពីជម្លោះនេះនៅតែមាន «ពិភពលោកបានប្រែប្រួលខុសពីមុនទៅហើយ»។
«សារសំខាន់នៃកំណែទម្រង់នេះកាន់តែបង្ហាញច្បាស់ក្រោយពីជំងឺរាតត្បាតសកល» នៅពេលប្រព័ន្ធពហុភាគីបច្ចុប្បន្ន «បានបង្ហាញអំពីកម្សោយទាំងស្រុងរបស់វា» សម្ដេចប៉ាប Francis សង្កត់ធ្ងន់ដូច្នេះ។
សម្ដេចសង្ឃក៏បានរិះគន់ចំពោះការបែងចែកវ៉ាក់សាំងមិនបានស្មើភាពគ្នា «ដែលនេះបានបង្ហាញយ៉ាងច្បាស់»ថា អ្នកខ្លាំងមានប្រៀបជាង ធៀបនឹងសាមគ្គីភាព។
សម្ដេចប៉ាប អំពាវនាវឱ្យមានការកែទម្រង់នេះគឺដើម្បីអនុញ្ញាតឱ្យបណ្ដាអង្គការអន្តរជាតិ កំណត់ឡើងវិញនូវគោលដៅសំខាន់របស់ពួកគេគឺ «ការបម្រើមនុស្សជាតិ» ដោយបញ្ជាក់ថា ស្ថាប័នអន្តរជាតិនានា ត្រូវតែជាលទ្ធផលនៃ «ការយល់ព្រមទូលំទូលាយបំផុត តាមដែលអាចធ្វើទៅបាន»។
សៀវភៅថ្មីរបស់សម្ដេចប៉ាប Francis ដែលមានចំណងជើងថា «ខ្ញុំក្នុងនាមជាព្រះ សូមអំពាវនាវដល់អ្នក៖ ការបួសសួងដប់ប្រការសម្រាប់អនាគតដែលពេញដោយក្ដីសង្ឃឹម» នឹងត្រូវបានចេញផ្សាយនៅ ប្រទេសអ៊ីតាលី ចាប់ពីថ្ងៃទី ១៨ តុលាខាងមុខ៕