ករណីគ្រោះថ្នាក់ចរាចរណ៍ដ៏រន្ធត់មួយបានកើតឡើងនៅ ប្រទេសកុងហ្គោ បណ្ដាលឱ្យមនុស្ស ៣៤ នាក់ ក្នុងនោះមានក្មេង ១៦ នាក់បាត់បង់ជីវិត។
កាលពីថ្ងៃទី ២៨ កញ្ញា អាជ្ញាធរក្នុងស្រុកបានបញ្ជាក់ថា មនុស្ស ៣៤ នាក់ក្នុងនោះមានក្មេងចំនួន ១៦ នាក់ បានស្លាប់នៅក្នុងករណីគ្រោះថ្នាក់ចរាចរណ៍ធ្ងន់ធ្ងរមួយនៅតំបន់ភាគនិរតីរបស់ សាធារណរដ្ឋកុងហ្គោ។
យោងតាមព័ត៌មាននៅ អាហ្វ្រិក លោកស្រី Clementine Lupanda ដែលជាអភិបាលតំបន់ Lubudi ក្នុងខេត្ត Lualaba បានឱ្យដឹងថា ករណីគ្រោះថ្នាក់ខាងលើកើតឡើងនៅថ្ងៃទី ២៦ កញ្ញា។
រថយន្តមួយគ្រឿងដែលដឹកទំនិញផង និងដឹកអ្នកដំណើរផង ធ្វើដំណើរពីខេត្ត Kasai-Oriental ឆ្ពោះទៅកាន់ខេត្ត Lualaba ហើយក៏បានក្រឡាប់នៅពេលកំពុងផ្លាស់ទីលើដងផ្លូវចោតមួយកន្លែង។
ក្នុងចំណោមជនរងគ្រោះដែលបានស្លាប់ មាន ៩ នាក់ជាបុរស, ៩ នាក់ជាស្ត្រី និង ១៦ នាក់គឺជាក្មេងមិនទាន់គ្រប់អាយុ។ ក្នុងចំណោមមនុស្សជិត ៦០ នាក់ដែលនៅរស់រានមានជីវិត មាន ៣៧ នាក់រងរបួស និងត្រូវបានបញ្ជូនទៅកាន់មន្ទីរពេទ្យ។
មូលហេតុដែលនាំឱ្យកើតមានហេតុកាណ៍ដ៏រន្ធត់នេះត្រូវបានគេជឿថា បណ្ដាលមកពីរថយន្តបើកបរហួសល្បឿនកំណត់នៅពេលឡើងទួល និងអ្នកបើកបរស្ថិតក្នុងស្ថានភាពស្រវឹងស្រា៕
